1-2. (a) Eˇfeˇsuꞈ liꞈ 6:16 hkʼaw kʼoˆ taˍ ve hkʼe, aˬ htoꞈ ma te ngaˬ hui ‘yonˍ ve htanˬ tuˬ’ cawˬ cawˇ ve le? (b) Ngaˬ hui aˬ htoꞈ ma ve awˬ lawn htaꞈ chaˬ nyi tuˬ le?

 Nawˬ ‘yonˍ ve htanˬ tuˬ’ cawˬ˗aw laˇ? (Eˇfeˇsuꞈ 6:16 gʼaw sheˍ.) Cawˬ ve yoˬ. Htanˬ tuˬ awˬ to htaꞈ haꞈ shaˉ laˇ ve hkʼe, nawˬ ve yonˍ ve, haˉ chawˇ haˉ paˆ maˇ gʼa te tuˬ, hehnˇ ve maˇ gʼa te tuˬ, leh chi beuꞈ teˇ co˗e Gʼuiˬ sha ve awˬ liˇ awˬ hkʼaˇ htaꞈ maˇ hawˍ daꞈ ve maˇ gʼa te tuˬ haꞈ shaˉ laˇ ve yoˬ.

² Ngaˬ hui “awˬ leh meuˇ ve” awˬ yanˇ hkʼaw chehˇ ve pa taw, ngaˬ hui ve yonˍ ve htaꞈ gʼaˇ hteꞈ lawˇ nyi laˇ ve yoˬ. (2 Tiˆmoˉseˍ 3:1) Nawˬ ve yonˍ ve htanˬ tuˬ hkʼa dehꞈ daꞈ chehˇ sheˍ ve le naˍ nawˬ hkʼaˬ hkʼe te chaˬ nyi gʼa tuˬ le? Leh htanˬ tuˬ htaꞈ nawˬ hkʼaˬ hkʼe te hkʼa dehꞈ gʼawˆ tiˍ gʼa tuˬ le? Na hkawˇ chi ve teˇ hpaˍ htaꞈ ngaˬ hui teˇ geh chaˬ nyi tuˬ yoˬ.

3. Maꞈ yaˇ yawˇ hui ve htanˬ tuˬ htaꞈ hkʼaˬ hkʼe gʼa te cawˇ ve le? Aˬ htoꞈ ma pa taw le?

³ Liꞈ hpu ve awˬ co˗e htaˇ, maꞈ yaˇ htanˬ tuˬ htaꞈ shaˍ guiˬ hoˆ taˍ ve yoˬ. Htanˬ tuˬ daꞈ leh yawˇ maˇ gʼa caˇ tuˬ maꞈ yaˇ hkʼaˬ htaˆ kaꞈ shaˍ chu shehˆ ve yoˬ. Maꞈ yaˇ yawˇ ve htanˬ tuˬ luˬ ve htaꞈ mawˬ ve kʼo, gʼuˇ suhˍ teˇ pawˆ maꞈ bawˆ ve hkʼaw yehˇ gʼa tuˬ yawˇ laꞈ haˉ gu ve yoˬ. Awˬ lawn chi ngaˬ hui ve yonˍ ve htaꞈ hkʼaˬ hkʼe te caˉ daꞈ ve le?

