Maˇ maw ve awˬ yanˇ Gʼuiˬ sha ve mvuhˇ miˬ uˉ peunˍ la htaˇ, miˬ guiˬ hkʼoˆ ve chaw yaˇ ha lehˬ ve cawˬ leh, chaw yaˇ teˇ moˍ tiˉ hpehꞈ leh yawˇ hui dawˇ cawˇ ve kanˉ htaꞈ gʼa te tuˬ yoˬ. Gʼuiˬ sha lehˬ Yeˍsuˆ Hkriꞈ htaꞈ leuˆ yuˬ leh miˬ guiˬ hkʼoˆ uˉ peunˍ tcuh ve yoˬ. Yeˍsuˆ lehˬ, chi beuꞈ teˇ co˗e ve miˬ guiˬ hkʼoˆ lo ve uˉ peunˍ paˍ htaꞈ maˇ shuˍ. Yeˍsuˆ lehˬ yawˇ uˉ peunˍ ve awˬ hawˉ lo chehˇ ve chaw htaꞈ haꞈ leh yawˇ hui awˬ pon dawˇ nyi piˇ puiˉ jaˇ ve yoˬ. Yawˇ lehˬ nyi ma daꞈ jaˇ ve, ha kʼaˉ puiˉ jaˇ ve, leh hteˇ ve cawˇ ve Jawˇmawˇ hpehꞈ ve yoˬ.—Iˉsaˍyaˆ 11:4.

Miˬ guiˬ awˬ suhˉ hkʼaw mvuhˇ miˬ leh chaw ceuˬ pehˬ daꞈ ve kaꞈ maˇ cawˬ. Teˇ gʼaˇ le le cawˇ daꞈ hawˍ daꞈ tuˬ yoˬ. (Hpeuꞈ maˍ ve 7:9, 10) Oˇ ve teˇ yanˇ teˇ gʼaˇ le le Gʼuiˬ sha htaꞈ haꞈ leh teˇ gʼaˇ leh teˇ gʼaˇ kaꞈ haꞈ daꞈ tuˬ yoˬ. Gʼuiˬ sha dawˇ teh taˍ ve hkʼe miˬ guiˬ hkʼoˆ dawˇ sha gawˬ lehˍ ve cawˬ tuˬ, yawˇ hui ga daꞈ tuˬ yoˬ. Leh yawˇ hui miˬ guiˬ daꞈ la tuˬ te tuˬ yoˬ.—Chiˇ mvuh ve 115:16.

Yaˬhoˉvaˬ ve mvuhˇ miˬ miˬ guiˬ hkʼoˆ uˉ peunˍ la htaˇ, hpanˍ shehˍ hpaˇ Gʼuiˬ sha lehˬ hkʼaˬ htaˆ kaꞈ mvuhˇ haw shaˉ daꞈ ve cawˬ tcuh leh teˇ ceuˬ le le awˬ yanˇ cawˇ cawˇ cawˬ tcuh tuˬ yoˬ. (Chiˇ mvuh ve 24:1, 2) Yeˍsuˆ miˬ guiˬ hkʼoˆ chehˇ htaˇ, Yeˍsuˆ Gʼuiˬ sha ve kanˇ paˆ htaꞈ hpeuꞈ maw laˇ peuˬ˗oˬ ve yoˬ. Tawˇ pa haˉ te kʼo, Yeˍsuˆ mvuhˇ yeˬ mvuhˇ haw lonˉ htaꞈ jehˇ tcuh gʼa ve yoˬ. (Maˍkuˆ 4:39, 41) Yeˍsuˆ miˬ guiˬ hkʼoˆ uˉ peunˍ la htaˇ, miˬ hiˆ ve, mvuhˇ yeˬ mvuhˇ haw lonˉ chi ve teˇ hpaˍ maˇ kʼawꞈ cawˬ˗o. Gʼuiˬ sha ve mvuhˇ miˬ lehˬ chaw yaˇ leh suhˆ cehˬ hawˆ cehˬ keunˍ daꞈ ve hkʼaw cawˬ tcuh laˇ tuˬ yoˬ.—Hawˇseˍ 2:18.

