1. Chaw teˇ hpaˍ yawˇ hui haꞈ ve chaw Hkriꞈ yaˇ awˬ moˍ hkʼaw tawˆ cheˆ piˇ htaˇ hkʼaˬ hkʼe dawˇ ve le?

 Nawˬ haꞈ ve chaw Hkriꞈ yaˇ awˬ moˍ hkʼaw tawˆ cheˆ piˇ ve chaw cawˬ jaw˗aw laˇ? Cawˬ ve kʼo, nyi ma luˬ jaˇ tuˬ yoˬ! Awˬ viˉ awˬ nyi yaˇ miˇ teˇ gʼaˇ Hin˗daˍ kʼoˆ ve, “ngaˬ hpawˇ htaꞈ heuˆ daꞈ ve 41 hkʼawꞈ gaˬ˗oˬ. * Ngaˬ hpawˇ suh˗e htaˇ chi aꞈ kehˉ ngaˬ nyi ma luˬ tuˬ te laˇ ve maˇ cawˬ˗o tehꞈ dawˇ ve yoˬ. Yaꞈ hkʼaˇ, ngaˬ ve yaˇ paˍ Yaˬhoˉvaˬ, awˬ miˇ ma leh yaˇ htaꞈ baˬ taˉ htaˇ, oˇ ve aꞈ kehˉ ngaˬ nyi ma luˬ jaˇ tuˬ te laˇ sheˍ ve yoˬ.”

2-3. Chiˇ mvuh ve liꞈ 78:40, 41 hkʼaw kʼoˆ taˍ ve hkʼe, Yaˬhoˉvaˬ ve kanˉ te ve chaw yawˇ htaꞈ baˬ taˉ htaˇ yawˇ hkʼaˬ hkʼe dawˇ ve le?

² Gʼuiˬ sha ve yehˬ kʼa hkʼaw ve mvuhˇ naw ma tcuh yaˇ Gʼuiˬ sha htaꞈ baˬ taˉ htaˇ, yawˇ nyi ma hkʼaˬ hkʼe taw luˬ ve dawˇ nyi sheˍ. (Yuˇdaꞈ 6) Iˉsaˍreˍlaˆ chaw Gʼuiˬ sha htaꞈ laiˉ pawˆ hpfuhˆ ve yawˇ gʼa mawˬ htaˇ nyi ma naˬ jaˇ. (Chiˇ mvuh ve 78:40, 41 gʼaw sheˍ.) Nawˬ haꞈ ve chaw Gʼuiˬ sha htaꞈ baˬ taˉ ve shiˍ htaˇ Yaˬhoˉvaˬ nawˬ htaꞈ na gʼa ve tehꞈ yonˍ gʼa ve yoˬ. Gʼuiˬ sha kaꞈ nyi ma luˬ leh nyi ma naˬ jaˇ. Awˬ lawn chi nawˬ yeunˇ hkanˍ gʼaˇ tuˬ Yaˬhoˉvaˬ ga laˇ leh awˬ gʼaˇ peꞈ laˇ tuˬ yoˬ.

³ Ngaˬ hui haꞈ ve chaw Yaˬhoˉvaˬ htaꞈ baˬ taˉ ve cawˬ ve kʼo, yawˇ ga laˇ ve htaꞈ gʼa tuˬ ngaˬ hui hkʼaˬ hkʼe gʼa te cawˇ ve, awˬ lawn chi ve hkʼaw teˇ geh henˇ tuˬ yoˬ. Chi hkʼe gʼa hpuˇ ve awˬ viˉ awˬ nyi htaꞈ ngaˬ hui hkʼaˬ hkʼe ga piˇ gʼa ve kaꞈ teˇ geh henˇ tuˬ yoˬ. Ngaˬ hui shaˍ tiꞈ te leh hkʼaˬ hkʼe ve maˇ gʼa dawˇ tuˬ, awˉ lawˉ teˇ geh henˇ tuˬ yoˬ.

