1. Yaˬhoˉvaˬ htaꞈ ngaˬ hui hkʼaˬ hkʼe kuˬ gʼa ve le?

 Yaˬhoˉvaˬ ve yehˬ kʼa hkʼaw Yeˍsuˆ lehˬ “hpanˍ taˍ ve hkʼa peu˗eˬ awˬ hkʼaw lo yaˇ kaoˬ hpehꞈ” leh mvuhˇ naw ma tcuh yaˇ kaꞈ laiˉ lanˬ gʼaˇ cawˬ ve yoˬ. (Kawˇlawˇsehˇ 1:15; Chiˇ mvuh ve 103:20) Yeˍsuˆ miˬ guiˬ hkʼoˆ lo laˬ htaˇ, Yaˬhoˉvaˬ htaꞈ Awˬ pa tehꞈ ngaˬ hui kuˬ gʼa ve maˍ laˇ ve yoˬ. Tawˇ pa haˉ te kʼo, yawˇ awˬ laꞈ gʼawˇ htaꞈ tawˇ yaw daꞈ htaˇ, Yaˬhoˉvaˬ lehˬ “ngaˬ ve Awˬ pa leh nawˬ hui ve Awˬ pa” hpehꞈ ve yoˬ. (Yoˇhanˬ 20:17) Ngaˬ hui awˬ to chiˇ aꞈ leh Baˆtiˆsaˬ haꞈ yuˬ htaˇ, awˬ viˉ awˬ nyi Hkriꞈ yaˇ awˬ moˍ hkʼaw ngaˬ hui kaꞈ teˇ gʼaˇ gʼa chehˇ la ve yoˬ.—Maˍkuˆ 10:29, 30.

2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Chaw teˇ hpaˍ Yaˬhoˉvaˬ yawˇ htaꞈ haꞈ ve Awˬ pa hpehꞈ ve tehꞈ dawˇ tuˬ haˍ jaˇ. Chaw teˇ hpaˍ kʼo awˬ viˉ awˬ nyi htaꞈ haꞈ ve hkʼaˬ hkʼe hpeuꞈ maw piˇ tuˬ maˇ shiˍ. Yaˬhoˉvaˬ ngaˬ hui htaꞈ haꞈ ve Awˬ pa hpehꞈ leh ngaˬ hui meuˆ daꞈ gʼa ve Awˬ pa hpehꞈ ve kaꞈ dawˇ tuˬ Yeˍsuˆ hkʼaˬ hkʼe ga laˇ gʼa ve le, awˬ lawn chi ve hkʼaw teˇ geh henˇ tuˬ yoˬ. Ngaˬ hui awˬ viˉ awˬ nyi htaꞈ te piˇ htaˇ, Yaˬhoˉvaˬ htaꞈ hkʼaˬ hkʼe henˇ yuˬ gʼa ve kaꞈ teˇ geh henˇ tuˬ yoˬ.

3. Yaˬhoˉvaˬ geh meuˆ daꞈ tuˬ Yeˍsuˆ ve bon lawˬ hkawˇ ngaˬ hui htaꞈ hkʼaˬ hkʼe maˍ laˇ ve le?

³ Yeˍsuˆ lehˬ Awˬ pa Yaˬhoˉvaˬ yawˇ htaꞈ haꞈ leh hkʼaˬ htaˆ kaꞈ tawˇ yaw daꞈ gʼa ve tehꞈ dawˇ ve yoˬ. Yeˍsuˆ kaꞈ ngaˬ hui Yaˬhoˉvaˬ htaꞈ chi hkʼe dawˇ tcuh gaˇ ve yoˬ. Yaˬhoˉvaˬ kanˇ paˆ tiˉ yehˇ ve Gʼuiˬ sha hpehꞈ leh teꞈ chiˉ maˇ dawˇ nyi puiˉ ve tehꞈ Yeˍsuˆ ngaˬ hui htaꞈ maˇ dawˇ tcuh gaˇ. Yaˬhoˉvaˬ lehˬ ngaˬ hui htaꞈ haꞈ leh dawˇ haˍ ve Gʼuiˬ sha hpehꞈ ve tehꞈ Yeˍsuˆ ngaˬ hui htaꞈ dawˇ tcuh gaˇ ve yoˬ. Yeˍsuˆ awˬ laꞈ gʼawˇ htaꞈ bon chi hkʼe lawˬ˗oꞈ tehꞈ maˍ piˇ htaˇ ve htaꞈ ngaˬ hui mawˬ gʼa ve yoˬ. Yeˍsuˆ bon tanˬ lawˬ htaˇ “ngaˬ hui ve Awˬ pa˗oˬ” tehꞈ kʼoˆ ve yoˬ. (Maꞈhtehˍ  6:9) Awˬ tehˬ kʼo, Yeˍsuˆ Yaˬhoˉvaˬ htaꞈ kanˇ paˆ uiˍ ve Gʼuiˬ sha, “yawˇ te hpanˍ taˍ ve” maˇ heˆ leh “co co taiˍ taiˍ uˉ peunˍ ve Hkunˉ hawˉ hkanˇ” hpehꞈ ve tehꞈ kuˬ kaꞈ gʼa ve yoˬ. (Awˬ hkuiˉ puiˍ 49:25; Iˉsaˍyaˆ 40:28; 1 Tiˆmoˉseˍ 1:17) Yaꞈ hkʼaˇ, Yeˍsuˆ ngaˬ hui Gʼuiˬ sha htaꞈ “Awˬ pa˗oˬ” kuˬ kʼoˆ laˇ ve yoˬ.