4. Aˬ htoꞈ ma te nawˬ ve yonˍ ve htanˬ tuˬ hkʼa dehꞈ chaˬ nyi cawˇ ve le? Leh hkʼaˬ hkʼe te gʼa tuˬ le?

⁴ Oˇ htaˇ ve maꞈ yaˇ hkʼa shuˍ, maꞈ bawˆ tuˬ hkʼaˬ htaˆ kaꞈ gu hehnˇ taˍ ve hkʼe, yonˍ ve htanˬ tuˬ hkʼa dehꞈ chaˬ nyi leh gʼa haꞈ shaˉ ve yoˬ. Hkriꞈ yaˇ lehˬ co ha hpawˇ ve maꞈ te daꞈ leh neˇ teˇ hpaˍ kaꞈ yoˬ. (Eˇfeˇsuꞈ 6:10-12) Nawˬ yonˍ ve htanˬ tuˬ teˇ gʼaˇ kaꞈ haꞈ shaˉ laˇ maˇ gʼa. Tawˍ ve tsuhˇ ve leh beˬ ve lawˇ ve htaꞈ gʼa hpuˇ tuˬ nawˬ gu  hehnˇ˗oˬ ve tehꞈ hkʼaˬ hkʼe te shiˍ gʼa ve le? Awˉ lawˉ teˇ hkʼaˇ nawˬ Yaˬhoˉvaˬ ga laˇ tuˬ bon lawˬ sheˍ. Nawˬ Gʼuiˬ sha dawˇ ve hkʼe dawˇ tuˬ yawˇ ve tawˇ hkawˇ htaꞈ yehˇ sheˍ. (Heˍbrehˇ 4:12) Liꞈ hpu hkʼaw kʼoˆ ve, “nawˬ ve nyi ma awˬ tawˬ hkʼa gaˬ [Yaˬhoˉvaˬ] htaꞈ gʼaˇ va˗o. Nawˬ ve cuˇ yiˍ htaꞈ a ciˉ kaꞈ taˇ gʼaˇ va.” (Tawˇ naˉ ve 3:5, 6) Liꞈ hpu chi teˇ tawn htaꞈ dawˇ nyi htaˇ, maˇ maw ve awˬ yanˇ ngaˬ hui dawˇ cheˆ ve htaꞈ kʼawꞈ dawˇ nyi cawˇ ve yoˬ. Tawˇ pa haˉ te kʼo, nawˬ hpu hpawˇ dawˇ haˍ jaˇ ve laˇ? Heˍbrehˇ liꞈ 13:5 hkʼaw Yaˬhoˉvaˬ ka tiꞈ te taˍ laˇ ve htaꞈ dawˇ nawˇ˗aw laˇ? Oˇ kaˬ lo kʼoˆ ve, “ngaˬ nawˬ htaꞈ hkʼaˬ htaˆ kaꞈ maˇ hpaˆ, hkʼaˬ htaˆ kaꞈ maˇ baˬ.” Ka tiꞈ chi ve Yaˬhoˉvaˬ nawˬ htaꞈ ga laˇ tuˬ nawˬ yonˍ gʼa˗aw laˇ? Nawˬ hkʼa dehꞈ yonˍ ve kʼo, yonˍ ve htanˬ tuˬ daꞈ chehˇ sheˍ ve yoˬ.

5. Nawˬ ve yonˍ hkʼaˇ htaꞈ chaˬ nyi htaˇ, aˬ htoꞈ ma htaꞈ mawˬ tuˬ le?

⁵ Nawˬ ve yonˍ hkʼaˇ htaꞈ hkʼa dehꞈ chaˬ nyi htaˇ, nawˬ anˇ tuˬ yoˬ. Nawˬ ve gʼaˇ nuˇ kuiˬ teˇ tcuhˉ teˇ yanˇ maˇ gʼa chaˬ nyi ve htaꞈ mawˬ tuˬ yoˬ. Tawˇ pa haˉ te kʼo, dawˇ haˍ ve, heˍ ve, leh awˬ gʼaˇ maˇ nuˇ cawˇ kaꞈ awˬ gʼaˇ nuˇ ve nawˬ ve yonˍ hkʼaˇ htaꞈ heuˆ la kuiˬ cawˬ ve yoˬ. Awˬ lawn chi nawˬ htaꞈ hpehꞈ la puiˉ ve kʼo, nawˬ ve yonˍ hkʼaˇ chi aꞈ kehˉ maˇ gʼa luˬ kʼai tuˬ hkʼaˬ hkʼe te gʼa ve le?

