Awˬ pa awˬ e, nawˬ ve yaˇ yonˍ tuˬ ga piˇ ve
“Chaw haˉ yaˇ miˇ haˉ teˇ hpaˍ . . . yawˇ hui hkʼa peu˗eˬ, Gʼuiˬ sha ve awˬ meh htaꞈ chiˇ mvuh piˇ˗oˆ.” —Chiˇ mvuh ve 148:12, 13.
Kʼa muiˬ liꞈ: 41, 48
1, 2. (a) Aˬ htoꞈ ma pa taw awˬ pa awˬ e yaˇ htaꞈ Yaˬhoˉvaˬ ve awˬ lawn maˍ tuˬ maˇ sha ve le? Awˬ pa awˬ e awˬ hkʼaˇ teˇ ma tiˉ te gʼa ve aˬ htoꞈ ma le? (b) Ngaˬ hui awˬ lawn 4 maˬ aˬ htoꞈ ma gʼa henˇ tuˬ le?
Awˬ pa awˬ e teˇ ca kʼoˆ ve, “ngaˬ hui Yaˬhoˉvaˬ htaꞈ yonˍ ve yoˬ. Yaꞈ hkʼaˇ, yaˇ yonˍ hkʼaˇ chi hkʼa shuˍ shuˍ cawˬ tuˬ ve maˇ heˆ. Yonˍ ve teˇ ceuˬ awˬ shinˉ awˬ ka gʼa ve maˇ heˆ, ngaˬ hui ve yaˇ a yehˉ yehˉ cawˬ la gʼa ve yoˬ.” Awˬ viˇ awˬ nyi hawˉ hkʼaˆ teˇ gʼaˇ kʼoˆ ve, “nawˬ ve yaˇ yonˍ la tuˬ ga piˇ ve lehˬ, haˍ jaˇ ve awˬ lawn hpehꞈ ve yoˬ. Yaˇ ve na hkawˇ htaꞈ nawˬ hkʼawꞈ piˇ ve daꞈ jaˇ ve tehꞈ dawˇ ve yoˬ. Yaꞈ hkʼaˇ, peuˬ hkʼawꞈ nawˉ na hkawˇ chi hkʼa shuˍ kʼawꞈ na laˇ ve yoˬ! Yaꞈ nyi yaˇ ve htawˇ dawˇ nawˬ dawˇ awˬ pon hkʼawꞈ piˇ hkawˇ lawꞈ ve yoˬ. Yaꞈ hkʼaˇ shawˉ pawˍ yawˇ awˬ pon hkʼawꞈ piˇ hkawˇ chi ve maˇ lawꞈ.” Yaˇ uiˍ laˇ htaˇ, awˬ pa awˬ e laiˉ gʼaˇ maˍ piˇ jaw ve awˬ lawn chi aꞈ kehˉ gʼa kʼawꞈ kʼoˆ maˍ piˇ ve yoˬ. Yaˇ teˇ hpaˍ Yaˬhoˉvaˬ htaꞈ haꞈ ve maˍ piˇ tuˬ, awˬ hkʼaˇ laiˉ ceuˬ yehˇ cawˇ ve yawˇ hui gʼa mawˬ ve yoˬ.
2 Nawˬ awˬ pa awˬ e hpehꞈ ve kʼo, nawˬ ve yaˇ uiˍ la htaˇ Yaˬhoˉvaˬ htaꞈ haꞈ tuˬ leh hkʼaˬ htaˆ kaꞈ, Gʼuiˬ sha ve kanˉ te tuˬ chi hkʼe maˍ gʼa ve, htawˇ dawˇ nawˬ dawˇ jaw˗aw laˇ? Awˬ tehˬ kʼo, ngaˬ hui a shu yawˇ hkʼaˇ yawˇ chi hkʼe te maˇ gʼa. (Yeˍraˍmiˆ 10:23) Chi htaꞈ pa taw, ngaˬ hui Yaˬhoˉvaˬ ga laˇ tuˬ loˍ ve yoˬ. Gʼuiˬ sha awˬ pa awˬ e htaꞈ awˬ hkʼaˇ beˆ maˍ laˇ ve yoˬ. Nawˬ ve yaˇ teˇ hpaˍ htaꞈ hkʼaˬ hkʼe ga piˇ gʼa tuˬ le? (1) Yawˇ htaꞈ hkʼa dehꞈ gʼa shiˍ ve. (2) Yaˬhoˉvaˬ ve awˬ lawn nawˬ ve nyi ma hkʼaw cawˬ ve yawˇ hui htaꞈ maˍ piˇ sheˍ. (3) Uˉ paˬ maˬ htaꞈ yehˇ sheˍ. (4) Daꞈ kehˬ ve awˬ ha hpu gʼa tuˬ, Gʼuiˬ sha geh bon lawˬ ve leh nawˬ ve yaˇ teˇ hpaˍ geh yeunˇ hkanˍ ve yoˬ.
