1. Yaˬhoˉvaˬ kʼoˆ taˍ ve, ngaˬ hui ve awˬ co˗e aˬ htoꞈ ma hpehꞈ la tuˬ le?

 Yaˬhoˉvaˬ kʼoˆ taˍ ve, ngaˬ hui ve awˬ co˗e “awˬ nu ve mvuhˇ miˬ yaˇ teˇ chi gʼaˇ Yuˇdaꞈ chaw teˇ gʼaˇ geh laˬ leh, ngaˬ hui htawˇ nawˬ hui geh kʼai gaˇ ve yoˬ. Awˬ lawn kʼo, Gʼuiˬ sha nawˬ hui geh chehˇ taˍ ve htaꞈ ngaˬ hui gʼa kaˇ ve yoˬ.” (Zaˍhkaˍriˆ 8:23) Liꞈ hpu chi ve hkʼaw “Yuˇdaꞈ chaw” tcuhˉ kuiˬ lehˬ Gʼuiˬ sha ve daꞈ kehˬ ve awˬ ha hpu leuˆ yuˬ piˇ taˍ ve chaw htaꞈ kʼoˆ gaˇ ve yoˬ. Yawˇ hui ve awˬ nu ve awˬ meh lehˬ “Gʼuiˬ sha ve Iˉsaˍreˍlaˆ chaw” tehꞈ kʼoˆ ve yoˬ. (Gaˍlaˍtiˆ 6:16) Chi teˇ tawn hkʼaw “teˇ chi gʼaˇ” lehˬ miˬ guiˬ hkʼoˆ co co taiˍ taiˍ chehˇ tuˬ dawˇ law taˍ ve chaw htaꞈ kʼoˆ ve yoˬ. Yaˬhoˉvaˬ leuˆ yuˬ taˍ ve chaw htaꞈ awˬ bon naꞈ piˇ leh yawˇ hui geh oˉ kʼoˍ gʼa pui ve ngaˬ hui ha lehˬ jaˇ.

2. “Teˇ chi gʼaˇ” lehˬ leuˆ yuˬ piˇ taˍ ve chaw geh hkʼaˬ hkʼe te “kʼai” gʼa tuˬ le?

² Chi teˇ hkui miˬ guiˬ hkʼoˆ chehˇ sheˍ ve leuˆ yuˬ piˇ taˍ ve chaw teˇ gʼaˇ le le ve awˬ meh maˇ shiˍ gʼa. * Chi hkʼe hpehꞈ ve kʼo, miˬ guiˬ hkʼoˆ lo dawˇ law taˍ ve chaw teˇ hpaˍ, leuˆ yuˬ piˇ taˍ ve chaw geh hkʼaˬ hkʼe te “kʼai” gʼa tuˬ le? Liꞈ hpu hkʼaw kʼawꞈ nyi sheˍ. Oˇ kaˬ lo kʼoˆ ve, “teˇ chi gʼaˇ” lehˬ “Yuˇdaꞈ chaw teˇ gʼaˇ geh laˬ leh, ngaˬ hui htawˇ nawˬ hui geh kʼai gaˇ ve yoˬ. Awˬ lawn kʼo, Gʼuiˬ sha nawˬ hui geh chehˇ taˍ ve htaꞈ ngaˬ hui gʼa kaˇ ve yoˬ.” Awˉ lawˉ htaˇ Yuˇdaꞈ chaw teˇ gʼaˇ htaꞈ ceh tiˉ kʼoˆ ve yoˬ. Yaꞈ hkʼaˇ, awˬ leh meuˇ htaˇ “nawˬ hui” tcuhˉ kuiˬ lehˬ laiˉ gʼaˇ htaꞈ kʼoˆ gaˇ ve yoˬ. Chi htaꞈ pa taw, chi ve teˇ tawn hkʼaw Yuˇdaꞈ chaw tcuhˉ kuiˬ lehˬ leuˆ yuˬ piˇ taˍ ve chaw teˇ gʼaˇ htaꞈ ceh tiˉ kʼoˆ gaˇ ve maˇ heˆ. Yaꞈ hkʼaˇ, leuˆ yuˬ piˇ taˍ ve chaw hkʼa peu˗eˬ htaꞈ kʼoˆ gaˇ ve yoˬ. Maˇ leuˆ yuˬ taˍ ve chaw htawˇ, leuˆ yuˬ taˍ ve chaw geh Gʼuiˬ sha ve kanˉ te ve yoˬ. Yawˇ hui leuˆ yuˬ piˇ taˍ ve chaw htaꞈ  sheh kʼai paˍ tehꞈ maˇ dawˇ. Yeˍsuˆ lehˬ sheh kʼai paˍ hpehꞈ ve yoˬ.—Maꞈhtehˍ 23:10.

