1. Aˬ htoꞈ ma te ngaˬ hui Yaˬhoˉvaˬ htaꞈ ceh tiˉ oˉ kʼoˍ pui cawˇ ve le?

 Yaˬhoˉvaˬ ngaˬ hui htaꞈ hpanˍ leh a shaꞈ peꞈ laˇ ve pa taw, yawˇ htaꞈ ceh tiˉ oˉ kʼoˍ pui cawˇ ve yoˬ. (Hpeuꞈ maˍ ve 4:11) Awˬ lawn chi maˇ sha. Ngaˬ hui Yaˬhoˉvaˬ htaꞈ haꞈ leh yawˆ yan ve htawˇ, teˇ ceuˬ ceuˬ ngaˬ hui a shaꞈ teꞈ kuiˬ hkʼaw a yeˇ uiˍ jaˇ ve hpehꞈ la leh Yaˬhoˉvaˬ htaꞈ ceh tiˉ oˉ kʼoˍ maˇ pui la ve yoˬ. Chi ngaˬ hui htaꞈ hpehꞈ la gʼa ve tehꞈ shiˍ cawˇ ve yoˬ. Yaˬhoˉvaˬ htaꞈ ceh tiˉ oˉ kʼoˍ pui ve hkʼaˬ hkʼe kʼoˆ gaˇ ve teˇ geh nyi sheˍ.

2. Tawˆ kʼai ve liꞈ 34:14 hkʼaw kʼoˆ taˍ ve hkʼe, ngaˬ hui Yaˬhoˉvaˬ htaꞈ ceh tiˉ oˉ kʼoˍ pui ve kʼo hkʼaˬ hkʼe te tuˬ le?

² Liꞈ hpu hkʼaw kʼoˆ ve, Yaˬhoˉvaˬ htaꞈ ceh tiˉ oˉ kʼoˍ pui ve kʼoˆ gaˇ ve lehˬ, nyi ma awˬ tawˍ hkʼa gaˬ yawˇ htaꞈ gʼa haꞈ ve yoˬ. Chi kʼoˆ gaˇ ve lehˬ ngaˬ hui Yaˬhoˉvaˬ htaꞈ ceh tiˉ haꞈ ve awˬ nu ve awˬ ceuˬ htaꞈ maˇ haꞈ.—Tawˆ kʼai ve 34:14 gʼaw sheˍ.

3. Aˬ htoꞈ ma te ngaˬ hui Yaˬhoˉvaˬ htaꞈ haꞈ tuˬ daꞈ ve awˬ hkʼaˇ cawˬ ve le?

³ Ngaˬ hui Yaˬhoˉvaˬ htaꞈ haꞈ ve awˬ hkʼaˇ maˇ ca ca˗ehꞈ haꞈ ve maˇ heˆ. Ngaˬ hui yawˇ htaꞈ haꞈ ve lehˬ yawˇ ve awˬ lawn gʼa henˇ ve pa taw yoˬ. Yawˇ ve te hkʼaˇ dawˇ hkʼaˇ htaꞈ ngaˬ hui dawˇ cawˇ jaˇ. Ngaˬ hui Yaˬhoˉvaˬ dawˇ cawˇ ve, maˇ dawˇ cawˇ ve htaꞈ shiˍ leh yawˇ hkʼe dawˇ ve yoˬ. Chi hkʼoˆ kaꞈ Gʼuiˬ sha chaw yaˇ htaꞈ hkʼaˬ hkʼe dawˇ ve ngaˬ hui shiˍ leh gʼaꞈ te gaˇ ve yoˬ. Gʼuiˬ sha ngaˬ hui htaꞈ haꞈ leh awˬ chawˇ te laˇ ve ha lehˬ jaˇ. (Chiˇ mvuh ve 25:14) Hpanˍ shehˍ hpaˇ ve awˬ lawn ngaˬ hui shiˍ ve pa taw, yawˇ htaꞈ meuˆ daꞈ tuˬ te laˇ ve yoˬ.—Yaˍkoˆ 4:8.

