1, 2. Aˬ htoꞈ ma te Yaˬhoˉvaˬ ve Shaˉhkiˆhkanˍ ve chaw veuꞈ kʼaˇ veuꞈ ve teh taˍ ve awˬ hkʼaˇ daꞈ jaˇ ve le? (awˬ lawn tanˬ htaˇ ve aw han htaꞈ nyi sheˍ.)

 Saˍ laꞈ teˇ hpaˍ bon yehˬ lo kʼai ve veuꞈ kʼaˇ veuꞈ ve awˬ hkʼaˇ kʼoˆ maˍ laˇ htaˇ, Nehˬtaˬlehˬ mvuhˇ miˬ lo liꞈ sha tanˇ hkʼaw kʼoˆ ve, “yawˇ hui veuꞈ kʼaˇ veuꞈ ve maˇ nyi sha.” Yaꞈ hkʼaˇ, Yaˬhoˉvaˬ ve Shaˉhkiˆhkanˍ ve chaw hpawnˬ daꞈ lonˉ lo kʼai htaˇ, yawˇ hui htaꞈ maˇ shuˍ daꞈ, liꞈ sha tanˇ chi ve hkʼaw bvuhꞈ taˍ ve yoˬ. Hawˉ hkʼaˆ paˍ chaw mawˇ, yaˇ nehˬ, leh yaˇ ehˉ aˉ poꞈ awˬ htaꞈ hpawˇ ve leh neˆ htai (necktie) hpeh ceuꞈ taˍ ve leh, yaˇ miˇ ma yaˇ nehˬ leh yaˇ ehˉ yawˇ hui veuꞈ taˍ ve hteh vawˇ lawˇ maˇ ngeh leh nyi sha ve yoˬ. Laiˉ gʼaˇ Yaˬhoˉvaˬ ve Shaˉhkiˆhkanˍ ve chaw veuꞈ kʼaˇ veuꞈ ve awˬ hkʼaˇ htaꞈ chiˇ mvuh ve yoˬ. Hkriꞈ yaˇ veuꞈ kʼaˇ veuꞈ ve awˬ hkʼaˇ lehˬ “nyi ma nuˇ nehˬ ve leh nyi ma taˍ puiˉ ve” hpeuꞈ maw cawˇ ve yoˬ tehꞈ, tcuh yaˇ Pawˇluꞈ kʼoˆ ve yoˬ. (1 Tiˆmoˉseˍ 2:9, 10) Pawˇluꞈ yawˇ yaˇ miˇ htaꞈ kʼoˆ ve htawˇ, hawˉ hkʼaˆ kaꞈ hkʼa shuˍ yehˇ hpehꞈ ve yoˬ.

 ² Ngaˬ hui Yaˬhoˉvaˬ ve chaw hpehꞈ ve pa taw, veuꞈ kʼaˇ veuꞈ ve daꞈ jaˇ ve teh taˍ ve awˬ hkʼaˇ ngaˬ hui leh ngaˬ hui oˉ kʼoˍ pui chehˇ ve Gʼuiˬ sha awˬ pon a yeˇ uiˍ jaˬ ve yoˬ. (Awˬ hkuiˉ puiˍ 3:21) Yawˇ ve kanˉ te ve chaw veuꞈ kʼaˇ veuꞈ ve awˬ hkʼaˇ kanˇ paˆ uiˍ jaˇ ve Yaˬhoˉvaˬ gu teh taˍ laˇ ve yoˬ tehꞈ, Liꞈ hpu hkʼaw hkʼa dehꞈ kʼoˆ taˍ ve yoˬ. Chi htaꞈ pa taw, ngaˬ hui dawˇ cawˇ ve veuꞈ kʼaˇ ceh tiˉ maˇ leuˆ cawˇ, Yaˬhoˉvaˬ dawˇ cawˇ ve veuꞈ kʼaˇ leuˆ cawˇ ve lehˬ, a yeˇ uiˍ jaˇ ve yoˬ.

3. Gʼuiˬ sha Iˉsaˍreˍlaˆ chaw htaꞈ piˇ taˍ ve awˬ liˇ tawˇ hkawˇ ngaˬ hui veuꞈ kʼaˇ veuꞈ ve htaꞈ hkʼaˬ hkʼe maˍ laˇ ve le?