4. Yaˇ Yaˬhoˉvaˬ htaꞈ baˬ taˉ htaˇ awˬ pa awˬ e laiˉ gʼaˇ hkʼaˬ hkʼe dawˇ ve le?

⁴ Yaˇ Hkriꞈ yaˇ awˬ moˍ hkʼaw tawˆ cheˆ piˇ htaˇ, yaˇ teˇ ceuˬ ceuˬ te yaꞈ ve maˇ heˆ leh yaˇ awˬ tehˬ ve hkʼaw chehˇ tuˬ maˇ ga piˇ gʼa ve tehꞈ awˬ pa awˬ e dawˇ ve yoˬ. Awˬ viˉ awˬ nyi teˇ gʼaˇ hawˉ hkʼaˆ Luˉkaꞈ meh ve, yawˇ ve yaˇ paˍ htaꞈ Hkriꞈ yaˇ awˬ moˍ hkʼaw tawˆ cheˆ piˇ ve yoˬ. Yawˇ kʼoˆ ve, “ngaˬ awˬ to htaꞈ venˇ baˆ taˍ ve, teˇ pawˆ pawˆ kʼo hawˬ ve, zuhꞈ  maˆ maˇ daꞈ ve, leh ngaˬ nyi ma naˬ jaˇ ve yoˬ.” Awˬ viˉ awˬ nyi yaˇ miˇ teˇ gʼaˇ Eˇliˇsaˍbeh meh ve yawˇ ve yaˇ paˍ htaꞈ Hkriꞈ yaˇ awˬ moˍ hkʼaw tawˆ cheˆ piˇ peuˬ hkʼawꞈ nawˉ yawˇ kʼoˆ ve, “ngaˬ maˇ daꞈ ve awˬ e hpehꞈ ve tehꞈ hkʼaˬ htaˆ kaꞈ dawˇ ve yoˬ. Ngaˬ ve yaˇ Yaˬhoˉvaˬ htaꞈ chi aꞈ kehˉ haꞈ tuˬ maˍ piˇ cawˇ ve tehꞈ dawˇ ve yoˬ.”

5. Yaˇ Yaˬhoˉvaˬ htaꞈ baˬ taˉ htaˇ awˬ pa awˬ e ve yaꞈ kuiˬ hpehꞈ˗aw laˇ?

⁵ Yaˬhoˉvaˬ ve kanˉ te tuˬ ve, maˇ heˆ leh maˇ te tuˬ ve, ngaˬ hui hkʼaˇ ngaˬ hui leuˆ yuˬ tuˬ a hkaw˗naˬ cawˬ ve tehꞈ tawnˇ taˍ sheˍ. Awˬ pa awˬ e daꞈ ve henˇ yuˬ tuˬ maˇ hpehꞈ ve htawˇ, yaˇ teˇ hpaˍ yawˇ hui uiˍ la htaˇ Yaˬhoˉvaˬ ve kanˉ te tuˬ leuˆ yuˬ kaꞈ gʼa ve yoˬ. Maˇ heˆ leh yaˇ Gʼuiˬ sha htaꞈ haꞈ tuˬ awˬ pa awˬ e coˇ caˇ leh maˍ piˇ ve htawˇ, yaˇ uiˍ la htaˇ awˬ tehˬ ve hkʼaw maˇ chehˇ kaꞈ gʼa ve yoˬ. Yaꞈ hkʼaˇ, yawˇ ve a shaꞈ teꞈ hkʼaˇ hkʼaˬ hkʼe te tuˬ teˇ gʼaˇ le le gʼa leuˆ yuˬ cawˇ ve yoˬ. (Yawˇsuˆ 24:15) Chi htaꞈ pa taw awˬ pa awˬ e˗oˬ, nawˬ nyi ma naˬ jaˇ ve htawˇ, nawˬ ve yaˇ Yaˬhoˉvaˬ ve kanˉ maˇ te tuˬ leuˆ yuˬ htaˇ nawˬ awˬ to htaꞈ venˇ baˆ taˇ taˍ.

6. Awˬ pa awˬ e Yaˬhoˉvaˬ htaꞈ baˬ taˉ htaˇ, yaˇ teˇ hpaˍ hkʼaˬ hkʼe dawˇ ve le?

⁶ Awˬ pa awˬ e teˇ hpaˍ kʼo, Yaˬhoˉvaˬ leh yehˬ kʼa htaꞈ kaꞈ baˬ taˉ ve yoˬ. (Chiˇ mvuh ve 27:10) Yaˇ teˇ hpaˍ awˬ pa awˬ e htaꞈ haꞈ leh nyi hkʼaˇ suh jaˇ ve chaw, chi hkʼe gʼa hpuˇ htaˇ nyi ma luˬ jaˇ. Awˬ viˉ awˬ nyi Iˉsaˍtaˆ awˬ pa Hkriꞈ yaˇ awˬ moˍ hkʼaw tawˆ cheˆ piˇ ve yoˬ. Yawˇ kʼoˆ ve, “ngaˬ pa Yaˬhoˉvaˬ htaꞈ baˬ taˉ ve ngaˬ shiˍ htaˇ hawˬ ve yoˬ. Awˬ lawn kʼo, ngaˬ ngaˬ pa htaꞈ haꞈ jaˇ. Ngaˬ pa Hkriꞈ yaˇ awˬ moˍ hkʼaw tawˆ cheˆ piˇ˗oˬ ve htawˇ, yawˇ hkʼaˬ hkʼe kʼai naˍ ngaˬ dawˇ haˍ ve yoˬ. Teˇ pawˆ pawˆ chi ngaˬ kawˆ puiˉ jaˇ ve a naˍ cawˬ tuˬ te laˇ leh dawˇ haˍ dawˇ hkiˉ jaˇ tuˬ kaꞈ te laˇ ve yoˬ.”