4. (a) Ngaˬ hui Yaˬhoˉvaˬ htaꞈ hkʼa dehꞈ maˇ haꞈ tuˬ Saˍtanˍ awˬ hkʼaˇ hkʼaˬ hkʼe hpawˇ yehˇ ve le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

 ⁴ Saˍtanˍ miˬ guiˬ htaꞈ uˉ peunˍ ve pa taw, ngaˬ hui dawˇ cawˇ tuˬ te laˇ ve awˬ ceuˬ teˇ hpaˍ leh a shaꞈ teꞈ kuiˬ hkʼaw a yeˇ uiˍ jaˇ ve hpehꞈ la leh yaꞈ ve hpawˇ maˇ te tuˬ haˍ jaˇ. (Eˇfeˇsuꞈ 2:1-3; 1 Yoˇhanˬ 5:19) Saˍtanˍ ve dawˇ hkʼaˇ lehˬ ngaˬ hui ve nyi ma Yaˬhoˉvaˬ htaꞈ maˇ haꞈ leh oˉ kʼoˍ maˇ pui tuˬ, awˬ nu ve awˬ ceuˬ htaꞈ kaꞈ haꞈ tcuh gaˇ ve yoˬ. Chi teˇ hkui Saˍtanˍ yehˇ ve 2 hkʼaˇ htaꞈ teˇ geh dawˇ nyi sheˍ. Awˉ lawˉ teˇ hkʼaˇ, ngaˬ hui hpu htaꞈ haꞈ tuˬ yawˇ coˇ caˇ leh te laˇ ve yoˬ. Nyiˇ hkʼaˇ teˇ hkʼaˇ, ngaˬ hui maˇ daꞈ ve pyawˍ ve hpawˇ leuˆ tuˬ yawˇ coˇ caˇ leh te laˇ ve yoˬ.

5. Ngaˬ hui hpu htaꞈ haꞈ ve chaw maˇ hpehꞈ tuˬ aˬ htoꞈ ma te shaˍ tiꞈ gʼa te cawˇ ve le?

⁵ Ngaˬ hui caˇ tuˬ dawˬ tuˬ lawꞈ ve, aˉ poꞈ veuꞈ kʼaˇ cawˬ ve, leh chehˇ kuiˬ daꞈ ve cawˬ ve a hkʼe leˇ hpehꞈ ve yoˬ. Yaꞈ hkʼaˇ, ngaˬ hui hpu htaꞈ haꞈ ve chaw maˇ gʼa hpehꞈ tuˬ shaˍ tiꞈ gʼa te ve yoˬ. Chaw maˇ maˇ hpu shi mawˇ jeˬ htaꞈ haꞈ leh “sheˉ lai ve” yoˬ. (2 Tiˆmoˉseˍ 3:2) Yeˍsuˆ ve awˬ laꞈ gʼawˇ hpu htaꞈ haꞈ˗e la ve tehꞈ yawˇ shiˍ ve pa taw, shaˍ tiꞈ piˇ ve, “chaw teˇ gʼaˇ kaꞈ jawˇ mawˇ nyiˇ gʼaˇ ve awˬ ceˬ te maˇ gʼa. Awˬ lawn kʼo, teˇ gʼaˇ htaꞈ canˇ kʼo, teˇ gʼaˇ htaꞈ haꞈ tuˬ yoˬ. Teˇ gʼaˇ htaꞈ yawˆ yan kʼo, teˇ gʼaˇ htaꞈ maˇ shawˍ maˇ caˆ te tuˬ yoˬ. Nawˬ hui lehˬ Gʼuiˬ sha ve awˬ ceˬ kaꞈ, hpu shi mawˇ jeˬ ve awˬ ceˬ kaꞈ, teˇ pawˆ tiˉ teˇ geh te maˇ gʼa.” (Maꞈhtehˍ 6:24) Chi htaꞈ pa taw, a shu teˇ gʼaˇ Yaˬhoˉvaˬ htaꞈ oˉ kʼoˍ pui˗oˬ ve htawˇ, paw sha gaˇ ve pa taw awˬ yanˇ leh awˬ gʼaˇ yehˇ maˇ jaˇ leh, yawˇ jawˇ mawˇ 2 gʼaˇ ve awˬ ceˬ te chehˇ ve yoˬ. Yaˬhoˉvaˬ htaꞈ ceh tiˉ oˉ kʼoˍ maˇ pui.

