1-2. Aˬ htoꞈ ma te chi beuꞈ teˇ co˗e ve Hkriꞈ yaˇ Oˉ kʼoˍ pui ve liꞈ htaꞈ a yeˇ te cawˇ ve le?

 Tcuh yaˇ Pawˇluꞈ Tiˆmoˉseˍ htaꞈ kʼoˆ piˇ ve, “Liꞈ hpu hkʼa peu˗eˬ lehˬ, Gʼuiˬ sha ve Awˬ ha hpu dawˇ pawnˍ piˇ ve htaꞈ pa taw cawˬ la ve yoˬ.” Oˉ kʼoˍ pui ve liꞈ kaꞈ yoˬ. (2 Tiˆmoˉseˍ 3:16) Nawˬ Oˉ kʼoˍ pui ve liꞈ htaꞈ hkʼaˬ hkʼe dawˇ ve le? Liꞈ chi ve hkʼaw awˬ liˇ tawˇ hkawˇ maˇ jaˇ leh chi beuꞈ yehˇ maˇ gʼa˗o tehꞈ laiˉ gʼaˇ dawˇ ve yoˬ. Yaꞈ hkʼaˇ, awˬ tehˬ ve Hkriꞈ yaˇ chi hkʼe maˇ dawˇ.

² Oˉ kʼoˍ pui ve liꞈ peuˬ taˉ ve 3,500 hkʼawꞈ htaˇ bvuhꞈ˗aˬ ve htawˇ, “ngaˬ hui htaꞈ maˍ laˇ tuˬ” Yaˬhoˉvaˬ haꞈ shaˉ taˍ sheˍ. (Roˉmaꞈ 15:4) Oˉ kʼoˍ pui ve liꞈ Yaˬhoˉvaˬ ve te hkʼaˇ dawˇ hkʼaˇ ngaˬ hui na gʼa tuˬ maˍ laˇ ve yoˬ. Chi ve ngaˬ hui henˇ gaˇ ve yoˬ. Awˬ tehˬ kʼo dawˇ pawnˍ piˇ ve liꞈ chi ve hkʼaw henˇ tuˬ cawˬ maˇ jaˇ. 4 tawn htaꞈ teˇ geh henˇ sheˍ.

3. Teˇ hkʼawꞈ le le venˇ baˆ hpehˇ ve awˬ nyi htaˇ aˬ htoꞈ ma te tuˉ tanˇ tuˬ gʼa tuˉ tanˇ cawˇ ve le?

³ Heuˇ tuˬ ve 1: Yaˬhoˉvaˬ ngaˬ hui ve tuˉ tanˇ tuˬ htaꞈ haꞈ yuˬ laˇ tuˬ yawˇ nyi hkʼaˇ suh ve awˬ ceuˬ htaꞈ gʼa te ve yoˬ. Teˇ hkʼawꞈ le le venˇ baˆ hpehˇ ve awˬ nyi htaˇ, Iˉsaˍreˍlaˆ chaw ca mawˬ daꞈ la leh paw hkuˇ lonˉ kaꞈ to nuˇ to shaˆ yuˬ leh tuˉ tanˇ ve yoˬ. Iˉsaˍreˍlaˆ chaw venˇ baˆ gʼa ponˬ tuˬ tuˉ tanˇ tuˬ chi teˇ hpaˍ yawˇ hui htaꞈ shaˍ tiꞈ piˇ ve yoˬ! Mvuhˇ miˬ hkʼaw ve chaw hkʼa peu˗eˬ venˇ baˆ gʼa ponˬ tuˬ paw hkuˇ lonˉ lehˬ daꞈ kehˬ jaˇ ve pawehˇ hkʼaw tuˉ tanˇ tuˬ to nuˇ to shaˆ ve awˬ suhˍ maˇ gʼa tuˉ tanˇ piˇ sheˍ htaˇ, a yeˇ uiˍ jaˇ ve teˇ ceuˬ htaꞈ yawˇ gʼa te sheˍ ve yoˬ.

4. Oˉ kʼoˍ pui ve liꞈ 16:12, 13 hkʼaw kʼoˆ taˍ ve hkʼe, venˇ baˆ hpehˇ ve awˬ nyi htaˇ paw hkuˇ lonˉ daꞈ kehˬ jaˇ ve bawehˇ hkʼaw awˉ lawˉ loꞈ˗e htaˇ aˬ htoꞈ ma te ve le? (Awˬ htaꞈ hpawˇ ve awˬ han htaꞈ nyi sheˍ.)