7. Awˬ pa awˬ e Hkriꞈ yaˇ awˬ moˍ hkʼaw tawˆ cheˆ piˇ ve, yaˇ teˇ hpaˍ htaꞈ Yaˬhoˉvaˬ hkʼaˬ hkʼe dawˇ ve le?

⁷ Nawˬ ve awˬ pa maˇ heˆ leh awˬ e Hkriꞈ yaˇ awˬ moˍ hkʼaw tawˆ cheˆ ve kʼo, nyi ma naˬ jaˇ ve yoˬ hehˉ. Ngaˬ hui nawˬ ve awˬ viˉ awˬ nyi hpehꞈ leh nawˬ nyi ma naˬ ve hkʼe ngaˬ hui kaꞈ nyi ma naˬ ve yoˬ. Nawˬ nyi ma hkʼaˬ hkʼe taw naˬ ve Yaˬhoˉvaˬ shiˍ ve tehꞈ nawˬ tawnˇ taˍ sheˍ. Nawˬ Yaˬhoˉvaˬ htaꞈ ka tiꞈ yeˬ sheˍ ve yawˇ nawˬ htaꞈ haꞈ leh nyi hkʼaˇ suh ve yoˬ. Ngaˬ hui kaꞈ hkʼa shuˍ yoˬ. Awˬ pa awˬ e chi hkʼe dawˇ cheˆ ve lehˬ nawˬ ve yaꞈ kuiˬ hpehꞈ ve maˇ heˆ tehꞈ tawnˇ taˍ sheˍ. Awˬ lawn kʼo, yawˇ Yaˬhoˉvaˬ ve kanˉ te tuˬ ve laˇ, teˇ gʼaˇ leh teˇ gʼaˇ leuˆ yuˬ tuˬ a hkaw˗anˬ peꞈ laˇ ve yoˬ. Teˇ gʼaˇ le le awˬ to chiˇ aꞈ leh Baˆtiˆsaˬ haꞈ yuˬ˗oˬ ve chaw “a shu yawˇ ve awˬ vuiˬ htaꞈ gʼa pfuhˇ tuˬ yoˬ.”—Gaˍlaˍtiˆ 6:5.

8. Yehˬ kʼa hkʼaw ve chaw yawˇ haꞈ ve Yaˬhoˉvaˬ geh kʼawꞈ la tuˬ law chehˇ htaˇ hkʼaˬ hkʼe te cawˇ ve le? (Awˇ ceˍ awˇ fa “ Yaˬhoˉvaˬ geh kʼawꞈ la˗o” htaꞈ nyi sheˍ.)

⁸ Nawˬ haꞈ ve chaw Yaˬhoˉvaˬ htaꞈ baˬ taˉ htaˇ, teˇ nyi kʼo yawˇ Yaˬhoˉvaˬ geh kʼawꞈ kʼawꞈ la tuˬ tehꞈ nawˬ dawˇ law gʼa ve yoˬ. Yaꞈ hkʼaˇ, chi teˇ hkui nawˬ yawˇ htaꞈ law chehˇ htaˇ, aˬ htoꞈ ma te cawˇ ve le? Nawˬ ve yonˍ hkʼaˇ yonˍ yeˬ tuˬ te cawˇ ve yoˬ. Yehˬ kʼa hkʼaw ve chaw leh tawˆ cheˆ piˇ ve chaw awˬ pon nawˬ daꞈ ve henˇ yuˬ tuˬ te gʼa ve yoˬ. Chi hkʼoˆ kaꞈ, nawˬ nyi ma gawˬ lehˍ te leh nyi ma luˬ ve htaꞈ yeunˇ hkanˍ gʼaˇ tuˬ sha ve yoˬ. Chi teˇ hkui nawˬ ve yonˍ hkʼaˇ yonˍ yeˬ gʼa tuˬ aˬ htoꞈ ma te gʼa ve teˇ geh nyi sheˍ.

9. Nawˬ Yaˬhoˉvaˬ geh awˬ gʼaˇ gʼa tuˬ hkʼaˬ hkʼe gʼa te cawˇ ve le? (Awˇ ceˍ awˇ fa “ Nawˬ haꞈ ve chaw Yaˬhoˉvaˬ htaꞈ baˬ taˉ htaˇ awˬ hawˉ lo cawˬ ve Liꞈ hpu awˬ tawn chi teˇ hpaˍ nawˬ htaꞈ awˬ gʼaˇ peꞈ laˇ ve” htaꞈ nyi sheˍ.)

