Saˍraˇ * kʼoˆ ve, “ngaˬ yaꞈ tawˍ puiˉ jaˇ leh ngaˬ awˬ to htaꞈ yonˍ maˇ gʼa.” Chi htaꞈ pa taw “nyi ma hawˬ ve, hteˇ˗ehꞈ kʼoˆ ve, leh a shu yawˇ awˬ to htaꞈ yonˍ gʼa jaˇ ve chaw geh ngaˬ awˬ chawˇ maˇ te gaˇ. Yaꞈ hkʼaˇ, nyi ma nuˇ nehˬ ve chaw geh ngaˬ awˬ chawˇ te htaˇ nyi ma sha jaˇ. Ngaˬ ve dawˇ hkʼaˇ leh ngaˬ ve awˬ lawn chi hkʼe ve chaw htaꞈ kʼoˆ maˍ piˇ haˆ ve yoˬ. Ngaˬ ve awˬ chawˇ daꞈ jaˇ ve lehˬ nyi ma nuˇ nehˬ ve chaw yoˬ.”

Saˍraˇ kʼoˆ ve awˬ ceuˬ ngaˬ hui nyi ma nuˇ nehˬ ve kʼo, shu ngaˬ hui htaꞈ awˬ chawˇ te gaˇ ve yoˬ. Nyi ma nuˇ nehˬ ve lehˬ Yaˬhoˉvaˬ nyi hkʼaˇ suh tuˬ te piˇ ve yoˬ. ‘Nyi ma nuˇ nehˬ ve htaꞈ veuꞈ deh˗o’ tehꞈ Gʼuiˬ sha ve tawˇ hkawˇ ngaˬ hui htaꞈ kʼoˆ laˇ ve yoˬ. (Kawˇlawˇsehˇ 3:12) Nyi ma nuˇ nehˬ ve aˬ htoꞈ ma htaꞈ kʼoˆ gaˇ ve le? Yeˍsuˆ hkʼaˬ hkʼe te leh nyi ma nuˇ nehˬ ve tehꞈ hpeuꞈ maw laˇ ve le? Leh chi ve teˇ hpaˍ hkʼaˬ hkʼe te ngaˬ hui htaꞈ ha lehˬ tuˬ te laˇ gʼa ve le?

Ngaˬ hui gawˬ lehˍ chehˇ puiˉ ve chaw hpehꞈ ve kʼo, nyi ma nuˇ nehˬ ve tehꞈ hpeuꞈ maw piˇ ve yoˬ. Nyi ma nuˇ nehˬ ve chaw lehˬ, nyi ma maˇ sha htaˇ gawˬ lehˍ chehˇ puiˉ ve yoˬ.

Nyi ma nuˇ nehˬ ve chaw lehˬ yeunˇ hkanˍ puiˉ ve yoˬ. Liꞈ hpu hkʼaw Heˍlaˍsaˆ hkawˇ nyi ma nuˇ nehˬ ve lehˬ, iˉ mvuhˇ awˬ hteunˍ awˬ meuˇ hpehꞈ la ve htaꞈ kʼoˆ gaˇ ve yoˬ. Iˉ mvuhˇ awˬ gʼaˇ hehnˇ jaˇ leh yawˇ htaꞈ yuˬ tiˍ gʼaˇ tuˬ gʼa te jawˬ ve yoˬ. Chi ve hkʼa shuˍ shuˍ ngaˬ hui nyi ma nuˇ nehˬ ve chaw hpehꞈ htaˇ, ngaˬ hui maˇ biˇ ve pa taw shu geh awˬ chawˇ te gʼa leh dawˇ sha gawˬ lehˍ ve cawˬ tuˬ maˇ daꞈ ve dawˇ hkʼaˇ htaꞈ yuˬ tiˍ gʼa ve yoˬ.

