1. Yaˬhoˉvaˬ yawˇ ve a loˍ awˬ tehˬ biˇ la tuˬ yawˇ aˬ htoꞈ ma te gʼa ve le?

 Yaˬhoˉvaˬ yawˇ ve a loˍ awˬ tehˬ biˇ la tuˬ yawˇ aˬ htoꞈ ma hpehꞈ tcuh gaˇ kaꞈ hpehꞈ gʼa ve yoˬ. Yawˇ lehˬ Saˍlaꞈ, awˬ gʼaˇ piˇ shehˍ hpaˇ, leh daꞈ ve awˬ lawn sha tanˇ maˍ shehˍ hpaˇ hpehꞈ ve yoˬ. Chi lehˬ yawˇ te ve teˇ ceuˬ ceuˬ ceh hpehꞈ sheˍ. (Iˉsaˍyaˆ 48:17; 2 Kawˇrenˍhtuˆ 7:6; Gaˍlaˍtiˆ 3:8) Yaꞈ hkʼaˇ, laiˉ pawˆ kʼo, Yaˬhoˉvaˬ dawˇ taˍ ve hkʼe te biˇ la tuˬ chaw yaˇ htaꞈ yehˇ ve yoˬ. (Maꞈhtehˍ 24:14; 28:19, 20; 2 Kawˇrenˍhtuˆ 1:3, 4) Yawˇ ve a loˍ biˇ la tuˬ, cuˇ yiˍ, awˬ gʼaˇ, a shu htaꞈ piˇ kaꞈ gʼa ve yoˬ. Cuˇ yiˍ cawˬ paˍ teˇ hpaˍ hpaˍ kʼoˆ ve, chi lehˬ Yaˬhoˉvaˬ ve awˬ meh tcuhˉ kuiˬ htaꞈ kʼoˆ gaˇ ve yoˬ.

2. (a) Yaˬhoˉvaˬ ngaˬ hui htaꞈ yehˇ sheˍ ve laˇ tehꞈ aˬ htoꞈ ma te teˇ pawˆ pawˆ kʼo htawˇ dawˇ nawˬ dawˇ cawˬ ve le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Ngaˬ hui Yaˬhoˉvaˬ yehˇ ve chaw hpehꞈ gaˇ ve yoˬ. Yaꞈ hkʼaˇ, chaw teˇ hpaˍ Yaˬhoˉvaˬ yawˇ htaꞈ yehˇ sheˍ ve laˇ tehꞈ dawˇ ve yoˬ hehˉ. Aˬ htoꞈ ma te chi hkʼe dawˇ ve le? A shaꞈ maˇ la ve, a shaꞈ teꞈ kuiˬ hkʼaw gʼa hpuˇ ve, maˇ heˆ leh hkʼa dehꞈ te maˇ gʼa ve pa taw, Yaˬhoˉvaˬ ve kanˉ te gaˇ ve hkʼe te maˇ gʼa tehꞈ dawˇ ve yoˬ. Chaw teˇ hpaˍ kʼo, yawˇ hui te chehˇ ve htaꞈ nyi hkʼaˇ suh leh chi aꞈ kehˉ te tuˬ maˇ loˍ tehꞈ dawˇ ve yoˬ. Yaˬhoˉvaˬ ve a loˍ awˬ tehˬ biˇ la tuˬ ngaˬ hui loˍ ve awˬ ceuˬ htaꞈ hkʼaˬ hkʼe peꞈ laˇ ve le? Liꞈ hpu hkʼaw hawˉ hkʼaˆ leh yaˇ miˇ yawˇ hui te gaˇ ve nyi ma cawˬ leh Gʼuiˬ sha nyi hkʼaˇ suh ve htaꞈ te piˇ gʼa tuˬ, Gʼuiˬ sha yawˇ hui htaꞈ hkʼaˬ hkʼe ga piˇ ve le? Leh ngaˬ  hui Yaˬhoˉvaˬ htaꞈ hkʼaˬ hkʼe yehˇ tcuh gʼa tuˬ, hkʼaˬ hkʼe te cawˇ ve le? Awˬ lawn chi teˇ hpaˍ teˇ geh henˇ tuˬ yoˬ.

3. Hpiˇliˇpiˆ liꞈ 2:13 hkʼaw Yaˬhoˉvaˬ ka tiꞈ te taˍ laˇ ve ngaˬ hui te gaˇ ve nyi ma cawˬ tuˬ yawˇ hkʼaˬ hkʼe peꞈ laˇ tuˬ le?

