1-2. Yaˬhoˉvaˬ ve chaw laiˉ gʼaˇ aˬ htoꞈ ma gʼa hpuˇ ve le? Leh oˇ ve yawˇ hui htaꞈ hkʼaˬ hkʼe heuˆ la kuiˬ cawˬ ve le?

 Shehnˆ ve awˬ lawn htaꞈ teˇ geh dawˇ nyi sheˍ. Awˬ viˉ awˬ nyi yaˇ nehˬ teˇ nyi aꞈ kehˉ teˇ nyi gʼaˇ hteꞈ naˬ ve, awˬ viˉ awˬ nyi hawˉ hkʼaˆ 50 hkʼawꞈ hpaˆ˗oˬ ve kanˉ te kaiˬ ve htawˇ kanˉ maˇ gʼa te˗o, leh kanˉ ca ve htawˇ maˇ gʼa sheˍ, awˬ viˉ awˬ nyi yaˇ miˇ a shaꞈ maˇ˗oˬ ve Yaˬhoˉvaˬ ve kanˉ oˇ htaˇ hkʼe leˇ te maˇ gʼa˗oˬ ve yoˬ.

² Chi ve 3 gʼaˇ hkʼaw ve teˇ gʼaˇ hkʼe nawˬ kaꞈ gʼa hpuˇ ve kʼo, nawˬ kaꞈ awˬ hpfuhˇ maˇ cawˬ tehꞈ dawˇ la ve yoˬ. Chi hkʼe gʼa hpuˇ htaˇ nawˬ ha lehˬ ve maˇ cawˬ leh, a shu yawˇ awˬ to htaꞈ maˇ daꞈ ve hpawˇ dawˇ la leh, nawˬ shu geh awˬ lawn cawˬ tuˬ te laˇ sha ve yoˬ.

3. Saˍtanˍ leh yawˇ hpawˇ chehˇ ve chaw, chaw yaˇ ve a shaꞈ htaꞈ hkʼaˬ hkʼe dawˇ ve le?

³ Miˬ guiˬ chi hkʼoˆ lo ve chaw a shu yawˇ ve a shaꞈ htaꞈ Saˍtanˍ dawˇ ve hkʼe dawˇ ve yoˬ. Saˍtanˍ chaw yaˇ awˬ hpfuhˇ maˇ cawˬ tuˬ te piˇ ve yoˬ. Chi htaꞈ pa taw, Saˍtanˍ gʼa suh tuˬ ve htaꞈ shiˍ ve htawˇ, Eˇvaꞈ Gʼuiˬ sha hkawˇ maˇ na ve kʼo aˬ htoꞈ ma te gaˇ kaꞈ gʼa ve tehꞈ kʼoˆ piˇ ve lehˬ haiˬ jaˇ ve yoˬ. Tanˇ kaˬ hpawˇ, mvuhˇ miˬ hpawˇ, leh bon hpawˇ htawˇ, Saˍtanˍ chaw yaˇ htaꞈ te gaˇ tuˬ hkʼaˬ htaˆ kaꞈ te piˇ ve yoˬ. Tanˇ kaˬ paˍ, mvuhˇ miˬ uˉ peunˍ paˍ, leh bon awˬ hoˉ teˇ hpaˍ a shaꞈ htaꞈ awˬ hpfuhˇ maˇ shiˍ leh chaw yaˇ hkʼaˬ hkʼe hpehꞈ ve kaꞈ a yeˇ maˇ te ve anˇ tuˬ maˇ loˍ.

