Yaˬhoˉvaˬ ve awˬ bon gʼa tuˬ hkʼaˬ htaˆ kaꞈ behˇ daꞈ˗oˆ
“Nawˬ lehˬ Gʼuiˬ sha htaꞈ kaꞈ chaw yaˇ htaꞈ kaꞈ behˇ daꞈ leh gʼaˇ peuˬ ... ve yoˬ.” —Awˬ hkuiˉ puiˍ 32:28.
Kʼa muiˬ liꞈ: 23, 38
1, 2. Gʼuiˬ sha kanˉ te ve chaw aˬ htoꞈ ma gʼa bawˆ daꞈ ve le?
Aˍbeˍlaˆ hteˇ ve cawˇ ve chaw htaꞈ tanˬ leh Gʼuiˬ sha kanˉ te ve chaw chi beuꞈ teˇ co˗e hkʼa gaˬ, Gʼuiˬ sha ve ka tiꞈ yeˬ ve chaw teˇ gʼaˇ le le gʼa bawˆ daꞈ ve yoˬ. Heˍbrehˇ chaw Hkriꞈ yaˇ awˬ moˍ coˇ caˇ leh Yaˬhoˉvaˬ haꞈ yuˬ laˇ leh awˬ bon gʼa tuˬ, “yeunˇ hkanˍ ve awˬ hkʼaw lo tuꞈ ve hkanˍ ve htaꞈ gʼaˇ hteꞈ gʼa bawˆ daꞈ ve yoˬ” tehꞈ, tcuh yaˇ Pawˇluꞈ yawˇ hui htaꞈ kʼoˆ piˇ ve yoˬ. (Heˍbrehˇ 10:32-34) Hkriꞈ yaˇ awˬ moˍ gʼa bawˆ daꞈ ve lehˬ gʼuiˇ daꞈ ve, behˇ daꞈ ve maˇ heˆ leh, chu˗iˬ daꞈ ve chi hkʼe ve teˇ hpaˍ Heˍlaˍsaˆ chaw hkehˬ daꞈ ve hkʼa shuˍ Pawˇluꞈ kʼoˆ taˍ ve yoˬ. (Heˍbrehˇ 12:1, 4) Chi beuꞈ teˇ co˗e htawˇ, ngaˬ hui ve a shaꞈ awˬ pon gʼuiˇ daꞈ chehˇ ve yoˬ. Leh chi teˇ hkui ve ha lehˬ ve leh awˬ gʼuˇ suhˍ hpawˇ ve laꞈ shawnˍ htaꞈ mehˉ kʼai tcuh gaˇ ve canˇ paˍ, ngaˬ hui cawˬ ve yoˬ.
2 Saˍtanˍ leh yawˇ ve miˬ guiˬ htaꞈ, ngaˬ hui “behˇ daꞈ ve” lehˬ haˍ jaˇ ve yoˬ. (Eˇfeˇsuꞈ 6:12) Miˬ guiˬ hkʼoˆ maˍ ve awˬ lawn, haˉ chawˇ haˉ paˆ te ve, shuˉ dawˬ ve, tzuhˬ leh naˆ chi maˇ cawˇ ve awˬ hkʼaˇ yehˇ ve, chi hkʼa shuˍ shuˍ maˇ daꞈ ve te hkʼaˇ htaꞈ ngaˬ hui gʼa tawˍ daꞈ ve yoˬ. Ngaˬ hui ve awˬ gʼaˇ nuˇ ve leh gʼaˇ nuˇ kuiˬ htaꞈ kaꞈ ngaˬ hui hkʼaˬ htaˆ kaꞈ gʼa bawˆ daꞈ ve yoˬ.—2 Kawˇrenˍhtuˆ 10:3-6; Kawˇlawˇsehˇ 3:5-9.
