1-2. Yeˍsuˆ ve tuˍ hpfuh awˬ paˇ lo yaˇ miˇ teˇ hpaˍ htaꞈ mvuhˇ naw ma tcuh yaˇ aˬ htoꞈ ma kʼoˆ piˇ ve le? Yawˇ hui aˬ htoꞈ ma te tuˬ Yeˍsuˆ kʼoˆ piˇ ve le?

 Niˆsanˇ ha pa 16 nyi 33 hkʼawꞈ mvuhˇ htiˇ la paˇ neˇ htaˇ, Gʼuiˬ sha htaꞈ yawˆ yan leh nyi ma luˬ chehˇ ve yaˇ miˇ Yeˍsuˆ ve tuˍ hpfuh lo kʼai ve yoˬ. Yawˇ ve awˬ to oˇ kaˬ lo 36 naˍ riˍ hpaˆ teh˗oˬ ve yoˬ. Yawˇ hui sha hawnˉ leh naˍ manˇ hawnˉ Yeˍsuˆ ve awˬ to htaꞈ shehˍ piˇ tuˬ dawˇ teh taˍ ve yoˬ. Yaꞈ hkʼaˇ, yawˇ hui gaˬ˗e htaˇ tuˍ hpfuh hkʼaw teꞈ chiˉ maˇ mawˬ ve pa taw anˇ jaˇ. Yeˍsuˆ kʼawꞈ teꞈ tu la˗oˬ tehꞈ mvuhˇ naw ma tcuh yaˇ teˇ gʼaˇ yawˇ hui htaꞈ kʼoˆ piˇ ve yoˬ. Yawˇ kʼoˆ ve, “nawˬ hui gʼuˇ suhˍ Gaˍliˍlehˇ mvuhˇ miˬ lo yawˇ kʼai peuˬ. Oˇ kaˬ lo nawˬ hui yawˇ htaꞈ gʼa mawˬ tuˬ yoˬ.”—Maꞈhtehˍ 28:1-7; Luˉkaꞈ 23:56; 24:10.

² Yaˇ miˇ teˇ hpaˍ oˇ kaˬ lo tawˆ kai peuˬ hkʼawꞈ nawˉ, Yeˍsuˆ awˬ to yawˇ hui htaꞈ mawˬ tcuh leh kʼoˆ ve, “ngaˬ ve awˬ viˉ awˬ nyi teˇ hpaˍ htaꞈ Gaˍliˍlehˇ mvuhˇ miˬ lo kʼai tuˬ ca hto piˇ˗oˆ. Oˇ kaˬ lo yawˇ hui ngaˬ htaꞈ gʼa mawˬ tuˬ yoˬ.” (Maꞈhtehˍ 28:10) Yeˍsuˆ kʼawꞈ teꞈ tu la peuˬ hkʼawꞈ nawˉ, te ve awˉ lawˉ teˇ ceuˬ lehˬ awˬ laꞈ gʼawˇ htaꞈ mawˬ daꞈ tuˬ tinˍ daꞈ ve yoˬ. Yawˇ a yeˇ uiˍ jaˇ ve awˬ ceuˬ yawˇ hui htaꞈ kʼoˆ piˇ gaˇ ve yoˬ.

3-4. Maꞈhtehˍ liꞈ 28:19, 20 hkʼaw awˬ laꞈ gʼawˇ htaꞈ ceh kʼoˆ piˇ ve maˇ heˆ tehꞈ ngaˬ hui hkʼaˬ hkʼe te shiˍ gʼa ve le? (Awˬ htaꞈ hpawˇ ve awˬ han htaꞈ nyi sheˍ.)

³ Maꞈhtehˍ liꞈ 28:16-20 gʼaw sheˍ. Yeˍsuˆ awˬ laꞈ gʼawˇ htaꞈ mawˬ daꞈ htaˇ, a yeˇ uiˍ jaˇ ve kanˉ te tuˬ kʼoˆ piˇ ve yoˬ. Chi beuꞈ ngaˬ hui te chehˇ ve hkʼa shuˍ yoˬ. Yawˇ kʼoˆ ve, ‘nawˬ hui kʼai leh chaw ceuˬ hkʼa  peu˗eˬ ngaˬ ve awˬ laꞈ gʼawˇ hpehꞈ la tuˬ ca te˗o. Ngaˬ nawˬ hui htaꞈ piˇ taˍ ve tawˇ hkawˇ hkʼa peu˗eˬ na yuˬ leh te tuˬ, yawˇ hui htaꞈ maˍ piˇ˗oˆ.’