4. Awˬ lawn chi ve hkʼaw aˬ htoꞈ ma htaꞈ teˇ geh henˇ tuˬ le?

⁴ Yaˬhoˉvaˬ ngaˬ hui awˬ hpfuhˇ cawˬ ve tehꞈ dawˇ tuˬ te laˇ ve yoˬ. Ngaˬ hui awˬ hpfuhˇ maˇ cawˬ tehꞈ dawˇ htaˇ, Gʼuiˬ sha ga laˇ ve yoˬ. (Chiˇ mvuh ve 136:23; Roˉmaꞈ 12:3) Awˬ lawn chi ve  hkʼaw Yaˬhoˉvaˬ ngaˬ hui htaꞈ ga laˇ ve awˬ hkʼaˇ teˇ hpaˍ htaꞈ teˇ geh henˇ tuˬ yoˬ. (1) Naˬ htaˇ gawˬ htaˇ, (2) hpu hpawˇ dawˇ haˍ htaˇ, leh (3) a shaꞈ maˇ la htaˇ, Yaˬhoˉvaˬ awˬ pon awˬ hpfuhˇ maˇ cawˬ tehꞈ dawˇ la ve yoˬ. Yaꞈ hkʼaˇ, ngaˬ hui Yaˬhoˉvaˬ awˬ pon awˬ hpfuhˇ cawˬ ve tehꞈ yonˍ gʼa tuˬ awˉ lawˉ teˇ geh nyi sheˍ.

5. Chaw yaˇ Yaˬhoˉvaˬ awˬ pon awˬ hpfuhˇ cawˬ ve tehꞈ nawˬ shiˍ tuˬ aˬ htoꞈ ma te laˇ ve le?

⁵ Gʼuiˬ sha ngaˬ hui htaꞈ jeꞈ yuˬ te taˍ ve yoˬ. Gʼuiˬ sha awˬ pon kʼo, ngaˬ hui jeꞈ aꞈ kehˉ awˬ hpfuhˇ hkʼaˆ jaˇ. (Awˬ hkuiˉ puiˍ 2:7) Ngaˬ hui Yaˬhoˉvaˬ awˬ pon awˬ hpfuhˇ cawˬ ve tehꞈ shiˍ tuˬ awˬ hkʼaˇ laiˉ hkʼaˇ cawˬ ve yoˬ. Awˉ lawˉ teˇ hkʼaˇ lehˬ Gʼuiˬ sha yawˇ ve te hkʼaˇ dawˇ hkʼaˇ htaꞈ henˇ yuˬ tuˬ chaw yaˇ htaꞈ hpanˍ taˍ ve yoˬ. Chi Gʼuiˬ sha hpanˍ taˍ ve teˇ ceuˬ le aꞈ kehˉ chaw yaˇ lehˬ awˬ hpfuhˇ cawˬ jaˇ. (Awˬ hkuiˉ puiˍ 1:27) Gʼuiˬ sha ngaˬ hui htaꞈ miˬ guiˬ leh to nuˇ to shaˆ nyi haꞈ shaˉ tcuh laˇ ve yoˬ.—Chiˇ mvuh ve 8:4-8.

6. Chaw yaˇ maˇ biˇ ve htawˇ Yaˬhoˉvaˬ awˬ pon awˬ hpfuhˇ cawˬ ve tehꞈ shiˍ tuˬ aˬ htoꞈ ma ve awˬ hkʼaˇ cawˬ sheˍ ve le?

⁶ Aˍdanˍ venˇ baˆ te yaꞈ ve htawˇ, Yaˬhoˉvaˬ kaꞈ chaw yaˇ htaꞈ awˬ hpfuhˇ shiˍ sheˍ. Gʼuiˬ sha ngaˬ hui htaꞈ awˬ hpfuhˇ cawˬ ve tehꞈ dawˇ leh yawˇ haꞈ jaˇ ve Yaˇ paˍ teˇ gʼaˇ ceh cawˬ ve htawˇ, ngaˬ hui venˇ baˆ awˬ pon htaiˍ hkʼaw tcuh laˇ ve yoˬ. (1 Yoˇhanˬ 4:9, 10) Aˍdanˍ venˇ baˆ te yaꞈ ve pa taw “hteˇ ve chaw kaꞈ maˇ hteˇ ve chaw kaꞈ” gʼa suh˗e ve htawˇ, htaiˍ hkʼawꞈ ve awˬ hpfuhˇ htaꞈ pa taw Yaˬhoˉvaˬ kʼawꞈ teꞈ tu la tcuh laˇ tuˬ yoˬ. (Tcuh yaˇ 24:15) Ngaˬ hui a shaꞈ hkʼaˬ hkʼe ma gaˬ ve, chehˇ sha cawˬ sha ve, leh hpu cawˬ maˇ cawˬ ve htawˇ, Gʼuiˬ sha ngaˬ hui htaꞈ awˬ hpfuhˇ cawˬ ve tehꞈ shawˍ ve, Liꞈ hpu hkʼaw hpeuꞈ maw laˇ ve yoˬ.—Tcuh yaˇ 10:34, 35.