3. Awˬ lawn chi ve hkʼaw aˬ htoꞈ ma htaꞈ hkʼawꞈ tuˬ le?

³ Chi beuꞈ teˇ co˗e leuˆ yuˬ piˇ taˍ ve chaw ngaˬ hui geh chehˇ sheˍ. Chi htaꞈ pa taw, chaw teˇ hpaˍ hpaˍ htawˇ dawˇ nawˬ dawˇ cawˬ ve: (1) Leuˆ yuˬ piˇ taˍ ve chaw a shu yawˇ awˬ to htaꞈ hkʼaˬ hkʼe dawˇ nyi cawˇ ve le? (2) Yeˍsuˆ suh ve dawˇ nawˇ tuˬ hpawnˬ daꞈ ve te htaˇ hkaoˍ monˇ caˇ leh a pehˉ meuˇ gʼuiˬ dawˬ ve chaw htaꞈ hkʼaˬ hkʼe dawˇ nyi cawˇ ve le? (3) Hkaoˍ monˇ caˇ leh a pehˉ meuˇ gʼuiˬ dawˬ ve chaw kʼawꞈ maˇ la ve kʼo, ngaˬ hui aˬ htoꞈ ma htaꞈ dawˇ haˍ ve le? Awˬ lawn chi ve hkʼaw hkʼawꞈ laˇ tuˬ yoˬ.

4. Leuˆ yuˬ piˇ taˍ ve chaw 1 Kawˇrenˍhtuˆ liꞈ 11:27-29 hkʼaw shaˍ tiꞈ peꞈ laˇ ve htaꞈ hkʼaˬ hkʼe dawˇ nyi cawˇ ve le?

⁴ Leuˆ yuˬ piˇ taˍ ve chaw 1 Kawˇrenˍhtuˆ liꞈ 11:27-29 hkʼaw shaˍ tiꞈ peꞈ laˇ ve htaꞈ hkʼa dehꞈ dawˇ nyi cawˇ ve yoˬ. (Gʼaw sheˍ.) Leuˆ yuˬ piˇ taˍ ve chaw Yeˍsuˆ suh ve dawˇ nawˇ tuˬ hpawnˬ daꞈ ve te htaˇ, “maˇ keunˍ ve awˬ hkʼaw lo” hkaoˍ monˇ caˇ leh a pehˉ meuˇ gʼuiˬ dawˬ ve kʼo hkʼaˬ hkʼe te tuˬ le? Yawˇ hkaoˍ monˇ caˇ leh a pehˉ meuˇ gʼuiˬ dawˬ ve htawˇ, Yaˬhoˉvaˬ ve hteˇ ve cawˇ ve awˬ liˇ awˬ hkʼaˇ htaꞈ maˇ gʼaꞈ te kʼo maˇ keunˍ. (Heˍbrehˇ 6:4-6; 10:26-29) Leuˆ yuˬ piˇ taˍ ve chaw “laꞈ shawnˍ” gʼa gaˇ ve kʼo, yawˇ caˉ leh ka tiꞈ gʼa yeˬ ve yoˬ. ‘Mvuhˇ  naw ma lo taˆ˗e tuˬ, Gʼuiˬ sha lehˬ Yeˍsuˆ Hkriꞈ htaꞈ cuˇ leh kuˬ yuˬ ve htaꞈ gʼa htaˇ hkʼa gaˬ gʼaꞈ yuˬ tcuhˉ taˍ ve yoˬ.’—Hpiˇliˇpiˆ 3:13-16.