⁴ Yeˍsuˆ yawˇ awˬ hkʼaˇ suh gʼaꞈ yuˬ ve chaw teˇ gʼaˇ le le htaꞈ hto toˇ tcuh gaˇ ve yoˬ. Ka tiꞈ yeˬ ve tcuh yaˇ 11 gʼaˇ htaꞈ kʼoˆ piˇ ve ceh maˇ heˆ. Aˬ htoꞈ ma te awˬ lawn chi ngaˬ hui shiˍ ve le? Awˬ lawn kʼo, Gaˍliˍlehˇ hkʼaw pui hkʼoˆ lo Yeˍsuˆ bon maˍ htaˇ, tcuh yaˇ hui ceh oˇ kaˬ lo chehˇ taˍ ve maˇ heˆ. Mvuhˇ naw ma tcuh yaˇ, yaˇ miˇ hui htaꞈ kʼoˆ piˇ ve dawˇ nyi sheˍ. Yawˇ kʼoˆ ve, nawˬ Gaˍliˍlehˇ mvuhˇ miˬ lo Yeˍsuˆ htaꞈ mawˬ tuˬ yoˬ. Yeˍsuˆ kʼoˆ htaˇ yawˇ hui oˇ kaˬ lo gʼa chehˇ taˍ cawˇ ve yoˬ. Yaꞈ hkʼaˇ, chi hkʼe ceh maˇ heˆ. Tcuh yaˇ Pawˇluꞈ kaꞈ kʼoˆ ve, “teˇ pawˆ tiˉ awˬ viˉ awˬ nyi ngaˇ ha gʼaˇ hpaˆ htaꞈ kaꞈ yawˇ awˬ to kʼawꞈ maw piˇ ve yoˬ.” (1 Kawˇrenˍhtuˆ 15:6) Pawˇluꞈ hkʼaˬ kaˬ lo ve htaꞈ kʼoˆ gaˇ ve le?

5. Ngaˬ hui 1 Kawˇrenˍhtuˆ liꞈ 15:6 leh Maꞈhtehˍ liꞈ kaˇ nanˉ uiˍ 28 shuˍ daꞈ ve tehꞈ hkʼaˬ hkʼe te shiˍ gʼa ve le?

⁵ Pawˇluꞈ kʼoˆ ve, 1 Kawˇrenˍhtuˆ liꞈ 15:6 leh Maꞈhtehˍ liꞈ kaˇ nanˉ uiˍ 28 shuˍ daꞈ ve tehꞈ ngaˬ hui gʼa shiˍ ve yoˬ. Awˉ lawˉ teˇ hkʼaˇ lehˬ Yeˍsuˆ ve awˬ laꞈ gʼawˇ maˇ˗awˍ ve Gaˍliˍlehˇ chaw hpehꞈ ve pa taw, Yeˍruˆsaˍlehnˍ venˇ lo hpawnˬ daꞈ ve aꞈ kehˉ Gaˍliˍlehˇ mvuhˇ miˬ lo hpawnˬ daꞈ ve yoˬ. Nyiˇ hkʼaˇ lehˬ Yeˍsuˆ teꞈ tu la peuˬ hkʼawꞈ nawˉ, tcuh yaˇ 11 gʼaˇ htaꞈ Yeˍruˆsaˍlehnˍ venˇ lo mawˬ daꞈ taˉ˗oˬ ve yoˬ. Yawˇ tcuh yaˇ 11 gʼaˇ htaꞈ ceh bon maˍ˗e leh shu awˬ laꞈ gʼawˇ hpehꞈ la tuˬ te tcuh gaˇ ve kʼo, yawˇ oˇ kaˬ lo maˍ piˇ kaꞈ gʼa ve yoˬ. Yaˇ miˇ teˇ hpaˍ leh awˬ kaˍ awˬ nu ve chaw Gaˍliˍlehˇ mvuhˇ miˬ lo kʼai tcuh tuˬ maˇ loˍ.—Luˉkaꞈ 24:33, 36.

6. Maꞈhtehˍ liꞈ 28:20 hkʼaw shu awˬ laꞈ gʼawˇ hpehꞈ la tuˬ ca te˗o kʼoˆ ve, chi beuꞈ teˇ co˗e kaꞈ kʼoˆ gaˇ ve tehꞈ ngaˬ hui hkʼaˬ hkʼe shiˍ gʼa ve le? Leh chi beuꞈ teˇ co˗e chi ve htaꞈ hkʼaˬ hkʼe gʼaꞈ te chehˇ ve le?

⁶ A yeˇ uiˍ ve shehˆ hkʼaˇ lehˬ shu awˬ laꞈ gʼawˇ hpehꞈ la tuˬ ca te tcuh ve, oˇ htaˇ teˇ co˗e ve Hkriꞈ yaˇ ceh maˇ heˆ. Ngaˬ hui hkʼaˬ hkʼe te shiˍ gʼa ve le? Yeˍsuˆ kʼoˆ piˇ ve, “miˬ guiˬ chi awˬ yanˇ leh htaˇ hkʼa gaˬ, ngaˬ nawˬ hui geh hkʼaˬ htaˆ kaꞈ chehˇ tuˬ yoˬ.” (Maꞈhtehˍ 28:20) Yeˍsuˆ ve tawˇ hkawˇ chi beuꞈ teˇ co˗e kaꞈ awˬ tehˬ hpehꞈ la chehˇ ve yoˬ. Chaw maˇ maˇ yawˇ ve tawˇ hkawˇ htaꞈ gʼaꞈ te chehˇ ve yoˬ. Dawˇ nyi sheˍ! Teˇ hkʼawꞈ le le 300,000 gʼaˇ Baˆtiˆsaˬ haꞈ yuˬ leh Yeˍsuˆ ve awˬ laꞈ gʼawˇ hpehꞈ la chehˇ ve yoˬ!

