1. Oˇ htaˇ teˇ co˗e Gʼuiˬ sha ve kanˉ te ve chaw awˬ gʼaˇ cawˬ tuˬ hkʼaˬ kaˬ lo gʼa ve le?

 Liꞈ hpu hkʼaw laiˉ pawˆ kʼoˆ ve, Yaˬhoˉvaˬ ve kanˉ te ve chaw awˬ gʼaˇ cawˬ ve yoˬ. Yaꞈ hkʼaˇ, awˬ gʼaˇ cawˬ jaˇ ve chaw kaꞈ, hkʼaˬ htaˆ kaꞈ awˬ gʼaˇ cawˬ ve maˇ heˆ tehꞈ dawˇ ve yoˬ. Tawˇ pa haˉ te kʼo, teˇ pawˆ pawˆ jawˇ mawˇ Daˍviˆ yawˇ “hkʼaw pui hkʼoˆ ve taꞈ yehˬ hkʼa shuˍ” hpehꞈ ve yoˬ. Yaꞈ hkʼaˇ, teˇ pawˆ pawˆ kʼo, yawˇ “kawˆ jaˇ ve yoˬ.” (Chiˇ mvuh ve 30:7) Sanˍsonˍ kaꞈ hkʼa shuˍ shuˍ yoˬ. Yawˇ Gʼuiˬ sha geh kanˇ paˆ gʼa htaˇ, awˬ gʼaˇ cawˬ la ve yoˬ. Yaꞈ hkʼaˇ, yawˇ Gʼuiˬ sha geh kanˇ paˆ maˇ gʼa ve kʼo, “awˬ nu ve chaw teˇ hpaˍ hkʼa shuˍ hpehꞈ la tuˬ yoˬ.” (Suhˉ jehˬ ve 14:5, 6; 16:17) Gʼuiˬ sha ve kanˉ ka tiꞈ yeˬ ve hkʼaw te ve chaw chi teˇ hpaˍ Gʼuiˬ sha geh kanˇ paˆ gʼa htaˇ, awˬ gʼaˇ cawˬ ve tehꞈ ngaˬ hui hkʼa tawˍ lehˆ gʼa mawˬ ve yoˬ.

2. Pawˇluꞈ awˬ gʼaˇ nuˇ htaˇ awˬ gʼaˇ uiˍ ve tehꞈ hkʼaˬ hkʼe te kʼoˆ gʼa ve le? (2 Kawˇrenˍhtuˆ 12:9, 10)

² Pawˇluꞈ Gʼuiˬ sha ve kanˇ paˆ gʼa tuˬ loˍ ve yoˬ. (2 Kawˇrenˍhtuˆ 12:9, 10 gʼaw sheˍ.) Pawˇluꞈ kaꞈ ngaˬ hui hkʼa shuˍ hpehꞈ ve yoˬ. Yawˇ kaꞈ maˇ chehˇ sha ve htaꞈ gʼa tawˍ daꞈ ve yoˬ. (Gaˍlaˍtiˆ 4:13, 14) Teˇ pawˆ pawˆ yawˇ cawˇ ve awˬ ceuˬ htaꞈ te tuˬ gʼa coˇ caˇ jaˇ. (Roˉmaꞈ 7:18, 19) Chi hkʼoˆ kaꞈ, yawˇ aˬ htoꞈ ma gʼa hpuˇ la tuˬ ve htaꞈ dawˇ haˍ leh kawˆ ve yoˬ. (2 Kawˇrenˍhtuˆ 1:8, 9) Pawˇluꞈ awˬ gʼaˇ nuˇ ve teˇ yanˇ, awˬ gʼaˇ kʼawꞈ uiˍ la ve yoˬ. Aˬ htoꞈ ma pa taw le? Awˬ lawn kʼo, Yaˬhoˉvaˬ yawˇ htaꞈ kanˇ paˆ piˇ leh yawˇ awˬ gʼaˇ cawˬ tuˬ te piˇ ve yoˬ.

3. Awˬ lawn chi ve hkʼaw aˬ htoꞈ ma ve na hkawˇ htaꞈ ngaˬ hui teˇ geh henˇ tuˬ le?

³ Yaˬhoˉvaˬ ngaˬ hui htaꞈ awˬ gʼaˇ cawˬ tcuh laˇ tuˬ yoˬ tehꞈ ka tiꞈ te taˍ laˇ ve yoˬ. (1 Peˍtruˆ 5:10) Yaꞈ hkʼaˇ, ngaˬ hui awˬ gʼaˇ cawˬ tuˬ ngaˬ hui ve awˬ vuiˬ ngaˬ hui gʼa te cawˇ ve yoˬ. Tawˇ pa haˉ te kʼo, kaˇ ve awˬ hkʼeun lehˬ kaˇ kʼai gʼa tuˬ te piˇ ve yoˬ. Yaꞈ hkʼaˇ, kaˇ gʼaꞈ ve chaw lehˬ kaˇ kʼai gʼa tuˬ htaꞈ gʼa naˆ ve yoˬ. Chi ve hkʼa shuˍ shuˍ, Yaˬhoˉvaˬ ngaˬ hui htaꞈ awˬ gʼaˇ peꞈ laˇ tuˬ yoˬ. Yaꞈ hkʼaˇ, ngaˬ hui awˬ gʼaˇ cawˬ tuˬ teˇ ceuˬ ceuˬ gʼa te cawˇ ve yoˬ. Ngaˬ hui awˬ gʼaˇ cawˬ tuˬ Yaˬhoˉvaˬ aˬ htoꞈ ma peꞈ laˇ gʼa ve le? Ngaˬ hui daꞈ kehˬ ve awˬ ha hpu gʼa tuˬ aˬ htoꞈ ma gʼa te cawˇ ve le? Yaˬhoˉvaˬ yawˇ ve kanˉ te ve chaw, tcuh kaˍ paˍ  Yoˇnaˆ, Yeˍsuˆ ve awˬ e Maˍriˆ, leh tcuh yaˇ Pawˇluꞈ, yawˇ hui awˬ gʼaˇ cawˬ tuˬ hkʼaˬ hkʼe ga piˇ ve htaꞈ teˇ geh nyi sheˍ. Leh chi beuꞈ teˇ co˗e Yaˬhoˉvaˬ yawˇ ve kanˉ te ve chaw htaꞈ hkʼaˬ hkʼe ga piˇ ve kaꞈ teˇ geh nyi sheˍ.

