1. Mvuhˇ naw ma hkʼoˆ ve hpu shi mawˇ jeˬ htaꞈ Yeˍsuˆ hkʼaˬ hkʼe kʼoˆ ve le?

 Laꞈ shawnˍ leh awˬ hpfuhˇ hkʼaˆ ve awˬ ceuˬ hkʼa peu˗eˬ mawˬ hpehꞈ ve maˇ heˆ. Awˬ tehˬ kʼo, laꞈ shawnˍ leh mawˬ maˇ hpehꞈ ve awˬ ceuˬ lehˬ awˬ hpfuhˇ hkʼaˆ jaˇ. Yeˍsuˆ hkʼaw pui hkʼoˆ lo bon maˍ leh kʼoˆ ve, mvuhˇ naw ma hkʼoˆ ve mawˇ jeˬ leh hpu shi mawˇ jeˬ aꞈ kehˉ awˬ hpfuhˇ hkʼaˆ jaˇ. Yawˇ kʼawꞈ kʼoˆ ve, “nawˬ ve mawˇ jeˬ shaw hpoˆ taˍ ve teˇ kaˬ lo nawˬ ve nyi ma htawˇ oˇ kaˬ lo cawˬ tuˬ yoˬ.” (Maꞈhtehˍ 6:19-21) Hkʼaˬ ve teˇ ceuˬ awˬ hpfuhˇ hkʼaˆ jaˇ tehꞈ ngaˬ hui dawˇ ve kʼo, gʼa tuˬ gʼaˇ hteꞈ ca ve yoˬ. Ngaˬ hui ‘mvuhˇ naw ma hkʼoˆ lo mawˇ jeˬ shaw hpoˆ taˍ loˬ.’ Chi kʼoˆ gaˇ ve lehˬ Gʼuiˬ sha geh daꞈ ve awˬ meh cawˬ tuˬ te ve yoˬ. Yeˍsuˆ kʼoˆ ve, hpu shi mawˇ jeˬ chi ve lehˬ te luˬ maˇ gʼa leh chaw hkʼawˇ kaꞈ hkʼawˇ yuˬ maˇ gʼa.

2. (a) 2 Kawˇrenˍhtuˆ liꞈ 4:17, 18 hkʼaw Pawˇluꞈ kʼoˆ taˍ ve hkʼe, ngaˬ hui aˬ htoꞈ ma htaꞈ a yeˇ yuˬ cawˇ ve le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Tcuh yaˇ Pawˇluꞈ ngaˬ hui htaꞈ kʼoˆ laˇ ve, “maˇ mawˬ hpehꞈ ve awˬ ceuˬ teˇ hpaˍ htaꞈ” a yeˇ te cawˇ ve yoˬ. (2 Kawˇrenˍhtuˆ 4:17, 18 gʼaw sheˍ.) Awˬ hpfuhˇ hkʼaˆ jaˇ ve awˬ ceuˬ maˇ mawˬ hpehꞈ ve lehˬ Gʼuiˬ sha ve miˬ guiˬ awˬ suhˉ hkʼaw ngaˬ hui gʼa tuˬ ve htaꞈ kʼoˆ gaˇ ve yoˬ. Awˬ lawn chi ve hkʼaw awˬ hpfuhˇ hkʼaˆ jaˇ ve, maˇ mawˬ hpehꞈ ve laꞈ shawnˍ 4 ceuˬ kaꞈ chi teˇ hkui ngaˬ hui cawˬ gʼa ve henˇ tuˬ yoˬ. Chi teˇ hpaˍ lehˬ, Gʼuiˬ sha htaꞈ awˬ chawˇ te ve, bon lawˬ ve, daꞈ kehˬ ve Awˬ ha hpu ga laˇ tcuh ve, leh ngaˬ hui Gʼuiˬ sha ve kanˉ te gʼa ve mvuhˇ naw ma hkʼoˆ lo ve ga laˇ tcuh ve yoˬ. Maˇ mawˬ hpehꞈ ve laꞈ shawnˍ chi ve ngaˬ hui awˬ hpfuhˇ shiˍ ve tehꞈ hpeuꞈ maw piˇ gʼa tuˬ kaꞈ henˇ tuˬ yoˬ.

3. Maˇ mawˬ hpehꞈ ve laꞈ shawnˍ awˬ hpfuhˇ hkʼaˆ jaˇ ve aˬ htoꞈ ma le? Leh chaw yaˇ laꞈ shawnˍ chi htaꞈ gʼa tuˬ hkʼaˬ hkʼe hpehꞈ gʼa ve le?