⁹ Nawˬ yonˍ yeˬ ve cawˬ tuˬ leh yehˬ kʼa hkʼaw ve chaw htaꞈ kaꞈ ga piˇ tuˬ coˇ caˇ cawˇ ve yoˬ. Chi ve  nawˬ hkʼaˬ hkʼe te gʼa tuˬ le? Nawˬ Yaˬhoˉvaˬ geh awˬ gʼaˇ gʼa gaˇ ve kʼo, Hkriꞈ yaˇ gʼa te cawˇ ve lehˬ, Liꞈ hpu gʼaw ve, hkʼa dehꞈ dawˇ nyi ve leh hpawnˬ daꞈ˗e ve hkʼaˬ htaˆ kaꞈ gʼa kʼai ve yoˬ. Yoˇhaˍnaˆ awˬ pa leh awˬ viˉ ma Hkriꞈ yaˇ awˬ moˍ hkʼaw tawˆ cheˆ piˇ ve kʼoˆ ve, “Liꞈ hpu hkʼaw ve chaw teˇ hpaˍ ve awˬ lawn Aˍbiˆgeˬlaˆ, Iˉsaˍtaˆ, Yawˇbaˆ, leh Yeˍsuˆ yawˇ hui ve awˬ lawn gʼaw ve htaꞈ ngaˬ dawˇ cawˇ ve yoˬ. Yawˇ hui ve awˬ lawn ngaˬ nyi ma gawˬ lehˍ cawˬ tuˬ te laˇ leh daꞈ ve hpawˇ dawˇ tuˬ kaꞈ te laˇ ve yoˬ. Ngaˬ nyi ma naˬ sheˍ ve htawˇ, yawˇ hui ve awˬ lawn gʼa gʼaw ve kʼo, nyi ma sha tuˬ te laˇ ve yoˬ. Gʼuiˬ sha ve kanˉ hkʼaˇ hkʼaw ve liꞈ hkawˇ VDO na ve ngaˬ dawˇ cawˇ leh chi ngaˬ awˬ gʼaˇ gʼa tuˬ te laˇ ve yoˬ.”

10. Chiˇ mvuh ve liꞈ 32:6-8 hkʼaw ngaˬ hui dawˇ haˍ jaˇ htaˇ hkʼaˬ hkʼe ga laˇ ve le?

¹⁰ Nawˬ nyi ma hkʼaw cawˬ ve awˬ ceuˬ Yaˬhoˉvaˬ htaꞈ kʼoˆ maˍ piˇ sheˍ. Nawˬ dawˇ haˍ jaˇ leh nyi ma hkʼaˬ hkʼe taw luˬ ve htawˇ, bon lawˬ tcuhˉ taˍ sheˍ. Awˬ lawn teˇ hpaˍ Yaˬhoˉvaˬ dawˇ ve hkʼe nawˬ kaꞈ dawˇ tuˬ yawˇ ga laˇ tuˬ lawˬ sheˍ. Leh ‘nawˬ kʼai cawˇ ve yaꞈ kʼaw htaꞈ maˍ laˇ leh, dawˇ hkʼaˇ piˇ laˇ tuˬ’ Gʼuiˬ sha geh lawˬ sheˍ. (Chiˇ mvuh ve 32:6-8 gʼaw sheˍ.) Nawˬ hkʼaˬ hkʼe dawˇ ve awˬ ceuˬ Yaˬhoˉvaˬ htaꞈ kʼoˆ maˍ piˇ htaˇ, nyi ma luˬ jaˇ ve yoˬ hehˉ. Yaꞈ hkʼaˇ, Yaˬhoˉvaˬ nawˬ htaꞈ na gʼa ve tehꞈ shiˍ sheˍ. Yawˇ nawˬ htaꞈ haꞈ jaˇ leh nyi ma hkʼaw cawˬ ve awˬ ceuˬ hkʼa peu˗eˬ kʼoˆ maˍ laˇ tcuh gaˇ ve yoˬ.—Tawˆ kʼai ve 34:6; Chiˇ mvuh ve 62:7, 8.

11. Heˍbrehˇ liꞈ 12:11 hkʼaw kʼoˆ taˍ ve hkʼe, Yaˬhoˉvaˬ maˍ laˇ ve htaꞈ aˬ htoꞈ ma te nawˬ yonˍ cawˇ ve le? (Awˇ ceˍ awˇ fa “ Hkriꞈ yaˇ awˬ moˍ hkʼaw tawˆ cheˆ piˇ ve lehˬ Yaˬhoˉvaˬ haꞈ pehnˇ ve hkʼaw maˍ laˇ ve” htaꞈ nyi sheˍ.)

¹¹ Nyi haꞈ shaˉ paˍ dawˇ cheˆ ve htaꞈ nawˬ haꞈ yuˬ sheˍ. Hkriꞈ yaˇ awˬ moˍ hkʼaw tawˆ cheˆ piˇ ve lehˬ Yaˬhoˉvaˬ haꞈ pehnˇ ve hkʼaw maˍ laˇ leh, teˇ gʼaˇ le le leh, te yaꞈ ve chaw awˬ pon htawˇ awˬ bon cawˬ ve yoˬ. (Heˍbrehˇ 12:11 gʼaw sheˍ.) Nyi haꞈ shaˉ paˍ dawˇ cheˆ ve maˇ cawˇ tehꞈ Hkriꞈ yaˇ awˬ moˍ hkʼaw ve chaw teˇ gʼaˇ gʼaˇ kʼoˆ ve kʼo, awˬ viˉ awˬ nyi oˇ ve teˇ gʼaˇ te yaꞈ ve chaw ve awˬ lawn hkʼa peu˗eˬ maˇ kʼoˆ ve pa taw, yawˇ htaꞈ maˇ daꞈ ve hpawˇ dawˇ ve  hpehꞈ kʼai gʼa ve yoˬ. Ngaˬ hui awˬ lawn hkʼa peu˗eˬ maˇ shiˍ ve tehꞈ tawnˇ taˍ sheˍ. Chi htaꞈ pa taw, nyi haꞈ shaˉ paˍ Liꞈ hpu hkʼaw ve awˬ liˇ awˬ hkʼaˇ htaꞈ gʼaꞈ te leh Yaˬhoˉvaˬ ve awˬ tan dawˇ cheˆ ve pa taw, yawˇ hui dawˇ cheˆ ve htaꞈ ngaˬ hui yonˍ ve daꞈ jaˇ.—2 Raˍsaˍvanˍ 19:6.