Yaˇ teˇ hpaˍ htaꞈ hkʼa dehꞈ gʼa shiˍ ve
3. Yeˍsuˆ awˬ laꞈ gʼawˇ hui htaꞈ maˍ piˇ ve awˬ hkʼaˇ, awˬ pa awˬ e hkʼaˬ hkʼe henˇ yuˬ gʼa ve le?
3 Nawˬ hui aˬ htoꞈ ma htaꞈ yonˍ ve le tehꞈ, Yeˍsuˆ awˬ laꞈ gʼawˇ htaꞈ hkʼaˬ htaˆ kaꞈ na piˇ ve yoˬ. (Maꞈhtehˍ 16:13-15) Nawˬ Yeˍsuˆ htaꞈ henˇ yuˬ gʼa ve yoˬ. Yaˇ teˇ hpaˍ geh awˬ yanˇ yehˇ htaˇ, hkʼaˬ hkʼe dawˇ ve le na piˇ leh yawˇ ve nyi ma hkʼaw cawˬ ve kʼoˆ maˍ tcuh sheˍ. Yawˇ hui htawˇ dawˇ nawˬ dawˇ cawˬ˗aw laˇ? Awˬ viˉ awˬ nyi hawˉ hkʼaˆ paˍ yaˇ nehˬ teˇ gʼaˇ kʼoˆ ve, “ngaˬ pa ngaˬ ve yonˍ hkʼaˇ htaꞈ yaw ve dawˇ cawˇ leh ngaˬ dawˇ nyi tuˬ gʼa laˇ ve yoˬ. Ngaˬ pa ngaˬ htaꞈ na laˇ ve, ‘Liꞈ hpu hkʼaˬ hkʼe kʼoˆ ve le?’ ‘Nawˬ awˬ lawn chi htaꞈ yonˍ˗aw laˇ?’ ‘Leh aˬ htoꞈ ma te nawˬ yonˍ ve le?’ Yawˇ ngaˬ ve tawˇ hkawˇ hkʼawꞈ laˇ tcuh gaˇ ve, yawˇ ve maˇ heˆ leh ngaˬ e ve tawˇ hkawˇ hkʼaˇ suh maˇ hkʼawꞈ tcuh gaˇ. Ngaˬ a shaꞈ maˇ la htaˇ, yawˇ chi aꞈ kehˉ kʼoˆ maˍ tcuh gaˇ ve yoˬ.”
4. Aˬ htoꞈ ma pa taw yeunˇ hkanˍ leh yaˇ na ve hkawˇ hkʼawꞈ piˇ ve a yeˇ uiˍ ve le? Tawˇ pa haˉ kʼoˆ maˍ laˇ sheˍ.
4 Liꞈ hpu hkʼaw cawˬ ve awˬ ceuˬ htaꞈ awˉ lawˉ htaˇ kaꞈ nawˬ ve yaˇ teˇ hpaˍ maˇ yonˍ ve kʼo, yeunˇ hkanˍ sheˍ. Yaˇ teˇ hpaˍ na hkawˇ cawˬ ve kʼo, yawˇ hui htaꞈ ga piˇ sheˍ. Awˬ pa teˇ gʼaˇ kʼoˆ ve, “yaˇ ve na hkawˇ teˇ hpaˍ htaꞈ a yeˇ te piˇ sheˍ. Yawˇ ve awˬ lawn a yeˇ maˇ uiˍ tehꞈ taˇ dawˇ leh, hkʼawꞈ piˇ haˍ ve leh maˇ hkʼawꞈ piˇ gaˇ ve awˬ lawn htaꞈ taˇ jaw kʼai.” Awˬ tehˬ kʼo, yaˇ na hkawˇ cawˬ ve kʼo, daꞈ jaˇ ve awˬ lawn hpehꞈ ve yoˬ. Awˬ lawn kʼo, yawˇ hkʼa dehꞈ na gʼa gaˇ ve yoˬ. Yeˍsuˆ yaˇ ehˉ hpehꞈ htaˇ kaꞈ, na hkawˇ cawˬ ve yoˬ. (Luˉkaꞈ 2:46 gʼaw ve.) Yaˇ nehˬ teˇ gʼaˇ kʼoˆ ve, “ngaˬ hui awˬ tehˬ awˬ na ve bon liˇ htaꞈ yonˍ chehˇ˗aw laˇ, ngaˬ htawˇ dawˇ nawˬ dawˇ te htaˇ, yawˇ dawˇ haˍ ve htawˇ, ngaˬ pa ngaˬ e nyi ma nuˇ nehˬ jaˇ ve yoˬ. Yawˇ hui ngaˬ na piˇ ve teˇ hkawˇ le le Liꞈ hpu htaꞈ cuˇ leh hkʼawꞈ laˇ ve yoˬ.”
5. Yaˇ teˇ hpaˍ Yaˬhoˉvaˬ geh yonˍ ve htaꞈ shuˍ ve htawˇ, awˬ pa awˬ e hkʼaˬ hkʼe te cawˇ ve le?
5 Yaˇ teˇ hpaˍ htaꞈ hkʼa dehꞈ gʼa shiˍ ve yoˬ. Yawˇ hto toˇ leh hpawnˬ daꞈ kuiˬ lo kʼai ve pa taw, yawˇ Yaˬhoˉvaˬ htaꞈ yonˍ ve tehꞈ taˇ dawˇ. Yawˇ Yaˬhoˉvaˬ htaꞈ awˬ tehˬ awˬ na hkʼaˬ hkʼe dawˇ ve le? Leh Liꞈ hpu hkʼaw kaꞈ hkʼaˬ hkʼe dawˇ ve le? Yawˇ hui Yaˬhoˉvaˬ geh ka tiꞈ yeˬ tuˬ aˬ htoꞈ ma teˇ ceuˬ tawˍ laˇ ve le, coˇ caˇ leh ca sheˍ. Teˇ nyi le le nawˬ ve yaˇ geh chehˇ htaˇ, Yaˬhoˉvaˬ ve awˬ lawn yaw daꞈ sheˍ. Yawˇ geh chehˇ htaˇ maˇ heˆ leh maˇ chehˇ htaˇ nawˬ ve yaˇ awˬ pon bon lawˬ sheˍ.
