“Hkʼe te leh, awˬ nyi htaꞈ maˇ kʼoˆ, awˬ yanˇ htaꞈ maˇ kʼoˆ, nawˬ hui maˇ shiˍ ve pa taw hkʼa dehꞈ shaw taˍ˗oꞈ.”—Maꞈhtehˍ 25:13.

“Awˬ yanˇ oˇ ve hkʼaˬ htaˆ gaˬ la tuˬ ve htaꞈ nawˬ hui maˇ shiˍ ve pa taw, shaˍ tiꞈ te leh shaw taˍ˗oꞈ.”—Maˍkuˆ 13:33.

Chi htaꞈ pa taw, miˬ guiˬ awˬ leh meuˇ ve awˬ yanˇ hkʼaˬ ve teˇ nyi gaˬ la tuˬ ve htaꞈ chaw teˇ gʼaˇ kaꞈ maˇ shiˍ. Yaꞈ hkʼaˇ, Gʼuiˬ sha lehˬ “awˬ nyi awˬ haˉ oˇ ve” htaꞈ shiˍ ve yoˬ. (Maꞈhtehˍ 24:36) Chi kʼoˆ gaˇ ve lehˬ awˬ leh meuˇ ve awˬ nyi awˬ haˉ hkʼaˬ htaˆ gaˬ la tuˬ ngaˬ hui maˇ shiˍ gʼa ve htaꞈ kʼoˆ gaˇ ve laˇ? Maˇ heˆ. Awˬ leh meuˇ ve awˬ nyi awˬ haˉ hkʼaˬ htaˆ gaˬ la tuˬ awˬ heˆ teˇ hpaˍ htaꞈ nyi˗oꞈ tehꞈ Yeˍsuˆ awˬ laꞈ gʼawˇ teˇ hpaˍ htaꞈ kʼoˆ piˇ ve yoˬ.

Ngaˬ hui awˬ leh meuˇ ve awˬ yanˇ hkʼaw chehˇ taˍ ve htaꞈ shiˍ gʼa tuˬ, “awˬ heˆ” laiˉ ceuˬ cawˬ ve yoˬ. Yeˍsuˆ kʼoˆ ve, “chaw teˇ ceuˬ leh teˇ ceuˬ, mvuhˇ miˬ teˇ peˆ leh teˇ peˆ yaꞈ daꞈ jiˆ daꞈ tuˬ yoˬ. Meuꞈ ve kaˆ ve leh miˬ hiˆ ve teˇ hpaˍ teˇ kaˬ peuˬ teˇ kaˬ lo hpehꞈ la tuˬ yoˬ.” (Maꞈhtehˍ 24:3, 7) Yeˍsuˆ lehˬ “naˬ beuˬ” htaꞈ kaꞈ kʼoˆ taˍ sheˍ ve yoˬ. (Luˉkaꞈ 21:11) Yeˍsuˆ kʼoˆ taˍ ve awˬ ceuˬ awˬ tehˬ hpehꞈ la chehˇ ve nawˬ mawˬ˗aw laˇ?

Chi beuꞈ teˇ co˗e maꞈ te daꞈ ve, miˬ hiˆ ve, naˬ ve gawˬ ve, chi teˇ hpaˍ htaꞈ pa taw gʼa tuꞈ gʼa hkanˍ ve yoˬ. Tawˇ pa haˉ te kʼo, 2004 hkʼawꞈ htaˇ, I˗diˉyaˆ laˇ tsuhˇ laˉ shaˆ gʼuiˬ lo miˬ hiˆ ve yoˬ. Tcuhˬnaˬmiˆ hpehꞈ ve pa taw, chaw 225,000 gʼaˇ suh˗e ve yoˬ. Leh a naˍ CO˗viꞈ˗ 19 hpehꞈ ve pa taw, 3 hkʼawꞈ hpaˆ ve hkʼaw chaw 6,900,000 gʼaˇ hpaˆ suh˗e ve yoˬ. Awˬ heˆ chi ve teˇ hpaˍ htaꞈ mawˬ kʼo, miˬ guiˬ awˬ leh meuˇ gaˬ la paˇ neˇ˗oˬ ve tehꞈ Yeˍsuˆ kʼoˆ laˇ ve yoˬ.