7. Ngaˬ hui aˬ htoꞈ ma ve awˬ lawn htaꞈ henˇ tuˬ le?

⁷ Laiˉ gʼaˇ Liꞈ hpu henˇ ve uiˍ la mvuh la leh Baˆtiˆsaˬ haꞈ yuˬ ve yoˬ. Chaw teˇ hpaˍ hpaˍ awˬ yanˇ cawˇ cawˇ Liꞈ hpu henˇ ve htawˇ, Yeˍsuˆ ve awˬ laꞈ gʼawˇ hpehꞈ la tuˬ htawˇ dawˇ nawˬ dawˇ cawˬ ve yoˬ. Yawˇ hui Liꞈ hpu henˇ ve dawˇ cawˇ ve htawˇ, Baˆtiˆsaˬ maˇ haꞈ yuˬ sheˍ. Nawˬ geh Liꞈ hpu henˇ ve chaw cawˬ ve kʼo, henˇ taˍ ve htaꞈ gʼaꞈ te leh Yeˍsuˆ ve awˬ laꞈ gʼawˇ hpehꞈ la tuˬ nawˬ ga piˇ gaˇ ve tehꞈ ngaˬ hui yonˍ gʼa ve yoˬ. Liꞈ hpu henˇ ve chaw nyi ma hkʼaw gaˬ tuˬ, yawˇ Yaˬhoˉvaˬ htaꞈ haꞈ tuˬ, leh uiˍ la mvuh la tuˬ ga piˇ ve awˬ lawn chi ve hkʼaw henˇ tuˬ yoˬ. Aˬ htoꞈ ma te ngaˬ hui awˬ lawn chi htaꞈ henˇ ve le? Teˇ pawˆ pawˆ kʼo Liꞈ hpu henˇ ve chaw teˇ gʼaˇ gʼaˇ geh maˇ kʼawꞈ maˍ piˇ tuˬ ngaˬ hui dawˇ cheˆ cawˇ ve pa taw yoˬ.

8. Liꞈ hpu henˇ ve chaw Yaˬhoˉvaˬ htaꞈ haꞈ tuˬ ga piˇ ve aˬ htoꞈ ma te haˍ jaˇ ve le?

⁸ Chaw yaˇ Yaˬhoˉvaˬ htaꞈ haꞈ leh yawˇ ve kanˉ te tuˬ dawˇ law ve yoˬ. Chi htaꞈ pa taw, Yaˬhoˉvaˬ Liꞈ hpu henˇ ve chaw htaꞈ dawˇ haˍ leh haꞈ ve tehꞈ yawˇ shiˍ tuˬ ngaˬ hui ga piˇ gaˇ ve yoˬ. “Gʼuiˬ sha lehˬ, yaˇ cuˬ shi teˇ hpaˍ leh mehˇ chawˇ ma teˇ hpaˍ htaꞈ haꞈ shaˉ chehˇ ve” tehꞈ yawˇ shiˍ tuˬ ngaˬ hui ga piˇ gaˇ ve yoˬ. (Chiˇ mvuh ve 68:5) Liꞈ hpu henˇ ve chaw Yaˬhoˉvaˬ yawˇ htaꞈ hkʼaˬ hkʼe taw haꞈ ve shiˍ htaˇ, yawˇ kaꞈ Yaˬhoˉvaˬ htaꞈ haꞈ la ve yoˬ. Liꞈ hpu henˇ ve chaw teˇ hpaˍ Yaˬhoˉvaˬ yawˇ htaꞈ  haꞈ ve Awˬ pa hpehꞈ ve dawˇ tuˬ haˍ jaˇ. Yawˇ ve awˬ pa yawˇ htaꞈ maˇ haꞈ piˇ jaw ve pa taw yoˬ. (2 Tiˆmoˉseˍ 3:1, 3) Liꞈ hpu henˇ ve chaw htaꞈ Yaˬhoˉvaˬ ve te hkʼaˇ dawˇ hkʼaˇ maˍ piˇ htaˇ, Yaˬhoˉvaˬ yawˇ htaꞈ co co taiˍ taiˍ a shaꞈ gʼa tcuh gaˇ ve, leh Yaˬhoˉvaˬ yawˇ htaꞈ ga piˇ gaˇ ve tehꞈ shiˍ tcuh sheˍ. Ngaˬ hui gʼa te cawˇ ve aˬ htoꞈ ma cawˬ sheˍ ve le?