3. Ngaˬ hui ve canˇ paˍ htaꞈ bawˆ tuˬ, Gʼuiˬ sha hkʼaˬ hkʼe te jawˬ tcuh laˇ ve le?
3 Ngaˬ hui chi hkʼe ve kanˇ paˆ cawˬ ve canˇ paˍ htaꞈ gʼaˇ˗aw laˇ? Gʼaˇ˗aw. Yaꞈ hkʼaˇ, maˇ sha! Pawˇluꞈ yawˇ awˬ to chu˗iˬ daꞈ paˍ htaꞈ tehˆ daꞈ leh yawˇ kʼoˆ ve, Chu˗iˬ daꞈ ve teˇ yanˇ, hkʼe leˇ mvuhˇ haw htaꞈ ceh ngaˬ chu˗iˬ ve maˇ heˆ.” (1 Kawˇrenˍhtuˆ 9:26) Chu˗iˬ daꞈ paˍ yawˇ geh chu˗iˬ daꞈ ve chaw htaꞈ bawˆ daꞈ ve hkʼa shuˍ, ngaˬ hui ve canˇ paˍ htaꞈ kaꞈ gʼa bawˆ daꞈ ve yoˬ. Yaˬhoˉvaˬ ngaˬ hui htaꞈ ga laˇ leh chi hkʼe te jawˬ tcuh laˇ ve yoˬ. Yawˇ chi hkʼe te tuˬ Liꞈ hpu htaꞈ yehˇ ve yoˬ. Ngaˬ hui htaꞈ ga laˇ tuˬ, Liꞈ hpu htaꞈ cuˇ ve liꞈ kʼoˆ teˇ hpaˍ, Hkriꞈ yaˇ hpawnˬ daꞈ ve leh, hpawnˬ daꞈ lonˉ kaꞈ yawˇ yehˇ ve yoˬ. Nawˬ maˍ laˇ ve chi hkʼa peu˗eˬ htaꞈ yehˇ˗aw laˇ? Nawˬ hkʼa peu˗eˬ htaꞈ maˇ yehˇ ve kʼo, chu˗iˬ daꞈ paˍ mvuhˇ haw htaꞈ chu˗iˬ ve, canˇ paˍ htaꞈ maˇ chu˗iˬ ve hkʼa shuˍ yoˬ.
4. Haiˬ ve ngaˬ hui htaꞈ maˇ gʼaˇ tcuh tuˬ, hkʼaˬ hkʼe te tuˬ le?
4 Ngaˬ hui hkʼaˬ htaˆ kaꞈ nawˇ taˍ cawˇ ve yoˬ. Aˬ htoꞈ ma pa taw le? Ngaˬ hui ve canˇ paˍ maˇ dawˇ maˇ gaˇ ve awˬ hkʼaw lo maˇ heˆ kʼo gʼaˇ nuˇ htaˇ, ca bawˆ la tuˬ yoˬ. Liꞈ hpu lehˬ shaˍ tiꞈ leh awˬ gʼaˇ kaꞈ peꞈ laˇ tuˬ, “haiˬ ve teˇ ceuˬ nawˬ hui htaꞈ taˇ gʼaˇ piˇ lawˬ. Daꞈ ve htaꞈ cuˇ leh haiˬ ve htaꞈ gʼaˇ piˇ lawˬ˗oꞈ,” tehꞈ kʼoˆ ve yoˬ. (Roˉmaꞈ 12:21) Ngaˬ hui haiˬ ve htaꞈ caˉ leh bawˆ ve kʼo, gʼaˇ hpehꞈ ve yoˬ! Yaꞈ hkʼaˇ, ngaˬ hui a yeˇ maˇ te leh chu˗iˬ daꞈ ve htaꞈ jehˇ ve kʼo, Saˍtanˍ, yawˇ ve miˬ guiˬ maˇ heˆ leh, ngaˬ hui ve awˬ gʼaˇ nuˇ kuiˬ htaꞈ gʼaˇ la tuˬ yoˬ. Hkʼe te leh, awˬ gʼaˇ taˇ nuˇ leh nawˬ ve laꞈ sheh htaꞈ deu lehˍ taˇ hpehˇ ce taˍ!—1 Peˍtruˆ 5:9.
5. (a) Gʼuiˬ sha ngaˬ hui htaꞈ haꞈ yuˬ laˇ leh awˬ bon gʼa tuˬ, ngaˬ hui aˬ htoꞈ ma maˇ leuˇ cawˇ ve le? (b) Ngaˬ hui Liꞈ hpu hkʼaw a shu ve awˬ lawn gʼa henˇ tuˬ le?
