Chi hkʼoˆ kaꞈ, hpawnˬ daꞈ ve chi hkʼaw Mvuhˇ miˬ teˇ hpaˍ caˉ daꞈ tuˬ ve Awˬ moˍ awˬ suhˉ teh tcuh ve yoˬ. “Mvuhˇ miˬ teˇ hpaˍ cawˇ daꞈ tuˬ leh dawˇ sha gawˬ lehˍ cawˬ tuˬ leh mvuhˇ miˬ teˇ hpaˍ kawˆ ve maˇ cawˬ tuˬ” yawˇ hui te tcuh gaˇ ve yoˬ. Bon liˇ laiˉ maˬ awˬ moˍ chi htaꞈ awˬ gʼaˇ piˇ ve yoˬ. Aˍmeˬriˆkaꞈ mvuhˇ miˬ ve Bon yehˬ Awˬ moˍ lonˉ awˬ moˍ awˬ suhˉ chi htaꞈ chiˇ mvuh leh kʼoˆ ve, “Gʼuiˬ sha ve mvuhˇ miˬ ve teˇ hpawˇ lo miˬ guiˬ hkʼoˆ lo cawˬ ve hkʼa shuˍ yoˬ.” Awˬ moˍ chi ve hkʼaw ve awˬ tanˬ Pehˇriˆ venˇ dawˇ sha gawˬ lehˍ ve cawˬ tuˬ kaꞈ hpawnˬ daꞈ˗e tcuh ve yoˬ. Awˬ tanˬ te shehˍ hpaˇ teˇ gʼaˇ kʼoˆ ve, chi hkʼe te ve “miˬ guiˬ hkʼoˆ awˉ lawˉ teˇ pawˆ hpehꞈ ve yoˬ.”

Chi awˬ tehˬ hpehꞈ ve yoˬ. Yaꞈ hkʼaˇ, hpawnˬ daꞈ ve chi oˇ ve teˇ pawˆ htaꞈ maˇ caˉ daꞈ. 1919 hkʼawꞈ htaˇ, hto toˇ ve awˬ hkʼaˇ awˬ suhˉ tanˬ ve chi Yaˬhoˉvaˬ yawˇ ve mvuhˇ miˬ yaˇ htaꞈ ga ve pa taw, peuˬ laˬ htaˇ aꞈ kehˉ kʼawꞈ hto toˇ gʼa ve yoˬ. Yaꞈ hkʼaˇ, Liꞈ hpu henˇ yaˇ pa ve gʼa hpuˇ ve yoˬ.

Ha pa 1 maˬ 4 nyi 1919 hkʼawꞈ htaˇ, Vawˆcheu htao˗veuˇ Baiˍbeunˇ hkʼaw nyi haꞈ shaˉ paˍ leuˆ ve yoˬ. Oˇ ve teˇ yanˇ Yoˇsehꞈ F. Raˆhteuˬfawˍ Yaˬhoˉvaˬ ve chaw htaꞈ shehˍ kʼai leh awˬ viˉ awˬ nyi hawˉ hkʼaˆ 7 gʼaˇ Aˍmeˬriˆkaꞈ mvuhˇ miˬ Ahˆtaˬlaˬtaˍ venˇ htawnˍ hkʼawꞈ lo chehˇ taˍ sheˍ ve yoˬ. Yawˇ hui htawnˍ hkʼaw lo chehˇ ve awˬ viˉ awˬ nyi tawˆ la leh Uˉ peunˍ ve Kawˍ miˍ tiˍ kʼawꞈ te cawˇ ve maˇ heˆ leh awˬ nu ve chaw htaꞈ kʼawꞈ leuˆ te cawˇ ve laˇ? tehꞈ yawˇ hui gʼa dawˇ cheˆ ve yoˬ.

