1, 2. (a) Chi beuꞈ teˇ co˗e chaw laiˉ gʼaˇ shoꞈ shaꞈ ve awˬ ceuˬ aˬ htoꞈ ma gʼa hpuˇ ve le? leh hkʼaˬ hkʼe hpehꞈ la ve le? (b) Iˉsaˍyaˆ liꞈ 41:10, 13 aˬ htoꞈ ma dawˇ law kuiˬ yonˍ gʼa ve htaꞈ peꞈ laˇ ve le?

 Yawˇ ve awˬ hpawˇ mawˇ chaw mawˇ chaw kehˉ hpehꞈ ve gʼuˇ suhˍ peuˍ ve chaw teˇ gʼaˇ yawˇ kʼoˆ ve, “co ha hpawˇ daꞈ ve teˇ nyi le le te ve htaꞈ haꞈ shaˉ gʼa ve htawˇ, ngaˬ dawˇ haˍ ve htaꞈ laiˉ hkʼawꞈ gʼa tawˍ daꞈ ve yoˬ. Chi lehˬ, ngaˬ zuhꞈ maˇ gʼa leh maˇ chehˇ sha tuˬ te laˇ ve, shu htaꞈ te piˇ ve heuˆ la kuiˬ cawˬ ve, leh teˇ pawˆ pawˆ maˇ kʼawꞈ te gaˇ tuˬ te laˇ ve yoˬ.”

² Awˬ viˉ awˬ nyi yaˇ miˇ chi teˇ gʼaˇ ve dawˇ hkʼaˇ htaꞈ nawˬ na gʼa˗aw laˇ? Saˍtanˍ uˉ peunˍ ve haiˬ ve awˬ hawˉ lo ngaˬ hui chehˇ ve pa taw, ngaˬ hui htaꞈ nyiˉ laˇ ve gʼa hpuˇ maˇ jaˇ ve yoˬ. Sho kʼuˉ kʼawehꞈ yehˇ chehˇ ve heuˇ sha hpawˇ lehˬ hehnˇ jaˇ leh kʼai haˍ jaˇ ve hkʼa shuˍ shuˍ, dawˇ haˍ ve lehˬ ngaˬ hui awˬ gʼaˇ nuˇ tuˬ te laˇ ve yoˬ. (Tawˇ naˉ ve 12:25) Aˬ htoꞈ ma pa taw nawˬ dawˇ haˍ ve hehˉ le? Awˬ lawn kʼo, nawˬ haꞈ ve chaw suh˗e ve maˇ heˆ kʼo, na ve leh fawˉ mehˍ ve htaꞈ gʼa yeunˇ hkanˍ ve yoˬ hehˉ. Nawˬ lehˬ haˍ ve awˬ yanˇ htaˇ, yehˬ kʼa awˬ pon gʼa nyi haꞈ shaˉ chehˇ ve yoˬ hehˉ. Ponˬ kʼai ve awˬ yanˇ, nawˬ dawˇ haˍ ve  lehˬ awˬ gʼaˇ nuˇ la leh ha lehˬ ve awˬ ceuˬ htawˇ mehˉ kʼai gʼa ve yoˬ. Hkʼaˬ hkʼe hpehꞈ ve kaꞈ, Gʼuiˬ sha nawˬ htaꞈ ga laˇ tuˬ nawˬ yonˍ gʼa ve yoˬ.—Iˉsaˍyaˆ 41:10, 13 gʼaw ve.

3, 4. (a) Liꞈ hpu hkʼaw bvuhꞈ taˍ ve “laꞈ sheh” htaꞈ hkʼaˬ hkʼe kʼoˆ ve le? (b) Ngaˬ hui ve laꞈ sheh deu laˇ tuˬ, aˬ htoꞈ ma te laˇ ve hehˉ le?

³ Chaw yaˇ ve awˬ liˇ awˬ hkʼaˇ leh te hkʼaˇ htaꞈ kʼoˆ maˍ tuˬ, Liꞈ hpu hkʼaw chaw yaˇ ve awˬ hkʼeun ve awˬ lawn uˉ paˬ maˬ laiˉ ma cawˬ ve yoˬ. Tawˇ pa haˉ te kʼo, laꞈ sheh ve awˬ lawn laiˉ ha pawˆ cawˬ ve yoˬ. Liꞈ hpu hkʼaw kʼoˆ ve, chaw teˇ gʼaˇ ve laꞈ sheh awˬ gʼaˇ gʼa ve kʼoˆ gaˇ ve lehˬ, yawˇ awˬ gʼaˇ gʼa ve , awˬ gʼaˇ hehnˇ ve leh te kʼai gʼa ve kʼoˆ gaˇ ve yoˬ. Liꞈ hpu hkʼaw chaw teˇ gʼaˇ ve laꞈ sheh awˬ gʼaˇ gʼa ve tehꞈ kʼoˆ htaˇ, yawˇ awˬ to awˬ gʼaˇ gʼa ve leh awˬ gʼaˇ hehnˇ la ve, leh hkʼaˬ htaˆ kaꞈ te gʼa ve yoˬ tehꞈ, kʼoˆ gaˇ ve yoˬ. (1 Saˍmo˗eˍlaˆ 23:16; Eˇzaˍraˆ 1:6) Kʼoˆ gaˇ ve lehˬ, yawˇ daꞈ ve dawˇ hkʼaˇ cawˬ leh awˬ gʼuˇ suhˍ hpawˇ ve dawˇ law kuiˬ kaꞈ cawˬ gʼa ve yoˬ.

