Liꞈ hpu ve awˬ co˗e htaˇ, awˬ nu ve chaw ve yehˬ kʼa hkʼaw mawˇ haꞈ shaˉ shehˍ hpaˇ lehˬ mawˇ jeˬ hkʼa peu˗eˬ htaꞈ nyi haꞈ shaˉ piˇ ve yoˬ.

Yaˍkoˆ ve yaˇ paˍ Yoˇsehꞈ Eˇjiˇtuꞈ mvuhˇ miˬ hkʼaw shu ceˬ te htaˇ, Yoˇsehꞈ awˬ nu ve teˇ gʼaˇ ve mawˇ haꞈ shaˉ shehˍ hpaˇ hpehꞈ la ve yoˬ. Eˇjiˇtuꞈ chaw awˬ shehˍ hpaˇ chi teˇ gʼaˇ “kanˉ hkʼa peu˗eˬ Yoˇsehꞈ ve laꞈ sheh hkʼaw lo chiˇ aꞈ piˇ taˍ ve yoˬ.” (Awˬ hkuiˉ puiˍ 39:2-6) Peuˬ hkʼawꞈ nawˉ, Yoˇsehꞈ Eˇjiˇtuꞈ mvuhˇ miˬ hkʼaw kanˇ paˆ cawˬ jaˇ ve teˇ gʼaˇ hpehꞈ la htaˇ, yawˇ kaꞈ mawˇ haꞈ shaˉ shehˍ hpaˇ teˇ gʼaˇ cawˬ ve yoˬ.—Awˬ hkuiˉ puiˍ 44:4.

Yeˍsuˆ ve awˬ co˗e htaˇ hko shehˍ hpaˇ hko hkʼaw maˇ chehˇ, venˇ hkʼaw lo chehˇ ve yoˬ. Hkʼe te leh hko shehˍ hpaˇ mawˇ jeˬ hkʼa peu˗eˬ htaꞈ nyi haꞈ shaˉ paˍ cawˬ leh yawˇ hko hkʼaw lo kanˉ te ve chaw hkʼa peu˗eˬ htaꞈ nyi haꞈ shaˉ tcuh ve yoˬ.

Mawˇ hkʼa peu˗eˬ htaꞈ nyi haꞈ shaˉ shehˍ hpaˇ hkʼaˬ hkʼe ve chaw hpehꞈ cawˇ ve le? Awˉ lawˉ peuˇ ve Hkriꞈ yaˇ ve awˬ co˗e htaˇ, Roˉmaꞈ chaw liꞈ bvuhꞈ paˍ teˇ gʼaˇ Koˍluˍmeˇyaˆ kʼoˆ ve “mawˇ hkʼa peu˗eˬ htaꞈ nyi haꞈ shaˉ shehˍ hpaˇ chi teˇ gʼaˇ lehˬ yawˇ kanˉ chi te puiˉ ve tehꞈ awˉ lawˉ htaˇ kaꞈ gʼa hpeuꞈ maw piˇ ve yoˬ.” Yawˇ kʼawꞈ kʼoˆ sheˍ ve “kanˇ paˆ yehˇ ve kaꞈ yawˇ cawˇ lawꞈ keunˍ lawꞈ ve hkʼaw gʼa yehˇ ve yoˬ. A yeˇ uiˍ jaˇ ve lehˬ maˇ shiˍ ve htawˇ yawˇ shiˍ ve hkʼe maˇ gʼa te leh yawˇ hkʼaˬ htaˆ kaꞈ henˇ gaˇ ve nyi ma gʼa cawˬ ve yoˬ.”

Liꞈ hpu hkʼaw Hkriꞈ yaˇ awˬ moˍ ve kanˉ leh mawˇ haꞈ shaˉ shehˍ hpaˇ ve kanˉ tehˆ daꞈ ve yoˬ. Tawˇ pa haˉ te kʼo “Gʼuiˬ sha ve awˬ bon laiˉ ceuˬ htaꞈ nawˬ hui hkʼa dehꞈ haꞈ shaˉ leh yehˇ ve chaw” hpehꞈ cawˇ ve tehꞈ tcuh yaˇ Peˍtruˆ Hkriꞈ yaˇ htaꞈ kʼoˆ piˇ ve yoˬ.—1 Peˍtruˆ 4:10.

Luˉkaꞈ liꞈ kaˇ nanˉ uiˍ 16:1 te leh 8 hkʼaw Yeˍsuˆ mawˇ jeˬ hkʼa peu˗eˬ htaꞈ nyi haꞈ shaˉ shehˍ hpaˇ ve tawˇ pa haˉ kʼoˆ maˍ laˇ ve yoˬ. Chi hkʼoˆ kaꞈ, Yeˍsuˆ yawˇ Jawˇmawˇ tanˬ te htaˇ hpehꞈ la tuˬ ve awˬ lawn kʼoˆ maˍ laˇ htaˇ, Yeˍsuˆ yawˇ ve awˬ laꞈ gʼawˇ htaꞈ ka tiꞈ te piˇ ve “ka tiꞈ yeˬ leh cuˇ yiˍ cawˬ ve awˬ ceˬ” maˇ heˆ leh “mawˇ haꞈ shaˉ shehˍ hpaˇ” leuˆ teh tuˬ yoˬ. Awˬ leh meuˇ ve awˬ yanˇ mawˇ haꞈ shaˉ shehˍ hpaˇ chi teˇ gʼaˇ Yeˍsuˆ ve awˬ laꞈ gʼawˇ htaꞈ co ha hpawˇ ve caˇ tuˬ hkʼa dehꞈ piˇ tuˬ yoˬ. (Maꞈhtehˍ 24:45-47; Luˉkaꞈ 12:42) Chi teˇ hkui ka tiꞈ yeˬ ve mawˇ haꞈ shaˉ shehˍ hpaˇ Yeˍsuˆ yawˇ ve awˬ laꞈ gʼawˇ htaꞈ ka tiꞈ te piˇ ve ngaˬ hui ha lehˬ jaˇ.