1. Aˬ htoꞈ ma te ngaˬ hui ‘awˬ leh meuˇ ve awˬ yanˇ’ hkʼaw chehˇ taˍ ve tehꞈ shiˍ ve le?

 Nawˬ 1914 hkʼawꞈ peuˬ hkʼawꞈ nawˉ paw ve laˇ? Paw ve kʼo, nawˬ kaꞈ ‘awˬ leh meuˇ ve awˬ yanˇ’ hkʼaw chehˇ taˍ ve yoˬ. (2 Tiˆmoˉseˍ 3:1) Yeˍsuˆ kʼoˆ taˍ ve awˬ leh meuˇ ve awˬ yanˇ hkʼaw hpehꞈ la tuˬ ve awˬ heˆ teˇ hpaˍ teˇ gʼaˇ le le gʼa hpuˇ chehˇ ve yoˬ. Maꞈ te ve, meuꞈ ve kaˆ ve, miˬ hiˆ ve, naˬ beuˬ, haiˬ ve chaw gʼaˇ hteꞈ maˇ la ve, leh Yaˬhoˉvaˬ ve chaw fawˉ mehˍ ve gʼa hpuˇ ve yoˬ. (Maꞈhtehˍ 24:3, 7-9, 12; Luˉkaꞈ 21:10-12) Chi hkʼoˆ kaꞈ chi beuꞈ teˇ co˗e ve chaw te hkʼaˇ dawˇ hkʼaˇ Pawˇluꞈ kʼoˆ taˍ ve hkʼe hpehꞈ ve yoˬ. (Awˇ ceˍ awˇ fa “ Chi beuꞈ teˇ co˗e ve chaw hkʼaˬ hkʼe hpehꞈ ve le?”) Yaˬhoˉvaˬ htaꞈ oˉ kʼoˍ pui ve chaw ‘awˬ leh meuˇ ve awˬ yanˇ’ hkʼaw chehˇ taˍ ve tehꞈ hkʼa dehꞈ shiˍ ve yoˬ.—Miˆhkaˍ 4:1.

2. Aˬ htoꞈ ma ve na hkawˇ htaꞈ ngaˬ hui gʼa shiˍ cawˇ ve le?

² 1914 hkʼawꞈ peuˬ laˬ ve maw jaˇ˗oˬ. Hkʼe kʼo, ngaˬ hui ‘awˬ leh meuˇ ve awˬ yanˇ’ hkʼaw awˬ leh meuˇ teˇ tawn lo chehˇ taˍ ve yoˬ. Haiˬ jaˇ ve miˬ guiˬ chi peuˬ la paˇ neˇ ve yoˬ. ‘Awˬ leh meuˇ ve awˬ yanˇ’ peuˬ la paˇ neˇ ve hkʼaw aˬ htoꞈ ma hpehꞈ la tuˬ le? Awˬ heˆ chi ve htaꞈ law chehˇ htaˇ, Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve le? A yeˇ uiˍ ve na hkawˇ chi ngaˬ hui gʼa henˇ tuˬ yoˬ.

3. Tcuh kaˍ paˍ ve tawˇ hkawˇ 1 Hteˇsaˍlawˇniˆ liꞈ 5:1-3 hkʼaw kʼoˆ taˍ ve hkʼe, mvuhˇ miˬ uˉ peunˍ paˍ teˇ hpaˍ aˬ htoꞈ ma kʼoˆ laˇ tuˬ le?