³ Hpiˇliˇpiˆ liꞈ 2:13 gʼaw sheˍ. * Ngaˬ hui te gaˇ ve nyi ma cawˬ tuˬ Yaˬhoˉvaˬ peꞈ laˇ ve yoˬ. Yawˇ hkʼaˬ hkʼe te ve le? Teˇ pawˆ pawˆ kʼo, awˬ viˉ awˬ nyi ga laˇ tuˬ loˍ ve maˇ heˆ leh Hkriꞈ yaˇ awˬ moˍ hkʼaw teˇ ceuˬ ceuˬ loˍ ve tehꞈ ngaˬ hui shiˍ ve yoˬ. Hto toˇ ve, yehˬ te ve, maˇ heˆ leh mvuhˇ yeˬ mvuhˇ haw lonˉ hpawˇ leh awˬ nu ve Hkriꞈ yaˇ awˬ moˍ hkʼaw hto toˇ ve chaw loˍ ve tehꞈ nyi haꞈ shaˉ paˍ awˬ tcuhˆ puiˍ lo ve liꞈ gʼaw htaˇ, ‘ngaˬ hkʼaˬ ve teˇ ceuˬ ga gʼa ve le?’ tehꞈ a shu yawˇ awˬ to htaꞈ na nyi cawˇ ve yoˬ. Chi hkʼoˆ kaꞈ haˍ ve awˬ vuiˬ te tuˬ gʼa htaˇ, hkʼa dehꞈ te gʼa tuˬ naˍ htawˇ dawˇ nawˬ htawˇ cawˬ ve yoˬ. Liꞈ hpu gʼaw peuˬ hkʼawꞈ nawˉ ‘yuˬ yehˇ leh shu htaꞈ hkʼaˬ hkʼe ga piˇ gʼa tuˬ le?’ a shu yawˇ awˬ to htaꞈ na nyi cawˇ ve yoˬ. Yaˬhoˉvaˬ ngaˬ hui htaꞈ nyiˉ laˇ tuˬ ve maˇ heˆ. Yaꞈ hkʼaˇ, ngaˬ hui te gʼa ve hkʼe coˇ caˇ leh te ve htaꞈ yawˇ mawˬ htaˇ, te gaˇ ve nyi ma cawˬ tuˬ yawˇ peꞈ laˇ ve yoˬ.

4. Ngaˬ hui te gʼa tuˬ awˬ gʼaˇ Yaˬhoˉvaˬ hkʼaˬ hkʼe ga laˇ tuˬ le?

⁴ Ngaˬ hui te gʼa tuˬ awˬ gʼaˇ Yaˬhoˉvaˬ peꞈ laˇ ve yoˬ. (Iˉsaˍyaˆ 40:29) Ngaˬ hui puiˉ ve hpehꞈ ve hkʼe hkʼa dehꞈ te gʼa tuˬ yawˇ daꞈ kehˬ ve awˬ ha hpu htaꞈ cuˇ leh ga laˇ ve yoˬ. (Tawˆ kʼai ve 35:30-35) Chi hkʼoˆ kaꞈ Gʼuiˬ sha ve kanˉ hkʼaˇ htaꞈ caˉ daꞈ ve teˇ ceuˬ ceuˬ beˆ maˍ laˇ ve yoˬ. Nawˬ ve awˬ vuiˬ htaꞈ hkʼaˬ hkʼe te tuˬ maˇ shiˍ htaˇ, awˬ nu ve chaw leh, mvuhˇ naw ma hkʼoˆ ve Awˬ paˍ “uiˍ jaˇ daꞈ jaˇ ve” geh kaꞈ lawˬ sheˍ. (2 Kawˇrenˍhtuˆ 4:7; Luˉkaꞈ 11:13) Liꞈ hpu hkʼaw hawˉ hkʼaˆ leh yaˇ miˇ te gaˇ ve nyi ma cawˬ leh Yaˬhoˉvaˬ ga piˇ ve laiˉ gʼaˇ cawˬ ve yoˬ. Awˬ lawn chi ve teˇ hpaˍ htaꞈ mawˬ htaˇ, yawˇ hui hkʼe leˇ nawˬ kaꞈ Yaˬhoˉvaˬ htaꞈ hkʼaˬ hkʼe yehˇ tcuh gʼa tuˬ dawˇ nyi sheˍ.

5. Iˉsaˍreˍlaˆ chaw htaꞈ ga piˇ tuˬ Yaˬhoˉvaˬ Moˉseˍ htaꞈ yehˇ ve awˬ hkʼaˇ leh yawˇ htaꞈ tanˬ yehˇ ve awˬ yanˇ ngaˬ hui hkʼaˬ hkʼe henˇ yuˬ gʼa ve le?

