1-2. (a) Ngaˬ hui teˇ nyi le le ponˬ gʼa tuˬ aˬ htoꞈ ma ga laˇ ve le? Tawˇ pa haˉ kʼoˆ maˍ laˇ sheˍ. (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

 Nawˬ a shaꞈ teꞈ kuiˬ hkʼaw shoꞈ shaꞈ ve gʼa hpuˇ htaˇ, chi hkʼe dawˇ jaw˗aw laˇ? “Ngaˬ hkʼaˇ ngaˬ gu maˇ gʼa taˬ.” Laiˉ gʼaˇ kaꞈ chi hkʼe dawˇ jaw ve yoˬ. Nawˬ naˬ ve maˇ heˆ leh haꞈ ve chaw suh˗e htaˇ, nawˬ teˇ pawˆ pawˆ kʼo chi hkʼe dawˇ tuˬ yoˬ. Yaˬhoˉvaˬ ve daꞈ kehˬ ve awˬ ha hpu “uiˍ jaˇ daꞈ jaˇ ve kanˇ paˆ” ga laˇ ve pa taw, nawˬ teˇ nyi le le shoꞈ shaꞈ ve htaꞈ yeunˇ hkanˍ gʼaˇ ve tehꞈ dawˇ ve yoˬ.—2 Kawˇrenˍhtuˆ 4:7-9.

² Chi hkʼoˆ kaꞈ, haiˬ jaˇ ve miˬ guiˬ chi htaꞈ tawˍ daꞈ gʼaˇ tuˬ daꞈ kehˬ ve awˬ ha hpu htaꞈ gʼa cuˇ ve yoˬ. (1 Yoˇhanˬ 5:19) Ngaˬ hui “haiˬ ve awˬ ha teˇ hpaˍ” htaꞈ kaꞈ gʼa tawˍ daꞈ ve yoˬ. (Eˇfeˇsuꞈ 6:12) Ngaˬ hui chi ve teˇ hpaˍ htaꞈ tawˍ daꞈ gʼaˇ tuˬ daꞈ kehˬ ve awˬ ha hpu ga laˇ ve 2 hkʼaˇ htaꞈ teˇ geh henˇ tuˬ yoˬ. Chi hkʼoˆ kaꞈ, daꞈ kehˬ ve awˬ ha hpu geh awˬ bon maˇ maˇ gʼa tuˬ hkʼaˬ hkʼe gʼa te cawˇ ve kaꞈ henˇ tuˬ yoˬ.

3. Ngaˬ hui shoꞈ shaꞈ ve htaꞈ yeunˇ hkanˍ gʼaˇ tuˬ Yaˬhoˉvaˬ ga laˇ ve awˬ hkʼaˇ teˇ hkʼaˇ lehˬ aˬ htoꞈ ma le?

³ Ngaˬ hui shoꞈ shaꞈ ve laiˉ ceuˬ gʼa hpuˇ ve htawˇ, Yaˬhoˉvaˬ ve kanˉ te biˇ gʼa tuˬ daꞈ kehˬ ve awˬ ha hpu ga laˇ ve yoˬ. Pawˇluꞈ shoꞈ shaꞈ ve laiˉ ceuˬ gʼa hpuˇ ve htawˇ, “Hkriꞈ ve kanˇ paˆ” htaꞈ cuˇ ve pa taw, caˉ leh Gʼuiˬ sha ve kanˉ te gʼa ve yoˬ. (2 Kawˇrenˍhtuˆ 12:9) Yawˇ miˍshenˍnaˍliˍ te ve 2 pawˆ teˇ pawˆ htaˇ, yawˇ bon maˍ ve ceh tiˉ maˇ te. Yaꞈ hkʼaˇ, yawˇ awˬ to htaꞈ hu tuˬ kanˉ kaꞈ gʼa te ve yoˬ. Kawˇrenˍhtuˆ venˇ hkʼaw Aˍkuˉlaˆ leh Piˇkiˇlaˆ aˉ hkʼaw Pawˇluꞈ haˉ ve yoˬ. Yawˇ huiˉ maˬ Pawˇluꞈ hkʼa shuˍ hpa aˉ po kʼo tawˉ ve yoˬ. Teˇ nyi nyi kʼo Pawˇluꞈ yawˇ huiˉ maˬ geh kanˉ te ve yoˬ. (Tcuh yaˇ 18:1-4) Pawˇluꞈ awˬ to htaꞈ hu tuˬ kanˉ gʼa te ve leh Gʼuiˬ sha ve kanˉ te biˇ gʼa tuˬ daꞈ kehˬ ve awˬ ha hpu ga piˇ ve yoˬ.