4. Yaˬhoˉvaˬ ngaˬ hui yawˇ geh meuˆ daꞈ tcuh gaˇ ve tehꞈ hkʼaˬ hkʼe te shiˍ gʼa ve le?

⁴ Yaˬhoˉvaˬ nawˬ htaꞈ haꞈ ve Awˬ pa hpehꞈ ve tehꞈ dawˇ tuˬ haˍ˗aw laˇ? Chaw teˇ hpaˍ awˬ pa awˬ e maˇ haꞈ piˇ ve yehˬ kʼa hkʼaw uiˍ la ve pa taw, chi hkʼe dawˇ tuˬ haˍ jaˇ. Yaꞈ hkʼaˇ, Yaˬhoˉvaˬ ngaˬ hui ve te hkʼaˇ dawˇ hkʼaˇ htaꞈ shiˍ leh ngaˬ hui yawˇ geh meuˆ daꞈ tcuh gaˇ ve yoˬ. Liꞈ hpu hkʼaw kʼoˆ ve, “Gʼuiˬ sha geh jiˆ laˬ˗oꞈ. Hkʼe te kʼo, yawˇ nawˬ hui geh jiˆ laˬ tuˬ yoˬ.” (Yaˍkoˆ 4:8) Yaˬhoˉvaˬ ngaˬ hui htaꞈ haꞈ leh daꞈ jaˇ ve Awˬ pa hpehꞈ ve yoˬ.

5. Luˉkaꞈ liꞈ 10:22 hkʼaw kʼoˆ taˍ ve hkʼe, ngaˬ hui Yaˬhoˉvaˬ geh gʼaˇ hteꞈ meuˆ daꞈ tuˬ Yeˍsuˆ hkʼaˬ hkʼe ga laˇ ve le?

⁵ Yeˍsuˆ Yaˬhoˉvaˬ geh meuˆ daꞈ jaˇ leh yawˇ Yaˬhoˉvaˬ htaꞈ hkʼa dehꞈ henˇ yuˬ gʼa ve pa taw, ngaˬ hui kaꞈ Yaˬhoˉvaˬ geh gʼaˇ hteꞈ meuˆ daꞈ tuˬ Yeˍsuˆ ga laˇ gʼa ve yoˬ. Yawˇ kʼoˆ ve, “ngaˬ htaꞈ mawˬ ve chaw lehˬ, Awˬ pa htaꞈ mawˬ peuˬ.” (Yoˇhanˬ 14:9) Ngaˬ hui Awˬ pa hkawˇ na leh hkʼaˬ hkʼe yawˆ yan tuˬ, Yeˍsuˆ lehˬ ngaˬ hui htaꞈ maˍ laˇ gʼa ve awˬ viˉ paˍ hkʼe hpehꞈ ve yoˬ. Ngaˬ hui Awˬ pa nyi hkʼaˇ suh tuˬ te piˇ leh Awˬ pa nyi ma maˇ luˬ tuˬ te piˇ ve, hkʼaˬ hkʼe te gʼa ve le? Yeˍsuˆ miˬ guiˬ hkʼoˆ chehˇ htaˇ Yaˬhoˉvaˬ yawˇ htaꞈ te piˇ ve awˬ ceuˬ Gʼuiˬ sha ngaˬ hui htaꞈ haꞈ leh dawˇ haˍ laˇ ve tehꞈ mawˬ tuˬ te laˇ ve yoˬ. (Luˉkaꞈ 10:22 gʼaw sheˍ.) Teˇ lawn lawn htaꞈ teˇ geh nyi sheˍ.

