1-2. (a) Maˇ maw ve awˬ yanˇ mvuhˇ miˬ uˉ peunˍ paˍ teˇ hpaˍ aˬ htoꞈ ma hto laˇ tuˬ le? (b) Aˬ htoꞈ ma na hkawˇ htaꞈ ngaˬ hui gʼa shiˍ cawˇ ve le?

 ‘Mvuhˇ miˬ gawˬ la peuˬ leh teꞈ chiˉ dawˇ haˍ tuˬ maˇ cawˬ’ tehꞈ mvuhˇ miˬ uˉ peunˍ paˍ teˇ hpaˍ kʼoˆ laˇ htaˇ, ngaˬ hui oˇ kaˬ lo chehˇ taˍ ve htaꞈ dawˇ nyi sheˍ. Chi hpehꞈ la tuˬ ve awˬ ceuˬ Liꞈ hpu hkʼaw awˉ lawˉ htaˇ kaꞈ kʼoˆ taˍ ve yoˬ. Teˇ co˗e peuˬ teˇ co˗e dawˇ sha gawˬ lehˍ ve chi hkʼe ve maˇ cawˬ jaw sheˍ tehꞈ yawˇ hui kʼoˆ ve yoˬ. Mvuhˇ miˬ hkʼa peu˗eˬ hkʼoˆ shoꞈ shaꞈ ve gu gʼa˗oˬ ve tehꞈ ngaˬ hui htaꞈ dawˇ tcuh gaˇ ve yoˬ. Yaꞈ hkʼaˇ, yawˇ hui hpehꞈ la tuˬ ve awˬ ceuˬ htaꞈ gu maˇ gʼa. Liꞈ hpu hkʼaw kʼoˆ ve, “luˬ ve sheˆ ve teˇ ceuˬ yawˇ hui awˬ hkʼoˆ teˇ cawˬ haˉ gaˬ la tuˬ yoˬ. Yawˇ hui ponˬ kuiˬ a ciˉ kaꞈ maˇ cawˇ.”—1 Hteˇsaˍlawˇniˆ 5:3.

² A yeˇ uiˍ jaˇ ve ngaˬ hui gʼa shiˍ cawˇ ve lehˬ “tuꞈ jaˇ hkanˍ jaˇ ve” awˬ yanˇ htaˇ aˬ htoꞈ ma hpehꞈ la tuˬ le? Oˇ ve teˇ yanˇ Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve le? Tuꞈ jaˇ hkanˍ jaˇ ve awˬ yanˇ htaˇ ngaˬ hui hkaˬ htaˆ kaꞈ ka tiꞈ yeˬ gʼa tuˬ chi teˇ hkui kaꞈ hkʼaˬ hkʼe gu hehnˇ taˍ cawˇ ve le?—Maꞈhtehˍ 24:21.

3. Hpeuꞈ maˍ ve liꞈ 17:5, 15-18 hkʼaw kʼoˆ taˍ ve hkʼe, Gʼuiˬ sha “Uiˍ ve Baˍbuˍlonˍ venˇ” htaꞈ hkʼaˬ hkʼe te luˬ piˇ tuˬ le?

³ Hpeuꞈ maˍ ve liꞈ 17:5, 15-18 gʼaw sheˍ. “Uiˍ ve Baˍbuˍlonˍ venˇ” htaꞈ te luˬ tuˬ yoˬ! Awˉ lawˉ htaˇ kʼoˆ ve hkʼe, mvuhˇ miˬ teˇ hpaˍ  lehˬ hpehꞈ la tuˬ ve awˬ ceuˬ htaꞈ gu maˇ gʼa. Aˬ htoꞈ ma pa taw le? “Awˬ lawn kʼo, Gʼuiˬ sha nyi ma cawˇ ve htaꞈ yawˇ hui te tuˬ, yawˇ hui ve nyi ma htaꞈ Gʼuiˬ sha dawˇ pawnˍ piˇ [tuˬ] yoˬ.” Chi hkʼaˬ hkʼe ve le? Chi lehˬ miˬ guiˬ hkʼoˆ lo maˇ heˆ heˆ ve bon liˇ hkʼa peu˗eˬ htaꞈ te luˬ tuˬ yoˬ. * ‘Nyiˉ˗ehˍ ve haiˬ ve to nuˇ to shaˆ awˬ hkaw teˇ chi maˬ’ htaꞈ Yaˬhoˉvaˬ dawˇ pawnˍ piˇ tuˬ yoˬ. “Awˬ hkaw teˇ chi maˬ” lehˬ mvuhˇ miˬ hkʼa peu˗eˬ “haiˬ ve to nuˇ to shaˆ” hpawˇ chehˇ leh, chi lehˬ mvuhˇ miˬ awˬ moˍ lonˉ htaꞈ kʼoˆ ve yoˬ. (Hpeuꞈ maˍ ve 17:3, 11-13; 18:8) Mvuhˇ miˬ uˉ peunˍ paˍ maˇ heˆ heˆ ve bon liˇ htaꞈ te luˬ htaˇ, “tuꞈ jaˇ hkanˍ jaˇ ve” tanˬ ve awˬ heˆ hpehꞈ ve yoˬ. Awˬ heˆ chi ve laꞈ haˉ hpehꞈ la leh miˬ guiˬ hkʼoˆ lo ve chaw hkʼa peu˗eˬ htaꞈ leuˆ la kuiˬ cawˬ ve pa taw kawˆ jaˇ.

