Peuˬ taˉ ve teˇ lawn hkʼaw ngaˬ hui gʼa gʼaw ve, maˇ maw ve awˬ yanˇ hkʼaw haiˬ ve miˬ guiˬ yaˇ leh shoꞈ shaꞈ ve hkʼa peu˗eˬ htaꞈ Gʼuiˬ sha te luˬ tuˬ yoˬ. Chi awˬ tehˬ hpehꞈ la tuˬ yoˬ tehꞈ ngaˬ hui yonˍ gʼa ve yoˬ. Aˬ htoꞈ ma pa taw le? Awˬ lawn kʼo, Liꞈ hpu lehˬ Gʼuiˬ sha ve tawˇ hkawˇ hpehꞈ leh oˇ kaˬ lo chi hkʼe kʼoˆ taˍ ve yoˬ.

“Miˬ guiˬ leh miˬ guiˬ htaꞈ caˉ daꞈ ve sheˉ lai ve teˇ hpaˍ lehˬ, mehˉ kʼai chehˇ ve yoˬ.”—1 Yoˇhanˬ 2:17.

Yaꞈ hkʼaˇ, ponˬ ve chaw cawˬ tuˬ yoˬ tehꞈ ngaˬ hui yonˍ gʼa ve yoˬ. Awˬ lawn kʼo, Liꞈ hpu chi teˇ tawn hkʼaw kʼoˆ ve,

“Gʼuiˬ sha ve a loˍ htaꞈ te ve chaw teˇ gʼaˇ lehˬ, co co taiˍ taiˍ teꞈ chehˇ tuˬ yoˬ.”

Chi htaꞈ pa taw, ngaˬ hui ve a shaꞈ gʼa ponˬ tuˬ, Gʼuiˬ sha ve a loˍ htaꞈ gʼa gʼaꞈ te ve yoˬ. Leh Gʼuiˬ sha ngaˬ hui htaꞈ aˬ htoꞈ ma te tcuh gaˇ ve shiˍ tuˬ, yawˇ htaꞈ awˉ lawˉ gʼa shiˍ daꞈ sheˍ ve yoˬ.

Yeˍsuˆ kʼoˆ ve, ‘co tiꞈ ha tiꞈ teˇ ceuˬ htaꞈ gʼa tuˬ, awˬ tehˬ awˬ na ve Gʼuiˬ sha’ htaꞈ gʼa shiˍ ve yoˬ. (Yoˇhanˬ 17:3) Awˬ leh meuˇ ve awˬ yanˇ htaꞈ ponˬ leh co co taiˍ taiˍ ve a shaꞈ gʼa tuˬ ngaˬ hui Gʼuiˬ sha htaꞈ gʼa shiˍ ve yoˬ. Chi lehˬ Gʼuiˬ sha awˬ tehˬ cawˬ ve leh yawˇ ve awˬ lawn a ciˉ ceh tiˉ shiˍ ve htaꞈ kʼoˆ gaˇ ve maˇ heˆ. Ngaˬ hui yawˇ geh awˬ chawˇ gʼa te ve yoˬ. Ngaˬ hui awˬ chawˇ geh meuˆ daꞈ gaˇ ve kʼo, yawˇ geh awˬ chawˇ te leh tawˇ gʼa yaw daꞈ ve yoˬ. Gʼuiˬ sha geh awˬ chawˇ te ve kaꞈ chi hkʼa shuˍ gʼa te ve yoˬ. Gʼuiˬ sha htaꞈ awˬ chawˇ te leh yawˇ htaꞈ ka tiꞈ yeˬ gʼa tuˬ, Liꞈ hpu hkʼaw awˬ tehˬ ve teˇ ceuˬ ceuˬ htaꞈ teˇ geh nyi sheˍ.

Ngaˬ hui a shaꞈ gʼa teꞈ chehˇ tuˬ teˇ le le awˍ gʼa caˇ ve yoˬ. Yaꞈ hkʼaˇ Yeˍsuˆ kʼoˆ ve, “Liꞈ hpu hkʼaw chi hkʼe bvuhꞈ taˍ ve, chaw yaˇ lehˬ hkaoˍmonˇ htaꞈ pa taw ceh tiˉ gʼa teꞈ ve maˇ heˆ. Gʼuiˬ sha ve mawꞈ kʼaw hkʼaw lo tawˆ la ve tawˇ teˇ hkawˇ le le htaꞈ pa taw gʼa teꞈ ve yoˬ.”—Maꞈhtehˍ 4:4.