6. Awˬ bon cawˬ ve htaꞈ dawˇ haˍ ve aˬ htoꞈ ma teˇ hpaˍ cawˬ ve le?

⁶ Dawˇ haˍ ve teˇ ceuˬ ceuˬ kʼo awˬ bon cawˬ ve yoˬ. Tawˇ pa haˉ te kʼo, Yaˬhoˉvaˬ leh Yeˍsuˆ ha lehˬ tuˬ maˇ te piˇ la ve htaꞈ ngaˬ hui dawˇ haˍ ve yoˬ. (1 Kawˇrenˍhtuˆ 7:32) Ngaˬ hui venˇ baˆ uiˍ jaˇ ve htaꞈ te yaꞈ leh Yaˬhoˉvaˬ geh maˇ meuˆ daꞈ la ve htaꞈ dawˇ haˍ ve yoˬ. (Chiˇ mvuh ve 38:18) Chi hkʼoˆ kaꞈ teˇ pawˆ pawˆ kʼo, awˬ ca, yehˬ kʼa hkʼaw ve chaw htaꞈ nyi haˍ shaˉ ve leh awˬ viˉ awˬ nyi htaꞈ ha lehˬ tuˬ maˇ te piˇ la ve htaꞈ dawˇ haˍ ve yoˬ.—1 Kawˇrenˍhtuˆ 7:33; 2 Kawˇrenˍhtuˆ 11:28.

7. Tawˇ naˉ ve liꞈ 29:25 hkʼaw kʼoˆ taˍ ve hkʼe, aˬ htoꞈ ma te ngaˬ hui chaw yaˇ htaꞈ maˇ kawˆ cawˇ ve le?

⁷ Awˬ nu ve teˇ hkʼaˇ lehˬ maˇ dawˇ haˍ cawˇ kaꞈ dawˇ haˍ ve ngaˬ hui ve yonˍ hkʼaˇ htaꞈ heuˆ la kuiˬ cawˬ ve yoˬ. Tawˇ pa haˉ te kʼo, ngaˬ hui caˇ tuˬ leh veuꞈ kaˇ maˇ lawꞈ ve htaꞈ dawˇ haˍ ve yoˬ. (Maꞈhtehˍ 6:31, 32) Ngaˬ hui hkʼe tawn maˇ dawˇ haˍ tuˬ hpu shi mawˇ jeˬ htaꞈ gʼaꞈ ca ve yoˬ. Chi hkʼe te ve lehˬ hpu htaꞈ haꞈ la tuˬ yoˬ. Ngaˬ hui chi hkʼe dawˇ ve kʼo, Yaˬhoˉvaˬ htaꞈ hkʼa dehꞈ maˇ yonˍ leh co ha hpawˇ heuˆ la kuiˬ cawˬ ve yoˬ. (Maˍkuˆ 4:19; 1 Tiˆmoˉseˍ 6:10) Ngaˬ hui maˇ dawˇ haˍ cawˇ kaꞈ dawˇ haˍ ve awˬ nu ve teˇ hkʼaˇ lehˬ shu nyi ma maˇ sha tuˬ te piˇ la ve htaꞈ dawˇ haˍ ve yoˬ. Yaˬhoˉvaˬ nyi hkʼaˇ suh tuˬ te piˇ ve aꞈ kehˉ, chaw yaˇ kʼoˆ guiˇ gʼuiˬ guiˇ ve fawˉ mehˍ laˇ ve htaꞈ kawˆ ve yoˬ. Chi ve teˇ hpaˍ ngaˬ hui htaꞈ maˇ gʼa heuˆ la tuˬ Yaˬhoˉvaˬ ga laˇ tuˬ lawˬ sheˍ. Tawˍ ve tsuhˇ ve htaꞈ tawˍ daꞈ gʼaˇ tuˬ yonˍ ve haꞈ hanˉ ve leh loˍ ve awˬ ceuˬ htaꞈ lawˬ sheˍ.—Tawˇ naˉ ve 29:25 gʼaw sheˍ; Luˉkaꞈ 17:5.

