1-2. (a) Tawˇ naˉ ve liꞈ 16:31 hkʼaw kʼoˆ taˍ ve hkʼe, awˬ viˉ awˬ nyi chaw mawˇ Gʼuiˬ sha ve kanˉ ka tiꞈ yeˬ ve hkʼaw te ve htaꞈ ngaˬ hui hkʼaˬ hkʼe dawˇ nyi cawˇ ve le? (b) Awˬ lawn chi ve hkʼaw aˬ htoꞈ ma htaꞈ henˇ tuˬ le?

 Shehnˉ shiˍ maˇ htuˍ baˬ sheˍ htaˇ, awˬ gʼeuˆ maˇ mawˬ. Mawˬ ve chaw lehˬ chi haˉ pui shiˍ ceh hpehꞈ ve tehꞈ dawˇ leh juˇ hpanˍ kʼai ve yoˬ. Awˬ tehˬ kʼo, chi shehnˉ shiˍ hpehꞈ leh awˬ hpfuhˇ hkʼaˆ jaˇ ve tehꞈ mawˬ ve chaw maˇ shiˍ.

² Awˬ viˉ awˬ nyi chaw mawˇ Gʼuiˬ sha ve kanˉ ka tiꞈ yeˬ ve hkʼaw te ve chaw kaꞈ, shehnˉ shiˍ awˬ hpfuhˇ hkʼaˆ jaˇ ve hkʼe hpehꞈ ve yoˬ. Yawˇ hui uˉ hkeh mvuh hpu ve lehˬ, shi uˉ tcuhˍ hkʼe hpehꞈ ve tehꞈ Liꞈ hpu hkʼaw tehˆ taˍ ve yoˬ. (Tawˇ naˉ ve 16:31 gʼaw sheˍ; 20:29) Yaꞈ hkʼaˇ, chi awˬ gʼuˇ suhˍ htaˇ kʼoˆ kʼai peuˬ ve hkʼe shehnˉ shiˍ hkʼa shuˍ awˬ hpfuhˇ maˇ cawˬ tehꞈ ngaˬ hui kaꞈ dawˇ la gʼa ve yoˬ. Yaꞈ hkʼaˇ, yaˇ nehˬ awˬ viˉ awˬ nyi chaw mawˇ chi teˇ hpaˍ htaꞈ awˬ hpfuhˇ shiˍ ve kʼo, shehnˉ shiˍ aꞈ kehˉ awˬ hpfuhˇ hkʼaˆ jaˇ ve awˬ ceuˬ yawˇ hui gʼa tuˬ yoˬ. Awˬ lawn chi ve hkʼaw na hkawˇ 3 maˬ htaꞈ teˇ geh henˇ tuˬ yoˬ. Awˬ viˉ awˬ nyi chaw mawˇ Gʼuiˬ sha ve kanˉ ka tiꞈ yeˬ ve hkʼaw te ve htaꞈ aˬ htoꞈ ma te yawˇ awˬ hpfuhˇ shiˍ ve le? Awˬ viˉ awˬ nyi chaw mawˇ Gʼuiˬ sha ve kanˉ hkʼaˇ hkʼaw a yeˇ uiˍ jaˇ ve tehꞈ hkʼaˬ hkʼe te shawˍ ve le? Yawˇ hui htaꞈ ngaˬ hui hkʼaˬ hkʼe te henˇ yuˬ gʼa ve le?

3. Chiˇ mvuh ve liꞈ 92:12-15 hkʼaw kʼoˆ taˍ ve hkʼe, awˬ viˉ awˬ nyi chaw mawˇ Gʼuiˬ sha ve kanˉ ka tiꞈ yeˬ ve hkʼaw te ve aˬ htoꞈ ma te yawˇ awˬ pon awˬ hpfuhˇ hkʼaˆ jaˇ ve le?