Yaˬhoˉvaˬ ve awˬ lawn nawˬ ve nyi ma hkʼaw cawˬ ve yawˇ hui htaꞈ maˍ piˇ sheˍ
6. Awˬ pa awˬ e Yaˬhoˉvaˬ leh Liꞈ hpu ve awˬ lawn htaꞈ hkʼaˬ htaˆ kaꞈ caˉ leh henˇ ve kʼo, chi ve nawˬ ve yaˇ htaꞈ maˍ tuˬ hkʼaˬ hkʼe ga laˇ ve le?
6 Yeˍsuˆ Yaˬhoˉvaˬ htaꞈ haꞈ leh Liꞈ hpu hkʼaw htaꞈ hkʼa dehꞈ shiˍ ve pa taw, laiˉ gʼaˇ yawˇ ve hkawˇ htaꞈ na gaˇ ve yoˬ. Yeˍsuˆ yawˇ hui htaꞈ kaꞈ haꞈ ve yoˬ tehꞈ, yawˇ hui dawˇ ve yoˬ. Chi htaꞈ pa taw, yawˇ hui Yeˍsuˆ htaꞈ hkʼa dehꞈ na ve yoˬ. (Luˉkaꞈ 24:32; Yoˇhanˬ 7:46) Chi hkʼa shuˍ, nawˬ Yaˬhoˉvaˬ htaꞈ haꞈ ve yaˇ teˇ hpaˍ mawˬ htaˇ, chi lehˬ Gʼuiˬ sha htaꞈ kaꞈ haꞈ tuˬ ga piˇ ve yoˬ. (Bon maˍ ve 6:5-8; Luˉkaꞈ 6:45 gʼaw ve.) Chi htaꞈ pa taw, nawˬ Liꞈ hpu htaꞈ hkʼa dehꞈ henˇ sheˍ, leh ngaˬ hui ve liꞈ kʼoˆ teˇ hpaˍ htaꞈ hkʼaˬ htaˆ kaꞈ gʼaw sheˍ. Yaˬhoˉvaˬ hpanˍ taˍ ve awˬ ceuˬ htaꞈ shiˍ gʼa tuˬ, hkʼa dehꞈ coˇ caˇ sheˍ. (Maꞈhtehˍ 6:26, 28) Nawˬ Yaˬhoˉvaˬ htaꞈ gʼaˇ hteꞈ shiˍ maˇ la ve kʼo, nawˬ ve yaˇ htaꞈ maˍ piˇ tuˬ, laiˉ ceuˬ cawˬ ve yoˬ.—Luˉkaꞈ 6:40.
7, 8. Yaˬhoˉvaˬ ve awˬ lawn teˇ hpaˍ henˇ shiˍ htaˇ, nawˬ aˬ htoꞈ ma te cawˇ ve le? Awˬ pa awˬ e teˇ hpaˍ chi hkʼa shuˍ shuˍ hkʼaˬ hkʼe te ve le?
7 Yaˬhoˉvaˬ ve awˬ lawn teˇ ceuˬ ceuˬ henˇ ve kʼo, nawˬ ve yaˇ htaꞈ kʼoˆ maˍ piˇ sheˍ. Hkʼaˬ htaˆ kaꞈ chi hkʼe te sheˍ, hpawnˬ daꞈ ve awˬ lawn gu ve leh yehˬ kʼa hkʼaw oˉ kʼoˍ pui htaˇ ceh tiˉ maˇ heˆ. Chi lehˬ, awˬ pa awˬ e teˇ ca te ve yoˬ. Suhˆ cehˬ hawˆ cehˬ daꞈ jaˇ ve htaꞈ gʼa mawˬ ve maˇ heˆ leh caˇ tuˬ mehˬ ve htaꞈ gʼa caˇ ve ha lehˬ htaˇ, Yaˬhoˉvaˬ ve awˬ lawn yawˇ hui ve yaˇ teˇ hpaˍ htaꞈ kʼoˆ maˍ piˇ ve yoˬ. Yawˇ hui kʼoˆ ve, “Yaˬhoˉvaˬ ngaˬ hui awˬ pon teˇ ceuˬ le le te laˇ tuˬ, yawˇ haꞈ pehnˇ leh coˇ caˇ te laˇ ve yoˬ. Ngaˬ hui ve yaˇ teˇ hpaˍ htaꞈ hkʼaˬ htaˆ kaꞈ kʼoˆ maˍ piˇ ve yoˬ.” Awˬ pa awˬ e oˇ ve teˇ ca htawˇ, yawˇ ve yaˇ miˇ nyiˇ gʼaˇ geh hko hkʼaw lo kanˉ te htaˇ, hpanˍ taˍ ve awˬ ceuˬ htaꞈ yaw daꞈ ve dawˇ cawˇ ve yoˬ. Tawˇ pa haˉ te kʼo, awˬ yawˇ ehˉ i ve htawˇ suhˆ cehˬ kʼawꞈ hpehꞈ la ve anˇ tuˬ cawˬ ve yoˬ tehꞈ yawˇ hui yaw daꞈ ve yoˬ. Awˬ pa awˬ e kʼoˆ ve, “yaˇ teˇ hpaˍ a shaꞈ htaꞈ yawˆ yan leh awˬ bon uiˍ hkawˇ kʼoˆ piˇ tuˬ, coˇ caˇ leh ga piˇ ve yoˬ.”