4. 2 Kawˇrenˍhtuˆ liꞈ 12:7-9 hkʼaw kʼoˆ taˍ ve hkʼe, Pawˇluꞈ aˬ htoꞈ ma htaꞈ gʼa tawˍ daꞈ ve le?

 ⁴ 2 Kawˇrenˍhtuˆ liꞈ 12:7-9 gʼaw sheˍ. Pawˇluꞈ ‘awˬ suhˍ awˬ shaˍ hpawˇ aˉ chuˇ teˇ maˬ tcuhˍ laˇ’ ve htaꞈ tawˍ daꞈ ve kʼoˆ htaˇ, hkʼaˬ hkʼe kʼoˆ gaˇ ve le? Nawˬ awˬ to teˇ to htaꞈ aˉ chuˇ tcuhˍ laˇ htaˇ, hkʼaˬ hkʼe taw naˬ ve dawˇ nyi sheˍ. Yawˇ shoꞈ shaꞈ ve gʼa hpuˇ leh hpehꞈ bawˬ jaˇ. Chi “Saˍtanˍ ve tcuh yaˇ” leh “fawˉ mehˍ laˇ chehˇ ve” tehꞈ yawˇ kʼoˆ ve yoˬ. Saˍtanˍ leh neˇ teˇ hpaˍ Pawˇluꞈ htaꞈ shoꞈ shaꞈ ve hteˇ˗ehꞈ maˇ gʼa te piˇ ve htawˇ, yawˇ hui Pawˇluꞈ htaꞈ aˉ chuˇ juˆ piˇ ve htaꞈ shuˍ ve yoˬ. Yaꞈ hkʼaˇ, neˇ teˇ hpaˍ Pawˇluꞈ gʼa hpuˇ ve htaꞈ mawˬ htaˇ, aˉ chuˇ oˇ ve gʼaˇ hteꞈ kʼawꞈ tcuhˍ tuˬ caꞈ keu piˇ ve hkʼa shuˍ, shoꞈ shaꞈ ve oˇ ve gʼaˇ hteꞈ kʼawꞈ cawˬ tcuh ve yoˬ. Pawˇluꞈ hkʼaˬ hkʼe te ve le?

5. Yaˬhoˉvaˬ Pawˇluꞈ ve bon lawˬ hkawˇ htaꞈ hkʼaˬ hkʼe hkʼawꞈ piˇ ve le?

⁵ Awˉ lawˉ htaˇ Pawˇluꞈ “aˉ chuˇ” yuˬ tawˆ gaˇ ve yoˬ. Yawˇ kʼoˆ ve, ‘aˉ chuˇ chi htaꞈ gʼa ponˬ tuˬ [Yaˬhoˉvaˬ] geh 3 pawˆ hkʼa gaˬ lawˬ hkawˉ ve yoˬ.’ Yaꞈ hkʼaˇ, Pawˇluꞈ bon 3 pawˆ lawˬ ve htawˇ, aˉ chuˇ cawˬ sheˍ. Chi kʼoˆ gaˇ ve lehˬ Yaˬhoˉvaˬ yawˇ ve bon lawˬ hkawˇ htaꞈ maˇ hkʼawꞈ piˇ ve laˇ? Maˇ heˆ. Hkʼawꞈ piˇ ve yoˬ. Yawˇ Pawˇluꞈ ve shoꞈ shaꞈ ve mehˉ kʼai tuˬ maˇ te piˇ ve htawˇ, yeunˇ hkanˍ gʼaˇ tuˬ awˬ gʼaˇ piˇ ve yoˬ. Gʼuiˬ sha kʼoˆ ve, “awˬ gʼaˇ nuˇ ve teˇ kaˬ awˬ hkʼaw lo ngaˬ ve kanˇ paˆ biˇ la ve yoˬ.” (2 Kawˇrenˍhtuˆ 12:8, 9) Gʼuiˬ sha Pawˇluꞈ htaꞈ ga piˇ ve pa taw, yawˇ ha lehˬ leh nyi ma gawˬ lehˍ cawˬ leh awˬ gʼaˇ cawˬ la ve yoˬ!—Hpiˇliˇpiˆ 4:4-7.