12. Chaw teˇ hpaˍ Yaˬhoˉvaˬ maˍ piˇ ve htaꞈ haꞈ yuˬ ve awˬ bon hkʼaˬ hkʼe gʼa ve le?

¹² Nawˬ haꞈ ve chaw Hkriꞈ yaˇ awˬ moˍ hkaw tawˆ cheˆ tuˬ nyi haꞈ shaˉ paˍ dawˇ cheˆ htaˇ, nawˬ kaꞈ yawˇ hui dawˇ cheˆ ve htaꞈ haꞈ yuˬ sheˍ. Nawˬ haꞈ ve chaw Yaˬhoˉvaˬ geh kʼawꞈ la tuˬ nawˬ kaꞈ ga piˇ chehˇ ve yoˬ. Chi awˬ gʼuˇ suhˍ htaˇ kʼoˆ kʼai peuˬ ve Eˇliˇsaˍbeh kʼoˆ ve, “yaˇ htaꞈ maˇ caˉ daꞈ tuˬ haˍ jaˇ. Yaꞈ hkʼaˇ, yaˇ Yaˬhoˉvaˬ geh kʼawꞈ la˗oˬ htaˇ, yawˇ htaꞈ tawˆ cheˆ laˇ ve keunˍ jaˇ tehꞈ dawˇ ve yoˬ. Oˇ ve teˇ yanˇ ngaˬ htaꞈ laiˉ ceuˬ maˍ laˇ ve yoˬ. Yaˬhoˉvaˬ maˍ laˇ ve daꞈ ve tehꞈ ngaˬ kaꞈ shiˍ ve yoˬ.” Eˇliˇsaˍbeh ve awˬ hpawˇ Maˍkuˆ kʼoˆ ve, “yaˇ kʼawꞈ la˗oˬ htaˇ, yaˇ ngaˬ htaꞈ kʼoˆ laˇ ve, yawˇ kʼawꞈ la gaˇ ve teˇ ceuˬ lehˬ ngaˬ pa ngaˬ e Yaˬhoˉvaˬ ve hkawˇ na yuˬ ve pa taw yoˬ. Ngaˬ huiˉ maˬ yawˇ htaꞈ maˇ caˉ daꞈ. Ngaˬ hui hkʼaˬ htaˆ kaꞈ Yaˬhoˉvaˬ hkawˇ na yuˬ tuˬ ga laˇ ve ngaˬ ha lehˬ jaˇ.”

13. Nawˬ nyi ma luˬ htaˇ ga laˇ gʼa ve aˬ htoꞈ ma cawˬ ve le?

¹³ Nawˬ nyi ma luˬ jaˇ htaˇ nawˬ htaꞈ na gʼa ve awˬ chawˇ geh tawˇ yaw daꞈ leh, nawˬ daꞈ ve hpawˇ dawˇ tuˬ leh dawˇ law kuiˬ cawˬ tuˬ ga laˇ gʼa ve awˬ viˉ awˬ nyi geh tawˇ yaw daꞈ sheˍ. (Tawˇ naˉ ve 12:25; 17:17) Chi awˬ gʼuˇ suhˍ htaˇ kʼoˆ kʼai peuˬ ve Yoˇhaˍnaˆ kʼoˆ ve, “awˬ tehˬ kʼo ngaˬ teˇ gʼaˇ tiˉ chehˇ ve tehꞈ dawˇ ve yoˬ. Yaꞈ hkʼaˇ, ngaˬ yonˍ gʼa ve awˬ chawˇ geh tawˇ yaw daꞈ htaˇ, ngaˬ htaꞈ ga laˇ gʼa jaˇ.” Hkʼe te leh, Hkriꞈ yaˇ awˬ moˍ hkʼaw ve chaw nawˬ nyi ma maˇ sha tuˬ teˇ ceuˬ ceuˬ kʼoˆ laˇ ve kʼo, nawˬ hkʼaˬ hkʼe te tuˬ le?

14. Aˬ htoꞈ ma te ngaˬ hui ‘teˇ gʼaˇ leh teˇ gʼaˇ yeunˇ hkanˍ daꞈ leh teˇ gʼaˇ leh teˇ gʼaˇ venˇ baˆ taˍ daꞈ kuiˬ cawˬ kʼo, venˇ baˆ hpehˇ daꞈ’ cawˇ ve le?