Ngaˬ hui nyi ma nuˇ nehˬ ve maˇ cawˬ tehꞈ dawˇ puiˉ la ve yoˬ. Laiˉ gʼaˇ haiˬ ve chaw hpehꞈ leh nyi ma hawˬ puiˉ ve pa taw, ngaˬ hui nyi ma nuˇ nehˬ ve chaw hpehꞈ tuˬ haˍ jaˇ. (Roˉmaꞈ 7:19) Chi htaꞈ pa taw, nyi ma nuˇ nehˬ ve chaw hpehꞈ tuˬ gʼa coˇ caˇ jaˇ. Yaꞈ hkʼaˇ, ngaˬ hui nyi ma nuˇ nehˬ ve chaw hpehꞈ tuˬ Yaˬhoˉvaˬ ve daꞈ kehˬ ve Awˬ ha hpu ga laˇ gʼa tuˬ yoˬ. (Gaˍlaˍtiˆ 5:22, 23) Aˬ htoꞈ ma te ngaˬ hui nyi ma nuˇ nehˬ ve veuꞈ deh cawˇ ve le?

Nyi ma nuˇ nehˬ ve lehˬ shu ngaˬ hui geh awˬ chawˇ te gaˇ tuˬ te piˇ ve yoˬ. Saˍraˇ kʼoˆ ve hkʼa shuˍ, nyi ma nuˇ nehˬ ve chaw geh awˬ chawˇ te gaˇ ve yoˬ. Yeˍsuˆ lehˬ nyi ma nuˇ nehˬ jaˇ leh daꞈ jaˇ ve henˇ yuˬ tuˬ hpehꞈ ve yoˬ. (2 Kawˇrenˍhtuˆ 10:1) Yaˇ ehˉ teˇ hpaˍ Yeˍsuˆ htaꞈ maˇ shiˍ ve htawˇ, yawˇ geh chehˇ gaˇ ve yoˬ.—Maˍkuˆ 10:13-16.

 Nyi ma nuˇ nehˬ ve chaw hpehꞈ ve kʼo, ngaˬ hui leh awˬ paˇ awˬ kui chehˇ ve chaw awˬ pon daꞈ ve yoˬ. Ngaˬ hui nyi ma nuˇ nehˬ ve chaw hpehꞈ ve kʼo, nyi ma maˇ zuhˆ leh haˆ maˇ beuꞈ puiˉ. (Tawˇ naˉ ve 16:32) Chi htaꞈ pa taw, ngaˬ hui haꞈ ve chaw htaꞈ nyi ma naˬ tuˬ maˇ te piˇ. Ngaˬ hui te ve leh tawˇ yaw ve shu nyi ma naˬ tuˬ kaꞈ maˇ te.

A yeˇ uiˍ ve awˬ vuiˬ cawˬ leh shoꞈ shaꞈ jaˇ ve htawˇ, Yeˍsuˆ teˇ gʼaˇ le le htaꞈ nyi ma nuˇ nehˬ ve te piˇ ve yoˬ. Yawˇ ve awˬ co˗e htaˇ laiˉ gʼaˇ shoꞈ shaꞈ ve laiˉ ceuˬ gʼa hpuˇ leh awˬ lawn cawˬ maˇ ve pa taw, nyi ma sha tuˬ loˍ ve yoˬ. Yeˍsuˆ “ngaˬ geh laˬ˗oꞈ. Ngaˬ nawˬ hui htaꞈ gʼaˇ jehˇ piˇ tuˬ yoˬ” tehꞈ kʼoˆ piˇ htaˇ, yawˇ hui awˬ gʼaˇ gʼa jaˇ ve yoˬ hehˉ!—Maꞈhtehˍ 11:28, 29.

Ngaˬ hui hkʼaˬ hkʼe te Yeˍsuˆ hkʼe leˇ nyi ma nuˇ nehˬ ve chaw hpehꞈ gʼa tuˬ le? Yeˍsuˆ shu htaꞈ hkʼaˬ hkʼe te piˇ ve leh haˍ ve awˬ yanˇ htaˇ yawˇ hkʼaˬ hkʼe te ve ngaˬ hui Liꞈ hpu hkʼaw chaˬ nyi ve yoˬ. Peuˬ leh ngaˬ hui tawˍ ve tsuhˇ ve htaꞈ gʼa hpuˇ htaˇ, ngaˬ hui nyi ma nuˇ nehˬ ve Yeˍsuˆ hkʼe te ve yoˬ. (1 Peˍtruˆ 2:21) Yeˍsuˆ nyi ma nuˇ nehˬ ve 3 hkʼaˇ teˇ geh nyi sheˍ.