6. Yeˍsuˆ Lawˍdiˍkiˆ venˇ Hkriꞈ yaˇ awˬ moˍ htaꞈ kʼoˆ piˇ ve, ngaˬ hui hkʼaˬ hkʼe te henˇ yuˬ gʼa ve le?

⁶ Awˉ lawˉ peuˇ htaˇ, Lawˍdiˍkiˆ venˇ hkʼaw ve Hkriꞈ yaˇ awˬ moˍ, “ngaˬ lehˬ paw sha ve yoˬ. Mawˇ  jeˬ maˇ maˇ shaw hpoˆ taˍ peuˬ. Ngaˬ teꞈ chiˉ kaꞈ maˇ loˍ” tehꞈ kʼoˆ ve yoˬ. Yaꞈ hkʼaˇ, Yaˬhoˉvaˬ leh Yeˍsuˆ mehˆ gʼuˇ suhˍ, “nawˬ lehˬ hkʼaˬ ma hpehꞈ bawˬ tuˬ cawˬ ve, hkʼaˬ ma ha kʼaˉ tuˬ cawˬ ve leh, hkʼaˬ ma haˍ gʼawˇ chehˇ ve htaꞈ nawˬ maˇ shiˍ. Nawˬ mehˆ cuˉ leh awˬ kʼu nyi hpehꞈ chehˇ ve” yoˬ. Yeˍsuˆ yawˇ hui htaꞈ chi hkʼe kʼoˆ piˇ ve, paw sha ve htaꞈ pa taw maˇ heˆ. Yaꞈ hkʼaˇ, yawˇ hui hpu htaꞈ haꞈ jaˇ ve pa taw, Yaˬhoˉvaˬ geh meuˆ daꞈ ve htaꞈ heuˆ la kuiˬ cawˬ ve yoˬ. (Hpeuꞈ maˍ ve 3:14-17) Chi htaꞈ pa taw, a shu hpu htaꞈ haꞈ ve tehꞈ shiˍ la htaˇ, haˆ gu cawˇ ve yoˬ. (1 Tiˆmoˉseˍ 6:7, 8) Chi hkʼe maˇ te ve kʼo, ngaˬ hui ve nyi ma awˬ nu ve awˬ ceuˬ htaꞈ haꞈ ve pa taw, Yaˬhoˉvaˬ htaꞈ oˉ kʼoˍ pui ve yawˇ maˇ haꞈ yuˬ. Yawˇ htaꞈ ceh tiˉ oˉ kʼoˍ pui tcuh gaˇ ve yoˬ. (Bon maˍ ve 4:24) Yaꞈ hkʼaˇ, ngaˬ hui a shaꞈ teꞈ kuiˬ hkʼaw hpu a yeˇ uiˍ jaˇ ve hkʼaˬ hkʼe te hpehꞈ la gʼa ve le?

7-9. Nyi haꞈ shaˉ paˍ Daˍviˆ ve awˬ lawn nawˬ htaꞈ aˬ htoꞈ ma maˍ laˇ ve le?

⁷ Aˍmeˬriˆkaꞈ mvuhˇ miˬ lo nyi haꞈ shaˉ paˍ kaiˬ ve teˇ gʼaˇ Daˍviˆ htaꞈ teˇ geh nyi sheˍ. Yawˇ lehˬ kanˉ te kuiˬ hkʼaw kaiˬ ve chaw teˇ gʼaˇ hpehꞈ jaw ve yoˬ. Yawˇ ve aˉ yaˇ kʼawꞈ taˆ ve, ha pa hpfuhˇ kʼawꞈ taˆ ve, leh yawˇ te chehˇ ve kanˉ hpawˇ cheuˬ ve teˇ gʼaˇ hpehꞈ ve yoˬ. Yawˇ kʼoˆ ve, “oˇ ve teˇ yanˇ ngaˬ te gʼa ve teˇ ceuˬ le le Yaˬhoˉvaˬ awˬ bon naꞈ laˇ ve pa taw, te gʼa ve tehꞈ dawˇ ve yoˬ. Awˬ tehˬ kʼo, chi hkʼe hpehꞈ˗aw laˇ?”

⁸ Daˍviˆ ve kanˉ lehˬ Yaˬhoˉvaˬ geh meuˆ daꞈ ve htaꞈ heuˆ la kuiˬ cawˬ ve tehꞈ shiˍ la ve yoˬ. Yawˇ kʼoˆ ve, “hpawnˬ daꞈ htaˇ, hto toˇ htaˇ, ngaˬ kanˉ awˬ lawn tiˉ dawˇ nyi ve yoˬ.” Yawˇ kʼawꞈ kʼoˆ ve, “ngaˬ hpu gʼa maˇ jaˇ ve htawˇ, dawˇ maˇ jaˇ leh ngaˬ miˇ ma geh kaꞈ maˇ cawˇ daꞈ.”