8. Heˍ ve tawˇ htaꞈ ngaˬ hui aˬ htoꞈ ma te maˇ yonˍ cawˇ ve le?

⁸ Saˍtanˍ ‘heˍ ve awˬ pa hpehꞈ’ leh Yaˬhoˉvaˬ leh awˬ viˉ awˬ nyi ve awˬ lawn Saˍtanˍ uˉ peunˍ ve awˬ hawˉ lo chehˇ ve chaw htaꞈ heˍ tcuh ve yoˬ. (Yoˇhanˬ 8:44) Tawˇ pa haˉ te kʼo, Yaˬhoˉvaˬ ve kanˉ hkʼaˇ htaꞈ tawˍ daꞈ ve chaw, Yaˬhoˉvaˬ ve kanˉ hkʼaˇ vehˆsaiˉ, TV, leh awˬ lawn sha tanˇ teˇ hpaˍ hkʼaw maˇ heˆ heˆ ve bvuhꞈ keu tcuh ve yoˬ. Chi lehˬ Saˍtanˍ ve “aˬ miˍ to chehˇ ve hkʼaˆ ce” hkʼe hpehꞈ ve yoˬ. (Eˇfeˇsuꞈ 6:16) Heˍ ve tawˇ chi hkʼe ve shu ngaˬ hui htaꞈ kʼoˆ laˇ htaˇ, hkʼaˬ hkʼe te tuˬ le? Heˍ ve chi teˇ hpaˍ htaꞈ ngaˬ hui maˇ yonˍ. Aˬ htoꞈ ma pa taw le? Ngaˬ hui Yaˬhoˉvaˬ htaꞈ yonˍ  leh awˬ viˉ awˬ nyi htaꞈ gʼaˇ va ve pa taw yoˬ. Yaˬhoˉvaˬ ve kanˉ hkʼaˇ htaꞈ tawˍ daꞈ ve chaw geh maˇ caˉ daꞈ. Ngaˬ hui shiˍ gaˇ mawˬ gaˇ ve htaꞈ caˉ daꞈ ve teˇ ceuˬ kaꞈ yawˇ hui geh tawˇ gʼawˬ daꞈ tuˬ taˇ te laˇ tcuh.

9. Awˬ gʼaˇ nuˇ ve ngaˬ hui htaꞈ hkʼaˬ hkʼe heuˆ la kuiˬ cawˬ ve le?

⁹ Awˬ gʼaˇ nuˇ ve lehˬ ngaˬ hui ve yonˍ hkʼaˇ maˇ yonˍ yeˬ tuˬ te laˇ ve yoˬ. Ngaˬ hui ve shoꞈ shaꞈ ve htaꞈ yuˬ baˬ maˇ gʼa. Chi hkʼe te ve kʼo, awˬ vuiˬ htaꞈ a yeˇ maˇ yuˬ ve chaw hkʼe hpehꞈ ve yoˬ. Yaꞈ hkʼaˇ, teˇ pawˆ pawˆ kʼo ngaˬ hui awˬ gʼaˇ nuˇ leh shoꞈ shaꞈ ve ngaˬ hui ve dawˇ hkʼaˇ hkʼaw cawˬ tcuh ve kʼo, Yaˬhoˉvaˬ laꞈ shawnˍ peꞈ laˇ ve hkʼa dehꞈ nyi maˇ mawˬ. (Hpeuꞈ maˍ ve 21:3, 4) Awˬ gʼaˇ nuˇ ve lehˬ ngaˬ hui yonˍ yeˬ ve maˇ cawˬ leh maˇ te tcuhˉ taˍ tuˬ te laˇ ve yoˬ. (Tawˇ naˉ ve 24:10) Yaꞈ hkʼaˇ, ngaˬ hui chi hkʼe ve chaw hpehꞈ tuˬ maˇ loˍ.

