Chaˬ nyi tehˆ nyi paˍ awˬ tcuhˉ awˬ yanˇ htaꞈ chaˬ nyi chehˇ leh chaw maˇ jaˇ kuiˬ lo mvuhˇ yeˬ mvuhˇ haw lonˉ laˬ chehˇ ve htaꞈ gʼa mawˬ ve yoˬ. Oˇ kaˬ lo ve chaw htaꞈ yawˇ dawˇ haˍ ve yoˬ. Yawˇ hui htaꞈ shaˍ tiꞈ piˇ gʼa tuˬ yawˇ te gʼa ve hkʼe te ve yoˬ.

Chi ve hkʼa shuˍ, chi teˇ hkui Yaˬhoˉvaˬ miˬ guiˬ yaˇ htaꞈ “mvuhˇ yeˬ mvuhˇ haw lonˉ” maˇ hpehꞈ jaw ve laˬ tuˬ ve tehꞈ shaˍ tiꞈ piˇ chehˇ ve yoˬ. Yawˇ chaw yaˇ htaꞈ shaˍ tiꞈ hkʼaˬ hkʼe piˇ ve le? Yawˇ shaˍ tiꞈ piˇ ve htaꞈ chaw yaˇ gʼaꞈ te tuˬ awˬ yanˇ cawˬ sheˍ ve tehꞈ ngaˬ hui hkʼaˬ hkʼe te yonˍ gʼa ve le? Oˇ htaˇ teˇ co˗e, Yaˬhoˉvaˬ chaw yaˇ htaꞈ shaˍ tiꞈ piˇ jaw ve, teˇ lawn lawn htaꞈ chaˬ nyi sheˍ.

Liꞈ hpu ve awˬ co˗e htaˇ, Yaˬhoˉvaˬ shaˍ tiꞈ piˇ ve htaꞈ maˇ na yuˬ ve chaw cawˬ ve yoˬ. “Mvuhˇ yeˬ mvuhˇ haw lonˉ” gʼa hpuˇ tuˬ ve tcuhˉ kuiˬ lehˬ Gʼuiˬ sha ciˍ yanˍ piˇ ve htaꞈ kʼoˆ gaˇ ve yoˬ. (Tawˇ naˉ ve 10:25; Yeˍraˍmiˆ 30:23) Yawˇ ve hkawˇ na yuˬ tuˬ teˇ pawˆ le le yawˇ hui aˬ htoꞈ ma gʼa te cawˇ ve kaꞈ kʼoˆ piˇ leh yawˇ hui pa tuˬ awˬ yanˇ teh taˍ piˇ ve yoˬ. (2 Jawˇmawˇ 17:12-15; Neˍhaˍmiˆ 9:29, 30) Chi hkʼoˆ kaꞈ Gʼuiˬ sha ka tiꞈ yeˬ ve chaw htaꞈ cuˇ leh yawˇ suhˉ jehˬ tuˬ kʼoˆ piˇ tcuh leh chaw yaˇ Gʼuiˬ sha kʼoˆ ve htaꞈ na gʼa leh laꞈ haˉ gʼaꞈ te tuˬ ga piˇ ve yoˬ.—Aˍmoˆ 3:7.

Ka tiꞈ yeˬ ve chaw Gʼuiˬ sha yehˇ ve lehˬ Noˉaꞈ yoˬ. Yawˇ ve awˬ co˗e htaˇ, pehꞈ ve tzuhˆ ve leh haiˬ ve chaw htaꞈ miˬ guiˬ chi hkʼoˆ lo iˉ kaˆ htonˍ tuˬ yoˬ tehꞈ shaˍ tiꞈ piˇ tcuh ve yoˬ. (Awˬ hkuiˉ puiˍ 6:9-13, 17) Hkʼaˬ hkʼe te leh gʼa ponˬ tuˬ kaꞈ Noˉaꞈ kʼoˆ piˇ ve yoˬ. Yawˇ awˬ lawn oˇ ve htaꞈ hkʼa dehꞈ hto toˇ ve pa taw, Liꞈ hpu hkʼaw yawˇ htaꞈ ‘hteˇ ve cawˇ ve Gʼuiˬ sha ve awˬ lawn bon maˍ ve’ tehꞈ kʼoˆ ve yoˬ.—2 Peˍtruˆ 2:5.