7. Yaˬhoˉvaˬ ve kanˉ te ve chaw yawˇ yawˇ hui htaꞈ awˬ hpfuhˇ cawˬ ve tehꞈ yonˍ gʼa tuˬ aˬ htoꞈ ma awˬ hkʼaˇ cawˬ sheˍ ve le?

⁷ Yaˬhoˉvaˬ ngaˬ hui htaꞈ awˬ hpfuhˇ cawˬ ve tehꞈ yonˍ gʼa tuˬ awˬ nu ve awˬ hkʼaˇ cawˬ sheˍ. Gʼuiˬ sha ngaˬ hui yawˇ geh laˬ tuˬ gʼawˬ veu laˇ leh ngaˬ hui daꞈ ve awˬ lawn sha tanˇ gʼa kaˇ htaˇ, hkʼaˬ hkʼe te tuˬ yawˇ chaˬ nyi taˍ ve yoˬ. (Yoˇhanˬ 6:44) Ngaˬ hui Yaˬhoˉvaˬ geh jiˆ kʼai htaˇ, yawˇ kaꞈ ngaˬ hui geh jiˆ laˬ tuˬ yoˬ. (Yaˍkoˆ 4:8) Yaˬhoˉvaˬ awˬ yanˇ yehˇ leh ngaˬ hui htaꞈ maˍ laˇ tuˬ coˇ caˇ jaˇ. Ngaˬ hui yawˇ awˬ pon awˬ hpfuhˇ cawˬ ve yoˬ. Chi teˇ hkui ngaˬ hui hkʼaˬ hkʼe hpehꞈ ve yawˇ shiˍ leh ngaˬ hui hkʼaˬ hkʼe taw te gʼa ve kaꞈ yawˇ shiˍ ve yoˬ. Chi hkʼoˆ kaꞈ yawˇ ngaˬ hui htaꞈ haꞈ ve pa taw, maˍ laˇ ve yoˬ. (Tawˇ naˉ ve 3:11, 12) Yaˬhoˉvaˬ ngaˬ hui htaꞈ awˬ hpfuhˇ cawˬ ve tehꞈ shawˍ ve ngaˬ hui hkʼa tawˍ lehˆ gʼa mawˬ ve yoˬ!

8. Chiˇ mvuh ve liꞈ 18:27-29 hkʼaw ngaˬ hui shoꞈ shaꞈ ve gʼa hpuˇ htaˇ hkʼaˬ hkʼe ga laˇ ve le?

⁸ Jawˇmawˇ Daˍviˆ awˬ hpfuhˇ maˇ cawˬ tehꞈ laiˉ gʼaˇ dawˇ ve yoˬ. Yaꞈ hkʼaˇ, Yaˬhoˉvaˬ yawˇ htaꞈ haꞈ leh ga laˇ chehˇ ve tehꞈ shiˍ ve yoˬ. Chi hkʼe shiˍ ve lehˬ Daˍviˆ yeunˇ hkanˍ gʼaˇ leh yawˇ hpehꞈ chehˇ ve awˬ ceuˬ teˇ hpaˍ htaꞈ cawˇ ve dawˇ hkʼaˇ cawˬ tuˬ ga piˇ ve yoˬ. (2 Saˍmo˗eˍlaˆ 16:5-7) Ngaˬ hui awˬ gʼaˇ nuˇ leh shoꞈ shaꞈ ve gʼa hpuˇ htaˇ, Yaˬhoˉvaˬ ngaˬ hui awˬ nu ve awˬ ceuˬ teˇ hpaˍ htaꞈ dawˇ tuˬ leh shoꞈ shaꞈ ve htaꞈ yeunˇ hkanˍ gʼaˇ tuˬ kaꞈ ga laˇ ve yoˬ. (Chiˇ mvuh ve 18:27-29 gʼaw sheˍ.) Yaˬhoˉvaˬ ngaˬ hui htaꞈ ga laˇ ve kʼo, yawˇ ve kanˉ te ve ha lehˬ ve htaꞈ teˇ ceuˬ kaꞈ tawˍ laˇ maˇ gʼa. (Roˉmaꞈ 8:31) Chi teˇ hkui Yaˬhoˉvaˬ ngaˬ hui htaꞈ haꞈ leh awˬ hpfuhˇ cawˬ ve tehꞈ shiˍ ve maˇ leunˇ tuˬ ve 3 hkʼaˇ htaꞈ teˇ geh nyi sheˍ.