10. Awˬ viˉ awˬ nyi yaˇ miˇ teˇ gʼaˇ ve awˬ lawn nawˬ htaꞈ aˬ htoꞈ ma maˍ laˇ ve le?

¹⁰ Aˍmeˬriˆkaꞈ mvuhˇ miˬ lo awˬ viˉ awˬ nyi yaˇ miˇ teˇ gʼaˇ ka tiꞈ yeˬ leh awˬ hpawˇ naˬ chehˇ ve nyi haꞈ shaˉ ve htaꞈ dawˇ nyi sheˍ. Yawˇ awˬ tcuhˆ puiˍ lo liꞈ bvuhꞈ feu leh kʼoˆ ve, “ngaˬ hui dawˇ haˍ jaˇ leh teˇ pawˆ pawˆ awˬ gʼaˇ nuˇ ve yoˬ. Yaꞈ hkʼaˇ, ngaˬ hui ve dawˇ law kuiˬ hkʼa tawˍ lehˆ mawˬ ve yoˬ. Ngaˬ hui ve yonˍ hkʼaˇ uiˍ la mvuh la tuˬ, awˬ gʼaˇ gʼa tuˬ awˬ lawn teˇ hpaˍ maˍ ve dawˇ cawˇ jaˇ.” Ngaˬ hui kaꞈ chi hkʼe beˆ maˍ laˇ leh awˬ gʼaˇ peꞈ laˇ tuˬ loˍ ve yoˬ. Awˬ ceuˬ chi ve teˇ hpaˍ Saˍtanˍ ngaˬ hui htaꞈ she pfuhˍ laˇ ve htaꞈ yeunˇ hkanˍ gʼaˇ tuˬ ga laˇ ve yoˬ. Ngaˬ hui awˬ gʼaˇ nuˇ ve htaꞈ yeunˇ hkanˍ gʼaˇ tuˬ yaˇ miˇ chi teˇ gʼaˇ ve awˬ lawn awˬ gʼaˇ peꞈ laˇ ve yoˬ! Ngaˬ hui hkʼaˬ hkʼe te gʼa tuˬ le? Nawˬ shoꞈ shaꞈ ve awˬ lawn teˇ hpaˍ Saˍtanˍ lawˇ nyi laˇ ve tehꞈ shawˍ sheˍ. Yaˬhoˉvaˬ lehˬ awˬ gʼaˇ peꞈ laˇ shehˍ hpaˇ hpehꞈ ve tehꞈ tawnˇ taˍ sheˍ. Yawˇ gu laˇ ve co ha hpawˇ ve caˇ tuˬ htaꞈ awˬ hpfuhˇ shiˍ sheˍ.

11. Ngaˬ hui ve yonˍ ve htanˬ tuˬ htaꞈ chaˬ nyi tuˬ a shu yawˇ awˬ to htaꞈ hkʼaˬ hkʼe na nyi cawˇ ve le?

¹¹ Nawˬ ve yonˍ ve htanˬ tuˬ hkʼaˬ teˇ tawn lo gu tuˬ mawˬ˗aw laˇ? Ponˬ laˬ ve hkʼaˬ nyiˇ ha pa maˇ gaˬ sheˍ htaˇ, maˇ dawˇ haˍ cawˇ kaꞈ dawˇ haˍ ve nawˬ jaw kʼai gʼa˗aw laˇ? Yaˬhoˉvaˬ ve kanˉ hkʼaˇ htaꞈ tawˍ daꞈ ve chaw kʼoˆ ve hkawˇ na leh gʼawˬ daꞈ˗aw laˇ? Nawˬ awˬ gʼaˇ nuˇ ve htaꞈ yeunˇ hkanˍ gʼaˇ˗aw laˇ? Nawˬ chi hkʼe te gʼa ve kʼo, nawˬ ve yonˍ ve htanˬ tuˬ daꞈ chehˇ sheˍ ve yoˬ. Yaꞈ hkʼaˇ, Saˍtanˍ laꞈ caˉ laiˉ  ceuˬ yehˇ leh ngaˬ hui htaꞈ te luˬ gaˇ ve pa taw, shaˍ tiꞈ gʼa te cawˇ ve yoˬ. Awˬ lawn teˇ lawn htaꞈ teˇ geh nyi sheˍ.

12. Mawˇ jeˬ htaꞈ sheˉ lai ve ngaˬ hui htaꞈ heuˆ la kuiˬ hkʼaˬ hkʼe cawˬ ve le?

¹² Mawˇ jeˬ htaꞈ sheˉ lai ve lehˬ ngaˬ hui ve yonˍ ve htanˬ tuˬ htaꞈ a yeˇ maˇ te tuˬ te laˇ ve yoˬ. Tcuh yaˇ Pawˇluꞈ kʼoˆ ve, “maꞈ yaˇ te chehˇ ve chaw hkʼaˬ ve teˇ gʼaˇ maˇ kʼoˆ, a shu yawˇ ve maꞈ poˍ nyi hkʼaˇ suh tuˬ te gaˇ ve pa taw, a shu yawˇ awˬ to awˬ pon kanˉ” maˇ te. (2 Tiˆmoˉseˍ 2:4) Awˬ tehˬ kʼo, Roˉmaꞈ ve maꞈ yaˇ tanˇ kaˬ te tuˬ a hkaw˗anˬ maˇ gʼa. Chi htaꞈ maˇ na yuˬ ve kʼo, maꞈ yaˇ heuˆ la kuiˬ hkʼaˬ hkʼe cawˬ ve le?