4. (a) Mvuhˇ miˬ teˇ hpaˍ awˬ hkʼaˇ hkʼaˬ hkʼe ve yehˇ leh maˇ heˆ heˆ ve bon liˇ htaꞈ te luˬ tuˬ le? Bon liˇ oˇ hkʼe ve htaꞈ yawˆ yan jaw ve chaw hkʼaˬ hkʼe te tuˬ le?

⁴ Mvuhˇ miˬ teˇ hpaˍ Uiˍ ve Baˍbuˍlonˍ venˇ htaꞈ te luˬ htaˇ, aˬ htoꞈ ma awˬ hkʼaˇ yehˇ ve ngaˬ hui maˇ shiˍ. Bon liˇ teˇ hpaˍ lehˬ dawˇ sha gawˬ lehˍ ve cawˬ tuˬ htaꞈ tawˍ laˇ leh mvuhˇ miˬ hpawˇ hkʼaˬ htaˆ kaꞈ shoꞈ shaꞈ laˇ ve tehꞈ yawˇ hui dawˇ ve yoˬ. Maˇ heˆ leh bon liˇ hpu shi mawˇ jeˬ cawˬ maˇ jaˇ leh paw sha jaˇ ve tehꞈ yawˇ hui kʼoˆ ve yoˬ. (Hpeuꞈ maˍ ve 18:3, 7) Mvuhˇ miˬ teˇ hpaˍ bon liˇ htaꞈ te luˬ htaˇ, awˬ moˍ yaˇ teˇ gʼaˇ le le htaꞈ te luˬ ve maˇ heˆ. Yaꞈ hkʼaˇ, nyi˗a kʼo bon liˇ teˇ hpaˍ htaꞈ ceh te luˬ ve yoˬ. Bon awˬ hoˉ teˇ hpaˍ yawˇ hui ka tiꞈ te taˍ ve htaꞈ maˇ gʼaꞈ te ve tehꞈ oˇ ve teˇ yanˇ, awˬ moˍ yaˇ shiˍ la ve yoˬ. Chi htaꞈ pa taw yawˇ hui bon oˇ ve teˇ hpaˍ htaꞈ maˇ caˉ daꞈ tehꞈ kʼoˆ ve yoˬ.

5. Tuꞈ jaˇ hkanˍ jaˇ ve htaꞈ caˉ daꞈ ve Yaˬhoˉvaˬ aˬ htoꞈ ma ka tiꞈ te taˍ laˇ ve le? Aˬ htoꞈ ma pa taw le?

⁵ Uiˍ ve Baˍbuˍlonˍ venˇ htaꞈ te luˬ ve awˬ yanˇ hkʼaˬ hkʼe maw ve Liꞈ hpu hkʼaw maˇ gʼa kʼoˆ laˇ taˍ. Yaꞈ hkʼaˇ, ngaˬ hui shiˍ ve lehˬ te luˬ ve awˬ yanˇ maˇ maw. (Hpeuꞈ maˍ ve 18:10, 21) Yaˬhoˉvaˬ ka tiꞈ te taˍ laˇ ve, “yawˇ leuˆ yuˬ taˍ ve chaw hui” gʼa ponˬ tuˬ leh awˬ tehˬ ve bon liˇ yeˬ chehˇ gʼa tuˬ “awˬ yanˇ oˇ ve htaꞈ yawˇ ngeh piˇ lawˬ tuˬ yoˬ.”  (Maˍkuˆ 13:19, 20) Yaꞈ hkʼaˇ, tuꞈ jaˇ hkanˍ jaˇ ve leh Aˍmaˍgeˍdonˍ hkʼa gaˬ Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve le?