Iˉ kaˆ maˇ htonˍ sheˍ htaˇ Noˉaꞈ chaw yaˇ htaꞈ shaˍ tiꞈ piˇ ve yoˬ. Yaꞈ hkʼaˇ, chaw yaˇ maˇ na yuˬ leh maˇ yonˍ ve pa taw, “iˉ kaˆ htonˍ la leh yawˇ hui htaꞈ poˬ chiˇ veu” leh suh peuˬ ve yoˬ. (Maꞈhtehˍ 24:39; Heˍbrehˇ 11:7) Yaꞈ hkʼaˇ, Gʼuiˬ sha shaˍ tiꞈ maˇ peꞈ laˇ ve tehꞈ chaw teˇ gʼaˇ kaꞈ venˇ baˆ taˍ maˇ hpehꞈ.

“Mvuhˇ yeˬ mvuhˇ haw lonˉ” Gʼuiˬ sha suhˉ jehˬ piˇ tuˬ ve maˇ laˬ sheˍ htaˇ kaꞈ chaw yaˇ htaꞈ shaˍ tiꞈ piˇ ve yoˬ. Hkʼaˬ hkʼe hpehꞈ ve htawˇ shaˍ tiꞈ piˇ ve chi htaꞈ chaw yaˇ gʼaꞈ te tuˬ awˬ yanˇ cawˬ sheˍ ve tehꞈ, yawˇ awˉ lawˉ htaˇ hkʼa dehꞈ chaˬ nyi ve yoˬ. Teˇ ceuˬ lehˬ Eˇjiˇtuꞈ mvuhˇ miˬ hkʼaw awˬ heˆ 10 ceuˬ hpehꞈ tcuh htaˇ hkʼe yoˬ. Awˬ heˆ 7 ceuˬ teˇ ceuˬ mvuhˇ yeˬ mvuhˇ haw lonˉ leh vaˇ shiˍ ce la leh maˇ gʼa te luˬ sheˍ htaˇ, Yaˬhoˉvaˬ Moˉseˍ leh Aˍronˍ htaꞈ Hpaˍrawˇ leh yawˇ ve a maꞈ lonˉ teˇ hpaˍ htaꞈ shaˍ tiꞈ piˇ tcuh ve yoˬ. Yaꞈ hkʼaˇ, mvuhˇ yeˬ mvuhˇ haw lonˉ leh vaˇ shiˍ shawˉ pawˍ hkʼe laˬ ve kʼo, yawˇ hui ponˬ kuiˬ leh hpaw˗e kuiˬ ca gʼa˗aw laˇ? Liꞈ hpu hkʼaw kʼoˆ ve, “a shu yawˇ ve yehˬ leh, hkawˆ hkʼaw maˇ chehˇ taˍ ve chaw leh to nuˇ to shaˆ hkʼa peu˗eˬ, vaˇ shiˍ ce teˍ leh suh peuˬ tuˬ yoˬ. Gʼuiˬ sha ve tawˇ htaꞈ gʼa kaˇ leh kawˆ ve jawˇ mawˇ ve a maꞈ lonˉ teˇ hpaˍ lehˬ, a shu yawˇ ve awˬ ceˬ leh, ceˇ teˇ hpaˍ htaꞈ aˉ hkʼaw lo gʼaꞈ keu taˍ ve yoˬ. Yaꞈ hkʼaˇ, Gʼuiˬ sha ve tawˇ htaꞈ maˇ na ve chaw teˇ hpaˍ lehˬ, a shu yawˇ ve awˬ ceˬ leh ceˇ teˇ hpaˍ htaꞈ ti mi hkʼaw hkʼe leˇ hpehˇ baˬ taˍ ve yoˬ.” (Tawˆ kʼai ve 9:18-21) Yaˬhoˉvaˬ shaˍ tiꞈ piˇ ve htaꞈ na yuˬ tuˬ awˬ yanˇ cawˬ sheˍ leh, haˆ gʼaꞈ te ve chaw kʼo, heuˆ la kuiˬ maˇ cawˬ ve tehꞈ hkʼa tawˍ lehˆ gʼa mawˬ ve yoˬ.