⁵ Yaˬhoˉvaˬ Iˉsaˍreˍlaˆ chaw htaꞈ ponˬ piˇ tuˬ Moˉseˍ htaꞈ yehˇ ve yoˬ. Yawˇ Moˉseˍ htaꞈ hkʼaˬ hkʼe htaˇ yehˇ ve le? “Eˇjiˇtuꞈ chaw hui ve cuˇ yiˍ hkʼa peu˗eˬ htaꞈ gʼa henˇ” peuˬ hkʼawꞈ nawˉ gu hehnˇ˗oˬ htaˇ tehꞈ dawˇ ve laˇ? (Tcuh yaˇ 7:22-25) Maˇ heˆ. Yawˇ nyi ma nuˇ nehˬ tuˬ ga piˇ peuˬ hkʼawꞈ nawˉ htaˇ yehˇ ve yoˬ. (Tcuh yaˇ 7:30, 34-36) Moˉseˍ Eˇjiˇtuꞈ mvuhˇ miˬ hkʼaw ve jawˇ mawˇ htaꞈ tawˇ yaw haˆ tuˬ Yaˬhoˉvaˬ ga piˇ ve yoˬ. (Tawˆ kʼai ve 9:13-19) Yaˬhoˉvaˬ Moˉseˍ htaꞈ yehˇ ve awˬ hkʼaˇ leh tanˬ yehˇ ve awˬ yanˇ hkʼaˬ hkʼe henˇ yuˬ gʼa ve le? Ngaˬ hui gʼa henˇ ve awˬ ceuˬ lehˬ, Yaˬhoˉvaˬ htaꞈ henˇ yuˬ leh yawˇ htaꞈ gʼaˇ va ve chaw yawˇ yehˇ ve yoˬ.—Hpiˇliˇpiˆ 4:13.

6. Yaˬhoˉvaˬ Baˍziˆlehˇ htaꞈ yehˇ leh Daˍviˆ htaꞈ ga piˇ ve awˬ hkʼaˇ ngaˬ hui htaꞈ hkʼaˬ hkʼe maˍ laˇ ve le?

⁶ Ponˬ laˬ ve laiˉ ha hkʼawꞈ htaˇ, Yaˬhoˉvaˬ Baˍziˆlehˇ htaꞈ cuˇ leh Daˍviˆ htaꞈ ga tcuh ve yoˬ. Daˍviˆ ve yaˇ paˍ Aˍbaˆsaˍlonˍ Daˍviˆ leh yawˇ ve chaw htaꞈ gʼaꞈ yuˬ htaˇ, yawˇ hui “ meuꞈ jehˇ kaˆ jehˇ leh heuˬ jaˇ” ve yoˬ. Baˍziˆlehˇ leh yawˇ ve chaw teˇ hpaˍ suh ve htaꞈ maˇ kawˆ leh caˇ tuˬ leh yehˇ tuˬ yawˇ hui htaꞈ ca yuˬ piˇ la ve yoˬ. Baˍziˆlehˇ mawˇ˗oˬ ve pa taw, Yaˬhoˉvaˬ yawˇ htaꞈ maˇ yehˇ˗o ve tehꞈ maˇ dawˇ. Yaꞈ hkʼaˇ, yawˇ cawˬ taˍ ve mawˇ Gʼuiˬ sha ve chaw htaꞈ ha lehˬ ve hkʼaw ga piˇ ve yoˬ. (2 Saˍmo˗eˍlaˆ 17:27-29) Chi ngaˬ hui htaꞈ aˬ htoꞈ ma maˍ laˇ ve le? Ngaˬ hui chehˇ ve mvuhˇ miˬ hkʼaw leh shu mvuhˇ miˬ hkʼaw chehˇ ve awˬ viˉ  awˬ nyi caˇ tuˬ maˇ lawꞈ ve htaꞈ ga piˇ tuˬ Yaˬhoˉvaˬ ngaˬ hui htaꞈ kaꞈ yehˇ ve yoˬ. (Tawˇ naˉ ve 3:27, 28; 19:17) Ngaˬ hui yawˇ hui htaꞈ hteˇ˗ehꞈ ga piˇ maˇ gʼa ve kʼo, miˬ guiˬ hkʼoˆ teˇ kaˬ le le lo yehˇ tuˬ ve hpu tanˇ tanˇ kuiˬ hkʼaw keu leh awˬ viˉ awˬ nyi ga laˇ tuˬ loˍ ve chaw htaꞈ ga piˇ gʼa ve yoˬ.—2 Kawˇrenˍhtuˆ 8:14, 15; 9:11.