6. Maˇ heˆ heˆ ve bon liˇ htaꞈ maˇ caˉ daꞈ ve awˬ hkʼoˆ kaꞈ ngaˬ hui aˬ htoꞈ ma gʼa te cawˇ sheˍ ve le?

⁶ Yaˬhoˉvaˬ yawˇ ve chaw maˇ heˆ heˆ ve bon liˇ htaꞈ maˇ caˉ daꞈ tcuh gaˇ ve tehꞈ ngaˬ hui henˇ˗oˬ. Yaꞈ hkʼaˇ, chi hkʼe ceh maˇ lawꞈ. Ngaˬ hui awˬ tehˬ ve bon liˇ hpawˇ kaꞈ gʼa chehˇ cawˇ ve yoˬ. Chi ve lehˬ Yaˬhoˉvaˬ htaꞈ daꞈ kehˬ ve hkʼaw oˉ kʼoˍ pui ve yoˬ. Ngaˬ hui chi hkʼe te gʼa tuˬ nyiˇ hkʼaˇ htaꞈ teˇ geh nyi sheˍ.

7. (a) Yaˬhoˉvaˬ ve hteˇ ve cawˇ ve awˬ liˇ awˬ hkʼaˇ htaꞈ hkʼaˬ hkʼe te gʼaꞈ te gʼa tuˬ le? (b) Heˍbrehˇ liꞈ 10:24, 25 hkʼaw kʼoˆ ve hkʼe aˬ htoꞈ ma te ngaˬ hui hpawnˬ daꞈ˗e cawˇ ve le? Aˬ htoꞈ ma te chi teˇ hkui kaꞈ a yeˇ uiˍ jaˇ ve le?

⁷ Awˉ lawˉ teˇ hkʼaˇ lehˬ, Yaˬhoˉvaˬ ve hteˇ ve cawˇ ve awˬ liˇ awˬ hkʼaˇ htaꞈ gʼa gʼaꞈ te ve yoˬ. Shu dawˇ cawˇ ve leh miˬ guiˬ ve awˬ liˇ awˬ hkʼaˇ htaꞈ ngaˬ hui maˇ gʼaꞈ te taˬ. Tawˇ pa haˉ te kʼo, pehꞈ ve tzuhˆ ve hkʼa peu˗eˬ ngaˬ hui maˇ te. Chi hawˉ hkʼaˆ chawˇ hawˉ hkʼaˆ leh yaˇ miˇ chawˇ yaˇ miˇ heuˆ daꞈ ve htaꞈ kʼoˆ ve yoˬ. (Maꞈhtehˍ 19:4, 5; Roˉmaꞈ 1:26, 27) Nyiˇ hkʼaˇ lehˬ, awˬ viˉ awˬ nyi geh Yaˬhoˉvaˬ htaꞈ oˉ kʼoˍ gʼa pui ve yoˬ. Ngaˬ hui hkʼaˬ kaˬ lo chehˇ ve htawˇ, hpawnˬ daꞈ kuiˬ hkʼaw Yaˬhoˉvaˬ htaꞈ oˉ kʼoˍ pui ve hkʼaˬ htaˆ kaꞈ kʼai ve yoˬ. Shu tawˍ laˇ jaˇ ve kʼo aˉ hkʼaw lo maˇ heˆ leh, shu maˇ mawˬ kuiˬ lo hpawnˬ daꞈ tuˬ yoˬ. Hkʼaˬ hkʼe hpehꞈ ve htawˇ ngaˬ hui hkʼaˬ htaˆ kaꞈ hpawnˬ daꞈ˗e tuˬ yoˬ. “Awˬ nyi oˇ ve teˇ nyi gaˬ la paˇ neˇ ve htaꞈ [ngaˬ hui] shiˍ ve pa taw” hkʼaˬ htaˆ kaꞈ hpawnˬ daꞈ˗e cawˇ ve yoˬ.—Heˍbrehˇ 10:24, 25 gʼaw sheˍ.

8. Ngaˬ hui hto toˇ ve awˬ hkʼaˇ hkʼaˬ hkʼe pa tuˬ le?

⁸ Tuꞈ jaˇ hkanˍ jaˇ htaˇ ngaˬ hui hto toˇ ve awˬ hkʼaˇ kaꞈ pa tuˬ yoˬ. Chi teˇ hkui ngaˬ hui daꞈ ve awˬ lawn sha tanˇ hto toˇ leh shu awˬ laꞈ gʼawˇ hpehꞈ la tuˬ coˇ caˇ leh maˍ piˇ ve yoˬ. Oˇ ve teˇ yanˇ vaˇ shiˍ lonˉ ce la ve hkʼe, ngaˬ hui gʼa hto maˍ piˇ tuˬ yoˬ. (Hpeuꞈ maˍ ve 16:21) Maˇ maw ve awˬ yanˇ Saˍtanˍ ve miˬ guiˬ htaꞈ te luˬ tuˬ yoˬ tehꞈ ngaˬ hui hto toˇ tuˬ yoˬ. Awˬ yanˇ gaˬ laˬ htaˇ, hto toˇ tuˬ ve, maˍ tuˬ ve, awˬ hkʼaˇ shiˍ la tuˬ yoˬ. Ngaˬ hui te laˬ maw jaˇ˗oˬ ve hkʼe maˇ heˆ leh awˬ hkʼaˇ awˬ suhˉ pa tuˬ laˇ? Ngaˬ hui law nyi taˍ cawˇ ve yoˬ. Hkʼaˬ hkʼe hpehꞈ ve htawˇ, Yaˬhoˉvaˬ suhˉ jehˬ tuˬ haꞈ hanˉ ve hkʼaw hto toˇ ve a yeˇ uiˍ jaˇ ve awˬ vuiˬ ngaˬ hui gʼa ve yoˬ!—Yeˍsaˍkeˍlaˆ 2:3-5.