4. Yaˬhoˉvaˬ geh awˬ gʼaˇ gʼa tuˬ ngaˬ hui hkʼaˬ hkʼe gʼa te cawˇ ve le?

⁴ Ngaˬ hui Yaˬhoˉvaˬ geh awˬ gʼaˇ gʼa ve teˇ ceuˬ lehˬ, bon lawˬ ve yoˬ. Yaˬhoˉvaˬ ngaˬ hui ve bon lawˬ hkawˇ htaꞈ hkʼawꞈ laˇ ve lehˬ, “uiˍ jaˇ daꞈ jaˇ ve kanˇ paˆ” htaꞈ cuˇ ve yoˬ. (2 Kawˇrenˍhtuˆ 4:7) Chi hkʼoˆ kaꞈ, ngaˬ hui Liꞈ hpu gʼaw leh hkʼa dehꞈ dawˇ nyi htaˇ, awˬ gʼaˇ cawˬ la ve yoˬ. (Chiˇ mvuh ve 86:11) Liꞈ hpu hkʼaw Gʼuiˬ sha ve tawˇ hkawˇ lehˬ, “kanˇ paˆ cawˬ ve yoˬ.” (Heˍbrehˇ 4:12) Nawˬ Gʼuiˬ sha geh bon lawˬ leh Liꞈ hpu gʼaw htaˇ, nawˬ yeunˇ hkanˍ gʼaˇ tuˬ awˬ gʼaˇ cawˬ ve, hkʼaˬ htaˆ kaꞈ ha lehˬ ve, leh Gʼuiˬ sha ve kanˉ hkʼa dehꞈ te gʼa ve yoˬ. Yaˬhoˉvaˬ lehˬ tcuh kaˍ paˍ Yoˇnaˆ awˬ gʼaˇ cawˬ la tuˬ hkʼaˬ hkʼe ga piˇ ve htaꞈ teˇ geh nyi sheˍ.

5. Tcuh kaˍ paˍ Yoˇnaˆ awˬ gʼaˇ cawˬ tuˬ aˬ htoꞈ ma te ga laˇ ve htaꞈ loˍ ve le?

⁵ Tcuh kaˍ paˍ Yoˇnaˆ awˬ gʼaˇ cawˬ la tuˬ ga laˇ ve htaꞈ loˍ ve yoˬ. Oˇ ve teˇ yanˇ Yaˬhoˉvaˬ yawˇ htaꞈ awˬ vuiˬ piˇ ve maˇ te leh yawˇ hpaw˗e ve yoˬ. Mvuhˇ yeˬ mvuhˇ haw lonˉ laˬ ve pa taw, aˬ laˬ hkʼe yawˇ suh˗e te ve yoˬ. Heuˇ shan hpawˇ lonˉ hkʼaw chehˇ ve chaw teˇ hpaˍ kaꞈ aˬ laˬ hkʼe suh˗e tuˬ yawˇ te piˇ ve yoˬ. Yawˇ htaꞈ laˇ tsuhˇ gʼuiˬ hkʼaw baˬ keu piˇ htaˇ, yawˇ maˇ chehˇ jaw kuiˬ awˬ ti lo gʼa chehˇ ve yoˬ. Chi ve lehˬ ngaˇ lonˉ gʼoˇ peˬ hkʼaw hpehꞈ ve yoˬ. Nawˬ dawˇ kʼo, Yoˇnaˆ hkʼaˬ hkʼe dawˇ ve le? Ngaˇ lonˉ gʼoˇ peˬ hkʼaw suh˗e tuˬ yoˬ tehꞈ yawˇ dawˇ ve laˇ? Yaˬhoˉvaˬ yawˇ htaꞈ baˬ taˉ laˇ˗oˬ ve tehꞈ yawˇ dawˇ ve laˇ? Chi Yoˇnaˆ kawˆ jaˇ.

6. Yoˇnaˆ liꞈ 2:1, 2, 7, hkʼaw kʼoˆ taˍ ve hkʼe, Yoˇnaˆ ngaˇ lonˉ gʼoˇ peˬ hkʼaw chehˇ htaˇ yawˇ awˬ gʼaˇ cawˬ tuˬ aˬ htoꞈ ma ga piˇ ve le?