³ 1 Hteˇsaˍlawˇniˆ liꞈ 5:1-3 gʼaw sheˍ. “[Yaˬhoˉvaˬ] ve awˬ nyi” chi ve teˇ tawn hkʼaw Pawˇluꞈ kʼoˆ ve tcuhˉ kuiˬ lehˬ, “Uiˍ ve  Baˍbuˍlonˍ venˇ” tanˬ te luˬ htaˇ ve htaꞈ kʼoˆ ve yoˬ. Oˇ ve lehˬ miˬ guiˬ hkʼoˆ lo maˇ heˆ heˆ ve bon liˇ hkʼa peu˗eˬ htaꞈ Aˍmaˍgeˍdonˍ hkʼaw te luˬ tuˬ yoˬ. (Hpeuꞈ maˍ ve 16:14, 16; 17:5) Mvuhˇ miˬ jawˇ mawˇ teˇ hpaˍ lehˬ ‘mvuhˇ miˬ gawˬ la peuˬ leh teꞈ chiˉ dawˇ haˍ tuˬ maˇ cawˬ!’ kʼoˆ htaˇ Yaˬhoˉvaˬ ve awˬ nyi laꞈ haˉ gaˬ la tuˬ yoˬ. Mvuhˇ miˬ jawˇ mawˇ teˇ hpaˍ cawˇ daꞈ hawˍ daꞈ tuˬ hkʼa shuˍ kʼoˆ ve yoˬ. * Yaꞈ hkʼaˇ, ‘mvuhˇ miˬ gawˬ la peuˬ leh teꞈ chiˉ dawˇ haˍ tuˬ maˇ cawˬ!’ tehꞈ kʼoˆ laˇ ve chi Liꞈ hpu hkʼaw maˇ hawˍ daꞈ. Awˬ lawn kʼo, mvuhˇ miˬ uˉ peunˍ paˍ teˇ hpaˍ dawˇ sha gawˬ lehˍ ve cawˬ tuˬ te laˇ˗oˬ ve tehꞈ chaw yaˇ dawˇ tuˬ yoˬ. Yaꞈ hkʼaˇ, maˇ maw maw ve awˬ yanˇ “luˬ ve sheˆ ve teˇ ceuˬ yawˇ hui awˬ hkʼoˆ teˇ cawˬ haˉ gaˬ la tuˬ yoˬ.”—Maꞈhtehˍ 24:21.

4. (a) ‘Mvuhˇ miˬ gawˬ la peuˬ leh teꞈ chiˉ dawˇ haˍ tuˬ maˇ cawˬ!’ tehꞈ kʼoˆ ve htaꞈ caˉ daꞈ ve ngaˬ hui maˇ shiˍ sheˍ ve aˬ htoꞈ ma cawˬ ve le? (b) Ngaˬ hui shiˍ˗oˬ ve aˬ htoꞈ ma cawˬ ve le?

⁴ Mvuhˇ miˬ uˉ peunˍ paˍ teˇ hpaˍ ‘mvuhˇ miˬ gawˬ la peuˬ leh teꞈ chiˉ dawˇ haˍ tuˬ maˇ cawˬ!’ tehꞈ kʼoˆ tuˬ aˬ htoꞈ ma te piˇ ve ngaˬ hui maˇ shiˍ. Yawˇ hui hto laˇ tuˬ ve awˬ hkʼaˇ lehˬ teˇ pawˆ tiˉ maˇ heˆ leh laiˉ pawˆ hto laˇ tuˬ ve naˍ ngaˬ hui maˇ shiˍ. Yaꞈ hkʼaˇ, mvuhˇ miˬ uˉ peunˍ paˍ teˇ hpaˍ mvuhˇ miˬ gawˬ la peuˬ kʼoˆ ve htaꞈ ngaˬ hui maˇ yonˍ. Liꞈ hpu hkʼaw kʼoˆ ve, awˬ heˆ chi htaꞈ mawˬ htaˇ, “[Yaˬhoˉvaˬ] ve awˬ nyi” gaˬ la chehˇ ve tehꞈ ngaˬ hui hkʼa dehꞈ law nyi taˍ cawˇ ve yoˬ.

5. 1 Hteˇsaˍlawˇniˆ liꞈ 5:4-6 hkʼaw kʼoˆ ve “[Yaˬhoˉvaˬ] ve awˬ nyi” htaꞈ haꞈ yuˬ gʼa tuˬ ngaˬ hui hkʼaˬ hkʼe gʼa te cawˇ ve le?

⁵ 1 Hteˇsaˍlawˇniˆ liꞈ 5:4-6 gʼaw sheˍ. “[Yaˬhoˉvaˬ] ve awˬ nyi” htaꞈ shiˍ leh haꞈ yuˬ gʼa tuˬ Pawˇluꞈ ve tawˇ hkawˇ ngaˬ hui htaꞈ ga laˇ ve yoˬ. Ngaˬ hui shu hkʼe ‘zuhꞈ muiˉ taˇ kʼa chehˇ hkʼa dehꞈ shaw taˍ˗oˬ.’ Tawˇ pa haˉ te kʼo, ngaˬ hui choˬ paˉ oˇ paˉ maˇ chehˇ leh mvuhˇ miˬ hpawˇ kaꞈ maˇ caˉ daꞈ. Ngaˬ hui mvuhˇ miˬ hpawˇ caˉ daꞈ ve kʼo, “miˬ guiˬ yaˇ hui” hkʼe hpehꞈ ve yoˬ. (Yoˇhanˬ 15:19) Gʼuiˬ sha ve mvuhˇ miˬ ceh tiˉ gawˬ lehˍ ve cawˬ tcuh laˇ gʼa ve tehꞈ ngaˬ hui yonˍ ve yoˬ.