7. Yaˬhoˉvaˬ Suˉmonˍ htaꞈ hkʼaˬ hkʼe yehˇ ve le? Yawˇ ve awˬ lawn ngaˬ hui htaꞈ awˬ gʼaˇ hkʼaˬ hkʼe peꞈ laˇ ve le?

⁷ Yeˍruˆsaˍlehnˍ venˇ hkʼaw ka tiꞈ yeˬ ve Suˉmonˍ htaꞈ Yaˬhoˉvaˬ ka tiꞈ te piˇ ve, yawˇ Meˍsiˉyaꞈ htaꞈ maˇ gʼa mawˬ sheˍ ve ceh ceh maˇ suh. Yawˇ laiˉ hkʼawꞈ law˗oˬ ve pa taw, ka tiꞈ chi ve yawˇ awˬ gʼaˇ gʼa jaˇ. Awˬ leh meuˇ htaˇ Suˉmonˍ yonˍ leh yeunˇ hkanˍ ve pa taw, Yaˬhoˉvaˬ awˬ bon naꞈ piˇ ve yoˬ. Teˇ nyi htaˇ, “awˬ ha hpu yawˇ htaꞈ dawˇ pawnˍ piˇ ve htaꞈ pa taw, yawˇ bon yehˬ lonˉ awˬ hkʼaw lo kʼai” leh yaˇ ehˉ Yeˍsuˆ htaꞈ mawˬ leh yaˇ ehˉ chi Hkriꞈ hpehꞈ yoˬ tehꞈ tcuh kaˍ paˍ ve tawˇ hkawˇ hkʼaw yawˇ kʼoˆ ve yoˬ. (Luˉkaꞈ 2:25-35) Yeˍsuˆ miˬ guiˬ hkʼoˆ Gʼuiˬ sha ve kanˉ maˇ te sheˍ htaˇ kaꞈ Suˉmonˍ suh˗oˬ ve hehˉ. Yaꞈ hkʼaˇ, yawˇ Yaˬhoˉvaˬ ve kanˉ gʼa te ve ha lehˬ jaˇ. Awˬ gʼuˇ suhˍ hpawˇ daꞈ jaˇ ve awˬ ceuˬ yawˇ htaꞈ law taˍ ve yoˬ! Miˬ guiˬ awˬ suhˉ hkʼaw ka tiꞈ yeˬ ve hawˉ hkʼaˆ chi teˇ gʼaˇ, Yeˍsuˆ uˉ peunˍ ve awˬ hawˉ lo teˇ yehˬ le le awˬ bon gʼa ve htaꞈ yawˇ gʼa mawˬ tuˬ yoˬ. (Awˬ hkuiˉ puiˍ 22:18) Yaˬhoˉvaˬ ve kanˉ hkʼaˬ hkʼe ve gʼa te ve maˇ kʼoˆ, chi teˇ hkui ngaˬ hui yawˇ ve kanˉ daꞈ jaˇ ve gʼa te ve ha lehˬ jaˇ.

8. Yaˬhoˉvaˬ Baˍnaˍbaˆ htaꞈ yehˇ ve hkʼe ngaˬ hui htaꞈ kaꞈ hkʼaˬ hkʼe yehˇ ve le?

⁸ Awˉ lawˉ peuˇ ve awˬ co˗e htaˇ, nyi ma nuˇ nehˬ ve hawˉ hkʼaˆ teˇ gʼaˇ Yaˬhoˉvaˬ htaꞈ yehˇ tcuh gaˇ ve Yoˇsehꞈ yoˬ. (Tcuh yaˇ 4:36, 37) Yoˇsehꞈ shu htaꞈ awˬ gʼaˇ piˇ gaˇ puiˉ ve pa taw, tcuh yaˇ hui yawˇ htaꞈ Baˍnaˍbaˆ tehꞈ kuˬ ve yoˬ. Chi ve tcuhˉ kuiˬ lehˬ “awˬ gʼaˇ piˇ shehˍ hpaˇ” tehꞈ kʼoˆ gaˇ ve yoˬ. Sawˉluꞈ Hkriꞈ yaˇ awˬ moˍ htaꞈ fawˉ mehˍ jaw ve pa taw, yawˇ Hkriꞈ yaˇ hpehꞈ la htaˇ awˬ viˉ awˬ nyi laiˉ gʼaˇ yawˇ htaꞈ kawˆ ve yoˬ. Yaꞈ hkʼaˇ, Baˍnaˍbaˆ Sawˉluꞈ htaꞈ ga piˇ leh awˬ gʼaˇ piˇ ve yoˬ. Sawˉluꞈ ha lehˬ leh awˬ hpfuhˇ shiˍ jaˇ. (Tcuh yaˇ 9:21, 26-28) Teˇ pawˆ htaˇ, Yeˍruˆsaˍlehnˍ venˇ lo ve nyi haꞈ shaˉ paˍ Suˇriˆ mvuhˇ miˬ, Anˍtiˆawˍ venˇ hkʼaw ve awˬ viˉ awˬ nyi awˬ gʼaˇ piˇ tuˬ loˍ ve tehꞈ shiˍ ve pa taw, yawˇ hui Baˍnaˍbaˆ htaꞈ oˇ kaˬ lo kʼai tcuh ve yoˬ. Yawˇ hui Baˍnaˍbaˆ htaꞈ leuˆ ve cawˇ jaˇ! Liꞈ hpu hkʼaw Baˍnaˍbaˆ lehˬ “yawˇ hui nyi ma yeˬ leh Jawˇmawˇ Yeˍsuˆ htaꞈ vawˆ tcuhˉ taˍ tuˬ, yawˇ yawˇ hui hkʼa peu˗eˬ htaꞈ awˬ gʼaˇ piˇ ve yoˬ.” (Tcuh yaˇ 11:22-24) Chi beuꞈ teˇ co˗e kaꞈ hkʼa shuˍ, Yaˬhoˉvaˬ ngaˬ hui htaꞈ yehˇ leh awˬ viˉ awˬ nyi htaꞈ “awˬ gʼaˇ piˇ” tcuh laˇ ve yoˬ. Haꞈ ve chaw suh˗e ve, na chehˇ ve chaw, maˇ heˆ leh dawˇ maˇ ve a naˍ cawˬ ve chaw htaꞈ tawˇ yaw tuˬ awˬ hkʼeun hkʼaw awˬ gʼaˇ piˇ tuˬ Gʼuiˬ sha ngaˬ hui htaꞈ te tcuh gaˇ ve yoˬ. Yaˬhoˉvaˬ Baˍnaˍbaˆ htaꞈ yehˇ ve hkʼe nawˬ htaꞈ kaꞈ yehˇ tcuh˗aw laˇ?—1 Hteˇsaˍlawˇniˆ 5:14.