Liꞈ hpu hkʼaw awˬ yanˇ teˇ yanˇ htaꞈ “awˬ leh meuˇ ve awˬ nyi awˬ haˉ” tehꞈ kʼoˆ ve yoˬ. Chi lehˬ miˬ guiˬ  awˬ leh meuˇ ve htaꞈ kʼoˆ gaˇ ve yoˬ. (2 Peˍtruˆ 3:3, 4) 2 Tiˆmoˉseˍ liꞈ 3:1-5 hkʼaw kʼoˆ ve, awˬ leh meuˇ ve awˬ nyi awˬ haˉ hkʼaw chehˇ ve chaw awˬ liˇ awˬ hkʼaˇ maˇ daꞈ. (“ Awˬ leh meuˇ ve awˬ nyi awˬ haˉ hkʼaw hpehꞈ la tuˬ ve awˬ ceuˬ teˇ hpaˍ” htaꞈ nyi sheˍ.) Chi beuꞈ teˇ co˗e ve chaw a shu yawˇ awˬ pon tiˉ dawˇ nyi ve, lawˇ hpaꞈ uiˍ ve, haiˬ jaˇ ve chaw, shu htaꞈ maˇ haꞈ puiˉ ve chaw, chi hkʼe hpehꞈ chehˇ ve nawˬ mawˬ˗aw laˇ? Chi ve teˇ hpaˍ htaꞈ nyi kʼo, awˬ leh meuˇ ve awˬ nyi awˬ haˉ gaˬ la paˇ neˇ jaˇ˗oˬ ve tehꞈ shiˍ gʼa ve yoˬ.

Awˬ leh meuˇ ve awˬ nyi awˬ haˉ gaˬ la tuˬ maw jaˇ sheˍ laˇ? Liꞈ hpu hkʼaw kʼoˆ ve, “awˬ yanˇ a ciˉ ceh tiˉ cawˬ ve” yoˬ. Peuˬ hkʼawꞈ nawˉ, Gʼuiˬ sha lehˬ “miˬ guiˬ htaꞈ te luˬ ve chaw teˇ hpaˍ htaꞈ te luˬ piˇ tuˬ yoˬ.”—Hpeuꞈ maˍ ve 11:15-18; 12:12.

Haiˬ ve miˬ guiˬ htaꞈ te luˬ tuˬ Gʼuiˬ sha awˬ nyi tinˍ taˍ peuˬ. (Maꞈhtehˍ 24:36) Daꞈ jaˇ ve awˬ lawn lehˬ Gʼuiˬ sha chaw ‘teˇ gʼaˇ htaꞈ kaꞈ maˇ luˬ kʼai’ tcuh gaˇ (2 Peˍtruˆ 3:9) Gʼuiˬ sha chaw yaˇ htaꞈ yawˇ ve awˬ liˇ awˬ hkʼaˇ henˇ leh gʼaꞈ te tuˬ awˬ yanˇ peꞈ laˇ ve yoˬ. Aˬ htoꞈ ma pa taw yawˇ chi hkʼe te ve le? Awˬ lawn kʼo, Gʼuiˬ sha lehˬ ngaˬ hui htaꞈ miˬ guiˬ awˬ leh meuˇ ve awˬ yanˇ chi ve hkʼaw ponˬ tcuh gaˇ leh daꞈ jaˇ ve miˬ guiˬ awˬ suhˉ hkʼaw chehˇ tcuh gaˇ ve yoˬ.

Gʼuiˬ sha ve mvuhˇ miˬ uˉ peunˍ ve awˬ hawˉ lo chehˇ gaˇ ve kʼo, hkʼaˬ hkʼe gʼa te cawˇ ve htaꞈ shiˍ tuˬ, Gʼuiˬ sha lehˬ miˬ guiˬ hkʼoˆ lo Liꞈ hpu maˍ ve kanˉ hkʼaˇ cawˬ tcuh ve yoˬ. Yeˍsuˆ kʼoˆ ve, “miˬ guiˬ hkʼoˆ teˇ kaˬ le le lo” daꞈ ve awˬ lawn sha tanˇ gʼa hto toˇ ve yoˬ. (Maꞈhtehˍ 24:14) Liꞈ hpu hkʼaw ve dawˇ law kuiˬ shu htaꞈ hto piˇ leh maˍ piˇ tuˬ, laiˉ lanˬ naˍ riˍ yehˇ leh hto toˇ ve yoˬ. Yeˍsuˆ kʼoˆ taˍ ve, awˬ leh meuˇ ve awˬ yanˇ maˇ gaˬ la sheˍ htaˇ, teˇ kaˬ le le lo daꞈ ve awˬ lawn sha tanˇ gʼa hto toˇ ve yoˬ.

Chaw yaˇ uˉ peunˍ ve awˬ yanˇ leh la paˇ neˇ˗oˬ. Yaꞈ hkʼaˇ, daꞈ ve awˬ lawn lehˬ miˬ guiˬ awˬ leh meuˇ ve awˬ yanˇ htaꞈ nawˬ ponˬ gʼa leh Gʼuiˬ sha ka tiꞈ te taˍ laˇ ve miˬ guiˬ awˬ suhˉ hkʼaw nawˬ gʼa chehˇ tuˬ yoˬ. Gʼuˇ suhˍ teˇ lawn hkʼaw Gʼuiˬ sha ka tiꞈ te taˍ laˇ ve miˬ guiˬ awˬ suhˉ hkʼaw chehˇ gaˇ ve kʼo, hkʼaˬ hkʼe gʼa te cawˇ ve awˬ hkʼaˇ kʼoˆ maˍ laˇ taˍ ve yoˬ.