³ Moˉseˍ ve awˬ liˇ tawˇ hkawˇ hkʼaw, shu mvuhˇ miˬ ve chaw haˉ chawˇ haˉ paˆ te ve a shaꞈ teꞈ hkʼaˇ, Iˉsaˍreˍlaˆ chaw htaꞈ haꞈ shaˉ tuˬ, awˬ liˇ tawˇ hkawˇ cawˬ ve yoˬ. Hawˉ hkʼaˆ leh yaˇ miˇ fuiˍ daꞈ maˇ gʼa ve veuꞈ kʼaˇ Yaˬhoˉvaˬ maˇ dawˇ cawˇ jaˇ ve, awˬ liˇ tawˇ hkawˇ chi hpeuꞈ maw laˇ taˍ ve yoˬ. Chi beuꞈ teˇ co˗e kaꞈ cawˬ chehˇ sheꞈ ve yoˬ. (Bon maˍ ve 22:5 gʼaw ve.) Veuꞈ kʼaˇ hawˉ hkʼaˆ veuꞈ leh yawˇ yaˇ miˇ htaꞈ shuˍ ve, veuꞈ kʼaˇ yaˇ miˇ veuꞈ leh yawˇ hawˉ hkʼaˆ htaꞈ shuˍ ve, maˇ heˆ leh yawˇ hui veuꞈ taˍ ve veuꞈ kʼaˇ hawˉ hkʼaˆ yaˇ miˇ htaꞈ fuiˍ daꞈ maˇ gʼa ve, chi hkʼa peu˗eˬ Yaˬhoˉvaˬ maˇ dawˇ cawˇ jaˇ awˬ liˇ tawˇ hkawˇ chi ngaˬ hui htaꞈ maˍ laˇ ve yoˬ.

4. Veuꞈ kʼaˇ veuꞈ ve daꞈ jaˇ ve htaꞈ dawˇ cheˆ tuˬ, aˬ htoꞈ ma ve teˇ ceuˬ ngaˬ hui htaꞈ ga laˇ ve le?

⁴ Ngaˬ hui veuꞈ kʼaˇ veuˬ ve daꞈ jaˇ ve htaꞈ dawˇ cheˆ tuˬ, Liꞈ hpu ngaˬ hui htaꞈ ga laˇ gʼa ve yoˬ. Ngaˬ hui hkʼaˬ kaꞈ lo laˬ ve maˇ kʼo, mvuhˇ kaˆ ve, haw ve, leh chaw liˇ vaˇ liˇ hkʼaˬ hkʼe hpehꞈ ve maˇ kʼo, ngaˬ hui awˬ liˇ awˬ hkʼaˇ chi yehˇ gʼa ve yoˬ. Chi ve veuꞈ gʼa ve, oˇ ve veuꞈ maˇ gʼa ve, hkʼa peu˗eˬ bvuhꞈ tawˆ tuˬ maˇ lo. Yaꞈ hkʼaˇ, ngaˬ hui Liꞈ hpu ve awˬ liˇ awˬ hkʼaˇ gʼaꞈ te ve kaꞈ lawꞈ leh, ngaˬ hui dawˇ cawˇ ve veuꞈ kʼaˇ kaꞈ veuꞈ hpehꞈ ve yoˬ. Veuꞈ kʼaˇ hkʼaˬ ve veuꞈ ve ngaˬ hui dawˇ cheˆ htaˇ, “Gʼuiˬ sha ve daꞈ jaˇ ve nyi ma cawˇ jaˇ ve leh biˇ jaˇ ve a loˍ” na gʼa tuˬ, Liꞈ hpu hkʼaw ve awˬ liˇ awˬ hkʼaˇ teˇ geh henˇ sheˍ.—Roˉmaꞈ 12:1, 2.

5, 6. Ngaˬ hui ve veuꞈ kʼaˇ shu htaꞈ hkʼaˬ hkʼe heuˆ la kuiˬ cawˬ ve le?