⁹ Daˍviˆ yawˇ a shaꞈ teꞈ kuiˬ hkʼaw aˬ htoꞈ ma  a yeˇ uiˍ ve awˉ lawˉ teh ve yawˇ gʼa chaˬ nyi ve yoˬ. Yawˇ kʼoˆ ve, “ngaˬ ve a shaꞈ teꞈ hkʼaˇ gʼa pa cawˇ ve yoˬ.” Awˬ tehˬ kʼo, Daˍviˆ kanˉ te ve awˬ yanˇ pa gaˇ leh awˬ shehˍ hpaˇ htaꞈ kʼoˆ piˇ ve yoˬ. Yaꞈ hkʼaˇ, yawˇ kanˉ maˇ cawˬ tuˬ te piˇ ve yoˬ. Daˍviˆ kʼoˆ ve, “shawˉ pawˍ kʼo ngaˬ hkʼaˬ htaˆ kaꞈ teˇ tcuhˉ teˇ yanˇ gʼuˇ suhˍ peuˍ ve te tuˬ liꞈ bvuhꞈ piˇ ve yoˬ.” Hkʼe kʼo yawˇ ve kanˉ˗ehꞈ? Daˍviˆ leh awˬ miˇ ma daꞈ kehˬ tuˬ kanˉ te ve yoˬ. Maˇ maw hkʼawꞈ nawˉ, yawˇ hkʼaˬ htaˆ kaꞈ gʼuˇ suhˍ peuˍ ve te tuˬ liꞈ bvuhꞈ piˇ ve yoˬ. Peuˬ leh awˬ miˇ ma kaꞈ gʼuˇ suhˍ peuˍ ve te ve yoˬ. Yawˇ hui ve kanˉ shu awˬ pon awˬ hpfuhˇ maˇ cawˬ. Yaꞈ hkʼaˇ, yawˇ hui a shaꞈ teꞈ kuiˬ hkʼaw a yeˇ uiˍ jaˇ ve maˇ heˆ. Yawˇ hui gʼa jaw ve gʼaˇ hpfuhˇ 10 pun te leh 1 pun hkʼe taw ceh gʼa ve yoˬ. Yaꞈ hkʼaˇ, yawˇ hui loˍ ve awˬ ceuˬ kaꞈ cawˬ leh hpu yehˇ lawꞈ ve yoˬ. Yawˇ hui a shaꞈ teꞈ kuiˬ hkʼaw Yaˬhoˉvaˬ htaꞈ a yeˇ uiˍ jaˇ tehꞈ shawˍ leh chi hkʼe te ve chaw htaꞈ yawˇ nyi haꞈ shaˉ ve tehꞈ yawˇ hui hkʼa tawˍ lehˆ gʼa mawˬ ve yoˬ.—Maꞈhtehˍ 6:31-33.