³ Maˇ mawˬ hpehꞈ ve laꞈ shawnˍ awˬ hpfuhˇ hkʼaˆ jaˇ ve lehˬ Yaˬhoˉvaˬ Gʼuiˬ sha htaꞈ awˬ chawˇ gʼa te ve yoˬ. (Chiˇ mvuh ve 25:14) Yaꞈ hkʼaˇ, daꞈ kehˬ jaˇ ve Gʼuiˬ sha maˇ biˇ ve chaw yaˇ htaꞈ awˬ chawˇ te gʼa ve hkʼaˬ hkʼe te hpehꞈ gʼa ve le? “Venˇ baˆ htaꞈ yuˬ baˬ shehˍ hpaˇ” Yeˍsuˆ htaiˍ hkʼawꞈ laˇ ve awˬ hpfuhˇ htaꞈ pa taw, Gʼuiˬ sha ngaˬ hui htaꞈ awˬ chawˇ te gʼa ve yoˬ. (Yoˇhanˬ 1:29) Miˬ guiˬ yaˇ gʼa ponˬ tuˬ Yeˍsuˆ suh htaˇ hkʼa gaˬ ka tiꞈ yeˬ ve Yaˬhoˉvaˬ awˉ lawˉ htaˇ kaꞈ shiˍ˗oˬ ve yoˬ. Yeˍsuˆ maˇ suh sheˍ htaˇ, a shaꞈ teꞈ ve chaw htaꞈ Gʼuiˬ sha awˬ chawˇ te gʼa ve awˬ hkʼaˇ chi htaꞈ pa taw yoˬ.—Roˉmaꞈ 3:25.

4. Yeˍsuˆ maˇ laˬ sheˍ htaˇ, Gʼuiˬ sha ve kanˉ te ve ka tiꞈ yeˬ ve chaw Gʼuiˬ sha htaꞈ awˬ chawˇ hkʼaˬ hkʼe te gʼa ve tawˇ pa haˉ kʼoˆ maˍ laˇ sheˍ.

⁴ Yeˍsuˆ maˇ laˬ sheˍ htaˇ, Gʼuiˬ sha ve kanˉ te ve ka tiꞈ yeˬ ve chaw htaꞈ Gʼuiˬ sha awˬ chawˇ te gʼa ve awˬ lawn htaꞈ teˇ geh nyi sheˍ. Aˍbraˍhanˍ yonˍ hkʼaˇ yonˍ yeˬ jaˇ. Aˍbraˍhanˍ suh peuˬ hkʼawꞈ nawˉ 1,000 hkʼawꞈ gaˬ htaˇ, Yaˬhoˉvaˬ Aˍbraˍhanˍ htaꞈ “ngaˬ ve awˬ chawˇ” tehꞈ kuˬ ve yoˬ. (Iˉsaˍyaˆ 41:8) A shu teˇ gʼaˇ Yaˬhoˉvaˬ htaꞈ awˬ chawˇ te˗oˬ ve kʼo, yawˇ suh˗oˬ ve htawˇ, Yaˬhoˉvaˬ yawˇ htaꞈ awˬ chawˇ tehꞈ shawˍ sheˍ ve yoˬ. Aˍbraˍhanˍ Yaˬhoˉvaˬ ve dawˇ hkʼaˇ hkʼaw a shaꞈ teꞈ chehˇ sheˍ. (Luˉkaꞈ 20:37, 38) Awˬ nu ve teˇ gʼaˇ lehˬ Yawˇbaˆ yoˬ. Mvuhˇ naw ma hkʼoˆ mvuhˇ naw ma tcuh yaˇ hkʼa peu˗eˬ hpawnˬ daꞈ htaˇ, Yaˬhoˉvaˬ Yawˇbaˆ htaꞈ yonˍ gʼa ve hkʼaw kʼoˆ ve yoˬ. Yaˬhoˉvaˬ kʼoˆ ve, “yawˇ ngaˬ htaꞈ oˉ kʼoˍ pui leh, haiˬ ve kanˉ htaꞈ maˇ gʼa te tuˬ shaˍ tiꞈ hkʼa dehꞈ taˍ chehˇ ve chaw hpehꞈ ve yoˬ.” (Yawˇbaˆ 1:6-8) Gʼuiˬ sha htaꞈ oˉ kʼoˍ maˇ pui ve mvuhˇ miˬ hkʼaw Daˍyeˍlaˆ 80 hkʼawꞈ hkʼa gaˬ Gʼuiˬ sha ve kanˉ te˗oˬ htaˇ, Gʼuiˬ sha hkʼaˬ hkʼe dawˇ ve le? Yawˇ a shaꞈ maˇ˗oˬ htaˇ, mvuhˇ naw ma tcuh yaˇ 3 pawˆ htawˆ hkanˍ leh kʼoˆ ve, “Gʼuiˬ sha nawˬ htaꞈ haꞈ jaˇ ve yoˬ.” (Daˍyeˍlaˆ 9:23; 10:11, 19) Yaˬhoˉvaˬ haꞈ ve chaw suh˗oˬ ve htawˇ, kʼawꞈ teꞈ tu la tcuh gaˇ ve tehꞈ ngaˬ hui yonˍ ve yoˬ.—Yawˇbaˆ 14:15.