Htawnˍ hkʼaw chehˇ htaˇ, shehˍ kʼai paˍ awˬ nu ve chaw htaꞈ kʼawꞈ leuˆ cawˇ ve tehꞈ awˬ viˉ awˬ nyi kʼoˆ ve gʼa kaˇ ve pa taw, awˬ viˉ awˬ nyi Raˆhteuˬfawˍ awˬ gʼuˇ suhˍ hpawˇ awˬ pon dawˇ haˍ leh hpawnˬ daꞈ ve awˬ moˍ hkʼaw liꞈ bvuhꞈ piˇ ve yoˬ. Eˍvanˍdeuˍ J. Hkawˇveuˬ shehˍ kʼai tcuh ve yoˬ. Awˬ viˉ awˬ nyi Eˍvanˍdeuˍ “nyi ma gawˬ lehˍ ve,” “cuˇ yiˍ cawˬ ve,” leh “awˬ shehˍ hpaˇ htaꞈ ka tiꞈ yeˬ ve” chaw hpehꞈ ve yoˬ. Awˬ viˉ awˬ nyi laiˉ gʼaˇ maˇ dawˇ cawˇ leh 6 ha pa law sheˍ leh awˬ  suhˉ kʼawꞈ leuˆ cawˇ ve yoˬ. Mvuhˇ miˬ hpawˇ awˬ liˇ caˉ daꞈ paˍ awˬ viˉ awˬ nyi htawnˍ hkʼaw chehˇ ve htaꞈ ga piˇ ve chaw kaꞈ chi hkʼe dawˇ ve yoˬ. Oˇ teˇ yanˇ leh gʼaˇ hteꞈ gʼawˬ daꞈ ve yoˬ.

Oˇ teˇ yanˇ ve hpehꞈ la ve awˬ lawn Riˆchaˬ H. Baˍbeuˇ kʼoˆ maˍ laˇ ve yoˬ. Maˇ gʼa gʼawˬ daꞈ tuˬ coˇ caˇ leh gu piˇ ve htaꞈ kʼoˆ gaˇ ve yoˬ. Gʼaˇ hteꞈ gʼawˬ daꞈ chehˇ htaˇ, awˬ viˉ awˬ nyi teˇ gʼaˇ kʼoˆ ve, “ngaˬ mvuhˇ miˬ ve awˬ liˇ awˬ hkʼaˇ hpawˇ kanˉ maˇ te leh maˇ shiˍ. Yaꞈ hkʼaˇ, ka tiꞈ yeˬ ve kʼo, ngaˬ kaꞈ a ciˉ shiˍ ve yoˬ. Gʼuiˬ sha ngaˬ hui htaꞈ ka tiꞈ yeˬ ve chaw hpehꞈ tcuh gaˇ ve tehꞈ ngaˬ hkʼa dehꞈ yonˍ gʼa ve yoˬ. Chi teˇ hkui awˬ viˉ awˬ nyi Raˆhteuˬfawˍ htaꞈ sheh kʼai shehˍ hpaˇ kʼawꞈ te tcuh cawˇ ve, chi aꞈ kehˉ daꞈ ve maˇ cawˬ.”—Chiˇ mvuh ve 18:25.

Oˇ ve teˇ yanˇ A. H. Mehˆmi˗lanˇ htawnˍ hkʼaw lo chehˇ ve, peuˬ hkʼawꞈ nawˉ yawˇ kʼawꞈ kʼoˆ maˍ laˇ ve, hkʼawꞈ nawˉ teˇ nyi awˬ viˉ awˬ nyi Raˆhteuˬfawˍ yehˬ miˉ htaꞈ ca htawˆ la leh kʼoˆ laˇ ve, “laꞈ sheh che peu˗a” hto la liꞈ laꞈ shehˍ hkʼawꞈ keu piˇ ve yoˬ. Oˇ ve htaꞈ gʼa kaˇ htaˇ, awˬ viˉ awˬ nyi Mehˆmi˗lanˇ sheh kʼai paˍ leuˆ gʼa ve htaꞈ gʼa shiˍ ve yoˬ. Oˇ ve hkʼaw lehˬ “RAˆHTEUˬFAWˍ VAIˉ VAN BAˍBEUˇ EHN˗DEU˗SANˍ BU˗LIˇ LEH SAꞈPINˍ AWˉ LAWˉ 3 GʼAˇ SHEH KʼAI PAˍ TEˇ GʼAˇ LE LE HAꞈ VE.” Chi ve tcuhˉ kuiˬ leh Uˉ peunˍ ve Kawˍmiˍtiˍ awˬ piˍ ve teˇ moˍ hkʼa peu˗eˬ gʼa kʼawꞈ te ve htaꞈ kʼoˆ gaˇ ve yoˬ. Yoˇsehꞈ Raˆhteuˬfawˍ leh Viˆliˇ˗an Van Ehn˗beuˬ sheh kʼai paˍ ve awˬ vuiˬ gʼa kʼawꞈ te ve yoˬ. Chi htaꞈ pa taw, Awˬ viˉ awˬ nyi Raˆhteuˬfawˍ sheh kʼai paˍ awˬ hoˉ gʼa kʼawꞈ te ve yoˬ.