9-10. Ngaˬ hui Liꞈ hpu henˇ ve chaw geh liꞈ kʼoˆ hkʼaˬ ve yehˇ leh maˍ piˇ tuˬ le?

⁹ “Liꞈ hpu ngaˬ hui htaꞈ aˬ htoꞈ ma maˍ laˇ gʼa ve le?” leh “Gʼuiˬ sha hkʼaˬ htaˆ kaꞈ haꞈ laˇ tuˬ hkʼaˬ hkʼe gʼa te ve le?” liꞈ kʼoˆ chi ve teˇ hpaˍ htaꞈ yehˇ sheˍ. Liꞈ kʼoˆ chi ve teˇ hpaˍ lehˬ Liꞈ hpu henˇ ve chaw nyi ma hkʼaw gaˬ tuˬ leh yawˇ Yaˬhoˉvaˬ htaꞈ haꞈ tuˬ ga piˇ ve yoˬ. Tawˇ pa haˉ te kʼo, ngaˬ hui htaꞈ maˍ laˇ ve, awˬ lawn 1 hkʼaw Gʼuiˬ sha ngaˬ hui htaꞈ a yeˇ yuˬ laˇ ve laˇ?, maˇ heˆ leh yawˇ nyi ma heh ve laˇ?, hkʼawꞈ laˇ hkawˇ cawˬ ve yoˬ. Chaw yaˇ tuꞈ hkanˍ chehˇ htaˇ, Gʼuiˬ sha hkʼaˬ hkʼe dawˇ ve le? Nawˬ Yaˬhoˉvaˬ ve awˬ chawˇ hpehꞈ gʼa˗aw laˇ? Gʼuiˬ sha haꞈ laˇ tuˬ, Liꞈ hpu henˇ ve chaw na gʼa leh Liꞈ hpu hkʼaw ve awˬ liˇ awˬ hkʼaˇ yawˇ a shaꞈ teꞈ kuiˬ hkʼaw yuˬ yehˇ htaˇ daꞈ la ve leh hkʼaˬ hkʼe te Gʼuiˬ sha geh  meuˆ daꞈ la tuˬ, Liꞈ hpu henˇ ve chaw htaꞈ ga piˇ ve yoˬ. Nawˬ liꞈ kʼoˆ chi yehˇ leh shu htaꞈ maˍ piˇ jaw˗oˬ ve htawˇ, Liꞈ hpu henˇ ve chaw teˇ gʼaˇ leh teˇ gʼaˇ loˍ ve htaꞈ dawˇ nyi leh gu cawˇ ve yoˬ.

¹⁰ “Maˍ piˇ tuˬ ve laꞈ caˉ hkʼa dehꞈ yehˇ sheˍ” Chi ve hkʼaw maˇ cawˬ ve Liꞈ hpu henˇ ve chaw shiˍ gaˇ ve kʼo˗ehꞈ? Ngaˬ hui htaꞈ maˍ laˇ ve, leh Gʼuiˬ sha haꞈ laˇ tuˬ, caˉ leh kʼawꞈ maˍ tuˬ Liꞈ kʼoˆ chi yawˇ hkʼaˇ yawˇ gʼaw tuˬ ga piˇ sheˍ.

11. Liꞈ hpu henˇ ve chaw geh ngaˬ hui bon hkʼaˬ htaˆ lawˬ cawˇ ve le? Leh bon lawˬ ve a yeˇ uiˍ jaˇ ve tehꞈ yawˇ hui na gʼa tuˬ hkʼaˬ hkʼe ga piˇ gʼa tuˬ le?

¹¹ Liꞈ hpu maˇ henˇ sheˍ htaˇ bon awˉ lawˉ lawˬ sheˍ. Liꞈ hpu henˇ ve chaw geh tanˬ maˍ piˇ htaˇ leh hpehˇ htaˇ bon lawˬ cawˇ ve yoˬ. Ngaˬ hui Liꞈ hpu maˍ piˇ ve 2-3 pawˆ gaˬ kʼo bon lawˬ cawˇ ve yoˬ. Liꞈ hpu henˇ ve chaw Liꞈ hpu hkʼaw ve hkʼa dehꞈ na gʼa tuˬ Gʼuiˬ sha ve daꞈ kehˬ ve awˬ ha hpu ceh tiˉ ga laˇ gʼa ve tehꞈ shiˍ tuˬ ga piˇ sheˍ. Awˬ viˉ awˬ nyi teˇ hpaˍ kʼo Yaˍkoˆ liꞈ 1:5 hkʼaw Liꞈ hpu henˇ ve chaw geh bon lawˬ ve awˬ lawn yaw daꞈ ve yoˬ. Oˇ kaˬ lo kʼoˆ ve, “nawˬ hui awˬ hkʼaw lo teˇ gʼaˇ gʼaˇ cuˇ yiˍ maˇ biˇ ve kʼo, Gʼuiˬ sha geh lawˬ˗oꞈ.” Peuˬ hkʼawꞈ nawˉ Liꞈ hpu henˇ ve chaw htaꞈ na piˇ ve, “ngaˬ hui hkʼaˬ hkʼe te leh Gʼuiˬ sha geh cuˇ yiˍ lawˬ gʼa tuˬ le?” Chi hkʼe te ve lehˬ ngaˬ hui Gʼuiˬ sha geh bon lawˬ cawˇ ve tehꞈ Liꞈ hpu henˇ ve chaw na gʼa tuˬ ga piˇ ve yoˬ.