6. Ngaˬ hui shu htaꞈ aˬ htoꞈ ma te tcuh gaˇ ve le? Aˬ htoꞈ ma pa taw le?

⁶ Chi hkʼoˆ kaꞈ ngaˬ hui hkʼa dehꞈ shaw chehˇ taˍ˗oˬ ve hkʼe, shu kaꞈ shaw chehˇ taˍ tuˬ ga piˇ gaˇ leh Liꞈ hpu hkʼaw awˬ tehˬ hpehꞈ la tuˬ ve htaꞈ a yeˇ yuˬ tcuh gaˇ ve yoˬ. Tuꞈ jaˇ hkanˍ jaˇ ve awˬ nyi gaˬ la˗oˬ htaˇ, awˬ nu ve chaw Yaˬhoˉvaˬ ve kanˉ te tuˬ awˬ yanˇ maˇ cawˬ˗o ve tehꞈ ngaˬ hui tawnˇ taˍ cawˇ ve yoˬ. Chi htaꞈ pa taw, chi teˇ hkui kaꞈ ngaˬ hui haˆ haˆ hto toˇ tuˬ a yeˇ uiˍ jaˇ! *

7. Chi teˇ hkui Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve le?

⁷ “[Yaˬhoˉvaˬ] ve awˬ nyi” gaˬ la tuˬ ve awˬ yanˇ  maˇ maw. Hkʼe te leh yawˇ ngaˬ hui htaꞈ kaiˬ ve hkʼaw hto toˇ tcuh gaˇ ve yoˬ. Ngaˬ hui “Jawˇmawˇ Yeˍsuˆ ve kanˉ htaꞈ hkʼaˬ htaˆ kaꞈ gʼaˇ hteꞈ te chehˇ ve chaw hpehꞈ” ve tehꞈ yonˍ gʼa˗aw laˇ? (1 Kawˇrenˍhtuˆ 15:58) Awˬ leh meuˇ hpehꞈ la tuˬ ve awˬ heˆ teˇ hpaˍ htaꞈ Yeˍsuˆ kʼoˆ htaˇ, ngaˬ hui te tuˬ ve awˬ ceuˬ yawˇ awˬ gʼuˇ suhˍ htaˇ kaꞈ kʼoˆ taˍ ve yoˬ. Yawˇ kʼoˆ ve, “ha lehˬ ve bon hkawˇ chi, chaw ceuˬ hkʼa peu˗eˬ htaꞈ awˉ lawˉ gʼa maˍ piˇ tuˬ yoˬ.” (Maˍkuˆ 13:4, 8, 10; Maꞈhtehˍ 24:14) Nawˬ hto toˇ˗e ve teˇ pawˆ le le tcuh kaˍ paˍ ve tawˇ hkawˇ chi awˬ tehˬ hpehꞈ ve htaꞈ gʼa ga chehˇ ve yoˬ!

8. Hto toˇ ve hkʼaˬ hkʼe te uiˍ la mvuh la chehˇ ve le?

⁸ Gʼuiˬ sha ve mvuhˇ miˬ daꞈ ve awˬ lawn sha tanˇ hto toˇ ve hkʼaˬ hkʼe taw uiˍ la mvuh la chehˇ ve le? Teˇ hkʼawꞈ le le Gʼuiˬ sha ve mvuhˇ miˬ daꞈ ve awˬ lawn sha tanˇ gʼa kaˇ leh chaw maˇ la chehˇ ve yoˬ. Tawˇ pa haˉ te kʼo, awˬ leh meuˇ ve awˬ yanˇ hto toˇ ve chaw gʼaˇ hteꞈ maˇ la chehˇ ve htaꞈ dawˇ nyi sheˍ. 1914 hkʼawꞈ htaˇ, 43 mvuhˇ miˬ hkʼaw hto toˇ ve chaw 5,155 gʼaˇ cawˬ ve yoˬ. Chi beuꞈ teˇ co˗e 240 mvuhˇ miˬ hkʼaw hto toˇ ve chaw 8,500,000 gʼaˇ hpaˆ cawˬ ve yoˬ. Yaꞈ hkʼaˇ, kanˉ chi ve maˇ peuˬ sheˍ. Gʼuiˬ sha ve mvuhˇ miˬ ceh tiˉ chaw yaˇ ve shoꞈ shaꞈ ve hkʼa peu˗eˬ htaꞈ gu laˇ gʼa ve tehꞈ ngaˬ hui caˉ leh hto toˇ cawˇ ve yoˬ.—Chiˇ mvuh ve 145:11-13.