⁶ Yoˇnaˆ yawˇ teˇ gʼaˇ tiˉ chehˇ htaˇ, awˬ gʼaˇ teˇ pawˆ kʼawꞈ cawˬ tuˬ hkʼaˬ hkʼe te ve le? Yawˇ Yaˬhoˉvaˬ geh bon lawˬ ve yoˬ. (Yoˇnaˆ 2:1, 2, 7 gʼaw sheˍ.) Yawˇ Yaˬhoˉvaˬ ve hkawˇ maˇ na yuˬ ve htawˇ, yawˇ venˇ baˆ dawˇ hpfuhˆ ve kʼo, Yaˬhoˉvaˬ yawˇ ve bon lawˬ hkawˇ htaꞈ na yuˬ laˇ tuˬ yoˬ tehꞈ yonˍ ve yoˬ. Chi hkʼoˆ kaꞈ, Yoˇnaˆ Liꞈ hpu laiˉ tawn htaꞈ kaꞈ dawˇ nyi ve yoˬ. Aˬ htoꞈ ma te chi hkʼe kʼoˆ gʼa ve le? Awˬ lawn kʼo, Yoˇnaˆ liꞈ kaˇ nanˉ uiˍ 2 hkʼaw yawˇ ve bon lawˬ hkawˇ leh Chiˇ mvuh ve liꞈ hkʼaw shuˍ daꞈ ve yoˬ. (Tawˇ pa haˉ te kʼo, Yoˇnaˆ 2:2, 5 leh Chiˇ mvuh ve 69:1; 86:7 htaꞈ tehˆ daꞈ sheˍ.) Yoˇnaˆ Liꞈ hpu awˬ tawn chi teˇ hpaˍ htaꞈ hkʼa dehꞈ shiˍ ve tehꞈ gʼa mawˬ ve yoˬ. Liꞈ hpu chi teˇ hpaˍ Yaˬhoˉvaˬ yawˇ htaꞈ ga laˇ gʼa ve tehꞈ yonˍ ve yoˬ. Yaˬhoˉvaˬ Yoˇnaˆ htaꞈ ga piˇ peuˬ hkʼawꞈ nawˉ, Yaˬhoˉvaˬ yawˇ htaꞈ awˬ vuiˬ te tcuh laˇ ve htaꞈ hkʼa dehꞈ te tuˬ yoˬ.—Yoˇnaˆ 2:10–3:4.

7-8. Tai˗wanˬ mvuhˇ miˬ lo chehˇ ve awˬ viˉ awˬ nyi hawˉ hkʼaˆ teˇ gʼaˇ shoꞈ shaꞈ ve gʼa hpuˇ htaˇ awˬ gʼaˇ cawˬ tuˬ aˬ htoꞈ ma ga piˇ ve le?

⁷ Ngaˬ hui a shaꞈ teꞈ kuiˬ hkʼaw shoꞈ shaꞈ ve laiˉ ceuˬ gʼa hpuˇ htaˇ, Yoˇnaˆ ve awˬ lawn ngaˬ hui htaꞈ ga laˇ gʼa ve yoˬ. Tai˗wanˬ mvuhˇ miˬ lo chehˇ ve awˬ viˉ awˬ nyi She˗mi b ve awˬ lawn htaꞈ teˇ geh nyi sheˍ. She˗mi naˬ jaˇ ve yoˬ. Chi hkʼe ceh tiˉ maˇ heˆ. Yehˬ kʼa hkʼaw ve chaw yawˇ htaꞈ tawˍ piˇ hehnˇ jaˇ ve gʼa yeunˇ hkanˍ ve yoˬ. She˗mi Yaˬhoˉvaˬ geh awˬ gʼaˇ gʼa tuˬ yawˇ bon lawˬ leh a shu yawˇ hkʼaˇ yawˇ Liꞈ hpu henˇ ve yoˬ. Yawˇ kʼoˆ ve, “teˇ pawˆ pawˆ kʼo shoꞈ shaꞈ ve gʼa hpuˇ htaˇ, ngaˬ dawˇ maˇ jaˇ ve pa taw, a shu yawˇ hkʼaˇ yawˇ Liꞈ hpu henˇ ve te maˇ gʼa. Ngaˬ nyi ma gawˬ lehˍ maˇ cawˬ ve yoˬ.” Yaꞈ hkʼaˇ, She˗mi awˬ gʼaˇ maˇ nuˇ. Yawˇ kʼoˆ ve, “chi hkʼe hpehꞈ htaˇ, ngaˬ te ve awˉ lawˉ teˇ ceuˬ lehˬ, Yaˬhoˉvaˬ geh bon lawˬ ve yoˬ. Tawˇ yaw tuˬ awˬ hkʼeun hkʼaw kʼa muiˬ hkawˇ hpaw leh naˍ pawˍ tcuhˉ na taˍ ve yoˬ. Teˇ pawˆ pawˆ kʼo, ngaˬ nyi ma gawˬ lehˍ cawˬ htaˇ hkʼa gaˬ, kʼa muiˬ hkawˇ hkʼaw ve liꞈ hkawˇ a yehˉ yahˉ gʼaꞈ kʼa ve yoˬ. Peuˬ hkʼawꞈ nawˉ, ngaˬ a shu yawˇ hkʼaˇ yawˇ Liꞈ hpu kʼawꞈ henˇ ve yoˬ.”

⁸ A shu yawˇ hkʼaˇ yawˇ Liꞈ hpu henˇ ve She˗mi awˬ gʼaˇ cawˬ tuˬ te piˇ ve yoˬ. Tawˇ pa haˉ te kʼo, yawˇ shawˆ hpeꞈ ve peuˬ hkʼawꞈ nawˉ, yawˇ awˬ suhˍ nyiˉ˗ehˍ ve maˇ lawꞈ ve pa taw, awˬ suhˍ gʼa keu cawˇ  ve tehꞈ yawˇ htaꞈ saˍ laꞈ gʼonˍ kʼoˆ piˇ ve yoˬ. Yaꞈ hkʼaˇ, yawˇ maˇ shawˆ hpeꞈ sheˍ teˇ haˉ htaˇ, yawˇ hkʼa shuˍ shawˆ hpeꞈ ve awˬ viˉ awˬ nyi yaˇ miˇ teˇ gʼaˇ ve awˬ lawn htaꞈ caˉ daꞈ ve liꞈ yawˇ gʼaw leh awˬ viˉ awˬ nyi yaˇ miˇ oˇ ve awˬ suhˍ nyiˉ˗ehˍ ve yawˇ hkʼe taw kaꞈ maˇ cawˬ maˇ ve yoˬ. Yaꞈ hkʼaˇ, yawˇ awˬ suhˍ maˇ keu leh na la vaiˇ ve yoˬ. Awˬ lawn chi ve She˗mi caˉ leh ka tiꞈ yeˬ gʼa tuˬ awˬ gʼaˇ cawˬ ve yoˬ.