10. Ngaˬ hui ve nyi ma htaꞈ hkʼaˬ hkʼe te haꞈ shaˉ gʼa tuˬ le?

¹⁰ Hpu cawˬ maˇ ve, maˇ cawˬ maˇ ve htawˇ, a shu yawˇ nyi ma htaꞈ gʼa haꞈ shaˉ ve yoˬ. Ngaˬ hui hpu htaꞈ haꞈ ve chaw maˇ gʼa hpehꞈ tuˬ shaˍ tiꞈ gʼa te ve yoˬ. Yaˬhoˉvaˬ ve kanˉ te ve aꞈ kehˉ, awˬ suhˍ awˬ shaˍ hpawˇ ca caˇ ve a yeˇ uiˍ ve taˇ te piˇ. Yaꞈ hkʼaˇ, nawˬ chi hkʼe hpehꞈ ve tehꞈ hkʼaˬ hkʼe te shiˍ gʼa tuˬ le? Awˉ lawˉ teˇ hkʼaˇ a shu yawˇ awˬ to htaꞈ na nyi cawˇ ve, ‘ngaˬ hpawnˬ daꞈ htaˇ leh hto toˇ˗e htaˇ, kanˉ awˬ lawn hkʼaˬ htaˆ kaꞈ dawˇ nyi˗aw laˇ? Ngaˬ hpu maˇ yehˇ lawꞈ la ve htaꞈ hkʼaˬ htaˆ kaꞈ dawˇ haˍ˗aw laˇ? Ngaˬ ve awˬ ca geh hpu shi mawˇ jeˬ ve awˬ lawn cawˬ daꞈ˗aw laˇ? Yaˬhoˉvaˬ ve kanˉ maˇ maˇ te tuˬ shu awˬ pon awˬ hpfuhˇ maˇ cawˬ ve kanˉ te˗aw laˇ?’ (1 Tiˆmoˉseˍ 6:9-12) Na hkawˇ chi ve teˇ hpaˍ htaꞈ dawˇ nyi htaˇ, Yaˬhoˉvaˬ htaꞈ haꞈ leh awˬ to chiˇ aꞈ piˇ ve chaw htaꞈ, “ngaˬ nawˬ htaꞈ hkʼaˬ htaˆ kaꞈ maˇ hpaˆ, hkʼaˬ htaˆ kaꞈ maˇ baˬ” tehꞈ yawˇ ka tiꞈ te piˇ ve yoˬ. Chi htaꞈ pa taw Pawˇluꞈ kʼoˆ ve ‘hpu htaꞈ sheˉ lai ve taˇ cawˬ piˇ.’—Heˍbrehˇ 13:5, 6.

11. Pyawˍ ve hkʼaˬ hkʼe heuˆ la kuiˬ cawˬ ve le?

¹¹ Yaˬhoˉvaˬ ngaˬ hui htaꞈ pyawˍ leh ha lehˬ tcuh gaˇ ve yoˬ. Liꞈ hpu hkʼaw kʼoˆ ve, “chaw yaˇ te keunˍ te cawˇ jaˇ ve kanˉ lehˬ, a shu yawˇ ca gʼa taˍ ve mawˇ jeˬ htaꞈ yehˇ leh ha lehˬ ha kʼa caˇ chehˇ dawˬ chehˇ cawˇ ve yoˬ.” (Cuˇ yiˍ piˇ ve 2:24) Yaꞈ hkʼaˇ, miˬ guiˬ yaˇ pyawˍ ve lehˬ ngaˬ hui htaꞈ heuˆ la kuiˬ kaꞈ cawˬ ve yoˬ. Saˍtanˍ yawˇ hui htaꞈ pehꞈ  ve tzuhˆ ve hpawˇ chaꞈ chiˆ tuˬ te piˇ ve htaꞈ yawˇ hui haꞈ yuˬ leh Liꞈ hpu hkʼaw haiˬ jaˇ kʼoˆ ve htaꞈ yawˇ hui dawˇ cawˇ ve yoˬ.

12. 1 Kawˇrenˍhtuˆ liꞈ 10:21, 22 hkʼaw kʼoˆ taˍ ve hkʼe, aˬ htoꞈ ma te ngaˬ hui pyawˍ ve hpawˇ cuˇ yiˍ cawˬ ve hkʼaw leuˆ cawˇ ve le?

¹² Ngaˬ hui Yaˬhoˉvaˬ htaꞈ ceh tiˉ oˉ kʼoˍ pui gaˇ ve yoˬ. Chi htaꞈ pa taw, ngaˬ hui “[Yaˬhoˉvaˬ] ve hpui lawˇ” leh “neˇ teˇ hpaˍ ve hpui lawˇ” teˇ geh caˇ maˇ hpehꞈ. (1 Kawˇrenˍhtuˆ 10:21, 22 gʼaw sheˍ.) Awˬ tehˬ kʼo, teˇ geh awˍ caˇ ve chaw lehˬ awˬ chawˇ hpehꞈ ve yoˬ. Chi htaꞈ pa taw, pyawˍ ve hehnˇ ve, pehꞈ ve tzuhˆ ve, neˇ ve awˬ lawn, maˇ heˆ leh loˍ ve, leh maˇ daꞈ ve dawˇ hkʼaˇ teˇ hpaˍ htaꞈ leuˆ ve kʼo, Yaˬhoˉvaˬ ve canˇ paˍ Saˍtanˍ caˇ tuˬ gu leh yawˇ hui geh caˇ chehˇ ve hkʼe hpehꞈ ve yoˬ. Chi ngaˬ hui ceh heuˆ la ve maˇ heˆ. Yaꞈ hkʼaˇ, ngaˬ hui Yaˬhoˉvaˬ geh meuˆ daꞈ ve kaꞈ yoˬ.