9. Aˬ htoꞈ ma te ngaˬ hui Gʼuiˬ sha ve mvuhˇ miˬ caˉ leh hto toˇ cawˇ ve le?

⁹ Gʼuiˬ sha ve mvuhˇ miˬ hto toˇ ve yawˇ te tcuh laˇ htaˇ hkʼa gaˬ te tuˬ yoˬ. Chaw yaˇ Yaˬhoˉvaˬ leh Yeˍsuˆ htaꞈ shiˍ tuˬ awˬ yanˇ hkʼaˬ hkʼe maw cawˬ sheˍ ve le? (Yoˇhanˬ 17:3) Ngaˬ hui maˇ shiˍ. Tuꞈ jaˇ hkanˍ jaˇ ve tanˬ htaˇ hkʼa gaˬ ceh ngaˬ hui shiˍ ve yoˬ. “Co tiꞈ ha tiꞈ htaꞈ gʼa tuˬ awˬ pon hkʼa fuiˍ taˍ ve chaw hui lehˬ” Yaˬhoˉvaˬ ve kanˉ te gʼa sheˍ ve yoˬ. (Tcuh yaˇ 13:48) Awˬ yanˇ maˇ leh sheˍ htaˇ, teˇ gʼaˇ le le htaꞈ hkʼaˬ hkʼe ga piˇ gʼa tuˬ le?

10. Chaw yaˇ htaꞈ awˬ tehˬ ve maˍ piˇ tuˬ Yaˬhoˉvaˬ ngaˬ hui htaꞈ aˬ htoꞈ ma peꞈ laˇ ve le?

¹⁰ Yaˬhoˉvaˬ ve kanˉ hkʼaˇ chaw yaˇ htaꞈ awˬ tehˬ ve maˍ piˇ gʼa tuˬ, ngaˬ hui loˍ ve teˇ ceuˬ le le yawˇ peꞈ laˇ ve yoˬ. Tawˇ pa haˉ te kʼo, mvuhˇ hpeuꞈ haˉ hpawnˬ daꞈ ve, hto toˇ kuiˬ lo yuˬ yehˇ tuˬ awˬ hkʼaˇ, ca kʼawꞈ guiˇ˗e ve leh Liꞈ hpu maˍ tuˬ awˬ pon kaꞈ maˍ laˇ ve yoˬ. Chi hkʼoˆ kaꞈ, Yaˬhoˉvaˬ ve kanˉ hkʼaˇ ngaˬ hui Maˍ piˇ tuˬ ve laꞈ caˉ peꞈ laˇ ve yoˬ. Laꞈ caˉ chi teˇ hpaˍ ngaˬ hui htaꞈ hkʼaˬ hkʼe ga laˇ ve le?

•   Tanˬ hto toˇ gʼa tuˬ te laˇ ve

•   Shu Liꞈ hpu ve awˬ lawn htaꞈ shiˍ gaˇ tuˬ te piˇ ve

•    Shu Liꞈ hpu htaꞈ henˇ gaˇ tuˬ awˬ gʼaˇ piˇ ve

•   Liꞈ hpu henˇ ve chaw htaꞈ awˬ tehˬ ve maˍ piˇ ve

•   Shu ngaˬ hui ve vehˆsaiˉ hkʼaw loꞈ˗e tuˬ leh hpawnˬ daꞈ la tuˬ jehˬ piˇ ve

 Yaꞈ hkʼaˇ, laꞈ caˉ cawˬ ve ceh maˇ lawꞈ. Ngaˬ hui laꞈ caˉ chi ve teˇ hpaˍ htaꞈ kaꞈ gʼa yehˇ ve yoˬ. * Tawˇ pa haˉ te kʼo, nyi ma pfuhˇ ve chaw geh tawˇ yaw daꞈ peuˬ hkʼawꞈ nawˉ, liꞈ kʼoˆ maˇ heˆ leh liꞈ kʼoˆ ehˉ piˇ taˉ ve kʼo, yawˇ htaꞈ teˇ pawˆ kʼawꞈ mawˬ htaˇ hkʼa gaˬ liꞈ oˇ ve htaꞈ gʼaw gʼa ve yoˬ. Teˇ ha pa le le kaiˬ ve hkʼaw hto toˇ tuˬ, teˇ gʼaˇ leh teˇ gʼaˇ ve awˬ vuiˬ hpehꞈ ve yoˬ.