Chi beuꞈ teˇ co˗e Yaˬhoˉvaˬ ve tawˇ hkawˇ Liꞈ hpu hkʼaw cawˬ ve yoˬ. Nawˬ Liꞈ hpu gʼaw htaˇ, Gʼuiˬ sha aˬ htoꞈ ma te jaw˗oˬ ve, chi teˇ hkui aˬ htoꞈ ma te chehˇ ve, leh awˬ gʼuˇ suhˍ hpawˇ yawˇ aˬ htoꞈ ma te tuˬ ve, awˬ tehˬ ve a yeˇ uiˍ ve laiˉ ceuˬ nawˬ gʼa henˇ tuˬ yoˬ.

Nawˬ Gʼuiˬ sha hkawˇ na yuˬ gaˇ ve htawˇ, yawˇ maˇ dawˇ cawˇ ve awˬ ceuˬ htaꞈ nawˬ te chehˇ leh maˇ kʼawꞈ te tuˬ haˍ jaˇ tehꞈ dawˇ ve kʼo, nawˬ hkʼaˬ hkʼe te tuˬ le? Chi hkʼe hpehꞈ ve kʼo, nawˬ Gʼuiˬ sha geh meuˆ daꞈ gʼa tuˬ bon lawˬ ve lehˬ nawˬ htaꞈ ga laˇ gʼa ve yoˬ.

Sa˗ku˗laˆ meh ve yaˇ miˇ teˇ gʼaˇ ve awˬ lawn htaꞈ nyi sheˍ. Sa˗ku˗laˆ lehˬ haˉ chawˇ haˉ paˆ te ve yoˬ. Yawˇ Liꞈ hpu tanˬ henˇ htaˇ, “haˉ chawˇ haˉ paˆ te ve htaꞈ jaw kʼai loˬ” tehꞈ Gʼuiˬ sha ve awˬ liˇ tawˇ hkawˇ hkʼaw kʼoˆ ve htaꞈ yawˇ gʼa henˇ ve yoˬ. (1 Kawˇrenˍhtuˆ 6:18) Sa˗ku˗laˆ Gʼuiˬ sha ga laˇ tuˬ bon lawˬ leh awˬ leh meuˇ htaˇ chi hkʼe ve te hkʼaˇ htaꞈ yawˇ pa gʼa ve yoˬ. Yaꞈ hkʼaˇ, yawˇ ve dawˇ hkʼaˇ htaꞈ gʼa tawˍ daꞈ chehˇ sheˍ. Yawˇ kʼoˆ ve, “ngaˬ haˉ chawˇ haˉ paˆ te ve awˬ lawn htaꞈ dawˇ htaˇ, Yaˬhoˉvaˬ geh bon lawˬ leh yawˇ htaꞈ hteˇ lehˍ kʼoˆ piˇ ve yoˬ.” Ngaˬ ve awˬ gʼaˇ htaꞈ cuˇ ve kʼo, tawˍ daꞈ maˇ gʼaˇ taˬ tehꞈ shiˍ ve yoˬ. Bon lawˬ ve lehˬ ga laˇ gʼa jaˇ. Chi ngaˬ Yaˬhoˉvaˬ geh meuˆ daꞈ tuˬ te laˇ ve yoˬ. Laiˉ lanˬ gʼaˇ kaꞈ Sa˗ku˗laˆ hkʼa shuˍ Yaˬhoˉvaˬ htaꞈ shiˍ la htaˇ, yawˇ hui a shu yawˇ ve te hkʼaˇ dawˇ hkʼaˇ htaꞈ pa leh Yaˬhoˉvaˬ nyi hkʼaˇ suh ve hkʼe gʼaꞈ te gʼa tuˬ yawˇ ga piˇ ve yoˬ.—Hpiˇliˇpiˆ 4:13.

Nawˬ Gʼuiˬ sha htaꞈ shiˍ maˇ la ve kʼo, “Gʼuiˬ sha nawˬ hui htaꞈ shiˍ chehˇ ve yoˬ.” Hkʼe te leh, nawˬ Gʼuiˬ sha geh meuˆ daꞈ jaˇ ve awˬ chawˇ hpehꞈ tuˬ yoˬ. (Gaˍlaˍtiˆ 4:9; Chiˇ mvuh ve 25:14) Leh Gʼuiˬ sha gu teh taˍ laˇ ve miˬ guiˬ awˬ suhˉ hkʼaw nawˬ gʼa chehˇ tuˬ yoˬ. Yaꞈ hkʼaˇ, miˬ guiˬ awˬ suhˉ hkʼaˬ hkʼe hpehꞈ ve le? Gʼuˇ suhˍ teˇ lawn hkʼaw awˬ lawn chi htaꞈ caˉ daꞈ ve kʼoˆ maˍ laˇ tuˬ yoˬ.