9. Naˬ ve gawˬ ve ngaˬ hui a shu yawˇ awˬ to htaꞈ hkʼaˬ hkʼe dawˇ tuˬ te laˇ ve le?

⁹ Naˬ ve gawˬ ve ngaˬ hui ve dawˇ hkʼaˇ htaꞈ heuˆ  la kuiˬ cawˬ ve yoˬ. Ngaˬ hui awˬ hpfuhˇ maˇ cawˬ˗o tehꞈ dawˇ puiˉ ve yoˬ. Ngaˬ hui naˬ leh shu ga laˇ htaˇ, yaꞈ taw ve yoˬ hehˉ. Shu maˇ shiˍ ve htawˇ, ngaˬ hui oˇ htaˇ hkʼe leˇ te maˇ gʼa˗o ve pa taw nyi ma luˬ ve yoˬ. Ngaˬ hui awˬ gʼaˇ nuˇ htaˇ, Yaˬhoˉvaˬ awˬ gʼaˇ peꞈ laˇ ve yoˬ. Yawˇ hkʼaˬ hkʼe te ve le?

10. Tawˇ naˉ ve liꞈ 12:25 hkʼaw kʼoˆ taˍ ve hkʼe, ngaˬ hui naˬ htaˇ aˬ htoꞈ ma ga laˇ gʼa ve le?

¹⁰ Ngaˬ hui naˬ htaˇ “na sha ve tawˇ lehˬ” awˬ gʼaˇ gʼa tuˬ ga laˇ ve yoˬ. (Tawˇ naˉ ve 12:25 gʼaw sheˍ.) Yaˬhoˉvaˬ na sha ve tawˇ Liꞈ hpu hkʼaw cawˬ tcuh taˍ ve lehˬ ngaˬ hui naˬ htaˇ, yawˇ awˬ pon awˬ hpfuhˇ cawˬ ve tehꞈ shiˍ tuˬ ga laˇ ve yoˬ. (Chiˇ mvuh ve 31:19; 41:3) Na sha ve tawˇ ngaˬ hui awˉ lawˉ teˇ pawˆ maˇ heˆ leh laiˉ pawˆ dawˇ nyi htaˇ, naˬ ve htaꞈ pa taw maˇ daꞈ ve dawˇ hkʼaˇ htaꞈ ngaˬ hui tawˍ daꞈ gʼaˇ tuˬ Yaˬhoˉvaˬ ga laˇ ve yoˬ.

