Miˬ guiˬ chi awˬ leh meuˇ gaˬ la paˇ neˇ˗oˬ laˇ?
Miˬ guiˬ chi awˬ leh meuˇ gaˬ la paˇ neˇ ve awˬ lawn Liꞈ hpu hkʼaw kʼoˆ taˍ ve nawˬ gʼa kaˇ jaw ve yoˬ hehˉ. (1 Yoˇhanˬ 2:17) Miˬ guiˬ chi hkʼoˆ lo chaw yaˇ maˇ kʼawꞈ cawˬ˗o ve htaꞈ kʼoˆ gaˇ ve laˇ? Miˬ guiˬ chi hkʼoˆ lo a shaꞈ teꞈ ve awˬ ceuˬ maˇ cawˬ˗o ve maˇ heˆ leh miˬ guiˬ htaꞈ te luˬ tuˬ ve htaꞈ kʼoˆ gaˇ ve laˇ?
Liꞈ hpu hkʼaw chi hkʼe maˇ gʼa kʼoˆ maˍ laˇ taˍ
Aˬ htoꞈ ma cawˬ tuˬ sheˍ ve le?
Chaw yaˇ
Liꞈ hpu hkʼaw kʼoˆ laˇ ve, Gʼuiˬ sha “miˬ guiˬ htaꞈ htawˇ te hpanˍ taˍ leh, co co taiˍ taiˍ yeˬ chehˇ piˇ lawˬ ve yoˬ. Yawˇ lehˬ miˬ guiˬ chi htaꞈ shehˇ de lonˉ hpehꞈ piˇ ve maˇ heˆ. Chaw yaˇ teˇ hpaˍ ve chehˇ kuiˬ hpehꞈ la piˇ taˍ ve yoˬ.”—Iˉsaˍyaˆ 45:18.
Miˬ guiˬ
Liꞈ hpu hkʼaw kʼoˆ ve, “chaw yaˇ teˇ co peuˬ teˇ co mehˉ kʼai chehˇ ve yoˬ. Yaꞈ hkʼaˇ, miˬ guiˬ chi lehˬ hkʼaˬ htaˆ kaꞈ hkʼa shuˍ hpehꞈ chehˇ ve yoˬ.”—Cuˇ yiˍ piˇ ve 1:4.
Tcuhˉ kuiˬ: Liꞈ hpu hkʼaw kʼoˆ taˍ ve hkʼe, miˬ guiˬ htaꞈ te luˬ tuˬ awˬ nyi maˇ cawˬ leh co co taiˍ taiˍ chaw yaˇ chehˇ kuiˬ hpehꞈ ve yoˬ. Hkʼe kʼo, miˬ guiˬ awˬ leh meuˇ gaˬ la paˇ neˇ ve yoˬ tehꞈ kʼoˆ ve, hkʼaˬ hkʼe kʼoˆ gaˇ ve le?
Dawˇ nyi sheˍ: Liꞈ hpu lehˬ Noˉaꞈ ve awˬ co˗e leh miˬ guiˬ awˬ leh meuˇ gaˬ la paˇ neˇ ve awˬ yanˇ htaꞈ tehˆ taˍ ve yoˬ. Oˇ ve teˇ yanˇ chaw yaˇ haiˬ jaˇ. (Awˬ hkuiˉ puiˍ 6:13) Yaꞈ hkʼaˇ, Noˉaꞈ daꞈ ve chaw hpehꞈ ve pa taw, Gʼuiˬ sha lehˬ yawˇ leh yawˇ ve yehˬ kʼa htaꞈ haꞈ shaˉ piˇ ve yoˬ. Gʼuiˬ sha lehˬ haiˬ ve chaw htaꞈ te luˬ tuˬ miˬ guiˬ hkʼoˆ iˉ kaꞈ htonˍ tcuh ve yoˬ. Oˇ ve teˇ yanˇ htaꞈ caˉ daꞈ ve awˬ lawn Liꞈ hpu hkʼaw kʼoˆ ve, “oˇ htaˇ, miˬ guiˬ htaꞈ iˉ kaˆ htonˍ piˇ leh, chaw yaˇ hui htaꞈ te luˬ te sheˆ piˇ ve yoˬ.” (2 Peˍtruˆ 3:6) Chi lehˬ oˇ htaˇ teˇ co˗e ve awˬ leh meuˇ hpehꞈ ve yoˬ. Miˬ guiˬ htaꞈ te luˬ ve maˇ heˆ. Haiˬ ve chaw htaꞈ te luˬ piˇ ve tehꞈ ngaˬ hui shiˍ ve yoˬ. Chi htaꞈ pa taw, Liꞈ hpu hkʼaw miˬ guiˬ awˬ leh meuˇ ve awˬ yanˇ htaꞈ kʼoˆ htaˇ, miˬ guiˬ chi htaꞈ te luˬ ve tehꞈ kʼoˆ gaˇ ve maˇ heˆ. Yaꞈ hkʼaˇ, miˬ guiˬ hkʼoˆ lo haiˬ jaˇ ve chaw leh chaw yaˇ te taˍ ve kanˉ hkʼaˇ teˇ hpaˍ htaꞈ te luˬ piˇ ve tehꞈ kʼoˆ gaˇ ve yoˬ.