11. Aˬ htoꞈ ma te awn˗laiˉ hkʼaw Liꞈ hpu henˇ gʼa ve le?

¹¹ Yaˬhoˉvaˬ chaw yaˇ awˬ tehˬ ve htaꞈ gʼa shiˍ tuˬ ga piˇ ve teˇ hkʼaˇ lehˬ, jw.org^® hkʼaw cawˬ ve Awn˗laiˉ hkʼaw Liꞈ hpu henˇ ve yoˬ. Aˬ htoꞈ ma te awn˗laiˉ hkʼaw Liꞈ hpu henˇ ve cawˬ ve le? Teˇ ha pa le le chaw maˇ maˇ In˗teu˗neꞈ hkʼaw Liꞈ hpu henˇ tuˬ hpfuhˆ nyi chehˇ ve pa taw yoˬ. Ngaˬ hui ve vehˆsaiˉ awn˗laiˉ hkʼaw Liꞈ hpu henˇ ve yawˇ hui awˬ tehˬ ve htaꞈ shiˍ tuˬ ga piˇ ve yoˬ. Chi hkʼoˆ kaꞈ ngaˬ hui yaw daꞈ ve chaw teˇ hpaˍ ngaˬ hui geh teˇ gʼaˇ tawˍ teˇ gʼaˇ Liꞈ hpu henˇ cawˇ naˍ, maˇ henˇ cawˇ naˍ dawˇ ve yoˬ hehˉ. Ngaˬ hui chi hkʼe ve chaw htaꞈ mawˬ daꞈ ve kʼo, Liꞈ hpu henˇ ve awˬ hkʼaˇ vehˆsaiˉ awn˗laiˉ hkʼaw maˇ heˆ leh yawˇ hui ve awˬ hkʼeun hkʼaw nyi tcuh kaꞈ gʼa ve yoˬ. *

12. Chaw teˇ gʼaˇ awn˗laiˉ hkʼaw Liꞈ hpu henˇ ve kʼo, aˬ htoꞈ ma htaꞈ gʼa shiˍ ve le?

¹² Awn˗laiˉ hkʼaw Liꞈ hpu henˇ ve awˬ hkʼaw lo “Liꞈ hpu leh yuˬ tawˆ paˍ,” “Liꞈ hpu hkʼaw ve chaw,” “Liꞈ hpu hkʼaw ve dawˇ law kuiˬ,” ve awˬ lawn htaꞈ henˇ gʼa ve yoˬ. Chi ve teˇ hpaˍ awˬ hkʼaw lo yawˇ hui gʼa henˇ ve,

•   Liꞈ hpu hkʼaw yawˇ hui htaꞈ hkʼaˬ hkʼe ga piˇ gʼa ve le?

•   Yaˬhoˉvaˬ, Yeˍsuˆ, leh mvuhˇ naw ma tcuh yaˇ a shu le?

•   Aˬ htoꞈ ma pa taw Gʼuiˬ sha chaw yaˇ htaꞈ hpanˍ ve le?

•   Aˬ htoꞈ ma pa taw tuꞈ ve hkanˍ ve leh haiˬ ve cawˬ ve le?

 Chi hkʼoˆ kaꞈ, Yaˬhoˉvaˬ yawˇ hkʼaˬ hkʼe te

•   Tuꞈ ve hkanˍ ve leh suh˗e ve htaꞈ maˇ kʼawꞈ cawˬ tcuh ve

•   Suh peuˬ ve chaw kʼawꞈ teꞈ tu la tcuh ve

•   Gʼuiˬ sha ve mvuhˇ miˬ chaw yaˇ uˉ peunˍ maˇ gʼa ve awˬ tan kʼawꞈ uˉ peunˍ la tcuh ve chi ve teˇ hpaˍ htawˇ yawˇ hui gʼa shiˍ tuˬ yoˬ.