9. Nawˬ shoꞈ shaꞈ ve gʼa hpuˇ jaˇ ve pa taw, awˬ gʼaˇ maˇ cawˬ tuˬ te laˇ ve kʼo, nawˬ hkʼaˬ hkʼe te cawˇ ve le? (Awˬ han htaꞈ nyi sheˍ.)

⁹ Nawˬ shoꞈ shaꞈ ve gʼa hpuˇ htaˇ, dawˇ haˍ jaˇ leh bon hkʼaˬ hkʼe lawˬ tuˬ maˇ shiˍ ve cawˬ jaw˗aw laˇ? Maˇ heˆ leh shoꞈ shaꞈ ve oˇ ve nawˬ a shu yawˇ hkʼaˇ yawˇ Liꞈ hpu henˇ maˇ gʼa tuˬ te laˇ jaw˗aw laˇ? Chi hkʼe hpehꞈ ve kʼo, nawˬ aˬ htoꞈ ma gʼa hpuˇ chehˇ ve Yaˬhoˉvaˬ hkʼa dehꞈ na gʼa ve tehꞈ tawnˇ taˍ sheˍ. Chi htaꞈ pa taw, nawˬ bon chi suhˉ˗ehˍ lawˬ ve htawˇ, nawˬ loˍ ve awˬ ceuˬ Yaˬhoˉvaˬ peꞈ laˇ tuˬ yoˬ tehꞈ yonˍ gʼa ve yoˬ. (Eˇfeˇsuꞈ 3:20) Yaꞈ hkʼaˇ, nawˬ naˬ ve, awˬ gʼaˇ maˇ cawˬ ve, maˇ heˆ leh nawˬ nyi ma naˬ jaˇ ve pa taw, Liꞈ hpu gʼaw tuˬ, maˇ heˆ leh a shu yawˇ hkʼaˇ yawˇ Liꞈ hpu henˇ maˇ gʼa ve kʼo, Liꞈ hpu gʼaw keu taˍ ve awˬ hkawˇ, maˇ heˆ leh Gʼuiˬ sha ve kanˉ hkʼaˇ hkʼaw ve liꞈ kʼoˆ teˇ hpaˍ awˬ hkawˇ gʼaw keu taˍ ve htaꞈ na gʼa ve yoˬ. Gʼuiˬ sha ve kanˉ hkʼaˇ gu teh taˍ laˇ ve liꞈ hkawˇ na ve, maˇ heˆ leh vehˆsaiˉ jw.org hkʼaw nyi gʼa ve yoˬ. Yaˬhoˉvaˬ gu teh taˍ laˇ ve awˬ ceuˬ teˇ hpaˍ lehˬ, nawˬ yawˇ geh bon lawˬ leh nawˬ bon lawˬ ve htaꞈ hkʼaˬ hkʼe hkʼawꞈ laˇ ve chaˬ nyi sheˍ. Chi hkʼe te ve kʼo, nawˬ awˬ gʼaˇ cawˬ la tuˬ Yaˬhoˉvaˬ ga laˇ tcuh gaˇ ve tehꞈ hpeuꞈ maw piˇ chehˇ ve yoˬ.

10. Ngaˬ hui awˬ gʼaˇ cawˬ tuˬ awˬ viˉ awˬ nyi hkʼaˬ hkʼe ga laˇ gʼa ve le?

¹⁰ Ngaˬ hui awˬ gʼaˇ cawˬ la tuˬ Yaˬhoˉvaˬ awˬ viˉ awˬ nyi htaꞈ cuˇ leh ga laˇ gʼa ve yoˬ. Ngaˬ hui shoꞈ shaꞈ ve, maˇ heˆ leh Gʼuiˬ sha ve kanˉ te ve haˍ ve gʼa hpuˇ htaˇ, yawˇ hui ‘ngaˬ hui htaꞈ maˇ maˇ dawˇ sha la tuˬ’ awˬ gʼaˇ peꞈ laˇ gʼa ve yoˬ. (Kawˇlawˇsehˇ 4:10, 11) Ngaˬ hui “loˍ htaˇ” awˬ chawˇ ga laˇ tuˬ loˍ ve yoˬ. (Tawˇ naˉ ve 17:17) Ngaˬ hui awˬ gʼaˇ nuˇ htaˇ, ngaˬ hui loˍ ve awˬ ceuˬ awˬ viˉ awˬ nyi ga laˇ ve, awˬ gʼaˇ peꞈ laˇ leh Yaˬhoˉvaˬ ve kanˉ ka tiꞈ yeˬ ve hkʼaw caˉ leh te gʼa tuˬ awˬ gʼaˇ peꞈ laˇ gʼa ve yoˬ. Awˬ nu ve chaw ga laˇ tcuh ve lehˬ, Yeˍsuˆ ve awˬ e Maˍriˆ awˬ gʼaˇ cawˬ tuˬ hkʼaˬ hkʼe ga piˇ ve htaꞈ teˇ geh nyi sheˍ.—Luˉkaꞈ 1:26-33.

