Liꞈ hpu ve awˬ co˗e htaˇ, heuˆ daꞈ tuˬ jehˬ daꞈ htaˇ chaw haˉ paˍ ve yehˬ kʼa yaˇ miˇ haˉ ve yehˬ kʼa htaꞈ hkehˉ hpfuhˇ gʼa piˇ ve yoˬ. Awˬ hpfuhˇ hkʼaˆ ve awˬ ceuˬ, to nuˇ to shaˆ, maˇ heˆ leh hpu kaꞈ hpehꞈ ve yoˬ. Teˇ pawˆ pawˆ kʼo, hkehˉ caˍ hpfuhˇ piˇ ve lehˬ kanˉ te piˇ kaꞈ gʼa ve yoˬ. Tawˇ pa haˉ te kʼo, Yaˍkoˆ Raˍhkeˍlaˆ htaꞈ gʼa heuˆ tuˬ yawˇ ve awˬ pa htaꞈ kanˉ 7 hkʼawꞈ gʼa te piˇ ve yoˬ. (Awˬ hkuiˉ puiˍ 29:17, 18, 20) Aˬ htoꞈ ma te oˇ htaˇ teˇ co˗e hkehˉ caˍ hpfuhˇ piˇ tuˬ awˬ liˇ awˬ hkʼaˇ cawˬ ve le?

Hkeh˗law Meh˗yunˇ Liꞈ hpu hpawˇ chaˬ nyi paˍ kʼoˆ ve, “yaˇ miˇ haˉ chaw haˉ paˍ ve yehˬ kʼa hkʼaw gʼa chehˇ la ve pa taw, chaw haˉ paˍ ve yehˬ kʼa yaˇ miˇ haˉ ve yehˬ kʼa htaꞈ hkehˉ hpfuhˇ gʼa piˇ ve yoˬ. Maˇ˗awˍ ve kʼo, yaˇ miˇ lehˬ yehˬ kʼa hkʼaw te caˇ te dawˬ ve hpawˇ a yeˇ uiˍ jaˇ ve pa taw yoˬ.” Yawˇ hui ve 2 yehˬ kʼa hkʼa dehꞈ meuˆ daꞈ tuˬ, hkehˉ hpfuhˇ gʼa piˇ ve yoˬ. Teˇ yehˬ kʼa tuꞈ hkanˍ htaˇ, teˇ yehˬ kʼa kaꞈ gʼa ga piˇ ve yoˬ. Chi hkʼoˆ kaꞈ, hkehˉ caˍ hpfuhˇ hpuˇ piˇ ve lehˬ, yaˇ miˇ oˇ ve teˇ gʼaˇ htaꞈ heuˆ daꞈ tuˬ ka tiꞈ te˗oˬ ve yoˬ. Yaˇ miˇ chi ve teˇ gʼaˇ awˬ pa nyi haꞈ shaˉ ve awˬ hawˉ lo maˇ chehˇ˗oˬ leh yawˇ ve awˬ hpawˇ nyi haꞈ shaˉ ve awˬ hawˉ lo gʼa chehˇ ve yoˬ.

Hkehˉ caˍ hpfuhˇ piˇ ve lehˬ, yaˇ miˇ htaꞈ vuiˬ leh hawˇ piˇ ve htaꞈ shuˍ ve tehꞈ kʼoˆ gaˇ ve maˇ heˆ. Oˇ htaˇ teˇ co˗e Iˉsaˍreˍlaˆ chaw—a shaꞈ teꞈ hkʼaˇ leh chaw liˇ vaˇ liˇ hkʼaw kʼoˆ ve, “yaˇ miˇ haˉ ve yehˬ kʼa htaꞈ hkehˉ caˍ hpfuhˇ piˇ ve maˇ heˆ leh awˬ nu ve awˬ ceuˬ piˇ ve lehˬ, Iˉsaˍreˍlaˆ chaw heuˆ daꞈ ve lehˬ mawˇ vuiˬ mawˇ hawˇ ve htaꞈ shuˍ ve yoˬ hehˉ. Awˬ tehˬ kʼo, maˇ heˆ. Hkehˉ caˍ hpfuhˇ piˇ ve lehˬ yaˇ miˇ haˉ ve yehˬ kʼa htaꞈ awˬ meh maˇ gʼa luˬ tuˬ te piˇ ve yoˬ. Yaˇ miˇ haˉ htaꞈ vuiˬ ve maˇ heˆ.”

Chi beuꞈ teˇ co˗e kaꞈ, mvuhˇ miˬ teˇ hpaˍ hpaˍ kʼo, hkehˉ caˍ hpfuhˇ piˇ tuˬ ve awˬ liˇ awˬ hkʼaˇ cawˬ sheˍ ve yoˬ. Shaˉhkiˆhkanˍ ve chaw hpehꞈ ve awˬ pa awˬ e hkehˉ caˍ hpfuhˇ peꞈ laˇ tuˬ kʼoˆ piˇ htaˇ, yawˇ hui “nyi ma daꞈ ve chaw hpehꞈ ve yoˬ tehꞈ chaw hkʼa peu˗eˬ shiˍ hpehꞈ tuˬ” hkehˉ hpfuhˇ chi ma ma peꞈ laˇ tuˬ maˇ kʼoˆ piˇ. Yawˇ hui “hpu htaꞈ sheˉ lai ve chaw” maˇ heˆ leh lawˇ paˆ uiˍ ve chaw hpehꞈ ve tehꞈ shu maˇ gʼa dawˇ tuˬ awˬ pon yoˬ. (Hpiˇliˇpiˆ 4:5; 1 Kawˇrenˍhtuˆ 10:32, 33) Chi hkʼoˆ kaꞈ, yaˇ miˇ haˉ ve awˬ pa awˬ e hkehˉ hpfuhˇ chi ma ma peꞈ laˇ tuˬ maˇ kʼoˆ piˇ ve kʼo, hkehˉ caˍ gʼa leh heuˆ daꞈ gʼa tuˬ yoˬ. Hkehˉ caˍ hpfuhˇ piˇ tuˬ chi ma ma maˇ gʼa ca ve pa taw, yawˇ gʼuˇ suhˍ peuˍ ve caˉ leh kʼawꞈ te kʼai gʼa ve yoˬ.

Mvuhˇ miˬ teˇ hpaˍ hpaˍ kʼo, hkehˉ caˍ tuˬ ve awˬ liˇ awˬ hkʼaˇ cawˬ ve yoˬ. Shaˉhkiˆhkanˍ ve chaw hpehꞈ ve awˬ pa awˬ e lehˬ, awˬ liˇ awˬ hkʼaˇ chi htaꞈ gʼa na yuˬ ve yoˬ. Liꞈ hpu hkʼaw kʼoˆ ve, Hkriꞈ yaˇ hpehꞈ ve chaw lehˬ, “uˉ peunˍ shehˍ hpaˇ teˇ hpaˍ awˬ hawˉ lo hkʼa dehꞈ chehˇ˗oˆ.” Mvuhˇ miˬ uˉ peunˍ ve chi, Gʼuiˬ sha ve awˬ liˇ awˬ hkʼaˇ htaꞈ maˇ yaꞈ ve kʼo, gʼa na yuˬ ve yoˬ.—Roˉmaꞈ 13:1; Tcuh yaˇ 5:29.