¹⁴ Teˇ gʼaˇ le le maˇ biˇ ve chaw hpehꞈ ve pa taw, ngaˬ hui awˬ viˉ awˬ nyi htaꞈ yeunˇ hkanˍ sheˍ. Awˬ viˉ awˬ nyi kʼoˆ ve leh te ve teˇ ceuˬ le le nawˬ dawˇ cawˇ tuˬ hpehꞈ kʼai maˇ gʼa. Awˬ viˉ awˬ nyi teˇ hpaˍ kʼo nawˬ geh aˬ htoꞈ ma tawˇ yaw tuˬ naˍ maˇ shiˍ. Leh teˇ hpaˍ kʼo nawˬ nyi ma naˬ tuˬ yaw laˇ sheˍ ve yoˬ hehˉ. (Yaˍkoˆ 3:2) Pawˇluꞈ kʼoˆ ve, “teˇ gʼaˇ leh teˇ gʼaˇ yeunˇ hkanˍ daꞈ˗oꞈ. Teˇ gʼaˇ leh teˇ gʼaˇ venˇ baˆ taˍ daꞈ kuiˬ cawˬ kʼo, venˇ baˆ hpehˇ daꞈ˗oꞈ.” (Kawˇlawˇsehˇ 3:13) Awˬ viˉ awˬ nyi yaˇ miˇ teˇ gʼaˇ yawˇ ve yaˇ paˍ Hkriꞈ yaˇ awˬ moˍ hkʼaw tawˆ cheˆ piˇ ve kʼoˆ ve, “awˬ viˉ awˬ nyi teˇ hpaˍ ngaˬ htaꞈ awˬ gʼaˇ peꞈ laˇ gaˇ ve htawˇ, yawˇ hkʼaˬ hkʼe kʼoˆ tuˬ awˬ hkʼaˇ maˇ shiˍ. Hkʼe te leh, yawˇ kʼoˆ ve tawˇ ngaˬ nyi ma naˬ tuˬ te laˇ ve yoˬ. Yaꞈ hkʼaˇ, ngaˬ yawˇ hui htaꞈ venˇ baˆ hpehˇ piˇ tuˬ Yaˬhoˉvaˬ ga laˇ ve pa taw, awˬ bon uiˍ jaˇ.” Tawˆ cheˆ piˇ ve chaw ve yehˬ kʼa hkʼaw ve chaw htaꞈ awˬ viˉ awˬ nyi hkʼaˬ hkʼe ga piˇ gʼa ve htaꞈ teˇ geh nyi sheˍ.

15. Tawˆ cheˆ piˇ gehˇ sheˍ ve yehˬ kʼa hkʼaw ve chaw htaꞈ ngaˬ hui hkʼaˬ hkʼe ga piˇ gʼa tuˬ le?

¹⁵ Hkriꞈ yaˇ awˬ moˍ hkʼaw tawˆ cheˆ piˇ ve yehˬ kʼa hkʼaw ve chaw htaꞈ haꞈ yuˬ piˇ sheˍ. Yawˇ hui htaꞈ haꞈ piˇ leh awˬ chawˇ te piˇ sheˍ. Awˬ viˉ awˬ nyi Me˗riˆ awˬ nyi paˍ Hkriꞈ yaˇ awˬ moˍ hkʼaw tawˆ cheˆ piˇ ve yoˬ. Awˉ lawˉ htaˇ hpawnˬ daꞈ˗e ve yawˇ dawˇ maˇ jaˇ. Yawˇ kʼoˆ ve, “awˬ lawn chi htaꞈ awˬ viˉ awˬ  nyi maˇ daꞈ ve hpawˇ kʼoˆ la ve htaꞈ ngaˬ kawˆ jaˇ. Yaꞈ hkʼaˇ, ngaˬ hpawnˬ daꞈ˗e htaˇ, awˬ viˉ awˬ nyi laiˉ gʼaˇ ngaˬ htaꞈ awˬ chawˇ te laˇ leh ngaˬ geh teˇ geh nyi ma luˬ ve yoˬ. Yawˇ hui ngaˬ nyi paˍ htaꞈ maˇ beuꞈ leh maˇ daꞈ ve hpawˇ maˇ kʼoˆ. Yawˇ hui ngaˬ htaꞈ maˇ baˬ taˉ la ve awˬ bom uiˍ jaˇ.” Awˬ viˉ awˬ nyi yaˇ miˇ teˇ gʼaˇ kʼawꞈ kʼoˆ ve, “ngaˬ hui ve yaˇ paˍ Hkriꞈ yaˇ awˬ moˍ hkʼaw tawˆ cheˆ piˇ htaˇ, awˬ chawˇ laiˉ gʼaˇ ngaˬ htaꞈ awˬ gʼaˇ peꞈ laˇ ve yoˬ. Laiˉ gʼaˇ ngaˬ hui htaꞈ aˬ htoꞈ ma kʼoˆ laˇ tuˬ maˇ shiˍ ve htawˇ, yawˇ hui ngaˬ geh teˇ geh hawˬ ve yoˬ. Teˇ hpaˍ kʼo ngaˬ htaꞈ liꞈ bvuhꞈ laˇ ve yoˬ. Yawˇ hui ngaˬ htaꞈ ga laˇ gʼa jaˇ!”