9. Ngaˬ hui hto toˇ ve htaꞈ caˉ daꞈ ve mvuhˇ miˬ teˇ hpaˍ hkʼaˬ hkʼe dawˇ tuˬ le? Yaꞈ hkʼaˇ, aˬ htoꞈ ma htaꞈ yonˍ gʼa ve le?

⁹ Oˇ ve teˇ yanˇ ngaˬ hui hto toˇ ve, mvuhˇ miˬ uˉ peunˍ paˍ teˇ hpaˍ nyi ma zuhˆ leh maˇ hto toˇ tcuh laˇ tuˬ yoˬ. Yaꞈ hkʼaˇ, chi teˇ hkui ngaˬ hui Yaˬhoˉvaˬ ve kanˉ te ve yawˇ ga laˇ tuˬ gʼaˇ va ve hkʼe, oˇ ve teˇ yanˇ kaꞈ yawˇ htaꞈ gʼaˇ va cawˇ ve yoˬ. Yaˬhoˉvaˬ yawˇ ve a loˍ htaꞈ te gʼa tuˬ daꞈ kehˬ ve awˬ ha hpu ga laˇ tuˬ yoˬ tehꞈ ngaˬ hui yonˍ gʼa ve yoˬ.—Miˆhkaˍ 3:8.

10. Luˉkaꞈ liꞈ 21:25-28 hkʼaw kʼoˆ taˍ ve hkʼe, tuꞈ jaˇ hkanˍ jaˇ ve awˬ yanˇ htaˇ maˇ˗awˍ ve chaw hkʼaˬ hkʼe dawˇ tuˬ le?

¹⁰ Luˉkaꞈ liꞈ 21:25-28 gʼaw sheˍ. Tuꞈ jaˇ hkanˍ jaˇ ve awˬ yanˇ htaˇ, chaw yaˇ yawˇ hui hkʼaˬ htaˆ kaꞈ gʼaˇ va gʼa ve tehꞈ dawˇ ve htaꞈ te luˬ piˇ ve gʼa mawˬ htaˇ anˇ˗e ve yoˬ. Yawˇ hui “dawˇ tuiꞈ gaˇ tuiꞈ jaˇ” leh chaw yaˇ teˇ co˗e peuˬ teˇ co˗e haiˬ jaˇ ve hkʼaw suh˗e tuˬ ve htaꞈ kawˆ ve yoˬ. (Zeˍhpaˍniˆ 1:14, 15) Oˇ ve teˇ yanˇ ngaˬ hui miˬ guiˬ htaꞈ maˇ caˉ daꞈ leh shoꞈ shaꞈ ve laiˉ ceuˬ gʼa hpuˇ ve pa taw, Yaˬhoˉvaˬ ve chaw a shaꞈ teꞈ hkʼaˇ kaꞈ haˍ jaˇ. Ngaˬ hui loˍ ve awˬ ceuˬ kaꞈ maˇ lawꞈ.

11. (a) Aˬ htoꞈ ma te Yaˬhoˉvaˬ ve Shaˉhkiˆhkanˍ ve chaw htaꞈ mvuhˇ miˬ teˇ hpaˍ te luˬ gaˇ ve le? (b) Aˬ htoꞈ ma te tuꞈ jaˇ hkanˍ jaˇ ve htaꞈ ngaˬ hui kawˆ tuˬ maˇ loˍ ve le?