5 Gʼaˇ tuˬ, aˬ htoꞈ ma pa taw ngaˬ hui bawˆ daꞈ chehˇ ve htaꞈ, maˇ leuˇ cawˇ ve yoˬ. Awˬ lawn kʼo, Gʼuiˬ sha haꞈ yuˬ laˇ leh awˬ bon gʼa ve ngaˬ hui heuˆ gaˇ ve yoˬ. Heˍbrehˇ 11:6 kʼoˆ ve, “Gʼuiˬ sha geh jiˆ kʼai ve chaw lehˬ, Gʼuiˬ sha cawˬ ve htaꞈ maˇ kʼoˆ, yawˇ htaꞈ ca ve chaw hui htaꞈ awˬ bon piˇ ve htaꞈ maˇ kʼoˆ, yawˇ gʼa yonˍ ve yoˬ.” Yaˬhoˉvaˬ htaꞈ ca ve kʼoˆ gaˇ ve lehˬ, yawˇ haꞈ yuˬ laˇ tuˬ ngaˬ hui coˇ caˇ leh kanˉ gʼa te ve yoˬ. (Tcuh yaˇ 15:17) Liꞈ hpu hkʼaw, oˇ hkʼe te ve chaw daꞈ ve henˇ yuˬ tuˬ laiˉ gʼaˇ cawˬ ve yoˬ. Yaˍkoˆ, Raˍhkeˍlaˆ, Yoˇsehꞈ, leh Pawˇluꞈ shoꞈ shaꞈ ve awˬ lawn gʼa hpuˇ ve haˍ jaˇ ve yoˬ. Yaꞈ hkʼaˇ, yawˇ hui gʼaˇ ve yoˬ. Ngaˬ hui coˇ caˇ ve kʼo, Yaˬhoˉvaˬ ve awˬ bon htaꞈ gʼa tuˬ yoˬ tehꞈ, yawˇ hui ve awˬ lawn maˍ laˇ ve yoˬ. Ngaˬ hui teˇ geh nyi sheˍ.
Nawˬ coˇ caˇ ve kʼo, awˬ bon gʼa tuˬ yoˬ
6. Yaˍkoˆ coˇ caˇ tuˬ aˬ htoꞈ ma ga piˇ ve le? Yawˇ aˬ htoꞈ ma awˬ bon gʼa ve le? (Awˬ lawn tanˬ htaˇ ve awˬ han htaꞈ nyi sheˍ.)
6 Ka tiꞈ yeˬ ve Yaˍkoˆ Yaˬhoˉvaˬ htaꞈ haꞈ leh meuˆ daꞈ ve awˬ hpfuhˇ hkʼaˆ jaˇ yawˇ shiˍ ve pa taw, behˇ daꞈ leh yeunˇ hkanˍ gʼaˇ ve yoˬ. Yaˬhoˉvaˬ Yaˍkoˆ ve awˬ ceuˬ awˬ hkʼaˇ htaꞈ awˬ bon naꞈ laˇ tuˬ, yawˇ awˬ tehˬ yonˍ ve yoˬ. (Awˬ hkuiˉ puiˍ 28:3, 4) Yaˍkoˆ a shaꞈ 100 hkʼawꞈ gaˬ la paˇ neˇ htaˇ, Gʼuiˬ sha geh awˬ bon gʼa tuˬ, yawˇ mvuhˇ naw ma tcuh yaˇ htaꞈ behˇ daꞈ ve yoˬ. (Awˬ hkuiˉ puiˍ 32:24-28 gʼaw ve.) Yaˍkoˆ mvuhˇ naw ma tcuh yaˇ htaꞈ behˇ daꞈ tuˬ, yawˇ ve awˬ gʼaˇ tiˉ yehˇ ve laˇ? Maˇ heˆ! Yaꞈ hkʼaˇ, yawˇ coˇ caˇ jaˇ leh, awˬ bon gʼa tuˬ teˇ ceuˬ le le htaꞈ te ve, yawˇ hpeuꞈ maw laˇ ve yoˬ! Yaˍkoˆ coˇ caˇ ve htaꞈ, Yaˬhoˉvaˬ awˬ bon naꞈ piˇ ve leh awˬ meh awˬ suhˉ Iˉsaˍreˍlaˆ kʼawꞈ meh piˇ ve yoˬ. “Gʼuiˬ sha geh behˇ daꞈ leh coˇ caˇ ve chaw” lehˬ, Iˉsaˍreˍlaˆ kʼoˆ ve tcuhˉ kuiˬ hpehꞈ ve yoˬ. Yaˬhoˉvaˬ haꞈ yuˬ laˇ leh awˬ bon gʼa ve laꞈ shawnˍ htaꞈ, Yaˍkoˆ gʼa ve hkʼa shuˍ ngaˬ htawˇ heuˆ gaˇ ve yoˬ.
7. (a) Raˍhkeˍlaˆ aˬ htoꞈ ma haˍ ve awˬ lawn cawˬ ve le? (b) Raˍhkeˍlaˆ aˬ htoꞈ ma te ve le? Leh yawˇ aˬ htoꞈ ma awˬ bon gʼa ve le?