Awˬ viˉ awˬ nyi Liꞈ hpu henˇ yaˇ ka tiꞈ yeˬ ve awˬ moˍ coˇ caˇ leh awˬ viˉ awˬ nyi 8 gʼaˇ htawnˍ hkʼaw lo ve hpehˇ piˇ tuˬ lawˬ ve yoˬ. Haꞈ hanˉ ve awˬ viˉ awˬ nyi Liꞈ hpu henˇ yaˇ awˬ meh gʼawˆ ve 700,000 gʼaˇ gʼa ve yoˬ. Yaꞈ hkʼaˇ, chi maˇ gʼa feu piˇ sheˍ kaꞈ awˬ viˉ awˬ nyi Raˆhteuˬfawˍ leh awˬ vuiˬ cawˬ ve awˬ viˉ awˬ nyi 7 gʼaˇ kaꞈ Ha pa 3 maˬ 26 nyi 1919 hkʼawꞈ htaˇ, hpehˇ piˇ ve yoˬ.

Haꞈ yuˬ laˇ ve chaw htaꞈ awˬ viˉ awˬ nyi Raˆhteuˬfawˍ kʼoˆ piˇ ve, “haiˬ jaˇ ve chi teˇ pawˆ htaꞈ ponˬ gʼa ve lehˬ awˬ gʼuˇ suhˍ hpawˇ chi aꞈ kehˉ kʼawꞈ haiˬ jaˇ ve htaꞈ ponˬ gʼa tuˬ tehꞈ ngaˬ hui hkʼa dehꞈ yonˍ gʼa ve. . . Nawˬ hui tawˍ daꞈ ve chi lehˬ awˬ viˉ awˬ nyi htawnˍ hkʼaw chehˇ ve awˬ pon ceh maˇ heˆ. Yaꞈ hkʼaˇ, tawˍ daꞈ ve chi teˇ pawˆ ve awˬ pon lehˬ, Yaˬhoˉvaˬ awˬ meꞈ awˬ hponˇ gʼa tuˬ leh gʼa ga ve chaw awˬ tehˬ awˬ na awˬ bon gʼa tuˬ awˬ pon yoˬ.”

Awˬ lawn chi hpehꞈ la htaˇ, Yaˬhoˉvaˬ ga laˇ ve tehꞈ hkʼa dehꞈ gʼa mawˬ ve yoˬ. Ha pa 5 maˬ 14 nyi 1919 hkʼawꞈ htaˇ, shaˉ nanˉ hkʼaw suhˉ jehˬ cheˆ ve “chi maˇ hteˇ maˇ cawˇ ve te piˇ ve yoˬ. Teˇ pawˆ kʼawꞈ jehˬ tuˬ awˬ hkʼaˇ cawˬ ve yoˬ.” Chi awˬ gʼuˇ suhˍ htaˇ awˬ viˉ awˬ nyi 8 gʼaˇ chi htaꞈ mvuhˇ miˬ hpawˇ te yaꞈ jaˇ ve tehꞈ jehˬ cheˆ piˇ ve yoˬ. Hpehˇ piˇ˗oˬ ve htawˇ kaꞈ te yaꞈ jaw ve awˬ lawn cawˬ  sheˍ ve yoˬ. Yaꞈ hkʼaˇ, suhˉ jehˬ ve chi teˇ ceuˬ le le yaꞈ kuiˬ maˇ cawˬ˗oˬ. Awˬ viˉ awˬ nyi Raˆhteuˬfawˍ Yaˬhoˉvaˬ ve chaw htaꞈ Aˍmeˬriˆkaꞈ shaˉ nanˉ hkʼaw gu piˇ tuˬ a hkaw˗anˬ cawˬ ve yoˬ.