11. Awˬ viˉ awˬ nyi hawˉ hkʼaˆ teˇ gʼaˇ Yaˬhoˉvaˬ ga piˇ ve htaꞈ hkʼaˬ hkʼe gʼa ve le?

¹¹ Yaˇ nehˬ teˇ gʼaˇ Ho˗he awˬ gʼaˇ maˇ cawˬ ve a naˍ hpehꞈ ve yoˬ. Yawˇ naˬ jaˇ ve pa taw, yawˇ awˬ to awˬ hpfuhˇ maˇ cawˬ tehꞈ dawˇ ve yoˬ. Yawˇ kʼoˆ ve, “ngaˬ haꞈ yuˬ maˇ gʼa. Ngaˬ chi hkʼe hpehꞈ tuˬ maˇ dawˇ jaw. Shu nyi laˇ htaˇ ngaˬ yaꞈ taw jaˇ. Ngaˬ gʼaˇ hteꞈ kʼawꞈ naˬ htaˇ, awˬ gʼuˇ suhˍ hpawˇ ngaˬ ve a shaꞈ hkʼaˬ hkʼe taw pa kʼai ve dawˇ nyi ve yoˬ. Ngaˬ dawˇ haˍ jaˇ leh Yaˬhoˉvaˬ ga laˇ tuˬ lawˬ ve yoˬ.” Yaˬhoˉvaˬ Ho˗he htaꞈ hkʼaˬ hkʼe ga piˇ ve le? Yawˇ kʼawꞈ kʼoˆ ve, “ngaˬ dawˇ maˇ jaˇ ve yoˬ. Chiˇ mvuh ve liꞈ hkʼaw Yaˬhoˉvaˬ yawˇ ve kanˉ te ve chaw htaꞈ dawˇ haˍ ve Liꞈ hpu awˬ tawn awˬ viˉ awˬ nyi gʼaw tcuh laˇ leh, teˇ pawˆ ve a ciˉ ciˉ gʼaw tuˬ kʼoˆ laˇ ve yoˬ. Awˬ tawn chi ve teˇ hpaˍ htaꞈ ngaˬ laiˉ pawˆ gʼaw leh awˬ gʼaˇ cawˬ la ve yoˬ. Leh ngaˬ ha lehˬ ve htaꞈ shu mawˬ ve yoˬ. Ngaˬ daꞈ ve hpawˇ dawˇ nyi ve yawˇ awˬ gʼaˇ gʼa jaˇ tehꞈ kʼoˆ laˇ ve yoˬ. Yaˬhoˉvaˬ ngaˬ ve bon lawˬ hkawˇ htaꞈ hkʼawꞈ laˇ ve yoˬ! Yawˇ ngaˬ ve dawˇ hkʼaˇ htaꞈ pa laˇ ve yoˬ. Ngaˬ naˬ leh a shu yawˇ awˬ to htaꞈ a yeˇ yuˬ cawˇ ve htawˇ, Liꞈ hpu  hkʼaw chaw naˬ htaꞈ Gʼuiˬ sha hkʼaˬ hkʼe dawˇ ve htaꞈ ngaˬ shiˍ la ve yoˬ.”

12. Naˬ htaˇ Yaˬhoˉvaˬ ga laˇ ve htaꞈ gʼa tuˬ nawˬ hkʼaˬ hkʼe gʼa te cawˇ ve le?

¹² Nawˬ naˬ ve gawˬ ve gʼa hpuˇ leh tawˍ daꞈ htaˇ, nawˬ aˬ htoꞈ ma gʼa hpuˇ ve Yaˬhoˉvaˬ shiˍ ve tehꞈ yonˍ gʼa ve yoˬ. Nawˬ cawˇ ve htaꞈ dawˇ tuˬ Yaˬhoˉvaˬ ga laˇ tcuh sheˍ. Chi hkʼoˆ kaꞈ Liꞈ hpu hkʼaw Yaˬhoˉvaˬ na sha ve tawˇ hkawˇ nawˬ awˬ pon haꞈ shaˉ taˍ laˇ ve htaꞈ gʼaw sheˍ. Yaˬhoˉvaˬ yawˇ ve kanˉ te ve chaw htaꞈ awˬ hpfuhˇ shiˍ ve tehꞈ Liꞈ hpu awˬ tawn htaꞈ a yeˇ yuˬ sheˍ. Chi hkʼe te ve kʼo, Yaˬhoˉvaˬ yawˇ ve kanˉ te ve ka tiꞈ yeˬ ve chaw teˇ gʼaˇ le le htaꞈ haꞈ ve shiˍ tuˬ ga laˇ ve yoˬ.—Chiˇ mvuh ve 84:11.

13. Yehˬ shehˍ hpaˇ kanˉ maˇ gʼa te˗o htaˇ hkʼaˬ hkʼe dawˇ ve le?

¹³ Yehˬ shehˍ hpaˇ teˇ gʼaˇ le le yehˬ kʼa hkʼaw loˍ ve awˬ ceuˬ cawˬ tcuh gaˇ ve yoˬ. Tawˇ pa haˉ te kʼo, awˬ viˉ awˬ nyi hawˉ hkʼaˆ teˇ gʼaˇ teꞈ ciˉ maˇ gʼa te yaꞈ kaꞈ kanˉ maˇ gʼa te˗o leh yawˇ kanˉ ca ve htawˇ maˇ gʼa sheˍ. Chi hkʼe gʼa hpuˇ htaˇ, yawˇ awˬ hpfuhˇ maˇ cawˬ tehꞈ dawˇ ve yoˬ. Yaꞈ hkʼaˇ, Yaˬhoˉvaˬ ka tiꞈ te taˍ ve htaꞈ dawˇ nyi htaˇ, hkʼaˬ hkʼe ga piˇ ve le?

