1. Laiˉ gʼaˇ kanˉ te ve htaꞈ hkʼaˬ hkʼe dawˇ ve le?

 Maˇ˗awˍ ve chaw kanˉ te ve htaꞈ hkʼaˬ hkʼe dawˇ ve le? Laiˉ mvuhˇ miˬ hkʼaw ve chaw oˇ htaˇ aꞈ kehˉ kanˉ te maˇ ve yoˬ. Yawˇ hui kanˉ maˇ jaˇ leh jehˇ tuˬ, yehˬ kʼa hkʼaw ve chaw geh chehˇ tuˬ, maˇ heˆ leh bon lawˬ˗e tuˬ kaꞈ awˬ yanˇ maˇ cawˬ. (Cuˇ yiˍ piˇ ve 2:23) Laiˉ gʼaˇ kʼo bawˬ leh laiˉ ceuˬ kʼoˆ leh kanˉ maˇ te.—Tawˇ naˉ ve 26:13, 14.

2-3. Yaˬhoˉvaˬ leh Yeˍsuˆ kanˉ te ve daꞈ ve henˇ yuˬ tuˬ hkʼaˬ hkʼe hpehꞈ ve le?

² Maˇ˗awˍ ve chaw keunˍ lawꞈ cawˇ lawꞈ ve dawˇ hkʼaˇ maˇ cawˬ. Yaꞈ hkʼaˇ, kanˉ te ve awˬ hkʼaˇ htaꞈ Yaˬhoˉvaˬ leh Yeˍsuˆ hkʼaˬ hkʼe dawˇ ve teˇ geh chaˬ nyi sheˍ. Yaˬhoˉvaˬ kanˉ te ve htaꞈ dawˇ cawˇ ve ngaˬ hui htawˇ dawˇ nawˬ dawˇ cawˬ tuˬ maˇ loˍ. Yeˍsuˆ kʼoˆ ve, “ngaˬ Awˬ pa lehˬ, chi beuꞈ hkʼa gaˬ kanˉ te chehˇ ve yoˬ. Ngaˬ htawˇ kanˉ te chehˇ ve yoˬ.” (Yoˇhanˬ 5:17) Gʼaw maˇ peuˬ ve mvuhˇ naw ma tcuh yaˇ, mvuhˇ naw ma miˬ naˆ ma, maˇ heˆ leh miˬ guiˬ hkʼoˆ daꞈ jaˇ ve awˬ ceuˬ hkʼa peu˗eˬ htaꞈ Yaˬhoˉvaˬ hpanˍ ve ngaˬ hui dawˇ nyi htaˇ, ngaˬ hui kaꞈ chiˇ mvuh ve liꞈ bvuhꞈ paˍ kʼoˆ ve hkʼe dawˇ ve yoˬ. Yawˇ kʼoˆ ve, ‘Yaˬhoˉvaˬ˗oˬ, nawˬ lehˬ cuˇ yiˍ htaꞈ yehˇ leh, awˬ ceuˬ hkʼa peu˗eˬ ve htaꞈ te hpanˍ taˍ ve yoˬ.’—Chiˇ mvuh ve 104:24.

³ Yeˍsuˆ kaꞈ yawˇ ve Awˬ pa htaꞈ henˇ yuˬ ve yoˬ. Gʼuiˬ sha “mvuhˇ naw ma” htaꞈ hpanˍ htaˇ Yeˍsuˆ gʼa ga ve yoˬ. Yeˍsuˆ Yaˬhoˉvaˬ geh chehˇ leh yawˇ ve laꞈ shaˉ maˉ te paˍ hpehꞈ ve yoˬ. (Tawˇ naˉ ve 8:27-31) Peuˬ hkʼawꞈ nawˉ Yeˍsuˆ miˬ guiˬ hkʼoˆ chehˇ htaˇ kaꞈ kanˉ te puiˉ jaˇ. Yeˍsuˆ awˬ pon kʼo, Yaˬhoˉvaˬ ve kanˉ lehˬ yawˇ ve caˇ tuˬ hkʼe  hpehꞈ ve yoˬ. Gʼuiˬ sha yawˇ htaꞈ peu laˇ ve tehꞈ yawˇ te ve teˇ ceuˬ le le hkʼaw hpeuꞈ maw piˇ ve yoˬ.—Yoˇhanˬ 4:34; 5:36; 14:10.