⁵ 2 Kawˇrenˍhtuˆ 6:4 (gʼaw ve) hkʼaw a yeˇ uiˍ ve awˬ liˇ awˬ hkʼaˇ tcuh yaˇ Pawˇluꞈ htaꞈ dawˇ pawnˬ piˇ leh bvuhꞈ ve yoˬ. Shu ngaˬ hui ve veuꞈ kʼaˇ veuꞈ ve awˬ hkʼaˇ htaꞈ mawˬ htaˇ, ngaˬ hui hkʼaˬ hkʼe ve chaw hpehꞈ ve le tehꞈ dawˇ puiˉ ve yoˬ. (1 Saˍmo˗eˍlaˆ 16:7) Ngaˬ hui Gʼuiˬ sha kanˉ te ve chaw hpehꞈ ve pa taw, ngaˬ hui veuꞈ kʼaˇ veuꞈ sha leh dawˇ cawˇ ve ceh tiˉ maˇ veuꞈ cawˇ ve yoˬ. Ngaˬ hui Liꞈ hpu ve awˬ liˇ awˬ hkʼaˇ gʼaꞈ te htaˇ, ngaˬ hui veuꞈ kʼaˇ veuꞈ ve kiˇ jaˇ ve maˇ heˆ kʼo, pehꞈ ve (sexy) jaw kʼai cawˇ ve ga laˇ gʼa ve yoˬ. Awˬ lawn chi ve kʼoˆ gaˇ ve lehˬ, maˇ mawˬ tcuh cawˇ ve ngaˬ hui ve awˬ to ve awˬ hkʼeun shu mawˬ gʼa ve veuꞈ kʼaˇ htaꞈ, ngaˬ hui jawˬ kʼai cawˇ ve yoˬ. Nawˬ ve veuꞈ kʼaˇ veuꞈ ve htaꞈ, shu nyi ma maˇ sha leh teˇ paˉ hpfuhˆ kʼai ve veuꞈ kʼaˇ htaꞈ maˇ veuꞈ cawˇ ve yoˬ.

 ⁶ Ngaˬ hui daꞈ kehˬ leh ngaˬ hui ve veuꞈ kʼaˇ nyi sha htaˇ, shu ngaˬ hui htaꞈ Yaˬhoˉvaˬ ve kanˉ te paˍ tehꞈ yawˆ yan maˇ la tuˬ yoˬ. Ngaˬ hui oˉ kʼoˍ pui chehˇ ve Gʼuiˬ sha htaꞈ yawˇ hui shiˍ gaˇ la leh, Gʼuiˬ sha ve kanˉ hkʼaˇ htaꞈ yawˆ yan la tuˬ yoˬ. Leh gʼa ponˬ tuˬ ve awˬ lawn sha tanˇ yawˇ kʼawꞈ na gaˇ la tuˬ yoˬ.

7, 8. Keunˍ lawꞈ cawˇ lawꞈ ve veuꞈ kʼaˇ hkʼaˬ htaˆ veuꞈ tuˬ, a yeˇ uiˍ jaˇ tehˬ tehˬ ve le?

⁷ Daꞈ kehˬ ve Gʼuiˬ sha, ngaˬ hui ve awˬ viˉ awˬ nyi, leh ngaˬ hui hto toˇ kuiˬ lo ve chaw chi teˇ hpaˍ awˬ pon, ngaˬ hui ve veuꞈ kʼaˇ teˇ hpaˍ Yaˬhoˉvaˬ htaꞈ yawˆ yan ve a yeˇ uiˍ jaˇ ve yoˬ. (Roˉmaꞈ 13:8-10) Hpawnˬ daꞈ htaˇ leh hto toˇ kuiˬ lo awˬ lawn chi a yeˇ uiˍ jaˇ tehˬ tehˬ ve yoˬ. Ngaˬ hui ve veuꞈ kʼaˇ lehˬ, Gʼuiˬ sha htaꞈ oˉ kʼoˍ pui ve chaw keunˍ lawꞈ cawˇ lawꞈ ve veuꞈ kʼaˇ gʼa hpehꞈ cawˇ ve yoˬ. (1 Tiˆmoˉseˍ 2:10) Awˬ tehˬ yoˬ, veuꞈ kʼaˇ teˇ hpaˍ teˇ kaˬ kʼo keunˍ lawꞈ cawˇ lawꞈ ve, teˇ kaˬ kʼo maˇ keunˍ ve yoˬ. Chi htaꞈ pa taw, ngaˬ hui veuꞈ kʼaˇ veuꞈ taˍ ve hkʼaˬ kaꞈ lo chehˇ ve htawˇ, shu nyi ma maˇ sha tuˬ gʼa jaw kʼai cawˇ ve yoˬ.