¹¹ Oˇ ve teˇ yanˇ bon liˇ te luˬ ve hkʼaw ve chaw  teˇ hpaˍ aˬ htoꞈ ma te Yaˬhoˉvaˬ ve Shaˉhkiˆhkanˍ ve chaw htaꞈ maˇ te luˬ ve le naˍ tehꞈ yawˇ hui nyi ma zuhˆ ve yoˬ. Yawˇ hui maˇ dawˇ cawˇ ve hkʼa tawˍ lehˆ te tawˆ la ve yoˬ. Yawˇ hui In˗teu˗neꞈ hkʼaw kaꞈ chi hkʼe bvuhꞈ keu ve yoˬ. Mvuhˇ miˬ teˇ hpaˍ leh yawˇ hui ve awˬ hoˉ Saˍtanˍ ngaˬ hui htaꞈ nyi bawˬ jaˇ. Yawˇ hui dawˇ taˍ ve hkʼe bon liˇ teˇ maˬ le le htaꞈ te luˬ maˇ gʼa ve pa taw yoˬ. Oˇ ve teˇ yanˇ mvuhˇ miˬ teˇ hpaˍ Gawˇgaˆ leh Maˍgawˇgaˆ ve dawˇ hkʼaˇ cawˬ tuˬ yoˬ.  * Yawˇ hui pawnˇ daꞈ leh Yaˬhoˉvaˬ ve chaw htaꞈ te luˬ gʼa ve hkʼe gʼaˇ hteꞈ te luˬ tuˬ yoˬ. (Yeˍsaˍkeˍlaˆ 38:2, 14-16) Chi teˇ hkui ngaˬ hui hkʼa peu˗eˬ maˇ shiˍ ve pa taw, oˇ ve teˇ yanˇ aˬ htoꞈ ma gʼa hpuˇ la ve htaꞈ dawˇ haˍ ve yoˬ. Yaꞈ hkʼaˇ, ngaˬ hui yonˍ gʼa ve teˇ ceuˬ lehˬ, tuꞈ jaˇ hkanˍ jaˇ ve awˬ nyi htaꞈ ngaˬ hui kawˆ tuˬ maˇ loˍ. Ngaˬ hui gʼa ponˬ tuˬ awˬ hkʼaˇ Yaˬhoˉvaˬ kʼoˆ maˍ laˇ tuˬ yoˬ. (Chiˇ mvuh ve 34:19) ‘Gʼuiˬ sha htaiˍ hkʼawꞈ laˇ tuˬ ve awˬ yanˇ neˇ la peuˬ’ ve htaꞈ ngaˬ hui shiˍ ve pa taw “oˉ kʼoˍ chiˇ leh nyi˗o.” *

12. “Ka tiꞈ yeˬ leh cuˇ yiˍ cawˬ ve awˬ ceˬ” awˬ gʼuˇ suhˍ hpawˇ hpehꞈ la tuˬ ve awˬ ceuˬ ngaˬ hui htaꞈ hkʼaˬ hkʼe gu laˇ ve le?

¹² “Ka tiꞈ yeˬ leh cuˇ yiˍ cawˬ ve awˬ ceˬ” ngaˬ hui tuꞈ jaˇ hkanˍ jaˇ ve awˬ yanˇ htaˇ, ka tiꞈ yeˬ gʼa tuˬ yawˇ hui gu teh taˍ laˇ ve yoˬ. (Maꞈhtehˍ 24:45) Yawˇ hui laiˉ hkʼaˇ gu˗oˬ ve yoˬ. Tawˇ pa haˉ te kʼo, 2016 te leh 2018 hkʼawꞈ hpawnˬ daꞈ lonˉ shehˆ nyi hkʼaw Yaˬhoˉvaˬ ve awˬ nyi gaˬ la paˇ neˇ htaˇ, daꞈ ve te hkʼaˇ dawˇ hkʼaˇ cawˬ tuˬ yawˇ hui ga laˇ ve yoˬ. Te hkʼaˇ dawˇ hkʼaˇ chi ve teˇ hpaˍ htaꞈ ngaˬ hui teˇ geh henˇ tuˬ yoˬ.