13. Awn˗laiˉ hkʼaw Liꞈ hpu henˇ ve lehˬ teˇ gʼaˇ tawˍ teˇ gʼaˇ henˇ ve hkʼaˬ hkʼe peun daꞈ ve le? Kʼoˆ maˍ laˇ sheˍ.

¹³ Awn˗laiˉ hkʼaw Liꞈ hpu henˇ ve lehˬ teˇ gʼaˇ tawˍ teˇ gʼaˇ henˇ ve tehꞈ kʼoˆ gaˇ ve maˇ heˆ. Shu awˬ laꞈ gʼawˇ hpehꞈ la tuˬ te ve Yeˍsuˆ ngaˬ hui htaꞈ daꞈ jaˇ ve awˬ vuiˬ peꞈ laˇ ve yoˬ. Awn˗laiˉ hkʼaw Liꞈ hpu henˇ ve nyi ma pfuhˇ ve chaw lehˬ henˇ taˍ ve htaꞈ dawˇ cawˇ ve, leh hkʼa dehꞈ kʼawꞈ henˇ gaˇ tuˬ tehꞈ ngaˬ hui dawˇ law ve yoˬ. Yawˇ teˇ gʼaˇ tawˍ teˇ gʼaˇ henˇ gaˇ tuˬ kaꞈ te piˇ ve yoˬ. Teˇ pfuhꞈ henˇ peuˬ hkʼawꞈ nawˉ teˇ gʼaˇ tawˍ teˇ gʼaˇ kʼawꞈ henˇ tuˬ jehˬ piˇ sheˍ. Miˬ guiˬ chi hkʼoˆ lo ngaˬ hui ve vehˆsaiˉ hkʼaw Liꞈ hpu lawˬ henˇ ve chaw teˇ nyi ve hkʼaw 230 gʼaˇ hpaˆ cawˬ ve yoˬ! Liꞈ hpu teˇ gʼaˇ tawˍ teˇ gʼaˇ henˇ ve a yeˇ uiˍ jaˇ!

14. Maꞈhtehˍ liꞈ 28:19, 20 hkʼaw Yeˍsuˆ kʼoˆ taˍ ve hkʼe, ngaˬ hui te gʼa ve hkʼe hkʼaˬ hkʼe te cawˇ ve le? Aˬ htoꞈ ma pa taw le?

¹⁴ Maꞈhtehˍ liꞈ 28:19, 20 gʼaw sheˍ. Ngaˬ hui ‘chaw ceuˬ hkʼa peu˗eˬ awˬ laꞈ gʼawˇ hpehꞈ la tuˬ leh yawˇ hui Yeˍsuˆ kʼoˆ ve hkʼe gʼaꞈ te tuˬ’ ngaˬ hui  Liꞈ hpu maˍ piˇ htaˇ, te gʼa ve hkʼe te cawˇ ve yoˬ. Yaˬhoˉvaˬ htaꞈ oˉ kʼoˍ pui leh yawˇ ve mvuhˇ miˬ uˉ peunˍ ve hpawˇ chehˇ ve a yeˇ hkʼaˬ hkʼe taw uiˍ ve yawˇ hui na gʼa tuˬ maˍ piˇ cawˇ ve yoˬ. Chi ve tcuhˉ kuiˬ lehˬ yawˇ hui henˇ taˍ ve htaꞈ yuˬ yehˇ ve, Yaˬhoˉvaˬ htaꞈ awˬ to chiˇ aꞈ piˇ ve leh Baˆtiˆsaˬ haꞈ yuˬ tuˬ ngaˬ hui ga piˇ ve htaꞈ kʼoˆ gaˇ ve yoˬ. Chi hkʼe te htaˇ, yawˇ hui Yaˬhoˉvaˬ ve awˬ nyi htaꞈ gʼa ponˬ tuˬ yoˬ.—1 Peˍtruˆ 3:21.

15. Ngaˬ hui aˬ htoꞈ ma te awˬ yanˇ maˇ shonˇ chehˇ cawˇ ve le? Aˬ htoꞈ ma pa taw le?

¹⁵ Awˉ lawˉ htaˇ kʼoˆ peuˬ ve hkʼe, haiˬ jaˇ ve miˬ guiˬ leh la paˇ neˇ ve yoˬ. Chi htaꞈ pa taw, ngaˬ hui Liꞈ hpu maˍ piˇ ve chaw Yeˍsuˆ ve awˬ laꞈ gʼawˇ maˇ hpehꞈ gaˇ ve chaw geh ngaˬ hui awˬ yanˇ taˇ shonˇ chehˇ. (1 Kawˇrenˍhtuˆ 9:26) Ngaˬ hui haˆ haˆ gʼa te ve yoˬ. Awˬ lawn kʼo, awˬ yanˇ cawˬ sheˍ htaˇ chaw maˇ maˇ Gʼuiˬ sha ve mvuhˇ miˬ awˬ lawn gʼa kaˇ cawˇ ve yoˬ.

16. Hpeuꞈ maˍ ve liꞈ 18:2, 4, 5, 8 hkʼaw kʼoˆ taˍ ve hkʼe, ngaˬ hui aˬ htoꞈ ma gʼa te cawˇ ve le? (Awˬ maiˉ htaꞈ nyi sheˍ.)