4. Yaˬhoˉvaˬ leh Yeˍsuˆ gʼaˇ jehˇ ve awˬ lawn ngaˬ hui htaꞈ aˬ htoꞈ ma maˍ laˇ ve le?

⁴ Yaˬhoˉvaˬ leh Yeˍsuˆ kanˉ maˇ maˇ te ve hkʼe ngaˬ hui hkʼaˬ htaˆ kaꞈ gʼa te ve htaꞈ kʼoˆ gaˇ ve laˇ? Maˇ heˆ. Awˬ tehˬ kʼo Yaˬhoˉvaˬ kanˉ te peuˬ hkʼawꞈ nawˉ, heuˬ ve maˇ cawˬ leh gʼaˇ jehˇ tuˬ maˇ loˍ. Yaꞈ hkʼaˇ, Liꞈ hpu hkʼaw kʼoˆ ve, Gʼuiˬ sha mvuhˇ naw ma leh miˬ guiˬ htaꞈ hpanˍ peuˬ hkʼawꞈ nawˉ yawˇ “kanˉ maˇ te leh gʼaˇ jehˇ chehˇ taˍ ve yoˬ.” (Tawˆ kʼai ve 31:17) Chi kʼoˆ gaˇ ve lehˬ Yaˬhoˉvaˬ teˇ ceuˬ le le htaꞈ hpanˍ leh yawˇ hpanˍ taˍ ve awˬ ceuˬ htaꞈ ha lehˬ chehˇ ve yoˬ. Yeˍsuˆ miˬ guiˬ hkʼoˆ chehˇ ve awˬ yanˇ yawˇ kanˉ te hkeuꞈ ve htawˇ, yawˇ gʼaˇ jehˇ ve leh awˬ chawˇ geh awˍ caˇ tuˬ awˬ yanˇ ca ve yoˬ.—Maꞈhtehˍ 14:13; Luˉkaꞈ 7:34.

5. Laiˉ gʼaˇ shoꞈ shaꞈ ve aˬ htoꞈ ma gʼa hpuˇ ve le?

⁵ Gʼuiˬ sha ve kanˉ te ve chaw ha lehˬ ve cawˬ tuˬ Liꞈ hpu hkʼaw awˬ gʼaˇ peꞈ laˇ ve yoˬ. Yawˇ hui kaiˬ ve chaw gʼa hpehꞈ ve yoˬ. (Tawˇ naˉ ve 15:19) Teˇ pawˆ pawˆ kʼo, nawˬ yehˬ kʼa gʼa caˇ tuˬ kanˉ gʼa te ve yoˬ. Yeˍsuˆ ve awˬ laꞈ gʼawˇ teˇ gʼaˇ le le kaꞈ hto toˇ ve awˬ vuiˬ cawˬ ve htawˇ, gʼaˇ gʼa jehˇ cawˇ ve yoˬ. Kanˉ te caˇ ve, Gʼuiˬ sha ve kanˉ te ve, leh gʼaˇ jehˇ ve teˇ pawˆ pawˆ keunˍ lawꞈ cawˇ lawꞈ ve awˬ yanˇ shawˍ teh tuˬ shoꞈ shaꞈ ve gʼa hpuˇ˗aw laˇ? Kanˉ gʼa te leh gʼaˇ hkʼaˬ hkʼe taw jehˇ cawˇ ve hkʼaˬ hkʼe te shiˍ gʼa tuˬ le?

6. Maˍkuˆ liꞈ 6:30-34 hkʼaw Yeˍsuˆ kanˉ te ve leh gʼaˇ jehˇ ve keunˍ lawꞈ cawˇ lawꞈ ve tehꞈ hkʼaˬ hkʼe hpeuꞈ maw laˇ ve le?