13. Aˬ htoꞈ ma te maꞈ yaˇ tanˇ kaˬ hpawˇ maˇ caˉ daꞈ cawˇ ve le?

¹³ Tawˇ pa haˉ teˇ maˬ htaꞈ dawˇ nyi sheˍ. Maꞈ yaˇ teˇ moˍ maꞈ te tuˬ mvuhˇ shawˉ htaˇ, aˉ htaw yehˇ jaw ve yoˬ. Yaꞈ hkʼaˇ, awˬ moˍ hkʼaw ve teˇ gʼaˇ mehˉ˗e ve yoˬ. Maꞈ yaˇ oˇ ve teˇ gʼaˇ venˇ hkʼaw lo chehˇ leh shinˍ hpaw ve yoˬ. Mvuhˇ hpeuꞈ la htaˇ maꞈ yaˇ teˇ hpaˍ laꞈ caˉ htaꞈ chaˬ nyi leh aˉ htaw suhˍ chehˇ ve yoˬ. Yaꞈ hkʼaˇ, shinˍ hpaw ve teˇ gʼaˇ gʼuˇ suhˍ teˇ nyi mawˇ hawˇ tuˬ gu chehˇ ve yoˬ. Awˬ nu ve teˇ nyi mvuhˇ shawˉ naꞈ htaˇ, maˇ dawˇ maˇ gaˇ ve hkʼaw canˇ paˍ bawˆ la ve yoˬ. Maꞈ yaˇ hkʼaˬ ve teˇ gʼaˇ tawˍ daꞈ gʼa tuˬ le, leh hkʼaˬ ve teˇ gʼaˇ awˬ hoˉ chiˇ mvuh piˇ ve htaꞈ gʼa keunˍ ve le? Leh a shu nawˬ awˬ paˇ lo chehˇ tcuh gaˇ ve le? Maꞈ yaˇ gu hehnˇ taˍ ve teˇ gʼaˇ laˇ, maˇ heˆ leh maˇ gu hehnˇ taˍ ve teˇ gʼaˇ laˇ?

14. Hkriꞈ ve maꞈ yaˇ lehˬ aˬ htoꞈ ma teˇ ceuˬ awˬ hpfuhˇ hkʼaˆ jaˇ ve tehꞈ shawˍ ve le?

¹⁴ Daꞈ ve maꞈ yaˇ hkʼe ngaˬ hui dawˇ teh taˍ ve htaꞈ hkʼaˬ htaˆ kaꞈ dawˇ nyi cawˇ ve yoˬ. Chi ve lehˬ Yaˬhoˉvaˬ leh Yeˍsuˆ nyi hkʼaˇ suh tuˬ awˬ pon yoˬ. Chi ve lehˬ miˬ guiˬ hkʼoˆ lo Saˍtanˍ te tcuh laˇ gaˇ ve aꞈ kehˉ awˬ hpfuhˇ hkʼaˆ jaˇ. Yaˬhoˉvaˬ ve kanˉ te tuˬ awˬ yanˇ leh awˬ gʼaˇ, ngaˬ hui ve yonˍ ve htanˬ tuˬ leh co ha hpawˇ ve laꞈ caˉ, hkʼaˬ htaˆ kaꞈ daꞈ chehˇ sheˍ le naˍ hkʼa dehꞈ gʼa chaˬ nyi ve yoˬ.