Aˬ htoꞈ ma mehˉ kʼai tuˬ le?
Shoꞈ shaꞈ ve leh haiˬ ve
Liꞈ hpu hkʼaw kʼoˆ ve, “haiˬ ve chaw teˇ hpaˍ lehˬ, teˇ hkui tiˉ mehˉ kʼai tuˬ yoˬ. Nawˬ yawˇ hui htaꞈ ca nyi ve htawˇ mawˬ tuˬ ve maˇ heˆ. Yaꞈ hkʼaˇ, nyi ma nuˇ nehˬ ve chaw hui lehˬ, mvuhˇ miˬ hkʼaw lo gawˬ lehˍ gʼa chehˇ leh, uiˍ la daꞈ la tuˬ yoˬ.”—Chiˇ mvuh ve 37:10, 11.
Tcuhˉ kuiˬ: Noˉaꞈ ve awˬ co˗e htaˇ, iˉ kaˆ htonˍ ve lehˬ haiˬ ve awˬ ceuˬ co co taiˍ taiˍ mehˉ kʼai tuˬ te piˇ ve maˇ heˆ. Awˬ lawn kʼo, peuˬ hkʼawꞈ nawˉ kaꞈ haiˬ ve chaw kʼawꞈ cawˬ la leh awˬ nu ve chaw htaꞈ shoꞈ shaꞈ tuˬ te piˇ ve yoˬ. Chiˇ mvuh ve liꞈ bvuhꞈ paˍ kʼoˆ ve, “haiˬ ve chaw teˇ hpaˍ lehˬ teˇ hkui tiˉ mehˉ kʼai tuˬ yoˬ.” Leh maˇ maw ve awˬ yanˇ hkʼaw chi hkʼe te tuˬ yoˬ. Gʼuiˬ sha yawˇ ve mvuhˇ miˬ htaꞈ cuˇ leh haiˬ ve hkʼa peu˗eˬ htaꞈ te luˬ piˇ tuˬ yoˬ. Mvuhˇ miˬ chi mvuhˇ naw ma hkʼoˆ lo cawˬ leh na yuˬ ve chaw teˇ hpaˍ htaꞈ uˉ peunˍ tuˬ yoˬ.
Dawˇ nyi sheˍ: Miˬ guiˬ hkʼoˆ lo ve uˉ peunˍ paˍ teˇ hpaˍ Gʼuiˬ sha ve mvuhˇ miˬ hpawˇ chehˇ tuˬ laˇ? Liꞈ hpu hkʼaw kʼoˆ ve, yawˇ hui maˇ chehˇ taˬ. Yawˇ hui Gʼuiˬ sha ve mvuhˇ miˬ htaꞈ hpfuhˆ tuˬ yoˬ. Yaꞈ hkʼaˇ, te maˇ gʼa. (Chiˇ mvuh ve 2:2) Leh hkʼaˬ hkʼe hpehꞈ la tuˬ le? Gʼuiˬ sha ve mvuhˇ miˬ lehˬ, chaw yaˇ uˉ peunˍ ve hkʼa peu˗eˬ awˬ tanˬ uˉ peunˍ leh Gʼuiˬ sha ve mvuhˇ miˬ ceh tiˉ leuˉ taˉ tuˬ yoˬ. (Daˍyeˍlaˆ 2:44) Aˬ htoꞈ ma pa taw, chaw yaˇ uˉ peunˍ ve htaꞈ te luˬ cawˇ ve le?