7 Yaˬhoˉvaˬ Yaˍkoˆ geh ka tiꞈ te piˇ ve htaꞈ, Yaˍkoˆ haꞈ jaˇ ve awˬ miˇ ma Raˍhkeˍlaˆ yawˇ shiˍ gaˇ jaˇ ve yoˬ. Yaꞈ hkʼaˇ, haˍ ve awˬ lawn teˇ ceuˬ cawˬ ve yoˬ. Raˍhkeˍlaˆ yaˇ maˇ cawˬ leh, awˬ lawn chi ve oˇ htaˇ teˇ co˗e ve yaˇ miˇ ma lehˬ nyi ma luˬ jaˇ ve yoˬ. Awˬ lawn chi ve Raˍhkeˍlaˆ awˬ gʼaˇ maˇ cawˬ htawˇ, yawˇ caˉ leh hkʼaˬ hkʼe kʼawꞈ te kʼai ve le? Yawˇ dawˇ law kuiˬ chi ve htaꞈ maˇ mehˉ kʼai tcuh. Yawˇ Yaˬhoˉvaˬ geh bon gʼaˇ hteꞈ kʼawꞈ lawˬ ve yoˬ. Raˍhkeˍlaˆ nyi ma awˬ tawˬ hkʼa gaˬ bon lawˬ ve htaꞈ Yaˬhoˉvaˬ kaˇ leh, awˬ leh meuˇ htaˇ yawˇ yaˇ kʼawꞈ gʼa ve ha lehˬ jaˇ ve yoˬ. Chi htaꞈ pa taw “ngaˬ lehˬ ... te daꞈ leh chi beuꞈ ngaˬ gʼaˇ peuˬ” tehꞈ kʼoˆ ve yoˬ.—Awˬ hkuiˉ puiˍ 30:8, 20-24.
8. Yoˇsehꞈ aˬ htoꞈ ma shoꞈ shaꞈ ve awˬ lawn cawˬ ve le? Leh daꞈ ve henˇ yuˬ tuˬ ngaˬ hui awˬ pon hkʼaˬ hkʼe hpehꞈ ve le?
8 Yaˍkoˆ leh Raˍhkeˍlaˆ ka tiꞈ yeˬ ve awˬ lawn, yawˇ ve yaˇ Yoˇsehꞈ shoꞈ shaꞈ ve awˬ lawn cawˬ htaˇ ga piˇ ve yoˬ hehˉ. Yoˇsehꞈ 17 hkʼawꞈ gaˬ htaˇ, yawˇ ve a shaꞈ pa jaˇ ve yoˬ. Yawˇ ve awˬ viˉ paˍ yawˇ htaꞈ hkawehˉ leh shu ve awˬ ceˬ te tuˬ hawˇ piˇ ve yoˬ. Oˇ ve hkʼawꞈ nawˉ, yawˇ yaꞈ kuiˬ maˇ cawˬ ve htawˇ kaꞈ, Eˇjiˇtuꞈ mvuhˇ miˬ ve htawnˍ hkʼaw lo laiˉ hkʼawꞈ gʼa chehˇ ve yoˬ. (Awˬ hkuiˉ puiˍ 37:23-28; 39:7-9, 20, 21) Yaꞈ hkʼaˇ, Yoˇsehꞈ nyi ma maˇ nuˇ leh nyi ma maˇ i, leh maˇ te hkʼawꞈ piˇ ve yoˬ. Aˬ htoꞈ ma pa taw le? Awˬ lawn kʼo, Yoˇsehꞈ Yaˬhoˉvaˬ htaꞈ meuˆ daꞈ ve teˇ ceuˬ awˬ hpfuhˇ hkʼaˆ jaˇ ve tehꞈ shiˍ leh, awˬ lawn chi ve htaꞈ tiˉ dawˇ nyi chehˇ ve yoˬ. (Oˉ kʼoˍ pui ve 19:18; Roˉmaꞈ 12:17-21) Yoˇsehꞈ ve awˬ lawn ngaˬ hui htaꞈ ga laˇ gʼa ve yoˬ. Ngaˬ hui yaˇ ehˉ htaˇ ma heˆ leh chi teˇ hkui ve a shaꞈ htaꞈ nyi ve kʼo dawˇ law kuiˬ maˇ cawˬ ve htawˇ, caˉ leh gʼa bawˆ daꞈ ve yoˬ. Chi hkʼe te htaˇ, ngaˬ hui yonˍ gʼa ve Yaˬhoˉvaˬ awˬ bon naꞈ laˇ tuˬ yoˬ.—Awˬ hkuiˉ puiˍ 39:21-23 gʼaw ve.