15. Pawˇluꞈ ngaˬ hui htaꞈ aˬ htoꞈ ma shaˍ tiꞈ peꞈ laˇ ve le? Leh aˬ htoꞈ ma pa taw le?

¹⁵ Yaꞈ hkʼaˇ, ngaˬ hui hkʼaˬ htaˆ kaꞈ shaˍ tiꞈ gʼa te ve yoˬ! Aˬ htoꞈ ma pa taw le? Tcuh yaˇ Pawˇluꞈ shaˍ  tiꞈ peꞈ laˇ ve, ‘paw sha la gaˇ ve chaw teˇ hpaˍ lehˬ, yonˍ ve teˇ ceuˬ htaꞈ hpfuhˆ baˬ taˉ’ tuˬ yoˬ. (1 Tiˆmoˉseˍ 6:9, 10) Ngaˬ hui a yeˇ maˇ uiˍ ve htaꞈ gʼaꞈ ca ve pa taw, “yonˍ ve teˇ ceuˬ htaꞈ hpfuhˆ baˬ taˉ” ve htaꞈ kʼoˆ gaˇ ve yoˬ. Chi hkʼe te ve kʼo, ngaˬ hui ve nyi ma “cuˇ yiˍ maˇ cawˬ ve awˬ hkʼoˆ kaꞈ te luˬ puiˉ ve sheˉ lai ve laiˉ ceuˬ awˬ hkʼaw lo ce loꞈ˗e ve yoˬ.” Ngaˬ hui heuˆ gaˇ ve teˇ hpaˍ nyi ma hkʼaw cawˬ tcuh ve kʼo, chi ve aˬ htoꞈ ma le hkʼa dehꞈ gʼa chaˬ nyi cawˇ ve yoˬ. Awˬ tehˬ kʼo, chi lehˬ ngaˬ hui htaꞈ te luˬ laˇ ve laꞈ caˉ hkʼe hpehꞈ ve yoˬ.

16. Maˍkuˆ liꞈ 10:17-22 hkʼaw bvuhꞈ taˍ ve hkʼe, ngaˬ hui aˬ htoꞈ ma na hkawˇ htaꞈ dawˇ nyi tuˬ ga laˇ ve le?

¹⁶ Tawˇ pa haˉ te kʼo, mawˇ maˇ maˇ vuiˬ gʼa tuˬ ngaˬ hui hpu cawˬ ve yoˬ. Ngaˬ hui maˇ loˍ ve mawˇ vuiˬ ve yaꞈ˗aw laˇ? Yaꞈ ve tiˉ maˇ heˆ. Yaꞈ hkʼaˇ, na hkawˇ chi ve teˇ hpaˍ htaꞈ dawˇ nyi sheˍ. Mawˇ teˇ ceuˬ ceuˬ vuiˬ tuˬ ngaˬ hui hpu lawꞈ ve htawˇ, awˬ yanˇ, awˬ gʼaˇ, leh mawˇ oˇ ve htaꞈ yehˇ leh nyi haꞈ shaˉ tuˬ ve awˬ yanˇ cawˬ˗aw laˇ? Chi hkʼoˆ kaꞈ, ngaˬ hui mawˇ oˇ ve htaꞈ tiˉ dawˇ nyi ve chaw hpehꞈ˗aw laˇ? Mawˇ htaꞈ tiˉ dawˇ nyi ve lehˬ Yeˍsuˆ hawˉ hkʼaˆ teˇ gʼaˇ htaꞈ Gʼuiˬ sha ve kanˉ te tuˬ kuˬ piˇ htaˇ, maˇ haꞈ yuˬ ve chaw hkʼe hpehꞈ˗aw laˇ? (Maˍkuˆ 10:17-22 gʼaw sheˍ.) Yaˬhoˉvaˬ ve a loˍ awˬ hkʼaˇ suh gʼaꞈ te tuˬ, awˬ yanˇ, awˬ gʼaˇ, htaꞈ awˬ hpfuhˇ shiˍ ve kʼo, a shaꞈ teꞈ hkʼaˇ caˇ lawꞈ dawˬ lawꞈ te ve daꞈ jaˇ!