6. Yaˬhoˉvaˬ Yeˍsuˆ ve hkawˇ hkʼaˬ hkʼe na piˇ ve le, tawˇ pa haˉ kʼoˆ maˍ laˇ sheˍ.

⁶ Yaˬhoˉvaˬ yawˇ ve yaˇ hui ve bon lawˬ hkawˇ na ve yoˬ. Yeˍsuˆ miˬ guiˬ hkʼoˆ chehˇ htaˇ, Yeˍsuˆ Yaˬhoˉvaˬ geh bon laiˉ pawˆ lawˬ ve yoˬ. Yaˬhoˉvaˬ Yeˍsuˆ ve bon lawˬ hkawˇ htaꞈ na ve tehꞈ ngaˬ hui shiˍ ve yoˬ. (Luˉkaꞈ 5:16) Yeˍsuˆ awˬ laꞈ gʼawˇ 12 gʼaˇ leuˆ yuˬ tuˬ a yeˇ uiˍ ve htaꞈ dawˇ cheˆ htaˇ, Yaˬhoˉvaˬ kaꞈ Yeˍsuˆ ve bon lawˬ hkawˇ htaꞈ na ve yoˬ. (Luˉkaꞈ 6:12, 13) Chi hkʼoˆ kaꞈ, Yeˍsuˆ dawˇ haˍ jaˇ htaˇ, Yaˬhoˉvaˬ kaꞈ Yeˍsuˆ ve bon lawˬ hkawˇ htaꞈ na ve yoˬ. Tawˇ pa haˉ te kʼo, Yeˍsuˆ htaꞈ shu hpfuhˆ˗a te piˇ htaˇ, yawˇ Yaˬhoˉvaˬ geh bon gʼaˇ hteꞈ lawˬ ve yoˬ. Yaˬhoˉvaˬ Yeˍsuˆ ve bon lawˬ hkawˇ htaꞈ ceh tiˉ na piˇ ve maˇ heˆ tehꞈ ngaˬ hui shiˍ ve yoˬ. Yaꞈ hkʼaˇ, Gʼuiˬ sha mvuhˇ naw ma tcuh  yaˇ htaꞈ peu piˇ leh Yeˍsuˆ htaꞈ awˬ gʼaˇ ca piˇ tcuh ve yoˬ.—Luˉkaꞈ 22:41-44.

7. Yaˬhoˉvaˬ yawˇ ve kanˉ te ve chaw ve bon lawˬ hkawˇ htaꞈ na ve tehꞈ nawˬ shiˍ htaˇ hkʼaˬ hkʼe dawˇ ve le?

⁷ Chi beuꞈ teˇ co˗e kaꞈ Yaˬhoˉvaˬ yawˇ ve kanˉ te ve chaw ve bon lawˬ hkawˇ htaꞈ na ve yoˬ. Yaˬhoˉvaˬ kaꞈ yawˇ hui ve bon lawˬ hkawˇ keunˍ daꞈ ve awˬ yanˇ leh daꞈ jaˇ ve awˬ yanˇ htaˇ hkʼawꞈ piˇ ve yoˬ. (Chiˇ mvuh ve 116:1, 2) I˗diˉyaˆ mvuhˇ miˬ lo chehˇ ve awˬ viˉ awˬ nyi yaˇ miˇ teˇ gʼaˇ kaꞈ awˬ lawn chi yawˇ awˬ pon awˬ tehˬ hpehꞈ ve yoˬ. Yawˇ laiˉ lawn htaꞈ dawˇ haˍ dawˇ hkiˉ puiˉ ve yoˬ. Chi htaꞈ caˉ daꞈ ve yawˇ Yaˬhoˉvaˬ geh bon laiˉ pawˆ lawˬ ve yoˬ. Yawˇ kʼoˆ ve, “2019 hkʼawꞈ Ha pa 5 maˬ JW awˬ han tawˆ kuiˬ hkʼaw dawˇ haˍ dawˇ hkiˉ ve awˬ hkʼaˇ gu gʼa tuˬ ve htaꞈ ngaˬ gʼa nyi htaˇ, chi ngaˬ htaꞈ cawˇ daꞈ jaˇ. Yaˬhoˉvaˬ ngaˬ ve bon lawˬ hkawˇ htaꞈ hkʼawꞈ laˇ ve yoˬ.”

8. Yaˬhoˉvaˬ Yeˍsuˆ htaꞈ haꞈ ve hkʼaˬ hkʼe hpeuꞈ maw piˇ ve le?

⁸ Yaˬhoˉvaˬ Yeˍsuˆ htaꞈ haꞈ ve hkʼa shuˍ ngaˬ hui htaꞈ kaꞈ haꞈ ve yoˬ. (Yoˇhanˬ 5:20) Yeˍsuˆ miˬ guiˬ hkʼoˆ chehˇ ve awˬ yanˇ htaˇ, Yeˍsuˆ yonˍ hkʼaˇ hpawˇ yonˍ yeˬ tuˬ Yaˬhoˉvaˬ nyi haꞈ shaˉ piˇ ve yoˬ. Yeˍsuˆ awˬ gʼaˇ nuˇ htaˇ, awˬ gʼaˇ piˇ leh a shaꞈ teꞈ kuiˬ hkʼaw loˍ ve awˬ ceuˬ nyi haꞈ shaˉ piˇ ve yoˬ. Yaˬhoˉvaˬ Yeˍsuˆ htaꞈ haꞈ leh nyi hkʼaˇ suh jaˇ tehꞈ kʼoˆ ve yoˬ. (Maꞈhtehˍ 3:16, 17) Yaˬhoˉvaˬ Yeˍsuˆ awˬ paˇ lo hkʼaˬ htaˆ kaꞈ chehˇ ve tehꞈ Yeˍsuˆ shiˍ ve pa taw, Yeˍsuˆ teˇ gʼaˇ tiˉ chehˇ ve tehꞈ maˇ dawˇ.—Yoˇhanˬ 8:16.