13-14. Pyawˍ ve awˬ ceuˬ lehˬ caˇ tuˬ htaꞈ hkʼaˬ hkʼe shuˍ ve le? (b) Yaˍkoˆ liꞈ 1:14, 15 hkʼaw kʼoˆ taˍ ve hkʼe, aˬ htoꞈ ma te ngaˬ hui cuˇ yiˍ cawˬ ve hkʼaw pyawˍ ve htaꞈ leuˆ cawˇ ve le?

¹³ Pyawˍ ve hkʼaˬ hkʼe te caˇ tuˬ htaꞈ shuˍ ve le? Ngaˬ hui aˬ htoꞈ ma caˇ tuˬ leuˆ gʼa ve yoˬ. Yaꞈ hkʼaˇ, ngaˬ hui hehˆ dawˬ˗oˬ ve kʼo, ngaˬ hui awˬ to htaꞈ hkʼaˬ hkʼe heuˆ la ve htaꞈ tawˍ maˇ gʼa. Chi teˇ hpaˍ yawˇ hkʼaˇ yawˇ hpehꞈ la ve yoˬ. Caˇ tuˬ daꞈ ve lehˬ awˬ to hpawˇ awˬ bon cawˬ ve yoˬ. Caˇ tuˬ maˇ daꞈ ve lehˬ awˬ to hpawˇ awˬ bon maˇ cawˬ. Ngaˬ hui chi ve htaꞈ laꞈ haˉ maˇ mawˬ ve htawˇ, awˬ meu˗eˇ meu˗eˇ mawˬ tuˬ yoˬ.

¹⁴ Chi ve hkʼa shuˍ pyawˍ ve awˬ ceuˬ leuˆ htaˇ, ngaˬ hui ve te hkʼaˇ dawˇ hkʼaˇ hkʼaw aˬ htoꞈ ma cawˬ tcuh tuˬ leuˆ gʼa ve yoˬ. Yaꞈ hkʼaˇ, ngaˬ hui nyi ve, leˍ guiˇ ve, na ve, peuˬ hkʼawꞈ nawˉ hpehꞈ laˬ ve awˬ ceuˬ htaꞈ tawˍ maˇ gʼa. Nyi ma hkʼaw dawˇ la ve yoˬ. Pyawˍ ve hpawˇ daꞈ ve lehˬ awˬ bon cawˬ ve yoˬ. Pyawˍ ve hpawˇ maˇ daꞈ ve lehˬ kawˆ tuˬ cawˬ ve yoˬ. (Yaˍkoˆ 1:14, 15 gʼaw sheˍ.) Heuˆ la ve ngaˬ hui laꞈ haˉ maˇ mawˬ ve htawˇ, awˬ meu˗eˇ meu˗eˇ mawˬ tuˬ yoˬ. Chi htaꞈ pa taw Liꞈ hpu hkʼaw shaˍ tiꞈ peꞈ laˇ ve, “taˇ dawˇ yaꞈ. Gʼuiˬ sha htaꞈ hkʼa mvuhˇ hkʼa na te maˇ hpehꞈ. Chaw teˇ gʼaˇ lehˬ, yawˇ awˬ yawˇ sheˍ ve hkʼe yawˇ gʼa gʼeuꞈ tuˬ yoˬ. A shu yawˇ awˬ suhˍ awˬ shaˍ htaꞈ caˉ daꞈ ve teˇ ceuˬ htaꞈ sheˍ ve kʼo, awˬ suhˍ awˬ shaˍ htaꞈ caˉ daꞈ ve awˬ hkʼaw lo luˬ ve sheˆ ve htaꞈ gʼa gʼeuꞈ tuˬ yoˬ.” (Gaˍlaˍtiˆ 6:7, 8) Chi htaꞈ pa taw Yaˬhoˉvaˬ canˇ ve awˬ ceuˬ htaꞈ maˇ nyi, maˇ leˍ, leh maˇ na ve a yeˇ uiˍ jaˇ!—Chiˇ mvuh ve 97:10.