5. Yaˬhoˉvaˬ htaꞈ awˬ chawˇ te gʼa tuˬ hkʼaˬ hkʼe gʼa te cawˇ ve le?

⁵ Chi teˇ hkui maˇ biˇ ve chaw yaˇ Yaˬhoˉvaˬ geh awˬ chawˇ te ve hkʼaˬ nyiˇ gʼaˇ cawˬ ve le? Laiˉ lanˬ gʼaˇ cawˬ ve yoˬ. Hawˉ hkʼaˆ, yaˇ miˇ, leh yaˇ ehˉ miˬ guiˬ chi hkʼoˆ lo chaw maˇ maˇ Gʼuiˬ sha geh awˬ chawˇ te gaˇ ve tehꞈ yawˇ hui ve a shaꞈ teꞈ hkʼaˇ hpeuꞈ maw laˇ ve pa taw, ngaˬ hui shiˍ gʼa ve yoˬ. Yaˬhoˉvaˬ “hteˇ ve cawˇ ve chaw” htaꞈ awˬ chawˇ hpehꞈ ve yoˬ. (Tawˇ naˉ ve 3:32) Yawˇ hui Yeˍsuˆ htaiˍ hkʼawꞈ laˇ ve awˬ hpfuhˇ htaꞈ yonˍ ve pa taw, Yaˬhoˉvaˬ htaꞈ awˬ chawˇ te gʼa leh, ngaˬ hui kaꞈ Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ ve pa taw awˬ chawˇ te gʼa ve yoˬ. A yeˇ uiˍ ve awˬ hkʼaˇ chi teˇ hpaˍ te peuˬ˗oˬ htaˇ, Hkriꞈ yaˇ laiˉ lanˬ gʼaˇ awˬ to chiˇ aꞈ leh Baˆtiˆsaˬ haꞈ yuˬ˗oˬ ve hkʼaw ngaˬ hui kaꞈ gʼa chehˇ leh mvuhˇ maw ma miˬ naˆ ma hkʼoˆ uiˍ jaˇ ve Yaˬhoˉvaˬ htaꞈ awˬ chawˇ te gʼa ve yoˬ!

6. Yaˬhoˉvaˬ htaꞈ awˬ chawˇ gʼa te ve awˬ hpfuhˇ shiˍ ve tehꞈ ngaˬ hui hkʼaˬ hkʼe te hpeuꞈ maw piˇ gʼa tuˬ le?

⁶ Yaˬhoˉvaˬ htaꞈ awˬ chawˇ gʼa te ve awˬ hpfuhˇ shiˍ ve tehꞈ ngaˬ hui hkʼaˬ hkʼe te hpeuꞈ maw piˇ gʼa tuˬ le? Aˍbraˍhanˍ, Yawˇbaˆ, ka tiꞈ yeˬ ve 100 hkʼawꞈ hpaˆ˗oˬ ve hkʼe, ngaˬ hui Yaˬhoˉvaˬ ve kanˉ hkʼaˬ hkʼe maw te˗oˬ ve htawˇ, caˉ leh ka tiꞈ gʼa yeˬ cawˇ ve yoˬ. Chi hkʼoˆ kaꞈ, Gʼuiˬ sha htaꞈ awˬ chawˇ te ve lehˬ ngaˬ hui a shaꞈ teꞈ ve aꞈ kehˉ awˬ hpfuhˇ hkʼaˆ jaˇ ve tehꞈ Daˍyeˍlaˆ hkʼa shuˍ ngaˬ hui gʼa dawˇ ve yoˬ. (Daˍyeˍlaˆ 6:7, 10, 16, 22) Yaˬhoˉvaˬ ga laˇ ve pa taw, ngaˬ hui beˬ ve lawˇ ve leh shoꞈ shaꞈ ve htaꞈ yeunˇ hkanˍ gʼaˇ ve yoˬ. Chi ngaˬ hui yawˇ geh co co taiˍ taiˍ awˬ chawˇ te gʼa tuˬ ga laˇ ve yoˬ.—Hpiˇliˇpiˆ 4:13.

7. (a) Tawˇ naˉ ve liꞈ 15:8 hkʼaw kʼoˆ taˍ ve hkʼe, ngaˬ hui ve bon lawˬ hkawˇ htaꞈ Yaˬhoˉvaˬ hkʼaˬ hkʼe dawˇ ve le? (b) Yaˬhoˉvaˬ ngaˬ hui ve bon lawˬ hkawˇ htaꞈ hkʼaˬ hkʼe hkʼawꞈ laˇ ve le?

⁷ Maˇ mawˬ hpehꞈ ve laꞈ shawnˍ teˇ ceuˬ lehˬ bon lawˬ ve yoˬ. Ngaˬ hui ve te hkʼaˇ dawˇ hkʼaˇ awˬ chawˇ  htaꞈ kʼoˆ piˇ gaˇ ve yoˬ. Ngaˬ hui Yaˬhoˉvaˬ htaꞈ awˬ chawˇ te ve kʼo, chi hkʼe leˇ te hpehꞈ˗aw laˇ? Hpehꞈ ve yoˬ. Yaˬhoˉvaˬ ve te hkʼaˇ dawˇ hkʼaˇ ngaˬ hui shiˍ tuˬ Liꞈ hpu hkʼaw kʼoˆ maˍ laˇ taˍ ve yoˬ. Ngaˬ hui bon lawˬ htaˇ, nyi ma hkʼaw cawˬ ve awˬ ceuˬ Yaˬhoˉvaˬ htaꞈ kʼoˆ piˇ gʼa ve yoˬ. Yaˬhoˉvaˬ ngaˬ hui ve bon lawˬ hkawˇ na gaˇ ve yoˬ. (Tawˇ naˉ ve 15:8 gʼaw sheˍ.) Yaˬhoˉvaˬ ngaˬ hui htaꞈ haꞈ ve awˬ chawˇ hpehꞈ ve yoˬ. Yawˇ ngaˬ hui ve bon lawˬ hkawˇ htaꞈ ceh na ve maˇ heˆ. Hkʼawꞈ laˇ ve yoˬ. Teˇ pawˆ pawˆ kʼo, bon lawˬ ve laꞈ haˆ hkʼawꞈ laˇ ve yoˬ. Teˇ pawˆ pawˆ kʼo, laiˉ pawˆ gʼa lawˬ ve yoˬ. Yaꞈ hkʼaˇ, keunˍ daꞈ cawˇ daꞈ ve awˬ yanˇ awˬ hkʼaw lo hkʼawꞈ laˇ tuˬ tehꞈ ngaˬ hui yonˍ gʼa ve yoˬ. Yaˬhoˉvaˬ hkʼawꞈ laˇ ve lehˬ ngaˬ hui dawˇ taˍ ve hkʼe maˇ heˆ. Tawˇ pa haˉ te kʼo, ngaˬ hui shoꞈ shaꞈ ve peuˬ˗e tuˬ te laˇ ve aꞈ kehˉ cuˇ yiˍ leh ngaˬ hui ‘hkanˍ hpehꞈ tuˬ’ awˬ gʼaˇ peꞈ laˇ ve yoˬ.—1 Kawˇrenˍhtuˆ 10:13.

