2019 hkʼawꞈ Shaw nyi kuiˬ Taꞈ yehˬ hkʼaw ve na hkawˇ chi teˇ hpaˍ htaꞈ nawˬ hkʼawꞈ gʼa˗aw laˇ?

Gʼuiˬ sha ka tiꞈ te taˍ laˇ ve, “hkʼa te tawˆ la ve laꞈ caˉ chi teˇ hpaˍ lehˬ nawˬ hui htaꞈ te luˬ laˇ gʼa tuˬ ve maˇ heˆ.” Chi hkʼaˬ hkʼe kʼoˆ gaˇ ve le? (Iˉsaˍyaˆ 54:17)

Gʼuiˬ sha ngaˬ hui htaꞈ “mvuhˇ haw mvuhˇ yeˬ lonˉ” htaꞈ ponˬ laˇ tuˬ ve tehꞈ yonˍ gʼa ve yoˬ. (Iˉsaˍyaˆ 25:4, 5) Canˇ paˍ ngaˬ hui htaꞈ co co taiˍ taiˍ te luˬ laˇ maˇ gʼa.—w19.01, 6-7.

Gʼuiˬ sha Hkaˍnanˍ chaw leh Iˉsaˍreˍlaˆ chaw yawˇ htaꞈ ka tiꞈ maˇ yeˬ ve te luˬ piˇ htaˇ, yawˇ ve hteˇ ve cawˇ ve hkʼaˬ hkʼe hpeuꞈ maw laˇ ve le?

Yaˇ miˇ leh yaˇ ehˉ htaꞈ pehꞈ ve tzuhˆ ve hpawˇ naˬ taweh te piˇ ve chaw htaꞈ Gʼuiˬ sha suhˉ jehˬ piˇ tuˬ yoˬ. Yaꞈ hkʼaˇ, yawˇ ve chaw yawˇ htaꞈ ka tiꞈ yeˬ leh yawˇ hui hteˇ ve cawˇ ve hkʼaw te daꞈ htaˇ, awˬ bon naꞈ piˇ tuˬ yoˬ.—w19.02, 22-23.

Shaˉ hkiˆ hkanˍ ve chaw maˇ heˆ ve bon lawˬ htaˇ, ngaˬ hui oˇ kaˬ ve chehˇ ve kʼo hkʼaˬ hkʼe te tuˬ le?

Ngaˬ hui taꞈ iˉ chehˇ leh gʼa yawˆ yan piˇ ve yoˬ. Bon lawˬ htaˇ, ngaˬ hui “A menˬ” maˇ kʼoˆ leh awˬ nu ve chaw htaꞈ laꞈ sheh maˇ caˉ daꞈ taˍ. Ngaˬ hui nyi ma hkʼaw bon lawˬ gʼa ve yoˬ.—w19.03, 31.

Yaˇ htaꞈ pehꞈ ve tzuhˆ ve hpawˇ naˬ taweh te piˇ ve hkʼaˬ hkʼe taw haiˬ jaˇ ve le?

Yawˇ yaˇ oˇ ve teˇ gʼaˇ htaꞈ venˇ baˆ te yaꞈ piˇ ve, Yawˇ Hkriꞈ yaˇ awˬ moˍ htaꞈ venˇ baˆ te yaꞈ piˇ ve, yawˇ Gʼuiˬ sha htaꞈ venˇ baˆ te yaꞈ piˇ ve, leh yawˇ mvuhˇ miˬ uˉ peunˍ ve htaꞈ venˇ baˆ te yaꞈ piˇ ve yoˬ. Yaˇ htaꞈ pehꞈ ve tzuhˆ ve hpawˇ naˬ taweh te piˇ ve gʼa kaˇ htaˇ, nyi haꞈ shaˉ paˍ mvuhˇ miˬ ve awˬ liˇ htaꞈ gʼaꞈ te leh mvuhˇ miˬ kanˉ te paˍ htaꞈ kʼoˆ piˇ ve yoˬ.—w19.05, 9-10.

Nawˬ ve nyi ma awˬ hkʼaw lo dawˇ hkʼaˇ awˬ suhˉ hkʼaˬ hkʼe te cawˬ gʼa tuˬ le?

A yeˇ uiˍ jaˇ ve lehˬ Yaˬhoˉvaˬ geh bon lawˬ ve, ngaˬ hui ve te hkʼaˇ dawˇ hkʼaˇ hkʼaˬ hkʼe pa cawˇ ve htaꞈ hkʼa dehꞈ dawˇ nyi ve, daꞈ jaˇ ve awˬ chawˇ gʼa leuˆ ve yoˬ. —w19.06, 11.

Fawˉ mehˍ ve gʼa hpuˇ tuˬ aˬ htoꞈ ma te chi teˇ hkui kaꞈ ngaˬ hui gu hehnˇ taˍ gʼa ve le?