12. Nawˬ Chiˇ mvuh ve liꞈ 139:2-4 hkʼaw cuˇ leh Liꞈ hpu henˇ ve chaw bon lawˬ ve hkʼaw Yaˬhoˉvaˬ geh yaw daꞈ tuˬ hkʼaˬ hkʼe ga piˇ gʼa tuˬ le?

¹² Liꞈ hpu henˇ ve chaw htaꞈ bon lawˬ ve maˍ piˇ sheˍ. Yawˇ nyi ma awˬ tawˍ hkʼa gaˬ bon lawˬ ve Yaˬhoˉvaˬ na gaˇ ve tehꞈ shiˍ tuˬ ga piˇ sheˍ. Yaˬhoˉvaˬ geh a shu yawˇ hkʼaˇ yawˇ bon lawˬ htaˇ, nyi ma hkʼaw cawˬ ve leh shu geh maˇ yaw daꞈ haˆ ve tawˇ kʼoˆ piˇ gʼa ve tehꞈ yawˇ na gʼa tuˬ ga piˇ sheˍ. Awˬ tehˬ kʼo, ngaˬ hui nyi ma hkʼaw hkʼaˬ hkʼe dawˇ ve Yaˬhoˉvaˬ shiˍ ve yoˬ. (Chiˇ mvuh ve 139:2-4 gʼaw sheˍ.) Chi hkʼoˆ kaꞈ Liꞈ hpu hanˇ ve chaw yawˇ ve te hkʼaˇ dawˇ hkʼaˇ maˇ daꞈ ve pa tuˬ, Yaˬhoˉvaˬ gʼa ga laˇ tcuh ve tehꞈ awˬ gʼaˇ piˇ sheˍ. Tawˇ pa haˉ te kʼo, Hkriꞈ yaˇ maˇ te cawˇ ve pawehˇ, Liꞈ hpu henˇ ve chaw teˇ hpaˍ te chehˇ sheˍ. Chi yaꞈ ve tehꞈ yawˇ shiˍ ve htawˇ te chehˇ sheˍ. Liꞈ hpu henˇ ve chaw hkʼaˬ hkʼe dawˇ ve bon lawˬ ve hkʼaw Yaˬhoˉvaˬ htaꞈ hteˇ˗ehꞈ kʼoˆ piˇ tuˬ awˬ gʼaˇ piˇ leh, Yaˬhoˉvaˬ haꞈ ve ceh tiˉ yawˇ haꞈ tuˬ Yaˬhoˉvaˬ ga laˇ tcuh sheˍ.—Chiˇ mvuh ve 97:10.

13. (a) Aˬ htoꞈ ma te Liꞈ hpu henˇ ve chaw hpawnˬ daꞈ kuiˬ hkʼaw haˆ la tuˬ jehˬ piˇ cawˇ ve le? (b) Liꞈ hpu henˇ ve chaw hpawnˬ daꞈ la htaˇ nyi ma sha tuˬ hkʼaˬ hkʼe ga piˇ gʼa ve le?

¹³ Liꞈ hpu henˇ ve chaw hpawnˬ daꞈ ve kʼai gʼa tuˬ haˆ jehˬ piˇ sheˍ. Liꞈ hpu henˇ ve chaw hpawnˬ daꞈ kuiˬ hkʼaw mawˬ ve, kaˇ ve, yawˇ Yaˬhoˉvaˬ ve kanˉ te gaˇ tuˬ te piˇ leh uiˍ la mvuh la ve yoˬ. Hpawnˬ daꞈ kuiˬ lo ngaˬ hui aˬ htoꞈ ma ca te ve le?, VDO yawˇ htaꞈ nyi tcuh leh hpawnˬ daꞈ la tuˬ jehˬ piˇ sheˍ. Nawˬ te gʼa ve kʼo yawˇ aˉ hkʼaw gʼawˬ la tuˬ kʼoˆ piˇ sheˍ. Chi hkʼoˆ kaꞈ, Liꞈ hpu henˇ ve chaw hpawnˬ daꞈ la htaˇ, Hkriꞈ yaˇ awˬ moˍ hkʼaw ve chaw htaꞈ shiˍ daꞈ leh nyi ma sha tuˬ, yawˇ geh Liꞈ hpu maˍ piˇ htaˇ awˬ viˉ awˬ nyi htaꞈ teˇ gʼaˇ teˇ pawˆ shiˍ kʼai cawˇ ve yoˬ.