14. Yaˬhoˉvaˬ ka tiꞈ yeˬ ve aˬ htoꞈ ma awˬ hkʼaˇ cawˬ sheˍ ve le?

¹⁴ Yaˬhoˉvaˬ hkʼaˬ htaˆ kaꞈ ka tiꞈ yeˬ ve yoˬ. (Yawˇsuˆ 21:45; 23:14) Yawˇ te ve lehˬ awˬ bon laiˉ ceuˬ cawˬ ve yoˬ. Awˉ lawˉ teˇ ceuˬ lehˬ, yawˇ ka tiꞈ yeˬ ve lehˬ yawˇ ve awˬ meh awˬ meꞈ awˬ hponˇ gʼa tuˬ awˬ pon yoˬ. Yaˬhoˉvaˬ yawˇ ve kanˉ te ve ka tiꞈ yeˬ ve chaw htaꞈ nyi haꞈ shaˉ tuˬ ka tiꞈ te piˇ htaˇ, yawˇ ka tiꞈ te taˍ ve htaꞈ gʼaꞈ te ve yoˬ. (Chiˇ mvuh ve 31:1-3) Awˬ nu ve teˇ ceuˬ lehˬ, Yaˬhoˉvaˬ yawˇ ve yehˬ kʼa hkʼaw ve chaw htaꞈ maˇ nyi haꞈ shaˉ ve kʼo, ngaˬ hui nyi ma luˬ ve tehꞈ yawˇ shiˍ ve yoˬ. Ngaˬ hui awˬ to leh co ha hpawˇ Yaˬhoˉvaˬ nyi haꞈ  shaˉ laˇ tuˬ ka tiꞈ te˗o htaˇ, yawˇ te tuˬ ve htaꞈ teˇ ceuˬ kaꞈ tawˍ piˇ maˇ gʼa!—Maꞈhtehˍ 6:30-33; 24:45.

15. (a) Awˉ lawˉ peuˇ ve Hkriꞈ yaˇ aˬ htoꞈ ma htaꞈ gʼa hpuˇ ve le? (b) Chiˇ mvuh ve liꞈ 37:18, 19 hkʼaw ngaˬ hui yonˍ gʼa tuˬ aˬ htoꞈ ma ga laˇ ve le?

¹⁵ Yaˬhoˉvaˬ ka tiꞈ yeˬ ve tehꞈ ngaˬ hui tawnˇ taˍ ve kʼo, ngaˬ hui hpu hpawˇ dawˇ haˍ ve htaꞈ gu gʼa tuˬ awˬ hkʼaˇ yawˇ ga laˇ gʼa ve tehꞈ yonˍ gʼa ve yoˬ. Awˉ lawˉ peuˇ ve Hkriꞈ yaˇ htaꞈ dawˇ nyi sheˍ. Yeˍruˆsaˍlehnˍ venˇ hkʼaw chehˇ ve Hkriꞈ yaˇ awˬ moˍ htaꞈ fawˉ mehˍ jaˇ ve pa taw, ‘tcuh yaˇ teˇ hpaˍ maˇ heˆ kʼo, yawˇ hui hkʼa peu˗eˬ hpaˆ daꞈ leh teˇ kaˬ le le lo hpaw˗e ve yoˬ.’ (Tcuh yaˇ 8:1) Oˇ ve teˇ yanˇ hkʼaˬ hkʼe hpehꞈ la ve htaꞈ dawˇ nyi sheˍ. Yawˇ hui hpu hpawˇ gʼa dawˇ haˍ ve yoˬ. Yawˇ hui yehˬ, tanˇ kaˬ hkʼaˇ, leh kanˉ kaꞈ maˇ gʼa te ve yoˬ. Yaꞈ hkʼaˇ, Yaˬhoˉvaˬ yawˇ hui htaꞈ maˇ chiˇ baˬ leh hkʼaˬ htaˆ kaꞈ ha lehˬ gʼa sheˍ ve yoˬ. (Tcuh yaˇ 8:4; Heˍbrehˇ 13:5, 6; Yaˍkoˆ 1:2, 3) Yaˬhoˉvaˬ ka tiꞈ yeˬ ve Hkriꞈ yaˇ chi ve teˇ hpaˍ htaꞈ ga piˇ ve kʼo, ngaˬ hui htaꞈ kaꞈ ga laˇ tuˬ yoˬ.—Chiˇ mvuh ve 37:18, 19 gʼaw sheˍ.