Awˬ viˉ awˬ nyi Mehˆmi˗lanˇ kʼoˆ ve, “ngaˬ hui mui chehˇ leh Awˬ shehˍ hpaˇ mvuhˇ naw ma hkʼoˆ shiˍ tawˆ˗e laˇ tuˬ htaꞈ ceh law chehˇ ve maˇ heˆ. Awˬ shehˍ hpaˇ ngaˬ hui htaꞈ te tcuh gaˇ ve hkʼe gʼa gʼaꞈ te ve yoˬ.”

Yaꞈ hkʼaˇ, oˇ ve teˇ yanˇ awˬ viˉ awˬ nyi awˬ tcuhˆ puiˍ lonˉ hkʼaw kanˉ te jaw ve kaꞈ maˇ gʼa te˗o. Awˬ viˉ awˬ nyi htawnˍ hkʼaw gʼa chehˇ ve pa taw, liꞈ tawˆ tuˬ ve kaꞈ hkʼa peu˗eˬ te luˬ piˇ ve yoˬ. Awˬ lawn chi nyi ma luˬ jaˇ leh hto toˇ ve peuˬ˗oˬ ve hehˉ tehꞈ laiˉ gʼaˇ htawˇ dawˇ nawˬ dawˇ cawˬ ve yoˬ.

Gʼuiˬ sha ve mvuhˇ miˬ awˬ lawn sha tanˇ na gaˇ ve chaw cawˬ sheˍ laˇ? Teˇ kaˬ le le chehˇ ve bon hkawˇ ca na la tuˬ awˬ viˉ awˬ nyi Raˆhteuˬfawˍ dawˇ cheˆ leh bon maˍ hkawˇ cawˬ tcuh ve yoˬ. Awˬ viˉ awˬ nyi Mehˆmi˗lanˇ kʼoˆ ve, “ca na la ve chaw maˇ cawˬ ve kʼo, hto toˇ ve teˇ kaˬ le le lo gaˬ˗oˬ ve yoˬ.”

Ha pa 5 maˬ 4 nyi 1919 hkʼawꞈ htaˇ, awˬ viˉ awˬ nyi Raˆhteuˬfawˍ naˬ jaˇ ve htawˇ, bon maˍ hkawˇ awˬ meh lehˬ “Tuꞈ ve hkanˍ ve peuˬ tuˬ chaw yaˇ awˬ pon dawˇ law kuiˬ” LawˆEˬJehˬleˬ Hkeh˗liˆfaw˗ni˗a venˇ lo maˍ ve yoˬ. Na la ve chaw 3,500 gʼaˇ hpaˆ cawˬ leh laiˉ ha gʼaˇ mui kuiˬ maˇ cawˬ ve pa taw kʼawꞈ˗e ve yoˬ. Hkʼawꞈ nawˉ teˇ nyi 1,500 gʼaˇ bon maˍ hkawˇ kʼawꞈ na la ve yoˬ. Chi teˇ pawˆ daꞈ ve awˬ lawn sha tanˇ na gaˇ ve chaw cawˬ sheˍ ve tehꞈ Liꞈ hpu henˇ yaˇ shiˍ la ve yoˬ.

Awˬ viˉ awˬ nyi te ve awˬ ceuˬ chi teˇ hkui hkʼa gaˬ hteˇ hteˇ shawˇ shawˇ cawˬ ve yoˬ.

Shaw nyi kuiˬ Taꞈ yehˬ (Kaˇlaˇ hkawˇ) Ha pa 8 maˬ 1 nyi 1919 hkʼawꞈ htaˇ, Ha pa 9 maˬ Siˍdeuˇ Hpawehˉ venˇ lo hpawnˬ daꞈ lonˉ cawˬ tuˬ yoˬ tehꞈ shiˍ laˇ kaˇ laˇ ve yoˬ. Miꞈseuˇriˆ lo laˬ ve Liꞈ hpu henˇ yaˇ yaˇ nehˬ B Bi˗tiˇ kʼoˆ ve, “teˇ gʼaˇ le le gʼa kʼai  cawˇ ve tehꞈ dawˇ ve yoˬ.” Hpawnˬ daꞈ ve chi hkʼaw 6,000 gʼaˇ hpaˆ cawˬ leh dawˇ taˍ ve aꞈ kehˉ Laˬ maˇ jaˇ. Ha lehˬ jaˇ ve teˇ ceuˬ lehˬ laˇ tsuhˇ gʼuiˬ Aiˬriˬ lo Baˆtiˆsaˬ haꞈ yuˬ ve chaw hkʼa peu˗eˬ 200 gʼaˇ hpaˆ cawˬ ve yoˬ.