⁴ Oˉ kʼoˍ pui ve liꞈ 16:12, 13 gʼaw sheˍ. Venˇ baˆ hpehˇ ve awˬ nyi  htaˇ, hkʼaˬ hkʼe hpehꞈ la ve htaꞈ dawˇ nyi sheˍ. Venˇ baˆ hpehˇ ve awˬ nyi htaˇ paw hkuˇ lonˉ daꞈ kehˬ jaˇ ve bawehˇ hkʼaw 3 pawˆ loꞈ˗e ve yoˬ. Yawˇ awˉ lawˉ teˇ pawˆ loꞈ˗e htaˇ laꞈ sheh teˇ paˉ sha hawnˉ ka taˍ leh, teˇ paˉ kʼo sha hawnˉ tuˉ tanˇ tuˬ ve shi kawˆ hkʼaw shiˉ gʼeuꞈ keu leh ka taˍ ve yoˬ. Daꞈ kehˬ jaˇ ve bawehˇ gʼuˇ suhˍ lo gaˬ htaˇ yawˇ kaꞈ gʼa jehˇ sheˍ ve yoˬ. Peuˬ leh yawˆ yan ve hkʼaw daꞈ kehˬ jaˇ ve bawehˇ hkʼaw loꞈ˗e leh, ka tiꞈ shaˉ caˆ taˍ kʼoˍ gʼuˇ suhˍ huˉ taˍ htaˇ, Yaˬhoˉvaˬ gʼuˇ suhˍ lo huˉ taˍ ve hkʼe gʼa te ve yoˬ. Bawehˇ oˇ ve hkʼaw hawnˉ tuˬ sha hawnˉ oˇ ve shiˉ gʼeuꞈ hkʼoˆ a yehˉ yehˉ ngeuˍ pfuhˍ ve yoˬ. * Peuˬ leh yawˇ tawˆ˗e ve yoˬ. Venˇ baˆ hpehˇ piˇ tuˬ tuˉ tanˇ tuˬ ve to nuˇ to shaˆ ve awˬ suhˍ yuˬ leh daꞈ kehˬ jaˇ ve bawehˇ hkʼaw kʼawꞈ loꞈ˗e ve yoˬ. Venˇ baˆ hpehˇ piˇ tuˬ to nuˇ to shaˆ ve awˬ suhˍ maˇ gʼa tuˉ tanˇ sheˍ htaˇ, paw hkuˇ lonˉ sha hawnˉ awˉ lawˉ tuˉ ve htaꞈ chaˬ nyi sheˍ.

5. Venˇ baˆ hpehˇ ve awˬ nyi htaˇ, sha hawnˉ yehˇ ve ngaˬ hui htaꞈ hkʼaˬ hkʼe maˍ laˇ ve le?

⁵ Venˇ baˆ hpehˇ ve awˬ nyi htaˇ, sha hawnˉ yehˇ ve ngaˬ hui htaꞈ hkʼaˬ hkʼe maˍ laˇ ve le? Liꞈ hpu hkʼaw kʼoˆ ve, Yaˬhoˉvaˬ htaꞈ ka tiꞈ yeˬ ve chaw bon lawˬ hkawˇ lehˬ sha hawnˉ htaꞈ shuˍ ve yoˬ. (Chiˇ mvuh ve 141:2; Hpeuꞈ maˍ ve 5:8) Venˇ baˆ hpehˇ ve awˬ nyi htaˇ, paw hkuˇ lonˉ sha hawnˉ ka leh Yaˬhoˉvaˬ mehˆ gʼuˇ suhˍ yawˆ yan ve hkʼaw huˉ taˍ ve yoˬ. Chi ve hkʼa shuˍ ngaˬ hui Yaˬhoˉvaˬ geh bon lawˬ htaˇ yawˆ yan ve hkʼaw gʼa lawˬ ve yoˬ. Gʼuiˬ sha hkʼa peu˗eˬ hpanˍ shehˍ hpaˇ hpehꞈ ve htawˇ ngaˬ hui yawˇ geh meuˆ daꞈ tcuh laˇ ve, tawˇ yaw daꞈ tcuh laˇ ve, leh awˬ pa yaˇ htaꞈ meuˆ daꞈ ve hkʼe yawˇ geh meuˆ daꞈ tcuh laˇ ve, Gʼuiˬ sha htaꞈ awˬ bon uiˍ jaˇ kʼoˆ piˇ gaˇ ve yoˬ. (Yaˍkoˆ 4:8) Chi hkʼoˆ kaꞈ, yawˇ ngaˬ hui htaꞈ awˬ chawˇ tehꞈ shawˍ laˇ ve yoˬ! (Chiˇ mvuh ve 25:14) Chi daꞈ jaˇ ve awˬ hkʼaˇ hpehꞈ leh yawˇ nyi ma luˬ tuˬ maˇ te gaˇ.