5. Leuˆ yuˬ piˇ taˍ ve chaw a shu yawˇ awˬ to htaꞈ hkʼaˬ hkʼe dawˇ nyi cawˇ ve le?

⁵ Yaˬhoˉvaˬ ve daꞈ kehˬ ve awˬ ha hpu lehˬ yawˇ ve kanˉ te ve chaw htaꞈ nyi ma nuˇ nehˬ tcuh gaˇ ve yoˬ. Uiˍ muiˬ caˆ muiˬ ve maˇ heˆ. (Eˇfeˇsuꞈ 4:1-3; Kawˇlawˇsehˇ 3:10, 12) Chi htaꞈ pa taw, leuˆ yuˬ piˇ taˍ ve chaw shu aꞈ kehˉ daꞈ ve maˇ heˆ leh yawˇ ve daꞈ kehˬ ve awˬ ha hpu yawˇ ve kanˉ te ve chaw aꞈ kehˉ peꞈ laˇ maˇ ve tehꞈ yawˇ hui maˇ dawˇ. Yawˇ awˬ viˉ awˬ nyi aꞈ kehˉ Liꞈ hpu hkʼaw hkʼa dehꞈ na gʼa ve tehꞈ maˇ dawˇ cawˇ. “Nawˬ kaꞈ leuˆ yuˬ piˇ taˍ ve chaw hpehꞈ ve” tehꞈ awˬ viˉ awˬ nyi htaꞈ maˇ kʼoˆ piˇ ve awˬ hkʼoˆ kaꞈ Yeˍsuˆ suh ve dawˇ nawˇ tuˬ hpawnˬ daꞈ ve te htaˇ, hkaoˍ monˇ caˇ leh a pehˉ meuˇ gʼuiˬ dawˬ cawˇ ve tehꞈ kaꞈ maˇ kʼoˆ piˇ. Chi hkʼe te ve aꞈ kehˉ yawˇ nyi ma nuˇ nehˬ leh, Yaˬhoˉvaˬ teˇ gʼaˇ ceh tiˉ leuˆ yuˬ ve tehꞈ shiˍ cawˇ ve yoˬ.

6. Leuˆ yuˬ piˇ taˍ ve chaw 1 Kawˇrenˍhtuˆ liꞈ 4:7, 8 hkʼaw kʼoˆ taˍ ve hkʼe, hkʼaˬ hkʼe te cawˇ ve le?

⁶ Mvuhˇ naw ma hkʼoˆ taˆ˗e tuˬ a hkaw˗anˬ cawˬ ve htawˇ, yawˇ htaꞈ shu aꞈ kehˉ yawˆ yan laˇ tuˬ maˇ dawˇ law. (Hpiˇliˇpiˆ 2:2, 3) Leuˆ yuˬ piˇ taˍ ve chaw Yaˬhoˉvaˬ yawˇ htaꞈ leuˆ yuˬ laˇ htaˇ, Yaˬhoˉvaˬ awˬ lawn chi awˬ nu ve chaw shiˍ tuˬ maˇ kʼoˆ piˇ. Yawˇ leuˆ yuˬ ve chaw hpehꞈ ve tehꞈ shu laꞈ haˉ maˇ yonˍ ve htawˇ, maˇ anˇ. Chi hkʼoˆ kaꞈ, Gʼuiˬ sha geh daꞈ jaˇ ve awˬ vuiˬ gʼa ve tehꞈ chaw teˇ hpaˍ hpaˍ kʼoˆ htaˇ, Liꞈ hpu hkʼaw kʼoˆ ve laꞈ haˉ taˇ yonˍ tehꞈ kʼoˆ ve htaꞈ yawˇ shiˍ ve yoˬ. (Hpeuꞈ maˍ ve 2:2) Leuˆ yuˬ piˇ taˍ ve chaw lehˬ shu yawˇ htaꞈ a yeˇ hkʼe taw taw maˇ yuˬ laˇ tcuh gaˇ. Yawˇ leuˆ yuˬ piˇ taˍ ve chaw hpehꞈ ve tehꞈ shu htaꞈ mawˬ daꞈ htaˇ maˇ kʼoˆ maˍ piˇ.—1 Kawˇrenˍhtuˆ 4:7, 8 gʼaw sheˍ.