9. Yaˬhoˉvaˬ ngaˬ hui htaꞈ haꞈ ve tehꞈ hkʼaˬ hkʼe te shiˍ gʼa ve le?

⁹ Yaˬhoˉvaˬ ngaˬ hui htaꞈ haꞈ jaˇ ve tehꞈ Yeˍsuˆ dawˇ ve hkʼe ngaˬ hui kaꞈ dawˇ ve yoˬ. Yaˬhoˉvaˬ ngaˬ hui awˬ pon laiˉ ceuˬ te laˇ ve lehˬ, ngaˬ hui yawˇ htaꞈ shiˍ daꞈ tuˬ gawˬ veu laˇ ve, ngaˬ hui htaꞈ ha lehˬ tuˬ te laˇ ve yehˬ kʼa hkʼaw ve chaw hkʼa shuˍ awˬ viˉ awˬ nyi cawˬ tcuh laˇ ve, leh ngaˬ hui awˬ gʼaˇ nuˇ htaˇ awˬ gʼaˇ peꞈ laˇ ve yoˬ. (Yoˇhanˬ 6:44) Chi hkʼoˆ kaꞈ, ngaˬ hui ve yonˍ hkʼaˇ yonˍ yeˬ tuˬ yawˇ laiˉ ceuˬ peꞈ laˇ leh ngaˬ hui ve a shaꞈ teꞈ chehˇ kuiˬ hkʼaw loˍ ve awˬ ceuˬ cawˬ tuˬ kaꞈ yawˇ nyi haꞈ shaˉ laˇ ve yoˬ. (Maꞈhtehˍ 6:31, 32) Yaˬhoˉvaˬ ngaˬ hui htaꞈ te laˇ ve awˬ ceuˬ teˇ hpaˍ htaꞈ dawˇ nyi htaˇ, ngaˬ hui yawˇ htaꞈ haꞈ jaˇ.

10. Yaˬhoˉvaˬ awˬ viˉ awˬ nyi htaꞈ te piˇ ve awˬ hkʼaˇ ngaˬ hui hkʼaˬ hkʼe heuˆ yuˬ gʼa ve le?

¹⁰ Yaˬhoˉvaˬ awˬ viˉ awˬ nyi teˇ gʼaˇ le le htaꞈ haꞈ ve yoˬ. Yaꞈ hkʼaˇ, ngaˬ hui teˇ pawˆ pawˆ yawˇ hui htaꞈ haꞈ tuˬ haˍ ve yoˬ. Hpehꞈ laˬ ve leh chaw liˇ vaˇ liˇ maˇ shuˍ daꞈ ve pa taw yoˬ hehˉ. Chi hkʼoˆ kaꞈ, ngaˬ hui teˇ gʼaˇ le le te yaꞈ leh shu nyi ma maˇ sha tuˬ te piˇ ve yoˬ. Ngaˬ hui Yaˬhoˉvaˬ htaꞈ henˇ yuˬ ve kʼo, awˬ viˉ awˬ nyi htaꞈ haꞈ gʼa ve yoˬ. (Eˇfeˇsuꞈ 5:1, 2; 1 Yoˇhanˬ 4:19) Yaˬhoˉvaˬ ve awˬ lawn ngaˬ hui htaꞈ hkʼaˬ hkʼe maˍ laˇ gʼa ve teˇ geh nyi sheˍ.

11. Yeˍsuˆ Yaˬhoˉvaˬ hkʼa shuˍ shu htaꞈ hkʼaˬ hkʼe “ha kʼaˉ puiˉ jaˇ ve” le?

¹¹ Yaˬhoˉvaˬ lehˬ shu htaꞈ “ha kʼaˉ puiˉ jaˇ ve” Gʼuiˬ sha hpehꞈ ve yoˬ. (Luˉkaꞈ 1:77) Ha kʼaˉ puiˉ ve chaw lehˬ, shu tuꞈ ve hkanˍ ve leh shoꞈ shaꞈ ve gʼa hpuˇ htaˇ, dawˇ haˍ ve yoˬ. Yawˇ oˇ ve teˇ gʼaˇ htaꞈ ga piˇ gʼa tuˬ awˬ hkʼaˇ ca ve yoˬ. Awˬ lawn chi hkʼe ve Yeˍsuˆ kaꞈ Yaˬhoˉvaˬ htaꞈ henˇ yuˬ ve yoˬ. (Yoˇhanˬ 5:19) Tawˇ pa haˉ te kʼo, Yeˍsuˆ miˬ guiˬ hkʼoˆ chehˇ htaˇ, yawˇ chaw teˇ moˍ htaꞈ mawˬ leh “yawˇ yawˇ hui htaꞈ ha kʼaˉ ve yoˬ. Awˬ lawn kʼo, yawˇ hui lehˬ yawˬ hawˉ paˍ maˇ cawˬ ve yawˬ hkʼe nyi ma shoꞈ shaꞈ jaˇ leh awˬ gʼaˇ nuˇ jaˇ chehˇ ve” htaꞈ yawˇ gʼa mawˬ ve yoˬ. (Maꞈhtehˍ 9:36) Yeˍsuˆ yawˇ hui htaꞈ ha kʼaˉ ve ceh maˇ heˆ. Ga piˇ tuˬ awˬ hkʼaˇ kaꞈ ca ve yoˬ. Yawˇ chaw naˬ htaꞈ gu na˗e piˇ leh “kanˉ te heuˬ leh mawˇ pfuhˇ hawˇ ve chaw hkʼa peu˗eˬ ngaˬ geh laˬ˗oꞈ” nawˬ hui htaꞈ gʼaˇ jehˇ tcuh laˇ tuˬ yoˬ tehꞈ kʼoˆ piˇ ve yoˬ.—Maꞈhtehˍ 11:28-30; 14:14.