9. Yaˬhoˉvaˬ Vai˗siˍleˆ htaꞈ daꞈ ve nyi haꞈ shaˉ paˍ te tcuh ve, ngaˬ hui htaꞈ aˬ htoꞈ ma maˍ laˇ ve le?

⁹ Vai˗siˍleˆ daꞈ ve nyi haꞈ shaˉ paˍ hpehꞈ tuˬ Yaˬhoˉvaˬ ga piˇ ve yoˬ. Yawˇ 26 hkʼawꞈ htaˇ nyi haꞈ shaˍ paˍ gʼa te ve yoˬ. Awˬ viˉ awˬ nyi shoꞈ shaꞈ ve gʼa hpuˇ chehˇ ve chaw htaꞈ, yawˇ hkʼa dehꞈ ga piˇ maˇ gʼa la ve htaꞈ kawˆ ve yoˬ. Yaꞈ hkʼaˇ, nyi haꞈ shaˉ paˍ te maw jaˇ˗o ve leh Gʼuiˬ sha ve mvuhˇ miˬ kanˉ te ve hkʼaw Vai˗siˍleˆ gʼa henˇ ve yoˬ. Yawˇ kaꞈ coˇ caˇ jaˇ. Yawˇ laiˉ ceuˬ dawˇ teh taˍ ve yoˬ. Yawˇ dawˇ teh taˍ ve teˇ hpaˍ htaꞈ gʼaꞈ te gʼa htaˇ, kawˆ ve kaꞈ awˬ meuˇ˗e meuˇ˗e mehˉ kʼai ve yoˬ. Yawˇ kʼoˆ ve, “oˇ htaˇ yawˇ kawˆ tuˬ te laˇ ve lehˬ chi teˇ hkui ha lehˬ tuˬ te laˇ jaˇ. Hkriꞈ yaˇ awˬ moˍ hkʼaw awˬ gʼaˇ piˇ tuˬ Liꞈ hpu awˬ tawn mawˬ tuˬ Yaˬhoˉvaˬ ga laˇ ve ha lehˬ jaˇ.” Awˬ viˉ awˬ nyi hawˉ hkʼaˆ˗oˬ, Yaˬhoˉvaˬ Vai˗siˍleˆ htaꞈ yehˇ ve hkʼe nawˬ htaꞈ kaꞈ yehˇ tcuh  gaˇ ve kʼo, nawˬ Hkriꞈ yaˇ awˬ moˍ hkʼaw awˬ vuiˬ maˇ maˇ te gʼa tuˬ yawˇ nawˬ htaꞈ ga laˇ tuˬ yoˬ.