9. Yaˍkoˆ, Raˍhkeˍlaˆ, leh Yoˇsehꞈ htaꞈ ngaˬ hui hkʼaˬ hkʼe henˇ yuˬ gʼa ve le?
9 Chi beuꞈ teˇ co˗e, ngaˬ hui shoꞈ shaꞈ ve awˬ lawn laiˉ ceuˬ gʼa hpuˇ ve yoˬ. Maˇ hteˇ maˇ cawˇ ve, nyi cha ve, kʼoˆ guiˇ gʼuiˬ guiˇ ve, maˇ heˆ leh hkawehˉ ve, awˬ lawn chi ve teˇ hpaˍ nawˬ gʼa hpuˇ ve hehˉ. Awˬ gʼaˇ taˇ nuˇ leh Yaˍkoˆ, Raˍhkeˍlaˆ, leh Yoˇsehꞈ ha lehˬ leh hkʼaˬ htaˆ kaꞈ Gʼuiˬ sha kanˉ te kʼai gʼa ve aˬ htoꞈ ma ga piˇ ve, awˬ lawn chi htaꞈ dawˇ nawˇ sheˍ. Gʼuiˬ sha htaꞈ meuˆ daꞈ ve awˬ hpfuhˇ hkʼaˆ jaˇ ve pa taw, Gʼuiˬ sha yawˇ hui htaꞈ awˬ gʼaˇ piˇ leh awˬ bon naꞈ piˇ ve yoˬ. Yawˇ hui hkʼaˬ htaˆ kaꞈ bawˆ leh bon lawˬ ve awˬ hkʼaˇ suh gʼaꞈ te kʼai ve yoˬ. Ngaˬ hui awˬ leh meuˇ ve awˬ yanˇ chehˇ ve pa taw, awˬ gʼuˇ suhˍ hpawˇ ve dawˇ law kuiˬ htaꞈ haꞈ shaˉ tuˬ a yeˇ uiˍ jaˇ ve yoˬ! Yaˬhoˉvaˬ ha lehˬ ve te piˇ gʼa tuˬ, nawˬ hkʼaˬ htaˆ kaꞈ behˇ daꞈ leh hkeuꞈ jaˇ ve kanˉ te tuˬ, nawˬ gu hehnˇ taˍ˗aw laˇ?
Awˬ bon gʼa tuˬ behˇ daꞈ sheˍ
10, 11. (a) Gʼuiˬ sha geh awˬ bon gʼa tuˬ, aˬ htoꞈ ma pa taw ngaˬ hui gʼa behˇ daꞈ ve le? (b) Cawˇ ve awˬ hkʼaw lo dawˇ cheˆ gʼa tuˬ, ngaˬ hui htaꞈ aˬ htoꞈ ma ga laˇ ve le?
10 Gʼuiˬ sha geh awˬ bon gʼa tuˬ, aˬ htoꞈ ma pa taw ngaˬ hui gʼa behˇ daꞈ ve le? Ngaˬ hui maˇ biˇ ve chaw yaˇ hpehꞈ ve pa taw, maˇ daꞈ ve dawˇ hkʼaˇ htaꞈ gʼa behˇ daꞈ ve yoˬ. Teˇ hpaˍ hpaˍ, Gʼuiˬ sha kanˉ te ve htaꞈ hkʼa dehꞈ maˇ dawˇ cawˇ leh awˬ nu ve chaw maˇ chehˇ sha puiˉ ve maˇ heˆ kʼo nyi ma haˍ ve yoˬ. Awˬ kaˍ awˬ nu ve chaw yawˇ htaꞈ te naˬ piˇ ve kʼo, venˇ baˆ hpehˇ piˇ tuˬ haˍ jaˇ ve yoˬ. Ngaˬ hui Gʼuiˬ sha kanˉ te ve hkʼaˬ hkʼe maw gaˬ peuˬ ve htawˇ, Gʼuiˬ sha kanˉ te tuˬ haˍ ve awˬ lawn ngaˬ hui teˇ gʼaˇ le le gʼa tawˍ daꞈ ve yoˬ. Leh ka tiꞈ yeˬ ve chaw htaꞈ Gʼuiˬ sha awˬ bon naꞈ piˇ tuˬ yoˬ.