12. Ngaˬ hui awˬ viˉ awˬ nyi htaꞈ ha kʼaˉ ve tehꞈ hkʼaˬ hkʼe mawˬ tcuh piˇ gʼa tuˬ le?

¹² Ngaˬ hui awˬ viˉ awˬ nyi htaꞈ ha kʼaˉ ve tehꞈ mawˬ tcuh tuˬ, yawˇ shoꞈ shaꞈ ve aˬ htoꞈ ma gʼa hpuˇ ve awˉ lawˉ dawˇ nyi cawˇ ve yoˬ. Tawˇ pa haˉ te kʼo, awˬ viˉ awˬ nyi yaˇ miˇ teˇ gʼaˇ naˬ jaˇ htaˇ, chi htaꞈ caˉ daꞈ ve yawˇ maˇ hkanˇ jaw. Chaw teˇ hpaˍ yawˇ htaꞈ ga piˇ ve kʼo, yawˇ ha lehˬ jaˇ tuˬ ve maˇ heˆ laˇ? Yawˇ chi hkʼe taw taw naˬ ve yawˇ ve yehˬ kʼa hkʼaw ve chaw htaꞈ nyi haꞈ shaˉ gʼa˗aw laˇ? Ngaˬ hui awˬ chiˇ te piˇ  ve maˇ heˆ leh yehˬ hkʼaw daꞈ kehˬ tuˬ te piˇ ve kʼo daꞈ˗aˬ laˇ? Tehꞈ dawˇ nyi sheˍ. Awˬ viˉ awˬ nyi hawˉ hkʼaˆ teˇ gʼaˇ kanˉ maˇ gʼa te˗o ve kʼo, ngaˬ hui yawˇ htaꞈ maˇ kʼoˆ piˇ leh hpu a ciˉ piˇ ve kʼo daꞈ˗aˬ laˇ, hpu chi ve yawˇ kanˉ awˬ suhˉ gʼa htaˇ hkʼa gaˬ yehˇ lawꞈ tuˬ ve laˇ? Ngaˬ hui dawˇ nyi sheˍ.

13-14. Ngaˬ hui Yaˬhoˉvaˬ hkʼa shuˍ piˇ gaˇ puiˉ ve chaw hkʼaˬ hkʼe hpehꞈ gʼa tuˬ le?

¹³ Yaˬhoˉvaˬ lehˬ piˇ gaˇ puiˉ ve Gʼuiˬ sha hpehꞈ ve yoˬ. Ngaˬ hui maˇ lawˬ ve kaꞈ yawˇ laiˉ ceuˬ peꞈ laˇ ve yoˬ. (Maꞈhtehˍ 5:45) Ngaˬ hui yawˇ htaꞈ henˇ yuˬ leh awˬ viˉ awˬ nyi ngaˬ hui ga laˇ tuˬ maˇ lawˬ ve htawˇ, ngaˬ hui awˉ lawˉ yawˇ hui htaꞈ ga piˇ sheˍ. Ngaˬ hui maˇ gʼa lawˬ ve htawˇ, Yaˬhoˉvaˬ teˇ nyi le le mvuhˇ shawˉ mvuhˇ nyi tawˆ la tcuh laˇ ve htaꞈ dawˇ nyi sheˍ. Yaˬhoˉvaˬ te ve awˬ ceuˬ htaꞈ awˬ hpfuhˇ maˇ shiˍ ve chaw awˬ pon htawˇ, yawˇ teˇ gʼaˇ le le htaꞈ mvuhˇ nyi ba piˇ ve yoˬ. Chi lehˬ Yaˬhoˉvaˬ ngaˬ hui htaꞈ haꞈ jaˇ. Yaˬhoˉvaˬ ngaˬ hui htaꞈ dawˇ haˍ leh piˇ laˇ gaˇ ve Gʼuiˬ sha hpehꞈ ve htaꞈ ngaˬ hui dawˇ nyi htaˇ, ngaˬ hui kaꞈ yawˇ htaꞈ haꞈ jaˇ!