 ⁸ 1 Kawˇrenˍhtuˆ 10:31 gʼaw sheˍ. Hpawnˬ daꞈ lonˉ kʼai htaˇ, ngaˬ hui ve veuꞈ kʼaˇ lehˬ gʼa keunˍ lawꞈ cawˇ lawꞈ leh gʼa nyi sha cawˇ ve yoˬ. Ngaˬ hui veuꞈ taˍ ve veuꞈ kʼaˇ miˬ gui yaˇ dawˇ cawˇ ve awˬ hkʼaˇ htaꞈ maˇ henˇ yuˬ cawˇ ve yoˬ. Hpawnˬ daꞈ ve tanˬ htaˇ, peuˬ htaˇ, leh chaw haˉ kuiˬ yehˬ lo chehˇ htaˇ, maˇ nyi sha ve veuꞈ kʼaˇ maˇ veuꞈ cawˇ ve yoˬ. Chi hkʼe te ve kʼo, ngaˬ hui awˬ to Yaˬhoˉvaˬ ve Shaˉhkiˆhkanˍ ve chaw kʼoˆ tuˬ nyi ma sha jaˇ leh, hkʼaˬ htaˆ kaꞈ hto piˇ hpehꞈ ve yoˬ.

9, 10. Ngaˬ hui veuꞈ kʼaˇ veuꞈ htaˇ, aˬ htoꞈ ma pa taw Hpiˇliˇpiˆ 2:4 heuˆ la cawˇ ve le?

⁹ Hpiˇliˇpiˆ 2:4 gʼaw sheˍ. Ngaˬ hui veuꞈ kʼaˇ veuꞈ ve awˬ viˉ awˬ nyi htaꞈ hkʼaˬ hkʼe heuˆ la kuiˬ cawˬ ve, aˬ htoꞈ ma te dawˇ nyi tuˬ a yeˇ uiˍ ve le? Teˇ ceuˬ lehˬ, “nawˬ hui awˬ hkʼaw lo cawˬ ve miˬ guiˬ htaꞈ caˉ daꞈ ve awˬ ceuˬ teˇ hpaˍ htaꞈ tiˇ pehˍ˗oꞈ. Awˬ ceuˬ oˇ ve teˇ hpaˍ lehˬ, haˉ chawˇ haˉ paˆ te ve, chaꞈ chiˆ ve htaꞈ te ve, pehꞈ ve tzuhˆ ve htaꞈ te ve,” beˆ maˍ laˇ ve chi teˇ hpaˍ Gʼuiˬ sha ve chaw coˇ caˇ leh gʼaꞈ te ve htaꞈ pa taw yoˬ. (Kawˇlawˇsehˇ 3:2, 5) Haˉ chawˇ haˉ paˆ te ve htaꞈ awˬ viˉ awˬ nyi teˇ hpaˍ maˇ te˗o ve htawˇ, teˇ pawˆ pawˆ yawˇ hui maˇ daꞈ ve dawˇ hkʼaˇ htaꞈ gʼa tawˍ daꞈ chehˇ ve yoˬ. Ngaˬ hui veuꞈ kʼaˇ veuꞈ ve teˇ hpaˍ sha tiꞈ maˇ te ve kʼo, yawˇ hui Liꞈ hpu awˬ hkʼaˇ suh gʼaꞈ te tuˬ leh maˇ daꞈ ve dawˇ hkʼaˇ tawˍ daꞈ gʼa tuˬ haˍ jaˇ ve yoˬ. (1 Kawˇrenˍhtuˆ 6:9, 10) Yawˇ gʼa tawˍ daꞈ ve htaꞈ ngaˬ hui maˇ kʼawꞈ te piˇ maˇ tcuh gaˇ ve maˇ heˆ laˇ?

¹⁰ Ngaˬ hui ve awˬ viˉ awˬ nyi geh chehˇ ve teˇ yanˇ, haˉ chawˇ haˉ paˆ te ve chaw hui geh maˇ gʼa chehˇ. Yawˇ hui geh chehˇ htaˇ, ngaˬ hui veuꞈ kʼaˇ lehˬ, daꞈ kehˬ leh nyi ma sha piˇ cawˇ ve yoˬ. Chi ve lehˬ, ngaˬ hui hpawnˬ daꞈ chehˇ htaˇ maˇ heˆ leh leˍ guiˇ htaˇ kaꞈ hkʼa shuˍ yoˬ. Hkʼaˬ hkʼe veuꞈ tuˬ ve ngaˬ hkʼaˇ ngaˬ leuˆ gʼa ve htawˇ, shu te ve awˬ liˇ awˬ hkʼaˇ hkʼa peu˗eˬ daꞈ kehˬ ve yawˇ haꞈ shaˉ gʼa ve ngaˬ hui ga piˇ gʼa tuˬ, ngaˬ hui veuꞈ kʼaˇ keunˍ daꞈ ve htaꞈ leuˆ cawˇ ve yoˬ. (1 Peˍtruˆ 1:15, 16) Awˬ tehˬ awˬ na “haꞈ pehnˇ ve lehˬ maˇ shawˍ maˇ caˆ maˇ te puiˉ, a shu yawˇ awˬ to awˬ pon maˇ ca puiˉ.”—1 Kawˇrenˍhtuˆ 13:4, 5.