6. (a) Yaˬhoˉvaˬ nawˬ ve bon lawˬ hkawˇ htaꞈ hkʼaˬ hkʼe hkʼawꞈ laˇ tuˬ le? (b) Chi teˇ tawn hkʼaw Liꞈ hpu awˬ tawn hkʼaˬ ve teˇ tawn nawˬ htaꞈ awˬ gʼaˇ peꞈ laˇ ve le?

⁶ Pawˇluꞈ hkʼa shuˍ nawˬ ve shoꞈ shaꞈ ve Yaˬhoˉvaˬ yuˬ baˬ laˇ tuˬ lawˬ jaw˗aw laˇ? Nawˬ bon laiˉ pawˆ lawˬ ve htawˇ, shoꞈ shaꞈ ve cawˬ maˇ jaˇ sheˍ. Teˇ pawˆ pawˆ kʼo, Yaˬhoˉvaˬ nawˬ htaꞈ maˇ dawˇ cawˇ ve kaꞈ dawˇ puiˉ ve yoˬ. Chi hkʼe dawˇ ve kʼo, Pawˇluꞈ htaꞈ dawˇ nyi sheˍ. Yaˬhoˉvaˬ Pawˇluꞈ ve bon lawˬ hkawˇ htaꞈ hkʼawꞈ piˇ ve kʼo, nawˬ ve bon lawˬ hkawˇ htaꞈ kaꞈ hkʼawꞈ laˇ tuˬ yoˬ. Yaˬhoˉvaˬ shoꞈ shaꞈ ve peuˬ tuˬ maˇ te laˇ. Yaꞈ hkʼaˇ, yawˇ ve daꞈ kehˬ ve awˬ ha hpu nawˬ yeunˇ hkanˍ gʼaˇ tuˬ ga laˇ tuˬ yoˬ. (Chiˇ mvuh ve 61:3, 4) Nawˬ “shu dawˆ baˬ laˇ ve htawˇ” Yaˬhoˉvaˬ nawˬ htaꞈ maˇ baˬ taˉ laˇ.—2 Kawˇrenˍhtuˆ 4:8, 9; Hpiˇliˇpiˆ 4:13.

7-8. (a) Daꞈ kehˬ ve awˬ ha hpu mvuhˇ haw htaꞈ hkʼaˬ hkʼe shuˍ ve le? (b) Peˍtruˆ daꞈ kehˬ ve awˬ ha hpu kanˉ te ve htaꞈ hkʼaˬ hkʼe kʼoˆ ve le?

⁷ Daꞈ kehˬ ve awˬ ha hpu hkʼaˬ hkʼe hpawˇ ga laˇ sheˍ ve le? Laˇ tsuhˇ gʼuiˬ hkʼaw gʼuiˬ baˇ uiˍ jaˇ ve htawˇ mvuhˇ haw hpawˇ cawˇ ve kʼo, heuˇ shan hpawˇ kawˆ tuˬ maˇ cawˬ leh teˇ hpawˇ lo gaˬ tuˬ yoˬ. Chi ve hkʼa shuˍ ngaˬ hui shoꞈ shaꞈ ve gʼa hpuˇ ve htawˇ daꞈ kehˬ ve awˬ ha hpu ga laˇ ve kʼo, Gʼuiˬ sha ka tiꞈ te taˍ ve miˬ guiˬ awˬ suhˉ hkʼaw gaˬ tuˬ yoˬ.

⁸ Tcuh yaˇ Peˍtruˆ ngaˇ ca paˍ hpehꞈ ve pa taw, heuˇ shan hpawˇ gʼaꞈ ve awˬ hkʼaˇ shiˍ ve yoˬ. Daꞈ kehˬ ve awˬ ha hpu kanˉ te ve lehˬ heuˇ shan hpawˇ gʼaꞈ ve htaꞈ shuˍ ve yoˬ. Yawˇ kʼoˆ ve, ‘Gʼuiˬ sha ve tcuh kaˍ paˍ teˇ hpaˍ lehˬ, yawˇ hui ve a loˍ htaꞈ yaw ve maˇ heˆ. Daꞈ ve kehˬ ve Awˬ ha hpu yawˇ hui htaꞈ dawˇ pawnˍ piˇ leh yaw ve yoˬ.’ Heˍlaˍsaˆ ve tawˇ hkawˇ “dawˇ pawnˍ piˇ” ve tcuhˉ kuiˬ lehˬ “mvuhˇ haw meuˆ kʼai ve” htaꞈ kʼoˆ gaˇ ve yoˬ.—2 Peˍtruˆ 1:21.