⁴ Teˇ pawˆ pawˆ kʼo, Liꞈ hpu hkʼaw chaw teˇ gʼaˇ laꞈ sheh deu ve kʼoˆ htaˇ, yawˇ awˬ gʼaˇ nuˇ ve maˇ heˆ kʼo dawˇ law kuiˬ maˇ cawˬ ve kʼoˆ gaˇ ve yoˬ. (2 Raˍsaˍvanˍ 15:7; Heˍbrehˇ 12:12) Nawˬ dawˇ haˍ ve maˇ heˆ kʼo, awˬ gʼaˇ nuˇ ve maˇ heˆ kʼo, nawˬ Yaˬhoˉvaˬ htaꞈ meuˆ daꞈ ve mehˉ kʼai ve kʼo, caˉ leh maˇ kʼawꞈ te gaˇ ve yoˬ. Nawˬ awˬ gʼaˇ hkʼaˬ kaꞈ lo ca gʼa tuˬ le? Awˬ gʼaˇ gʼa leh yeunˇ hkanˍ gʼa tuˬ, nawˬ hkʼaˬ hkʼe te ve le?

5. (a) Ngaˬ hui shoꞈ shaꞈ ve awˬ lawn cawˬ htaˇ hkʼaˬ hkʼe dawˇ ve le? Yaꞈ hkʼaˇ, ngaˬ hui aˬ htoꞈ ma htaꞈ maˇ leunˇ cawˇ ve le? (b) Ngaˬ hui aˬ htoꞈ ma gʼa henˇ tuˬ le?

⁵ Zeˍhpaˍniˆ 3:16, 17 gʼaw ve. Ngaˬ hui shoꞈ shaꞈ ve awˬ lawn cawˬ htaˇ, ngaˬ hui kawˆ leh awˬ gʼaˇ nuˇ la ve pa taw, laꞈ sheh deu leh hpehˇ ce taˍ ve maˇ te cawˇ. Ngaˬ hui dawˇ haˍ ve hkʼa peu˗eˬ chiˇ aꞈ piˇ tuˬ, Yaˬhoˉvaˬ kuˬ laˇ ve yoˬ. (1 Peˍtruˆ 5:7) Yaˬhoˉvaˬ Iˉsaˍreˍlaˆ chaw htaꞈ nyi haꞈ shaˉ piˇ ve hkʼa shuˍ shuˍ, ngaˬ hui htaꞈ kaꞈ nyi haꞈ shaˉ laˇ tuˬ yoˬ. Yawˇ kʼoˆ ve, yawˇ ve laꞈ sheh “nawˬ hui htaꞈ ponˬ laˇ tuˬ ngeh ve maˇ heˆ.” Yawˇ ve kanˉ te ve ka tiꞈ yeˬ ve chaw htaꞈ hkʼaˬ htaˆ kaꞈ ga piˇ gaˇ ve yoˬ. (Iˉsaˍyaˆ 59:1, Miˬ guiˬ awˬ suhˉ yuˬ tawˆ ve Liꞈ hpu) Awˬ lawn chi, Liꞈ hpu hkʼaw cawˬ ve henˇ yuˬ tuˬ a yeˇ uiˍ ve 3 ceuˬ Yaˬhoˉvaˬ yawˇ ve chaw htaꞈ ga piˇ gaˇ leh yawˇ te piˇ gʼa ve tehꞈ, hpeuꞈ maw laˇ ve ngaˬ hui gʼa henˇ tuˬ yoˬ. Awˬ lawn chi nawˬ htaꞈ hkʼaˬ hkʼe ga laˇ ve teˇ geh nyi sheˍ.

6, 7. Iˉsaˍreˍlaˆ chaw hui Aˍmaˍlehˆ chaw hui htaꞈ bawˆ gʼaˇ ve ngaˬ hui aˬ htoꞈ ma gʼa henˇ ve le?