³ Awˬ viˉ awˬ nyi chaw mawˇ Gʼuiˬ sha ve kanˉ ka tiꞈ yeˬ ve hkʼaw te ve yawˇ awˬ pon awˬ hpfuhˇ hkʼaˆ jaˇ. Gʼuiˬ sha yawˇ hui htaꞈ awˬ htaꞈ hpawˇ ceh nyi ve maˇ heˆ. Awˬ hkʼaw hpawˇ kaꞈ nyi leh awˬ tehˬ kʼo,  yawˇ hui hkʼaˬ hkʼe ve chaw hpehꞈ ve htaꞈ shiˍ ve yoˬ. Leh yawˇ hui ve te hkʼaˇ dawˇ hkʼaˇ daꞈ ve laiˉ ceuˬ htaꞈ kaꞈ Gʼuiˬ sha gʼa mawˬ ve yoˬ. Chaw mawˇ ve cuˇ yiˍ, na gʼa ve, leh a shaꞈ teꞈ kuiˬ hkʼaw hpehꞈ laˬ jaw ve awˬ ceuˬ yaˇ nehˬ htaꞈ gʼa maˍ piˇ ve Yaˬhoˉvaˬ gʼa mawˬ htaˇ ha lehˬ jaˇ. (Yawˇbaˆ 12:12; Tawˇ naˉ ve 1:1-4) Yawˇ hui yeunˇ hkanˍ ve htaꞈ Yaˬhoˉvaˬ awˬ hpfuhˇ shiˍ ve yoˬ. (Maˍlaˍhkiˆ 3:16) Yawˇ hui shoꞈ shaꞈ ve laiˉ ceuˬ gʼa hpuˇ ve htawˇ, yawˇ hui ve yonˍ hkʼaˇ maˇ i kai jaw. Yawˇ hui awˬ tehˬ ve htaꞈ tanˬ henˇ htaˇ aꞈ kehˉ, awˬ gʼuˇ suhˍ hpawˇ ve dawˇ law kuiˬ htaꞈ caˉ daꞈ ve hkʼa tawˍ lehˆ gʼa mawˬ ve yoˬ. Yawˇ hui “mawˇ jaˇ peuˬ” ve htawˇ, Gʼuiˬ sha ve awˬ meh htaꞈ caˉ leh hto toˇ ve pa taw, Yaˬhoˉvaˬ yawˇ hui htaꞈ haꞈ jaˇ.—Chiˇ mvuh ve liꞈ 92:12-15 gʼaw sheˍ.

4. Awˬ viˉ awˬ nyi chaw mawˇ awˬ gʼaˇ gʼa tuˬ aˬ htoꞈ ma te piˇ ve le?

⁴ Chi teˇ kuiˬ nawˬ a shaꞈ maˇ˗oˬ ve kʼo, ponˬ laˬ htaˇ nawˬ Yaˬhoˉvaˬ ve kanˉ te ve awˬ ceuˬ htaꞈ yawˇ maˇ leunˇ laˇ tehꞈ hkʼa dehꞈ yonˍ gʼa ve yoˬ. (Heˍbrehˇ 6:10) Nawˬ kaiˬ ve hkʼaw hto toˇ ve htaꞈ Gʼuiˬ sha gʼa mawˬ htaˇ ha lehˬ jaˇ. Nawˬ shoꞈ shaꞈ ve laiˉ ceuˬ leh nyi ma luˬ ve htaꞈ kaꞈ yeunˇ hkanˍ ve yoˬ. Nawˬ Liꞈ hpu hkʼaw ve awˬ liˇ awˬ hkʼaˇ htaꞈ coˇ caˇ leh gʼaꞈ te ve yoˬ. Nawˬ Gʼuiˬ sha ve kanˉ hkʼaˇ hkʼaw ve awˬ vuiˬ laiˉ ceuˬ htaꞈ te leh awˬ nu ve chaw htaꞈ kaꞈ maˍ piˇ ve yoˬ. Gʼuiˬ sha ve kanˉ hkʼaˇ hkʼaw pa ve aˬ htoꞈ ma cawˬ ve htawˇ maˇ kʼoˆ, nawˬ gʼaꞈ te ve yoˬ. Chi hkʼoˆ kaꞈ, awˬ viˉ awˬ nyi Gʼuiˬ sha ve kanˉ awˬ yanˇ hkʼa biˇ te ve chaw htaꞈ nawˬ awˬ gʼaˇ piˇ leh ga piˇ ve yoˬ. Nawˬ Yaˬhoˉvaˬ htaꞈ ka tiꞈ yeˬ ve pa taw, yawˇ nawˬ htaꞈ haꞈ jaˇ. Leh “yawˇ htaꞈ ka tiꞈ yeˬ ve chaw teˇ hpaˍ htaꞈ yawˇ maˇ chiˇ baˬ” tehꞈ ka tiꞈ te taˍ laˇ ve yoˬ. (Chiˇ mvuh ve 37:28) “Nawˬ hui mawˇ la htaˇ hkʼa gaˬ, ngaˬ nawˬ hui htaꞈ haꞈ shaˉ laˇ tuˬ yoˬ” tehꞈ Gʼuiˬ sha htawˆ hkanˍ laˇ taˍ sheˍ ve yoˬ. (Iˉsaˍyaˆ 46:4) Hkʼe te leh, nawˬ a shaꞈ maˇ˗oˬ leh Gʼuiˬ sha ve kanˉ hkʼaˇ hkʼaw awˬ bon maˇ cawˬ tehꞈ taˇ dawˇ. Awˬ lawn kʼo, nawˬ a yeˇ uiˍ ve chaw hpehꞈ leh Gʼuiˬ sha ve kanˉ hkʼaˇ hkʼaw awˬ hpfuhˇ hkʼaˆ jaˇ!