Nawˬ Gʼuiˬ sha geh awˬ bon gʼa tuˬ behˇ daꞈ chehˇ˗aw laˇ? (Awˬ tawn 10, 11 nyi sheˍ)
11 Awˬ tehˬ awˬ na yoˬ. Cawˇ ve awˬ hkʼaw lo dawˇ cheˆ leh Hkriꞈ yaˇ hpehꞈ tuˬ haˍ ve yoˬ. Ngaˬ hui ve maˇ daꞈ ve dawˇ hkʼaˇ htaꞈ tawˍ daꞈ chehˇ htaˇ, awˬ lawn chi haˍ jaˇ ve yoˬ. (Yeˍraˍmiˆ 17:9) Nawˬ chi hkʼe dawˇ ve kʼo, Yaˬhoˉvaˬ geh bon lawˬ leh daꞈ kehˬ ve awˬ ha hpu lawˬ˗oˆ. Bon lawˬ ve leh daꞈ kehˬ ve awˬ ha hpu chi nawˬ awˬ gʼaˇ cawˬ leh hteˇ ve cawˇ ve te gʼa tuˬ ga laˇ ve yoˬ. Leh Gʼuiˬ sha geh awˬ bon gʼa tuˬ yoˬ. Nawˬ bon lawˬ ve awˬ hkʼaˇ suh hkʼaˬ htaˆ kaꞈ gʼaꞈ te chehˇ˗oˆ. Coˇ caˇ leh Liꞈ hpu teˇ nyi le le gʼaw ve leh, a shu yawˇ hkʼaˇ yawˇ Liꞈ hpu henˇ ve leh yehˬ kʼa oˉ kʼoˍ pui ve htaꞈ awˬ yanˇ gu teh taˍ sheˍ.—Chiˇ mvuh ve 119:32 gʼaw ve.
12, 13. Awˬ viˉ awˬ nyi Hkriꞈ yaˇ nyiˇ gʼaˇ maˇ daꞈ ve dawˇ hkʼaˇ htaꞈ haꞈ shaˉ gʼa tuˬ, hkʼaˬ hkʼe ga piˇ ve le?
12 Gʼuiˬ sha ve tawˇ hkawˇ, yawˇ ve daꞈ kehˬ ve awˬ ha hpu, leh ngaˬ hui ve Hkriꞈ yaˇ ve liꞈ kʼoˆ teˇ hpaˍ awˬ viˉ awˬ nyi maˇ daꞈ ve dawˇ hkʼaˇ htaꞈ gʼaˇ tuˬ, ga piˇ ve laiˉ gʼaˇ ve awˬ lawn cawˬ ve yoˬ. Yaˇ nehˬ teˇ gʼaˇ Ha pa 12 maˬ 8 nyi 2003 hkʼawꞈ Tu loˬ! hkʼaw ve “Nawˬ maˇ daꞈ ve dawˇ hkʼaˇ htaꞈ hkʼaˬ hkʼe tawˍ daꞈ gʼa ve le?” awˬ lawn gʼaw ve yoˬ. Yawˇ hkʼaˬ hkʼe dawˇ ve le? “Ngaˬ awˬ to maˇ daꞈ ve dawˇ hkʼaˇ htaꞈ tawˍ daꞈ gʼaˇ tuˬ te chehˇ ve yoˬ. Awˬ lawn chi hkʼaw ‘Laiˉ gʼaˇ awˬ pon maˇ daꞈ ve htaꞈ gʼaˇ tuˬ haˍ jaˇ ve,’ ngaˬ gʼaw peuˬ htaˇ, ngaˬ yehˬ kʼa lonˉ hkʼaw gʼa chehˇ taˍ ve htaꞈ shuˍ ve yoˬ. Ngaˬ nyi ma maˇ gʼa haˍ tuˬ te laˇ ve yoˬ.” Ha pa 10 maˬ 8 nyi 2003 hkʼawꞈ Tu loˬ! hkʼaw ve “Shu htaꞈ maˇ shuˍ daꞈ ve a shaꞈ teꞈ hkʼaˇ—Gʼuiˬ sha haꞈ yuˬ laˇ˗aw laˇ?” awˬ lawn chi kaꞈ yawˇ htaꞈ ga piˇ maˇ jaˇ ve yoˬ. Laiˉ gʼaˇ ve awˬ pon lehˬ, “aˉ chuˇ teˇ maˬ tcuhˍ laˇ ve” hkʼa shuˍ behˇ daꞈ ve chi caˉ leh kʼawꞈ te kʼai ve, yawˇ gʼaw peuˬ ve awˬ lawn chi htaꞈ hkʼa deh na gʼa ve yoˬ. (2 Kawˇrenˍhtuˆ 12:7) Yaꞈ hkʼaˇ, yawˇ hui daꞈ kehˬ ve haꞈ shaˉ gʼa tuˬ hkʼaˬ htaˆ kaꞈ behˇ daꞈ kʼai ve kʼo, awˬ gʼuˇ suhˍ hpawˇ daꞈ ve dawˇ law kuiˬ cawˬ gʼa ve yoˬ. “Dawˇ law kuiˬ chi htaꞈ pa taw, ngaˬ ka tiꞈ yeˬ gʼa ve yoˬ. Yaˬhoˉvaˬ yawˇ ve kanˉ hkʼaˇ htaꞈ yehˇ leh, ngaˬ htaꞈ teˇ nyi le le haiˬ jaˇ ve awˬ hawˉ lo gʼa pon tuˬ ga laˇ ve awˬ bon uiˍ jaˇ ve yoˬ” tehꞈ, yawˇ kʼoˆ ve yoˬ.