16. Ngaˬ hui Yaˬhoˉvaˬ awˬ pon awˬ hpfuhˇ maˇ cawˬ tehꞈ dawˇ tuˬ aˬ htoꞈ ma te laˇ ve le?

¹⁶ Ngaˬ hui a shaꞈ maˇ la htaˇ, Yaˬhoˉvaˬ ve kanˉ oˇ htaˇ hkʼe leˇ te maˇ gʼa˗o tehꞈ dawˇ la ve yoˬ. Jawˇmawˇ Daˍviˆ kaꞈ mawˇ la htaˇ chi hkʼe dawˇ jaw ve yoˬ. (Chiˇ mvuh ve 71:9) Yaˬhoˉvaˬ ngaˬ hui htaꞈ hkʼaˬ hkʼe ga laˇ ve le?

17. Awˬ viˉ awˬ nyi Jeˬlen ve awˬ lawn ngaˬ hui htaꞈ aˬ htoꞈ ma maˍ laˇ ve le?

¹⁷ Awˬ viˉ awˬ nyi yaˇ miˇ Jeˬlen hpawnˬ daꞈ kuiˬ yehˬ kʼawꞈ gu te ve henˇ la tuˬ kuˬ piˇ ve yoˬ. Jeˬlen maˇ kʼai gaˇ leh yawˇ kʼoˆ ve, “ngaˬ mawˇ˗oˬ, mehˇ chawˇ ma hpehꞈ ve, chi hkʼe ve hpawˇ ngaˬ teꞈ ciˉ kaꞈ maˇ te puiˉ. Ngaˬ Yaˬhoˉvaˬ awˬ pon awˬ bon maˇ cawˬ  taˬ.” Hpawnˬ daꞈ ve maˇ kʼai sheˍ teˇ haˉ htaˇ, Jeˬlen nyi ma hkʼaw cawˬ ve awˬ ceuˬ Yaˬhoˉvaˬ htaꞈ kʼoˆ piˇ ve yoˬ. Gʼuˇ suhˍ teˇ nyi hpawnˬ daꞈ kuiˬ lo gaˬ la htaˇ, yawˇ laˬ tuˬ maˇ laˬ tuˬ htawˇ dawˇ nawˬ dawˇ cawˬ ve yoˬ. Hpawnˬ daꞈ chehˇ htaˇ, bon maˍ paˍ teˇ gʼaˇ kʼoˆ laˇ ve a yeˇ uiˍ jaˇ ve lehˬ, te gaˇ ve nyi ma cawˬ kʼo Yaˬhoˉvaˬ maˍ laˇ tuˬ yoˬ. Jeˬlen kʼawꞈ kʼoˆ ve, “ngaˬ nyi ma hkʼaw dawˇ ve ‘chi hkʼe ve ngaˬ kaꞈ cawˬ ve yoˬ!’ Yaˬhoˉvaˬ ngaˬ ve bon lawˬ hkawˇ htaꞈ hkʼawꞈ laˇ ve gʼa mawˬ htaˇ, ngaˬ hawˬ ve yoˬ. Ngaˬ Gʼuiˬ sha htaꞈ piˇ gʼa ve awˬ hpfuhˇ hkʼaˆ jaˇ ve awˬ ceuˬ cawˬ sheˍ ve tehꞈ yonˍ gʼa leh ngaˬ kanˉ chi ve te gʼa tuˬ yawˇ ga laˇ gaˇ ve yoˬ.” Peuˬ taˉ ve htaꞈ kʼawꞈ dawˇ nyi htaˇ Jeˬlen kʼoˆ ve, “hpawnˬ daꞈ˗e htaˇ ngaˬ kawˆ ve, awˬ gʼaˇ nuˇ ve, leh awˬ hpfuhˇ maˇ cawˬ tehꞈ dawˇ ve yoˬ. Yaꞈ hkʼaˇ, hkʼa dehꞈ yonˍ gʼa sheˍ ve, awˬ gʼaˇ kʼawꞈ cawˬ ve, awˬ hpfuhˇ cawˬ ve tehꞈ dawˇ la ve yoˬ!”