8 Awˬ pa teˇ gʼaˇ yawˇ ve yaˇ paˍ geh mawˇ awˬ peˍ gʼawˆ teh kuiˬ lo kʼai ve yoˬ. Yaˇ ve yonˍ hkʼaˇ yonˍ maˇ la leh Yaˬhoˉvaˬ te hpanˍ shehˍ hpaˇ hpehꞈ ve henˇ tuˬ, awˬ pa chi teˇ gʼaˇ awˬ yanˇ chi htaꞈ yehˇ ve yoˬ. Yawˇ kʼoˆ ve, “laˇ tsuhˇ gʼuiˬ hkʼaw ve to nuˇ to shaˆ awˬ piˍ faiˉ shiˍ htaꞈ shuˍ ve ngaˬ hui teˇ geh nyi ve yoˬ. To nuˇ to shaˆ suh kʼai peuˬ ve chi lehˬ daꞈ jaˇ leh hkʼa biˇ hkʼa lawꞈ cawˬ ve, chi teˇ hkui ngaˬ hui mawˬ gʼa ve to noˇ to shaˆ teˇ hpaˍ htaꞈ maˇ peuˬ daꞈ ve yoˬ. Hkʼa sha sha˗ehˬ ve a shaꞈ teꞈ ve awˬ ceuˬ teˇ ceuˬ htaꞈ pa leh hkʼa biˇ hkʼa lawꞈ ve awˬ suhˉ teˇ ceuˬ kʼawꞈ hpehꞈ kʼai ve kʼo, faiˉ shiˍ awˬ piˍ chi teˇ hpaˍ aˬ htoꞈ ma pa taw hkʼa biˇ hkʼa lawꞈ cawˬ ve le? Awˬ lawn chi ve, nyi ma hpfuhˇ lawꞈ lawꞈ cawˬ jaˇ leh ngaˬ ve yaˇ paˍ htaꞈ maˍ piˇ gaˇ ve yoˬ.”
Uˉ paˬ maˬ htaꞈ yehˇ sheˍ
9. Aˬ htoꞈ ma te ngaˬ hui uˉ pa maˬ htaꞈ yehˇ cawˇ ve le? Awˬ e teˇ gʼaˇ uˉ paˬ maˬ hkʼaˬ hkʼe ve yehˇ ve le?
9 Yeˍsuˆ uˉ paˬ maˬ htaꞈ maˇ maˇ yehˇ ve yoˬ. Yawˇ a yeˇ uiˍ ve awˬ ceuˬ maˍ htaˇ, awˬ lawn htaꞈ kʼoˆ maˍ piˇ ve leh tawˇ pa haˉ htaꞈ yehˇ ve yoˬ. (Maꞈhtehˍ 13:34, 35) Nawˬ uˉ paˬ maˬ htaꞈ yehˇ htaˇ, yaˇ teˇ hpaˍ yawˇ ve dawˇ nyi puiˉ ve yehˇ tuˬ ga piˇ gʼa ve yoˬ. Chi lehˬ, nawˬ maˍ piˇ chehˇ ve awˬ lawn htaꞈ yawˇ dawˇ nyi tuˬ, hkʼa dehꞈ dehꞈ na gʼa tuˬ, leh tawˇ gʼa tuˬ yawˇ htaꞈ ga piˇ ve yoˬ. Leh yawˇ hui henˇ ve kaꞈ dawˇ cawˇ tuˬ yoˬ. Awˬ e teˇ gʼaˇ ve tawˇ pa haˉ htaꞈ dawˇ nyi sheˍ. Yaˬhoˉvaˬ mvuhˇ haw awˬ shaˉ te hpanˍ htaˇ, yawˇ ngaˬ hui awˬ pon dawˇ nyi puiˉ jaˇ ve yoˬ tehꞈ, yawˇ ve yaˇ pa a shaꞈ 10 hkʼawꞈ leh 8 hkʼawꞈ gaˬ ve htaꞈ henˇ tcuh gaˇ ve yoˬ. Yawˇ hui na gʼa ve uˉ paˬ maˬ htaꞈ yehˇ tuˬ, nuˇ cuˉ gʼuiˬ, keu vanˉ, leh kaˍ fiˍ piˇ ve yoˬ. Leh yawˇ awˬ pon yaˇ htaꞈ kaˍ fiˍ teˇ gʼaˇ teˇ hkehˇ te tcuh ve yoˬ. Yawˇ kʼoˆ ve, “yawˇ hui coˇ caˇ jaˇ ve yoˬ. ‘Nawˬ aˬ htoꞈ ma te chi hkʼe te coˇ caˇ ve le’ tehꞈ na piˇ htaˇ, ‘ngaˬ e dawˇ cawˇ jaˇ ve kaˍ fiˍ te piˇ gaˇ ve yoˬ’ tehꞈ yawˇ hui kʼoˆ ve yoˬ. Ngaˬ kʼawꞈ kʼoˆ maˍ piˇ ve, Gʼuiˬ sha kaꞈ chi hkʼa shuˍ yoˬ. Yawˇ mvuhˇ haw awˬ shaˉ ngaˬ hui awˬ pon keunˍ lawꞈ cawˇ lawꞈ coˇ caˇ leh te hpanˍ laˇ ve yoˬ.” Yawˇ hui awˬ lawn chi htaꞈ henˇ ve dawˇ cawˇ jaˇ leh maˇ leuˇ ve yoˬ!