5. Awˬ viˉ awˬ nyi chaw mawˇ aˬ htoꞈ ma htaꞈ maˇ leunˇ cawˇ ve le?

⁵ Awˬ viˉ awˬ nyi chaw mawˇ Gʼuiˬ sha ve kanˉ hkʼaˇ hkʼaw laiˉ ceuˬ te gʼa sheˍ ve yoˬ. Oˇ htaˇ hkʼe leˇ yawˇ hui awˬ gʼaˇ awˬ shaˉ hkʼa dehꞈ maˇ daꞈ˗oˬ ve htawˇ, yawˇ hui hpehꞈ laˬ jaw ve awˬ lawn kaꞈ cawˬ maˇ ve yoˬ. Yaˬhoˉvaˬ chaw mawˇ htaꞈ yawˇ ve kanˉ hkʼaˇ hkʼaw laiˉ ceuˬ te tcuh ve tehꞈ oˇ htaˇ teˇ co˗e leh chi beuꞈ teˇ co˗e kaꞈ hkʼa tawˍ lehˆ gʼa mawˬ ve yoˬ.

6-7. Liꞈ hpu hkʼaw ve chaw mawˇ ka tiꞈ yeˬ ve hkʼaw Yaˬhoˉvaˬ ve kanˉ te ve yawˇ yawˇ hui htaꞈ awˬ bon hkʼaˬ hkʼe naꞈ piˇ ve kʼoˆ maˍ laˇ sheˍ.

 ⁶ Yaˬhoˉvaˬ ve kanˉ ka tiꞈ yeˬ ve hkʼaw te ve chaw laiˉ gʼaˇ leh yawˇ hui a shaꞈ maˇ˗oˬ ve htawˇ, nyi ma pfuhˇ jaˇ ve hkʼaw te ve awˬ lawn Liꞈ hpu hkʼaw cawˬ ve yoˬ. Moˉseˍ Yaˬhoˉvaˬ ve tcuh kaˍ paˍ te leh Iˉsaˍreˍlaˆ chaw hui htaꞈ shehˍ kʼai sheh hpaˇ tanˬ te htaˇ, Moˉseˍ a shaꞈ aˬ laˬ hkʼe 80 hkʼawꞈ hpaˆ gaˬ˗oˬ. Daˍyeˍlaˆ 90 hkʼawꞈ hpaˆ gaˬ˗oˬ ve htawˇ, Yaˬhoˉvaˬ yawˇ ve tcuh kaˍ paˍ te tcuh sheˍ ve yoˬ. Chi hkʼoˆ kaꞈ, tcuh yaˇ Yoˇhanˬ Gʼuiˬ sha ve awˬ ha hpu dawˇ pawnˍ piˇ leh Hpeuꞈ maˍ ve liꞈ bvuhꞈ htaˇ, a shaꞈ 90 hkʼawꞈ hpaˆ˗oˬ.

⁷ Yaˬhoˉvaˬ ve kanˉ ka tiꞈ yeˬ ve hkʼaw te ve laiˉ gʼaˇ shu hkʼa dehꞈ maˇ shiˍ leh a yeˇ maˇ yuˬ piˇ ve yoˬ. Yaꞈ hkʼaˇ, Yaˬhoˉvaˬ yawˇ hui htaꞈ a yeˇ yuˬ leh laꞈ shawnˍ piˇ ve yoˬ. Tawˇ pa haˉ te kʼo, Suˉmonˍ lehˬ “hteˇ ve cawˇ ve chaw hpehꞈ leh, Gʼuiˬ sha htaꞈ yawˆ yan ve chaw teˇ gʼaˇ hpehꞈ ve yoˬ.” Liꞈ hpu hkʼaw yawˇ htaꞈ a ciˉ ceh tiˉ kʼoˆ taˍ ve yoˬ. Yaꞈ hkʼaˇ, Yaˬhoˉvaˬ yawˇ htaꞈ hkʼa dehꞈ shiˍ leh daꞈ jaˇ ve awˬ vuiˬ piˇ ve lehˬ, Yeˍsuˆ yaˇ ehˉ htaˇ ve htaꞈ Suˉmonˍ mawˬ tcuh ve yoˬ. Yeˍsuˆ leh Maˍriˆ htaꞈ caˉ daꞈ ve tcuh kaˍ paˍ ve tawˇ hkawˇ kaꞈ yawˇ htaꞈ kʼoˆ tcuh ve yoˬ. (Luˉkaꞈ 2:22, 25-35) Tcuh kaˍ ma Aˍnaˆ htaꞈ dawˇ nyi sheˍ. Yawˇ 84 hkʼawꞈ gaˬ˗oˬ ve htawˇ, “bon yehˬ lonˉ awˬ hkʼaw lo ceh tiˉ chehˇ taˍ” ve yoˬ. Yawˇ hkʼaˬ htaˆ kaꞈ bon yehˬ lonˉ hkʼaw kʼai ve pa taw, Yaˬhoˉvaˬ yawˇ htaꞈ laꞈ shawnˍ piˇ ve lehˬ Yeˍsuˆ yaˇ ehˉ htaˇ ve htaꞈ yawˇ gʼa mawˬ ve yoˬ. Suˉmonˍ leh Aˍnaˆ Yaˬhoˉvaˬ awˬ pon awˬ hpfuhˇ hkʼaˆ jaˇ.—Luˉkaꞈ 2:36-38.