⁶ Kanˉ te ve hkʼaw keunˍ lawꞈ cawˇ lawꞈ ve cawˬ tuˬ a yeˇ uiˍ jaˇ. Jawˇmawˇ Sawˉlaꞈmonˍ htaꞈ Gʼuiˬ sha dawˇ pawnˍ piˇ leh bvuhꞈ tcuh ve, ‘awˬ ceuˬ hkʼa peu˗eˬ awˬ pon, awˬ yanˇ cawˬ taˍ ve yoˬ.’ Ti ve, te ve, hawˬ ve, gʼuiˬ ve, kʼaˍ hkʼeˆ ve awˬ yanˇ leh awˬ nu ve teˇ hpaˍ htaꞈ yawˇ kʼoˆ ve yoˬ. (Cuˇ yiˍ piˇ ve 3:1-8) Ngaˬ hui a shaꞈ teꞈ kuiˬ hkʼaw a yeˇ uiˍ ve 2 ceuˬ cawˬ ve lehˬ kanˉ te ve leh gʼaˇ jehˇ ve awˬ yanˇ yoˬ. Yeˍsuˆ kaꞈ chi hkʼe ve keunˍ lawꞈ cawˇ lawꞈ ve cawˬ ve yoˬ. Tawˇ pa haˉ te kʼo, tcuh yaˇ hui bon maˍ peuˬ leh kʼawꞈ la htaˇ, chaw laˬ maˇ jaˇ ve pa taw “yawˇ hui awˍ kaꞈ caˇ maˇ tanˇ ve yoˬ.” Yeˍsuˆ yawˇ hui htaꞈ kʼoˆ piˇ ve, “heh puiˉ hkʼaw chaw gawˬ kuiˬ lo gʼaˇ a ciˉ ca jehˇ sheˬ.” (Maˍkuˆ 6:30-34 gʼaw sheˍ.) Yeˍsuˆ leh awˬ laꞈ gʼawˇ gʼaˇ jehˇ gaˇ htaˇ maˇ gʼa jehˇ ve htawˇ, awˬ laꞈ gʼawˇ teˇ gʼaˇ le le awˬ pon gʼaˇ jehˇ ve a yeˇ uiˍ ve tehꞈ yawˇ shiˍ ve yoˬ.

7. Shinˉ nyi htaꞈ caˉ daꞈ ve awˬ liˇ tawˇ hkawˇ ngaˬ hui gʼa henˇ ve awˬ bon hkʼaˬ hkʼe gʼa ve le?

⁷ Teˇ pawˆ pawˆ kʼo ngaˬ hui kaꞈ jehˇ ve maˇ heˆ leh te jaw ve hkʼe tiˉ maˇ kʼawꞈ te. Teˇ shinˉ le le shinˉ nyi htaˇ, awˬ lawn chi ngaˬ hui gʼa mawˬ ve yoˬ. Chi lehˬ oˇ htaˇ teˇ co˗e, Gʼuiˬ sha yawˇ ve chaw htaꞈ gu teh taˍ piˇ ve a yeˇ uiˍ jaˇ ve awˬ ceuˬ hpehꞈ ve yoˬ. Ngaˬ hui Moˉseˍ ve awˬ liˇ tawˇ hkawˇ awˬ hawˉ lo maˇ gʼa chehˇ˗o ve htawˇ, kanˉ te ve leh gʼaˇ jehˇ ve htaꞈ cawˇ ve hpawˇ dawˇ tuˬ ga laˇ leh, shinˉ nyi htaꞈ caˉ daꞈ ve gʼa henˇ ve awˬ bon gʼa ve yoˬ.