11, 12. Ngaˬ hui cawˇ ve htaꞈ dawˇ cheˆ tuˬ, Cuˇ yiˍ piˇ ve 3:1, 17 hkʼaw hkʼaˬ hkʼe ga laˇ gʼa ve le?

¹¹ Gʼuiˬ sha kanˉ te ve chaw veuꞈ kʼaˇ veuꞈ tuˬ yawˇ dawˇ cheˆ htaˇ, “awˬ ceuˬ hkʼa peu˗eˬ awˬ pon, daꞈ ve cawˇ ve awˬ yanˇ cawˬ taˍ ve,” yawˇ hui na gʼa ve yoˬ. (Cuˇ yiˍ piˇ ve 3:1, 17) Mvuhˇ haw awˬ shaˉ, awˬ tcuhˉ awˬ yanˇ, leh chehˇ kuiˬ awˬ ti ngaˬ hui veuꞈ kʼaˇ leuˆ ve lehˬ, chi htaꞈ caˉ daꞈ ve yoˬ. Yaꞈ hkʼaˇ, Yaˬhoˉvaˬ tehˬ taˍ ve awˬ liˇ awˬ hkʼaˇ lehˬ maˇ pa jaw ve yoˬ.—Maˍlaˍhkiˆ 3:6.

¹² Haw ve awˬ yanˇ htaˇ, awˬ nu ve awˬ yanˇ aꞈ kehˉ, daꞈ ve leh yawˆ yan ve veuꞈ kʼaˇ leuˆ yuˬ tuˬ haˍ jaˇ ve yoˬ. Kiˇ jaˇ ve leh kʼoˍ jaˇ ve veuꞈ kʼaˇ ngaˬ hui maˇ veuꞈ ve kʼo, awˬ viˉ awˬ nyi ha lehˬ jaˇ ve yoˬ. (Yawˇbaˆ 31:1) Ngaˬ hui iˉ kaˆ lawehˇ htaˇ, nyi sha ve veuꞈ kʼaˇ kaꞈ gʼa veuꞈ ve yoˬ. (Tawˇ naˉ ve 11:2, 20) Awˬ to htaꞈ mawˬ jaˇ ve iˉ kaˆ lawehˇ tuˬ ve veuꞈ kʼaˇ awˬ nu ve chaw veuꞈ ve htawˇ, ngaˬ hui dawˇ cheˆ ve lehˬ, daꞈ  kehˬ ve Gʼuiˬ sha Yaˬhoˉvaˬ htaꞈ gʼa yawˆ yan piˇ cawˇ ve yoˬ.