15. Yaˬhoˉvaˬ ngaˬ hui htaꞈ aˬ htoꞈ ma laꞈ shawnˍ peꞈ laˇ ve le?

¹⁵ Yaˬhoˉvaˬ ve chaw In˗teu˗neꞈ hkʼaw JW awˬ han tawˆ kuiˬ nyi ve dawˇ cawˇ ve yoˬ. Awˬ viˉ awˬ nyi yaˇ miˇ Mehˉlenˍ kʼoˆ ve, “JW awˬ han tawˆ kuiˬ ngaˬ daꞈ ve hpawˇ dawˇ tuˬ ga laˇ ve yoˬ. Ngaˬ teˇ lawn le le nyi gʼa ve yoˬ. Hkʼaˬ ve daꞈ maˇ daꞈ ve leuˆ tuˬ maˇ loˍ. Ngaˬ awˬ gʼaˇ nuˇ leh chehˇ bawˬ htaˇ, bon maˍ ve leh Teˇ nyi le le Liꞈ hpu chaˬ nyi tuˬ nyi ve ngaˬ dawˇ cawˇ jaˇ. Ngaˬ htaꞈ awˬ gʼaˇ peꞈ laˇ jaˇ. Ngaˬ Yaˬhoˉvaˬ leh yawˇ ve kanˉ hkʼaˇ htaꞈ meuˆ daꞈ maˇ la ve yoˬ. JW awˬ han tawˆ kuiˬ ngaˬ ve a shaꞈ teꞈ hkʼaˇ pa laˇ jaˇ.” JW awˬ han tawˆ kuiˬ Yaˬhoˉvaˬ peꞈ laˇ ve laꞈ shawnˍ hpehꞈ ve yoˬ. Chi ve nawˬ awˬ pon awˬ bon gʼa˗aw laˇ? JW awˬ han tawˆ kuiˬ teˇ ha pa le le ve, VDO, awˬ hkawˇ, leh liꞈ hkawˇ kaꞈ yoˬ. Ngaˬ hui hkʼaˬ htaˆ nyi leh hkʼaˬ htaˆ na kaꞈ hpehꞈ ve yoˬ.

16-17. Aˬ htoꞈ ma te pyawˍ ve awˬ ceuˬ htaꞈ ngaˬ hui awˬ yanˇ chi maw maw maˇ yehˇ cawˇ ve le? Chi ngaˬ hui hkʼaˬ hkʼe te gʼa tuˬ le?

¹⁶ Ngaˬ hui aˬ htoꞈ ma leˍ guiˇ ve, na ve, maˇ heˆ leh pyawˍ ve nyi ve ceh maˇ heˆ. Yaꞈ hkʼaˇ, ngaˬ hui awˬ yanˇ hkʼaˬ hkʼe maw yehˇ ve shaˍ tiꞈ gʼa te ve yoˬ. Maˇ heˆ kʼo Yaˬhoˉvaˬ ve kanˉ aꞈ kehˉ pyawˍ ve awˬ ceuˬ htaꞈ awˬ yanˇ yehˇ maˇ jaˇ la ve yoˬ. Awˬ yanˇ cawˇ cawˇ te tuˬ haˍ jaˇ tehꞈ laiˉ gʼaˇ dawˇ ve yoˬ. Aˍbiˆgeˬlaˆ 18 hkʼawꞈ ve kʼoˆ ve, “ngaˬ teˇ nyi mvuhˇ hkʼa hpeuꞈ kanˉ te heuˬ jaˇ  leh awˬ han nyi ve kʼo, heuˬ ve na˗e la leh nyi ma sha ve yoˬ. Yaꞈ hkʼaˇ shaˍ tiꞈ maˇ te ve kʼo shiˍ la htaˇ, awˬ han laiˉ naˍ riˍ nyi˗oˬ.” Yaˇ nehˬ teˇ gʼaˇ Saˍmo˗eˍlaˆ kʼoˆ ve, “teˇ pawˆ pawˆ kʼo ngaˬ VDO teˇ maˬ peuˬ teˇ maˬ nyi ve yoˬ. Awˉ lawˉ htaˇ leh teˇ maˬ ceh tiˉ nyi ve yoˬ. Yaꞈ hkʼaˇ, shiˍ la htaˇ 3-4 naˍ riˍ nyi˗o ve law.”