11. Maˍriˆ awˬ gʼaˇ cawˬ tuˬ aˬ htoꞈ ma te ga laˇ ve htaꞈ loˍ ve le?

¹¹ Maˍriˆ awˬ gʼaˇ cawˬ tuˬ ga laˇ ve htaꞈ loˍ ve yoˬ. Mvuhˇ naw ma tcuh yaˇ Gaˍbeˍlaˆ Maˍriˆ awˬ hpawˇ maˇ heuˆ sheˍ ve kaꞈ yaˇ hu la tuˬ yoˬ tehꞈ kʼoˆ piˇ htaˇ,  yawˇ hkʼaˬ hkʼe taw dawˇ haˍ ve htaꞈ dawˇ nyi sheˍ. Leh yawˇ yaˇ maˇ cawˬ jaw sheˍ. Yaꞈ hkʼaˇ, awˬ gʼuˇ suhˍ hpawˇ Meˍsiˉyaꞈ hpehꞈ tuˬ ve yaˇ teˇ gʼaˇ htaꞈ yawˇ gʼa nyi haꞈ shaˉ ve yoˬ. Chi hkʼe ceh tiˉ maˇ heˆ. Maˍriˆ hawˉ hkʼaˆ geh kaꞈ maˇ zuhꞈ jaw sheˍ. Yaꞈ hkʼaˇ, yawˇ yaˇ hu ve tehꞈ yawˇ ve chaw haˉ paˍ Yoˇsehꞈ htaꞈ gʼa kʼoˆ piˇ cawˇ ve yoˬ. Chi hkʼe kʼoˆ piˇ ve lehˬ sha ve maˇ heˆ.—Luˉkaꞈ 1:26-33.

12. Luˉkaꞈ liꞈ 1:39-45 hkʼaw kʼoˆ taˍ ve hkʼe, Maˍriˆ awˬ gʼaˇ cawˬ tuˬ aˬ htoꞈ ma ga piˇ ve le?

¹² Maˍriˆ maˇ te jaw ve awˬ vuiˬ htaꞈ te leh maˇ sha ve awˬ lawn htaꞈ te tuˬ, awˬ gʼaˇ cawˬ tuˬ aˬ htoꞈ ma ga piˇ ve le? Maˍriˆ awˬ nu ve chaw ga laˇ tcuh ve yoˬ. Tawˇ pa haˉ te kʼo, Maˍriˆ yawˇ ve awˬ vuiˬ chi htaꞈ caˉ daꞈ ve hkʼa dehꞈ te gʼa tuˬ mvuhˇ naw ma tcuh yaˇ Gaˍbeˍlaˆ kʼoˆ laˇ tuˬ lawˬ ve yoˬ. (Luˉkaꞈ 1:34) Peuˬ hkʼawꞈ nawˉ, Maˍriˆ yawˇ ve awˬ viˉ awˬ nyi Eˇliˇsaˍbehˆ geh kʼai tuˬ Yuˇdaꞈ mvuhˇ miˬ hkʼaw hkʼoˆ lawˬ hkʼoˆ lo cawˬ ve venˇ teˇ venˇ lo yawˇ kʼai ve yoˬ. Maˍriˆ Eˇliˇsaˍbehˆ geh kʼai ve awˬ gʼaˇ gʼa jaˇ ve yoˬ. Maˍriˆ gʼoˇ peˬ hkʼaw hu taˍ ve Yaˇ paˍ htaꞈ caˉ daꞈ ve tcuh kaˍ paˍ ve tawˇ hkawˇ kʼoˆ leh Yaˬhoˉvaˬ dawˇ pawnˍ laˇ ve htaꞈ gʼa ve tehꞈ Eˇliˇsaˍbehˆ Maˍriˆ htaꞈ chiˇ mvuh piˇ ve yoˬ. (Luˉkaꞈ 1:39-45 gʼaw sheˍ.) Maˍriˆ Yaˬhoˉvaˬ htaꞈ kʼoˆ piˇ ve, nawˬ “kanˇ paˆ uiˍ ve htaꞈ te taˍ peuˬ.” (Luˉkaꞈ 1:46-51) Maˍriˆ awˬ gʼaˇ cawˬ la tuˬ Yaˬhoˉvaˬ lehˬ mvuhˇ naw ma tcuh yaˇ Gaˍbeˍlaˆ leh Eˇliˇsaˍbehˆ htaꞈ cuˇ ve tehꞈ hkʼa tawˍ lehˆ gʼa mawˬ ve yoˬ.

13. Boˬliˇviˇ˗aˇ mvuhˇ miˬ lo chehˇ ve awˬ viˉ awˬ nyi yaˇ miˇ awˬ viˉ awˬ nyi ga laˇ tuˬ lawˬ htaˇ awˬ bon hkʼaˬ hkʼe gʼa ve le?