8-9. Awˬ viˉ awˬ nyi mehˇ chawˇ ma caˉ leh aˬ htoꞈ ma te gʼa sheˍ ve le?

⁸ Awˬ viˉ awˬ nyi Lon˗iˆ Di˗tunˇ ve awˬ lawn htaꞈ teˇ geh nyi sheˍ. Kaˬneˬdaˬ mvuhˇ miˬ lo yawˇ tcuh peu ve gʼuˇ suhˍ peuˍ ve tanˬ te htaˇ, 21 hkʼawꞈ ceh tiˉ sheˍ. Peuˬ hkʼawꞈ nawˉ, yawˇ leh awˬ hpawˇ Yoˇhanˬ toˇ nyi shehˍ hpaˇ laiˉ hkʼawꞈ teˇ geh te ve yoˬ. Yawˇ huiˉ maˬ Beˍteˍlaˆ hkʼaw kanˉ te leh oˇ kaˬ lo 20 hkʼawꞈ hpaˆ chehˇ ve yoˬ. Lon˗iˆ 58 hkʼawꞈ gaˬ˗oˬ htaˇ, yawˇ leh Yoˇhanˬ Yuˬkaˬrenˇ mvuhˇ miˬ lo awˬ vuiˬ awˬ suhˉ gʼa te ve yoˬ. Yawˇ hui hkʼaˬ hkʼe te ve le? Yawˇ hui shu mvuhˇ miˬ lo Gʼuiˬ sha ve kanˉ ca kʼawꞈ te tuˬ mawˇ jaˇ˗oˬ tehꞈ dawˇ˗aw laˇ? Maˇ dawˇ. Yawˇ hui oˇ kaˬ lo ha lehˬ ha kʼa kʼai ve yoˬ. Yoˇhanˬ kaꞈ Awˬ tcuhˆ puiˍ Kawˍmiˍtiˍ hkʼaw kanˉ gʼa te ve yoˬ. 7 hkʼawꞈ gaˬ leh Yoˇhanˬ suh˗e ve yoˬ. Hkʼe te leh, Lon˗iˆ oˇ kaˬ lo caˉ leh Gʼuiˬ sha ve kanˉ kʼawꞈ te tuˬ dawˇ cheˆ ve yoˬ. Chi teˇ hkui yawˇ 81 hkʼawꞈ gaˬ˗oˬ leh Yuˬkaˬrenˇ mvuhˇ miˬ Beˍteˍlaˆ hkʼaw Yaˬhoˉvaˬ ve kanˉ ka tiꞈ yeˬ ve hkʼaw te chehˇ sheˍ leh oˇ kaˬ lo ve teˇ gʼaˇ le le yawˇ htaꞈ haꞈ jaˇ.

⁹ Awˬ viˉ awˬ nyi yaˇ miˇ awˬ hpawˇ Gʼuiˬ sha ve kanˉ hkʼaˇ hkʼaw awˬ vuiˬ cawˬ maˇ ve chaw kaꞈ Lon˗iˆ hkʼa shuˍ shu a yeˇ maˇ yuˬ piˇ leh, awˬ hpawˇ a shaꞈ teꞈ chehˇ htaˇ hkʼe taw yawˇ htaꞈ shu a yeˇ maˇ yuˬ piˇ. Awˬ tehˬ kʼo, awˬ viˉ awˬ nyi chi teˇ hpaˍ awˬ hpfuhˇ hkʼaˆ jaˇ. Awˬ viˉ awˬ nyi yaˇ miˇ awˬ hpawˇ htaꞈ laiˉ hkʼawꞈ awˬ gʼaˇ piˇ ve leh chi teˇ hkui kaꞈ Yaˬhoˉvaˬ ve kanˉ ka tiꞈ yeˬ ve hkʼaw te chehˇ sheˍ ve htaꞈ yawˇ awˬ hpfuhˇ shiˍ jaˇ. (1 Tiˆmoˉseˍ 5:3) Chi hkʼoˆ kaꞈ, yawˇ hui yaˇ nehˬ htaꞈ kaꞈ awˬ gʼaˇ piˇ sheˍ ve yoˬ.