16. Tawˆ cheˆ piˇ taˍ ve chaw ve yehˬ kʼa hkʼaw ve chaw htaꞈ awˬ viˉ awˬ nyi caˉ leh hkʼaˬ hkʼe ga piˇ gʼa tuˬ le?

¹⁶ Tawˆ cheˆ piˇ taˍ ve chaw ve yehˬ kʼa hkʼaw ve chaw htaꞈ nawˬ haꞈ piˇ ve, awˬ gʼaˇ piˇ ve, leh ga piˇ sheˍ. (Heˍbrehˇ 10:24, 25) Teˇ pawˆ pawˆ yawˇ hui dawˇ ve Hkriꞈ yaˇ awˬ moˍ hkʼaw ve awˬ viˉ awˬ nyi a yeˇ maˇ yuˬ laˇ ve, maˇ heˆ leh tawˇ maˇ yaw laˇ ve tehꞈ yawˇ hui dawˇ ve yoˬ. Yaꞈ hkʼaˇ, awˬ lawn chi hkʼe ve taˇ cawˬ tcuh. Nawˬ chehˇ ve Hkriꞈ yaˇ awˬ moˍ hkʼaw yaˇ ehˉ leh yaˇ nehˬ awˬ pa awˬ e htaꞈ tawˆ cheˆ piˇ ve cawˬ ve kʼo, nawˬ yawˇ hui htaꞈ chiˇ mvuh piˇ leh awˬ gʼaˇ piˇ sheˍ. Maˍriˆ ve awˬ hpawˇ Hkriꞈ yaˇ awˬ moˍ hkʼaw tawˆ cheˆ piˇ leh yehˬ kʼa htaꞈ baˬ taˉ ve yoˬ. Yawˇ kʼoˆ ve, “awˬ chawˇ ngaˬ ve aˉ hkʼaw laˬ leh awˬ chiˇ te laˇ ve, yaˇ htaꞈ kaꞈ Liꞈ hpu gʼa maˍ laˇ ve, yawˇ hui ngaˬ ve dawˇ hkʼaˇ htaꞈ na gʼa leh ngaˬ geh teˇ geh hawˬ ve yoˬ. Ngaˬ htaꞈ maˇ daꞈ ve chaw kʼoˆ ve cawˬ htaˇ, yawˇ hui ga laˇ ve yoˬ. Chi ngaˬ awˬ gʼaˇ ga jaˇ!”—Roˉmaꞈ 12:13, 15.

17. Tawˆ cheˆ piˇ taˍ ve yehˬ kʼa hkʼaw ve chaw htaꞈ nyi haꞈ shaˉ paˍ awˬ gʼaˇ hkʼaˬ hkʼe piˇ gʼa tuˬ le?

¹⁷ Nyi haꞈ shaˉ paˍ˗oˬ, tawˆ cheˆ piˇ taˍ ve yehˬ kʼa hkʼaw ve chaw htaꞈ nawˬ awˬ gʼaˇ piˇ gʼa ve hkʼe piˇ sheˍ. Chi lehˬ nawˬ ve awˬ vuiˬ hpehꞈ ve yoˬ. (1 Hteˇsaˍlawˇniˆ 5:14) Nawˬ yawˇ hui geh tawˇ ca yaw daꞈ˗e cawˇ ve yoˬ. Hpawnˬ daꞈ ve maˇ tanˬ sheˍ htaˇ leh hpawnˬ daꞈ ve hpehˇ peuˬ hkʼawꞈ nawˉ, nawˬ yawˇ hui htaꞈ awˬ gʼaˇ piˇ cawˇ ve yoˬ. Nawˬ yawˇ hui ve aˉ hkʼaw kʼai leh teˇ geh bon lawˬ cawˇ ve yoˬ. Gʼuiˬ sha ve kanˉ teˇ geh te tuˬ jehˬ piˇ ve, maˇ heˆ leh nawˬ ve yehˬ kʼa hkʼaw oˉ kʼoˍ pui htaˇ yawˇ hui htaꞈ kaꞈ jehˬ piˇ gʼa ve yoˬ. Nyi haꞈ shaˉ paˍ lehˬ Yaˬhoˉvaˬ ve yawˬ hawˉ shehˍ hpaˇ hpehꞈ ve, tawˆ cheˆ piˇ taˍ ve yehˬ kʼa hkʼaw ve chaw htaꞈ nawˬ haꞈ piˇ ve, ha kʼaˉ piˇ leh a yeˇ yuˬ piˇ sheˍ.—1 Hteˇsaˍlawˇniˆ 2:7, 8.