6. Paw hkuˇ lonˉ maˇ gʼa tuˉ tanˇ sheˍ htaˇ sha hawnˉ awˉ lawˉ gʼa tuˉ tanˇ ve ngaˬ hui htaꞈ hkʼaˬ hkʼe maˍ laˇ ve le?

⁶ Chi hkʼoˆ kaꞈ, paw hkuˇ lonˉ maˇ gʼa tuˉ tanˇ sheˍ htaˇ sha hawnˉ awˉ lawˉ gʼa tuˉ tanˇ ve tehꞈ tawnˇ taˍ cawˇ ve yoˬ. Yawˇ tuˉ tanˇ htaˇ Yaˬhoˉvaˬ nyi hkʼaˇ suh ve tehꞈ yonˍ gʼa tuˬ yawˇ chi hkʼe te ve yoˬ. Chi ngaˬ hui htaꞈ hkʼaˬ hkʼe maˍ laˇ ve le? Yeˍsuˆ miˬ guiˬ hkʼoˆ chehˇ htaˇ, chaw yaˇ gʼa ponˬ tuˬ yawˇ awˬ to maˇ gʼa tuˉ tanˇ laˇ sheˍ htaˇ, a yeˇ uiˍ jaˇ ve awˬ ceuˬ htaꞈ yawˇ awˉ lawˉ gʼa te sheˍ ve yoˬ. Oˇ ve aˬ htoꞈ ma le? Yawˇ miˬ guiˬ hkʼoˆ a shaꞈ teꞈ chehˇ htaˇ Yaˬhoˉvaˬ htaꞈ ka tiꞈ gʼa yeˬ ve yoˬ. Chi hkʼe te ve lehˬ, yawˇ ve tuˉ tanˇ tuˬ htaꞈ Yaˬhoˉvaˬ haꞈ yuˬ laˇ tuˬ awˬ pon yoˬ. Chi hkʼoˆ kaꞈ, Yaˬhoˉvaˬ ve awˬ liˇ awˬ hkʼaˇ daꞈ jaˇ leh, yawˇ uˉ peunˍ ve hteˇ ve cawˇ ve tehꞈ Yeˍsuˆ ve a shaꞈ teꞈ hkʼaˇ hpeuꞈ maw piˇ ve yoˬ.

7. Yeˍsuˆ miˬ guiˬ hkʼoˆ chehˇ htaˇ Awˬ pa nyi hkʼaˇ suh tuˬ aˬ htoꞈ ma te te piˇ ve le?

⁷ Yeˍsuˆ miˬ guiˬ hkʼoˆ chehˇ htaˇ, Yaˬhoˉvaˬ ve awˬ liˇ awˬ hkʼaˇ htaꞈ hkʼa dehꞈ na yuˬ ve yoˬ. Yawˇ Awˬ pa uˉ peunˍ ve daꞈ jaˇ ve tehꞈ hpeuꞈ maw piˇ tuˬ Yeˍsuˆ dawˇ teh taˍ ve htaꞈ teˇ ceuˬ kaꞈ te luˬ piˇ maˇ gʼa. Beˬ ve lawˇ ve, tuꞈ ve hkanˍ ve, leh naˬ jaˇ leh suh ve awˬ nyi gaˬ la paˇ neˇ ve htawˇ tawˍ piˇ maˇ gʼa. (Hpiˇliˇpiˆ 2:8) Yeˍsuˆ tuꞈ jaˇ hkanˍ jaˇ ve hpuˇ ve htawˇ, bon lawˬ ve hkʼaw “gʼaˇ hteꞈ kuˬ leh mehˆ gʼuiˬ yaꞈ la ve” yoˬ. (Heˍbrehˇ 5:7) Yeˍsuˆ nyi ma awˬ tawˍ hkʼa gaˬ bon lawˬ ve lehˬ yawˇ Yaˬhoˉvaˬ htaꞈ ka tiꞈ yeˬ ve tehꞈ hpeuꞈ maw piˇ leh Yaˬhoˉvaˬ ve hkawˇ hkʼa dehꞈ na yuˬ tuˬ dawˇ teh taˍ ve yoˬ. Yaˬhoˉvaˬ awˬ pon kʼo, Yeˍsuˆ ve bon lawˬ hkawˇ sha hawnˉ hkʼe hpehꞈ ve yoˬ. Yeˍsuˆ htaꞈ Yaˬhoˉvaˬ nyi hkʼaˇ suh jaˇ leh Yaˬhoˉvaˬ uˉ peunˍ ve hteˇ ve cawˇ ve leh daꞈ jaˇ ve tehꞈ hpeuꞈ maw piˇ ve yoˬ.