8. Bon lawˬ ve a yeˇ uiˍ jaˇ ve tehꞈ ngaˬ hui hkʼaˬ hkʼe hpeuꞈ maw piˇ gʼa tuˬ le?

⁸ Bon lawˬ ve teˇ ceuˬ daꞈ jaˇ ve tehꞈ ngaˬ hui hkʼaˬ hkʼe te hpeuꞈ maw piˇ gʼa tuˬ le? Awˉ lawˉ teˇ ceuˬ lehˬ, “hkʼaˬ htaˆ kaꞈ bon lawˬ tcuhˉ taˍ˗oꞈ” Yaˬhoˉvaˬ beˆ maˍ laˇ ve htaꞈ ngaˬ hui na yuˬ ve yoˬ. (1 Hteˇsaˍlawˇniˆ 5:17) “Hkʼaˬ htaˆ kaꞈ bon lawˬ tcuhˉ taˍ” cawˇ ve htawˇ, Yaˬhoˉvaˬ ngaˬ hui htaꞈ maˇ nyiˉ laˇ, leuˆ yuˬ tcuh laˇ ve yoˬ. (Roˉmaꞈ 12:12) Laꞈ shawnˍ chi ve htaꞈ ngaˬ hui awˬ hpfuhˇ shiˍ ve tehꞈ, teˇ nyi ve laiˉ pawˆ bon lawˬ ve hkʼaw hpeuꞈ maw piˇ ve yoˬ. Ngaˬ hui bon lawˬ htaˇ, awˬ bon uiˍ hkawˇ leh yawˇ htaꞈ chiˇ mvuh ve maˇ leunˇ cawˇ.—Chiˇ mvuh ve 145:2, 3.

9. Awˬ viˉ awˬ nyi hawˉ hkʼaˆ teˇ gʼaˇ bon lawˬ ve htaꞈ hkʼaˬ hkʼe dawˇ ve le? Leh nawˬ bon lawˬ ve htaꞈ hkʼaˬ hkʼe dawˇ ve le?

⁹ Ngaˬ hui Yaˬhoˉvaˬ ve kanˉ te maw˗oˬ leh bon lawˬ ve Yaˬhoˉvaˬ hkʼawꞈ laˇ ve awˬ hkʼaˇ htaꞈ mawˬ htaˇ, ngaˬ hui awˬ hpfuhˇ shiˍ maˇ la ve yoˬ. Hkriˆ Gʼuiˬ sha ve kanˉ awˬ yanˇ hkʼa biˇ 47 hkʼawꞈ te˗oˬ ve yoˬ. Yawˇ kʼoˆ ve, “mvuhˇ shawˉ teˇ naꞈ tu leh Yaˬhoˉvaˬ geh bon gʼa lawˬ ve ngaˬ ha lehˬ jaˇ. Mvuhˇ shawˉ teˇ naꞈ mvuhˇ nyi ba tawˆ la gehˇ sheˍ htaˇ, Yaˬhoˉvaˬ geh bon gʼa lawˬ ve daꞈ jaˇ. Teˇ ceuˬ le le kaꞈ daꞈ jaˇ! Bon lawˬ ve lehˬ Yaˬhoˉvaˬ awˬ nu ve laꞈ shawnˍ laiˉ ceuˬ kaꞈ peꞈ laˇ ve pa taw, ngaˬ awˬ bon uiˍ jaˇ kʼoˆ piˇ gaˇ ve yoˬ. Mvuhˇ hpeuꞈ htaˇ ngaˬ bon lawˬ leh ngaˬ ve dawˇ shiˍ puiˉ ve nyi ma htaꞈ shoꞈ shaꞈ tuˬ maˇ te laˇ ve ha lehˬ jaˇ.”