⁶ Iˉsaˍreˍlaˆ chaw Eˇjiˇtuꞈ mvuhˇ miˬ hkʼaw awˬ ceˬ te ve gʼa ponˬ hkʼawꞈ nawˉ maˇ maw maw, Aˍmaˍlehˆ chaw yawˇ hui htaꞈ ca bawˆ la ve yoˬ. Iˉsaˍreˍlaˆ chaw maꞈ bawˆ tuˬ sheh kʼai tcuh ve Yawˇsuˆ, haꞈ hanˉ ve chaw htaꞈ Moˉseˍ kʼoˆ piˇ ve yoˬ. Peuˬ leh, Moˉseˍ lehˬ Aˍronˍ leh Huˇraˆ htaꞈ yawˇ hui chehˇ kuiˬ awˬ paˇ lo cawˬ ve hkʼaw hkʼoˆ lo shiˍ taˆ˗e ve yoˬ. Yawˇ hui hkʼaw hkʼoˆ lo chehˇ ve maꞈ bawˆ ve htaꞈ mawˬ gʼa ve yoˬ. Chaw 3 gʼaˇ chi maꞈ bawˆ ve htaꞈ hpaw˗e ve yawˇ hui kawˆ ve laˇ? Maˇ heˆ!

⁷ Iˉsaˍreˍlaˆ chaw Aˍmaˍlehˆ chaw hui htaꞈ bawˆ gʼaˇ tuˬ, gu taˍ ve awˬ hkʼaˇ suh Moˉseˍ gʼaꞈ te ve yoˬ. Yawˇ awˬ tehˬ awˬ na Gʼuiˬ sha ve juˇ fuiˍ taˬ laꞈ sheh hkʼaw ka taˍ leh mvuhˇ naw ma hpawˇ lo chiˇ taˆ ve yoˬ. Moˉseˍ oˇ hkʼe te htaˇ, Yaˬhoˉvaˬ Iˉsaˍreˍlaˆ chaw htaꞈ kanˇ paˆ piˇ leh Aˍmaˍlehˆ chaw htaꞈ bawˆ gʼa ve yoˬ. Yaꞈ hkʼaˇ, Moˉseˍ laꞈ gʼawˇ suh la leh hpehˇ ce ve teˇ yanˇ, Aˍmaˍlehˆ  chaw hui Iˉsaˍreˍlaˆ chaw htaꞈ kʼawꞈ bawˆ gʼaˇ ve yoˬ. Aˍronˍ leh Huˇraˆ Moˉseˍ htaꞈ haˆ haˆ ga piˇ ve yoˬ. “Aˍronˍ leh Huˇraˆ yawˇ huiˉ maˬ haˉ pui shiˍ teˇ maˬ ca gʼawˆ ve laˇ leh Moˉseˍ htaꞈ mui tcuh taˍ ve yoˬ. Yawˇ huiˉ maˬ lehˬ, Moˉseˍ geh teˇ gʼaˇ teˇ hpawˇ lo chehˇ taˍ leh, mvuhˇ nyi loꞈ˗e htaˇ hkʼa gaˬ, Moˉseˍ ve laꞈ sheh htaꞈ yuˬ tiˍ piˇ taˍ ve yoˬ.” Yoˬ, Gʼuiˬ sha ve kanˇ paˆ cawˬ ve laꞈ sheh htaꞈ yehˇ ve pa taw, Iˉsaˍreˍlaˆ chaw hui maꞈ bawˆ gʼaˇ ve yoˬ.—Tawˆ kʼai ve 17:8-13.

8. (a) Ehˇtaˍyoˇpiˆ ve chaw hui Yuˇdaꞈ mvuhˇ miˬ htaꞈ bawˆ la htaˇ, Aˍsaˍ aˬ htoꞈ ma te ve le? (b) Ngaˬ hui Aˍsaˍ htaꞈ hkʼaˬ hkʼe te henˇ yuˬ gʼa ve le?