10. Aˍbiˆgeˍlaˆ aˬ htoꞈ ma te ve le? Yawˇ ve awˬ lawn htaꞈ nawˬ hkʼaˬ hkʼe henˇ yuˬ gʼa ve le?

¹⁰ Daˍviˆ leh yawˇ ve chaw jawˇ mawˇ sawˉluꞈ gʼaꞈ yuˬ htaˇ, ga laˇ tuˬ loˍ ve yoˬ. Iˉsaˍreˍlaˆ chaw Naˍbaˍlaˆ paw sha jaˇ ve geh Daˍviˆ ve chaw caˇ tuˬ ca lawˬ˗e ve yoˬ. Yawˇ hui heh puiˉ hkʼaw Naˍbaˍlaˆ ve yawˬ ehˉ htaꞈ ga piˇ jaw ve pa taw, ga laˇ tuˬ lawˬ haˆ ve yoˬ. Yaꞈ hkʼaˇ, Naˍbaˍlaˆ yawˇ awˬ pon tiˉ dawˇ nyi leh maˇ ga piˇ. Daˍviˆ beuꞈ jaˇ leh Naˍbaˍlaˆ leh yawˇ ve yehˬ hkʼaw ve hawˉ hkʼaˆ hkʼa peu˗eˬ htaꞈ tiˇ pehˍ˗a te ve yoˬ. (1 Saˍmo˗eˍlaˆ 25:3-13, 22) Yaꞈ hkʼaˇ, Naˍbaˍlaˆ ve awˬ miˇ ma Aˍbiˆgeˍlaˆ awˬ hkiˇ awˬ naˬ daꞈ jaˇ leh cuˇ yiˍ cawˬ ve yoˬ. Yawˇ haꞈ hanˉ ve hkʼaw Daˍviˆ geh kʼai leh, hkui paˇ lo boˆ taˍ leh, Daˍviˆ nyi ma zuhˆ leh chaw htaꞈ maˇ gʼa tiˇ pehˍ tuˬ lawˬ hkawˉ piˇ ve yoˬ. Daˍviˆ awˬ lawn chi Yaˬhoˉvaˬ htaꞈ teh taˍ piˇ tuˬ yawˇ Daˍviˆ htaꞈ kʼoˆ piˇ ve yoˬ. Aˍbiˆgeˍlaˆ cuˇ yiˍ cawˬ leh nyi ma nuˇ nehˬ ve hkʼaw tawˇ yaw ve htaꞈ Daˍviˆ dawˇ cawˇ jaˇ. Yaˬhoˉvaˬ Aˍbiˆgeˍlaˆ htaꞈ peun laˇ ve tehꞈ Daˍviˆ shiˍ ve yoˬ. (1 Saˍmo˗eˍlaˆ 25:23-28, 32-34) Aˍbiˆgeˍlaˆ ve te hkʼaˇ dawˇ hkʼaˇ htaꞈ Yaˬhoˉvaˬ yehˇ gʼa ve yoˬ. Chi beuꞈ teˇ co˗e kaꞈ hkʼa shuˍ awˬ viˉ awˬ nyi yaˇ miˇ yehˬ kʼa hkʼaw leh Hkriꞈ yaˇ awˬ moˍ hkʼaw awˬ gʼaˇ piˇ tuˬ, tawˇ keunˍ daꞈ cawˇ daꞈ ve hkʼaw yaw ve yoˬ.—Tawˇ naˉ ve 24:3; Tiˇtuˆ 2:3-5.

11. Haˬlawˇhehˆ ve yaˇ miˇ hui aˬ htoꞈ ma te ve le? Chi beuꞈ teˇ co˗e yawˇ hui htaꞈ henˇ yuˬ chehˇ ve a shu le?

¹¹ Ponˬ laˬ ve laiˉ ha hkʼawꞈ htaˇ, Yeˍruˆsaˍlehnˍ lanˇ venˇ kʼawꞈ gu tuˬ Yaˬhoˉvaˬ Haˬlawˇhehˆ yaˇ miˇ hui htaꞈ yehˇ ve yoˬ. (Neˍhaˍmiˆ 2:20; 3:12) Yawˇ hui ve awˬ pa jawˇ mawˇ hpehꞈ ve htawˇ, haˍ leh kawˆ tuˬ cawˬ ve kanˉ chi htaꞈ ha lehˬ leh te ve yoˬ. (Neˍhaˍmiˆ 4:15-18) Awˬ hoˉ awˬ naˬ teˇ hpaˍ lehˬ “shu geh lanˇ venˇ htaꞈ maˇ gʼa ga kawˍ piˇ!” (Neˍhaˍmiˆ 3:5) Lanˇ venˇ 52 nyi ceh tiˉ te peuˬ ve Haˬlawˇhehˆ ve yaˇ miˇ hui hkʼaˬ hkʼe taw ha lehˬ ve htaꞈ dawˇ nyi sheˍ! (Neˍhaˍmiˆ 6:15) Ngaˬ hui ve co˗e kaꞈ awˬ viˉ awˬ nyi yaˇ miˇ laiˉ gʼaˇ Gʼuiˬ sha ve kanˉ daꞈ ve hpawˇ ha lehˬ leh te ve yoˬ. Hpawnˬ daꞈ kuiˬ yehˬ maˇ heˆ leh Yaˬhoˉvaˬ htaꞈ chiˇ aꞈ piˇ˗oˬ ve yehˬ teˇ hpaˍ kʼawꞈ gu te ve yoˬ. Yawˇ hui kaꞈ ha lehˬ jaˇ. Te puiˉ te hpehꞈ ve, nyi ma pfuhˇ ve, leh yawˇ hui ka tiꞈ yeˬ ve pa taw, kanˉ chi te gʼa ve yoˬ.