13. Veuꞈ kʼaˇ leuˆ htaˇ, 1 Kawˇrenˍhtuˆ 10:32, 33 hkʼaw ve beˆ maˍ laˇ hkawˇ ngaˬ hui htaꞈ, hkʼaˬ hkʼe ga laˇ gʼa ve le?

¹³ Ngaˬ hui veuꞈ kʼaˇ leuˆ htaˇ, awˬ liˇ awˬ hkʼaˇ teˇ ma cawˬ sheˍ ve yoˬ. Ngaˬ hui shu ve dawˇ shiˍ puiˉ ve nyi ma htaꞈ gʼa dawˇ nyi piˇ puiˉ ve yoˬ. (1 Kawˇrenˍhtuˆ 10:32, 33 gʼaw ve.) Ngaˬ hui veuꞈ kʼaˇ veuꞈ ve awˬ viˉ awˬ nyi leh awˬ nu ve chaw hkui htiˇ poˬ paiˍ tuˬ maˇ te cawˇ. Tcuh yaˇ Pawˇluꞈ kʼoˆ ve, “ngaˬ hui teˇ gʼaˇ le le a shu yawˇ awˬ paˇ awˬ kui lo chehˇ ve chaw hui htaꞈ daꞈ la uiˍ la tuˬ awˬ pon yawˇ hui nyi ma cawˇ tuˬ te piˇ˗a veuˬ.” Pawˇluꞈ kʼawꞈ caˉ kʼoˆ maˍ laˇ taˍ ve, “awˬ lawn kʼo, Hkriꞈ htawˇ yawˇ awˬ to nyi ma cawˇ ve htaꞈ yawˇ maˇ te.” (Roˉmaꞈ 15:2, 3) Yeˍsuˆ hkʼa shuˍ, Gʼuiˬ sha ve a loˍ gʼaꞈ te ve leh shu htaꞈ ga piˇ ve chi lehˬ, ngaˬ hui dawˇ cawˇ ve htaꞈ gʼaꞈ te ve a kehˉ a yeˇ uiˍ jaˇ ve tehꞈ, gʼa dawˇ ve yoˬ. Chi htaꞈ pa taw, ngaˬ hui dawˇ cawˇ ve htaꞈ veuꞈ leh shu daꞈ ve awˬ lawn sha tanˇ maˇ na gaˇ la ve kʼo, ngaˬ hui maˇ veuꞈ cawˇ.

14. Yaˇ hkʼaˬ hkʼe ve veuꞈ kʼaˇ leuˆ leh Yaˬhoˉvaˬ htaꞈ yawˆ yan piˇ tuˬ, awˬ pa awˬ e hkʼaˬ hkʼe te maˍ piˇ gʼa ve le?

¹⁴ Awˬ pa awˬ e Hkriꞈ yaˇ teˇ hpaˍ a shu yawˇ ve yaˇ htaꞈ, Liꞈ hpu hkʼaw ve awˬ liˇ awˬ hkʼaˇ gʼa maˍ piˇ ve yoˬ. Chi ve kaꞈ caˉ daꞈ taˍ ve, yehˬ kʼa hkʼaw ve chaw teˇ gʼaˇ le le Gʼuiˬ sha ha lehˬ piˇ gʼa tuˬ, keunˍ lawꞈ cawˇ lawꞈ ve veuꞈ kʼaˇ htaꞈ gʼa leuˆ ve yoˬ. (Tawˇ naˉ ve 22:6; 27:11) Daꞈ kehˬ ve Gʼuiˬ sha leh yawˇ teh taˍ ve awˬ liˇ awˬ hkʼaˇ teˇ hpaˍ htaꞈ yawˆ yan tuˬ, awˬ pa awˬ e yaˇ htaꞈ hkʼaˬ hkʼe te maˍ piˇ gʼa ve le? Daꞈ ve henˇ yuˬ tuˬ yaˇ awˬ pon awˬ pa awˬ e gʼa te cawˇ ve yoˬ. Keunˍ lawꞈ cawˇ lawꞈ ve veuꞈ kʼaˇ yaˇ leuˆ yuˬ tuˬ, awˬ pa awˬ e haꞈ pehnˇ ve awˬ hkʼaw lo gʼa maˍ piˇ ve yoˬ. Yaˇ yawˇ dawˇ cawˇ ve ceh tiˉ maˇ gʼa leuˆ cawˇ. Yaˬhoˉvaˬ ve awˬ tan hpehꞈ ve pa taw, yawˇ htaꞈ yawˆ yan piˇ tuˬ veuꞈ kʼaˇ leuˆ ve lehˬ, a yeˇ uiˍ jaˇ ve yoˬ.

15. Cuˇ yiˍ cawˬ ve hkʼaw dawˇ cheˆ htaˇ, aˬ htoꞈ ma teˇ ceuˬ ga laˇ gʼa ve le?

¹⁵ Liꞈ hpu hkʼaw ve beˆ maˍ laˇ hkawˇ ngaˬ hui cuˇ yiˍ cawˬ ve awˬ hkʼaw lo dawˇ cheˆ gʼa tuˬ leh, Gʼuiˬ sha htaꞈ yawˆ yan tuˬ ga laˇ ve yoˬ. Yaꞈ hkʼaˇ, veuꞈ kʼaˇ teˇ gʼaˇ le le htaꞈ hawˍ daꞈ ve cawˬ ve yoˬ. Teˇ gʼaˇ htaꞈ hawˍ ve leh vuiˬ gʼa ve veuꞈ kʼaˇ awˬ nu ve teˇ gʼaˇ htaꞈ maˇ shuˍ daꞈ ve yoˬ. Yaꞈ hkʼaˇ, ngaˬ hui ve veuꞈ kʼaˇ teˇ pawˆ le le daꞈ kehˬ ve, nyi sha ve, leh keunˍ lawꞈ cawˇ lawꞈ ve gʼa hpehꞈ piˇ ve yoˬ.