8. Ngaˬ hui Yeˍsuˆ htaꞈ hkʼaˬ hkʼe henˇ yuˬ gʼa tuˬ le?

⁸ Ngaˬ hui a shaꞈ teꞈ chehˇ htaˇ coˇ caˇ leh Yaˬhoˉvaˬ htaꞈ ka tiꞈ yeˬ tuˬ Yeˍsuˆ htaꞈ henˇ yuˬ gʼa  ve yoˬ. Ngaˬ hui Yaˬhoˉvaˬ nyi hkʼaˇ suh tuˬ te gaˇ ve pa taw, lawˇ nyi laˇ ve maˇ heˆ leh tuꞈ ve hkanˍ ve gʼa hpuˇ htaˇ, yawˇ ga laˇ tuˬ nyi ma awˬ tawˍ hkʼa gaˬ bon gʼa lawˬ ve yoˬ. Chi hkʼe te ve lehˬ ngaˬ hui Gʼuiˬ sha uˉ peunˍ ve hpawˇ chehˇ ve yoˬ. Ngaˬ hui Yaˬhoˉvaˬ maˇ dawˇ cawˇ ve awˬ ceuˬ htaꞈ te htaˇ, bon lawˬ hkawˇ htaꞈ yawˇ maˇ na. Yaꞈ hkʼaˇ, Gʼuiˬ sha ve awˬ liˇ awˬ hkʼaˇ htaꞈ gʼaꞈ te ve kʼo, yawˇ awˬ pon kʼo ngaˬ hui ve bon lawˬ hkawˇ sha hawnˉ hkʼe hpehꞈ ve yoˬ. Ngaˬ hui mvuhˇ naw ma hkʼoˆ ve Awˬ pa htaꞈ ka tiꞈ yeˬ ve kʼo, yawˇ ha lehˬ jaˇ tuˬ yoˬ.—Tawˇ naˉ ve 27:11.

9. Aˬ htoꞈ ma pa taw Iˉsaˍreˍlaˆ chaw awˬ chawˇ te daꞈ ve tuˉ tanˇ tuˬ tuˉ tanˇ ve le?

⁹ Henˇ tuˬ ve 2: Ngaˬ hui Yaˬhoˉvaˬ ve kanˉ te ve lehˬ yawˇ htaꞈ awˬ bon uiˍ jaˇ kʼoˆ piˇ gaˇ ve pa taw yoˬ. Iˉsaˍreˍlaˆ chaw awˬ co˗e htaˇ oˉ kʼoˍ pui ve hkʼaw a yeˇ uiˍ jaˇ ve lehˬ awˬ chawˇ te daꞈ ve tuˉ tanˇ tuˬ htaꞈ teˇ geh nyi sheˍ. * Iˉsaˍreˍlaˆ chaw awˬ chawˇ te daꞈ ve tuˉ tanˇ tuˬ “bon htaꞈ chiˇ mvuh ve” Oˉ kʼoˍ pui ve liꞈ hkʼaw ngaˬ hui htaꞈ maˍ laˇ ve yoˬ. (Oˉ kʼoˍ pui ve 7:11-13, 16-18) Yawˇ chi hkʼe te ve lehˬ gʼa te cawˇ ve htaꞈ pa taw te ve maˇ heˆ, yawˇ te gaˇ ve htaꞈ pa taw te ve yoˬ. Yawˇ Yaˬhoˉvaˬ Gʼuiˬ sha htaꞈ haꞈ ve pa taw, awˬ chawˇ te daꞈ ve tuˉ tanˇ tuˬ tuˉ tanˇ htaˇ, yawˇ ha lehˬ ha kʼa ve hkʼaw te ve yoˬ. Chi hkʼe tuˉ tanˇ ve chaw lehˬ yawˇ ve yehˬ kʼa leh paw hkuˇ teˇ hpaˍ tuˉ tanˇ taˍ ve shaˍ htaꞈ caˇ ve yoˬ. Yaꞈ hkʼaˇ, to nuˇ to shaˆ hkʼaw ve teˇ hpaˍ hpaˍ kʼo yawˇ hui maˇ caˇ. Oˇ ve teˇ hpaˍ Yaˬhoˉvaˬ htaꞈ ceh tanˇ piˇ ve yoˬ. Aˬ htoꞈ ma teˇ hpaˍ cawˬ ve teˇ geh nyi sheˍ.

10. Oˉ kʼoˍ pui ve liꞈ 3:6, 12, 14-16 hkʼaw awˬ chawˇ te daꞈ ve tuˉ tanˇ tuˬ ve htaꞈ kʼoˆ htaˇ, Yeˍsuˆ Yaˬhoˉvaˬ ve kanˉ te ve htaꞈ hkʼaˬ hkʼe te shuˍ daꞈ ve le?