¹³ Awˬ viˉ awˬ nyi nawˬ awˬ gʼaˇ cawˬ la tuˬ ga laˇ gʼa ve yoˬ. Maˍriˆ awˬ gʼaˇ cawˬ la tuˬ awˬ nu ve chaw ga laˇ tcuh ve yoˬ. Chi ve hkʼa shuˍ, Boˬliˇviˇ˗aˇ mvuhˇ miˬ lo chehˇ ve awˬ viˉ awˬ nyi Da˗su˗ri kaꞈ awˬ nu ve chaw ga piˇ ve htaꞈ gʼa ve yoˬ. Da˗su˗ri awˬ pa na jaˇ ve pa taw, naˆ tsuhˇ yehˬ hkʼaw gʼa zuhꞈ leh yawˇ maˇ gʼa chehˇ maw˗o tehꞈ saˍ laꞈ gʼonˍ chaˬ nyi mawˬ leh kʼoˆ piˇ ve yoˬ. Oˇ ve teˇ yanˇ Da˗su˗ri awˬ pa htaꞈ nyi haꞈ shaˉ ve yoˬ. (1 Tiˆmoˉseˍ 5:4) Chi hkʼe te ve maˇ sha ve yoˬ. Yawˇ kʼoˆ ve, “laiˉ pawˆ kʼo ngaˬ dawˇ maˇ tawˆ˗o tehꞈ dawˇ ve yoˬ.” Da˗su˗ri awˬ nu ve chaw ga laˇ tuˬ lawˬ˗aw laˇ? Awˉ lawˉ htaˇ yawˇ maˇ lawˬ. Yawˇ kʼoˆ ve, “ngaˬ awˬ viˉ awˬ nyi htaꞈ maˇ shoꞈ shaꞈ piˇ gaˇ ve yoˬ. Ngaˬ htaꞈ ga laˇ gʼa jaˇ ve lehˬ, Yaˬhoˉvaˬ hpehꞈ ve tehꞈ dawˇ ve yoˬ. Awˬ viˉ awˬ nyi ngaˬ htaꞈ maˇ ga laˇ tcuh ve kʼo, shoꞈ shaꞈ ve htaꞈ ngaˬ teˇ gʼaˇ tiˉ coˇ caˇ leh gu chehˇ ve tehꞈ dawˇ ve yoˬ.” (Tawˇ naˉ ve 18:1) Da˗su˗ri dawˇ cheˆ leh awˬ viˉ awˬ nyi teˇ hpaˍ hpaˍ geh liꞈ bvuhꞈ kʼai leh yawˇ shoꞈ shaꞈ ve hkʼaˬ hkʼe taw gʼa hpuˇ chehˇ ve kʼoˆ maˍ piˇ ve yoˬ. Yawˇ kʼoˆ ve, “ngaˬ awˬ gʼaˇ cawˬ tuˬ awˬ viˉ awˬ nyi ga laˇ jaˇ ve yoˬ. Chi ngaˬ nyi ma hkʼaw gaˬ jaˇ leh hkʼaˬ hkʼe kʼoˆ tuˬ maˇ shiˍ. Yawˇ hui naˆ tsuhˇ yehˬ lo ngaˬ htaꞈ caˇ tuˬ yuˬ veu laˇ ve, awˬ gʼaˇ peꞈ laˇ tuˬ Liꞈ hpu awˬ tawn bvuhꞈ laˇ ve, ngaˬ teˇ gʼaˇ tiˉ chehˇ ve maˇ heˆ tehꞈ shiˍ htaˇ, awˬ gʼaˇ gʼa jaˇ ve yoˬ. Yaˬhoˉvaˬ htaꞈ haꞈ ve yehˬ kʼa lonˉ cawˬ ve, ga daꞈ tuˬ ve yehˬ kʼa lonˉ cawˬ ve, teˇ geh hawˬ ve, teˇ gʼaˇ leh teˇ gʼaˇ awˬ gʼaˇ piˇ daꞈ ve yoˬ.”

14. Nyi haꞈ shaˉ paˍ ga laˇ tuˬ aˬ htoꞈ ma te ngaˬ hui lawˬ cawˇ ve le?

¹⁴ Ngaˬ hui awˬ gʼaˇ cawˬ la leh nyi ma sha tuˬ, Yaˬhoˉvaˬ ga laˇ gʼa ve awˬ ceuˬ lehˬ, nyi haꞈ shaˉ paˍ laꞈ shawnˍ hkʼe hpehꞈ ve htaꞈ cuˇ ve yoˬ. (Iˉsaˍyaˆ 32:1, 2) Chi htaꞈ pa taw, nawˬ dawˇ haˍ ve kʼo, nawˬ hkʼaˬ hkʼe dawˇ haˍ ve nyi haꞈ shaˉ paˍ htaꞈ kʼoˆ maˍ piˇ leh yawˇ ga laˇ tuˬ kʼoˆ laˇ htaˇ haꞈ yuˬ sheˍ. Nawˬ awˬ gʼaˇ cawˬ la tuˬ Yaˬhoˉvaˬ lehˬ yawˇ hui htaꞈ yehˇ ve yoˬ.

15. Hkriꞈ yaˇ teˇ gʼaˇ le le dawˇ law kuiˬ aˬ htoꞈ ma cawˬ ve le?

¹⁵ Liꞈ hpu hkʼaw ve dawˇ law kuiˬ ngaˬ hui awˬ gʼaˇ cawˬ tuˬ te laˇ gʼa ve yoˬ. (Roˉmaꞈ 4:3, 18-20) Hkriꞈ yaˇ teˇ hpaˍ kʼo miˬ guiˬ hkʼoˆ lo co co taiˍ taiˍ chehˇ tuˬ dawˇ law kuiˬ cawˬ ve yoˬ. Leh teˇ hpaˍ kʼo, mvuhˇ naw ma hkʼoˆ lo co co taiˍ taiˍ chehˇ tuˬ dawˇ law kuiˬ cawˬ ve yoˬ. Dawˇ law kuiˬ lehˬ ngaˬ hui shoꞈ shaꞈ ve htaꞈ yeunˇ hkanˍ gʼaˇ tuˬ ga laˇ ve, daꞈ ve awˬ lawn sha tanˇ hto toˇ tuˬ ga laˇ ve, leh Hkriꞈ yaˇ awˬ moˍ hkʼaw awˬ vuiˬ teˇ hpaˍ htaꞈ te gʼa tuˬ kaꞈ ga laˇ ve yoˬ. (1 Hteˇsaˍlawˇniˆ 1:3) Dawˇ law kuiˬ chi hkʼe ve Pawˇluꞈ awˬ gʼaˇ cawˬ tuˬ kaꞈ gʼa piˇ gʼa ve yoˬ.