¹⁴ Mvuhˇ naw ma hkʼoˆ ve Awˬ pa piˇ gaˇ puiˉ ve htaꞈ ngaˬ hui ve awˬ viˉ awˬ nyi laiˉ gʼaˇ henˇ yuˬ ve yoˬ. Yawˇ hui shu ga laˇ tuˬ maˇ lawˬ sheˍ ve kaꞈ awˉ lawˉ ga piˇ ve yoˬ. Tawˇ pa haˉ te kʼo, 2013 hkʼawꞈ Hpiˇliˇpaiˍ mvuhˇ miˬ lo mvuhˇ yeˬ mvuhˇ haw lonˉ gʼa hpuˇ htaˇ, awˬ viˉ awˬ nyi laiˉ gʼaˇ ve yehˬ paˆ˗e leh mawˇ jeˬ kaꞈ luˬ kʼai maˇ jaˇ. Miˬ guiˬ chi hkʼoˆ lo ve awˬ viˉ awˬ nyi hpu tanˇ tanˇ piˇ leh 1 hkʼawꞈ maˇ gaˬ sheˍ ve kaꞈ 750 yehˬ gu te leh te peuˬ ve yoˬ. A naˍ 19 cawˬ htaˇ kaꞈ awˬ viˉ awˬ nyi ga piˇ gaˇ puiˉ leh awˬ nu ve awˬ viˉ awˬ nyi htaꞈ ga gʼa ve hkʼe ga piˇ ve yoˬ. Awˬ viˉ awˬ nyi tuꞈ ve hkanˍ ve gʼa hpuˇ ve mawˬ htaˇ, haˆ ga piˇ ve kʼo ngaˬ hui yawˇ hui htaꞈ haꞈ ve tehꞈ hpeuꞈ maw piˇ ve yoˬ.

15-16. Luˉkaꞈ liꞈ 6:36 hkʼaw kʼoˆ taˍ ve hkʼe, Yaˬhoˉvaˬ htaꞈ henˇ yuˬ gʼa tuˬ ngaˬ hui hkʼaˬ hkʼe gʼa te cawˇ ve le?

¹⁵ Yaˬhoˉvaˬ lehˬ ha kʼaˉ puiˉ leh venˇ baˆ hpehˇ piˇ puiˉ ve yoˬ. (Luˉkaꞈ 6:36 gʼaw sheˍ.) Yawˇ ngaˬ hui htaꞈ teˇ nyi le le venˇ baˆ hpehˇ laˇ ve yoˬ. (Chiˇ mvuh ve 103:10-14) Yeˍsuˆ kaꞈ chi ve hkʼa shuˍ te ve yoˬ. Yawˇ ve awˬ laꞈ gʼawˇ maˇ biˇ ve chaw hpehꞈ ve htawˇ, yawˇ yawˇ hui htaꞈ ha kʼaˉ leh venˇ baˆ hpehˇ piˇ ve yoˬ. Ngaˬ hui teˇ gʼaˇ le le venˇ baˆ hpehˇ laˇ ve htaꞈ gʼa tuˬ, Yeˍsuˆ ve a shaꞈ tanˇ laˇ ve yoˬ. (1 Yoˇhanˬ 2:1, 2) Yaˬhoˉvaˬ leh Yeˍsuˆ nawˬ htaꞈ ha kʼaˉ leh chi hkʼe taw taw venˇ baˆ hpehˇ laˇ ve htaꞈ nawˬ shiˍ htaˇ, nawˬ yawˇ huiˉ maˬ geh meuˆ daꞈ gaˇ jaˇ ve maˇ heˆ laˇ?

¹⁶ Ngaˬ hui “teˇ gʼaˇ leh teˇ gʼaˇ venˆ baˆ hpehˇ daꞈ” ve kʼo, haꞈ daꞈ jaˇ tuˬ yoˬ. (Eˇfeˇsuꞈ 4:32) Yaꞈ hkʼaˇ,  chi sha ve maˇ heˆ. Hkʼe te leh ngaˬ hui gʼa coˇ caˇ jaˇ. Awˬ viˉ awˬ nyi yaˇ miˇ teˇ gʼaˇ dawˇ ve Shaw nyi kuiˬ Taꞈ yehˬ hkʼaw ve awˬ lawn “teˇ gʼaˇ leh teˇ gʼaˇ venˇ baˆ hpehˇ daꞈ˗oꞈ” tehꞈ kʼoˆ ve yawˇ htaꞈ ga laˇ gʼa jaˇ. * Yawˇ kʼoˆ ve, “awˬ lawn chi hkʼaw venˇ baˆ hpehˇ daꞈ ve chi ngaˬ ve dawˇ hkʼaˇ pa tuˬ ga laˇ gʼa ve yoˬ. Chi ve hkʼaw kʼoˆ ve, shu htaꞈ venˇ baˆ hpehˇ piˇ ve lehˬ, yawˇ te ve awˬ ceuˬ htaꞈ ngaˬ hui kaꞈ ha lehˬ ve tehꞈ kʼoˆ gaˇ ve maˇ heˆ. Yawˇ te ve awˬ ceuˬ ngaˬ hui htaꞈ heuˆ la kuiˬ maˇ cawˬ ve tehꞈ kaꞈ kʼoˆ gaˇ ve maˇ heˆ. Yaꞈ hkʼaˇ, venˇ baˆ hpehˇ piˇ ve lehˬ ngaˬ hui yawˇ htaꞈ maˇ beuꞈ˗o leh ngaˬ hui nyi ma sha gʼa ve htaꞈ kʼoˆ gaˇ ve yoˬ.” Ngaˬ hui awˬ viˉ awˬ nyi htaꞈ venˇ baˆ hpehˇ piˇ ve kʼo, yawˇ hui htaꞈ haꞈ ve tehꞈ hpeuꞈ maw piˇ leh mvuhˇ naw ma hkʼoˆ ve Awˬ pa Yaˬhoˉvaˬ htaꞈ ngaˬ hui henˇ yuˬ chehˇ ve yoˬ.