13. Ngaˬ hui hkʼaˬ hkʼe te Yaˬhoˉvaˬ htaꞈ ka tiꞈ yeˬ gʼa tuˬ le? Aˬ htoꞈ ma te ngaˬ hui chi teˇ hkui kaꞈ te cawˇ ve le?

¹³ Ka tiꞈ yeˬ sheˍ: 2016 hkʼawꞈ hpawnˬ daꞈ lonˉ shehˆ nyi htaˇ awˬ lawn lonˉ ma lehˬ “Hkʼaˬ htaˆ kaꞈ Yaˬhoˉvaˬ htaꞈ ka tiꞈ yeˬ piˇ˗oˆ!” Hpawnˬ daꞈ lonˉ chi ve hkʼaw maˍ laˇ ve ngaˬ hui Yaˬhoˉvaˬ geh meuˆ daꞈ ve kʼo yawˇ htaꞈ ka tiꞈ yeˬ tuˬ yoˬ. Hpawnˬ daꞈ lonˉ chi ve hkʼaw shaˍ tiꞈ peꞈ laˇ ve ngaˬ hui Yaˬhoˉvaˬ geh meuˆ daꞈ gʼa tuˬ nyi ma awˬ tawˍ hkʼa gaˬ bon lawˬ ve, a shu yawˇ hkʼaˇ yawˇ Liꞈ hpu henˇ ve chi teˇ hpaˍ yoˬ. Ngaˬ hui chi hkʼe te chehˇ ve kʼo, beˬ ve lawˇ ve hehnˇ jaˇ ve htaꞈ yeunˇ hkanˍ gʼaˇ tuˬ chi ga laˇ gʼa ve yoˬ. Saˍtanˍ ve miˬ guiˬ leh la paˇ neˇ htaˇ, Gʼuiˬ sha leh yawˇ ve mvuhˇ miˬ htaꞈ ngaˬ hui ka tiꞈ yeˬ ve pa taw, beˬ ve lawˇ ve gʼa hpuˇ jaˇ tuˬ yoˬ tehꞈ dawˇ taˍ cawˇ ve yoˬ. Shu ngaˬ hui htaꞈ kʼoˆ guiˇ gʼuiˬ guiˇ laˇ tuˬ yoˬ. (2 Peˍtruˆ 3:3, 4) Chi ve ngaˬ hui mvuhˇ miˬ choˬ paˉ oˇ paˉ maˇ chehˇ htaˇ hpehꞈ la tuˬ yoˬ. Chi teˇ hkui kaꞈ ngaˬ hui ka tiꞈ yeˬ ve kʼo, tuꞈ jaˇ hkanˍ jaˇ htaˇ ngaˬ hui Yaˬhoˉvaˬ htaꞈ ka tiꞈ yeˬ tuˬ yoˬ.

14. (a) Miˬ guiˬ hkʼoˆ chehˇ ve awˬ viˉ awˬ nyi sheh kʼai paˍ hawˉ hkʼaˆ htaꞈ caˉ daꞈ ve pa ve aˬ htoꞈ ma cawˬ tuˬ le? (b) Aˬ htoꞈ ma te oˇ ve teˇ yanˇ ngaˬ hui ka tiꞈ gʼa yeˬ cawˇ ve le?

¹⁴ Tuꞈ jaˇ hkanˍ jaˇ htaˇ, miˬ guiˬ hkʼoˆ chehˇ ve awˬ viˉ awˬ nyi sheh kʼai paˍ hawˉ hkʼaˆ htaꞈ caˉ daꞈ ve pa ve cawˬ tuˬ yoˬ. Awˬ yanˇ teˇ yanˇ htaˇ, Aˍmaˍgeˍdonˍ hkʼaw maꞈ bawˆ tuˬ leuˆ yuˬ taˍ ve leuˉ taˍ ve chaw htaꞈ mvuhˇ naw ma hkʼoˆ shiˍ taˆ˗e tuˬ yoˬ. (Maꞈhtehˍ 24:31; Hpeuꞈ maˍ ve 2:26, 27) Chi kʼoˆ gaˇ ve lehˬ oˇ ve teˇ yanˇ, yawˇ hui ngaˬ hui geh maˇ chehˇ˗o. Yaꞈ hkʼaˇ, chaw awˬ moˍ lonˉ hteˇ hteˇ shawˇ shawˇ gu laˇ ve htaꞈ gʼa tuˬ yoˬ. Awˬ nu ve yawˬ awˬ vuiˬ cawˬ ve chaw ngaˬ hui htaꞈ sheh kʼai laˇ tuˬ yoˬ. Oˇ ve teˇ yanˇ, yawˇ hui Yaˬhoˉvaˬ beˆ maˍ piˇ ve hkʼaˇ suh ngaˬ hui gʼaꞈ te leh yawˇ hui hpawˇ chehˇ ve tehꞈ ka tiꞈ yeˬ ve hkʼaw hpeuꞈ  maw piˇ tuˬ yoˬ. Ngaˬ hui gʼa ponˬ tuˬ chi ve htaꞈ caˉ daꞈ ve yoˬ.

15. Ngaˬ hui hkʼaˬ hkʼe te yeunˇ hkanˍ gʼaˇ tuˬ le? Aˬ htoꞈ ma te ngaˬ hui chi teˇ hkui kaꞈ te tuˬ a yeˇ uiˍ jaˇ ve le?

¹⁵ Yeunˇ hkanˍ sheˍ: 2017 hkʼawꞈ hpawnˬ daꞈ lonˉ shehˆ nyi htaˇ awˬ lawn lonˉ ma lehˬ “Te tcuhˉ taˍ˗oꞈ!” Hpawnˬ daꞈ lonˉ chi ve hkʼaw ngaˬ hui yeunˇ hkanˍ gʼaˇ tuˬ maˍ laˇ ve yoˬ. Ngaˬ hui te ve awˬ ceuˬ htaꞈ cawˬ ve maˇ heˆ, Yaˬhoˉvaˬ htaꞈ gʼaˇ va ve pa taw yeunˇ hkanˍ gʼaˇ ve yoˬ. (Roˉmaꞈ 12:12) Yeˍsuˆ ka tiꞈ te taˍ laˇ ve, “awˬ leh hkʼa gaˬ yeˬ chehˇ ve chaw lehˬ, htaiˍ hkʼawꞈ ve htaꞈ gʼa tuˬ yoˬ.” (Maꞈhtehˍ 24:13) Ngaˬ hui aˬ htoꞈ ma gʼa hpuˇ ve htawˇ ka tiꞈ gʼa yeˬ ve yoˬ. Chi teˇ hkui kaꞈ ngaˬ hui beˬ ve lawˇ ve teˇ ceuˬ le le htaꞈ yeunˇ hkanˍ gʼaˇ ve kʼo, tuꞈ jaˇ hkanˍ jaˇ ve maˇ gaˬ sheˍ htaˇ ngaˬ hui ve yonˍ hkʼaˇ kaꞈ uiˍ la mvuh la tuˬ yoˬ.