10. Awˬ viˉ awˬ nyi Htoˇniˬ ve daꞈ ve awˬ lawn hkʼaˬ hkʼe maˍ laˇ ve le?

¹⁰ Awˬ viˉ awˬ nyi laiˉ gʼaˇ chaw mawˇ nyi haꞈ shaˉ kuiˬ yehˬ hkʼaw gʼa chehˇ ve htawˇ, yawˇ hui awˬ  hpfuhˇ hkʼaˆ jaˇ. Tawˇ pa haˉ te kʼo, awˬ viˉ awˬ nyi Htoˇniˬ meh ve teˇ gʼaˇ 1942 hkʼawꞈ Ha pa 8 maˬ htaˇ Aˍmeˬriˆkaꞈ mvuhˇ miˬ Hpenˬsinˬveˬni˗aˬ venˇ lo yawˇ Baˆtiˆsaˍ haꞈ yuˬ ve yoˬ. Oˇ ve teˇ yanˇ 20 hkʼawꞈ ceh tiˉ sheˍ. Peuˬ leh maˇ maw yawˇ choˬ paˉ oˇ paˉ maˇ chehˇ ve pa taw, htawnˍ hkʼaw lo 2 hkʼawꞈ hpaˆ gʼa chehˇ ve yoˬ. Yawˇ leh yawˇ ve awˬ miˇ ma Hin˗daˍ yaˇ 2 gʼaˇ htaꞈ hu leh Yaˬhoˉvaˬ ve kanˉ te tuˬ maˍ piˇ ve yoˬ. Laiˉ hkʼawꞈ ve awˬ yanˇ awˬ viˉ awˬ nyi Htoˇniˬ awˬ vuiˬ laiˉ ceuˬ te ve yoˬ. Hkriꞈ yaˇ awˬ moˍ 3 kaˬ hkʼaw yawˇ nyi haꞈ shaˉ paˍ awˬ moˍ hkʼaw yawˇ mui hkʼawˇ mui paˍ (chi teˇ hkui nyi haꞈ shaˉ paˍ awˬ moˍ hkʼaw caˉ daꞈ paˍ) leh hpawnˬ daꞈ lonˉ hkʼaw kaꞈ nyi haꞈ shaˉ paˍ te jaw ve yoˬ. Leh yawˇ htawnˍ hkʼaw lo hpawnˬ daꞈ ve kaꞈ sheh kʼai jaw leh laiˉ gʼaˇ htaꞈ kaꞈ Liꞈ hpu maˍ piˇ jaw ve yoˬ. Chi teˇ hkui Htoˇniˬ 98 hkʼawꞈ gaˬ˗oˬ. Yawˇ chaw mawˇ nyi haꞈ shaˉ kuiˬ yehˬ hkʼaw gʼa chehˇ ve htawˇ, yawˇ Yaˬhoˉvaˬ ve kanˉ te chehˇ sheˍ. Yawˇ Hkriꞈ yaˇ awˬ moˍ hkʼaw awˬ viˉ awˬ nyi geh Gʼuiˬ sha ve kanˉ te gʼa ve hkʼe te chehˇ sheˍ.

11. Awˬ viˉ awˬ nyi chaw mawˇ choˬ kʼai oˇ kʼai te maˇ gaˬ ve maˇ heˆ leh, chaw mawˇ nyi haꞈ shaˉ kuiˬ yehˬ hkʼaw chehˇ ve chaw htaꞈ, ngaˬ hui awˬ hpfuhˇ shiˍ ve tehꞈ hkʼaˬ hkʼe te hpeuꞈ maw piˇ gʼa tuˬ le?