Teˇ gʼaˇ le le maˇ naˬ maˇ gawˬ leh mawˇ ve leh suh ve kaꞈ maˇ cawˬ. (Iˉsaˍyaˆ 35:5, 6) Chaw yaˇ awˉ lawˉ teˇ ca Eˍdenˍ hko hkʼaw chehˇ jaw ve hkʼa shuˍ, chaw yaˇ teˇ gʼaˇ le le daꞈ jaˇ ve miˬ guiˬ chi hkʼoˆ lo gʼa chehˇ tuˬ yoˬ. Miˬ guiˬ awˬ suhˉ hkʼaw suhˆ cehˬ teˇ hpaˍ kaꞈ awˬ shiˍ awˬ nu hkʼa biˇ nawꞈ leh miˬ guiˬ hkʼoˆ lo caˇ tuˬ hkʼa biˇ cawˬ tuˬ yoˬ. (Awˬ hkuiˉ puiˍ 2:9) Oˇ htaˇ teˇ co˗e Gʼuiˬ sha ve chaw hkʼa shuˍ, miˬ guiˬ awˬ suhˉ hkʼaw chehˇ ve chaw teˇ gʼaˇ le le hkʼa bvuhˆ gʼa caˇ gʼa dawˬ tuˬ yoˬ.—Oˉ kʼoˍ pui ve 26:4, 5.

Gʼuiˬ sha uˉ peunˍ ve awˬ hawˉ lo chehˇ ve chaw teˇ gʼaˇ le le dawˇ sha gawˬ lehˍ ve leh hteˇ ve cawˇ ve gʼa tuˬ yoˬ. Teˇ gʼaˇ leh teˇ gʼaˇ daꞈ ve te piˇ daꞈ tuˬ yoˬ. Maꞈ te daꞈ ve maˇ cawˬ, haiˬ ve hpawˇ kanˇ paˆ yehˇ ve kaꞈ maˇ cawˬ, chaw teˇ gʼaˇ kaꞈ ca caˇ ca dawˬ ve hpawˇ tuꞈ ve hkanˍ ve maˇ gʼa hpuˇ˗o. Liꞈ hpu hkʼaw ka tiꞈ te taˍ laˇ ve, “chaw teˇ gʼaˇ le le a shu yawˇ ve a pehˉ meuˇ hko leh, maˉ nawˆ hko hkʼaw gawˬ lehˍ gʼa chehˇ leh, chaw teˇ gʼaˇ kaꞈ yawˇ hui htaꞈ kawˆ tuˬ te piˇ tuˬ ve maˇ heˆ.”—Miˆhkaˍ 4:3, 4.

Teˇ gʼaˇ le le a shu yawˇ ve yehˬ cawˬ leh chehˇ kuiˬ maˇ cawˬ ve htaꞈ kawˆ tuˬ maˇ loˍ. Leh ha lehˬ jaˇ ve kanˉ htaꞈ gʼa te tuˬ yoˬ. Liꞈ hpu hkʼaw kʼoˆ ve, miˬ guiˬ awˬ suhˉ hkʼaw “a shu yawˇ te taˍ ve kanˉ awˬ hkʼaw lo gʼa ha lehˬ chehˇ tuˬ yoˬ.”—Iˉsaˍyaˆ 65:21-23.

Liꞈ hpu hkʼaw kʼoˆ ve, “mvuhˇ miˬ hkʼaw lo Gʼuiˬ sha htaꞈ shiˍ ve cuˇ yiˍ biˇ chehˇ taˍ tuˬ yoˬ.” (Iˉsaˍyaˆ 11:9) Gʼuiˬ sha uˉ peunˍ ve awˬ hawˉ lo chehˇ ve chaw yawˇ ve cuˇ yiˍ hkʼa biˇ gʼa henˇ tuˬ yoˬ. Leh Gʼuiˬ sha hpanˍ taˍ ve awˬ ceuˬ teˇ hpaˍ htaꞈ kaꞈ gʼa henˇ tuˬ yoˬ. Yawˇ hui a shu yawˇ ve cuˇ yiˍ htaꞈ yehˇ leh maꞈ te daꞈ tuˬ ve laꞈ caˉ leh kawˆ tuˬ cawˬ ve awˬ ceuˬ htaꞈ maˇ te˗o. (Iˉsaˍyaˆ 2:4) Yawˇ hui dawˇ sha gawˬ lehˍ ve hkʼaw teˇ geh chehˇ tuˬ ve awˬ hkʼaˇ leh miˬ guiˬ htaꞈ haꞈ shaˉ tuˬ ve awˬ hkʼaˇ gʼa henˇ tuˬ yoˬ.—Chiˇ mvuh ve 37:11.