8. Tawˆ kʼai ve liꞈ 31:12-15 hkʼaw kʼoˆ taˍ ve hkʼe, shinˉ nyi aˬ htoꞈ ma te tuˬ awˬ pon teh taˍ ve le?

⁸ Liꞈ hpu hkʼaw kʼoˆ ve, 6 “nyi” hkʼa gaˬ Gʼuiˬ sha awˬ ceuˬ hkʼa peu˗eˬ htaꞈ hpanˍ peuˬ hkʼawꞈ nawˉ gʼaˇ jehˇ ve yoˬ. (Awˬ hkuiˉ puiˍ 2:2) Yaꞈ hkʼaˇ, Yaˬhoˉvaˬ kanˉ te gaˇ leh “chi beuꞈ hkʼa gaˬ kanˉ te chehˇ ve yoˬ.” (Yoˇhanˬ 5:17) Awˬ hkuiˉ puiˍ liꞈ hkʼaw Yaˬhoˉvaˬ gʼaˇ jehˇ ve awˬ nyi htaꞈ kʼoˆ ve hkʼe shinˉ nyi kaꞈ chi ve htaꞈ shuˍ daꞈ ve yoˬ. Gʼuiˬ sha Iˉsaˍreˍlaˆ chaw htaꞈ teˇ shinˉ le le shinˉ nyi htaˇ gʼaˇ jehˇ tuˬ kʼoˆ piˇ ve yoˬ. Shinˉ nyi lehˬ Gʼuiˬ sha  leh Iˉsaˍreˍlaˆ chaw awˬ kaˍ lo shaˍ tiꞈ piˇ ve yoˬ. Awˬ nyi oˇ ve lehˬ “gʼaˇ jehˇ ve awˬ nyi hpehꞈ leh, [Yaˬhoˉvaˬ] ve daꞈ kehˬ ve awˬ nyi hpehꞈ ve yoˬ.” (Tawˆ kʼai ve 31:12-15 gʼaw sheˍ.) Kʼoˆ gaˇ ve lehˬ oˇ ve teˇ nyi teˇ gʼaˇ le le kanˉ maˇ gʼa te. Yaˇ ehˉ, awˬ ceˬ, leh to nuˇ to shaˆ htawˇ gʼaˇ jehˇ piˇ ve yoˬ. (Tawˆ kʼai ve 20:10) Awˬ liˇ tawˇ hkawˇ chi chaw yaˇ Yaˬhoˉvaˬ htaꞈ oˉ kʼoˍ pui gaˇ tuˬ te piˇ ve yoˬ.

9. Yeˍsuˆ ve awˬ co˗e htaˇ chaw teˇ hpaˍ hpaˍ shinˉ nyi htaꞈ keunˍ lawꞈ cawˇ lawꞈ maˇ dawˇ ve a shu le?

⁹ Shinˉ nyi lehˬ Gʼuiˬ sha ve chaw awˬ pon daꞈ ve awˬ nyi hpehꞈ ve yoˬ. Yaꞈ hkʼaˇ, Yeˍsuˆ ve awˬ co˗e htaˇ, bon awˬ hoˉ teˇ hpaˍ shinˉ nyi htaꞈ taˍ uiˍ jaˇ. Shinˉ nyi htaˇ caˬ nu chehˆ ve leh chaw naˬ htaꞈ gu na˗e piˇ ve, shinˉ nyi ve awˬ liˇ htaꞈ te yaꞈ ve tehꞈ yawˇ hui kʼoˆ ve yoˬ. (Maˍkuˆ 2:23-27; 3:2-5) Chi hkʼe te ve lehˬ Gʼuiˬ sha maˇ heuˆ gaˇ leh Yeˍsuˆ kaꞈ yawˇ ve hkawˇ na ve chaw hkʼa dehꞈ na gʼa tuˬ ga piˇ ve yoˬ.