7. Leuˆ yuˬ piˇ taˍ ve chaw aˬ htoꞈ ma maˇ te cawˇ ve le?

⁷ Leuˆ yuˬ piˇ taˍ ve chaw ceh tiˉ awˬ chawˇ te daꞈ tuˬ maˇ dawˇ. Yawˇ leuˆ yuˬ piˇ taˍ ve chaw awˬ moˍ hkʼaw ve chaw hkʼe leˇ maˇ te. Yawˇ hui leuˆ yuˬ laˇ ve awˬ lawn maˇ heˆ leh Liꞈ hpu teˇ geh henˇ tuˬ yaw daꞈ tuˬ, leuˆ yuˬ piˇ taˍ ve chaw htaꞈ maˇ gʼa ca. (Gaˍlaˍtiˆ 1:15-17) Leuˆ yuˬ piˇ taˍ ve chaw chi hkʼe te ve kʼo, Hkriꞈ yaˇ awˬ moˍ hkʼaw maˇ hawˍ daꞈ leh daꞈ kehˬ ve awˬ ha hpu htaꞈ kaꞈ tawˍ daꞈ chehˇ ve yoˬ. Awˬ lawn kʼo, daꞈ kehˬ ve awˬ ha hpu Gʼuiˬ sha ve chaw htaꞈ ha lehˬ tcuh gaˇ leh teˇ moˍ tiˉ hpehꞈ tcuh gaˇ ve yoˬ.—Roˉmaꞈ 16:17, 18.

8. Yeˍsuˆ suh ve dawˇ nawˇ tuˬ hpawnˬ daꞈ ve te htaˇ hkaoˍ monˇ caˇ leh a pehˉ meuˇ gʼuiˬ dawˬ ve chaw htaꞈ te piˇ ve awˬ hkʼaˇ aˬ htoꞈ ma te nawˬ shaˍ tiꞈ gʼa te cawˇ ve le? (Awˬ maiˉ htaꞈ nyi sheˍ.)

⁸ Ngaˬ hui leuˆ yuˬ piˇ taˍ ve chaw htaꞈ hkʼaˬ hkʼe te piˇ cawˇ ve le? Yawˇ Yeˍsuˆ Hkriꞈ ve awˬ viˉ awˬ nyi leh leuˆ yuˬ taˍ ve chaw hpehꞈ ve htawˇ, yawˇ htaꞈ shu aꞈ kehˉ chiˇ uiˍ chiˇ mvuh piˇ ve maˇ te cawˇ.  (Maꞈhtehˍ 23:8-12) Liꞈ hpu hkʼaw “yawˇ hui yonˍ ve teˇ ceuˬ htaꞈ henˇ yuˬ leh te˗o” kʼoˆ htaˇ, nyi haꞈ shaˉ paˍ htaꞈ kʼoˆ gaˇ ve yoˬ. Yaꞈ hkʼaˇ, chaw yaˇ hkʼaˬ ve teˇ gʼaˇ sheh kʼai paˍ hpehꞈ leh chiˇ uiˍ chiˇ mvuh piˇ cawˇ tehꞈ Liꞈ hpu hkʼaw maˇ gʼa kʼoˆ laˇ taˍ. (Heˍbrehˇ 13:7) Yoˬ. Liꞈ hpu hkʼaw chaw teˇ hpaˍ hpaˍ htaꞈ kʼoˆ htaˇ, “nyiˇ pun yawˆ yan cawˇ ve yoˬ.” Yaꞈ hkʼaˇ, yawˇ lehˬ “kanˉ hkʼa dehꞈ te” leh “bon maˍ ve leh shu htaꞈ maˍ piˇ ve” kaꞈ te ve yoˬ. Yawˇ leuˆ yuˬ piˇ taˍ ve chaw hpehꞈ ve pa taw maˇ heˆ. (1 Tiˆmoˉseˍ 5:17) Yawˇ hui htaꞈ a yeˇ yuˬ leh chiˇ mvuh piˇ jaˇ ve kʼo, nyi ma maˇ sha tuˬ te piˇ ve yoˬ. * Chi aꞈ kehˉ a yeˇ uiˍ jaˇ ve lehˬ ngaˬ hui yawˇ htaꞈ uiˍ muiˬ caˆ muiˬ ve cawˬ tuˬ te piˇ ve yoˬ.(Roˉmaꞈ 12:3) Yeˍsuˆ ve awˬ viˉ awˬ nyi leuˆ yuˬ piˇ taˍ ve chaw chi hkʼe hpehꞈ tuˬ maˇ te piˇ gaˇ!—Luˉkaꞈ 17:2.