Nawˬ hkʼa sha sha˗ehˬ ve uˉ paˬ maˬ yehˇ leh hpanˍ shehˍ hpaˇ cawˬ ve yoˬ tehꞈ nawˬ ve yaˇ htaꞈ kʼoˆ maˍ piˇ gʼa ve (Awˬ tawn 10 nyi sheˍ)
10, 11. (a) Te hpanˍ shehˍ hpaˇ cawˬ ve tehꞈ nawˬ ve yaˇ teˇ hpaˍ htaꞈ maˍ tuˬ, nawˬ uˉ paˬ maˬ hkʼaˬ hkʼe yehˇ ve le? (Awˬ lawn tanˬ htaˇ ve awˬ han htaꞈ nyi sheˍ.) (b) Nawˬ uˉ paˬ maˬ aˬ ma ve awˬ lawn ve yehˇ jaw ve le?
10 Te hpanˍ shehˍ hpaˇ cawˬ ve tehꞈ, nawˬ ve yaˇ teˇ hpaˍ htaꞈ maˍ tuˬ, nawˬ uˉ paˬ maˬ hkʼaˬ hkʼe yehˇ ve le? Awˬ chiˇ te tuˬ ve liꞈ kʼoˆ awˬ hkʼaˇ yehˇ leh, nawˬ ve yaˇ geh awˬ chiˇ te gʼa ve yoˬ. Liꞈ kʼoˆ chi ve awˬ hkʼaˇ suh awˬ chiˇ gʼaꞈ te tuˬ aˬ htoꞈ ma pa taw a yeˇ uiˍ ve le tehꞈ, kʼoˆ maˍ piˇ sheˍ. Peuˬ leh yaˇ htaꞈ iˉ shiˍ piˇ leh na piˇ ve, “iˉ shiˍ chi ve kaꞈ awˬ chiˇ te tuˬ ve liꞈ kʼoˆ hkʼa shuˍ shuˍ cawˬ ve nawˬ shiˍ˗aw laˇ?” Peuˬ leh, iˉ shiˍ hkoˇ leh yaˇ htaꞈ awˬ yawˇ piˇ ve yoˬ. Awˬ yawˇ chi ve awˬ chiˇ te tuˬ ve liꞈ kʼoˆ hkʼa shuˍ shuˍ leh iˉ shiˍ chi hpanˍ ve awˬ hkʼaˇ cawˬ ve yoˬ tehꞈ, kʼoˆ maˍ piˇ sheˍ. Yaꞈ hkʼaˇ, iˉ shiˍ te hpanˍ taˍ ve awˬ hkʼaˇ lehˬ awˬ chiˇ te ve awˬ hkʼaˇ aꞈ kehˉ haˍ jaˇ ve yoˬ. “Awˬ chiˇ te tuˬ ve liꞈ kʼoˆ chi bvuhꞈ paˍ gʼa cawˬ ve yoˬ. Leh iˉ shiˍ te hpanˍ taˍ ve awˬ hkʼaˇ a shu bvuhꞈ ve le?” tehꞈ, nawˬ na nyi piˇ gʼa ve yoˬ. Nawˬ ve yaˇ yaˇ nehˬ hpehꞈ ve kʼo, awˬ shiˍ ve awˬ yawˇ hkʼaw DNA leh te hpanˍ ve awˬ hkʼaˇ cawˬ ve yoˬ tehꞈ kʼoˆ maˍ piˇ hpehꞈ ve yoˬ. Awˬ hkuiˉ puiˍ ve a shaꞈ—Na hkawˇ 5 maˬ dawˇ nyi cawˇ ve liꞈ kʼoˆ liꞈ mehˆ hpfuhˇ 10 leh 20 hkʼa gaˬ awˬ han leh tawˇ pa haˉ teˇ hpaˍ kaꞈ maˍ piˇ gʼa ve yoˬ.