16. Haꞈ hanˉ ve hkʼaˬ kaˬ lo laˬ ve le? Chi teˇ hkui kaꞈ ngaˬ hui haꞈ hanˉ ve hkʼa dehꞈ cawˬ gʼa tuˬ hkʼaˬ hkʼe te gʼa ve le?

¹⁶ Haꞈ hanˉ sheˍ: 2018 hkʼawꞈ hpawnˬ daꞈ lonˉ shehˆ nyi htaˇ, awˬ lawn lonˉ ma lehˬ “Nyi ma haꞈ hanˉ te chehˇ˗oˆ!” Haꞈ hanˉ ve lehˬ ngaˬ hui puiˉ ve cheuˬ ve geh laˬ ve maˇ heˆ tehꞈ hpawnˬ daꞈ lonˉ chi ve hkʼaw maˍ laˇ ve htaꞈ tawnˇ taˍ cawˇ ve yoˬ. Awˬ tehˬ haꞈ hanˉ ve lehˬ yeunˇ hkanˍ leh Yaˬhoˉvaˬ htaꞈ gʼaˇ va ve pa taw yoˬ. Ngaˬ hui hkʼaˬ hkʼe te Yaˬhoˉvaˬ htaꞈ gʼaˇ hkʼa dehꞈ va gʼa tuˬ le? Teˇ nyi le le Liꞈ hpu gʼaw leh Yaˬhoˉvaˬ oˇ htaˇ teˇ co˗e yawˇ ve chaw htaꞈ hkʼaˬ hkʼe ga piˇ jaw ve hkʼa dehꞈ dawˇ nyi cawˇ ve yoˬ. (Chiˇ mvuh ve 68:20; 2 Peˍtruˆ 2:9) “Tuꞈ jaˇ hkanˍ jaˇ ve” awˬ yanˇ mvuhˇ miˬ teˇ hpaˍ ngaˬ hui htaꞈ ca te luˬ la htaˇ, chi teˇ hkui aꞈ kehˉ ngaˬ hui haꞈ hanˉ leh Yaˬhoˉvaˬ htaꞈ gʼaˇ va cawˇ ve yoˬ. (Chiˇ mvuh ve 112:7, 8; Heˍbrehˇ 13:6) Chi teˇ hkui kaꞈ Yaˬhoˉvaˬ htaꞈ gʼaˇ va ve kʼo, Gawˇgaˆ bawˆ la htaˇ, ngaˬ hui haꞈ hanˉ ve cawˬ tuˬ yoˬ. *

17. Aˬ htoꞈ ma te ngaˬ hui Aˍmaˍgeˍdonˍ htaꞈ kawˆ tuˬ maˇ loˍ ve le? (Awˬ htaꞈ hpawˇ ve awˬ han htaꞈ nyi sheˍ.)

¹⁷ Peuˬ taˉ ve teˇ lawn hkʼaw ngaˬ hui gʼa henˇ˗oˬ ve, maˇ˗awˍ ve lehˬ awˬ leh meuˇ lo chehˇ taˍ ve yoˬ. Yaꞈ hkʼaˇ, ngaˬ hui tuꞈ jaˇ hkanˍ jaˇ ve awˬ yanˇ htaꞈ kaꞈ ponˬ kʼai gʼa tuˬ dawˇ law taˍ ve yoˬ. Aˍmaˍgeˍdonˍ miˬ guiˬ hkʼoˆ haiˬ jaˇ ve hkʼa peu˗eˬ htaꞈ te luˬ tuˬ yoˬ. Yaꞈ hkʼaˇ, ngaˬ  hui kawˆ tuˬ maˇ loˍ. Aˬ htoꞈ ma pa taw le? Chi lehˬ Yaˬhoˉvaˬ ve maꞈ hpehꞈ ve pa taw, ngaˬ hui bawˆ tuˬ maˇ loˍ. (Tawˇ naˉ ve 1:33; Yeˍsaˍkeˍlaˆ 38:18-20; Zaˍhkaˍriˆ 14:3) Yaˬhoˉvaˬ lehˬ Yeˍsuˆ Hkriꞈ htaꞈ mvuhˇ naw ma tcuh yaˇ shiˍ leh maꞈ bawˆ tcuh tuˬ yoˬ. Yeˍsuˆ, leuˆ yuˬ taˍ ve chaw, mvuhˇ naw ma tcuh yaˇ awˬ moˍ lonˉ geh pawnˇ daꞈ leh Saˍtanˍ, neˇ haiˬ leh yawˇ ve awˬ moˍ miˬ guiˬ hkʼoˆ chehˇ ve htaꞈ bawˆ tuˬ yoˬ.—Daˍyeˍlaˆ 12:1; Hpeuꞈ maˍ ve 6:2; 17:14.