9. Leuˆ yuˬ piˇ taˍ ve chaw htaꞈ ngaˬ hui yawˆ yan ve tehꞈ hkʼaˬ hkʼe hpeuꞈ maw piˇ gʼa tuˬ le?

⁹ Yaˬhoˉvaˬ leuˆ yuˬ piˇ taˍ ve chaw htaꞈ ngaˬ hui yawˆ yan ve tehꞈ hkʼaˬ hkʼe hpeuꞈ maw piˇ gʼa tuˬ le? Yawˇ htaꞈ hkʼaˬ hkʼe leuˆ yuˬ laˇ ve ngaˬ hui maˇ na nyi piˇ cawˇ. Chi yawˇ ve awˬ lawn hpehꞈ ve yoˬ. Ngaˬ hui shiˍ tuˬ a hkaw˗anˬ maˇ cawˬ. (1 Hteˇsaˍlawˇniˆ 4:11; 2 Hteˇsaˍlawˇniˆ 3:11) Yawˇ ve awˬ ca, awˬ pa awˬ e, maˇ heˆ leh yehˬ kʼa hkʼaw ve chaw leuˆ yuˬ piˇ taˍ ve chaw hpehꞈ ve tehꞈ ngaˬ hui maˇ dawˇ cawˇ. Mvuhˇ naw ma hkʼoˆ dawˇ law kuiˬ cawˬ ve lehˬ awˬ shinˉ awˬ ka gʼa ve htaꞈ maˇ shuˍ daꞈ. Yaꞈ hkʼaˇ, Gʼuiˬ sha leuˆ yuˬ taˍ ve chaw htaꞈ piˇ ve yoˬ. (1 Hteˇsaˍlawˇniˆ 2:12) Chi hkʼoˆ kaꞈ, yawˇ hui nyi ma luˬ ve maˇ heˆ leh nyi ma maˇ sha tuˬ ve awˬ lawn teˇ hpaˍ kaꞈ ngaˬ hui maˇ na nyi piˇ cawˇ. Nawˬ teˇ gʼaˇ ceh tiˉ awˬ hpawˇ maˇ cawˬ leh miˬ guiˬ hkʼoˆ lo co co taiˍ taiˍ chehˇ tuˬ, leuˆ yuˬ piˇ taˍ ve chaw awˬ miˇ ma htaꞈ ngaˬ hui maˇ na nyi piˇ cawˇ. Miˬ guiˬ awˬ suhˉ hkʼaw Yaˬhoˉvaˬ “yawˇ hui nyi hkʼaˇ suh htaˇ hkʼa gaˬ, yawˇ hui loˍ ve awˬ ceuˬ teˇ hpaˍ htaꞈ” piˇ tuˬ tehꞈ ngaˬ hui yonˍ gʼa ve yoˬ.—Chiˇ mvuh ve 145:16.

10. “Chiˇ uiˍ chiˇ mvuh piˇ puiˉ ve” chaw maˇ gʼa hpehꞈ tuˬ ngaˬ hui htaꞈ shaˍ tiꞈ hkʼaˬ hkʼe peꞈ laˇ ve le?

¹⁰ Leuˆ yuˬ piˇ taˍ ve chaw htaꞈ a yeˇ uiˍ jaˇ ve tehꞈ maˇ gʼa te piˇ tuˬ, ngaˬ hui htaꞈ kaꞈ shaˍ tiꞈ peꞈ laˇ ve yoˬ. Aˬ htoꞈ ma te chi hkʼe te ve le? Liꞈ hpu hkʼaw kʼoˆ ve, leuˆ yuˬ piˇ taˍ ve chaw teˇ hpaˍ hpaˍ ka tiꞈ maˇ yeˬ. (Maꞈhtehˍ 25:10-12; 2 Peˍtruˆ 2:20, 21) Yawˇ leuˆ yuˬ piˇ taˍ ve chaw hpehꞈ ve, hkʼa dehꞈ shiˍ daꞈ ve awˬ viˉ awˬ nyi hpehꞈ ve, maˇ heˆ leh Yaˬhoˉvaˬ ve kanˉ te maw jaˇ˗oˬ ve chaw hpehꞈ ve htawˇ, yawˇ hui htaꞈ “chiˇ uiˍ chiˇ mvuh piˇ” ve ngaˬ hui maˇ te. (Yuˇdaꞈ 16) Teˇ nyi kʼo yawˇ ka tiꞈ maˇ yeˬ leh Gʼuiˬ sha ve kanˉ hkʼaˇ htaꞈ baˬ taˉ ve kʼo, ngaˬ hui ve yonˍ hkʼaˇ leh Yaˬhoˉvaˬ ve kanˉ te ve htaꞈ maˇ chiˇ baˬ.