¹¹ Awˬ viˉ awˬ nyi chaw mawˇ choˬ kʼai oˇ kʼai te maˇ gaˬ leh chaw mawˇ nyi haꞈ shaˉ kuiˬ yehˬ hkʼaw chehˇ ve chaw htaꞈ, ngaˬ hui awˬ hpfuhˇ shiˍ ve tehꞈ hkʼaˬ hkʼe te hpeuꞈ maw piˇ gʼa tuˬ le? Yawˇ hui te gʼa ve hkʼe hpawnˬ daꞈ la tuˬ, hto toˇ gʼa tuˬ, nyi haꞈ shaˉ paˍ coˇ caˇ leh ga piˇ ve yoˬ. Ngaˬ hui yawˇ hui geh ca gʼuiˇ˗e ve, awˬ hkʼeun hkʼaw tawˇ yaw daꞈ ve, leh VDO hkʼaw yaw daꞈ gʼa ve yoˬ. Ngaˬ hui ve Hkriꞈ yaˇ awˬ moˍ hkʼaw awˬ viˉ awˬ nyi chaw mawˇ chehˇ vuiˇ ve kʼo, yawˇ hui htaꞈ a yeˇ maˇ yuˬ laˇ ve tehꞈ maˇ dawˇ tuˬ, a yeˇ hkʼa dehꞈ gʼa yuˬ piˇ ve yoˬ. Chi hkʼoˆ kaꞈ, awˬ viˉ awˬ nyi chaw mawˇ teˇ hpaˍ nyi ma maˇ haˆ leh yawˇ ve awˬ lawn kʼoˆ ve maˇ keunˍ tehꞈ dawˇ ve yoˬ. Ngaˬ hui yawˇ htaꞈ awˬ gʼaˇ piˇ leh tawˇ yaw daꞈ gʼa ve yoˬ. Leh ponˬ laˬ htaˇ Yaˬhoˉvaˬ ve kanˉ hkʼaˇ hkʼaw chehˇ ve hkʼaˬ hkʼe taw ha lehˬ ve kʼoˆ maˍ laˇ tuˬ lawˬ piˇ sheˍ. Yawˇ hui ve awˬ lawn ngaˬ hui awˬ bon gʼa jaˇ tuˬ yoˬ.

12. Ngaˬ hui awˬ viˉ awˬ nyi chaw mawˇ geh awˬ chawˇ te ve kʼo, yawˇ hui htaꞈ caˉ daꞈ ve awˬ lawn ngaˬ hui hkʼaˬ hkʼe gʼa shiˍ tuˬ le?

¹² Awˬ viˉ awˬ nyi chaw mawˇ htaꞈ ngaˬ hui awˬ chawˇ te ve kʼo, Hkriꞈ yaˇ awˬ moˍ hkʼaw hpehꞈ laˬ jaw ve laiˉ gʼaˇ ve daꞈ ve awˬ lawn ngaˬ hui maˇ shiˍ jaw ve gʼa shiˍ tuˬ yoˬ. Aˍmeˬriˆkaꞈ mvuhˇ miˬ Jui˗she Siˆ˗tin venˇ Hkriꞈ yaˇ awˬ moˍ hkʼaw awˬ viˉ awˬ nyi yaˇ miˇ Heh˗ri Yaˬhoˉvaˬ ve kanˉ ka tiꞈ yeˬ ve hkʼaw laiˉ chi hkʼawꞈ te ve yoˬ. Peuˬ hkʼawꞈ nawˉ yawˇ ve yaˇ miˇ geh ca chehˇ˗e leh oˇ kaˬ lo ve Hkriꞈ yaˇ awˬ moˍ hkʼaw ve chaw yawˇ geh tawˇ yaw daꞈ htaˇ, yawˇ yonˍ hkʼaˇ hpawˇ daꞈ ve henˇ yuˬ tuˬ hpehꞈ ve tehꞈ shiˍ la ve yoˬ. Leh yawˇ ve awˬ lawn yawˇ hui htaꞈ awˬ gʼaˇ peꞈ piˇ jaˇ. Yawˇ awˬ tehˬ ve htaꞈ gʼa henˇ leh 1925 hkʼawꞈ htaˇ, Gʼuiˬ sha ve kanˉ tanˬ te ve tehꞈ awˬ viˉ awˬ nyi htaꞈ kʼoˆ maˍ piˇ ve yoˬ. Yawˇ hto toˇ˗e ve teˇ nyi le le htawnˍ hkʼaw lo gʼa chehˇ la puiˉ˗aˆ dawˇ leh ciˬ tsuhˇ taˬ kaꞈ yuˬ kai ve yoˬ. 1933 hkʼawꞈ htaˇ, yawˇ htawnˍ hkʼaw lo 2 pawˆ gʼa loꞈ˗e leh teˇ pawˆ le le 1 shinˉ gʼa chehˇ ve yoˬ. Yawˇ htawnˍ hkʼaw lo chehˇ ve awˬ yanˇ htaˇ, awˬ hpawˇ Shaˉhkiˆhkanˍ ve chaw maˇ hpehꞈ ve yaˇ 3 gʼaˇ htaꞈ gʼa nyi haꞈ shaˉ ve yoˬ. Heh˗ri ve hpehꞈ laˬ jaw ve awˬ lawn ngaˬ hui gʼa mawˬ ve hkʼe, chaw mawˇ Gʼuiˬ sha ve kanˉ ka tiꞈ yeˬ ve hkʼaw te ve chaw chi teˇ hpaˍ htaꞈ ngaˬ hui yawˆ yan leh awˬ hpfuhˇ shiˍ cawˇ ve yoˬ.