9. “Dawˇ pawnˍ piˇ” ve maˇ heˆ leh “mvuhˇ haw meuˆ kʼai ve” htaꞈ Peˍtruˆ kʼoˆ htaˇ aˬ htoꞈ ma htaꞈ dawˇ mawˬ ve le?

⁹ “Dawˇ pawnˍ piˇ” ve maˇ heˆ leh “mvuhˇ haw meuˆ kʼai ve” htaꞈ Peˍtruˆ kʼoˆ htaˇ, aˬ htoꞈ ma htaꞈ dawˇ mawˬ ve le? Heuˇ shan hpawˇ “mvuhˇ haw meuˆ kʼai” ve htaꞈ tcuh yaˇ ve liꞈ bvuhꞈ paˍ Luˉkaꞈ Heˍlaˍsaˆ tawˇ hkawˇ yehˇ leh kʼoˆ htaˇ, tawˇ hkawˇ hkʼa shuˍ yehˇ ve yoˬ. (Tcuh yaˇ 27:15) Liꞈ hpu chaˬ nyi paˍ kʼoˆ ve, daꞈ kehˬ ve awˬ ha hpu Liꞈ hpu bvuhꞈ paˍ htaꞈ “dawˇ pawnˍ piˇ” ve “mvuhˇ haw meuˆ kʼai ve” htaꞈ Peˍtruˆ kʼoˆ htaˇ, heuˇ shan hpawˇ  gʼaꞈ ve htaꞈ tehˆ maˍ ve yoˬ. Heuˇ shan hpawˇ awˬ ti lo gaˬ˗e tuˬ mvuhˇ haw meuˆ kʼai ve hkʼe, daꞈ kehˬ ve awˬ ha hpu kaꞈ Liꞈ hpu bvuhꞈ paˍ htaꞈ dawˇ pawnˍ piˇ leh hkʼa biˇ bvuhꞈ gʼa tuˬ ga piˇ ve yoˬ. Liꞈ hpu chaˬ nyi paˍ kʼawꞈ kʼoˆ ve, Liꞈ hpu bvuhꞈ paˍ lehˬ “heuˇ shan hpawˇ ve hpa lonˉ hpe” chehˇ ve yoˬ. Yaˬhoˉvaˬ lehˬ “mvuhˇ haw” leh daꞈ kehˬ ve awˬ ha hpu yawˇ hui htaꞈ piˇ ve yoˬ. Liꞈ hpu bvuhꞈ paˍ kaꞈ daꞈ kehˬ ve awˬ hpu dawˇ pawnˍ piˇ ve htaꞈ gʼaꞈ te chehˇ ve yoˬ.

10-11. Daꞈ kehˬ ve awˬ ha hpu ngaˬ hui htaꞈ dawˇ pawnˍ laˇ ve tehꞈ yonˍ gʼa tuˬ aˬ htoꞈ ma ve 2 ceuˬ htaꞈ ngaˬ hui gʼa te cawˇ ve le? Tawˇ pa haˉ kʼoˆ maˍ laˇ sheˍ.

¹⁰ Chi teˇ hkui Yaˬhoˉvaˬ daꞈ kehˬ ve awˬ ha hpu Liꞈ hpu bvuhꞈ paˍ htaꞈ maˇ dawˇ pawnˍ piˇ˗oˬ ve htawˇ, Yaˬhoˉvaˬ ve daꞈ kehˬ ve awˬ hpu yawˇ ve kanˉ te ve chaw htaꞈ dawˇ pawnˍ piˇ chehˇ sheˍ. Yawˇ ve awˬ vuiˬ yawˇ te ve yoˬ. Yaꞈ hkʼaˇ, hkʼaˬ hkʼe te leh daꞈ kehˬ ve awˬ ha hpu geh awˬ bon gʼa tuˬ le? Ngaˬ hui ve awˬ vuiˬ te chehˇ ve tehꞈ hkʼa dehꞈ yonˍ gʼa ve yoˬ. Chi hkʼaˬ hkʼe te gʼa tuˬ le?