11. Yeˍsuˆ suh ve dawˇ nawˇ tuˬ hpawnˬ daꞈ ve te htaˇ hkaoˍ monˇ caˇ leh a pehˉ meuˇ gʼuiˬ dawˬ ve chaw hkʼaˬ hkʼe hpehꞈ la ve le?

¹¹ Ponˬ laˬ ve laiˉ hkʼawꞈ Yeˍsuˆ suh ve dawˇ nawˇ tuˬ hpawnˬ daꞈ ve te htaˇ, hkaoˍ monˇ caˇ leh a pehˉ meuˇ gʼuiˬ dawˬ ve chaw i kʼai ve yoˬ. Yaꞈ hkʼaˇ, hkʼaˬ nyiˇ hkʼawꞈ maˇ gaˬ sheˍ chaw chi ve teˇ hpaˍ kʼawꞈ maˇ la ve yoˬ. Awˬ lawn chi ngaˬ hui dawˇ haˍ cawˇ˗aw laˇ? Maˇ dawˇ haˍ cawˇ. Teˇ lawn lawn htaꞈ teˇ geh nyi sheˍ.

12. Yeˍsuˆ suh ve dawˇ nawˇ tuˬ hpawnˬ daꞈ ve te htaˇ hkaoˍ monˇ caˇ leh a pehˉ meuˇ gʼuiˬ dawˬ ve hkʼaˬ nyiˇ gʼaˇ cawˬ ve aˬ htoꞈ ma te maˇ dawˇ haˍ cawˇ ve le?

¹² “[Yaˬhoˉvaˬ] lehˬ, yawˇ ve chaw teˇ hpaˍ htaꞈ shiˍ taˍ ve yoˬ.” (2 Tiˆmoˉseˍ 2:19) Yeˍsuˆ suh ve dawˇ nawˇ tuˬ hpawnˬ daꞈ ve te htaˇ hkaoˍ monˇ caˇ leh a pehˉ meuˇ gʼuiˬ dawˬ ve chaw, a shu leuˆ yuˬ piˇ taˍ ve chaw hpehꞈ ve tehꞈ hkʼa dehꞈ maˇ shiˍ.  Chi htaꞈ pa taw, leuˆ yuˬ piˇ taˍ ve chaw hpehꞈ ve tehꞈ dawˇ ve chaw htaꞈ kaꞈ gʼaw ve yoˬ. Awˬ tehˬ kʼo maˇ hpehꞈ. Laiˉ gʼaˇ kʼo, uˉ nawꞈ nehˆ hkʼa dehꞈ maˇ daꞈ ve pa taw, Yeˍsuˆ geh gʼa uˉ peunˍ tuˬ ve tehꞈ dawˇ ve yoˬ. Chaw teˇ hpaˍ hpaˍ kʼo, Yeˍsuˆ suh ve dawˇ nawˇ tuˬ hpawnˬ daꞈ ve te htaˇ hkaoˍ monˇ caˇ leh a pehˉ meuˇ gʼuiˬ dawˬ jaw ve htawˇ, chi teˇ hkui maˇ caˇ˗o. Chi teˇ hkui miˬ guiˬ hkʼoˆ leuˆ yuˬ piˇ taˍ ve chaw hkʼaˬ nyiˇ gʼaˇ leuˉ taˍ sheˍ ve maˇ shiˍ.

13. Tuꞈ jaˇ hkanˍ jaˇ ve awˬ nyi htaˇ, miˬ guiˬ hkʼoˆ leuˆ yuˬ piˇ taˍ ve chaw hkʼaˬ nyiˇ gʼaˇ leuˉ taˍ sheˍ ve, Liꞈ hpu hkʼaw kʼoˆ laˇ taˍ˗aw laˇ?