16. Ngaˬ hui coˇ caˇ leh nyi sha ve veuꞈ kʼaˇ htaꞈ veuꞈ ve lehˬ, aˬ htoꞈ ma te a yeˇ uiˍ jaˇ ve le?

¹⁶ Mawˇ hawˇ kuiˬ laiˉ hkʼaˬ lo veuꞈ kʼaˇ shu dawˇ cawˇ chehˇ ve ceh tiˉ hawˇ ve yoˬ. Chi htaꞈ pa taw, yaˇ miˇ teˇ hpaˍ nyi sha ve hteh vawˇ lawˇ leh aˉ poꞈ zuhˬ ma leh, hawˉ hkʼaˆ paˍ teˇ hpaˍ maˇ kiˇ ve aˉ poꞈ awˬ hkʼoˆ veuꞈ tuˬ leh haˍ htaw gʼa tuˬ, yawˇ hui awˬ yanˇ yehˇ leh gʼaꞈ ca ve yoˬ. Nyi sha leh keunˍ lawꞈ cawˇ lawꞈ ve veuꞈ kʼaˇ ngaˬ hui coˇ caˇ leh veuꞈ htaˇ, awˬ viˉ awˬ nyi mawˬ leh ha lehˬ jaˇ tuˬ yoˬ. Veuꞈ kʼaˇ chi hkʼe te veuꞈ ve lehˬ mvuhˇ naw ma hkʼoˆ chehˇ ve haꞈ jaˇ ve awˬ pa htaꞈ yawˆ yan te piˇ ve kʼo, ngaˬ hui chi hkʼe te yuˬ tanˇ ve lehˬ awˬ hpfuhˇ hkʼaˆ jaˇ ve yoˬ.

17. Awˬ viˉ awˬ nyi hawˉ hkʼaˆ paˍ paˇ tcuhˆ teh ga htaˇ, aˬ htoꞈ ma htaꞈ dawˇ nawˇ cawˇ ve le?

 ¹⁷ Hawˉ hkʼaˆ paˍ paˇ tcuhˆ teh ve keunˍ˗aˍ laˇ? Moˉseˍ ve awˬ liˇ tawˇ hkawˇ hkʼaw hawˉ hkʼaˆ paˍ paˇ tcuhˆ teh gʼa ve yoˬ. Yaꞈ hkʼaˇ , Hkriꞈ yaˇ teˇ hpaˍ lehˬ Moˉseˍ ve awˬ liˇ tawˇ hkawˇ awˬ hawˉ lo maˇ chehˇ ve yoˬ. (Oˉ kʼoˍ pui ve 19:27; 21:5; Gaˍlaˍtiˆ 3:24, 25) Teˇ hpaˍ hpaˍ ve chaw liˇ vaˇ liˇ kʼo, paˇ tcuhˆ teh gʼa ve leh daꞈ ve awˬ lawn sha tanˇ, awˬ nu ve chaw maˇ na gaˇ tuˬ maˇ te piˇ ve yoˬ. Awˬ tehˬ kʼo, leuˆ yuˬ taˍ ve chaw teˇ hpaˍ paˇ tcuhˆ kaꞈ teh ve yoˬ. Yaꞈ hkʼaˇ, awˬ nu ve awˬ viˉ awˬ nyi paˇ tcuhˆ maˇ teh gaˇ ve yoˬ. (1 Kawˇrenˍhtuˆ 8:9, 13; 10:32) Awˬ nu ve chaw liˇ vaˇ liˇ leh mvuhˇ miˬ teˇ hpaˍ hkʼaw, yawˇ hui paˇ tcuhˆ maˇ teh leh Hkriꞈ yaˇ hpehꞈ ve pa taw, maˇ keunˍ ve yoˬ. Awˬ tehˬ kʼo, awˬ viˉ awˬ nyi oˇ ve teˇ gʼaˇ paˇ tcuhˆ teh ve Gʼuiˬ sha htaꞈ yawˆ yan piˇ maˇ gʼa ve yoˬ. Awˬ teh kʼo, awˬ viˉ awˬ nyi paˇ tcuhˆ teh htaˇ, yawˇ “venˇ baˆ taˍ kuiˬ maˇ cawˬ ve chaw” maˇ hpehꞈ ve pa taw, Gʼuiˬ sha htaꞈ yawˆ yan piˇ tuˬ te maˇ gʼa ve yoˬ hehˉ.—1 Tiˆmoˉseˍ 3:2, 7; Roˉmaꞈ 15:1-3.