17. Maꞈhtehˍ liꞈ 5:16 hkʼaw kʼoˆ taˍ ve hkʼe, ngaˬ hui ve Awˬ pa Yaˬhoˉvaˬ htaꞈ hkʼaˬ hkʼe te yawˆ yan gʼa tuˬ le?

¹⁷ Haꞈ daꞈ ve yehˬ kʼa hkʼaw ngaˬ hui gʼa chehˇ leh miˬ guiˬ hkʼoˆ teˇ kaˬ le le lo awˬ viˉ awˬ nyi cawˬ ve, chi daꞈ jaˇ ve awˬ ceuˬ hpehꞈ ve yoˬ. Ngaˬ hui ve Awˬ pa Yaˬhoˉvaˬ Gʼuiˬ sha htaꞈ oˉ kʼoˍ pui la tuˬ te gʼa ve hkʼe chaw maˇ maˇ htaꞈ jehˬ piˇ gaˇ ve yoˬ. Hkʼe te leh, Yaˬhoˉvaˬ leh yawˇ ve chaw htaꞈ awˬ nu ve chaw maˇ daꞈ ve dawˇ tuˬ ngaˬ hui maˇ te gaˇ. Yaꞈ hkʼaˇ, awˬ nu ve chaw Yaˬhoˉvaˬ ve awˬ lawn henˇ leh yawˇ ve kanˉ te la tuˬ, ngaˬ hui ve te hkʼaˇ dawˇ hkʼaˇ daꞈ tuˬ gʼa te ve yoˬ.—Maꞈhtehˍ 5:16 gʼaw sheˍ.

18. Ngaˬ hui hto toˇ htaˇ maˇ kawˆ tuˬ aˬ htoꞈ ma ga laˇ ve le?

¹⁸ Ngaˬ hui Yaˬhoˉvaˬ hkawˇ na yuˬ ve pa taw, chaw teˇ hpaˍ ngaˬ hui htaꞈ maˇ shawˍ maˇ caˆ kʼoˆ leh fawˉ mehˍ laˇ ve yoˬ. A shu yawˇ ve yonˍ hkʼaˇ gʼa kʼoˆ maˍ piˇ htaˇ, nawˬ kawˆ˗aw laˇ? Nawˬ kawˆ ve kʼo, Yaˬhoˉvaˬ leh Yeˍsuˆ nawˬ htaꞈ ga laˇ tuˬ yoˬ tehꞈ nawˬ yonˍ gʼa ve yoˬ. Yeˍsuˆ awˬ laꞈ gʼawˇ htaꞈ htawˆ hkanˍ piˇ ve, yawˇ hui hkʼaˬ hkʼe gʼa kʼoˆ tuˬ leh hkʼaˬ hkʼe gʼa yaw tuˬ taˇ kawˆ. Yeˍsuˆ kʼoˆ ve, “awˬ yanˇ oˇ ve awˬ hkʼaw lo hkʼaˬ hkʼe gʼa kʼoˆ tuˬ ve htaꞈ nawˬ hui shiˍ tuˬ yoˬ. Awˬ lawn kʼo, tawˇ yaw shehˍ hpaˇ lehˬ nawˬ hui maˇ heˆ. Nawˬ hui Awˬ pa ve Awˬ ha hpu lehˬ, nawˬ hui awˬ hkʼaw lo tawˇ yaw tuˬ yoˬ.”—Maꞈhtehˍ 10:19, 20.