Ngaˬ hui—Chaw yaˇ uˉ peunˍ ve maˇ kʼawꞈ cawˬ tcuh gaˇ
Liꞈ hpu hkʼaw kʼoˆ ve, “awˬ gʼuˇ suhˍ hpawˇ hkʼaˬ hkʼe hpehꞈ la tuˬ ve htaꞈ chaw teˇ gʼaˇ kaꞈ shiˍ maˇ hpehꞈ ve htaꞈ ngaˬ shiˍ taˍ ve yoˬ. Chaw yaˇ lehˬ, a shu yawˇ ve a shaꞈ htaꞈ haꞈ shaˉ maˇ gʼa.”—Yeˍraˍmiˆ 10:23.
Tcuhˉ kuiˬ: Chaw yaˇ a shu yawˇ hkʼaˇ yawˇ uˉ peunˍ tuˬ hpanˍ taˍ ve maˇ heˆ. A shu yawˇ hkʼaˇ yawˇ uˉ peunˍ ve lehˬ shoꞈ shaꞈ ve tiˉ cawˬ leh shoꞈ shaꞈ ve htaꞈ teꞈ chiˉ kaꞈ gu maˇ gʼa.
Dawˇ nyi sheˍ: Chaˬ nyi tehˆ nyi taˍ ve liꞈ kʼoˆ teˇ kʼoˆ hkʼaw kʼoˆ ve, chaw yaˇ uˉ peunˍ ve lehˬ “haˍ ve gʼawˇ ve, meuꞈ ve kaˆ ve, naˬ ve gawˬ ve, miˬ hiˆ ve, mvuhˇ yeˬ mvuhˇ haw lonˉ, maꞈ te daꞈ ve leh haiˬ ve awˬ ceuˬ” chi ve teˇ hpaˍ htaꞈ gu laˇ maˇ gʼa. Liꞈ kʼoˆ chi hkʼaw kʼoˆ sheˍ ve, “Gʼuiˬ sha ve mvuhˇ miˬ ceh tiˉ chaw yaˇ shoꞈ shaꞈ ve hkʼa peu˗eˬ gu laˇ gʼa ve tehꞈ chaw teˇ hpaˍ yonˍ ve yoˬ.” Chaw yaˇ uˉ peunˍ ve hkʼa peu˗eˬ pawnˇ daꞈ ve htawˇ, maˇ biˇ ve chaw yaˇ uˉ peunˍ ve lehˬ shoꞈ shaꞈ ve htaꞈ gu maˇ gʼa. Gʼuiˬ sha ve mvuhˇ miˬ ceh tiˉ shoꞈ shaꞈ ve hkʼa peu˗eˬ htaꞈ gu laˇ gʼa ve yoˬ.
Chi htaꞈ pa taw, Liꞈ hpu hkʼaw kʼoˆ taˍ ve hkʼe, miˬ guiˬ awˬ leh meuˇ gaˬ la paˇ neˇ ve lehˬ, miˬ guiˬ hkʼoˆ lo ve haiˬ ve awˬ ceuˬ hkʼa peu˗eˬ mehˉ kʼai tuˬ yoˬ. Daꞈ ve chaw kawˆ tuˬ maˇ loˍ. Chi lehˬ ngaˬ hui law chehˇ ve awˬ ceuˬ hpehꞈ ve yoˬ. Awˬ lawn kʼo, haiˬ ve miˬ guiˬ htaꞈ te luˬ leh Gʼuiˬ sha ve miˬ guiˬ awˬ suhˉ cawˬ la htaˇ, dawˇ sha gawˬ lehˍ ve ceh tiˉ cawˬ tuˬ yoˬ!
Chi hkʼaˬ htaˆ hpehꞈ la tuˬ le? Gʼuˇ suhˍ teˇ lawn hkʼaw Liꞈ hpu htaꞈ cuˇ leh hkʼawꞈ laˇ tuˬ yoˬ.