17. Ngaˬ hui aˬ htoꞈ ma htaꞈ maˇ leunˇ cawˇ ve le?

¹⁷ Ngaˬ hui maꞈ bawˆ kuiˬ hkʼaw chehˇ leh teˇ nyi le le maꞈ bawˆ tuˬ gu hehnˇ taˍ ve tehꞈ maˇ leunˇ cawˇ ve yoˬ. (Hpeuꞈ maˍ ve 12:17) Awˬ viˉ awˬ nyi yonˍ ve htanˬ tuˬ htaꞈ ngaˬ hui ve awˬ tan gʼawˆ tiˍ taˍ laˇ maˇ gʼa. Ngaˬ hui ve htanˬ tuˬ a shu yawˇ hkʼaˇ yawˇ hkʼa dehꞈ gʼa gʼawˆ tiˍ taˍ ve yoˬ.

18. Aˬ htoꞈ ma te oˇ htaˇ ve maꞈ yaˇ htanˬ tuˬ htaꞈ hkʼa dehꞈ gʼa gʼawˆ tiˍ taˍ ve le?

¹⁸ Oˇ htaˇ ve maꞈ yaˇ maꞈ bawˆ kuiˬ hkʼaw haꞈ hanˉ ve pa taw, chiˇ mvuh ve htaꞈ gʼa keunˍ ve yoˬ. Yaꞈ hkʼaˇ, yawˇ aˉ hkʼaw lo kʼawꞈ la htaˇ htanˬ tuˬ maˇ cawˬ ve kʼo yaꞈ taw jaˇ. Roˉmaꞈ chaw ve chaˬ nyi tehˆ nyi paˍ Ta˗hki˗tuˆ kʼoˆ ve, “htanˬ tuˬ htaꞈ baˬ taˉ ve chaw lehˬ yaꞈ taw jaˇ.” Chi htaꞈ pa taw maꞈ yaˇ hkʼaˬ htaˆ kaꞈ htanˬ tuˬ htaꞈ yeˬ chaweh gʼa gʼawˆ tiˍ taˍ ve yoˬ.

19. Ngaˬ hui ve yonˍ ve htanˬ tuˬ htaꞈ hkʼaˬ hkʼe te hkʼa dehꞈ gʼawˆ tiˍ taˍ gʼa tuˬ le?

¹⁹ Ngaˬ hui ve yonˍ ve htanˬ tuˬ htaꞈ hkʼa dehꞈ gʼawˆ tiˍ taˍ gʼa tuˬ, Hkriꞈ yaˇ hpawnˬ daꞈ ve, Yaˬhoˉvaˬ ve awˬ meh leh yawˇ ve mvuhˇ miˬ awˬ lawn hkʼaˬ htaˆ kaꞈ shu htaꞈ kʼoˆ piˇ ve yoˬ. (Heˍbrehˇ 10:23-25) Chi hkʼoˆ kaꞈ bon lawˬ ve, teˇ nyi le le Liꞈ hpu gʼaw ve, leh ngaˬ hui teˇ ceuˬ le le te ve awˬ hkʼaw lo Liꞈ hpu hkʼaw beˆ maˍ laˇ ve htaꞈ yuˬ yehˇ ve yoˬ. (2 Tiˆmoˉseˍ 3:16, 17) Ngaˬ hui chi hkʼe te ve kʼo, Saˍtanˍ yehˇ ve laꞈ caˉ ngaˬ hui htaꞈ co co taiˍ taiˍ te luˬ laˇ maˇ gʼa. (Iˉsaˍyaˆ 54:17) Ngaˬ hui ve yonˍ ve htanˬ tuˬ ngaˬ hui htaꞈ haꞈ shaˉ laˇ tuˬ yoˬ. Awˬ viˉ awˬ nyi awˬ paˇ lo ngaˬ hui yeˬ chaweh huˉ taˍ gʼa tuˬ yoˬ. Ngaˬ hui teˇ nyi le le maꞈ bawˆ ve htaꞈ gʼaˇ tuˬ yoˬ. Yaꞈ hkʼaˇ, Yeˍsuˆ Saˍtanˍ leh yawˇ hpawˇ chehˇ ve chaw htaꞈ maꞈ te daꞈ leh gʼaˇ htaˇ, ngaˬ hui Yeˍsuˆ hpawˇ chehˇ ve a yeˇ uiˍ jaˇ ve lehˬ awˬ meꞈ awˬ hponˇ gʼa tuˬ yoˬ.—Hpeuꞈ maˍ ve 17:14; 20:10.