12. Yaˬhoˉvaˬ Taˍbiˉtaˆ htaꞈ yehˇ ve hkʼa shuˍ ngaˬ hui htaꞈ kaꞈ hkʼaˬ hkʼe yehˇ tuˬ le?

¹² Yaˬhoˉvaˬ Taˍbiˉtaˆ htaꞈ “daꞈ ve kanˉ teˇ hpaˍ leh, shu htaꞈ ha kʼaˉ leh tanˇ piˇ ve” nyi ma cawˬ tuˬ te piˇ ve, leuˉ leh mehˇ chawˇ ma htaꞈ kaꞈ ga tcuh gaˇ ve yoˬ. (Tcuh yaˇ 9:36) Taˍbiˉtaˆ nyi ma daꞈ leh shu htaꞈ ga piˇ puiˉ ve laiˉ gʼaˇ shiˍ ve yoˬ. Yawˇ suh˗e htaˇ, awˬ viˉ awˬ nyi laiˉ gʼaˇ hawˬ ve yoˬ. Tcuh yaˇ Peˍtruˆ yawˇ htaꞈ teꞈ tu la piˇ htaˇ, awˬ viˉ awˬ nyi ha lehˬ jaˇ. (Tcuh yaˇ 9:39-41) Hawˉ hkʼaˆ yaˇ miˇ leh a shaꞈ hkʼaˬ hkʼe ma ve htawˇ shu htaꞈ ga piˇ tuˬ Taˍbiˉtaˆ ve awˬ lawn maˍ laˇ ve yoˬ.—Heˍbrehˇ 13:16.

13. Ruˉhtaˆ yaꞈ taw puiˉ jaˇ ve htaꞈ Yaˬhoˉvaˬ hkʼaˬ hkʼe yehˇ ve le? Yawˇ hkʼaˬ hkʼe kʼoˆ ve le?

¹³ Yaꞈ taw puiˉ jaˇ ve Ruˉhtaˆ miˍshenˍnaˍliˍ te gaˇ ve yoˬ. Yawˇ yaˇ ehˉ htaˇ kuˬ piˇ ve liꞈ teˇ yehˬ peuˬ teˇ yehˬ piˇ ve dawˇ cawˇ jaˇ. Yawˇ kʼoˆ ve, “kanˉ chi ngaˬ dawˇ cawˇ jaˇ.” Yaꞈ hkʼaˇ, yehˬ shehˍ hpaˇ geh teˇ gʼaˇ tawˍ teˇ gʼaˇ Gʼuiˬ sha ve mvuhˇ miˬ awˬ lawn yaw daꞈ ve kʼo yawˇ awˬ pon haˍ jaˇ. Yawˇ yaꞈ taw puiˉ jaˇ ve htawˇ, 18 hkʼawꞈ htaˇ hkʼaˬ htaˆ kaꞈ gʼuˇ suhˍ peuˍ ve tanˬ te ve yoˬ. 1946 hkʼawꞈ htaˇ yawˇ Giˉlaˆ Shaw nyi kuiˬ Taꞈ yehˬ ve Liꞈ hpu henˇ yehˬ lo gʼa kʼai ve yoˬ. Peuˬ leh yawˇ Haˬwaˬiˬ leh Jaˬpanˍ mvuhˇ miˬ lo Gʼuiˬ sha ve kanˉ te ve yoˬ. Chi ve 2 mvuhˇ miˬ lo daꞈ ve awˬ lawn sha tanˇ hto maˍ piˇ tuˬ Yaˬhoˉvaˬ yawˇ htaꞈ yehˇ ve yoˬ. Ruˉhtaˆ Gʼuiˬ  sha ve kanˉ te ve 80 hkʼawꞈ hpaˆ˗oˬ htaˇ, yawˇ kʼoˆ ve, “Yaˬhoˉvaˬ lehˬ ngaˬ htaꞈ awˬ gʼaˇ peꞈ laˇ shehˍ hpaˇ hpehꞈ ve yoˬ. Ngaˬ yaꞈ taw ve htaꞈ gʼaˇ tuˬ yawˇ ga laˇ ve yoˬ. Yaˬhoˉvaˬ htaꞈ gʼaˇ va ve kʼo a shu teˇ gʼaˇ htaꞈ yehˇ kaꞈ gʼa ve tehꞈ ngaˬ yonˍ ve yoˬ.”

14. Kawˇlawˇsehˇ liꞈ 1:29 hkʼaw kʼoˆ taˍ ve hkʼe, Yaˬhoˉvaˬ ngaˬ hui htaꞈ yehˇ tcuh gaˇ ve kʼo, hkʼaˬ hkʼe gʼa te cawˇ ve le?