19. Liꞈ hpu henˇ ve chaw teˇ gʼaˇ haꞈ hanˉ ve hkʼaw hkʼaˬ hkʼe hto toˇ ve le?

 ¹⁹ Roˍbeuˍ ve awˬ lawn htaꞈ teˇ geh nyi sheˍ. Yaˬhoˉvaˬ ve yehˬ kʼa hkʼaw gʼa chehˇ ve htaꞈ yawˇ awˬ hpfuhˇ shiˍ jaˇ. Yawˇ Liꞈ hpu henˇ ve chaw hpehꞈ htaˇ, Aˍfaˍriˆkaˆ miˬ guiˬ awˬ hawˉ hpawˇ lo maꞈ yaˇ ve shaˉ nanˉ lo yawˇ gʼa kʼai ve yoˬ. Liꞈ hpu hkʼaw ve awˬ lawn htaꞈ yawˇ hkʼa dehꞈ maˇ shiˍ sheˍ ve htawˇ, yawˇ haꞈ hanˉ jaˇ. Yawˇ awˬ viˉ awˬ nyi htaꞈ haꞈ ve pa taw, maꞈ yaˇ maˇ te tehꞈ suhˉ jehˬ paˍ htaꞈ kʼoˆ piˇ ve yoˬ. Yaꞈ hkʼaˇ, suhˉ jehˬ paˍ yawˇ htaꞈ na piˇ ve, “nawˬ ve awˬ viˉ awˬ nyi a shu le?” Chi hkʼe na laˇ tuˬ tehꞈ yawˇ maˇ dawˇ nyi jaw. Yaꞈ hkʼaˇ, oˇ ve teˇ nyi hkʼaw ve teˇ nyi le le Liꞈ hpu chaˬ nyi tuˬ Maꞈhtehˍ liꞈ 12:50 htaꞈ yawˇ tawnˇ gʼa ve yoˬ. Oˇ kaˬ lo kʼoˆ ve, “mvuhˇ naw ma hkʼoˆ chehˇ ve ngaˬ Awˬ pa ve a loˍ htaꞈ hkʼa te ve chaw hui lehˬ, ngaˬ ve awˬ nyi paˍ, ngaˬ ve awˬ nyi ma leh ngaˬ ve awˬ e hpehꞈ ve yoˬ.” Roˍbeuˍ Liꞈ hpu henˇ ve chaw ceh hpehꞈ sheˍ ve htawˇ, Yaˬhoˉvaˬ yawˇ htaꞈ daꞈ kehˬ ve awˬ ha hpu piˇ leh na hkawˇ oˇ ve htaꞈ hkʼawꞈ gʼa tuˬ ga piˇ ve yoˬ. Roˍbeuˍ suhˉ jehˬ paˍ na piˇ ve awˬ nu ve teˇ hpaˍ htaꞈ kaꞈ hkʼawꞈ gʼa ve yoˬ. Yaˬhoˉvaˬ Roˍbeuˍ htaꞈ nyi hkʼaˇ suh jaˇ ve yoˬ. Ngaˬ hui Gʼuiˬ sha htaꞈ gʼaˇ va leh nyiˉ laˇ ve gʼa hpuˇ ve htawˇ, yawˇ ve awˬ lawn kʼoˆ ve Yaˬhoˉvaˬ ngaˬ hui htaꞈ nyi hkʼaˇ suh jaˇ ve yoˬ.

20. Ngaˬ hui aˬ htoꞈ ma te tuˬ dawˇ teh taˍ ve le? (Yoˇhanˬ 17:11, 15)

²⁰ Ngaˬ hui Yaˬhoˉvaˬ ve yehˬ kʼa hkʼaw gʼa chehˇ la ve htaꞈ hkʼaˬ htaˆ kaꞈ awˬ hpfuhˇ shiˍ sheˍ. Ngaˬ hui daꞈ jaˇ ve Awˬ pa cawˬ leh ngaˬ hui htaꞈ haꞈ ve awˬ viˉ awˬ nyi maˇ maˇ cawˬ ve yoˬ. Chi a yeˇ maˇ uiˍ tehꞈ taˇ dawˇ. Saˍtanˍ leh yawˇ hpawˇ chehˇ ve chaw Yaˬhoˉvaˬ ngaˬ hui htaꞈ awˬ tehˬ maˇ haꞈ ve tehꞈ dawˇ tcuh gaˇ leh yawˇ hui lehˬ ngaˬ hui htaꞈ maˇ haꞈ daꞈ tcuh gaˇ leh teˇ moˍ tiˉ maˇ hpehꞈ tuˬ coˇ caˇ leh te ve yoˬ. Gʼuiˬ sha ngaˬ hui htaꞈ haꞈ shaˉ laˇ ve, ngaˬ hui haꞈ daꞈ ve yehˬ kʼa hpehꞈ leh teˇ moˍ tiˉ hpehꞈ tuˬ ga laˇ ve, Yeˍsuˆ bon lawˬ chehˇ ve htaꞈ taˇ leunˇ sheˍ. Leh Yaˬhoˉvaˬ kaꞈ chi hkʼe te chehˇ ve yoˬ. (Yoˇhanˬ 17:11, 15 gʼaw sheˍ.) Yaˬhoˉvaˬ ngaˬ hui htaꞈ haꞈ ve tehꞈ yonˍ gʼa leh yawˇ ngaˬ hui htaꞈ hkʼaˬ htaˆ kaꞈ haꞈ shaˉ laˇ ve tehꞈ yonˍ sheˍ. Leh ngaˬ hui Gʼuiˬ sha ve yehˬ kʼa hkʼaw ve chaw htaꞈ hkʼa dehꞈ meuˆ daꞈ sheˍ.