Awˬ heˆ 10 ceuˬ maˇ hpehꞈ la sheˍ htaˇ, Hpaˍrawˇ leh yawˇ ve a maꞈ lonˉ teˇ hpaˍ htaꞈ shaˍ tiꞈ piˇ ve maˇ na yuˬ ve kʼaˍ jaˇ. (Tawˆ kʼai ve 4:22, 23) Yawˇ hui ve yaˇ paˍ uiˍ hkʼa peu˗eˬ suh˗e ve yoˬ. Chi nyi ma luˬ jaˇ! (Tawˆ kʼai ve 11:4-10; 12:29) Yaꞈ hkʼaˇ, shaˍ tiꞈ piˇ ve gʼaꞈ te tuˬ awˬ yanˇ cawˬ˗aw laˇ? Cawˬ ve yoˬ. Awˬ heˆ 10 ceuˬ hpehꞈ la tuˬ yoˬ tehꞈ Moˉseˍ Iˉsaˍreˍlaˆ chaw htaꞈ shaˍ tiꞈ piˇ ve yoˬ. Yawˇ hui ve yehˬ kʼa gʼa ponˬ tuˬ hkʼaˬ hkʼe gʼa te ve kaꞈ kʼoˆ piˇ ve yoˬ.  (Tawˆ kʼai ve 12:21-28) Moˉseˍ shaˍ tiꞈ piˇ ve htaꞈ na yuˬ ve hkʼaˬ nyiˇ gʼaˇ cawˬ ve le? Iˉsaˍreˍlaˆ chaw, “awˬ nu ve chaw ceuˬ teˇ hpaˍ,” leh Eˇjiˇtuꞈ chaw hui hkʼa peu˗eˬ 3 lanˬ gʼaˇ hpaˆ cawˬ ve yoˬ. Yawˇ hui Gʼuiˬ sha ciˍ yanˍ piˇ ve htaꞈ gʼa ponˬ leh Eˇjiˇtuꞈ mvuhˇ miˬ lo tawˆ kʼai ve yoˬ.—Tawˆ kʼai ve 12:38.

Ngaˬ hui henˇ laˬ peuˬ ve htaꞈ nyi kʼo, chaw yaˇ Yaˬhoˉvaˬ shaˍ tiꞈ piˇ ve htaꞈ gʼaꞈ te tuˬ awˬ yanˇ cawˬ sheˍ ve yoˬ. (Bon maˍ ve 32:4) Aˬ htoꞈ ma te yawˇ chi hkʼe te ve le? Tcuh yaˇ Peˍtruˆ kʼoˆ ve, Yaˬhoˉvaˬ lehˬ “chaw hkʼa peu˗eˬ venˇ baˆ htaꞈ dawˇ hpfuhˆ leh teˇ gʼaˇ kaꞈ maˇ gʼa luˬ kʼai tuˬ yawˇ heuˆ gaˇ” ve yoˬ. (2 Peˍtruˆ 3:9) Yawˇ chaw yaˇ htaꞈ haꞈ leh dawˇ haˍ ve yoˬ. Suhˉ jehˬ ve awˬ nyi maˇ gaˬ la sheˍ htaˇ, yawˇ kʼoˆ ve htaꞈ gʼaꞈ te leh venˇ baˆ dawˇ hpfuhˆ tcuh gaˇ ve yoˬ.—Iˉsaˍyaˆ 48:17, 18; Roˉmaꞈ 2:4.