16. Tcuh yaˇ Pawˇluꞈ awˬ gʼaˇ cawˬ tuˬ aˬ htoꞈ ma te ga laˇ ve htaꞈ loˍ ve le?

 ¹⁶ Pawˇluꞈ awˬ gʼaˇ cawˬ tuˬ ga laˇ ve htaꞈ loˍ ve yoˬ. Yawˇ Kawˇrenˍhtuˆ Hkriꞈ yaˇ awˬ moˍ htaꞈ liꞈ bvuhꞈ piˇ ve hkʼaw yawˇ awˬ to jeꞈ muꞈ hkʼu htaꞈ shuˍ ve tehꞈ kʼoˆ ve yoˬ. Yawˇ “nyiˉ tiˍ taˍ laˇ ve”, “dawˇ maˇ tawˆ ve”, “fawˉ mehˍ laˇ ve” leh “shu dawˆ baˬ laˇ ve” suh la paˇ neˇ ve kaꞈ gʼa hpuˇ ve yoˬ. (2 Kawˇrenˍhtuˆ 4:8-10) Pawˇluꞈ liꞈ chi bvuhꞈ ve yawˇ Miˍshenˍnaˍliˍ te ve 3 pawˆ teˇ pawˆ htaˇ hpehꞈ ve yoˬ. Oˇ ve teˇ yanˇ yawˇ shoꞈ shaꞈ ve gʼa hpuˇ chehˇ sheˍ ve tehꞈ maˇ shiˍ ve yoˬ hehˉ. Chaw haiˬ awˬ moˍ hehnˇ ve awˬ ceuˬ te ve, shu hpeh tiˍ piˇ ve, heuˇ shan hpawˇ luˬ kʼai ve, leh hkawnˍ hkʼaw lo kaꞈ gʼa chehˇ ve, chi teˇ hpaˍ yawˇ gʼa hpuˇ ve yoˬ.

17. 2 Kawˇrenˍhtuˆ liꞈ 4:16-18 hkʼaw kʼoˆ taˍ ve hkʼe, Pawˇluꞈ tuꞈ ve hkanˍ ve htaꞈ yeunˇ hkanˍ gʼaˇ tuˬ aˬ htoꞈ ma ga piˇ ve le?

¹⁷ Pawˇluꞈ awˬ gʼuˇ suhˍ hpawˇ yawˇ ve dawˇ law kuiˬ htaꞈ hkʼaˬ htaˆ kaꞈ dawˇ nyi ve pa taw, awˬ gʼaˇ cawˬ ve yoˬ. (2 Kawˇrenˍhtuˆ 4:16-18 gʼaw sheˍ.) Yawˇ Kawˇrenˍhtuˆ venˇ hkʼaw ve awˬ viˉ awˬ nyi htaꞈ kʼoˆ piˇ ve, yawˇ ve “awˬ suhˍ awˬ shaˍ hpawˇ luˬ kʼai chehˇ ve htawˇ” chi ve yawˇ awˬ gʼaˇ nuˇ tuˬ maˇ te laˇ tcuh. Pawˇluꞈ awˬ gʼuˇ suhˍ hpawˇ ve dawˇ law kuiˬ htaꞈ hkʼaˬ htaˆ kaꞈ dawˇ nyi chehˇ ve yoˬ. Leh mvuhˇ naw ma hkʼoˆ lo yawˇ ve dawˇ law kuiˬ lehˬ, “uiˍ jaˇ biˇ jaˇ ve co co taiˍ taiˍ awˬ meꞈ awˬ hponˇ” hpehꞈ ve yoˬ. Chi ve yawˇ gʼa hpuˇ ve tuꞈ ve hkanˍ ve teˇ ceuˬ le le htaꞈ yeunˇ hkanˍ gʼaˇ tuˬ te piˇ ve yoˬ. Dawˇ law kuiˬ chi ve htaꞈ Pawˇluꞈ dawˇ nyi ve pa taw, “teˇ nyi peuˬ teˇ nyi” awˬ gʼaˇ kʼawꞈ cawˬ la ve yoˬ.

18. Dawˇ law kuiˬ lehˬ Hti˗ho˗mi leh yawˇ ve yehˬ kʼa hkʼaw ve chaw awˬ gʼaˇ cawˬ tuˬ hkʼaˬ hkʼe ga piˇ ve le?

¹⁸ Buˬgeˇriˇ˗aˇ mvuhˇ miˬ lo chehˇ ve awˬ viˉ awˬ nyi hawˉ hkʼaˆ Hti˗ho˗mi awˬ gʼuˇ suhˍ hpawˇ ve dawˇ law kuiˬ htaꞈ dawˇ nyi ve pa taw, yawˇ awˬ gʼaˇ cawˬ ve yoˬ. Peuˬ laˬ ve laiˉ hkʼawꞈ htaˇ, yawˇ ve awˬ nyi paˍ Da˗konˇ maˇ dawˇ maˇ gaˇ ve hkʼaw gʼa hpuˇ ve pa taw suh˗e ve yoˬ. Chi Hti˗ho˗mi nyi ma luˬ jaˇ ve yoˬ. Awˬ lawn chi ve htaꞈ yeunˇ hkanˍ gʼa tuˬ, kʼawꞈ teꞈ tu la ve awˬ yanˇ htaˇ, a shaꞈ teꞈ hkʼaˇ hkʼaˬ hkʼe hpehꞈ tuˬ ve htaꞈ Hti˗ho˗mi leh yehˬ kʼa hkʼaw ve chaw hkʼa dehꞈ dawˇ nyi ve yoˬ. Yawˇ kʼoˆ ve, “Da˗konˇ htaꞈ hkʼaˬ kaˬ lo ca mawˬ daꞈ˗e tuˬ le, leh yawˇ htaꞈ aˬ htoꞈ ma te caˍ piˇ tuˬ ngaˬ hui yaw daꞈ ve yoˬ. Yawˇ htaꞈ haꞈ yuˬ piˇ tuˬ hti caˇ hti dawˬ ve pawehˇ te htaˇ, ngaˬ hui a shu htaꞈ jehˬ piˇ tuˬ ve, awˬ leh meuˇ ve awˬ lawn htaꞈ caˉ daꞈ ve ngaˬ hui yawˇ htaꞈ aˬ htoꞈ ma ve kʼoˆ maˍ piˇ tuˬ yaw daꞈ ve yoˬ.” Hti˗ho˗mi kʼoˆ ve, dawˇ law  kuiˬ htaꞈ hkʼaˬ htaˆ kaꞈ dawˇ nyi ve lehˬ, yawˇ leh yehˬ kʼa hkʼaw ve chaw awˬ gʼaˇ cawˬ tuˬ ga laˇ ve yoˬ. Yawˇ ve awˬ nyi paˍ htaꞈ Yaˬhoˉvaˬ kʼawꞈ teꞈ tu la piˇ htaˇ hkʼa gaˬ yeunˇ hkanˍ leh law chehˇ ve yoˬ.