11 Tu loˬ! hkʼaw “Dawˇ shehˍ hpaˇ cawˬ˗aw laˇ?” ve awˬ lawn awˬ pa awˬ e laiˉ gʼaˇ yaˇ geh gʼaw ve yoˬ. Nawˬ ve yaˇ a shaꞈ i ve kʼo, awˬ pa awˬ e hkʼa sha sha˗eh ve kʼoˆ maˍ piˇ gʼa ve yoˬ. Tawˇ pa haˉ te kʼo, awˬ pa awˬ e teˇ ca caꞈ poˬ leh ngaˆ htaꞈ tehˆ maˍ piˇ ve yoˬ. Yawˇ hui kʼoˆ ve, “caꞈ poˬ lehˬ ngaˆ htaꞈ shuˍ ve yoˬ. Caꞈ poˬ lehˬ awˬ u u leh awˬ yehˇ hpiˇ la gʼa˗aw laˇ? Ngaˆ lehˬ, yaꞈ kuiˬ awˬ ti hkʼa dehꞈ dehꞈ cawˬ cawˇ˗aw laˇ? Ngaˆ leh caꞈ poˬ ve awˬ hkawˇ hkʼaˬ ve teˇ maˬ aˬ tcuhˉ na shaˍ ve le? Chi htaꞈ pa taw, caꞈ poˬ htaꞈ te paˍ leh ngaˆ htaꞈ hpanˍ shehˍ hpaˉ a shu a ciˉ cuˇ yiˍ cawˬ ve le?” Nawˬ yaˇ geh yaw daꞈ leh na hkawˇ yehˇ htaˇ, yawˇ hui ve “dawˇ shiˍ puiˉ ve nyi ma” yehˇ tuˬ leh Yaˬhoˉvaˬ htaꞈ yonˍ ve maˇ la tuˬ, ga piˇ ve yoˬ.—Tawˇ naˉ ve 2:10-12.
12. Liꞈ hpu hkʼaw bvuhꞈ taˍ ve awˬ ceuˬ hkʼa peu˗eˬ cawˇ jaˇ ve nawˬ ve yaˇ htaꞈ maˍ piˇ tuˬ, nawˬ uˉ paˬ maˬ htaꞈ hkʼaˬ hkʼe yehˇ tuˬ le?
12 Liꞈ hpu hkʼaw bvuhꞈ taˍ ve awˬ ceuˬ hkʼa peu˗eˬ cawˇ ve yoˬ tehꞈ yaˇ htaꞈ maˍ piˇ tuˬ, uˉ paˬ maˬ htaꞈ kaꞈ yehˇ gʼa ve yoˬ. Tawˇ pa haˉ te kʼo, Yawˇbaˆ 26:7 gʼaw ve yoˬ. (Gʼaw ve.) Awˬ lawn chi ve Gʼuiˬ sha geh la ve yoˬ tehꞈ, yaˇ htaꞈ chi hkʼe ceh tiˉ kʼoˆ piˇ ve maˇ teˇ cawˇ. Yaꞈ hkʼaˇ, awˬ han htaꞈ dawˇ nyi gʼa tuˬ yawˇ htaꞈ ga piˇ sheˍ. Nawˬ ve yaˇ htaꞈ kʼoˆ piˇ ve, Yawˇbaˆ ve awˬ co˗e htaˇ, miˬ guiˬ htaꞈ poˬ hpe poˬ laꞈ kaˍ lo kʼuˉ taˍ ve yoˬ tehꞈ, chaw teˇ gʼaˇ kaꞈ maˇ yonˍ ve yoˬ. Bawˉ shiˍ leh haˉ pui shiˍ hkʼa shuˍ awˬ ceuˬ hkʼa peu˗eˬ mawˇ teˇ ceuˬ awˬ hkʼoˆ gʼa teh taˍ ve, yawˇ hui chi hkʼe dawˇ ve yoˬ. Oˇ htaˇ teˇ co˗eˬ htaˇ, teˇ gʼaˇ kaꞈ awˬ teh ve htaꞈ maˇ shiˍ sheˍ, awˬ lawn kʼo meuꞈ keu shiˍ nyi tuˬ ve awˬ hkʼeun leh miˬ guiˬ awˬ baˬ lo kʼai ve caꞈ poˬ maˇ cawˬ ve yoˬ. Chi htaꞈ pa taw, Liꞈ hpu bvuhꞈ laˬ ve maw jaˇ peuˬ ve htawˇ, Yaˬhoˉvaˬ geh la ve pa taw, hkʼaˬ htaˆ kaꞈ cawˇ ve yoˬ tehꞈ, ngaˬ hui gʼa henˇ ve yoˬ.—Neˍhaˍmiˆ 9:6.
Liꞈ hpu hkʼaw gʼaꞈ te ve aˬ htoꞈ ma te daꞈ ve le, yawˇ htaꞈ maˍ piˇ sheˍ
13, 14. Liꞈ hpu htaꞈ na yuˬ tuˬ, awˬ pa awˬ e yawˇ ve yaˇ htaꞈ hkʼaˬ hkʼe ga piˇ gʼa ve le?
13 Yaˇ Liꞈ hpu hkʼaw bvuhꞈ taˍ ve awˬ ceuˬ htaꞈ na yuˬ ve kʼo, yawˇ ha lehˬ jaˇ tuˬ yoˬ tehꞈ maˍ piˇ ve a yeˇ uiˍ jaˇ ve yoˬ. (Chiˇ mvuh ve 1:1-3 gʼaw ve.) Tawˇ pa haˉ te kʼo, nawˬ ve yaˇ htaꞈ kʼo piˇ ve, conˇ hkʼaw gʼa ca chehˇ ve kʼo dawˇ nyi sheˍ, a shu yawˇ geh chehˇ tuˬ gʼa leuˆ yuˬ ve yoˬ. “Nawˬ geh hkʼaˬ hkʼe ve chaw ca chehˇ tcuh gaˇ ve le?” Nawˬ chi hkʼe na piˇ gʼa ve yoˬ. Awˬ leh meuˇ, Yaˬhoˉvaˬ hkʼaˬ hkʼe ve chaw miˬ guiˬ awˬ suhˉ hkʼaw chehˇ tcuh gaˇ tuˬ, Gaˍlaˍtiˆ 5:19-23 teˇ geh gʼaw sheˍ.