13 Awˬ viˉ awˬ nyi yaˇ miˇ teˇ gʼaˇ ve awˬ lawn kaꞈ dawˇ nyi sheˍ. Yawˇ kʼoˆ ve, “ngaˬ loˍ ve awˬ ceuˬ awˬ yanˇ cawˇ ve hkʼaw teˇ pawˆ le le peꞈ laˇ ve awˬ bon uiˍ jaˇ. Laiˉ pawˆ kʼo, awˬ lawn laiˉ lawn ngaˬ ve awˬ pon bvuhꞈ laˇ ve tehꞈ shuˍ ve yoˬ. Laiˉ hkʼawꞈ, Yaˬhoˉvaˬ maˇ dawˇ cawˇ ve awˬ ceuˬ htaꞈ maˇ gʼa te tuˬ, ngaˬ behˇ daꞈ chehˇ ve htaꞈ maˇ behˇ daꞈ gaˇ˗o tehꞈ kaꞈ dawˇ ve yoˬ. Ngaˬ gʼa shiˍ ve Yaˬhoˉvaˬ ha kʼaˉ leh venˇ baˆ hpehˇ laˇ tuˬ yoˬ. Maˇ daꞈ ve dawˇ hkʼaˇ naˉ jaˇ ve htaꞈ ngaˬ hkʼa peu˗eˬ yuˬ baˬ maˇ gʼa ve pa taw, Yaˬhoˉvaˬ ga laˇ maˇ gʼa taˍ tehꞈ ngaꞈ dawˇ ve yoˬ. Behˇ daꞈ ve chi lehˬ ngaˬ awˬ to hkʼaw teˇ kaˬ le le lo heuˆ la ve yoˬ. . . . Ha pa 3 maˬ 15 nyi 2013 hkʼawꞈ Shaw nyi kuiˬ ‘Nawˬ Yaˬhoˉvaˬ htaꞈ “shiˍ gaˇ ve nyi ma” cawˬ˗aw laˇ?’ awˬ lawn chi gʼaw peuˬ leh, Yaˬhoˉvaˬ ngaˬ htaꞈ ga laˇ tuˬ, awˬ tehˬ awˬ na shiˍ ve yoˬ.”
14. (a) Pawˇluꞈ gʼa hpuˇ ve awˬ ceuˬ yawˇ hkʼaˬ hkʼe dawˇ ve le?(b) Ngaˬ hui ve gʼaˇ nuˇ kuiˬ htaꞈ hkʼaˬ hkʼe te gʼaˇ tuˬ le?
14 Roˉmaꞈ 7:21-25 gʼaw ve. Maˇ daꞈ ve dawˇ hkʼaˇ leh gʼaˇ nuˇ kuiˬ htaꞈ behˇ daꞈ ve lehˬ maˇ sha, Pawˇluꞈ hkʼa dehꞈ shiˍ ve yoˬ. Yaꞈ hkʼaˇ, Yaˬhoˉvaˬ geh bon lawˬ ve, ga laˇ tuˬ gʼaˇ va ve, leh Yeˍsuˆ htaiˍ hkʼawꞈ laˇ ve htaꞈ yonˍ ve hpeuꞈ maw laˇ ve kʼo, Pawˇluꞈ gʼaˇ tuˬ yoˬ tehꞈ yonˍ gʼa ve yoˬ. Hkʼe kʼo ngaˬ hui˗eh? Ngaˬ hui ve gʼaˇ nuˇ kuiˬ htaꞈ gʼaˇ gʼa awˬ laˇ? Pawˇluꞈ htaꞈ henˇ yuˬ tuˬ, Yaˬhoˉvaˬ htaꞈ yonˍ ve, ngaˬ hui awˬ gʼaˇ htaꞈ maˇ yonˍ, leh htaiˍ hkʼawꞈ ve htaꞈ yonˍ ve kʼo, gʼaˇ hpehꞈ ve yoˬ.