10. Yeˍsuˆ ve dawˇ hkʼaˇ shinˉ nyi htaꞈ caˉ daꞈ ve Maꞈhtehˍ liꞈ 12:9-12 hkʼaw ngaˬ hui htaꞈ hkʼaˬ hkʼe maˍ laˇ ve le?

¹⁰ Yeˍsuˆ leh yawˇ ve awˬ laꞈ gʼawˇ Yuˇdaꞈ chaw hpehꞈ ve Moˉseˍ ve awˬ liˇ tawˇ hkawˇ awˬ hawˉ loˍ chehˇ ve pa taw, shinˉ nyi htaꞈ taˍ uiˍ ve yoˬ. * Yaꞈ hkʼaˇ, Yeˍsuˆ kʼoˆ ve leh te ve shinˉ nyi htaꞈ taˍ uiˍ ve tehꞈ hpeuꞈ maw piˇ ve yoˬ. Shinˉ nyi htaˇ daꞈ ve htaꞈ te leh shu htaꞈ ga piˇ ve daꞈ ve awˬ ceuˬ hpehꞈ leh te gʼa ve yoˬ. Yeˍsuˆ hkʼa tawˍ lehˆ kʼoˆ piˇ ve, “shinˉ nyi htaˇ daꞈ ve awˬ ceuˬ htaꞈ te cawˇ ve yoˬ.” (Maꞈhtehˍ 12:9-12 gʼaw sheˍ.) Chi hkʼoˆ kaꞈ, Gʼuiˬ sha shinˉ nyi cawˬ tcuh laˇ ve lehˬ Yeˍsuˆ te ve  awˬ ceuˬ a yeˇ uiˍ ve tehꞈ hpeuꞈ maw piˇ ve yoˬ. Awˬ nyi oˇ ve mvuhˇ miˬ yaˇ gʼaˇ jehˇ ve pa taw, yawˇ hui Gʼuiˬ sha htaꞈ oˉ kʼoˍ pui gaˇ tuˬ te piˇ ve yoˬ. Gʼuiˬ sha geh meuˆ daꞈ tuˬ shinˉ nyi htaˇ gʼaˇ jehˇ ve yehˬ kʼa hkʼaw Yeˍsuˆ kaꞈ uiˍ la ve yoˬ. “[Yeˍsuˆ] uiˍ la kuiˬ Naˍzaˍrehˆ venˇ lo kʼawꞈ gaˬ la leh, yawˇ awˬ liˇ cawˬ taˍ ve hkʼe shinˉ nyi htaˇ bon yehˬ taˆ˗e ve yoˬ. Liꞈ hpu htaꞈ gʼaw tuˬ yawˇ tu” huˉ ve ngaˬ hui yawˇ ve awˬ lawn gʼaw htaˇ gʼa shiˍ ve yoˬ.—Luˉkaꞈ 4:15-19.

11. Kanˉ te ve awˬ lawn Yeˍsuˆ htaꞈ a shu maˍ piˇ ve le?

¹¹ Yoˇsehꞈ Yeˍsuˆ htaꞈ laꞈ shaˉ maˉ te tuˬ maˍ piˇ htaˇ, Yaˬhoˉvaˬ kanˉ te ve hpawˇ hkʼaˬ hkʼe dawˇ ve kaꞈ maˍ piˇ ve yoˬ. (Maꞈhtehˍ 13:55, 56) Yoˇsehꞈ yehˬ kʼa hkʼaw ve chaw laiˉ gʼaˇ htaꞈ nyi haꞈ shaˉ tuˬ teˇ nyi le le kanˉ te hkeuꞈ ve htaꞈ Yeˍsuˆ mawˬ ve yoˬ. Peuˬ leh Yeˍsuˆ awˬ laꞈ gʼawˇ htaꞈ kʼoˆ piˇ ve, “kanˉ te shehˍ hpaˇ lehˬ, awˬ hpfuhˇ gʼa cawˇ ve yoˬ.” (Luˉkaꞈ 10:7) Yeˍsuˆ kanˉ te hkeuꞈ ve htaꞈ ngaˬ hui hkʼa tawˍ lehˆ mawˬ ve yoˬ.