¹³ Miˬ guiˬ hkʼoˆ laiˉ kaˬ lo leuˆ yuˬ piˇ taˍ ve chaw leuˉ taˍ sheˍ ve pa taw, Yeˍsuˆ laˬ htaˇ yawˇ hui htaꞈ shiˍ taˆ˗e tuˬ yoˬ. (Maꞈhtehˍ 24:31) Liꞈ hpu hkʼaw kʼoˆ ve awˬ leh meuˇ ve awˬ yanˇ htaˇ, leuˆ yuˬ piˇ taˍ ve chaw miˬ guiˬ hkʼoˆ leuˉ taˍ sheˍ ve chaw maˇ maˇ˗o. (Hpeuꞈ maˍ ve 12:17) Yaꞈ hkʼaˇ, tuꞈ jaˇ hkanˍ jaˇ htaˇ, leuˆ yuˬ piˇ taˍ ve chaw hkʼaˬ nyiˇ gʼaˇ leuˉ taˍ sheˍ ve, Liꞈ hpu hkʼaw maˇ gʼa kʼoˆ laˇ taˍ.

14. Roˉmaꞈ liꞈ 9:11, 16 hkʼaw kʼoˆ taˍ ve hkʼe, leuˆ yuˬ piˇ taˍ ve chaw awˬ lawn ngaˬ hui hkʼaˬ hkʼe na gʼa cawˇ ve le?

¹⁴ Leuˆ yuˬ piˇ taˍ ve chaw htaꞈ hkʼaˬ hkʼe htaˇ leuˆ yuˬ tuˬ Yaˬhoˉvaˬ dawˇ cheˆ ve yoˬ. (Roˉmaꞈ 8:28-30) Yeˍsuˆ teꞈ tu la peuˬ hkʼawꞈ nawˉ, leuˆ yuˬ piˇ taˍ ve chaw htaꞈ Yaˬhoˉvaˬ tanˬ leuˆ yuˬ ve yoˬ. Nyi˗a kʼo awˉ lawˉ peuˇ ve Hkriꞈ yaˇ hkʼa peu˗eˬ leuˆ yuˬ piˇ taˍ ve chaw htaꞈ shuˍ ve yoˬ. Yaꞈ hkʼaˇ, laiˉ ha hkʼawꞈ peuˬ hkʼawꞈ nawˉ Hkriꞈ yaˇ hpehꞈ ve tehꞈ kʼoˆ ve htawˇ, Yeˍsuˆ awˬ hkʼaˇ suh maˇ gʼaꞈ te. Chi hkʼe hpehꞈ ve htawˇ, awˬ tehˬ ve Hkriꞈ yaˇ teˇ hpaˍ hpaˍ htaꞈ Yaˬhoˉvaˬ leuˆ yuˬ piˇ sheˍ. Yawˇ hui caˬ cehˬ hkʼe hpehꞈ leh veˬ kʼawˍ cehˬ geh teˇ geh uiˍ la piˇ sheˍ tehꞈ Yeˍsuˆ kʼoˆ ve yoˬ. (Maꞈhtehˍ 13:24-30) Awˬ leh meuˇ ve awˬ yanˇ htaˇ, 144,000 gʼaˇ ve  hkʼaw Yaˬhoˉvaˬ leuˆ yuˬ chehˇ sheˍ. * Chi htaꞈ pa taw awˬ leh meuˇ ve awˬ paˇ neˇ htaˇ, chaw teˇ hpaˍ hpaˍ htaꞈ leuˆ yuˬ piˇ taˍ ve chaw hpehꞈ tuˬ Yaˬhoˉvaˬ dawˇ cheˆ leh leuˆ yuˬ tuˬ yoˬ. Yawˇ te cawˇ ve, maˇ cawˇ ve, ngaˬ hui dawˇ nyi tuˬ maˇ loˍ. (Roˉmaꞈ 9:11, 16 gʼaw sheˍ.) * Kanˉ teˇ naˍ riˍ tiˉ gʼa te ve chaw htaꞈ gʼaˇ hpfuhˇ hkʼa shuˍ piˇ ve pa taw, kanˉ awˉ lawˉ te ve chaw hko shehˍ hpaˇ htaꞈ kʼoˆ piˇ ve, awˬ lawn chi Yeˍsuˆ tawˇ pa haˉ tehˆ maˍ laˇ ve hkʼe maˇ gʼa hpehꞈ tuˬ ngaˬ hui shaˍ tiꞈ gʼa te ve yoˬ.—Maꞈhtehˍ 20:8-15.