18. 2 Peˍtruˆ liꞈ 3:9 hkʼaw kʼoˆ taˍ ve hkʼe, te yaꞈ ve chaw htaꞈ Gʼuiˬ sha hkʼaˬ hkʼe te tcuh gaˇ ve le?

¹⁸ Yaˬhoˉvaˬ lehˬ, “chaw hkʼa peu˗eˬ venˇ baˆ htaꞈ dawˇ hpfuhˆ leh teˇ gʼaˇ kaꞈ maˇ gʼa luˬ kʼai tuˬ yawˇ heuˆ gaˇ ve” yoˬ (2 Peˍtruˆ 3:9 gʼaw sheˍ.) Chaw teˇ gʼaˇ venˇ baˆ uiˍ jaˇ ve htaꞈ te yaꞈ ve htawˇ, yawˇ ve a shaꞈ Yaˬhoˉvaˬ awˬ pon awˬ hpfuhˇ hkʼaˆ jaˇ sheˍ. Gʼuiˬ sha ve Yaˇ paˍ awˬ hpfuhˇ hkʼaˆ jaˇ ve htaiˍ hkʼawꞈ laˇ tcuh ve htaꞈ ngaˬ hui mawˬ gʼa ve yoˬ. Venˇ baˆ te yaꞈ ve chaw Yaˬhoˉvaˬ geh kʼawꞈ kʼawꞈ la tuˬ, yawˇ coˇ caˇ leh ga piˇ ve, leh yawˇ kaꞈ yawˇ hui htaꞈ dawˇ law chehˇ sheˍ. Yaˇ paˍ mehˉ kʼai ve awˬ lawn Yeˍsuˆ tawˇ pa haˉ tehˆ maˍ laˇ ve htaꞈ ngaˬ hui mawˬ gʼa ve yoˬ. (Luˉkaꞈ 15:11-32) Chaw teˇ hpaˍ Yaˬhoˉvaˬ htaꞈ baˬ taˉ ve kʼawꞈ la leh Hkriꞈ yaˇ awˬ moˍ hkʼaw ve awˬ viˉ awˬ nyi kaꞈ yawˇ htaꞈ ha lehˬ ha kʼa haꞈ yuˬ piˇ ve yoˬ. Chi awˬ gʼuˇ suhˍ htaˇ kʼoˆ kʼai peuˬ ve Eˇliˇsaˍbeh kaꞈ yawˇ ve yaˇ paˍ Hkriꞈ yaˇ awˬ moˍ hkʼaw kʼawꞈ kʼawꞈ la htaˇ ha lehˬ jaˇ. Yawˇ kʼoˆ ve, “awˬ viˉ awˬ nyi laiˉ gʼaˇ ngaˬ htaꞈ awˬ gʼaˇ peꞈ laˇ leh dawˇ law kuiˬ cawˬ tuˬ ga laˇ ve awˬ bon uiˍ jaˇ.”

19. Aˬ htoꞈ ma te ngaˬ hui hkʼaˬ htaˆ kaꞈ Yaˬhoˉvaˬ htaꞈ gʼaˇ va gʼa ve le?

¹⁹ Ngaˬ hui hkʼaˬ htaˆ kaꞈ Yaˬhoˉvaˬ htaꞈ gʼaˇ va gʼa ve yoˬ. Yaˬhoˉvaˬ ngaˬ hui htaꞈ te tcuh laˇ ve teˇ ceuˬ le le ngaˬ hui awˬ pon daꞈ jaˇ. Yaˬhoˉvaˬ htaꞈ oˉ kʼoˍ pui ve chaw teˇ gʼaˇ le le htaꞈ yawˇ haꞈ leh ha kʼaˉ ve yoˬ. Nawˬ dawˇ haˍ leh nyi ma luˬ htaˇ, Yaˬhoˉvaˬ nawˬ htaꞈ baˬ taˉ laˇ tuˬ awˬ nyi maˇ cawˬ tehꞈ yonˍ sheˍ. (Heˍbrehˇ 13:5, 6) Chi awˬ gʼuˇ suhˍ htaˇ kʼoˆ kʼai peuˬ ve Maˍkuˆ kʼoˆ ve, “Yaˬhoˉvaˬ ngaˬ hui htaꞈ maˇ baˬ taˉ laˇ jaw. Ngaˬ hui nyi ma luˬ tuˬ te laˇ ve awˬ lawn cawˬ htaˇ, yawˇ ngaˬ hui awˬ paˇ lo chehˇ leh hkʼaˬ htaˆ kaꞈ ga laˇ ve yoˬ.” Yaˬhoˉvaˬ lehˬ, “uiˍ jaˇ daꞈ jaˇ ve” awˬ gʼaˇ peꞈ laˇ gʼa ve tehꞈ nawˬ yonˍ gʼa ve yoˬ. (2 Kawˇrenˍhtuˆ 4:7) Chi htaꞈ pa taw, nawˬ haꞈ ve chaw Yaˬhoˉvaˬ htaꞈ baˬ taˉ htaˇ, nawˬ ka tiꞈ yeˬ leh dawˇ law chehˇ taˍ sheˍ.