15. Ngaˬ hui ka tiꞈ yeˬ leh shoꞈ shaꞈ ve awˬ lawn htaꞈ yeunˇ hkanˍ gʼa tuˬ, Yaˬhoˉvaˬ hkʼaˬ hkʼe ga laˇ ve le?
15 Teˇ pawˆ pawˆ kʼo, awˬ lawn teˇ lawn a yeˇ hkʼaˬ hkʼe taw uiˍ ve ngaˬ hui hpeuꞈ mawˬ piˇ tuˬ, Yaˬhoˉvaˬ te tcuh laˇ ve yoˬ. Tawˇ pa haˉ te kʼo, yehˬ hkʼaw ve chaw maˇ heˆ leh ngaˬ hui awˬ to naˬ jaˇ ve leh maˇ hteˇ maˇ cawˇ gʼa hpuˇ ve, hkʼaˬ hkʼe te tuˬ le? Yaˬhoˉvaˬ htaꞈ hkʼa dehꞈ yonˍ ve kʼo, yonˍ ve htaꞈ haꞈ shaˉ gʼa ve leh ha lehˬ ve hkʼaw yawˇ htaꞈ meuˆ daꞈ tuˬ awˬ gʼaˇ peꞈ laˇ ve, ngaˬ hui lawˬ ve yoˬ. (Hpiˇliˇpiˆ 4:13) Hkʼaˬ htaˆ kaꞈ yeunˇ hkanˍ gʼa tuˬ, awˬ gʼaˇ awˬ shaˉ leh nyi ma haꞈ hanˉ cawˬ gʼa ve bon lawˬ cawˇ ve yoˬ tehꞈ, oˇ htaˇ teˇ co˗e leh chi beuꞈ ve Hkriꞈ yaˇ hui henˇ yuˬ kuiˬ ngaˬ hui htaꞈ maˍ laˇ ve yoˬ.
Yaˬhoˉvaˬ ve awˬ bon gʼa tuˬ hkʼaˬ htaˆ kaꞈ behˇ daꞈ˗oˆ
16, 17. Nawˬ coˇ caˇ leh aˬ htoꞈ ma te tuˬ le?
16 Nawˬ awˬ gʼaˇ nuˇ ve, maˇ kʼawꞈ behˇ gaˇ ve, leh laꞈ sheh hpehˇ ce taˍ ve Neˇ haiˬ mawˬ gaˇ ve yoˬ. Chi htaꞈ pa taw, coˇ caˇ leh “daꞈ ve awˬ ceuˬ htaꞈ hkʼa dehꞈ vawˆ taˍ˗o.” (1 Hteˇsaˍlawˇniˆ 5:21) Saˍtanˍ, yawˇ ve haiˬ ve miˬ guiˬ, leh maˇ daꞈ ve dawˇ hkʼaˇ chi ve hkʼa peu˗eˬ htaꞈ nawˬ gʼaˇ hpehꞈ ve yoˬ. Gʼuiˬ sha nawˬ htaꞈ ga laˇ leh awˬ gʼaˇ peꞈ laˇ tuˬ, Gʼuiˬ sha htaꞈ awˬ tehˬ awˬ na gʼaˇ va ve kʼo, nawˬ gʼaˇ hpehꞈ ve yoˬ.—2 Kawˇrenˍhtuˆ 4:7-9; Gaˍlaˍtiˆ 6:9.
17 Chi htaꞈ pa taw, hkʼaˬ htaˆ kaꞈ bawˆ daꞈ kʼai sheˍ. Behˇ daꞈ kʼai sheˍ. Yeunˇ hkanˍ kʼai sheˍ. Yaˬhoˉvaˬ “nawˬ hui awˬ hkʼoˆ lo daꞈ ve awˬ bon awˬ shinˉ hkʼa biˇ yaꞈ la piˇ chehˇ ve” lehˬ, nawˬ hkʼa dehꞈ dehꞈ yonˍ gʼa ve yoˬ.—Maˍlaˍhkiˆ 3:10.