12. Liꞈ hpu hkʼaˬ teˇ tawn kanˉ te hkeuꞈ ve htaꞈ kʼoˆ taˍ ve le?

¹² Tcuh yaˇ Pawˇluꞈ kaꞈ kanˉ te hkeuꞈ ve yoˬ. Yawˇ ve kanˉ lehˬ Yeˍsuˆ ve awˬ lawn bon maˍ ve htawˇ, yawˇ awˬ to htaꞈ hu tuˬ kanˉ kaꞈ gʼa te ve yoˬ. Hteˇsaˍlawˇniˆ venˇ hkʼaw chehˇ ve chaw shiˍ ve, yawˇ hui “teˇ gʼaˇ kaꞈ maˇ gʼa hkeuꞈ tuˬ,” Pawˇluꞈ leh yawˇ geh chehˇ ve chaw “tanˇ hkuinˇ tanˇ vanˇ kanˉ gʼaˇ hteꞈ te ve yoˬ.” (2 Hteˇsaˍlawˇniˆ 3:8; Tcuh yaˇ 20:34, 35) Pawˇluꞈ hpa aˉ po kʼo tawˉ ve htaꞈ kʼoˆ gaˇ ve yoˬ. Kawˇrenˍhtuˆ venˇ hkʼaw Aˍkuˉlaˆ leh Piˇkiˇlaˆ aˉ hkʼaw lo Pawˇluꞈ chehˇ htaˇ, “yawˇ yawˇ huiˉ maˬ geh chehˇ leh kanˉ te ve yoˬ. Awˬ lawn kʼo, yawˇ hui lehˬ hpa aˉ po kʼo tawˉ shehˍ hpaˇ hpehꞈ ve yoˬ.” Pawˇluꞈ “tanˇ hkuinˇ tanˇ vanˇ” kanˉ te ve tcuhˉ kuiˬ lehˬ, yawˇ maˇ jehˇ˗oˬ ve htaꞈ kʼoˆ gaˇ ve maˇ heˆ. Shinˉ nyi htaˇ yawˇ jehˇ ve yoˬ. Oˇ ve teˇ nyi yawˇ hkʼe kanˉ maˇ te ve Yuˇdaꞈ chaw htaꞈ bon maˍ piˇ ve yoˬ.—Tcuh yaˇ 13:14-16, 42-44; 16:13; 18:1-4.

13. Pawˇluꞈ ve awˬ lawn ngaˬ hui htaꞈ aˬ htoꞈ ma maˍ laˇ ve le?

¹³ Tcuh yaˇ Pawˇluꞈ daꞈ ve henˇ yuˬ tuˬ hpehꞈ ve yoˬ. Pawˇluꞈ yawˇ awˬ to htaꞈ hu tuˬ kanˉ gʼa te ve htawˇ, “Gʼuiˬ sha ve ha lehˬ ve bon hkawˇ” shu htaꞈ maˍ piˇ tuˬ ve kanˉ kaꞈ hkʼaˬ htaˆ kaꞈ te ve yoˬ. (Roˉmaꞈ 15:16; 2 Kawˇrenˍhtuˆ 11:23) Yawˇ te ve hkʼe shu kaꞈ te tuˬ awˬ gʼaˇ piˇ ve yoˬ. Aˍkuˉlaˆ leh Piˇkiˇlaˆ Pawˇluꞈ geh “teˇ geh Yeˍsuˆ Hkriꞈ ve kanˉ ga te” ve yoˬ. (Roˉmaꞈ 12:11; 16:3) Pawˇluꞈ Kawˇrenˍhtuˆ venˇ hkʼaw ve awˬ viˉ awˬ nyi htaꞈ kaꞈ awˬ gʼaˇ piˇ ve, “Jawˇmawˇ Yeˍsuˆ ve kanˉ htaꞈ hkʼaˬ htaˆ kaꞈ gʼaˇ hteꞈ te chehˇ ve chaw hpehꞈ piˇ˗oˆ.” (1 Kawˇrenˍhtuˆ 15:58; 2 Kawˇrenˍhtuˆ 9:8) Yaˬhoˉvaˬ Pawˇluꞈ htaꞈ dawˇ pawnˍ piˇ leh bvuhꞈ tcuh ve, “chaw teˇ gʼaˇ gʼaˇ kanˉ maˇ te gaˇ ve kʼo, awˍ taˇ caˍ piˇ.”—2 Hteˇsaˍlawˇniˆ 3:10.