10. Aˬ htoꞈ ma te Gʼuiˬ sha ve daꞈ kehˬ ve Awˬ ha hpu htaꞈ ngaˬ hui awˬ hpfuhˇ shiˍ cawˇ ve le?

¹⁰ Maˇ mawˬ hpehꞈ ve daꞈ kehˬ ve Awˬ ha hpu kaꞈ laꞈ shawnˍ teˇ ceuˬ hpehꞈ ve yoˬ. Yeˍsuˆ kʼoˆ ve, ngaˬ hui hkʼaˬ htaˆ kaꞈ daꞈ kehˬ ve Awˬ ha hpu gʼa tuˬ bon lawˬ cawˇ ve yoˬ. (Luˉkaꞈ 11:9, 13) Ngaˬ hui cawˬ taˍ ve awˬ gʼaˇ aꞈ kehˉ kʼawꞈ cawˬ tuˬ, Yaˬhoˉvaˬ daꞈ kehˬ ve Awˬ ha hpu htaꞈ cuˇ leh ga laˇ ve yoˬ. (2 Kawˇrenˍhtuˆ 4:7; Tcuh yaˇ 1:8) Gʼuiˬ sha ve daꞈ kehˬ ve Awˬ ha hpu ngaˬ hui htaꞈ ga laˇ tcuh ve kʼo, beˬ ve lawˇ ve leh shoꞈ shaꞈ ve htaꞈ tawˍ daꞈ gʼaˇ tuˬ yoˬ.

11. Daꞈ kehˬ ve Awˬ ha hpu ngaˬ hui htaꞈ hkʼaˬ hkʼe ga laˇ ve le?

¹¹ Ngaˬ hui Gʼuiˬ sha ve kanˉ te htaˇ, daꞈ kehˬ ve Awˬ ha hpu ga laˇ ve yoˬ. Ngaˬ hui puiˉ ve hpehꞈ ve cheuˬ la tuˬ daꞈ kehˬ ve Awˬ ha hpu ga laˇ ve yoˬ. Ngaˬ hui awˬ vuiˬ gʼa taˍ ve htaꞈ hkʼa dehꞈ te gʼa tuˬ daꞈ kehˬ ve Awˬ ha hpu ga laˇ gʼa ve yoˬ. Ngaˬ hui Gʼuiˬ sha ve kanˉ te gʼa ve lehˬ ngaˬ hui cheuˬ ve htaꞈ pa taw maˇ heˆ, Gʼuiˬ sha ve daꞈ kehˬ ve Awˬ ha hpu ga laˇ leh te gʼa ve tehꞈ ngaˬ hui shiˍ ve yoˬ.

12. Chiˇ mvuh ve liꞈ 139:23, 24 hkʼaw kʼoˆ taˍ ve hkʼe, ngaˬ hui daꞈ kehˬ ve Awˬ ha hpu lawˬ leh hkʼaˬ hkʼe ga laˇ tcuh gʼa ve le?

¹² Daꞈ kehˬ ve Awˬ ha hpu htaꞈ ngaˬ hui awˬ hpfuhˇ shiˍ ve tehꞈ hpeuꞈ maw piˇ ve awˬ nu ve teˇ hkʼaˇ lehˬ, daꞈ ve maˇ daꞈ ve htaꞈ shiˍ tuˬ bon gʼa lawˬ cawˇ ve yoˬ. (Chiˇ mvuh ve 139:23, 24 gʼaw sheˍ.) Ngaˬ hui bon chi hkʼe lawˬ ve kʼo, Yaˬhoˉvaˬ daꞈ kehˬ ve Awˬ ha hpu htaꞈ cuˇ leh ngaˬ hui ve dawˇ hkʼaˇ daꞈ ve maˇ daꞈ ve htaꞈ shiˍ tuˬ ga laˇ ve yoˬ. Ngaˬ hui daꞈ ve maˇ daꞈ ve htaꞈ shiˍ˗oˬ htaˇ, maˇ daꞈ ve dawˇ hkʼaˇ htaꞈ ngaˬ hui tawˍ daꞈ gʼaˇ tuˬ Gʼuiˬ sha geh daꞈ kehˬ ve Awˬ ha hpu lawˬ cawˇ ve yoˬ. Ngaˬ hui chi hkʼe te ve kʼo, daꞈ kehˬ ve Awˬ ha hpu maˇ peꞈ laˇ tuˬ ngaˬ hui teˇ ceuˬ kaꞈ maˇ te gaˇ.—Eˇfeˇsuꞈ 4:30.