14. Liꞈ hpu henˇ ve chaw uiˍ la mvuh la tuˬ hkʼaˬ hkʼe ga piˇ gʼa ve le?

¹⁴ Ngaˬ hui dawˇ teh taˍ ve lehˬ Liꞈ hpu henˇ ve chaw uiˍ la mvuh la tuˬ ga piˇ ve yoˬ. (Eˇfeˇsuꞈ 4:13) Chaw teˇ hpaˍ ngaˬ hui geh Liꞈ hpu henˇ ve lehˬ yawˇ awˬ bon gʼa tuˬ htaꞈ ceh dawˇ nyi ve yoˬ. Yaꞈ hkʼaˇ, yawˇ Yaˬhoˉvaˬ htaꞈ haꞈ maˇ la htaˇ, yawˇ awˬ nu ve chaw leh Hkriꞈ yaˇ awˬ moˍ hkʼaw ve chaw htaꞈ kaꞈ ga piˇ gaˇ ve yoˬ. (Maꞈhtehˍ 22:37-39) Chi htaꞈ pa taw, Gʼuiˬ sha ve mvuhˇ miˬ awˬ pon hpu tanˇ tanˇ piˇ tuˬ Liꞈ hpu henˇ ve chaw htaꞈ kʼoˆ piˇ tuˬ htawˇ dawˇ nawˬ dawˇ taˇ cawˬ.

15. Liꞈ hpu henˇ ve chaw shoꞈ shaꞈ ve cawˬ htaˇ hkʼaˬ hkʼe ga piˇ gʼa tuˬ le?

 ¹⁵ Liꞈ hpu henˇ ve chaw shoꞈ shaꞈ htaˇ hkʼaˬ hkʼe te tuˬ maˍ piˇ sheˍ. Liꞈ hpu henˇ ve chaw Baˆtiˆsaˬ maˇ haꞈ yuˬ sheˍ ve, Hkriꞈ yaˇ awˬ moˍ hkʼaw ve chaw htaꞈ maˇ hawˍ daꞈ ve kʼo, a shu cawˇ maˇ cawˇ ve kʼoˆ piˇ ve aꞈ kehˉ, awˬ lawn chi htaꞈ caˉ daꞈ ve Liꞈ hpu hkʼaw hkʼaˬ hkʼe ga laˇ gʼa ve teˇ geh nyi˗a kʼoˆ maˍ piˇ gʼa ve yoˬ. Yawˇ venˇ baˆ hpehˇ piˇ gʼa leh awˬ lawn oˇ ve htaꞈ maˇ kʼawꞈ dawˇ nyi˗o. Chi yawˇ te maˇ gʼa ve kʼo, oˇ ve teˇ gʼaˇ geh kʼai leh nyi ma gawˬ lehˍ ve hkʼaw ‘awˬ viˉ awˬ nyi htaꞈ kʼawꞈ gʼa’ hkʼawꞈ tuˬ haꞈ pehnˇ ve hkʼaw cawˇ ve htaꞈ te gʼa tuˬ dawˇ teh taˍ gʼa ve yoˬ. (Maꞈhtehˍ liꞈ 18:15 htaꞈ tehˆ daꞈ sheˍ.) Liꞈ hpu henˇ ve chaw, oˇ ve teˇ gʼaˇ htaꞈ tawˇ hkʼaˬ hkʼe yaw daꞈ tuˬ teˇ geh gu leh ga piˇ sheˍ. JW laiˉbaˍ liˍ ehˆ, Yaˬhoˉvaˬ ve Shaˉhkiˆhkanˍ ve chaw hui ve hpfuhˆ nyi kuiˬ liꞈ kʼoˆ, leh vehˆsaiˉ jw.org hkʼaw shoꞈ shaꞈ ve htaꞈ gu tuˬ ve awˬ hkʼaˇ maˍ piˇ sheˍ. Yawˇ Baˆtiˆsaˬ maˇ haꞈ yuˬ sheˍ htaˇ shu geh shoꞈ shaꞈ ve cawˬ htaˇ gu tuˬ awˬ hkʼaˇ shiˍ ve kʼo, Baˆtiˆsaˬ haꞈ yuˬ peuˬ hkʼawꞈ nawˉ kaꞈ Hkriꞈ yaˇ awˬ moˍ hkʼaw ve chaw htaꞈ cawˇ daꞈ tuˬ awˬ hkʼaˇ shiˍ ve yoˬ.