14. Yoˇhanˬ liꞈ 14:12 hkʼaw Yeˍsuˆ ve tawˇ hkawˇ hkʼaˬ hkʼe kʼoˆ gaˇ ve le?

¹⁴ Awˬ leh meuˇ ve awˬ yanˇ a yeˇ uiˍ jaˇ ve kanˉ lehˬ hto toˇ ve leh shu awˬ laꞈ gʼawˇ hpehꞈ la tuˬ maˍ piˇ ve yoˬ. Yeˍsuˆ awˬ gʼuˇ suhˍ htaˇ kaꞈ kʼoˆ taˍ ve awˬ laꞈ gʼawˇ lehˬ yawˇ aꞈ kehˉ a yeˇ uiˍ ve kanˉ gʼa te tuˬ yoˬ. (Yoˇhanˬ 14:12 gʼaw sheˍ.) Ngaˬ hui yawˇ hkʼe leˇ anˇ tuˬ gʼa te ve tehꞈ kʼoˆ gaˇ ve maˇ heˆ. Yaꞈ hkʼaˇ, yawˇ ve awˬ laꞈ gʼawˇ hto toˇ ve leh maˍ ve vuiˇ kuiˬ lo gʼa kʼai ve, chaw maˇ maˇ htaꞈ mawˬ daꞈ ve leh yawˇ te ve aꞈ kehˉ awˬ yanˇ gʼa yehˇ maˇ ve htaꞈ kʼoˆ gaˇ ve yoˬ.

15. Aˬ htoꞈ ma ve na hkawˇ a shu yawˇ awˬ to htaꞈ na nyi cawˇ ve le?

¹⁵ Nawˬ kanˉ te htaˇ a shu yawˇ awˬ to htaꞈ na nyi cawˇ ve, ‘ngaˬ kaiˬ ve tehꞈ kanˉ teˇ geh te ve chaw dawˇ˗aw laˇ? Ngaˬ kanˉ hkʼa dehꞈ te leh awˬ yanˇ cawˇ cawˇ te peuˬ˗aw laˇ?’ Te peuˬ ve kʼo awˬ shehˍ hpaˇ kaꞈ nawˬ htaꞈ kʼawꞈ yonˍ gʼa leh kanˉ teˇ geh te  ve chaw kaꞈ daꞈ ve awˬ lawn sha tanˇ kʼawꞈ na gaˇ tuˬ yoˬ. Chi hkʼoˆ kaꞈ Gʼuiˬ sha ve kanˉ te ve a shu yawˇ awˬ to htaꞈ na nyi cawˇ ve, ‘ngaˬ Gʼuiˬ sha ve kanˉ te kaiˬ ve tehꞈ awˬ viˉ awˬ nyi dawˇ˗aw laˇ? Maˇ hto toˇ˗e sheˍ htaˇ, ngaˬ hkʼa dehꞈ gu˗aw laˇ? Nyi ma pfuhˇ ve chaw geh ngaˬ haˆ kʼawꞈ guiˇ˗e˗aw laˇ? Leh ngaˬ Gʼuiˬ sha ve kanˉ te ve awˬ hkʼaˇ laiˉ hkʼaˇ yehˇ˗aw laˇ?’ Chi hkʼe te ve kʼo, Gʼuiˬ sha ve kanˉ te ve hkʼaw ha lehˬ tuˬ yoˬ.