Yeˍsuˆ nyi ma nuˇ nehˬ jaˇ. Yeˍsuˆ kʼoˆ ve, “ngaˬ lehˬ nyi ma nuˇ nuˇ nehˬ nehˬ cawˬ” ve yoˬ. (Maꞈhtehˍ 11:29) Liꞈ hpu hkʼaw te hkʼaˇ dawˇ hkʼaˇ chi ve 2 maˬ htaꞈ kʼoˆ taˍ ve yoˬ. Awˬ lawn kʼo, nyi ma nuˇ ve leh nyi ma nehˬ lehˍ taˍ ve shuˍ daꞈ ve yoˬ. (Eˇfeˇsuꞈ 4:1-3) Aˬ htoꞈ ma te chi hkʼe hpehꞈ ve le?

Nyi ma nuˇ nehˬ ve lehˬ a shu yawˇ awˬ to htaꞈ hkʼe taw maˇ dawˇ nyi leh maˇ dawˇ maˇ tuˬ ga laˇ ve yoˬ. Yeˍsuˆ htaꞈ kʼoˆ guiˇ gʼuiˬ guiˇ leh maˇ hteˇ maˇ cawˇ te piˇ htaˇ hkʼaˬ hkʼe te ve le? Awˬ lawn kʼo, Yeˍsuˆ htaꞈ “caˇ leuˉ dawˬ leuˉ ve chaw, a pehˉ meuˇ gʼuiˬ dawˬ ponˬ dawˬ leuˉ ve chaw” hpehꞈ ve tehꞈ kʼoˆ piˇ ve yoˬ. Chi awˬ tehˬ hpehꞈ ve maˇ heˆ tehꞈ yawˇ ve te hkʼaˇ dawˇ hkʼaˇ hpeuꞈ maw piˇ ve yoˬ. Awˬ lawn kʼo, yawˇ nyi ma nuˇ nehˬ jaˇ. Yawˇ kʼoˆ ve, “cuˇ yiˍ maˍ yiˍ teˇ ceuˬ lehˬ, yawˇ te ve kanˉ teˇ hpaˍ awˬ hkʼaw lo, hteˇ ve cawˇ ve htaꞈ shu gʼa shiˍ ve yoˬ.”—Maꞈhtehˍ 11:19.

Chaw hpu chaw naˆ, hawˉ hkʼaˆ yaˇ miˇ, maˇ heˆ leh nawˬ hpehꞈ laˬ jaw ve awˬ lawn shu maˇ dawˇ nyi leh kʼoˆ laˇ htaˇ, nyi ma nuˇ nehˬ ve hkʼaw haꞈ yuˬ sheˍ. Aˍfaˍriˆkaˆ mvuhˇ miˬ lo nyi haꞈ shaˉ paˍ Peˍtruˆ kʼoˆ ve, “shu kʼoˆ laˇ ve htaꞈ pa taw, ngaˬ nyi ma maˇ sha htaˇ, ngaˬ awˬ to htaꞈ na nyi ve ‘Yeˍsuˆ hkʼaˬ hkʼe te ve le?’” Yawˇ kʼoˆ ve, “maˇ dawˇ maˇ tuˬ ngaˬ gʼa te ve yoˬ.”