16. Awˬ viˉ awˬ nyi teˇ geh Liꞈ hpu maˍ˗e tuˬ jehˬ piˇ ve aˬ htoꞈ ma te daꞈ ve le?

¹⁶ Hkriꞈ yaˇ awˬ moˍ hkʼaw ve chaw maˇ heˆ leh toˇ nyi shehˍ hpaˇ htaꞈ Liꞈ hpu henˇ ve chaw geh Liꞈ hpu maˍ˗e tuˬ jehˬ piˇ sheˍ. Aˬ htoꞈ ma pa taw le? Henˇ peuˬ˗oˬ ve hkʼa shuˍ Liꞈ hpu henˇ ve chaw htaꞈ nawˬ ga piˇ maˇ gʼa ve kʼo, awˬ viˉ awˬ nyi ga piˇ gʼa tuˬ yoˬ. Tawˇ pa haˉ te kʼo, Liꞈ hpu henˇ ve chaw shuˉ maˇ dawˬ tuˬ coˇ caˇ ve htawˇ, kʼawꞈ dawˬ ve yoˬ. Liꞈ hpu henˇ ve chaw te ve hkʼe, awˬ viˉ awˬ nyi te jaw ve htaꞈ jehˬ kʼai sheˍ. Yawˇ Liꞈ hpu henˇ ve chaw htaꞈ beˆ maˍ piˇ leh awˬ bon cawˬ tuˬ yoˬ. Awˬ viˉ awˬ nyi hawˉ hkʼaˆ hpehꞈ laˬ jaw ve geh teˇ geh Liꞈ hpu maˍ htaˇ nawˬ yaꞈ taw ve kʼo, awˬ viˉ awˬ nyi hawˉ hkʼaˆ Liꞈ hpu maˍ ve sheh kʼai tuˬ nawˬ lawˬ gʼa ve yoˬ. Nawˬ awˬ viˉ awˬ nyi htaꞈ jehˬ kʼai ve kʼo, yawˇ ve awˬ lawn Liꞈ hpu henˇ ve chaw awˬ bon gʼa tuˬ yoˬ. Ngaˬ hui dawˇ teh taˍ ve lehˬ Liꞈ hpu henˇ ve chaw uiˍ la mvuh la tuˬ ga piˇ ve yoˬ.

17-18. Liꞈ hpu henˇ ve chaw geh Liꞈ hpu henˇ ve jehˇ tuˬ kʼoˆ piˇ htaˇ, nawˬ aˬ htoꞈ ma htaꞈ dawˇ nyi cawˇ ve le?

¹⁷ Nawˬ geh Liꞈ hpu henˇ ve chaw maˇ uiˍ la mvuh la ve kʼo, a shu yawˇ awˬ to htaꞈ na nyi cawˇ ve, ‘yawˇ geh Liꞈ hpu maˍ ve jehˇ cawˇ˗aw laˇ?’ Maˇ dawˇ cheˆ sheˍ htaˇ, Liꞈ hpu henˇ ve chaw hkʼaˬ hkʼe taw te gʼa ve htaꞈ awˉ lawˉ dawˇ nyi cawˇ ve yoˬ. Teˇ gʼaˇ gʼaˇ kʼo, uiˍ la mvuh la tuˬ awˬ yanˇ gʼa yehˇ ve yoˬ. A shu yawˇ awˬ to htaꞈ na nyi cawˇ ve, ‘Liꞈ hpu henˇ ve chaw chi teˇ gʼaˇ uiˍ la mvuh la chehˇ˗aw laˇ? Yawˇ gʼa henˇ taˍ ve htaꞈ “na yuˬ” leh gʼaꞈ te˗aw laˇ?’ (Maꞈhtehˍ 28:20) Liꞈ hpu henˇ ve chaw teˇ gʼaˇ gʼaˇ kʼo maˇ uiˍ la mvuh la vaiˇ ve htawˇ, yawˇ ve a shaꞈ teꞈ hkʼaˇ pa leh awˬ meu˗eˇ awˬ meu˗eˇ uiˍ la chehˇ ve tehꞈ hpeuꞈ maw laˇ ve yoˬ.

¹⁸ Liꞈ hpu henˇ ve chaw henˇ maw˗oˬ ve htawˇ, a yeˇ hkʼa dehꞈ maˇ te laˇ ve kʼo˗ehꞈ? Ngaˬ hui htaꞈ maˍ laˇ ve, liꞈ kʼoˆ maˇ heˆ leh Gʼuiˬ sha haꞈ laˇ tuˬ, ve  liꞈ kʼoˆ yawˇ henˇ peuˬ˗oˬ ve yoˬ. Yaꞈ hkʼaˇ, maˇ hpawnˬ daꞈ la jaw sheˍ. Yeˍsuˆ suh ve dawˇ nawˇ tuˬ hpawnˬ daꞈ ve kaꞈ maˇ laˬ jaw. Liꞈ hpu henˇ tuˬ awˬ yanˇ tinˍ piˇ ve htawˇ, maˇ chehˇ. Liꞈ hpu henˇ ve chaw chi hkʼe hpehꞈ ve kʼo, yawˇ geh yaw daꞈ sheˍ. *

19. Liꞈ hpu henˇ ve chaw Liꞈ hpu maˍ piˇ ve htaꞈ a yeˇ hkʼa dehꞈ maˇ te laˇ ve kʼo, nawˬ hkʼaˬ hkʼe kʼoˆ piˇ tuˬ le? Nawˬ aˬ htoꞈ ma htaꞈ dawˇ nyi cawˇ ve le?