⁸ Jawˇ mawˇ Aˍsaˍ teˇ co˗e htaˇ, Yaˬhoˉvaˬ hkʼaˬ htaˆ kaꞈ kanˇ paˆ cawˬ ve laꞈ sheh htaꞈ yehˇ leh yawˇ ve chaw htaꞈ ga piˇ ve yoˬ. Maꞈ yaˇ laiˉ moˍ cawˬ ve Liꞈ hpu hkʼaw bvuhꞈ taˍ ve yoˬ. Ehˇtaˍyoˇpiˆ chaw Zeˍraˆ yawˇ maꞈ moˍ lonˉ uiˍ jaˇ ve cawˬ ve yoˬ. Yawˇ ve maꞈ moˍ cheuˬ jaˇ ve maꞈ yaˇ 1,000,000 gʼaˇ cawˬ ve yoˬ. Ehˇtaˍyoˇpiˆ ve maꞈ moˍ lehˬ Aˍsaˍ ve maꞈ moˍ 2 pun hkʼe tawn cawˬ ve yoˬ. Aˍsaˍ dawˇ haˍ ve, kawˆ ve maˇ heˆ leh awˬ gʼaˇ maˇ cawˬ˗aw laˇ? Maˇ heˆ! Aˍsaˍ laꞈ haˉ Yaˬhoˉvaˬ ga laˇ tuˬ lawˬ ve yoˬ. Ehˇtaˍyoˇpiˆ ve maꞈ yaˇ htaꞈ nyi ve kʼo, bawˆ gʼaˇ tuˬ hpehꞈ kʼai maˇ gʼa ve yoˬ. “Yaꞈ hkʼaˇ, Gʼuiˬ sha lehˬ hkʼa peu˗eˬ htaꞈ te gʼa ve yoˬ.” (Maꞈhtehˍ 19:26) Gʼuiˬ sha yawˇ ve kanˇ paˆ htaꞈ yehˇ leh, “a shaꞈ teꞈ chehˇ ve teˇ co˗e, Gʼuiˬ sha htaꞈ ka tiꞈ yeˬ chehˇ ve” Aˍsaˍ lehˬ ‘Ehˇtaˍyoˇpiˆ chaw teˇ hpaˍ htaꞈ shonˇ kʼai piˇ lawˬ ve yoˬ.’—2 Raˍsaˍvanˍ 14:8-13; 1 Jawˇ mawˇ 15:14.

9. (a) Neˍhaˍmiˆ Yeˍruˆsaˍlehnˍ venˇ lo gaˬ htaˇ, hkʼaˬ hkʼe hpehꞈ ve le? (b) Gʼuiˬ sha Neˍhaˍmiˆ ve bon lawˬ hkawˇ htaꞈ hkʼaˬ hkʼe hkʼawꞈ piˇ ve le?

⁹ Neˍhaˍmiˆ Yeˍruˆsaˍlehnˍ venˇ lo kʼai htaˇ, yawˇ aˬ htoꞈ ma mawˬ ve le? Shu mvuhˇ miˬ ve canˇ paˍ Yuˇdaꞈ chaw hui htaꞈ nyiˉ piˇ ve pa taw, yawˇ hui Yeˍruˆsaˍlehnˍ laˇ venˇ htaꞈ caˉ leh maˇ kʼawꞈ te ve htaꞈ yawˇ gʼa mawˬ ve yoˬ. Venˇ chi kawˆ tuˬ cawˬ leh Yuˇdaꞈ chaw awˬ gʼaˇ nuˇ kʼai ve yoˬ. Neˍhaˍmiˆ hkʼaˬ hkʼe dawˇ ve le? Yawˇ kaꞈ awˬ gʼaˇ nuˇ kʼai leh yawˇ ve laꞈ sheh htaꞈ hpehˇ ce taˍ ve laˇ? Maˇ heˆ! Moˉseˍ, Aˍsaˍ, leh awˬ nu ve Yaˬhoˉvaˬ ve kanˉ te ve chaw ka tiꞈ yeˬ ve hkʼa shuˍ, Neˍhaˍmiˆ Yaˬhoˉvaˬ htaꞈ hkʼaˬ htaˆ kaꞈ yonˍ ve yoˬ. Awˬ yanˇ chi ve hkʼa shuˍ, Neˍhaˍmiˆ Yaˬhoˉvaˬ ga laˇ tuˬ bon lawˬ ve leh Yaˬhoˉvaˬ yawˇ htaꞈ hkʼawꞈ piˇ ve yoˬ. Yuˇdaꞈ chaw hui awˬ gʼaˇ cawˬ tuˬ, Gʼuiˬ sha yawˇ ve “kanˇ paˆ” leh uiˍ jaˇ mvuh jaˇ ve laꞈ sheh htaꞈ yehˇ ve yoˬ. (Neˍhaˍmiˆ 1:10; 2:17-20; 6:9 gʼaw ve.) Yaˬhoˉvaˬ yawˇ ve kanˉ te ve chaw htaꞈ awˬ gʼaˇ piˇ ve hkʼa shuˍ nawˬ yonˍ˗aw laˇ?

10, 11. (a) Ngaˬ hui ve laꞈ sheh ce la tuˬ, Saˍtanˍ coˇ caˇ leh hkʼaˬ hkʼe te ve le? (b) Yaˬhoˉvaˬ ngaˬ hui htaꞈ awˬ gʼaˇ peꞈ laˇ tuˬ, yawˇ aˬ htoꞈ ma htaꞈ yehˇ ve le? (c) Nawˬ Yaˬhoˉvaˬ maˍ laˇ ve hkawˇ htaꞈ aˬ htoꞈ ma awˬ bon gʼa ve le?