Chaw yaˇ maˇ biˇ ve tehꞈ Yeˍsuˆ shiˍ ve yoˬ. Yeˍsuˆ ve awˬ laꞈ gʼawˇ cawˇ ve htaꞈ te gaˇ ve htawˇ, yawˇ hui maˇ biˇ ve pa taw, hkʼaˬ htaˆ kaꞈ chi hkʼe te maˇ gʼa. Tawˇ pa haˉ te kʼo, Yeˍsuˆ maˇ suh sheˍ ve teˇ haˉ htaˇ, Peˍtruˆ, Yaˍkoˆ, leh Yoˇhanˬ Yeˍsuˆ lawˬ piˇ ve hkʼe te tuˬ yawˇ hui maˇ te leh Yeˍsuˆ geh teˇ geh maˇ shaw taˍ. Yeˍsuˆ kʼawꞈ kʼoˆ ve, “nawˬ hui te gaˇ ve nyi ma cawˬ htawˇ, awˬ suhˍ awˬ shaˍ lehˬ, awˬ gʼaˇ nuˇ ve yoˬ.” (Maꞈhtehˍ 26:40, 41) Tcuh yaˇ hui maˇ biˇ ve htaꞈ Yeˍsuˆ shiˍ ve pa taw, yawˇ hui htaꞈ maˇ beuꞈ.

Awˬ viˉ awˬ nyi yaˇ miˇ Mehˬdiˆ shu htaꞈ nyi cha puiˉ jaˇ. Yaꞈ hkʼaˇ, Yeˍsuˆ nyi ma nuˇ nehˬ ve htaꞈ henˇ yuˬ tuˬ chi teˇ hkui yawˇ coˇ caˇ jaˇ. Yawˇ kʼoˆ ve, “chaw yaˇ teˇ gʼaˇ le le maˇ biˇ ve tehꞈ ngaˬ tawnˇ taˍ ve yoˬ. Leh chaw yaˇ ve te hkʼaˇ dawˇ hkʼaˇ htaꞈ Yaˬhoˉvaˬ dawˇ ve hkʼe ngaˬ kaꞈ dawˇ ve yoˬ.” Chaw yaˇ maˇ biˇ ve htaꞈ Yeˍsuˆ ha kʼaˉ ve hkʼaw nyi ve hkʼe, nawˬ kaꞈ shu htaꞈ nyi ma nuˇ nehˬ ve hkʼaw ga piˇ gʼa˗aw laˇ?

Yeˍsuˆ Yaˬhoˉvaˬ htaꞈ gʼaˇ va ve yoˬ. Yeˍsuˆ miˬ guiˬ hkʼoˆ chehˇ htaˇ, maˇ hteˇ maˇ cawˇ te piˇ ve htaꞈ gʼa yeunˇ hkanˍ ve yoˬ. Yawˇ htaꞈ shu dawˇ yaꞈ ve, nyi cha ve, leh ciˍ yanˍ piˇ ve yoˬ. Chi hkʼe hpehꞈ ve htawˇ, yawˇ hkʼaˬ htaˆ kaꞈ nyi ma nuˇ nehˬ jaˇ. Awˬ lawn kʼo, yawˇ “hteˇ lehˍ cawˇ lehˍ suhˉ jehˬ shehˍ hpaˇ Gʼuiˬ sha ve laꞈ hkʼaw lo yawˇ awˬ to htaꞈ aꞈ piˇ ve yoˬ.” (1 Peˍtruˆ 2:23) Yeˍsuˆ ve Awˬ pa yawˇ yeunˇ hkanˍ gʼaˇ tuˬ ga laˇ ve htaꞈ shiˍ leh yawˇ htaꞈ maˇ hteˇ maˇ cawˇ te laˇ ve chaw htaꞈ ciˍ yanˍ piˇ tuˬ yoˬ.

Ngaˬ hui maˇ hteˇ maˇ cawˇ ve gʼa hpuˇ leh beuꞈ ve hkʼaw te hkʼawꞈ piˇ ve kʼo, ngaˬ hui htaꞈ heuˆ la kuiˬ cawˬ jaˇ. Liꞈ hpu hkʼaw kʼoˆ ve, “chaw yaˇ nyi ma zuhˆ ve teˇ ceuˬ lehˬ, Gʼuiˬ sha ve hteˇ ve cawˇ ve htaꞈ tawˆ la tuˬ te maˇ gʼa.” (Yaˍkoˆ 1:20) Ngaˬ hui beuꞈ tuˬ awˬ hkʼaˇ cawˬ ve htawˇ, maˇ biˇ ve chaw hpehꞈ ve pa taw, maˇ hteˇ maˇ cawˇ te piˇ la ve yoˬ.