18, 19. Miˆhkaˍ 6:8 hkʼaw ngaˬ hui htaꞈ hkʼaˬ hkʼe ga laˇ gʼa ve le?

¹⁸ Veuꞈ kʼaˇ chi hkʼe veuꞈ hpehꞈ ve, oˇ hkʼe veuꞈ maˇ hpehꞈ ve, Yaˬhoˉvaˬ liꞈ hkʼa dehꞈ maˇ bvuhꞈ laˇ taˍ ve pa taw, ngaˬ hui ha lehˬ jaˇ ve yoˬ. Oˇ hkʼe hpehꞈ ve htawˇ, Liꞈ hpu hkʼaw lo awˬ liˇ awˬ hkʼaˇ htaꞈ yehˇ leh ngaˬ hui hkʼaˇ ngaˬ hui dawˇ cheˆ tuˬ, Gʼuiˬ sha te tcuh laˇ ve yoˬ. Chi htaꞈ pa taw, veuꞈ kʼaˇ awˬ lawn dawˇ cheˆ htaˇ kaꞈ, ngaˬ hui nyi ma gʼa nuˇ nehˬ ve yoˬ.—Miˆhkaˍ 6:8.

¹⁹ Yaˬhoˉvaˬ daꞈ kehˬ jaˇ leh yawˇ teh taˍ ve awˬ liˇ awˬ hkʼaˇ daꞈ jaˇ ve, ngaˬ hui nyi ma nuˇ nehˬ leh haꞈ yuˬ ve yoˬ. Ngaˬ hui nyi ma nuˇ nehˬ gaˇ ve kʼo, yawˇ teh taˍ ve awˬ liˇ awˬ hkʼaˇ htaꞈ gʼaꞈ te tuˬ yoˬ. Nyi ma nuˇ nehˬ ve lehˬ shu ve dawˇ hkʼaˇ htaꞈ yawˆ yan piˇ tuˬ, ngaˬ hui htaꞈ kaꞈ ga laˇ ve yoˬ.

20. Ngaˬ hui veuꞈ kʼaˇ veuꞈ ve awˬ hkʼaˇ, awˬ nu ve chaw leh Gʼuiˬ sha htaꞈ hkʼaˬ hkʼe heuˆ kuiˬ cawˬ tuˬ le?

²⁰ Ngaˬ hui ve veuꞈ kʼaˇ Yaˬhoˉvaˬ ve kanˉ te ve chaw tehꞈ hkʼa tawˍ lehˆ gʼa hpeuꞈ mawˬ piˇ ve yoˬ. Yaˬhoˉvaˬ teh taˍ ve awˬ liˇ awˬ hkʼaˇ uiˍ jaˇ mvuh jaˇ leh ngaˬ hui gʼaꞈ te ve ha lehˬ jaˇ ve yoˬ. Awˬ viˉ awˬ nyi maˇ˗o ve veuꞈ kʼaˇ veuꞈ ve awˬ hkʼaˇ daꞈ ve pa taw, chiˇ mvuh hkawˇ gʼa keunˍ ve yoˬ. Liꞈ hpu hkʼaw a shaꞈ ponˬ piˇ ve awˬ lawn na gaˇ ve chaw hui htaꞈ yawˇ hui ga piˇ leh, Yaˬhoˉvaˬ htaꞈ yawˆ yan te piˇ ve yawˇ ha lehˬ ve yoˬ. Ngaˬ hui cuˇ yiˍ cawˬ ve hkʼaw veuꞈ kʼaˇ leuˆ htaˇ, “awˬ meꞈ awˬ hponˇ leh kanˇ paˆ hkʼa biˇ cawˬ ve” Gʼuiˬ sha htaꞈ hkʼaˬ htaˆ kaꞈ yawˇ yan piˇ tuˬ yoˬ.—Chiˇ mvuh ve 104:1, 2.