13. Gʼuiˬ sha ve kanˉ hkʼaˇ hkʼaw chehˇ ve awˬ viˉ awˬ nyi chaw mawˇ htaꞈ caˉ daꞈ ve ngaˬ hui aˬ htoꞈ gʼa henˇ ve le?

¹³ Awˬ viˉ awˬ nyi chaw mawˇ Yaˬhoˉvaˬ awˬ pon leh yawˇ ve kanˉ hkʼaˇ hkʼaw awˬ hpfuhˇ hkʼaˆ jaˇ. Yaˬhoˉvaˬ lehˬ yawˇ hui leh yawˇ ve kanˉ hkʼaˇ htaꞈ hkʼaˬ hkʼe te nyi haꞈ shaˉ piˇ ve yawˇ hui gʼa mawˬ ve yoˬ. Yawˇ hui te yaꞈ ve laiˉ ceuˬ kaꞈ yawˇ hui htaꞈ maˍ piˇ sheˍ ve yoˬ. Awˬ viˉ awˬ nyi chaw mawˇ “cuˇ yiˍ maˍ yiˍ ve awˬ hkuiˉ puiˍ hpehꞈ” leh yawˇ hui hpehꞈ laˬ jaw ve awˬ lawn htaꞈ nawˬ henˇ yuˬ tuˬ dawˇ teh taˍ sheˍ. (Tawˇ naˉ ve 18:4) Nawˬ yawˇ hui htaꞈ awˬ chawˇ te leh hkʼa dehꞈ shiˍ daꞈ ve kʼo, nawˬ ve yonˍ hkʼaˇ kaꞈ uiˍ la mvuh la leh yawˇ hui geh nawˬ laiˉ ceuˬ gʼa henˇ tuˬ yoˬ.

14. Bon maˍ ve liꞈ 32:7 hkʼaw yaˇ nehˬ aˬ htoꞈ ma te tuˬ awˬ gʼaˇ piˇ ve le?

¹⁴ Nawˬ awˬ viˉ awˬ nyi chaw mawˇ geh tawˇ yaw daꞈ sheˍ. (Bon maˍ ve 32:7 gʼaw sheˍ.) Yawˇ hui awˬ gʼaˇ hkʼa dehꞈ maˇ daꞈ˗o ve, mehˆ kaꞈ hkʼa dehꞈ maˇ mawˬ˗o ve, yaꞈ kʼaw juˇ ve kaꞈ naiˇ ve, tawˇ yaw ve kaꞈ awˬ gʼaˇ maˇ cawˬ˗o ve htawˇ, yawˇ hui ve nyi ma yaˇ nehˬ hkʼe hpehꞈ chehˇ sheˍ leh a yeˇ uiˍ jaˇ ve lehˬ Yaˬhoˉvaˬ ve “awˬ meh daꞈ ve” te piˇ chehˇ sheˍ ve yoˬ. (Cuˇ yiˍ piˇ ve 7:1) Yaˬhoˉvaˬ aˬ htoꞈ ma te yawˇ hui htaꞈ awˬ hpfuhˇ shiˍ ve le? Tawnˇ taˍ sheˍ. Nawˬ hkʼaˬ htaˆ kaꞈ yawˇ hui htaꞈ yawˆ yan leh Eˇliˇshehˇ hkʼe te sheˍ. Eˇliˇshehˇ awˬ leh meuˇ htaˇ hkʼa gaˬ Eˇliˇyaꞈ geh gʼa chehˇ leh yawˇ Eˇliˇyaꞈ htaꞈ maˇ baˬ taˉ. “Ngaˬ nawˬ htaꞈ hpaˆ daꞈ maˇ hpehꞈ” tehꞈ 3 pawˆ kʼoˆ piˇ ve yoˬ.—2 Jawˇmawˇ 2:2, 4, 6.