13. Daꞈ kehˬ ve Awˬ ha hpu htaꞈ hkʼaˬ hkʼe te ngaˬ hui awˬ hpfuhˇ shiˍ maˇ la tuˬ le?

¹³ Chi beuꞈ teˇ co˗e daꞈ kehˬ ve Awˬ ha hpu aˬ htoꞈ ma ga laˇ ve ngaˬ hui hkʼa dehꞈ dawˇ nyi htaˇ, daꞈ kehˬ ve Awˬ ha hpu htaꞈ awˬ hpfuhˇ shiˍ maˇ la ve yoˬ. Yeˍsuˆ mvuhˇ naw ma hkʼoˆ maˇ kʼawꞈ˗e sheˍ htaˇ, yawˇ ve awˬ laꞈ gʼawˇ htaꞈ kʼoˆ ve, “Awˬ ha hpu nawˬ hui awˬ hkʼoˆ lo yaꞈ la htaˇ, nawˬ hui kanˇ paˆ gʼa tuˬ yoˬ. Oˇ htaˇ . . . mvuhˇ leh miˬ leh hkʼa gaˬ,  nawˬ hui ngaˬ ve shaˉ hkiˆ hkanˍ shehˍ hpaˇ gʼa hpehꞈ tuˬ yoˬ.” (Tcuh yaˇ 1:8) Chi awˬ tehˬ hpehꞈ la ve yoˬ. Daꞈ kehˬ ve Awˬ ha hpu ga laˇ ve pa taw, chi teˇ hkui miˬ guiˬ chi hkʼoˆ lo 8,500,000 gʼaˇ hpaˆ Yaˬhoˉvaˬ htaꞈ oˉ kʼoˍ pui chehˇ ve yoˬ. Chi hkʼoˆ kaꞈ, Gʼuiˬ sha ve daꞈ kehˬ ve Awˬ ha hpu ngaˬ hui htaꞈ ga laˇ leh te hkʼaˇ dawˇ hkʼaˇ daꞈ ve cawˬ ve pa taw, awˬ viˉ awˬ nyi haꞈ daꞈ ve hkʼaw ngaˬ hui gʼa chehˇ ve ha lehˬ jaˇ. Tawˇ pa haˉ te kʼo, haꞈ pehnˇ ve, ha lehˬ ve, dawˇ sha ve, dawˇ zuhˬ gaˇ zuhˬ ve, ha kʼaˉ ve, shu awˬ pon daꞈ ve htaꞈ te ve, ka tiꞈ yeˬ ve, nyi ma nuˇ nehˬ ve leh, a shu yawˇ awˬ to htaꞈ gʼaˇ puiˉ ve, chi teˇ hpaˍ lehˬ Gʼuiˬ sha ve “Awˬ ha hpu ve awˬ shiˍ nawꞈ la” ve yoˬ. (Gaˍlaˍtiˆ 5:22, 23) Daꞈ kehˬ ve Awˬ ha hpu lehˬ awˬ hpfuhˇ hkʼaˆ jaˇ ve laꞈ shawnˍ hpehꞈ ve yoˬ.

14. Ngaˬ hui Gʼuiˬ sha ve kanˉ te htaˇ, maˇ mawˬ gʼa ve hkʼaˬ hkʼe ga laˇ ve le?

¹⁴ Awˬ nu ve laꞈ shawnˍ nyi maˇ mawˬ ve teˇ ceuˬ lehˬ, Yaˬhoˉvaˬ, Yeˍsuˆ, leh mvuhˇ naw ma tcuh yaˇ geh “teˇ geh kanˉ te ve” yoˬ. (2 Kawˇrenˍhtuˆ 6:1) Ngaˬ hui shu awˬ laꞈ gʼawˇ hpehꞈ la tuˬ maˍ piˇ htaˇ, chi hkʼe te chehˇ ve yoˬ. Pawˇluꞈ leh awˬ nu ve chaw “teˇ geh Gʼuiˬ sha ve kanˉ te shehˍ hpaˇ hpehꞈ ve” tehꞈ kʼoˆ ve yoˬ. (1 Kawˇrenˍhtuˆ 3:9) Ngaˬ hui Hkriꞈ yaˇ ve kanˉ te htaˇ, Yeˍsuˆ geh kanˉ teˇ geh te chehˇ ve yoˬ. Yeˍsuˆ awˬ hkʼaˇ suh gʼaꞈ yuˬ ve chaw htaꞈ “kʼai leh chaw ceuˬ hkʼa peu˗eˬ ngaˬ ve awˬ laꞈ gʼawˇ hpehꞈ la tuˬ ca te˗o” kʼoˆ piˇ htaˇ ve htaꞈ dawˇ nyi sheˍ. Peuˬ leh yawˇ kʼoˆ ve, “ngaˬ nawˬ hui geh hkʼaˬ htaˆ kaꞈ chehˇ tuˬ yoˬ.” (Maꞈhtehˍ 28:19, 20) Hkʼaˬ hkʼe te ngaˬ hui mvuhˇ naw ma tcuh yaˇ geh teˇ geh kanˉ te ve le? “Miˬ guiˬ hkʼoˆ lo chehˇ ve chaw hkʼa peu˗eˬ . . . co co taiˍ taiˍ yeˬ ve ha lehˬ ve bon hkawˇ maˍ piˇ tuˬ” mvuhˇ naw ma tcuh yaˇ ngaˬ hui htaꞈ beˆ maˍ laˇ ve awˬ bon uiˍ jaˇ!—Hpeuꞈ maˍ ve 14:6.