¹⁴ Teˇ co˗e peuˬ teˇ co˗e Yaˬhoˉvaˬ yawˇ ve kanˉ te ve chaw htaꞈ laiˉ ceuˬ te gʼa tcuh ve yoˬ. Leh yawˇ nawˬ htaꞈ aˬ htoꞈ ma te tcuh gaˇ ve le? Nawˬ coˇ caˇ ve htaꞈ cawˬ ve yoˬ. (Kawˇlawˇsehˇ 1:29 gʼaw sheˍ.) Kaiˬ ve hkʼaw hto toˇ ve, hkʼa dehꞈ maˍ puiˉ ve, awˬ gʼaˇ piˇ puiˉ ve, kanˉ te ve hkʼaw cheuˬ ve, awˬ chawˇ htaꞈ ga piˇ puiˉ ve, maˇ heˆ leh Yaˬhoˉvaˬ ve a loˍ awˬ tehˬ biˇ la tuˬ nawˬ yawˇ htaꞈ yehˇ tcuh gaˇ ve kʼo, hkʼaˬ hkʼe hpehꞈ tcuh gaˇ kaꞈ hpehꞈ gʼa ve tehꞈ nawˬ yonˍ gʼa ve yoˬ.

15. 1 Tiˆmoˉseˍ liꞈ 4:12, 15 hkʼaw kʼoˆ taˍ ve hkʼe, awˬ viˉ awˬ nyi yaˇ nehˬ˗oˬ, nawˬ te gʼa tuˬ Yaˬhoˉvaˬ geh aˬ htoꞈ ma lawˬ cawˇ ve le?

¹⁵ Awˬ viˉ awˬ nyi yaˇ nehˬ˗oˬ, chi teˇ hkui nawˬ hkʼe ve co ha hpawˇ nyi ma pfuhˇ leh te gaˇ ve chaw ga piˇ shehˍ hpaˇ te la tuˬ ngaˬ hui loˍ ve yoˬ. Hkriꞈ yaˇ awˬ moˍ teˇ kaˬ kaˬ kʼo nyi haꞈ shaˉ paˍ laiˉ gʼaˇ cawˬ leh ga piˇ shehˍ hpaˇ hkʼa dehꞈ maˇ cawˬ. Nawˬ awˬ vuiˬ awˬ suhˉ maˇ maˇ kʼawꞈ te tuˬ te gʼa˗aw laˇ? Teˇ hpaˍ hpaˍ kʼo, “ngaˬ hto toˇ ve chaw hpehꞈ ve ceh kaꞈ nyi hkʼaˇ suh˗oˬ” tehꞈ dawˇ ve yoˬ. Nawˬ chi hkʼe dawˇ ve kʼo, ga piˇ shehˍ hpaˇ te gʼa tuˬ nawˬ “loˍ ve hkʼe” Yaˬhoˉvaˬ ga laˇ tuˬ lawˬ sheˍ. Gʼuiˬ sha ve kanˉ te gʼa ve hkʼe teˇ ceuˬ le le te tuˬ nawˬ “awˬ gʼaˇ” cawˬ tuˬ lawˬ sheˍ. (Cuˇ yiˍ piˇ ve 12:1) Nawˬ ga laˇ tuˬ ngaˬ hui loˍ ve yoˬ!—1 Tiˆmoˉseˍ 4:12, 15 gʼaw sheˍ.

16. Ngaˬ hui Yaˬhoˉvaˬ geh aˬ htoꞈ ma lawˬ cawˇ ve le? Aˬ htoꞈ ma pa taw le?

¹⁶ Yaˬhoˉvaˬ yawˇ ve a loˍ awˬ tehˬ biˇ la tuˬ nawˬ htaꞈ aˬ htoꞈ ma te tcuh gaˇ kaꞈ te gʼa ve yoˬ. Chi htaꞈ pa taw, awˬ gʼaˇ leh nawˬ te gaˇ ve nyi ma cawˬ tuˬ yawˇ geh lawˬ sheˍ. Chi teˇ hkui nawˬ a shaꞈ hkʼaˬ hkʼe ma ve htawˇ maˇ kʼoˆ, nawˬ cawˬ ve awˬ ceuˬ hpu shi mawˇ jeˬ leh puiˉ ve hpehꞈ ve htaꞈ yehˇ leh Yaˬhoˉvaˬ awˬ meꞈ awˬ hponˇ gʼa tuˬ, awˬ yanˇ, te gʼa tuˬ awˬ gʼaˇ, htaꞈ yehˇ sheˍ. (Cuˇ yiˍ piˇ ve 9:10) Nawˬ Yaˬhoˉvaˬ ve kanˉ maˇ maˇ te tuˬ awˬ vuiˬ gʼa ve kʼo, nawˬ te maˇ gʼa tehꞈ dawˇ leh awˬ vuiˬ maˇ haꞈ yuˬ ve taˇ te. Mvuhˇ naw ma hkʼoˆ ve Awˬ pa awˬ meꞈ awˬ hponˇ gʼa tuˬ, ngaˬ hui te ve a yeˇ maˇ uiˍ ve htawˇ, daꞈ jaˇ ve awˬ vuiˬ hpehꞈ ve yoˬ.