Jaˬmaˬniˬ mvuhˇ miˬ lo awˬ viˉ awˬ nyi yaˇ miˇ Hkeh˗htiˇ chi hkʼe dawˇ jaw ve yoˬ. Yawˇ kʼoˆ ve, ‘ngaˬ awˬ to ngaˬ maˇ te ve kʼo, shu ngaˬ awˬ to htaꞈ ga laˇ maˇ gʼa.’ Yaꞈ hkʼaˇ, yawˇ Yaˬhoˉvaˬ htaꞈ gʼaˇ va tuˬ shiˍ la htaˇ, yawˇ ve dawˇ hkʼaˇ pa ve yoˬ. Yawˇ kʼawꞈ kʼoˆ ve, “chi teˇ hkui ngaˬ awˬ to ngaˬ te tuˬ maˇ loˍ. Ngaˬ nyi ma nuˇ  nehˬ ve chaw hpehꞈ gʼa tuˬ, miˬ guiˬ hkʼoˆ maˇ daꞈ ve hkʼa peu˗eˬ htaꞈ Yaˬhoˉvaˬ gu laˇ tuˬ yoˬ tehꞈ ngaˬ shiˍ ve yoˬ.” Nawˬ maˇ hteˇ maˇ cawˇ ve gʼa hpuˇ jaw ve kʼo, Yeˍsuˆ Yaˬhoˉvaˬ htaꞈ gʼaˇ va ve awˬ lawn nawˬ henˇ yuˬ gʼa leh nyi ma nuˇ nehˬ ve cawˬ tuˬ te laˇ ve yoˬ.

Yeˍsuˆ kʼoˆ ve ngaˬ hui ha lehˬ gaˇ ve kʼo, nyi ma nuˇ nehˬ ve chaw gʼa hpehꞈ ve yoˬ. Yawˇ kʼoˆ ve, ‘nyi ma nuˇ nehˬ ve chaw hui awˬ bon uiˍ ve yoˬ.’ (Maꞈhtehˍ 5:5) Nyi ma nuˇ nehˬ ve ngaˬ hui htaꞈ hkʼaˬ hkʼe ga laˇ gʼa ve teˇ geh nyi sheˍ.

Nyi ma nuˇ nehˬ ve lehˬ awˬ ca maˇ cawˇ daꞈ ve htaꞈ ga laˇ gʼa ve yoˬ. Awˆsuh˗teˇriˇaˇ mvuhˇ miˬ lo awˬ viˉ awˬ nyi Roˍbeuˍ kʼoˆ ve, “maˇ dawˇ nyi leh ngaˬ miˇ ma htaꞈ hehnˇ ve laiˉ ceuˬ kʼoˆ piˇ ve yoˬ. Yaꞈ hkʼaˇ, hehnˇ ve kʼoˆ piˇ peuˬ hkʼawꞈ nawˉ ngaˬ teꞈ chiˉ maˇ gʼa kʼoˆ piˇ ve hkʼe, taꞈ iˉ chehˇ taˍ maˇ gʼa. Ngaˬ kʼoˆ ve nawˬ nyi ma maˇ sha tuˬ te laˇ ve pa taw, lawˬ hkawˉ laˇ ve yoˬ.”

“Ngaˬ hui hkʼa peu˗eˬ laiˉ ceuˬ te yaꞈ ve yoˬ.” Ngaˬ hui maˇ dawˇ nyi leh tawˇ yaw ve kʼo, awˬ ca htaꞈ shoꞈ shaꞈ tuˬ te piˇ gʼa ve yoˬ. (Yaˍkoˆ 3:2) Yaꞈ hkʼaˇ, nyi ma nuˇ nehˬ ve lehˬ ngaˬ hui nyi ma gawˬ la tuˬ leh tawˇ maˇ daꞈ ve maˇ gʼa yaw tuˬ ga laˇ ve yoˬ.—Tawˇ naˉ ve 17:27.