15. Yaˬhoˉvaˬ lehˬ ngaˬ hui yawˇ ve kanˉ te ve hkʼaw a yeˇ uiˍ jaˇ ve tehꞈ tawˇ pa haˉ kʼoˆ maˍ laˇ sheˍ.

¹⁵ Mvuhˇ naw ma hkʼoˆ lo ve ga laˇ ve pa taw, ngaˬ hui Gʼuiˬ sha ve kanˉ hkʼaˬ hkʼe te hkʼa dehꞈ te gʼa ve le? Ngaˬ hui Gʼuiˬ sha ve mvuhˇ miˬ ha lehˬ ve bon hkawˇ awˬ yawˇ sheˍ htaˇ, awˬ yawˇ teˇ hpaˍ hpaˍ nyi ma hkʼaw haꞈ yuˬ leh awˬ tehˬ uiˍ la ve yoˬ hehˉ. (Maꞈhtehˍ 13:18, 23) Awˬ yawˇ chi ve uiˍ la leh awˬ veˆ veˆ leh awˬ shiˍ nawꞈ tuˬ a shu te piˇ ve le? Yeˍsuˆ kʼoˆ ve, “Awˬ pa lehˬ, shu htaꞈ ngaˬ geh lo maˇ gʼawˬ veu laˇ ve kʼo, chaw teˇ gʼaˇ kaꞈ” ngaˬ ve awˬ laꞈ gʼawˇ maˇ hpehꞈ la gʼa taˬ. (Yoˇhanˬ 6:44) Liꞈ hpu hkʼaw awˬ lawn chi ve cawˬ ve yoˬ. Hpiˇliˇpiˆ venˇ baˬ lo Pawˇluꞈ yaˇ miˇ teˇ moˍ htaꞈ bon maˍ piˇ htaˇ, Luˍdiˇ htaꞈ caˉ daꞈ ve ngaˬ hui shiˍ tuˬ Liꞈ hpu hkʼaw kʼoˆ maˍ laˇ taˍ ve yoˬ. “Gʼuiˬ sha htaꞈ oˉ kʼoˍ pui ve Luˍdiˇ meh ve yaˇ miˇ teˇ gʼaˇ ngaˬ hui ve hkawˇ htaꞈ na chehˇ ve yoˬ.” (Tcuh yaˇ 16:13-15) Luˍdiˇ hkʼa shuˍ chaw laiˉ lanˬ gʼaˇ Yaˬhoˉvaˬ geh laˬ tuˬ yawˇ gʼawˬ veu laˇ ve yoˬ.

16. Ngaˬ hui Gʼuiˬ sha ve kanˉ te ve daꞈ ve gʼa htaˇ, a shu awˬ meꞈ awˬ hponˇ gʼa cawˇ ve le?

¹⁶ Ngaˬ hui Gʼuiˬ sha ve kanˉ te ve hkʼaw awˬ bon gʼa htaˇ, a shu awˬ meꞈ awˬ hponˇ gʼa ve le? Pawˇ luꞈ Kawˇrenˍhtuˆ Hkriꞈ yaˇ htaꞈ liꞈ bvuhꞈ piˇ htaˇ, yawˇ kʼoˆ ve, “ngaˬ ti taˍ leh Aˍpawˇluꞈ iˉ kaˆ pfuhˍ piˇ ve yoˬ. Yaꞈ hkʼaˇ, yeˬ la uiˍ la piˇ shehˍ hpaˇ lehˬ Gʼuiˬ sha yoˬ. Hkʼe te leh, ti shehˍ hpaˇ leh iˉ kaˆ pfuhˍ shehˍ hpaˇ lehˬ uiˍ ve maˇ heˆ. Yeˬ la uiˍ la piˇ shehˍ hpaˇ Gʼuiˬ sha ceh tiˉ uiˍ ve yoˬ.” (1 Kawˇrenˍhtuˆ 3:6, 7) Ngaˬ hui Yaˬhoˉvaˬ ve kanˉ te ve hkʼaw daꞈ ve gʼa htaˇ, Pawˇluꞈ hkʼa shuˍ Yaˬhoˉvaˬ htaꞈ awˬ meꞈ awˬ hponˇ cawˬ tcuh cawˇ ve yoˬ.

17. Gʼuiˬ sha, Yeˍsuˆ, leh mvuhˇ naw ma tcuh yaˇ geh ngaˬ hui kanˉ teˇ geh te ve awˬ hpfuhˇ shiˍ ve tehꞈ hkʼaˬ hkʼe te hpeuꞈ maw piˇ gʼa tuˬ le?

¹⁷ Gʼuiˬ sha, Yeˍsuˆ, leh mvuhˇ naw ma tcuh yaˇ geh ngaˬ hui “kanˉ teˇ geh te” htaˇ, awˬ hpfuhˇ shiˍ ve tehꞈ hkʼaˬ hkʼe te hpeuꞈ maw piˇ gʼa tuˬ le? Ngaˬ hui nyi ma pfuhˇ ve hkʼaw teˇ yanˇ le le daꞈ ve awˬ lawn sha tanˇ hto toˇ htaˇ laiˉ hkʼaˇ te gʼa ve yoˬ. Tawˇ pa haˉ te kʼo, “chaw hkʼa peu˗eˬ mehˆ gʼuˇ suhˍ maˇ kʼoˆ, teˇ yehˬ peuˬ  teˇ yehˬ awˬ hkʼaw lo maˇ kʼoˆ” ngaˬ hui gʼa hto toˇ ve yoˬ. (Tcuh yaˇ 20:20) Chi hkʼoˆ kaꞈ, laiˉ gʼaˇ hto toˇ kuiˬ awˬ ti lo maˇ chehˇ htaˇ kaꞈ hto toˇ ve yoˬ. Yawˇ hui maˇ mawˬ jaw ve chaw htaꞈ mawˬ htaˇ, chaw oˇ ve teˇ gʼaˇ geh tawˇ yaw daꞈ ve yoˬ. Tawˇ yaw gaˇ puiˉ ve chaw htaꞈ mawˬ htaˇ, chaw oˇ ve teˇ gʼaˇ nyi ma pfuhˇ tuˬ Gʼuiˬ sha ve mvuhˇ miˬ htaꞈ caˉ daꞈ ve awˬ hkʼaˇ ca leh kʼoˆ maˍ piˇ ve yoˬ.