Ngaˬ hui teˇ nyi le le a shaꞈ teꞈ ve hkʼaw ha lehˬ ve cawˬ tuˬ, Gʼuiˬ sha miˬ guiˬ htaꞈ gu teh taˍ laˇ ve yoˬ. Awˉ lawˉ htaˇ Gʼuiˬ sha dawˇ law taˍ ve hkʼa shuˍ, Gʼuiˬ sha lehˬ miˬ guiˬ chi hkʼoˆ lo chaw yaˇ htaꞈ co co taiˍ taiˍ chehˇ tcuh tuˬ yoˬ. (Chiˇ mvuh ve 37:29; Iˉsaˍyaˆ 45:18) Chi awˬ tehˬ hpehꞈ la tuˬ “Gʼuiˬ sha lehˬ suh ve teˇ ceuˬ htaꞈ co co taiˍ taiˍ te luˬ te sheˆ piˇ tuˬ yoˬ.” (Iˉsaˍyaˆ 25:8) Liꞈ hpu hkʼaw kʼoˆ ve, “suh ve teˇ ceuˬ maˇ kʼawꞈ cawˬ. Dawˇ haˍ ve, paˆ hawˬ ve, naˬ ve, awˬ ceuˬ chi teˇ hpaˍ htawˇ maˇ kʼawꞈ cawˬ.” (Hpeuꞈ maˍ ve 21:4) Haiˬ ve miˬ guiˬ chi hkʼoˆ lo gʼa ponˬ ve chaw leh miˬ guiˬ awˬ suhˉ hkʼaw Gʼuiˬ sha kʼawꞈ teꞈ tu laˇ piˇ ve chaw, yawˇ hui teˇ gʼaˇ le le co co taiˍ taiˍ a shaꞈ gʼa teꞈ chehˇ tuˬ yoˬ.—Yoˇhanˬ 5:28, 29; Tcuh yaˇ 24:15.

 Chi teˇ hkui laiˉ lanˬ gʼaˇ Gʼuiˬ sha ve mvuhˇ miˬ uˉ peunˍ ve awˬ hawˉ lo chehˇ tuˬ gu hehnˇ chehˇ ve leh awˬ yanˇ chi ve gaˬ la paˇ neˇ jaˇ˗oˬ. Yawˇ hui maˇ biˇ ve chaw hpehꞈ chehˇ sheˍ ve htawˇ, yawˇ hui miˬ guiˬ awˬ suhˉ hkʼaw gʼa chehˇ tuˬ, Gʼuiˬ sha te tcuh gaˇ ve hkʼe yawˇ hui coˇ caˇ leh te chehˇ ve yoˬ. Yawˇ hui chi hkʼe te gʼa tuˬ Yaˬhoˉvaˬ leh Yeˍsuˆ Hkriꞈ htaꞈ caˉ daꞈ ve awˬ lawn henˇ ve yoˬ.—Yoˇhanˬ 17:3.

Miˬ guiˬ awˬ leh meuˇ ve awˬ yanˇ htaꞈ ponˬ tuˬ hkʼaˬ hkʼe gʼa te ve le? Leh gaˬ la chehˇ ve daꞈ jaˇ ve miˬ guiˬ awˬ suhˉ hkʼaw gʼa chehˇ tuˬ, hkʼaˬ hkʼe gʼa te ve le? Chi ve teˇ hpaˍ htaꞈ nawˬ shiˍ gaˇ ve kʼo, Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ lawˬ g’a ve yoˬ. Liꞈ hpu henˇ htaˇ Nawˬ ve a shaꞈ co co taiˍ taiˍ ha lehˬ g’a ve! liꞈ k’oˆ yehˇ ve yoˬ..