19. Nawˬ ve dawˇ law kuiˬ htaꞈ nawˬ hkʼa tawˍ lehˆ mawˬ gʼa tuˬ hkʼaˬ hkʼe te gʼa ve le? (Awˬ han htaꞈ nyi sheˍ.)

¹⁹ Nawˬ ve dawˇ law kuiˬ hkʼa tawˍ lehˆ mawˬ gʼa tuˬ hkʼaˬ hkʼe te gʼa ve le? Miˬ guiˬ hkʼoˆ lo nawˬ co co taiˍ taiˍ chehˇ tuˬ dawˇ law kuiˬ cawˬ ve kʼo, miˬ guiˬ awˬ suhˉ ve awˬ lawn Liꞈ hpu hkʼaw hkʼaˬ hkʼe kʼoˆ taˍ ve htaꞈ gʼaw sheˍ. Leh awˬ lawn chi ve htaꞈ hkʼa dehꞈ dawˇ nyi sheˍ. (Iˉsaˍyaˆ 25:8; 32:16-18) Miˬ guiˬ awˬ suhˉ hkʼaw a shaꞈ teꞈ hkʼaˇ hkʼaˬ hkʼe hpehꞈ tuˬ ve htaꞈ dawˇ mawˬ nyi sheˍ. A shu htaꞈ nawˬ gʼa mawˬ daꞈ tuˬ dawˇ nyi sheˍ. Aˬ htoꞈ ma ve awˬ hkawˇ htaꞈ nawˬ gʼa kaˇ tuˬ le? Nawˬ hkʼaˬ hkʼe dawˇ tuˬ le? Hkʼa sha sha˗ehꞈ ve awˬ han htaꞈ nawˬ dawˇ mawˬ gʼa tuˬ ga laˇ gʼa ve lehˬ, Gʼuiˬ sha ve kanˉ hkʼaˇ liꞈ kʼoˆ hkʼaw Miˬ guiˬ awˬ suhˉ gaˬ la˗o, Gaˬ˗e la yoˬ, Oˇ ve teˇ yanˇ htaꞈ dawˇ mawˬ sheˍ awˬ han nyi ve, maˇ heˆ leh liꞈ hkawˇ VDO teˇ hpaˍ htaꞈ kaꞈ na sheˍ. Miˬ guiˬ awˬ suhˉ htaꞈ caˉ daꞈ ve ngaˬ hui hkʼaˬ htaˆ kaꞈ dawˇ nyi ve kʼo, chi teˇ hkui ngaˬ hui gʼa hpuˇ chehˇ ve shoꞈ shaꞈ ve lehˬ “i jaˇ” ve ceh hpehꞈ ve yoˬ. (2 Kawˇrenˍhtuˆ 4:17) Yaˬhoˉvaˬ nawˬ htaꞈ dawˇ law kuiˬ peꞈ laˇ ve lehˬ nawˬ awˬ gʼaˇ cawˬ tuˬ te laˇ ve yoˬ.

20. Ngaˬ hui awˬ gʼaˇ maˇ cawˬ htaˇ awˬ gʼaˇ kʼawꞈ cawˬ tuˬ hkʼaˬ hkʼe gʼa te cawˇ ve le?

²⁰ Ngaˬ hui hkʼaˬ hkʼe htaˇ awˬ gʼaˇ maˇ cawˬ leh, ‘Gʼuiˬ sha ngaˬ hui geh chehˇ taˍ ve kʼo, awˬ gʼaˇ gʼa tuˬ’ yoˬ tehꞈ tawnˇ taˍ sheˍ. (Chiˇ mvuh ve 108:13) Ngaˬ hui awˬ gʼaˇ cawˬ tuˬ Yaˬhoˉvaˬ hkʼa peu˗eˬ gu teh laˇ peuˬ˗oˬ ve yoˬ. Chi htaꞈ pa taw, Gʼuiˬ sha ve kanˉ hkʼa dehꞈ te gʼa tuˬ, tuꞈ ve hkanˍ ve htaꞈ yeunˇ hkanˍ gʼaˇ tuˬ, hkʼaˬ htaˆ kaꞈ ha lehˬ ve cawˬ gʼa tuˬ, ga laˇ tuˬ loˍ htaˇ nawˬ Yaˬhoˉvaˬ geh bon lawˬ leh a shu yawˇ hkʼaˇ yawˇ Liꞈ hpu henˇ sheˍ. Chi ve teˇ hpaˍ Yaˬhoˉvaˬ nawˬ htaꞈ hkʼaˬ hkʼe ga laˇ chehˇ ve htaꞈ shiˍ tuˬ yoˬ. Awˬ viˉ awˬ nyi nawˬ htaꞈ ga laˇ ve htaꞈ kaꞈ haꞈ yuˬ sheˍ. Leh nawˬ ve dawˇ law kuiˬ hkʼaˬ htaˆ kaꞈ hkʼa tawˍ lehˆ mawˬ tuˬ te sheˍ. Nawˬ chi hkʼe te ve kʼo, ‘Gʼuiˬ sha ve awˬ meꞈ awˬ hponˇ kanˇ paˆ uiˍ ve pa taw, nawˬ ha lehˬ ha kʼa ve awˬ hkʼaw lo nyi ma yeˬ leh yeunˇ hkanˍ puiˉ tuˬ yoˬ.’—Kawˇlawˇsehˇ 1:11.