 ¹⁰ Henˇ tuˬ ve 3: Ngaˬ hui Yaˬhoˉvaˬ htaꞈ haꞈ ve pa taw, daꞈ jaˇ ve awˬ ceuˬ yawˇ htaꞈ piˇ ve. To nuˇ to shaˆ hkʼaw ve awˬ chu Yaˬhoˉvaˬ awˬ pon kʼo daꞈ jaˇ. Chi hkʼoˆ kaꞈ, awˬ lanˇ shiˍ lehˬ daꞈ jaˇ ve tehꞈ yawˇ kʼawꞈ kʼoˆ ve yoˬ. (Oˉ kʼoˍ pui ve 3:6, 12, 14-16 gʼaw sheˍ.) Iˉsaˍreˍlaˆ chaw to nuˇ to shaˆ ve awˬ chu leh daꞈ jaˇ ve awˬ ceuˬ Yaˬhoˉvaˬ htaꞈ piˇ ve kʼo, yawˇ nyi hkʼaˇ suh jaˇ tuˬ yoˬ. Iˉsaˍreˍlaˆ chaw awˬ ceuˬ chi ve teˇ hpaˍ tanˇ piˇ ve lehˬ daꞈ jaˇ ve awˬ ceuˬ Yaˬhoˉvaˬ htaꞈ piˇ gaˇ ve tehꞈ hpeuꞈ maw piˇ ve yoˬ. Chi ve hkʼa shuˍ Yeˍsuˆ Yaˬhoˉvaˬ htaꞈ haꞈ ve pa taw, yawˇ ha lehˬ ha kʼa ve hkʼaw daꞈ jaˇ ve awˬ ceuˬ Yaˬhoˉvaˬ htaꞈ piˇ ve lehˬ yawˇ te gʼa ve hkʼe te ve yoˬ. (Yoˇhanˬ 14:31) Yeˍsuˆ Gʼuiˬ sha ve a loˍ awˬ hkʼaˇ suh gʼaꞈ te ve lehˬ ha lehˬ tuˬ hpehꞈ leh, yawˇ Gʼuiˬ sha ve awˬ liˇ tawˇ hkawˇ htaꞈ haꞈ jaˇ. (Chiˇ mvuh ve 40:8) Yeˍsuˆ Yaˬhoˉvaˬ ve kanˉ ha lehˬ ha kʼa te ve htaꞈ yawˇ mawˬ htaˇ ha lehˬ jaˇ!

11. Ngaˬ hui Gʼuiˬ sha ve kanˉ te ve, awˬ chawˇ te daꞈ ve tuˉ tanˇ tuˬ htaꞈ hkʼaˬ hkʼe shuˍ ve le? Chi ngaˬ hui htaꞈ awˬ gʼaˇ hkʼaˬ hkʼe peꞈ laˇ ve le?

¹¹ Yaˬhoˉvaˬ ve kanˉ te ve lehˬ awˬ chawˇ te daꞈ ve tuˉ tanˇ tuˬ htaꞈ shuˍ ve yoˬ. Chi ngaˬ hui Yaˬhoˉvaˬ htaꞈ hkʼaˬ hkʼe dawˇ ve hpeuꞈ maw piˇ ve yoˬ. Ngaˬ hui Yaˬhoˉvaˬ htaꞈ haꞈ ve pa taw, daꞈ jaˇ ve awˬ ceuˬ yawˇ htaꞈ piˇ ve yoˬ. Laiˉ lanˬ gʼaˇ Yaˬhoˉvaˬ leh yawˇ ve awˬ liˇ awˬ hkʼaˇ htaꞈ haꞈ ve pa taw, yawˇ ve kanˉ ha lehˬ ha kʼa te ve htaꞈ mawˬ htaˇ, yawˇ nyi hkʼaˇ suh jaˇ. Yaˬhoˉvaˬ ngaˬ hui te ve awˬ ceuˬ htaꞈ ceh nyi ve maˇ heˆ, ngaˬ hui te ve awˬ hkʼaˇ htaꞈ yawˇ awˬ hpfuhˇ shiˍ ve tehꞈ tawnˇ taˍ ve kʼo awˬ gʼaˇ gʼa ve yoˬ. Tawˇ pa haˉ te kʼo, nawˬ a shaꞈ maˇ˗oˬ leh Gʼuiˬ sha ve kanˉ te gaˇ ve hkʼe te maˇ gʼa ve kʼo, nawˬ te gʼa ve hkʼe ceh te ve Yaˬhoˉvaˬ na gʼa ve yoˬ. Nawˬ Gʼuiˬ sha ve kanˉ a ciˉ ceh te gʼa ve htawˇ, nawˬ nyi ma hkʼaw te gaˇ ve htaꞈ te gʼa tuˬ Yaˬhoˉvaˬ awˬ gʼaˇ peꞈ laˇ ve yoˬ. Nawˬ daꞈ jaˇ ve awˬ ceuˬ Yaˬhoˉvaˬ htaꞈ piˇ ve yawˇ ha lehˬ jaˇ.

