Laiˉ pawˆ kʼo, ngaˬ hui ve liꞈ kʼoˆ hkʼaw Heˍbrehˇ 4:12 htaꞈ yehˇ htaˇ, Liꞈ hpu kanˇ paˆ cawˬ leh a shaꞈ htaꞈ pa gʼa ve yoˬ. Chi kaꞈ awˬ tehˬ yoˬ. Yaꞈ hkʼaˇ, Heˍbrehˇ 4:12 bvuhꞈ htaˇ Pawˇluꞈ aˬ htoꞈ ma awˬ lawn kʼoˆ maˍ ve le, ngaˬ hui na gʼa cawˇ ve yoˬ. Hkriꞈ yaˇ Heˍbrehˇ chaw Gʼuiˬ sha ve a loˍ gʼaꞈ te tuˬ, yawˇ awˬ gʼaˇ piˇ chehˇ ve yoˬ. Gʼuiˬ sha ve a loˍ chi daꞈ kehˬ ve tawˇ hkawˇ hkʼaw cawˬ ve yoˬ. Gʼuiˬ sha Iˉsaˍreˍlaˆ chaw htaꞈ Eˇjiˆtuꞈ mvuhˇ miˬ lo hpehˇ piˇ ve awˬ lawn Pawˇluꞈ kʼoˆ maˍ laˇ ve yoˬ. Yawˇ hui “hkuiˇ jaˇ daꞈ jaˇ ve mvuhˇ miˬ” kʼai ve dawˇ law kuiˬ cawˬ leh, gʼaˇ jehˇ kuiˬ awˬ hkʼaw lo loꞈ˗e gʼa ve yoˬ.—Tawˆ kʼai ve 3:8; Bon maˍ ve 12:9, 10.

Chi ve lehˬ Gʼuiˬ sha ve a loˍ yoˬ. Yaꞈ hkʼaˇ, Gʼuiˬ sha beˆ maˍ piˇ ve awˬ hkʼaˇ htaꞈ Iˉsaˍreˍlaˆ chaw maˇ haꞈ yuˬ leh yonˍ hkʼaˇ maˇ hpeuꞈ mawˬ piˇ ve pa taw, maˇ˗o ve chaw mvuhˇ miˬ oˇ ve hkʼaw maˇ gʼa loꞈ˗e ve yoˬ. (Heh puiˉ hkʼaw 14:30; Yawˇsuˆ 14:6-10) Yaꞈ hkʼaˇ, “yawˇ ve gʼaˇ jehˇ kuiˬ awˬ hkʼaw lo loꞈ˗e tuˬ a hkaw˗anˬ cawˬ sheˍ” ve yoˬ tehꞈ, Pawˇluꞈ kʼoˆ taˍ ve yoˬ. (Heˍbrehˇ 3:16-19; 4:1) “A hkaw˗anˬ” chi ve lehˬ, Gʼuiˬ sha yawˇ ve a loˍ hpeuꞈ mawˬ laˇ ve teˇ ceuˬ hpehꞈ ve yoˬ. Hkriꞈ yaˇ Heˍbrehˇ chaw hkʼa shuˍ shuˍ, Gʼuiˬ sha ve a loˍ gʼaw leh gʼaꞈ te gʼa ve yoˬ. A hkaw˗anˬ chi Liꞈ hpu hkʼaw laˬ ve tehꞈ kʼoˆ maˍ laˇ tuˬ, Pawˇluꞈ Awˬ hkuiˉ puiˍ 2:2 leh Chiˇ mvuh ve 95:11 hkʼaw ve tawˇ hkawˇ yehˇ ve yoˬ.

“Yawˇ ve gʼaˇ jehˇ kuiˬ awˬ hkʼaw lo loꞈ˗e tuˬ a hkaw˗anˬ cawˬ sheˍ” ngaˬ hui gʼa kaˇ htaˇ, ha lehˬ jaˇ ve yoˬ. Gʼuiˬ sha ve gʼaˇ jehˇ kuiˬ awˬ hkʼaw lo loꞈ˗e ve lehˬ awˬ tehˬ awˬ na hpehꞈ gʼa ve, Liꞈ hpu maˍ laˇ ve ngaˬ hui yonˍ gʼa ve yoˬ. Leh ngaˬ hui loꞈ˗e gʼa tuˬ teˇ ceuˬ ceuˬ te chehˇ ve yoˬ. Yaꞈ hkʼaˇ, Moˉseˍ ve awˬ liˇ tawˇ hkawˇ htaꞈ ngaˬ hui gʼaꞈ te ve maˇ heˆ leh, Yaˬhoˉvaˬ ha lehˬ tuˬ daꞈ ve htaꞈ ceh tiˉ te ve kaꞈ maˇ heˆ. Ngaˬ hui Gʼuiˬ sha htaꞈ yonˍ ve pa taw, hkʼaˬ htaˆ kaꞈ Gʼuiˬ sha ve a loˍ htaꞈ gʼaꞈ te ve ha lehˬ jaˇ ve yoˬ. Laiˉ hinˉ gʼaˇ Liꞈ hpu leh Gʼuiˬ sha yawˇ ve a loˍ hkʼaˬ hkʼe hpeuꞈ mawˬ laˇ ve htaꞈ tanˬ henˇ ve yoˬ. Awˬ lawn chi ve lehˬ, yawˇ hui ve a shaꞈ teꞈ hkʼaˇ pa ve, yonˍ hkʼaˇ htaꞈ hpeuꞈ mawˬ laˇ ve, leh baˆtiˆsaˬ haꞈ yuˬ ve, chi teˇ hpaˍ yawˇ hui te gaˇ ve yoˬ. Yawˇ hui htaꞈ heuˆ la ve awˬ hkʼaˇ lehˬ, “Gʼuiˬ sha ve tawˇ hkawˇ lehˬ, teꞈ chehˇ leh kanˇ paˆ cawˬ ve yoˬ” tehꞈ, hkʼa dehꞈ hpeuꞈ mawˬ laˇ gʼa ve yoˬ. Gʼuiˬ sha yawˇ ve a loˍ Liꞈ hpu hkʼaw hpeuꞈ mawˬ laˇ ve lehˬ, ngaˬ hui ve a shaꞈ htaꞈ heuˆ la˗o leh, hkʼaˬ htaˆ kaꞈ kanˇ paˆ peꞈ laˇ tuˬ yoˬ.