¹⁶ Hpeuꞈ maˍ ve liꞈ 18:2, 4, 5, 8 gʼaw sheˍ. Yaˬhoˉvaˬ yawˇ ve chaw htaꞈ te tcuh gaˇ ve awˬ nu ve awˬ ceuˬ cawˬ sheˍ ve tehꞈ Liꞈ hpu awˬ tawn chi teˇ hpaˍ hkʼaw kʼoˆ laˇ ve yoˬ. Awˬ tehˬ ve Hkriꞈ yaˇ lehˬ Uiˍ ve Baˍbuˍlonˍ venˇ htaꞈ maˇ gʼa caˉ daꞈ. Liꞈ hpu henˇ ve chaw teˇ gʼaˇ hto toˇ ve te gaˇ ve kʼo, yawˇ maˇ heˆ heˆ ve bon liˇ htaꞈ caˉ daꞈ jaw ve, bon liˇ hkʼaw ve awˬ liˇ htaꞈ te jaw ve, maˇ heˆ leh awˬ moˍ oˇ ve hkʼaw hpu tanˇ tanˇ piˇ jaw ve kʼo, yawˇ maˇ heˆ heˆ ve bon liˇ htaꞈ maˇ caˉ daꞈ˗o ve tehꞈ gʼa hpeuꞈ maw piˇ ve yoˬ. Yawˇ bon liˇ hkʼaw maˇ heˆ leh Uiˍ ve Baˍbuˍlonˍ venˇ * htaꞈ caˉ daꞈ ve awˬ moˍ hkʼaw kaꞈ liꞈ bvuhꞈ piˇ leh gʼa lawˬ tawˆ la ve yoˬ.

17. Hkriꞈ yaˇ kanˉ hkʼaˬ hkʼe ve maˇ te cawˇ ve le? Aˬ htoꞈ ma pa taw le?

¹⁷ Awˬ tehˬ ve Hkriꞈ yaˇ lehˬ yawˇ hui kanˉ te ve kaꞈ Uiˍ ve Baˍbuˍlonˍ venˇ htaꞈ maˇ caˉ daꞈ ve tehꞈ hkʼa dehꞈ yonˍ gʼa tcuh ve yoˬ. (2 Kawˇrenˍhtuˆ 6:14-17) Tawˇ pa haˉ te kʼo, hpaꞈ yehˬ, bon yehˬ awˬ pon yawˇ kanˉ maˇ te piˇ. Chi hkʼoˆ kaꞈ, yawˇ paw leˍ hpehꞈ ve kʼo, Uiˍ ve Baˍbuˍlonˍ venˇ htaꞈ caˉ daꞈ ve kanˉ kʼo teˇ ceuˬ kaꞈ maˇ te. Yawˇ shu geh gʼaˇ ga caˇ ve htawˇ, maˇ heˆ heˆ ve oˉ kʼoˍ pui kuiˬ lo awˬ yanˇ yehˇ maˇ ve kʼo kanˉ maˇ te. Aˬ htoꞈ ma pa taw chi hkʼe maˇ te ve le? Yaˬhoˉvaˬ maˇ daꞈ tehꞈ dawˇ ve awˬ ceuˬ, maˇ heˆ heˆ ve bon awˬ moˍ maˍ ve te hkʼaˇ dawˇ hkʼaˇ htaꞈ ngaˬ hui maˇ caˉ daꞈ gaˇ ve pa taw yoˬ.—Iˉsaˍyaˆ 52:11. *