12. Awˬ chawˇ te daꞈ ve tuˉ tanˇ tuˬ htaꞈ Yaˬhoˉvaˬ hkʼaˬ hkʼe dawˇ ve le? Chi ngaˬ hui htaꞈ awˬ gʼaˇ hkʼaˬ hkʼe peꞈ laˇ ve le?

¹² Awˬ chawˇ te daꞈ ve tuˉ tanˇ tuˬ ngaˬ hui htaꞈ hkʼaˬ hkʼe maˍ laˇ ve le? To nuˇ to shaˆ hkʼaw daꞈ jaˇ ve tuˉ tanˇ htaˇ, Yaˬhoˉvaˬ nyi hkʼaˇ suh jaˇ. Yaˬhoˉvaˬ ve kanˉ ngaˬ hui ha lehˬ ha kʼa te ve kʼo, yawˇ nyi hkʼaˇ suh jaˇ. (Kawˇlawˇsehˇ 3:23) Nawˬ htaꞈ Yaˬhoˉvaˬ nyi hkʼaˇ suh jaˇ ve htaꞈ dawˇ nyi sheˍ. Nawˬ Gʼuiˬ sha ve kanˉ hkʼaˬ hkʼe taw te gʼa ve htawˇ, nawˬ te ve awˬ ceuˬ awˬ hpfuhˇ hkʼaˆ jaˇ ve mawˇ hkʼe hpehꞈ leh yawˇ hkʼaˬ htaˆ kaꞈ tawnˇ taˍ tuˬ yoˬ.—Maꞈhtehˍ 6:20; Heˍbrehˇ 6:10.

13. Oˉ kʼoˍ pui ve liꞈ 9:23, 24 hkʼaw kʼoˆ taˍ ve hkʼe, paw hkuˇ leuˆ taˍ ve htaꞈ Yaˬhoˉvaˬ haꞈ yuˬ ve tehꞈ hkʼaˬ hkʼe hpeuꞈ maw piˇ ve le?

¹³ Henˇ tuˬ ve 4: Yaˬhoˉvaˬ yawˇ ve kanˉ hkʼaˇ miˬ guiˬ hkʼoˆ ve htaꞈ awˬ bon naꞈ piˇ chehˇ ve. Yeˍsuˆ maˇ laˬ sheˍ 1512 hkʼawꞈ htaˇ, Siˉnaˆ hkʼaw paˇ lo daꞈ kehˬ ve aˉ po kʼo bon yehˬ tanˬ te htaˇ, aˬ htoꞈ ma hpehꞈ la ve htaꞈ teˇ geh nyi sheˍ. (Tawˆ kʼai ve 40:17) Oˇ ve teˇ yanˇ Moˉseˍ lehˬ Aˍronˍ leh Aˍronˍ ve yaˇ teˇ hpaˍ paw hkuˇ te tuˬ leuˆ ve yoˬ. Paw hkuˇ teˇ hpaˍ to nuˇ to shaˆ awˉ lawˉ teˇ pawˆ tuˉ tanˇ ve htaꞈ Iˉsaˍreˍlaˆ chaw ca hpoˆ nyi la ve yoˬ. (Oˉ kʼoˍ pui ve 9:1-5) Paw hkuˇ leuˆ yuˬ gehˇ sheˍ ve htaꞈ Yaˬhoˉvaˬ haꞈ yuˬ ve tehꞈ hkʼaˬ hkʼe hpehꞈ maw piˇ ve le? Aˍronˍ leh Moˉseˍ mvuhˇ miˬ yaˇ htaꞈ awˬ bon naꞈ piˇ taˍ ve tuˉ tanˇ tuˬ htaꞈ Yaˬhoˉvaˬ lehˬ aˬ miˍ ce la piˇ leh toꞈ baˬ tcuh ve yoˬ.—Oˉ kʼoˍ pui ve 9:23, 24 gʼaw sheˍ.