¹¹ Tawˇ pa haˉ chi htaꞈ dawˇ nyi sheˍ. Heuˇ shan hpawˇ gʼaꞈ paˍ mvuhˇ haw shaˉ gʼa gaˇ ve kʼo 2 ceuˬ gʼa te ve yoˬ. Awˉ lawˉ teˇ ceuˬ heuˇ shan hpawˇ mvuhˇ haw cawˇ kuiˬ lo gʼa chehˇ ve yoˬ. Heuˇ shan hpawˇ mvuhˇ haw maˇ cawˇ kuiˬ lo jehˇ ve kʼo, heuˇ shan hpawˇ gʼuˇ suhˍ lo kʼai maˇ gʼa. Nyiˇ ceuˬ teˇ ceuˬ heuˇ shan hpawˇ ve hpa lonˉ kiˇ˗ehꞈ gʼa gʼawˬ tsuhꞈ ve yoˬ. Mvuhˇ haw cawˬ ve htawˇ, heuˇ shan hpawˇ ve hpa lonˉ htaꞈ maˇ meuˆ ve kʼo kʼai maˇ gʼa ve yoˬ. Chi ve hkʼa shuˍ daꞈ kehꞈ ve awˬ ha hpu ga laˇ htaˇ ngaˬ hui yeunˇ hkanˍ leh Yaˬhoˉvaˬ ve kanˉ te gʼa ve yoˬ. Daꞈ kehˬ ve awˬ ha hpu gʼa tuˬ ngaˬ hui 2 ceuˬ gʼa te ve yoˬ. Awˉ lawˉ teˇ ceuˬ daꞈ kehˬ ve awˬ ha hpu dawˇ pawnˍ piˇ ve awˬ hkʼaˇ suh ngaˬ hui gʼaꞈ te cawˇ ve yoˬ. Nyiˇ ceuˬ lehˬ heuˇ shan hpawˇ ve hpa lonˉ kiˇ˗ehꞈ tsuhꞈ ve hkʼe, ngaˬ hui co ha hpawˇ te gʼa ve hkʼe te ve yoˬ. (Chiˇ mvuh ve 119:32) Ngaˬ hui chi ve 2 ceuˬ te˗oˬ ve kʼo, tawˍ ve tsuhˇ ve, shoꞈ shaꞈ ve, miˬ guiˬ awˬ suhˉ gaˬ htaˇ hkʼa gaˬ ka tiꞈ yeˬ ve hkʼaw yeunˇ hkanˍ gʼaˇ tuˬ daꞈ kehˬ ve awˬ ha hpu ga laˇ ve yoˬ.

12. Ngaˬ hui aˬ htoꞈ ma ve awˬ lawn htaꞈ kʼawꞈ dawˇ nyi tuˬ le?

 ¹² Chi teˇ hkui daꞈ kehˬ ve awˬ ha hpu ga laˇ ve 2 ceuˬ htaꞈ henˇ chehˇ sheˍ. Awˉ lawˉ teˇ ceuˬ shoꞈ shaꞈ ve gʼa hpuˇ ve htawˇ, ka tiꞈ yeˬ gʼa tuˬ daꞈ kehˬ ve awˬ ha hpu ga laˇ ve yoˬ. Nyiˇ ceuˬ lehˬ co ha hpawˇ uiˍ la mvuh la tuˬ, dawˇ pawnˍ laˇ leh ngaˬ hui Yaˬhoˉvaˬ ve a loˍ htaꞈ gʼaꞈ te gʼa tuˬ daꞈ kehˬ ve awˬ ha hpu ga laˇ ve yoˬ. Chi co co taiˍ taiˍ a shaꞈ gʼa tuˬ ga laˇ ve yoˬ. Chi teˇ hkui daꞈ kehˬ ve awˬ ha hpu geh awˬ bon maˇ maˇ gʼa tuˬ 4 ceuˬ teˇ geh henˇ sheˍ.

13. 2 Tiˆmoˉseˍ liꞈ 3:16, 17 hkʼaw kʼoˆ taˍ ve hkʼe, Liꞈ hpu ngaˬ hui awˬ pon awˬ bon hkʼaˬ hkʼe cawˬ ve le? Ngaˬ hui hkʼaˬ hkʼe gʼa te cawˇ ve le?