15. Awˬ viˉ awˬ nyi chaw mawˇ htaꞈ ngaˬ hui aˬ htoꞈ ma na piˇ gʼa ve le?

¹⁵ Nawˬ awˬ viˉ awˬ nyi chaw mawˇ ve awˬ lawn na piˇ ve lehˬ, yawˇ hui htaꞈ a yeˇ yuˬ piˇ ve tehꞈ mawˬ tcuh gʼa ve yoˬ. (Tawˇ naˉ ve 1:5; 20:5; 1 Tiˆmoˉseˍ 5:1, 2) Nawˬ yawˇ hui htaꞈ chi hkʼe na nyi piˇ gʼa ve yoˬ. “Aˍ puˍ˗oˬ, nawˬ yaˇ nehˬ htaˇ chi ve awˬ tehˬ hpehꞈ ve tehꞈ yonˍ gʼa tuˬ aˬ htoꞈ ma ga laˇ ve le?” “A pi˗oˬ, nawˬ Yaˬhoˉvaˬ geh meuˆ daꞈ maˇ la tuˬ aˬ htoꞈ ma te laˇ ve le?” “A nehꞈ leh aˉ hpaˇ Yaˬhoˉvaˬ ve kanˉ ka tiꞈ yeˬ ve hkʼaw te ve ha lehˬ tuˬ aˬ htoꞈ ma te laˇ ve le?” (1 Tiˆmoˉseˍ 6:6-8) Awˬ viˉ awˬ nyi chaw mawˇ yawˇ hui ve awˬ lawn kʼoˆ maˍ laˇ htaˇ, nawˬ hkʼa dehꞈ na taˍ sheˍ.

16. Awˬ viˉ awˬ nyi chaw mawˇ leh yaˇ nehˬ tawˇ yaw daꞈ htaˇ yawˇ hui aˬ htoꞈ ma awˬ bon gʼa ve le?

¹⁶ Awˬ viˉ awˬ nyi chaw mawˇ leh yaˇ nehˬ tawˇ yaw daꞈ htaˇ, yawˇ hui awˬ gʼaˇ gʼa ve yoˬ. (Roˉmaꞈ 1:12) Yaˬhoˉvaˬ yawˇ ve kanˉ ka tiꞈ yeˬ ve hkʼaw te ve chaw htaꞈ haꞈ shaˉ piˇ ve tehꞈ nawˬ yonˍ gʼa ve yoˬ. Awˬ viˉ awˬ nyi chaw mawˇ kaꞈ awˬ hpfuhˇ shiˍ ve tehꞈ dawˇ leh Yaˬhoˉvaˬ yawˇ htaꞈ awˬ bon hkʼaˬ hkʼe naꞈ laˇ ve nawˬ htaꞈ kʼoˆ maˍ laˇ ve yawˇ ha lehˬ jaˇ ve yoˬ.

17. Awˬ viˉ awˬ nyi chaw mawˇ ka tiꞈ yeˬ ve, teˇ nyi aꞈ kehˉ teˇ nyi awˬ hpfuhˇ cawˬ ve tehꞈ hkʼaˬ hkʼe te kʼoˆ gʼa ve le?

¹⁷ Daꞈ ve lehˬ awˬ tcuhˉ awˬ yanˇ htaˇ ceh daꞈ ve yoˬ. Yaꞈ hkʼaˇ, Yaˬhoˉvaˬ htaꞈ ka tiꞈ yeˬ ve chaw yawˇ mehˆ gʼuˇ suhˍ teˇ nyi aꞈ kehˉ teˇ nyi awˬ hpfuhˇ cawˬ ve yoˬ. (1 Hteˇsaˍlawˇniˆ 1:2, 3) Hkʼaˬ hkʼe te hpehꞈ gʼa ve le? Awˬ lawn kʼo, ponˬ laˬ ve awˬ yanˇ laiˉ hkʼawꞈ yawˇ hui daꞈ kehˬ ve awˬ ha hpu maˍ laˇ ve htaꞈ gʼa leh te hkʼaˇ dawˇ hkʼaˇ daꞈ ve laiˉ ceuˬ cawˬ tuˬ ga laˇ tcuh ve yoˬ. Awˬ viˉ awˬ nyi chaw mawˇ htaꞈ ngaˬ hui hkʼa dehꞈ shiˍ daꞈ ve, yawˇ hui htaꞈ yawˆ yan leh yawˇ hui ve awˬ lawn htaꞈ henˇ yuˬ ve kʼo, yawˇ hui htaꞈ awˬ hpfuhˇ shiˍ jaˇ tuˬ yoˬ.

18. Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

¹⁸ Hkriꞈ yaˇ awˬ moˍ hkʼaw uiˍ la mvuh la ve lehˬ, awˬ viˉ awˬ nyi yaˇ nehˬ chaw mawˇ htaꞈ awˬ hpfuhˇ shiˍ ve pa taw maˇ heˆ. Awˬ lawn kʼo, awˬ viˉ awˬ nyi chaw mawˇ yaˇ nehˬ htaꞈ kaꞈ awˬ hpfuhˇ shiˍ ve yoˬ. Gʼuˇ suhˍ teˇ lawn hkʼaw awˬ viˉ awˬ nyi chaw mawˇ Hkriꞈ yaˇ awˬ moˍ hkʼaw ve awˬ viˉ awˬ nyi yaˇ nehˬ htaꞈ awˬ hpfuhˇ shiˍ ve hkʼaˬ hkʼe hpeuꞈ maw piˇ ve teˇ geh henˇ tuˬ yoˬ.