18. (a) Yaˬhoˉvaˬ ngaˬ hui htaꞈ aˬ htoꞈ ma ka tiꞈ te taˍ laˇ ve le? (b) Hpeuꞈ maˍ ve liꞈ 7:9, 13-17 hkʼaw awˬ gʼuˇ suhˍ hpawˇ caˉ daꞈ ve yonˍ gʼa tuˬ aˬ htoꞈ ma ga laˇ ve le?

¹⁸ Yaˬhoˉvaˬ ka tiꞈ te ve, “laꞈ caˉ chi teˇ hpaˍ lehˬ, nawˬ hui htaꞈ te luˬ laˇ gʼa tuˬ ve maˇ heˆ.”(Iˉsaˍyaˆ 54:17) “Chaw awˬ moˍ lonˉ” ka tiꞈ yeˬ ve hkʼaw Yaˬhoˉvaˬ htaꞈ oˉ kʼoˍ pui ve “tuꞈ jaˇ hkanˍ jaˇ ve” awˬ nyi htaꞈ ponˬ tuˬ yoˬ. Peuˬ hkʼawꞈ nawˉ yawˇ hui ‘Gʼuiˬ sha ve kʼaw jaw awˬ gʼuˇ suhˍ kanˉ’ kʼawꞈ te tuˬ yoˬ. (Hpeuꞈ maˍ ve 7:9, 13-17 gʼaw sheˍ.) Awˬ gʼuˇ suhˍ hpawˇ ve awˬ lawn ngaˬ hui yonˍ gʼa tuˬ Liꞈ hpu hkʼaw ka tiꞈ laiˉ ceuˬ te taˍ laˇ ve yoˬ. “[Yaˬhoˉvaˬ] lehˬ, ka tiꞈ yeˬ ve chaw hui htaꞈ haꞈ shaˉ piˇ” ve tehꞈ ngaˬ hui shiˍ ve yoˬ. (Chiˇ mvuh ve 31:23) Oˇ ve teˇ yanˇ, Yaˬhoˉvaˬ htaꞈ haꞈ leh yawˇ htaꞈ chiˇ mvuh ve chaw yawˇ ve awˬ meh awˬ meꞈ awˬ hponˇ gʼa keunˍ ve tehꞈ hpeuꞈ maw piˇ ve ha lehˬ jaˇ tuˬ yoˬ.—Yeˍsaˍkeˍlaˆ 38:23.

19. Maˇ maw ve awˬ yanˇ ngaˬ hui daꞈ jaˇ ve dawˇ law kuiˬ aˬ htoꞈ ma cawˬ tuˬ le?

¹⁹ 2 Tiˆmoˉseˍ liꞈ 3:2-5 hkʼaw kʼoˆ taˍ ve hkʼe, miˬ guiˬ awˬ suhˉ hkʼaw Saˍtanˍ ve te hkʼaˇ dawˇ hkʼaˇ maˇ heuˆ la ve chaw hkʼaˬ hkʼe hpehꞈ ve dawˇ sheˍ. (Awˇ ceˍ awˇ fa “ Oˇ ve teˇ co˗e ve chaw hkʼaˬ hkʼe hpehꞈ tuˬ le?”) Awˬ viˉ awˬ nyi Cawnˉ Keh˗kaˆ * Uˉ peunˍ ve Kawˍmiˍtiˍ hkʼaw ve teˇ gʼaˇ kʼoˆ ve, “miˬ guiˬ chi hkʼoˆ lo teˇ gʼaˇ le le Yaˬhoˉvaˬ htaꞈ oˉ kʼoˍ pui ve kʼo, ha lehˬ jaˇ tuˬ yoˬ. Maˇ maw ve awˬ yanˇ nawˬ miˬ guiˬ awˬ suhˉ hkʼaw gʼa chehˇ tuˬ yoˬ. Yaˬhoˉvaˬ uˉ peunˍ ve awˬ hawˉ lo co co taiˍ taiˍ gʼa chehˇ tuˬ yoˬ.” Chi lehˬ daꞈ jaˇ ve dawˇ law kuiˬ hpehꞈ ve yoˬ!