Chi beuꞈ teˇ co˗e kaꞈ hkʼa shuˍ, miˬ guiˬ chi hkʼoˆ teˇ kaˬ le le lo hto toˇ chehˇ ve htaꞈ gʼa na yuˬ cawˇ ve yoˬ. Yeˍsuˆ miˬ guiˬ hkʼoˆ chehˇ htaˇ, haiˬ jaˇ ve miˬ guiˬ chi htaꞈ “tuꞈ jaˇ hkanˍ jaˇ ve” hkʼaw te luˬ tuˬ tehꞈ shaˍ tiꞈ piˇ jaw ve yoˬ. (Maꞈhtehˍ 24:21) Suhˉ jehˬ ve awˬ nyi maˇ gaˬ la sheˍ htaˇ, awˬ laꞈ gʼawˇ aˬ htoꞈ ma htaꞈ gʼa mawˬ tuˬ, gʼa hpuˇ tuˬ, yawˇ tcuh kaˍ paˍ ve tawˇ hkawˇ teˇ maˬ htaꞈ hkʼa dehꞈ kʼoˆ maˍ laˇ taˍ ve yoˬ. Leh miˬ guiˬ hkʼoˆ lo hpehꞈ chehˇ ve ngaˬ hui gʼa mawˬ ve htaꞈ yawˇ kʼoˆ ve yoˬ.—Maꞈhtehˍ 24:3-12; Luˉkaꞈ 21:10-13.

Tcuh kaˍ paˍ tawˇ hkawˇ chi htaꞈ caˉ daꞈ ve Yaˬhoˉvaˬ teˇ gʼaˇ le le yawˇ ve hkawˇ na yuˬ leh yawˇ uˉ peunˍ ve awˬ hawˉ lo chehˇ tcuh gaˇ ve yoˬ. Yawˇ hkawˇ na yuˬ ve chaw htaꞈ chi teˇ hkui aꞈ kehˉ a shaꞈ teꞈ hkʼaˇ daꞈ ve cawˬ tcuh leh awˬ gʼuˇ suhˍ hpawˇ miˬ guiˬ awˬ suhˉ hkʼaw awˬ bon maˇ maˇ gʼa tcuh gaˇ ve yoˬ. (2 Peˍtruˆ 3:13) Yaˬhoˉvaˬ ka tiꞈ te taˍ ve htaꞈ chaw yaˇ yonˍ tcuh gaˇ leh a shaꞈ htaꞈ ponˬ laˇ gʼa ve daꞈ ve awˬ lawn sha tanˇ gʼa kaˇ tuˬ yawˇ ga piˇ ve yoˬ. Oˇ ve lehˬ “Gʼuiˬ sha ve mvuhˇ miˬ htaꞈ caˉ daꞈ ve ha lehˬ ve bon hkawˇ” yoˬ. Chi awˬ gʼuˇ suhˍ htaˇ kaꞈ Yeˍsuˆ kʼoˆ taˍ ve ‘chaw ceuˬ hkʼa peu˗eˬ awˬ pon shaˉ hkiˆ hpehꞈ tuˬ, miˬ guiˬ hkʼoˆ teˇ kaˬ le le lo ca maˍ piˇ tuˬ yoˬ.’ (Maꞈhtehˍ 24:14) Awˬ tehˬ oˉ kʼoˍ pui ve chaw htaꞈ “ha lehˬ ve bon hkawˇ” 240 mvuhˇ miˬ hpaˆ hto toˇ ve yoˬ. “Mvuhˇ yeˬ mvuhˇ haw lonˉ” hkʼe hpehꞈ ve hteˇ ve cawˇ ve hkʼaw Gʼuiˬ sha suhˉ jehˬ ve htaꞈ gʼa ponˬ tuˬ, chaw maˇ maˇ yawˇ shaˍ tiꞈ piˇ ve htaꞈ gʼaꞈ te tcuh gaˇ ve yoˬ.—Zeˍhpaˍniˆ 1:14, 15; 2:2, 3.

A yeˇ uiˍ jaˇ ve na hkawˇ chi lehˬ chaw yaˇ Yaˬhoˉvaˬ shaˍ tiꞈ peꞈ laˇ ve htaꞈ gʼaꞈ te tuˬ awˬ yanˇ cawˬ˗aw laˇ? Yawˇ hkʼaˬ htaˆ kaꞈ chi hkʼe te ve tehꞈ hkʼa tawˍ lehˆ gʼa mawˬ ve yoˬ. Chaw maˇ maˇ miˬ guiˬ chi haiˬ jaˇ ve htaꞈ gʼa ponˬ tuˬ, ngaˬ hui Gʼuiˬ sha ve awˬ lawn caˉ leh hto toˇ cawˇ ve yoˬ.