¹³ Awˉ lawˉ teˇ ceuˬ Liꞈ hpu gʼa henˇ ve. (2 Tiˆmoˉseˍ 3:16, 17 gʼaw sheˍ.) “Gʼuiˬ sha ve Awˬ ha hpu dawˇ pawnˍ piˇ ve” Heˍlaˍsaˆ hkawˇ tcuhˉ kuiˬ lehˬ “Gʼuiˬ sha awˬ shaˉ meuˆ keu piˇ ve” htaꞈ kʼoˆ gaˇ ve yoˬ. Gʼuiˬ sha daꞈ kehˬ ve awˬ ha hpu htaꞈ cuˇ leh yawˇ ve dawˇ hkʼaˇ Liꞈ hpu bvuhꞈ paˍ ve dawˇ hkʼaˇ htaꞈ “meuˆ keu piˇ ve” yoˬ. Liꞈ hpu gʼaw leh hkʼa dehꞈ dawˇ nyi htaˇ, Gʼuiˬ sha ve tawˇ hkawˇ ngaˬ hui ve nyi ma hkʼaw gaˬ ve yoˬ. Gʼuiˬ sha geh laˬ ve chi teˇ hpaˍ lehˬ ngaˬ hui ve a shaꞈ teꞈ hkʼaˇ pa leh yawˇ ve a loˍ te gʼa ve yoˬ. (Heˍbrehˇ 4:12) Yaꞈ hkʼaˇ, daꞈ kehˬ ve awˬ ha hpu geh awˬ bon maˇ maˇ gʼa tuˬ, hkʼaˬ htaˆ kaꞈ Liꞈ hpu henˇ ve awˬ yanˇ gʼa shawˍ teh leh gʼaw ve htaꞈ hkʼa dehꞈ gʼa dawˇ nyi ve yoˬ. Chi hkʼe te htaˇ, Gʼuiˬ sha ve tawˇ hkawˇ ngaˬ hui kʼoˆ ve leh te ve awˬ bon cawˬ ve yoˬ.

14. (a) Aˬ htoꞈ ma te hpawnˬ daꞈ kuiˬ hkʼaw “mvuhˇ haw” cawˬ ve tehꞈ kʼoˆ gʼa ve le? (b) Ngaˬ hui hpawnˬ daꞈ kuiˬ hkʼaw heuˇ shan hpawˇ ve hpa lonˉ hkʼaˬ hkʼe te hpe gʼa tuˬ le?

¹⁴ Nyiˇ ceuˬ lehˬ awˬ viˉ awˬ nyi geh hpawnˬ daꞈ ve. (Chiˇ mvuh ve 22:22) Hpawnˬ daꞈ kuiˬ hkʼaw “mvuhˇ haw” cawˬ ve lehˬ Yaˬhoˉvaˬ ve kanˇ paˆ yoˬ. (Hpeuꞈ maˍ ve 2:29) Aˬ htoꞈ ma te chi hkʼe kʼoˆ ve le? Awˬ viˉ awˬ nyi geh teˇ geh hpawnˬ daꞈ htaˇ, daꞈ kehˬ ve awˬ ha hpu gʼa tuˬ bon lawˬ ve, Liꞈ hpu hkʼaw ve kʼa muiˬ hkawˇ Gʼuiˬ sha htaꞈ chiˇ mvuh ve, daꞈ kehˬ ve awˬ ha hpu awˬ viˉ awˬ nyi hawˉ hkʼaˆ htaꞈ leuˆ leh maˍ laˇ ve htaꞈ ngaˬ hui gʼa na ve yoˬ. Chi hkʼoˆ kaꞈ, awˬ viˉ awˬ nyi yaˇ miˇ gu leh awˬ vuiˬ te tuˬ kaꞈ daꞈ kehˬ ve awˬ ha hpu ga piˇ ve yoˬ. Yaꞈ hkʼaˇ, daꞈ kehˬ ve awˬ ha hpu geh awˬ bon maˇ maˇ gʼa tuˬ hpawnˬ daꞈ kuiˬ hkʼaw awˬ gʼaˇ piˇ daꞈ tuˬ gʼa gu ve yoˬ. Heuˇ shan hpawˇ “hpa lonˉ hpe˗oˬ” leh gu hehnˇ˗oˬ ve hkʼe, ngaˬ hui kaꞈ daꞈ kehˬ ve awˬ ha hpu geh awˬ bon maˇ maˇ gʼa tuˬ gu hehnˇ˗oˬ.