¹⁰ Neˇhaiˬ yawˇ ve laꞈ sheh htaꞈ maˇ hpehˇ ce taˍ tehꞈ ngaˬ hui yonˍ gʼa ve yoˬ. Yawˇ ngaˬ hui htaꞈ hkʼaˬ htaˆ kaꞈ lawˇ nyi laˇ ve, leh Hkriꞈ yaˇ ve kanˉ jehˇ tuˬ, coˇ caˇ leh te chehˇ ve yoˬ. Mvuhˇ miˬ uˉ peunˍ ve, bon liˇ awˬ hoˉ, Gʼuiˬ sha htaꞈ hpfuhˆ ve chaw chi teˇ hpaˍ nyiˉ laˇ ve leh heˍ ve tawˇ hkawˇ Neˇhaiˬ yehˇ ve yoˬ. Aˬ htoꞈ ma pa taw yawˇ chi hkʼe te ve le? Yawˇ ngaˬ hui htaꞈ Gʼuiˬ sha ve mvuhˇ miˬ daꞈ ve awˬ lawn sha tanˇ hto toˇ ve kanˉ jehˇ tcuh gaˇ ve yoˬ. Yaꞈ hkʼaˇ, Yaˬhoˉvaˬ ngaˬ hui htaꞈ hkʼaˬ htaˆ kaꞈ ga laˇ ve leh ngaˬ hui awˬ gʼaˇ cawˬ tuˬ, yawˇ ve daꞈ ve kehˬ ve awˬ ha hpu peꞈ laˇ ve yoˬ. (1 Raˍsaˍvanˍ 29:12) Saˍtanˍ leh haiˬ ve  miˬ guiˬ chi htaꞈ gʼaˇ tuˬ, ngaˬ hui Gʼuiˬ sha ve daꞈ ve kehˬ ve awˬ ha hpu lawˬ ve teˇ ceuˬ a yeˇ uiˍ jaˇ ve yoˬ. (Chiˇ mvuh ve 18:39; 1 Kawˇrenˍhtuˆ 10:13) Gʼuiˬ sha ve tawˇ hkawˇ ngaˬ hui htaꞈ ga laˇ ve pa taw, awˬ bon uiˍ hkawˇ kʼoˆ piˇ ve yoˬ. Ngaˬ hui teˇ ha pa le le liꞈ kʼoˆ hkʼaw gʼa henˇ ve kaꞈ dawˇ nyi sheˍ. Zaˍhkaˍriˆ 8:9, 13 (gʼaw ve) ve tawˇ hkawˇ Yeˍruˆsaˍlehnˍ venˇ hkʼaw Gʼuiˬ sha ve bon yehˬ awˬ suhˉ kʼawꞈ gu te htaˇ kʼoˆ taˍ ve yoˬ. Yaꞈ hkʼaˇ, ngaˬ hui ve awˬ co˗e htawˇ kaꞈ yehˇ hpehꞈ ve yoˬ.

¹¹ Hkriꞈ yaˇ awˬ moˍ hpawnˬ daꞈ ve, hpawnˬ daꞈ lonˉ, Gʼuiˬ sha ve kanˉ te jawˬ tuˬ ve liꞈ henˇ yehˬ teˇ hpaˍ hkʼaw, Yaˬhoˉvaˬ maˍ laˇ ve yawˇ ngaˬ hui htaꞈ awˬ gʼaˇ peꞈ laˇ ve yoˬ. Maˍ laˇ ve chi teˇ hpaˍ lehˬ, nyi ma cawˇ ve awˬ hkʼaw lo ngaˬ hui Gʼuiˬ sha kanˉ te tuˬ, dawˇ law kuiˬ teh taˍ tuˬ, leh Hkriꞈ yaˇ ve awˬ vuiˬ htaꞈ te gʼa tuˬ ga laˇ ve yoˬ. (Chiˇ mvuh ve 119:32) Yaˬhoˉvaˬ maˍ laˇ ve chi teˇ hpaˍ awˬ gʼaˇ peꞈ laˇ ve htaꞈ, nawˬ coˇ caˇ leh haꞈ yuˬ chehˇ˗aw laˇ?