¹⁹ Nawˬ yawˇ htaꞈ na nyi piˇ ve, ‘Yaˬhoˉvaˬ ve Shaˉhkiˆhkanˍ ve chaw hpehꞈ tuˬ haˍ jaˇ ve aˬ htoꞈ ma le?’ Yawˇ hkʼawꞈ laˇ ve, ‘ngaˬ Liꞈ hpu henˇ ve dawˇ cawˇ ve htawˇ, Shaˉhkiˆhkanˍ ve chaw maˇ te taˬ!’ Liꞈ hpu henˇ ve maw˗oˬ ve htawˇ yawˇ chi hkʼe hkʼawꞈ laˇ ve kʼo, yawˇ geh Liꞈ hpu maˍ ve jehˇ cawˇ ve yoˬ. Nawˬ chi hkʼe na piˇ htaˇ, Liꞈ hpu henˇ ve chaw yawˇ maˇ uiˍ la mvuh la ve awˬ hkʼaˇ nawˬ maˇ gʼa kaˇ jaw ve kʼoˆ maˍ laˇ tuˬ yoˬ hehˉ. Tawˇ pa haˉ te kʼo, yawˇ teˇ yehˬ peuˬ teˇ yehˬ hto toˇ maˇ gʼa taˬ tehꞈ dawˇ ve yoˬ. Nawˬ Liꞈ hpu henˇ ve chaw hkʼaˬ hkʼe dawˇ ve shiˍ˗oˬ htaˇ, yawˇ htaꞈ ga piˇ tuˬ awˬ hkʼaˇ sha ve yoˬ.

20. Liꞈ hpu henˇ ve chaw htaꞈ maˍ piˇ tuˬ laˇ, jehˇ cawˇ ve laˇ shiˍ tuˬ Tcuh yaˇ liꞈ 13:48 hkʼaw ngaˬ hui htaꞈ hkʼaˬ hkʼe ga laˇ ve le?

²⁰ Liꞈ hpu henˇ ve chaw Yeˍsaˍkeˍlaˆ ve awˬ co˗e htaˇ Iˉsaˍreˍlaˆ chaw hkʼe hpehꞈ ve sheˉ lai jaˇ. Yaˬhoˉvaˬ Yeˍsaˍkeˍlaˆ htaꞈ kʼoˆ piˇ ve, “nawˬ lehˬ yawˇ hui awˬ pon tinˍ hteˆ leh kʼa muiˬ hkawˇ kʼa maˍ piˇ paˍ hkʼe ceh hpehꞈ ve yoˬ. Yawˇ hui lehˬ nawˬ ve tawˇ htaꞈ kaˇ chehˇ ve htawˇ, teˇ hkawˇ htaꞈ kaꞈ maˇ na yuˬ.” (Yeˍsaˍkeˍlaˆ 33:32) Liꞈ hpu henˇ ve chaw geh jehˇ tuˬ kʼoˆ piˇ ve haˍ jaˇ. Chi teˇ hkui “awˬ yanˇ ngeh jaˇ peuˬ.” (1 Kawˇrenˍhtuˆ 7:29) Maˇ uiˍ la mvu la ve chaw geh awˬ yanˇ shonˇ chehˇ ve aꞈ kehˉ “co tiꞈ ha tiꞈ htaꞈ gʼa tuˬ awˬ pon hkʼa fuiˍ taˍ ve chaw hui” htaꞈ ngaˬ hui coˇ caˇ leh ca cawˇ ve yoˬ.—Tcuh yaˇ 13:48 gʼaw sheˍ.

21. 2020 hkʼawꞈ a yeˇ uiˍ jaˇ ve Liꞈ hpu awˬ tawn aˬ htoꞈ ma le? Aˬ htoꞈ ma te Liꞈ hpu awˬ tawn chi daꞈ jaˇ ve le?

²¹ 2020 hkʼawꞈ a yeˇ uiˍ jaˇ ve Liꞈ hpu awˬ tawn shu awˬ laꞈ gʼawˇ hpehꞈ la tuˬ ve awˬ hkʼaˇ ngaˬ hui htaꞈ maˍ laˇ leh dawˇ nyi tuˬ te laˇ ve yoˬ. Liꞈ hpu awˬ tawn chi lehˬ Gaˍliˍlehˇ hkʼaw lo Yeˍsuˆ kʼoˆ taˍ ve a yeˇ uiˍ jaˇ ve teˇ tawn hpehꞈ ve ‘nawˬ hui kʼai leh chaw ceuˬ hkʼa peu˗eˬ ngaˬ ve awˬ laꞈ gʼawˇ hpehꞈ la tuˬ ca te˗o. Yawˇ hui htaꞈ Baˆtiˆsaˬ piˇ˗oˆ.’—Maꞈhtehˍ 28:19.