14. Aˍronˍ leh Aˍronˍ ve yaˇ teˇ hpaˍ paw hkuˇ te ve Yaˬhoˉvaˬ haꞈ yuˬ ve ngaˬ hui awˬ pon a yeˇ hkʼaˬ hkʼe uiˍ ve le?

¹⁴ Yaˬhoˉvaˬ mvuhˇ naw ma hkʼoˆ aˬ miˍ ce la tcuh ve hkʼaˬ hkʼe hpeuꞈ maw piˇ ve le? Aˍronˍ leh  Aˍronˍ ve yaˇ teˇ hpaˍ paw hkuˇ te tuˬ Yaˬhoˉvaˬ leuˆ ve htaꞈ haꞈ yuˬ ve tehꞈ hpeuꞈ maw piˇ ve yoˬ. Yaˬhoˉvaˬ paw hkuˇ teˇ hpaˍ htaꞈ ga piˇ ve tehꞈ Iˉsaˍreˍlaˆ chaw hkʼa dehꞈ gʼa mawˬ htaˇ yawˇ hui kaꞈ gʼa ga cawˇ ve tehꞈ shiˍ la ve yoˬ. Chi ngaˬ hui awˬ pon a yeˇ hkʼaˬ hkʼe uiˍ ve le? Iˉsaˍreˍlaˆ chaw awˬ co˗e htaˇ paw hkuˇ lehˬ aˉ yanˇ uiˍ jaˇ. Yeˍsuˆ lehˬ uiˍ jaˇ mvuh jaˇ ve Paw hkuˇ lonˉ hpehꞈ leh 144,000 gʼaˇ kaꞈ mvuhˇ naw ma hkʼoˆ Yeˍsuˆ geh paw hkuˇ leh jawˇ mawˇ hpehꞈ tuˬ yoˬ.—Heˍbrehˇ 4:14; 8:3-5; 10:1.

15-16. Yaˬhoˉvaˬ “ka tiꞈ yeˬ leh cuˇ yiˍ cawˬ ve awˬ ceˬ” htaꞈ haꞈ yuˬ ve tehꞈ hkʼaˬ hkʼe hpeuꞈ maw laˇ ve le?

¹⁵ 1919 hkʼawꞈ htaˇ leuˆ yuˬ taˍ ve awˬ moˍ ehˉ htaꞈ “ka tiꞈ yeˬ leh cuˇ yiˍ cawˬ ve awˬ ceˬ” te tcuh ve yoˬ. Awˬ ceˬ teˇ hpaˍ htaꞈ hto toˇ ve shehˍ kʼai tcuh leh, Yeˍsuˆ awˬ hkʼaˇ suh gʼaꞈ yuˬ ve chaw htaꞈ “awˬ yanˇ cawˇ lehˍ caˇ tuˬ dawˬ tuˬ pehˬ piˇ” tcuh ve yoˬ. (Maꞈhtehˍ 24:45) Ka tiꞈ yeˬ leh cuˇ yiˍ cawˬ ve awˬ ceˬ htaꞈ Gʼuiˬ sha haꞈ yuˬ ve tehꞈ ngaˬ hui hkʼa tawˍ lehˆ mawˬ˗aw laˇ?

¹⁶ Saˍtanˍ leh yawˇ hpawˇ chehˇ ve chaw ka tiꞈ yeˬ leh cuˇ yiˍ cawˬ ve awˬ ceˬ ve kanˉ htaꞈ jehˇ tcuh gaˇ jaˇ. Yawˇ hui Yaˬhoˉvaˬ maˇ ga laˇ tcuh ve kʼo, kanˉ chi htaꞈ te gʼa tuˬ awˬ hkʼaˇ maˇ cawˬ. Ka tiꞈ yeˬ leh cuˇ yiˍ cawˬ ve awˬ ceˬ maꞈ lonˉ 2 pawˆ pawˆ kaꞈ yawˇ hui htaꞈ heuˆ la kuiˬ cawˬ ve, gʼaˇ hteꞈ fawˉ mehˍ piˇ ve, miˬ guiˬ hkʼoˆ tanˇ kaˬ hpawˇ heuˆ la kuiˬ cawˬ ve, leh maˇ hteˇ maˇ cawˇ ve te piˇ leh Yeˍsuˆ awˬ hkʼaˇ suh gʼaꞈ yuˬ ve chaw htaꞈ caˇ tuˬ hkʼa shuˍ liꞈ kʼoˆ leh awˬ nu ve teˇ hpaˍ gu piˇ ve yoˬ. Chi teˇ hkui ngaˬ hui liꞈ kʼoˆ leh awˬ nu ve teˇ hpaˍ cawˬ maˇ jaˇ ve htaꞈ dawˇ nyi sheˍ. Liꞈ kʼoˆ 900 chaw ceuˬ hpaˆ cawˬ leh a hkʼe leˇ piˇ ve yoˬ! Chi lehˬ Yaˬhoˉvaˬ ka tiꞈ yeˬ leh cuˇ yiˍ cawˬ ve awˬ ceˬ htaꞈ ga piˇ chehˇ ve yoˬ. Hkʼa tawˍ lehˆ gʼa mawˬ ve lehˬ hto toˇ ve yoˬ. Chi teˇ hkui  “miˬ guiˬ hkʼoˆ teˇ kaˬ le le lo” hto toˇ chehˇ ve yoˬ. (Maꞈhtehˍ 24:14) Yaˬhoˉvaˬ yawˇ ve kanˉ hkʼaˇ htaꞈ beˆ maˍ leh awˬ bon naꞈ piˇ chehˇ ve yoˬ.