18. Awˬ viˉ awˬ nyi teˇ gʼaˇ Liꞈ hpu hkʼaw ve awˬ liˇ awˬ hkʼaˇ kanˉ te ve hpawˇ hkʼaˬ hkʼe na yuˬ ve le?

 ¹⁸ Ponˬ laˬ ve laiˉ hkʼawꞈ htaˇ, nyi haꞈ shaˉ paˍ paw leˍ hpehꞈ ve teˇ gʼaˇ yawˇ chehˇ kuiˬ venˇ lo ve chaw bon yehˬ hkʼaw suhˆ htaꞈ caˉ daꞈ ve kanˉ te laˇ tuˬ shu ca la ve yoˬ. Ca la ve chaw yawˇ bon yehˬ hkʼaw kanˉ maˇ te ve kaꞈ shiˍ˗oˬ. Yaꞈ hkʼaˇ, chi teˇ pawˆ kanˉ te paˍ ca maˇ gʼa. Yawˇ kanˉ chi ve htaꞈ te laˇ tuˬ gʼaˇ hteꞈ lawˬ ve yoˬ. Yaꞈ hkʼaˇ, yawˇ Liꞈ hpu hkʼaw ve awˬ liˇ awˬ hkʼaˇ htaꞈ na yuˬ leh kanˉ chi maˇ te. Hkʼawꞈ nawˉ teˇ shinˉ htaˇ kanˉ te paˍ bon yehˬ hkʼaw laꞈ ka han htaꞈ tawˆ baˬ chehˇ ve awˬ han liꞈ sha tanˇ hkʼaw keu ve yoˬ. Awˬ viˉ awˬ nyi chi ve teˇ gʼaˇ Liꞈ hpu hkʼaw ve awˬ liˇ awˬ hkʼaˇ htaꞈ maˇ na yuˬ leh kanˉ te ve kʼo, awˬ han hkʼaw ve chaw yawˇ kaꞈ hpehꞈ gʼa ve yoˬ hehˉ. Hkʼaˬ hkʼe taw heuˆ la kuiˬ cawˬ ve htaꞈ dawˇ nyi sheˍ. Awˬ viˉ awˬ nyi yawˇ htaꞈ maˇ daꞈ ve hpawˇ dawˇ leh Yaˬhoˉvaˬ hkʼaˬ hkʼe taw nyi ma luˬ ve htaꞈ dawˇ nyi sheˍ.

19-20. (a) Awˬ lawn chi ve hkʼaw ngaˬ hui aˬ htoꞈ ma gʼa henˇ˗oˬ ve le? (b) Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ gʼa henˇ tuˬ le?

¹⁹ Maˇ maw ve awˬ yanˇ Liꞈ hpu hkʼaw kʼoˆ ve maˇ kaˇ jaw ve awˬ heˆ tawˆ la tuˬ yoˬ. Mvuhˇ miˬ uˉ peunˍ paˍ teˇ hpaˍ ‘mvuhˇ miˬ gawˬ la peuˬ leh teꞈ chiˉ dawˇ haˍ tuˬ maˇ cawˬ!’ tehꞈ kʼoˆ laˇ tuˬ yoˬ. Mvuhˇ miˬ uˉ peunˍ paˍ dawˇ sha gawˬ lehˍ ve cawˬ tuˬ te maˇ gʼa ve tehꞈ ngaˬ hui hkʼa dehꞈ shiˍ ve yoˬ. Awˬ lawn chi ve Yaˬhoˉvaˬ ngaˬ hui htaꞈ kʼoˆ laˇ ve awˬ bon uiˍ jaˇ. Oˇ ve maˇ kʼoˆ laˇ sheˍ htaˇ, leh tuꞈ jaˇ hkanˍ jaˇ ve maˇ tanˬ sheˍ htaˇ, ngaˬ hui aˬ htoꞈ ma gʼa te cawˇ ve le? Yaˬhoˉvaˬ ngaˬ hui htaꞈ gʼaˇ hteꞈ hto toˇ tcuh gaˇ leh shu awˬ laꞈ gʼawˇ hpehꞈ la tuˬ maˍ tcuh gaˇ ve yoˬ. Ngaˬ hui maˇ heˆ heˆ ve bon htaꞈ maˇ caˉ daꞈ ve tcuhˉ kuiˬ lehˬ yawˇ hui ve awˬ moˍ yaˇ maˇ te leh Uiˍ ve Baˍbuˍlonˍ venˇ htaꞈ kaꞈ maˇ caˉ daꞈ.

²⁰ ‘Awˬ leh meuˇ ve awˬ yanˇ’ hkʼaw awˬ leh meuˇ teˇ tawn lo hpehꞈ la tuˬ ve laiˉ ceuˬ cawˬ sheˍ. Yaˬhoˉvaˬ ngaˬ hui htaꞈ te tcuh gaˇ ve kaꞈ laiˉ ceuˬ cawˬ sheˍ. Chi ve teˇ hpaˍ aˬ htoꞈ ma le? Maˇ maw ve awˬ yanˇ hpehꞈ la tuˬ ve awˬ ceuˬ teˇ hpaˍ htaꞈ ngaˬ hui haꞈ yuˬ gʼa tuˬ, hkʼaˬ hkʼe te gu hehnˇ taˍ gʼa ve le? Gʼuˇ suhˍ teˇ lawn hkʼaw ngaˬ hui teˇ geh henˇ tuˬ yoˬ.