15. Hto toˇ kuiˬ lo daꞈ kehˬ ve awˬ ha hpu hkʼaˬ hkʼe te caˉ daꞈ ve le?

¹⁵ Shehˆ ceuˬ lehˬ hto toˇ ve. Ngaˬ hui hto toˇ˗e htaˇ Liꞈ hpu yehˇ leh maˍ ve kʼo, daꞈ kehˬ ve awˬ ha hpu ngaˬ hui Gʼuiˬ sha ve kanˉ te kuiˬ hkʼaw ga laˇ tcuh chehˇ ve yoˬ. (Roˉmaꞈ 15:18, 19) Ngaˬ hui daꞈ kehˬ ve awˬ ha hpu geh awˬ bon maˇ maˇ gʼa tuˬ hkʼaˬ htaˆ kaꞈ gʼa hto toˇ˗e leh teˇ pawˆ le le awˬ yanˇ cawˬ ve kʼo Liꞈ hpu gʼa yehˇ ve yoˬ. Ngaˬ hui Gʼuiˬ sha ve kanˉ te ve hkʼaw daꞈ la tuˬ ve teˇ hkʼaˇ lehˬ Ngaˬ hui Hkriꞈ yaˇ a shaꞈ teꞈ hkʼaˇ leh Gʼuiˬ sha kanˉ te ve hpawnˬ daꞈ ve te jawˬ tuˬ liꞈ kʼoˆ hkʼaw te maˍ laˇ ve awˬ hkʼaˇ htaꞈ yehˇ gʼa ve yoˬ.

16. Daꞈ kehˬ ve awˬ ha hpu gʼa tuˬ daꞈ jaˇ ve awˬ hkʼaˇ teˇ hkʼaˇ aˬ htoꞈ ma le?

¹⁶ Awˇ ceuˬ lehˬ Yaˬhoˉvaˬ geh bon lawˬ ve. (Maꞈhtehˍ 7:7-11; Luˉkaꞈ 11:13) Yaˬhoˉvaˬ geh daꞈ kehˬ ve awˬ ha hpu gʼa tuˬ daꞈ jaˇ ve awˬ hkʼaˇ teˇ hkʼaˇ lehˬ yawˇ geh bon lawˬ ve yoˬ. Ngaˬ hui ve bon lawˬ hkawˇ Yaˬhoˉvaˬ geh maˇ gaˬ˗e tuˬ teˇ ceuˬ kaꞈ tawˍ laˇ maˇ gʼa, leh htawnˍ ve laˇ venˇ maˇ heˆ leh Saˍtanˍ kaꞈ ngaˬ hui daꞈ kehˬ ve awˬ ha hpu maˇ gʼa tuˬ tawˍ laˇ maˇ gʼa. (Yaˍkoˆ 1:17) Yaꞈ hkʼaˇ, ngaˬ hui daꞈ kehˬ ve awˬ ha hpu geh awˬ bon maˇ maˇ gʼa tuˬ bon hkʼaˬ hkʼe gʼa lawˬ ve le? Bon lawˬ ve tawˇ pa  haˉ chi Luˉkaꞈ liꞈ ve ha lehˬ ve bon hkawˇ hkʼaw ceh cawˬ ve htaꞈ nyi sheˍ. *

17. Luˉkaꞈ liꞈ 11:5-9, 13 hkʼaw Yeˍsuˆ ve tawˇ pa haˉ ngaˬ hui htaꞈ aˬ htoꞈ ma maˍ laˇ ve le?

¹⁷ Luˉkaꞈ liꞈ 11:5-9, 13 gʼaw sheˍ. Yeˍsuˆ ve tawˇ pa haˉ ngaˬ hui daꞈ kehˬ ve awˬ ha hpu gʼa tuˬ bon lawˬ ve awˬ hkʼaˇ maˍ laˇ ve yoˬ. Hawˉ hkʼaˆ teˇ gʼaˇ yawˇ “gʼaˇ hteꞈ lawˬ tcuhˉ taˍ ve” pa taw yawˇ loˍ ve htaꞈ gʼa ve tawˇ pa haˉ tehˆ maˍ laˇ ve yoˬ. Tanˇ hkuinˇ gaˬ˗oˬ kaꞈ awˬ chawˇ ga laˇ tuˬ lawˬ haˆ ve yoˬ. Tawˇ pa haˉ chi bon lawˬ ve htaꞈ caˉ daꞈ ve hkʼaˬ hkʼe maˍ laˇ ve le? Yeˍsuˆ kʼoˆ ve, “lawˬ loˬ. Lawˬ kʼo gʼa tuˬ yoˬ. Ca loˬ. Ca kʼo mawˬ tuˬ yoˬ. Yehˬ miˉ htaꞈ htawˆ loˬ. Htawˆ kʼo hpaw laˇ tuˬ yoˬ.” Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Daꞈ kehˬ ve awˬ ha hpu gʼa tuˬ ngaˬ hui caˉ leh bon gʼa lawˬ ve yoˬ.