¹⁷ Chi htaꞈ pa taw pyawˍ ve awˬ ceuˬ awˬ yanˇ cawˇ cawˇ hkʼaˬ hkʼe te gʼa tuˬ le? Awˉ lawˉ htaˇ, nawˬ awˬ yanˇ hkʼaˬ hkʼe maw yehˇ˗oˬ ve htaꞈ shawˍ nyi sheˍ. Aˬ htoꞈ ma te teˇ shinˉ maˇ bvuhꞈ tawnˇ nyi ve le? Awˬ han nyi ve, In˗teu˗neꞈ leˍ guiˇ ve, tawˇ yaw tuˬ awˬ hkʼeun hkʼaw kenˍ (game) hkʼaˬ hkʼe maw leˍ guiˇ ve ha pa liꞈ hkʼaw bvuhꞈ keu nyi sheˍ. Nawˬ awˬ yanˇ yehˇ maˇ jaˇ ve htaꞈ mawˬ htaˇ, awˬ hkʼaˇ kʼawꞈ gu teh sheˍ. A yeˇ uiˍ ve htaꞈ awˬ yanˇ shawˍ teh peuˬ hkʼawꞈ nawˉ, pyawˍ ve awˬ ceuˬ htaꞈ kʼawꞈ te sheˍ. Nawˬ awˬ yanˇ shawˍ teh gʼa tuˬ Yaˬhoˉvaˬ ga laˇ tuˬ bon lawˬ sheˍ. Nawˬ chi hkʼe te ve kʼo, a shu yawˇ hkʼaˇ yawˇ Liꞈ hpu henˇ ve, yehˬ kʼa hkʼaw oˉ kʼoˍ pui ve, hpawnˬ daꞈ˗e ve, hto toˇ˗e ve, shu htaꞈ awˬ tehˬ ve maˍ piˇ tuˬ awˬ yanˇ cawˬ ve yoˬ. Chi teˇ hpaˍ te ve kʼo, pyawˍ ve hpawˇ awˬ yanˇ maˇ yehˇ maˇ leh ha lehˬ kuiˬ cawˬ ve yoˬ.

18-19. Ngaˬ hui Yaˬhoˉvaˬ htaꞈ ceh tiˉ oˉ kʼoˍ pui ve tehꞈ hkʼaˬ hkʼe te hpeuꞈ maw piˇ gʼa tuˬ le?

¹⁸ Tcuh yaˇ Peˍtruˆ Saˍtanˍ ve awˬ yanˇ leh la paˇ neˇ ve leh miˬ guiˬ awˬ suhˉ gaˬ la chehˇ ve htaꞈ yawˇ bvuhꞈ peuˬ hkʼawꞈ nawˉ yawˇ kʼoˆ ve, “haꞈ ve chaw teˇ hpaˍ˗oˬ, nawˬ hui chi teˇ hpaˍ htaꞈ dawˇ law chehˇ ve htaꞈ pa taw, yawˇ mehˆ gʼuˇ suhˍ chaꞈ chiˆ ve leh awˬ kuiˉ awˬ haiˇ maˇ gʼa cawˬ tuˬ leh, dawˇ sha gaˇ sha ve nyi ma gʼa cawˬ tuˬ, coˇ caˇ leh te˗o.” (2 Peˍtruˆ 3:14) Beˆ maˍ laˇ ve chi htaꞈ ngaˬ hui gʼaꞈ te leh Yaˬhoˉvaˬ htaꞈ oˉ kʼoˍ pui ve yawˇ a loˍ cawˇ leh haꞈ yuˬ laˇ ve htaꞈ te ve kʼo, ngaˬ hui yawˇ htaꞈ ceh tiˉ oˉ kʼoˍ pui ve tehꞈ hpeuꞈ maw piˇ ve yoˬ.

¹⁹ Saˍtanˍ leh yawˇ hpawˇ chehˇ ve ngaˬ hui Yaˬhoˉvaˬ aꞈ kehˉ awˬ nu ve awˬ ceuˬ htaꞈ a yeˇ uiˍ ve tehꞈ shawˍ tuˬ yawˇ hui coˇ caˇ leh gʼaˇ hteꞈ te laˇ ve yoˬ. (Luˉkaꞈ 4:13) Yaꞈ hkʼaˇ, ngaˬ hui Yaˬhoˉvaˬ htaꞈ ceh tiˉ haꞈ ve awˬ nu ve awˬ ceuˬ htaꞈ maˇ haꞈ. Yaˬhoˉvaˬ gʼa keunˍ ve hkʼe ngaˬ hui yawˇ htaꞈ ceh tiˉ oˉ kʼoˍ pui tuˬ dawˇ teh taˍ ve yoˬ!