12. Ngaˬ hui hkʼaˬ htaˆ kaꞈ awˬ gʼaˇ hehnˇ tuˬ, aˬ htoꞈ ma te cawˇ ve le?

¹² Yaˬhoˉvaˬ ve chaw Aˍmaˍlehˆ leh Ehˇtaˍyoˇpiˆ chaw htaꞈ gʼaˇ tuˬ, yawˇ ga piˇ ve yoˬ. Leh Yeˍruˆsaˍlehnˍ laˇ venˇ teˇ hpaˍ kʼawꞈ te peuˬ tuˬ, yawˇ Neˍhaˍmiˆ leh Yuˇdaꞈ chaw hui htaꞈ kanˇ paˆ piˇ ve yoˬ. Chi hkʼa shuˍ shuˍ, ngaˬ hui ve dawˇ haˍ ve leh, shu ngaˬ hui htaꞈ tawˍ taˍ laˇ ve maˇ heˆ leh nyi ma hkʼa dehꞈ maˇ pfuhˇ ve htawˇ, hkʼaˬ htaˆ kaꞈ hto toˇ ve kanˉ te gʼa tuˬ, Gʼuiˬ sha ngaˬ hui htaꞈ awˬ gʼaˇ peꞈ laˇ ve yoˬ. (1 Peˍtruˆ 5:10) Ngaˬ hui shoꞈ shaꞈ ve awˬ lawn mehˉ kʼai tuˬ, Yaˬhoˉvaˬ anˇ tuˬ te laˇ ve maˇ heˆ. Yaꞈ hkʼaˇ, ngaˬ hui ve awˬ vuiˬ htaꞈ te cawˇ ve yoˬ. Hkʼaˬ hkʼe te tuˬ le? Gʼuiˬ sha ve Tawˇ hkawˇ teˇ nyi le le gʼa gʼaw ve, teˇ shinˉ le le hpawnˬ daꞈ ve htaꞈ gu leh kʼai ve, a shu yawˇ hkʼaˇ yawˇ Liꞈ hpu henˇ ve, yehˬ kʼa oˉ kʼoˍ pui ve, leh Yaˬhoˉvaˬ htaꞈ yonˍ la tuˬ bon lawˬ ve yoˬ. Yaˬhoˉvaˬ gu taˍ laˇ ve leh awˬ gʼaˇ peꞈ laˇ ve hkʼaw, ngaˬ hui htaꞈ teˇ ceuˬ kaꞈ taˇ tawˍ laˇ tcuh. Awˬ ceuˬ chi ve hkʼaw, hkʼaˬ ve teˇ ceuˬ hkʼaˬ htaˆ kaꞈ maˇ te chehˇ leh nawˬ ve laꞈ sheh ce la ve kʼo, Gʼuiˬ sha ga laˇ tuˬ lawˬ˗oˆ. Leh “nawˬ hui te gaˇ ve nyi ma cawˬ tuˬ leh te gʼa tuˬ,” Gʼuiˬ sha ve awˬ ha hpu awˬ gʼaˇ peꞈ laˇ ve awˬ hkʼaˇ htaꞈ nyi sheˍ. (Hpiˇliˇpiˆ 2:13) Yaꞈ hkʼaˇ, nawˬ shu ve laꞈ sheh htaꞈ awˬ gʼaˇ piˇ hpehꞈ˗aw laˇ?

13, 14. (a) Awˬ viˉ awˬ nyi teˇ gʼaˇ yawˇ awˬ miˇ ma suh peuˬ hkʼawꞈ nawˉ, yawˇ awˬ gʼaˇ hkʼaˬ hkʼe gʼa ve le? (b) Ngaˬ hui shu htaꞈ awˬ gʼaˇ hkʼaˬ hkʼe piˇ gʼa tuˬ le?

¹³ Yaˬhoˉvaˬ lehˬ miˬ guiˬ chi hkʼoˆ ve awˬ viˉ awˬ nyi teˇ gʼaˇ leh teˇ gʼaˇ dawˇ haˍ daꞈ puiˉ ve htaꞈ peꞈ laˇ ve lehˬ, ngaˬ hui awˬ gʼaˇ gʼa ve yoˬ. Tcuh yaˇ Pawˇluꞈ kʼoˆ ve, “nawˬ hui ve laꞈ sheh deu lehˍ te chehˇ ve teˇ hpaˍ htaꞈ chiˇ leh, awˬ gʼaˇ maˇ cawˬ ve hkui tcuhˉ kʼu teˇ hpaˍ htaꞈ awˬ gʼaˇ cawˬ la piˇ˗oˆ ... Nawˬ hui ve hkui sheh awˬ pon yaꞈ kʼaw hteˇ lehˍ gu taˍ˗oꞈ.” (Heˍbrehˇ 12:12, 13) Awˬ viˉ awˬ nyi awˉ lawˉ peuˇ ve Hkriꞈ yaˇ awˬ nu ve awˬ viˉ awˬ nyi geh awˬ gʼaˇ chi hkʼe gʼa ve yoˬ. Ngaˬ hui ve awˬ co˗e htawˇ chi hkʼa shuˍ yoˬ. Awˬ lawn chi htaꞈ teˇ geh nyi sheˍ. Awˬ viˉ awˬ nyi hawˉ hkʼaˆ paˍ teˇ gʼaˇ yawˇ awˬ miˇ ma suh peuˬ hkʼawꞈ nawˉ, dawˇ haˍ tuˬ laiˉ ceuˬ gʼa hpuˇ ve yoˬ. Yawˇ kʼoˆ ve, “lawˇ nyi laˇ ve awˬ ceuˬ, hkʼaˬ htaˆ gʼa hpuˇ tuˬ leh hkʼaˬ hkʼe taw gʼa hpuˇ tuˬ ngaˬ leuˆ yuˬ maˇ gʼa ve htaꞈ gʼa shiˍ ve yoˬ. Bon lawˬ ve leh a shu yawˇ hkʼaˇ yawˇ Liꞈ hpu henˇ ve lehˬ, iˉ kaˆ maˇ kʼa tuˬ ve aˉ poꞈ hkʼa shuˍ yoˬ. Awˬ viˉ awˬ nyi co ha hpawˇ awˬ gʼaˇ peꞈ laˇ ve kaꞈ ngaˬ ve nyi ma sha  tuˬ te laˇ ve yoˬ. Ngaˬ gʼa shiˍ ve, shoꞈ shaꞈ ve awˬ lawn maˇ gʼa hpuˇ sheˍ htaˇ, Yaˬhoˉvaˬ geh meuˆ daꞈ ve teˇ ceuˬ cawˬ ve a yeˇ uiˍ jaˇ ve yoˬ.”