16. Yeˍsuˆ leh tcuh yaˇ hui gʼaˇ jehˇ ve, chi beuꞈ teˇ co˗e ve chaw laiˉ gʼaˇ htaꞈ hkʼaˬ hkʼe peun daꞈ ve le?

¹⁶ Yeˍsuˆ leh tcuh yaˇ hui kaꞈ teˇ pawˆ pawˆ gʼa jehˇ cawˇ ve tehꞈ yawˇ shiˍ ve yoˬ. Yaꞈ hkʼaˇ, oˇ htaˇ leh chi beuꞈ teˇ co˗e ve chaw Yeˍsuˆ ve tawˇ pa haˉ tehˆ maˍ laˇ ve hkʼaw paw sha paˍ hkʼe hpehꞈ ve yoˬ. Paw sha paˍ kʼoˆ ve, “hkʼa dehꞈ caˇ chehˇ dawˬ chehˇ leh ha lehˬ chehˇ˗oˆ.” (Luˉkaꞈ 12:19; 2 Tiˆmoˉseˍ 3:4) Yawˇ gʼaˇ jehˇ ve leh pyawˍ ve htaꞈ hkʼaˬ htaˆ kaꞈ dawˇ nyi ve yoˬ. Yaꞈ hkʼaˇ, Yeˍsuˆ leh tcuh yaˇ hui gʼaˇ jehˇ ve leh pyawˍ ve htaꞈ a shaꞈ teꞈ kuiˬ hkʼaw a yeˇ uiˍ jaˇ ve tehꞈ maˇ dawˇ.

17. Gʼaˇ jehˇ ve awˬ nyi htaˇ ngaˬ hui aˬ htoꞈ ma te ve le?

¹⁷ Chi beuꞈ teˇ co˗e ngaˬ hui Yeˍsuˆ htaꞈ henˇ yuˬ ve yoˬ. Ngaˬ hui ve gʼaˇ jehˇ ve awˬ nyi htaˇ jehˇ ve ceh maˇ te, hto toˇ˗e ve, hpawnˬ daꞈ˗e ve kaꞈ kʼai ve yoˬ. Shu awˬ laꞈ gʼawˇ hpehꞈ la tuˬ maˍ piˇ ve leh hpawnˬ daꞈ˗e ve a yeˇ uiˍ jaˇ tehꞈ ngaˬ hui dawˇ ve yoˬ. Puiˉ ve hpehꞈ ve hkʼe daꞈ kehˬ ve kanˉ chi ngaˬ hui hkʼaˬ htaˆ kaꞈ coˇ caˇ leh te tuˬ yoˬ. (Heˍbrehˇ 10:24, 25) Chi htaꞈ pa taw ngaˬ hui hkʼaˬ kaˬ lo ca guiˇ˗e ve htawˇ, hpawnˬ daꞈ˗e ve kʼai leh ngaˬ hui mawˬ daꞈ ve chaw htaꞈ hto maˍ piˇ tuˬ yoˬ.—2 Tiˆmoˉseˍ 4:2.

18. Ngaˬ hui ve Jawˇmawˇ Yeˍsuˆ Hkriꞈ ngaˬ hui htaꞈ aˬ htoꞈ ma te tcuh gaˇ ve le?

¹⁸ Ngaˬ hui ve Jawˇmawˇ Yeˍsuˆ Hkriꞈ ngaˬ hui kanˉ te ve leh gʼaˇ jehˇ ve awˬ nyi htaꞈ keunˍ lawꞈ cawˇ lawꞈ ve hkʼaw dawˇ nyi tuˬ ga laˇ ve ha lehˬ jaˇ! (Heˍbrehˇ 4:15) Ngaˬ hui jehˇ gaˇ ve awˬ yanˇ htaˇ jehˇ tuˬ, a shu yawˇ awˬ to htaꞈ hu ve kanˉ te tuˬ, leh shu awˬ laꞈ gʼawˇ hpehꞈ la tuˬ maˍ piˇ ve kaꞈ Yeˍsuˆ ngaˬ hui htaꞈ ha lehˬ tcuh gaˇ ve yoˬ. Yeˍsuˆ te ve awˬ ceuˬ, ngaˬ hui shu ceˬ te ve htaꞈ hpehˇ laˇ tuˬ gʼuˇ suhˍ teˇ lawn hkʼaw teˇ geh henˇ tuˬ yoˬ.