14 Chi hkʼe te ve kʼo, nawˬ a yeˇ uiˍ ve awˬ lawn 2 ceuˬ yaˇ htaꞈ maˍ piˇ gʼa ve yoˬ. Awˉ lawˉ teˇ ceuˬ, chi teˇ hkui ngaˬ hui a shaꞈ teꞈ ve ha lehˬ jaˇ leh shu geh chehˇ ve awˬ hkʼaˇ Yaˬhoˉvaˬ maˍ laˇ chehˇ ve yoˬ. Nyiˇ ceuˬ teˇ ceuˬ, miˬ guiˬ awˬ suhˉ hkʼaw chehˇ tuˬ awˬ hkʼaˇ yawˇ ngaˬ hui htaꞈ maˍ laˇ chehˇ ve yoˬ. (Iˉsaˍyaˆ 54:13; Yoˇhanˬ 17:3) Liꞈ hpu ngaˬ hui awˬ viˉ awˬ nyi htaꞈ hkʼaˬ hkʼe ga laˇ ve nawˬ ve yaˇ htaꞈ maˍ piˇ gʼa ve yoˬ. Shaw nyi kuiˬ taꞈ yehˬ hkʼaw “Liꞈ hpu a shaꞈ htaꞈ pa gʼa ve” hkʼa shuˍ ngaˬ hui ve liꞈ kʼoˆ teˇ hpaˍ hkʼaw awˬ viˉ awˬ nyi hpehꞈ laˬ jaw ve awˬ lawn htaꞈ yehˇ gʼa ve yoˬ. Maˇ heˆ kʼo, yawˇ ve te hkʼaˇ htaꞈ pa leh Yaˬhoˉvaˬ htaꞈ ha lehˬ piˇ tuˬ, Liꞈ hpu yawˇ htaꞈ hkʼaˬ hkʼe ga piˇ ve le, awˬ viˉ awˬ nyi nawˬ leh nawˬ ve yaˇ htaꞈ kʼoˆ maˍ laˇ ve.—Heˍbrehˇ 4:12.
15. Nawˬ ve yaˇ htaꞈ maˍ gʼa tuˬ, hkʼaˬ hkʼe te gʼa ve le?
15 Nawˬ maˍ piˇ ve awˬ lawn yaˇ dawˇ cawˇ leh nyi ma pfuhˇ lawꞈ lawꞈ cawˬ tuˬ, hkʼa dehꞈ dehꞈ dawˇ nyi sheˍ. Yaˬhoˉvaˬ ve awˬ lawn henˇ ve dawˇ cawˇ tuˬ leh yawˇ geh meuˆ daꞈ maˇ la tuˬ, awˬ lawn teˇ hpaˍ hpaˍ htaꞈ dawˇ nyi leh yawˇ htaꞈ ga piˇ ve yoˬ. Leh yawˇ a shaꞈ maˇ la htaˇ, caˉ leh kʼawꞈ te kʼai sheˍ. Awˬ pa teˇ gʼaˇ kʼoˆ ve, “maˍ piˇ jaw ve awˬ lawn htaꞈ maˍ piˇ tuˬ, coˇ caˇ leh awˬ hkʼaˇ awˬ suhˉ gʼa ca ve yoˬ.”
Daꞈ kehˬ ve awˬ ha hpu gʼa tuˬ Gʼuiˬ sha geh bon lawˬ ve leh nawˬ ve yaˇ teˇ hpaˍ geh yeunˇ hkanˍ ve
16. Yaˇ htaꞈ maˍ piˇ htaˇ, yeunˇ hkanˍ ve chi aˬ htoꞈ ma te a yeˇ uiˍ ve le? Awˬ pa awˬ e teˇ hpaˍ hkʼaˬ hkʼe te yeunˇ hkanˍ ve le?
16 Yaˬhoˉvaˬ daꞈ kehˬ ve awˬ ha hpu ga laˇ htaˇ, nawˬ ve yaˇ yonˍ hkʼaˇ uiˍ la mvuh la gʼa ve yoˬ. (Gaˍlaˍtiˆ 5:22, 23) Yaꞈ hkʼaˇ, yaˇ ve yonˍ hkʼaˇ uiˍ la mvuh la gʼa tuˬ awˬ yanˇ gʼa yehˇ ve yoˬ. Nawˬ ve yaˇ geh yeunˇ hkanˍ leh hkʼaˬ htaˆ kaꞈ maˍ piˇ sheˍ. Awˬ pa teˇ gʼaˇ yaˇ paˍ leh yaˇ miˇ cawˬ ve yawˇ kʼoˆ ve, “ngaˬ leh ngaˬ ve awˬ miˇ ma yaˇ htaꞈ a yeˇ hkʼa dehꞈ yuˬ piˇ ve, yawˇ hui yaˇ ehˉ hpehꞈ chehˇ htaˇ, hpawnˬ daꞈ ve awˬ nyi maˇ heˆ kʼo, teˇ nyi le le 15 miꞈ niꞈ yaˇ htaꞈ Liꞈ hpu maˍ piˇ ve yoˬ. Awˬ yanˇ 15 miꞈ niꞈ ngaˬ hui leh yaˇ awˬ pon awˬ yanˇ maˇ maw ve yoˬ.” Htoˇ nyi shehˍ hpaˇ teˇ gʼaˇ bvuhꞈ ve, “ngaˬ yaˇ nehˬ hpehꞈ htaˇ, htawˇ dawˇ nawˬ dawˇ awˬ lawn cawˬ maˇ jaˇ ve yoˬ. Hpawnˬ daꞈ ve, yehˬ kʼa hkʼaw oˉ kʼoˍ pui ve, leh a shu yawˇ hkʼaˇ yawˇ Liꞈ hpu henˇ ve chi teˇ hpaˍ teˇ htaˇ, ngaˬ ve htawˇ dawˇ nawˬ dawˇ htaꞈ ga laˇ leh hkʼawꞈ laˇ ve yoˬ. Chi htaꞈ pa taw, awˬ pa awˬ e teˇ hpaˍ caˉ leh yaˇ htaꞈ maˍ piˇ ve a yeˇ uiˍ jaˇ ve yoˬ.”