Ngaˬ hui Yaˬhoˉvaˬ geh meuˆ daꞈ cawˇ ve yoˬ. Yaˬhoˉvaˬ ngaˬ hui htaꞈ haꞈ leh maˇ baˬ taˉ laˇ tehꞈ yonˍ gʼa ve yoˬ. Teˇ nyi le le Liꞈ hpu gʼaw ve yoˬ. Hkʼaˬ htaˆ kaꞈ bon lawˬ ve yoˬ. Gʼuiˬ sha ve mvuhˇ miˬ htaꞈ caˉ daꞈ ve ka tiꞈ te taˍ ve hkʼa peu˗eˬ awˬ tehˬ hpehꞈ la tuˬ yoˬ tehꞈ ngaˬ hui yonˍ gʼa ve, coˇ caˇ leh Liꞈ hpu awˬ tawn dawˇ cawˇ ve tawnˇ taˍ ve yoˬ. Yaˬhoˉvaˬ htaꞈ kʼa muiˬ hkawˇ kʼa piˇ leh noꞈ mehˆ tawnˇ gʼa tcuh sheˍ.—w19.07, 2-4.

Yehˬ kʼa hkʼaw ve chaw leh awˬ viˉ awˬ nyi htaꞈ ga gʼa tuˬ hkʼaˬ hkʼe gʼa te ve le?

Ngaˬ hui shu htaꞈ gʼa ha kʼaˉ piˇ cawˇ ve yoˬ. Ngaˬ hui ve te hkʼaˇ dawˇ hkʼaˇ daꞈ ve yawˇ hui htaꞈ mawˬ tcuh ve yoˬ. Yeunˇ hkanˍ leh yawˇ hui ve te hkʼaˇ dawˇ hkʼaˇ htaꞈ dawˇ nyi piˇ ve yoˬ.—w19.08, 15-17.

Maꞈhtehˍ liꞈ 11:28 hkʼaw Yeˍsuˆ ka tiꞈ te taˍ laˇ ve, ngaˬ hui nyi ma sha tuˬ aˬ htoꞈ ma awˬ hkʼaˇ cawˬ ve le?

Ngaˬ hui htaꞈ haꞈ ve nyi haꞈ shaˉ paˍ, daꞈ jaˇ ve awˬ chawˇ, leh daꞈ jaˇ ve kanˉ cawˬ ve yoˬ.—w19.09, 23.

Nawˬ loˍ ve awˬ gʼaˇ awˬ shaˉ htaꞈ Gʼuiˬ sha hkʼaˬ hkʼe peꞈ laˇ gʼa tuˬ le? (Hpiˇleˍmonˍ 2:13)

Ngaˬ hui Liꞈ hpu gʼaw leh dawˇ nyi htaˇ, yawˇ ve a loˍ htaꞈ gʼaꞈ te gʼa tuˬ ngaˬ hui loˍ ve awˬ gʼaˇ awˬ shaˉ yawˇ peꞈ laˇ tuˬ yoˬ. Ngaˬ hui puiˉ ve hpehꞈ ve hkʼe hkʼa dehꞈ te gʼa tuˬ yawˇ daꞈ kehˬ ve awˬ ha hpu htaꞈ cuˇ leh ga laˇ ve yoˬ.—w19.10, 21.

A yeˇ uiˍ ve awˬ lawn maˇ gʼa dawˇ cheˆ sheˍ htaˇ ngaˬ hui aˬ htoꞈ ma awˉ lawˉ gʼa te cawˇ ve le?

Awˬ hkʼaˇ 5 hkʼaˇ lehˬ, hkʼa dehꞈ hpfuhˆ nyi ve, cuˇ yiˍ gʼa tuˬ bon lawˬ ve, nawˬ te ve awˬ hkʼaˇ htaꞈ dawˇ nyi ve, hkʼa dehꞈ dawˇ teh taˍ ve, leh awˬ tehˬ ve htaꞈ haꞈ yuˬ sheˍ.—w19.11, 27-29.

Maˇ suh puiˉ ve co ha Saˍtanˍ Eˇvaꞈ htaꞈ kʼoˆ piˇ htaˇ tanˬ cawˬ la ve laˇ?

Nyi˗a kʼo maˇ heˆ. Saˍtanˍ Eˇvaꞈ htaꞈ kʼoˆ piˇ ve, nawˬ maˇ suh taˬ. Chi ve tcuhˉ kuiˬ lehˬ nawˬ awˬ to ceh suh˗e ve, mawˬ maˇ gʼa ve co ha maˇ suh tehꞈ kʼoˆ gaˇ ve maˇ heˆ. Yaꞈ hkʼaˇ, maˇ heˆ heˆ maˍ ve Noˉaꞈ ve awˬ co˗e iˉ kaˆ htonˍ htaˇ, te luˬ peuˬ˗oˬ. Baˍbuˍlonˍ venˇ htaꞈ te ve chaw teˇ gʼaˇ leh teˇ gʼaˇ tawˇ yaw ve maˇ na gʼa tuˬ maˇ te piˇ sheˍ htaˇ, co ha maˇ suh puiˉ ve yonˍ ve oˇ htaˇ cawˬ ve yoˬ.—w19.12, 15.