18-19. (a) Awˬ tehˬ ve awˬ yawˇ ngaˬ hui hkʼaˬ hkʼe te iˉ kaˆ pfuhˍ piˇ gʼa tuˬ le? (b) Liꞈ hpu henˇ ve chaw teˇ gʼaˇ htaꞈ Yaˬhoˉvaˬ hkʼaˬ hkʼe ga piˇ ve kʼoˆ maˍ laˇ sheˍ.

¹⁸ Ngaˬ hui Gʼuiˬ sha geh kanˉ teˇ geh te ve chaw hpehꞈ ve kʼo, ngaˬ hui awˬ tehˬ ve awˬ yawˇ sheˍ ve ceh maˇ heˆ, iˉ kaˆ kaꞈ pfuhˍ ve yoˬ. Nyi ma pfuhˇ ve chaw htaꞈ mawˬ htaˇ, ngaˬ hui haˆ ca kʼawꞈ guiˇ˗e tuˬ maˇ heˆ leh Liꞈ hpu maˍ piˇ tuˬ awˬ nu ve teˇ gʼaˇ htaꞈ kʼai tcuh sheˍ. Liꞈ hpu henˇ ve chaw uiˍ la mvuh la ve, yawˇ ve te hkʼaˇ dawˇ hkʼaˇ pa tuˬ Yaˬhoˉvaˬ ga piˇ ve ngaˬ hui mawˬ htaˇ, ha lehˬ jaˇ.

¹⁹ Aˍfaˍriˆkaˆ miˬ guiˬ mawˉ nyi paˍ Ra˗fa˗ra˗ra˗neˬ ve awˬ lawn htaꞈ dawˇ nyi sheˍ. Yawˇ Liꞈ hpu hkʼaw gʼa henˇ ve htaꞈ dawˇ cawˇ jaˇ. Chaw suh˗oˬ ve htaꞈ caˉ daꞈ ve Liꞈ hpu hkʼaw hkʼaˬ hkʼe kʼoˆ ve htaꞈ yawˇ shiˍ htaˇ, yawˇ shoꞈ shaꞈ jaˇ ve gʼa hpuˇ ve yoˬ. (Bon maˍ ve 18:10-12) Peuˬ hkʼawꞈ nawˉ, yawˇ ve dawˇ hkʼaˇ htaꞈ Gʼuiˬ sha awˬ meu˗eˇ awˬ meu˗eˇ pa laˇ tcuh ve yoˬ. Peuˬ leh yawˇ awˬ to htaꞈ hu tuˬ ve kanˉ mawˉ nyi paˍ maˇ te˗o. Ra˗fa˗ra˗ra˗neˬ 60 hkʼawꞈ gaˬ˗oˬ ve yawˇ kʼoˆ ve, “Yaˬhoˉvaˬ ve Shaˉhkiˆhkanˍ ve chaw ngaˬ htaꞈ ga laˇ ve awˬ bon uiˍ jaˇ. Yawˇ hui ngaˬ kanˉ awˬ suhˉ ca tuˬ ga laˇ ve yoˬ. A yeˇ uiˍ jaˇ ve lehˬ Yaˬhoˉvaˬ ngaˬ ve dawˇ hkʼaˇ pa tuˬ ga laˇ ve awˬ bon uiˍ jaˇ. Chi teˇ hkui ngaˬ teˇ yehˬ peuˬ teˇ yehˬ hto toˇ leh Baˆtiˆsaˬ haꞈ yuˬ leh Yaˬhoˉvaˬ ve Shaˉhkiˆhkanˍ ve chaw hpehꞈ˗oˬ.”

20. Nawˬ aˬ htoꞈ ma te tuˬ dawˇ teh taˍ ve le?

²⁰ Awˬ lawn chi ve hkʼaw ngaˬ hui maˇ mawˬ gʼa ve laꞈ shawnˍ 4 ceuˬ gʼa henˇ˗oˬ ve yoˬ. Daꞈ jaˇ ve laꞈ shawnˍ lehˬ Yaˬhoˉvaˬ ngaˬ hui ve awˬ chawˇ hpehꞈ ve yoˬ. Chi awˬ nu ve laꞈ shawnˍ maˇ mawˬ gʼa ve htaꞈ kaꞈ awˬ bon gʼa tuˬ ga laˇ ve yoˬ. Oˇ ve lehˬ Gʼuiˬ sha geh bon lawˬ ve, daꞈ kehˬ ve Awˬ ha hpu ga laˇ tcuh ve, ngaˬ hui Gʼuiˬ sha ve kanˉ te gʼa ve mvuhˇ naw ma hkʼoˆ lo ve ga laˇ ve yoˬ. Laꞈ shawnˍ chi ve teˇ hpaˍ ngaˬ hui awˬ hpfuhˇ shiˍ ve tehꞈ hkʼa tawˍ lehˆ hpeuꞈ maw piˇ gʼa tuˬ, Yaˬhoˉvaˬ ngaˬ hui ve daꞈ jaˇ ve awˬ chawˇ hpehꞈ ve awˬ bon uiˍ jaˇ kʼoˆ piˇ tuˬ dawˇ teh taˍ sheˍ.