¹⁴ Aˍmaˍlehˆ chaw htaꞈ maꞈ bawˆ chehˇ htaˇ, Aˍronˍ leh Huˇraˆ Moˉseˍ ve laꞈ sheh htaꞈ ga piˇ ve yoˬ. Chi beuꞈ teˇ co˗e kaꞈ, shu htaꞈ awˬ gʼaˇ piˇ tuˬ leh ga piˇ ve awˬ hkʼaˇ, ngaˬ hui ca hpehꞈ ve yoˬ. Ngaˬ hui ve awˬ viˉ awˬ nyi teˇ hpaˍ lehˬ a shaꞈ mawˇ la ve, maˇ chehˇ sha puiˉ ve, yehˬ kʼa hkʼaw tawˍ ve tsuhˇ ve gʼa hpuˇ ve, chehˇ bawˬ ve, maˇ heˆ kʼo yawˇ haꞈ ve chaw suh˗e kʼai ve chi teˇ hpaˍ gʼa hkanˍ chehˇ ve yoˬ. Yaˇ ehˉ yaˇ nehˬ maˇ daꞈ ve awˬ ceuˬ htaꞈ nyiˉ te piˇ ve maˇ heˆ kʼo, miˬ guiˬ hkʼoˆ awˬ meh bvuhˬ tuˬ htaꞈ gʼaꞈ ca ve gʼa hpuˇ lehˬ, ngaˬ hui yawˇ hui htaꞈ awˬ gʼaˇ piˇ gʼa ve yoˬ. (1 Hteˇsaˍlawˇniˆ 3:1-3; 5:11, 14) Hpawnˬ daꞈ kuiˬ hkʼaw lo, hto toˇ ve kanˉ teˇ htaˇ, teˇ geh awˬ caˇ htaˇ, tawˇ yaw tuˬ ve awˬ hkʼeun hkʼaw tawˇ yaw daꞈ chehˇ htaˇ, ngaˬ hui shu htaꞈ a yeˇ teˇ piˇ tuˬ awˬ hkʼaˇ ca sheˍ.

15. Ngaˬ hui awˬ viˉ awˬ nyi geh daꞈ ve tawˇ hkawˇ yehˇ htaˇ, hkʼaˬ hkʼe hpehꞈ la tuˬ le?

¹⁵ Aˍsaˍ Ehˇtaˍyoˇpiˆ htaꞈ mawꞈ bawˆ gʼaˇ hkʼawꞈ nawˉ, tcuh kaˍ paˍ Aˍzaˍriˆ lehˬ Aˍsaˍ leh yawˇ ve chaw htaꞈ awˬ gʼaˇ piˇ ve yoˬ. Yawˇ kʼoˆ ve, “nawˬ hui awˬ gʼaˇ gʼa uiˍ la piˇ tuˬ yoˬ ... Nawˬ hui hkʼa te ve kanˉ hkʼa peu˗eˬ awˬ bon gʼa tuˬ yoˬ.” (2 Raˍsaˍvanˍ 15:7) Chi lehˬ awˬ tehˬ awˬ na oˉ kʼoˍ pui ve kʼawꞈ gu te tuˬ, Aˍsaˍ htaꞈ ga piˇ ve yoˬ. Chi hkʼa shuˍ shuˍ, ngaˬ hui ve daꞈ ve tawˇ hkawˇ shu htaꞈ awˬ gʼaˇ piˇ gʼa leh Yaˬhoˉvaˬ ve kanˉ te kʼai gʼa tuˬ ga piˇ gʼa ve yoˬ. (Tawˇ naˉ ve 15:23)  Hpawnˬ daꞈ htaˇ nawˬ hkʼawꞈ laˇ ve hkawˇ awˬ gʼaˇ piˇ daꞈ ve lehˬ awˬ viˉ awˬ nyi hkʼaˬ hkʼe tawn awˬ gʼaˇ gʼa ve tehꞈ, taˇ leunˇ.