Ha pa 9 maˬ 5 nyi 1919 hkʼawꞈ htaˇ, hpawnˬ daꞈ lonˉ chi ve 5 nyi teˇ nyi hkʼaw awˬ viˉ awˬ nyi Raˆhteuˬfawˍ bon maˍ hkawˇ lehˬ “Kanˉ teˇ geh te ve chaw” maˍ ve yoˬ. Yawˇ liꞈ kʼoˆ awˬ suhˉ Deuꞈ Go˗denˇ Eˬ * cawˬ tuˬ yoˬ tehꞈ shiˍ laˇ kaˇ laˇ ve yoˬ. Liꞈ kʼoˆ chi ve, “Chi teˇ hkui a yeˇ uiˍ ve awˬ lawn leh aˬ htoꞈ ma te Liꞈ hpu hkʼaw kʼoˆ taˍ ve hkʼe awˬ heˆ awˬ tehˬ hpehꞈ la ve kʼoˆ maˍ laˇ ve yoˬ.”

Liꞈ hpu henˇ yaˇ teˇ gʼaˇ le le liꞈ kʼoˆ awˬ suhˉ yehˇ leh haꞈ hanˉ ve hkʼaw hto toˇ tuˬ awˬ gʼaˇ piˇ ve yoˬ. Liꞈ kʼoˆ teˇ kʼoˆ hkʼaw hto toˇ ve awˬ hkʼaˇ kʼoˆ maˍ laˇ taˍ ve, “Baˆtiˆsaˬ haꞈ yuˬ˗oˬ ve chaw teˇ gʼaˇ le le Gʼuiˬ sha ve kanˉ daꞈ jaˇ ve htaꞈ te tuˬ leh, miˬ guiˬ yaˇ gʼa kaˇ tuˬ hto toˇ ve te gʼa ve hkʼe gʼa te ve tehꞈ tawnˇ taˍ sheˍ.” Chaw maˇ maˇ hto toˇ ve kanˉ te la ve yoˬ. Ha pa 9 maˬ htaˇ, Gʼuiˬ sha ve mvuhˇ miˬ kaiˬ ve hkʼaw hto toˇ ve chaw, liꞈ kʼoˆ awˬ suhˉ yuˬ ve chaw 50,000 gʼaˇ hpaˆ cawˬ ve tehꞈ kʼoˆ ve yoˬ.

1919 hkʼawꞈ hkʼaw Yaˬhoˉvaˬ yawˇ ve mvuhˇ miˬ yaˇ htaꞈ hteˇ hteˇ shawˇ shawˇ cawˬ tuˬ teˇ hpaˆ kʼawꞈ gu piˇ ve yoˬ. Yawˇ hui Gʼuiˬ sha ve kanˉ kʼawꞈ te tuˬ awˬ gʼaˇ gʼa ve yoˬ. Chi hkʼoˆ kaꞈ awˬ leh meuˇ ve awˬ yanˇ htaꞈ caˉ daꞈ ve tcuh kaˍ paˍ ve tawˇ hkawˇ biˇ la ve yoˬ. Beˬ ve lawˇ ve htaꞈ gʼa hpuˇ ve lehˬ Maˍlaˍhkiˆ liꞈ 3:1-4 hkʼaw kʼoˆ taˍ ve hkʼe Gʼuiˬ sha ve chaw htaꞈ “daꞈ kehˬ la piˇ” ve yoˬ. Gʼuiˬ sha ve chaw “Uiˍ ve Baˍbuˍlonˍ venˇ” lo awˬ ceˬ te chehˇ ve htaꞈ hpehˇ piˇ leh “Ka tiꞈ yeˬ leh cuˇ yiˍ cawˬ ve awˬ ceˬ” * Yeˍsuˆ leuˆ yuˬ ve yoˬ. (Hpeuꞈ maˍ ve 18:2, 4; Maꞈhtehˍ 24:45) Chi teˇ pawˆ Liꞈ hpu henˇ yaˇ Yaˬhoˉvaˬ yawˇ hui htaꞈ piˇ taˍ ve kanˉ te tuˬ gu hehnˇ taˍ˗oˬ ve yoˬ.