Roˍbeuˍ nyi ma nuˇ nehˬ ve cawˬ tuˬ leh a shu yawˇ awˬ to htaꞈ gʼaˇ puiˉ tuˬ coˇ caˇ ve yoˬ. Hkʼaˬ hkʼe hpehꞈ la ve le? “Chi teˇ hkui ngaˬ miˇ ma leh ngaˬ maˇ cawˇ maˇ hawˍ daꞈ htaˇ, tawˇ nuˇ lehˍ yaw leh hkʼa dehꞈ na taˍ piˇ ve pa taw ngaˬ nyi ma maˇ zuhˆ tcuh. Ngaˬ huiˉ maˬ meuˆ daꞈ maˇ la ve yoˬ.”

Nyi ma nuˇ nehˬ ve ngaˬ hui shu geh cawˇ daꞈ gʼa tuˬ ga laˇ gʼa jaˇ. Beuꞈ puiˉ ve chaw kʼo, awˬ chawˇ hkʼaˬ nyiˇ gʼaˇ maˇ cawˬ. Yaꞈ hkʼaˇ, ngaˬ hui nyi ma nuˇ nehꞈ ve kʼo, “cawˇ daꞈ hawˍ daꞈ ve teˇ ceuˬ” cawˬ ve yoˬ. (Eˇfeˇsuꞈ 4:2, 3) Hkeh˗htiˇ kʼawꞈ kʼoˆ ve, “chaw teˇ hpaˍ hpaˍ geh awˬ chawˇ te maˇ gʼa ve htawˇ, ngaˬ nyi ma nuˇ nehˬ ve cawˬ htaˇ shu geh awˬ chawˇ te gaˇ ve yoˬ.”

Nyi ma nuˇ nehˬ ve lehˬ nyi ma gawˬ lehˍ cawˬ tuˬ ga laˇ ve yoˬ. Liꞈ hpu hkʼaw kʼoˆ ve, “mvuhˇ naw ma lo yaꞈ la ve cuˇ yiˍ lehˬ” nyi ma nuˇ nehˬ ve leh dawˇ sha gawˬ lehˍ cawˬ ve yoˬ. (Yaˍkoˆ 3:13, 17) Nyi ma nuˇ nehˬ ve chaw lehˬ “nyi ma hkʼaw gawˬ lehˍ cawˬ” ve yoˬ. (Tawˇ naˉ ve 14:30) Maˍhtiˆ nyi ma nuˇ nehˬ ve cawˬ tuˬ coˇ caˇ jaˇ. Yawˇ kʼoˆ ve, “chi teˇ hkui ngaˬ ve dawˇ hkʼaˇ htaꞈ tiˉ maˇ yuˬ tiˍ leh nyi ma gawˬ lehˍ cawˬ ve ha lehˬ jaˇ.”

Awˬ tehˬ kʼo, nyi ma nuˇ nehˬ ve chaw hpehꞈ tuˬ gʼa coˇ caˇ jaˇ. Awˬ viˉ awˬ nyi hawˉ hkʼaˆ teˇ gʼaˇ kʼoˆ ve, “teˇ pawˆ pawˆ kʼo ngaˬ beuꞈ jaˇ.” Yaꞈ hkʼaˇ, ngaˬ hui nyi ma nuˇ nehˬ ve cawˬ tuˬ Yaˬhoˉvaˬ ga laˇ ve yoˬ. (Iˉsaˍyaˆ 41:10; 1 Tiˆmoˉseˍ 6:11) Yawˇ ngaˬ hui htaꞈ ‘maˍ laˇ leh te gʼa tuˬ yoˬ.’ Leh ‘yawˇ ngaˬ hui yonˍ yeˬ ve cawˬ tuˬ kaꞈ ga laˇ ve yoˬ.’ (1 Peˍtruˆ 5:10) Awˬ leh meuˇ htaˇ ngaˬ hui tcuh yaˇ Pawˇluꞈ hkʼa shuˍ, “Hkriꞈ ve nyi ma nuˇ nehˬ ve teˇ ceuˬ” cawˬ tuˬ ga laˇ ve yoˬ.—2 Kawˇrenˍhtuˆ 10:1.