16. Chaw mawˇ chaw kehˉ Neˍhaˍmiˆ htaꞈ hkʼaˬ hkʼe henˇ yuˬ ve le? Awˬ nu ve awˬ viˉ awˬ nyi nawˬ htaꞈ hkʼaˬ hkʼe ga laˇ ve kʼoˆ maˍ laˇ sheˍ.

¹⁶ Yaˬhoˉvaˬ ga laˇ ve awˬ hkʼaw lo Neˍhaˍmiˆ leh Yuˇdaꞈ chaw awˬ gʼaˇ gʼa ve yoˬ. Yawˇ Yeˍruˆsaˍlehnˍ laˇ venˇ 52 nyi ceh tiˉ te peuˬ ve! (Neˍhaˍmiˆ 2:18) Neˍhaˍmiˆ shu kanˉ te ve ceh tiˉ maˇ nyi, yawˇ Yeˍruˆsaˍlehnˍ laˇ venˇ htaꞈ kaꞈ gʼa ga te ve yoˬ. (Neˍhaˍmiˆ 5:16) Chi hkʼa shuˍ shuˍ, chaw mawˇ chaw kehˉ laiˉ gʼaˇ Neˍhaˍmiˆ htaꞈ henˇ yuˬ ve yoˬ. Yawˇ hui hpawnˬ daˬ kuiˬ yehˬ te ve htaꞈ ca ga piˇ ve leh, hpawnˬ daꞈ kuiˬ yehˬ nyi haꞈ shaˉ leh daꞈ kehˬ tuˬ te ve yoˬ. Yawˇ hui awˬ viˉ awˬ nyi nyi ma dawˇ haˍ dawˇ hkiˉ ve htaꞈ awˬ gʼaˇ piˇ tuˬ, ca guiˇ˗e piˇ leh teˇ geh hto toˇ ve yoˬ.—Iˉsaˍyaˆ 35:3, 4 gʼaw ve.

17, 18. Dawˇ haˍ leh shoꞈ shaꞈ ve awˬ lawn cawˬ htaˇ, ngaˬ hui aˬ htoꞈ ma yonˍ gʼa ve le?

¹⁷ Ngaˬ hui awˬ viˉ awˬ nyi geh kanˉ teˇ geh te htaˇ, nyi ma teˇ shiˍ tiˉ cawˬ maˇ la ve yoˬ. Chi lehˬ, awˬ tehˬ ve awˬ chawˇ cawˬ gʼa leh, Gʼuiˬ sha ve mvuhˇ miˬ awˬ bon peꞈ laˇ tuˬ, ngaˬ hui yonˍ gʼa tuˬ ga laˇ ve yoˬ. Yawˇ hui ve laꞈ sheh htaꞈ awˬ gʼaˇ piˇ htaˇ, haˍ ve awˬ lawn yeunˇ hkanˍ gʼaˇ, leh awˬ gʼuˇ suhˍ hpawˇ ve dawˇ law kuiˬ haꞈ shaˉ gʼa ve ngaˬ hui ga piˇ ve yoˬ. Ngaˬ hui shu htaꞈ ga piˇ htaˇ, ngaˬ hui ve laꞈ sheh awˬ gʼaˇ cawˬ la leh ngaˬ hui awˬ gʼuˇ suhˍ hpawˇ ve dawˇ law kuiˬ htaꞈ haꞈ shaˉ gʼa tuˬ kaꞈ ga laˇ ve yoˬ.

¹⁸ Oˇ htaˇ, Yaˬhoˉvaˬ yawˇ ve ka tiꞈ yeˬ ve chaw htaꞈ hkʼaˬ hkʼe ga piˇ leh haꞈ shaˉ piˇ, ve dawˇ nyi htaˇ, ngaˬ hui ve yonˍ hkʼaˇ cawˬ maˇ la ve yoˬ. Chi htaꞈ pa taw, nawˬ dawˇ haˍ leh shoꞈ shaꞈ ve awˬ lawn cawˬ htaˇ, “Nawˬ ve laꞈ sheh htaꞈ deu lehˍ taˇ hpehˇ ce taˍ”! Nawˬ Yaˬhoˉvaˬ ga laˇ tuˬ bon lawˬ kʼo, yawˇ ve laꞈ sheh kanˇ paˆ uiˍ jaˇ ve nawˬ htaꞈ awˬ gʼaˇ peꞈ laˇ leh awˬ gʼuˇ suhˍ hpawˇ Gʼuiˬ sha ve mvuhˇ miˬ awˬ bon gʼa tuˬ sheh kʼai laˇ tuˬ, nawˬ yonˍ gʼa ve yoˬ.—Chiˇ mvuh ve liꞈ 73:23, 24.