18. Ngaˬ hui a shaꞈ maˇ ve htawˇ, Yaˬhoˉvaˬ awˬ pon awˬ hpfuhˇ cawˬ ve tehꞈ Liꞈ hpu hkʼaw hkʼaˬ hkʼe kʼoˆ taˍ ve le?

¹⁸ A shaꞈ maˇ ve htawˇ, Yaˬhoˉvaˬ ngaˬ hui htaꞈ kanˉ te tcuh laˇ tuˬ cawˬ sheˍ ve tehꞈ yonˍ gʼa ve yoˬ. (Chiˇ mvuh ve 92:12-15) Ngaˬ hui a ciˉ ceh tiˉ te gʼa ve maˇ heˆ leh ngaˬ hui te ve awˬ ceuˬ a yeˇ maˇ uiˍ ve htawˇ, ngaˬ hui te ve kanˉ teˇ ceuˬ le le Yaˬhoˉvaˬ awˬ pon awˬ hpfuhˇ cawˬ ve tehꞈ Yeˍsuˆ maˍ laˇ ve yoˬ. (Luˉkaꞈ 21:2-4) Chi htaꞈ pa taw, nawˬ te gʼa ve awˬ ceuˬ htaꞈ a yeˇ yuˬ sheˍ. Yaˬhoˉvaˬ ve awˬ lawn shu htaꞈ kʼoˆ piˇ ve, awˬ viˉ awˬ nyi awˬ pon bon lawˬ piˇ ve, awˬ viˉ awˬ nyi caˉ leh Gʼuiˬ sha htaꞈ ka tiꞈ yeˬ tuˬ awˬ gʼaˇ piˇ ve yoˬ. Nawˬ Yaˬhoˉvaˬ ve kanˉ teˇ geh te ve chaw hpehꞈ ve tehꞈ yawˇ dawˇ ve, nawˬ te gʼa ve htaꞈ pa taw maˇ heˆ, nawˬ yawˇ ve hkawˇ na yuˬ ve pa taw yoˬ.—1 Kawˇrenˍhtuˆ 3:5-9.

19. Roˉmaꞈ liꞈ 8:38, 39 hkʼaw ngaˬ hui htaꞈ aˬ htoꞈ ma ka tiꞈ te taˍ laˇ ve le?

¹⁹ Yaˬhoˉvaˬ Gʼuiˬ sha yawˇ ve kanˉ te ve chaw htaꞈ awˬ tehˬ awˬ na awˬ hpfuhˇ shiˍ ve ngaˬ hui oˉ kʼoˍ gʼa pui ve awˬ bon uiˍ jaˇ! Ngaˬ hui yawˇ ve a loˍ te tuˬ hpanˍ taˍ laˇ ve yoˬ. Awˬ tehˬ oˉ kʼoˍ puiˍ ve ngaˬ hui a shaꞈ teꞈ kuiˬ hkʼaw nyi hkʼaˇ suh leh ha lehˬ tuˬ te laˇ ve yoˬ. (Hpeuꞈ maˍ ve 4:11) Miˬ guiˬ chaw yaˇ ngaˬ hui htaꞈ awˬ hpfuhˇ maˇ cawˬ tehꞈ dawˇ ve htawˇ, Yaˬhoˉvaˬ ngaˬ hui htaꞈ chi hkʼe maˇ dawˇ. (Heˍbrehˇ 11:16, 38) Ngaˬ hui naˬ ve gawˬ ve pa taw, awˬ gʼaˇ nuˇ leh awˬ hpfuhˇ maˇ cawˬ ve tehꞈ dawˇ htaˇ, hpu hpawˇ dawˇ haˍ htaˇ, a shaꞈ maˇ la htaˇ, mvuhˇ naw ma hkʼoˆ haꞈ pehnˇ uiˍ jaˇ ve Awˬ pa ngaˬ hui htaꞈ haꞈ ve hpeuꞈ maw laˇ ve teˇ ceuˬ kaꞈ tawˍ piˇ maˇ gʼa ve htaꞈ ngaˬ hui tawnˇ taˍ cawˇ ve yoˬ.—Roˉmaꞈ 8:38, 39 gʼaw sheˍ.