15. Maꞈhtehˍ liꞈ 24:45-47 hkʼaw kʼoˆ taˍ ve hkʼe, leuˆ yuˬ piˇ taˍ ve chaw teˇ gʼaˇ le le “ka tiꞈ yeˬ leh cuˇ yiˍ cawˬ ve awˬ ceˬ” hpehꞈ gʼa˗aw laˇ? Kʼoˆ maˍ laˇ sheˍ.

¹⁵ Teˇ gʼaˇ le le mvuhˇ naw ma hkʼoˆ taˆ˗e tuˬ dawˇ law taˍ ve chaw lehˬ,“ka tiꞈ yeˬ leh cuˇ yiˍ cawˬ ve awˬ ceˬ” hpehꞈ gʼa ve maˇ heˆ. (Maꞈhtehˍ 24:45-47 gʼaw sheˍ.) Awˉ lawˉ peuˇ ve Hkriꞈ yaˇ hkʼa shuˍ chaw maˇ maˇ htaꞈ caˇ tuˬ leh maˍ piˇ tuˬ chi beuꞈ teˇ co˗e Yaˬhoˉvaˬ leh Yeˍsuˆ awˬ viˉ awˬ nyi hawˉ hkʼaˆ htaꞈ yehˇ ve hkʼaˬ nyiˇ gʼaˇ maˇ cawˬ. Awˉ lawˉ peuˇ ve awˬ co˗e htaˇ, Gʼuiˬ sha Heˍlaˍsaˆ ve Liꞈ hpu awˬ tawn bvuhꞈ tcuh tuˬ, leuˆ yuˬ piˇ taˍ ve chaw htaꞈ yehˇ ve hkʼaˬ nyiˇ gʼaˇ maˇ cawˬ. Chi beuꞈ teˇ co˗e kaꞈ “awˬ yanˇ cawˇ lehˍ caˇ tuˬ dawˬ tuˬ pehˬ piˇ tuˬ awˬ pon” awˬ vuiˬ chi htaꞈ te tuˬ hkʼaˬ nyiˇ gʼaˇ maˇ cawˬ.

16. Chi ve hkʼaw nawˬ htaꞈ aˬ htoꞈ ma maˍ laˇ ve le?

¹⁶ Chi ve hkʼaw ngaˬ hui htaꞈ aˬ htoꞈ ma maˍ laˇ ve le? Yaˬhoˉvaˬ ve chaw maˇ˗awˍ ve miˬ guiˬ chi hkʼoˆ lo co co taiˍ taiˍ a shaꞈ gʼa tuˬ yawˇ dawˇ cheˆ ve yoˬ. Mvuhˇ naw ma hkʼoˆ Yeˍsuˆ geh teˇ geh uˉ peunˍ ve chaw lehˬ maˇ maˇ. “Yuˇdaꞈ chaw” maˇ heˆ leh “teˇ chi gʼaˇ” hpehꞈ ve htawˇ, Yaˬhoˉvaˬ teˇ gʼaˇ le le htaꞈ laꞈ shawnˍ piˇ tuˬ yoˬ. Gʼuiˬ sha lehˬ teˇ gʼaˇ le le awˬ liˇ tawˇ hkawˇ hkʼa shuˍ na yuˬ leh ka tiꞈ yeˬ tcuh gaˇ ve yoˬ. Teˇ gʼaˇ le le nyi ma nuˇ nehˬ leh teˇ moˍ tiˉ te ve hkʼaw Gʼuiˬ sha ve kanˉ te leh, Hkriꞈ yaˇ awˬ moˍ hkʼaw dawˇ sha gawˬ lehˍ ve cawˬ tcuh gaˇ ve yoˬ. Ngaˬ hui awˬ leh meuˇ ve awˬ paˇ neˇ lo chehˇ taˍ ve yoˬ. Chi htaꞈ pa taw, ngaˬ hui Yeˍsuˆ awˬ hkʼaˇ suh kʼai ve “yawˬ moˍ teˇ moˍ tiˉ” hpehꞈ leh Yaˬhoˉvaˬ ve kanˉ caˉ leh te sheˍ.—Yoˇhanˬ 10:16.