18. Yeˍsuˆ ve tawˇ pa haˉ tehˆ maˍ laˇ ve hkʼaw aˬ htoꞈ ma te Yaˬhoˉvaˬ ngaˬ hui htaꞈ daꞈ kehˬ ve awˬ ha hpu peꞈ laˇ tuˬ yoˬ tehꞈ yonˍ gʼa ve le?

¹⁸ Chi hkʼoˆ kaꞈ, Yeˍsuˆ ve tawˇ pa haˉ chi Yaˬhoˉvaˬ ve daꞈ kehˬ ve awˬ ha hpu ngaˬ hui htaꞈ peꞈ laˇ ve awˬ hkʼaˇ maˍ laˇ ve yoˬ. Hawˉ hkʼaˆ teˇ gʼaˇ ve tawˇ pa haˉ chi yawˇ daꞈ ve yehˬ shehˍ hpaˇ hpehꞈ gaˇ ve yoˬ. Tanˇ hkuinˇ htaˇ yawˇ aˉ hkʼaw laˬ ve chaw htaꞈ caˇ tuˬ caˍ piˇ cawˇ ve tehꞈ dawˇ ve yoˬ. Yaꞈ hkʼaˇ, yawˇ caˇ tuˬ maˇ cawˬ. Yeˍsuˆ kʼoˆ ve, yawˇ gʼaˇ hteꞈ lawˬ tcuhˉ taˍ ve pa taw, awˬ chawˇ caˇ tuˬ piˇ ve yoˬ. Yeˍsuˆ hkʼaˬ hkʼe maˍ laˇ ve le? Ngaˬ hui maˇ biˇ ve htawˇ, awˬ chawˇ caˇ tuˬ gʼaˇ hteꞈ lawˬ tcuhˉ taˍ ve htaꞈ piˇ ve kʼo, mvuhˇ naw ma hkʼoˆ chehˇ ve ngaˬ hui ve Awˬ pa geh daꞈ kehˬ ve awˬ ha hpu lawˬ tcuhˉ taˍ ve chaw htaꞈ piˇ tuˬ yoˬ. Chi htaꞈ pa taw, ngaˬ hui Gʼuiˬ sha geh daꞈ kehˬ ve awˬ ha hpu lawˬ htaˇ, yawˇ peꞈ laˇ tuˬ yoˬ tehꞈ yonˍ gʼa ve yoˬ.—Chiˇ mvuh ve 10:17; 66:19.

19. Aˬ htoꞈ ma te ngaˬ hui yeunˇ hkanˍ gʼaˇ tuˬ yoˬ tehꞈ yonˍ gʼa ve le?

¹⁹ Saˍtanˍ ngaˬ hui htaꞈ te luˬ laˇ ve maˇ jehˇ ve htawˇ, yeunˇ hkanˍ gʼaˇ tuˬ yoˬ tehꞈ yonˍ gʼa ve yoˬ. Aˬ htoꞈ ma pa taw le? Daꞈ kehˬ ve awˬ ha hpu ga laˇ gʼa ve 2 ceuˬ cawˬ ve pa taw yoˬ. (1) Ngaˬ hui shoꞈ shaꞈ ve teˇ hpaˍ htaꞈ yeunˇ hkanˍ gʼaˇ tuˬ daꞈ kehˬ ve awˬ ha hpu ga laˇ gʼa ve yoˬ. (2) “Ngaˬ hui ve heuˇ shan hpawˇ ve hpa lonˉ” htaꞈ mvuhˇ haw meuˆ kʼai ve hkʼe, ngaˬ hui Yaˬhoˉvaˬ ve kanˉ te ve uiˍ la mvuh la leh miˬ guiˬ awˬ suhˉ gaˬ htaˇ hkʼa gaˬ daꞈ kehˬ ve awˬ ha hpu ga laˇ tuˬ yoˬ. Daꞈ kehˬ ve awˬ ha hpu geh awˬ bon maˇ maˇ gʼa tuˬ coˇ caˇ sheˍ.