17. Ngaˬ hui Yaˬhoˉvaˬ ve kanˉ hkʼaˇ hpawˇ chehˇ ve tehꞈ hkʼaˬ hkʼe hpeuꞈ maw piˇ gʼa ve le?

¹⁷ ‘Miˬ guiˬ hkʼoˆ Gʼuiˬ sha ve kanˉ hkʼaˇ hkʼaw ngaˬ gʼa chehˇ ve ha lehˬ˗aˬ laˇ?’ tehꞈ a shu yawˇ awˬ to htaꞈ na nyi cawˇ ve yoˬ. Moˉseˍ leh Aˍronˍ ve awˬ co˗e htaˇ, Yaˬhoˉvaˬ yawˇ leuˆ yuˬ taˍ ve chaw htaꞈ haꞈ yuˬ ve tehꞈ hpeuꞈ maw piˇ tuˬ, mvuhˇ naw ma lo aˬ miˍ ce la tcuh ve hkʼa shuˍ, chi teˇ hkui kaꞈ yawˇ ve kanˉ hkʼaˇ htaꞈ haꞈ yuˬ chehˇ ve tehꞈ hkʼa tawˍ lehˆ hpeuꞈ maw laˇ ve yoˬ. Ngaˬ hui Yaˬhoˉvaˬ ve kanˉ hkʼaˇ hkʼaw gʼa chehˇ ve ha lehˬ jaˇ. (1 Hteˇsaˍlawˇniˆ 5:18, 19) Ngaˬ hui Yaˬhoˉvaˬ ve kanˉ hkʼaˇ hpawˇ chehˇ ve tehꞈ hkʼaˬ hkʼe hpeuꞈ maw piˇ gʼa tuˬ le? Chi hkʼe te gʼa tuˬ, Liꞈ hpu, liꞈ kʼoˆ, awˬ nu ve teˇ hpaˍ hkʼaw, Hkriꞈ yaˇ awˬ moˍ hkʼaw hpawnˬ daꞈ ve leh hpawnˬ daꞈ lonˉ hkʼaw, ngaˬ hui gʼa henˇ ve htaꞈ gʼaꞈ te ve kʼo hto toˇ leh shu htaꞈ Liꞈ hpu maˍ piˇ ve te gʼa ve hkʼe te ve yoˬ.—1 Kawˇrenˍhtuˆ 15:58.

18. Nawˬ aˬ htoꞈ ma te tuˬ dawˇ teh taˍ ve le?

¹⁸ Oˉ kʼoˍ pui ve liꞈ hkʼaw ngaˬ hui a shaꞈ teꞈ kuiˬ lo yuˬ yehˇ cawˇ ve yoˬ. Ngaˬ hui ve tuˉ tanˇ tuˬ htaꞈ Yaˬhoˉvaˬ haꞈ yuˬ laˇ tuˬ yawˇ nyi hkʼaˇ suh tuˬ te cawˇ ve yoˬ. Ngaˬ hui Yaˬhoˉvaˬ htaꞈ awˬ bon uiˍ jaˇ kʼoˆ piˇ gaˇ ve pa taw, yawˇ ve kanˉ te ve yoˬ. Ngaˬ hui Yaˬhoˉvaˬ htaꞈ haꞈ ve pa taw, daꞈ jaˇ ve awˬ ceuˬ yawˇ htaꞈ piˇ gaˇ ve yoˬ. Chi beuꞈ teˇ co˗e Yaˬhoˉvaˬ yawˇ ve kanˉ hkʼaˇ htaꞈ awˬ bon naꞈ piˇ chehˇ ve htaꞈ ga tuˬ ngaˬ hui te gʼa ve hkʼe te cawˇ ve yoˬ. Chi hkʼa peu˗eˬ ngaˬ hui te chehˇ ve kʼo, Yaˬhoˉvaˬ ve shaˉ hkiˆ hpehꞈ leh awˬ hpfuhˇ shiˍ ve tehꞈ yawˇ htaꞈ hpeuꞈ maw piˇ chehˇ ve yoˬ!