Nawˬ maˍ cheuˬ gaˇ ve kʼo, nawˬ Gʼuiˬ sha ve tawˇ hkawˇ htaꞈ gʼa haꞈ ve (Awˬ tawn 17 nyi sheˍ)
17. Awˬ pa awˬ e yawˇ ve yonˍ hkʼaˇ gʼa hteꞈ kʼawꞈ te maˇ la tuˬ, aˬ htoꞈ ma te a yeˇ uiˍ ve le? Awˬ pa awˬ e teˇ ca yawˇ ve yaˇ miˇ teˇ hpaˍ Yaˬhoˉvaˬ htaꞈ yonˍ maˇ la tuˬ, hkʼaˬ hkʼe ga piˇ ve le?
17 Nawˬ Yaˬhoˉvaˬ htaꞈ yonˍ maˇ ve yaˇ teˇ hpaˍ mawˬ htaˇ, yawˇ hui laiˉ ceuˬ gʼa henˇ tuˬ yoˬ. Nawˬ te chehˇ ve awˬ ceuˬ htaꞈ yawˇ hui mawˬ tuˬ yoˬ. Chi htaꞈ pa taw, nawˬ ve yonˍ hkʼaˇ gʼaˇ hteꞈ kʼawꞈ te maˇ la sheˍ. Yaˬhoˉvaˬ nawˬ awˬ pon awˬ tehˬ hpehꞈ ve yaˇ htaꞈ mawˬ tcuh sheˍ. Tawˇ pa haˉ te kʼo, awˬ pa awˬ e teˇ ca dawˇ haˍ ve awˬ lawn cawˬ htaˇ, yawˇ ve yaˇ miˇ teˇ hpaˍ geh bon lawˬ leh Yaˬhoˉvaˬ htaꞈ beˆ maˍ laˇ tcuh ve yoˬ. Yaˇ a shu yawˇ hkʼaˇ yawˇ bon lawˬ tuˬ awˬ gʼaˇ piˇ ve yoˬ. “Ngaˬ hui ve yaˇ miˇ uiˍ htaꞈ kʼoˆ piˇ ve, ‘Yaˬhoˉvaˬ htaꞈ hkʼa dehꞈ gʼaˇ va˗o, Gʼuiˬ sha ve kanˉ chi ma ma te˗o, leh chi ma ma taˇ dawˇ haˍ’ yawˇ oˇ hkʼe gʼaꞈ te htaˇ, Yaˬhoˉvaˬ ga laˇ chehˇ ve htaꞈ gʼa mawˬ ve yoˬ. Awˬ lawn chi yawˇ Gʼuiˬ sha leh Liꞈ hpu yonˍ maˇ la tuˬ ga piˇ ve yoˬ.”
18. Awˬ pa awˬ e aˬ htoꞈ ma maˇ leuˇ cawˇ ve le?
18 Awˬ pa awˬ e, yaˇ ve yonˍ hkʼaˇ nyiˉ te piˇ maˇ gʼa ve taˇ leuˇ sheˍ. Nawˬ ti leh iˉ kʼaˆ pfuhˍ gʼa ve, yaꞈ hkʼaˇ uiˍ la piˇ shehˍ hpaˇ Yaˬhoˉvaˬ teˇ gʼaˇ tiˉ hpehꞈ ve yoˬ. (1 Kawˇrenˍhtuˆ 3:6) Chi htaꞈ pa taw, awˬ hpfuhˇ hkʼaˆ jaˇ nawˬ ve yaˇ Yaˬhoˉvaˬ ve awˬ lawn hkʼa dehꞈ maˍ piˇ sheˍ. Yawˇ hui yonˍ ve teˇ ceuˬ cawˬ gʼa ve ga piˇ tuˬ, Gʼuiˬ sha geh daꞈ kehˬ ve awˬ ha hpu lawˬ sheˍ. Nawˬ coˇ caˇ leh kanˉ te maˇ ve htaꞈ Yaˬhoˉvaˬ awˬ bon naꞈ laˇ tuˬ, nawˬ yonˍ gʼa ve yoˬ.—Eˇfeˇsuꞈ 6:4.