1-2. Ehnˍheˍliˇtoˆ ve awˬ lawn ngaˬ hui teˇ gʼaˇ leh teˇ gʼaˇ hkʼaˬ hkʼe te tuˬ maˍ laˇ ve le?

 Nawˬ pa nawˬ e Yaˬhoˉvaˬ ve Shaˉhkiˆhkanˍ ve chaw hpehꞈ ve geh nawˬ uiˍ la ve laˇ? Yoˬ kʼo, Gʼuiˬ sha geh meuˆ daꞈ ve awˬ shinˉ awˬ ka gʼa ve maˇ heˆ tehꞈ nawˬ tawnˇ taˍ cawˇ ve yoˬ. Nawˬ pa nawˬ e Gʼuiˬ sha geh awˬ chawˇ hpehꞈ ve hkʼe nawˬ kaꞈ hpehꞈ ve maˇ heˆ. Nawˬ pa nawˬ e Shaˉhkiˆhkanˍ ve chaw hpehꞈ ve maˇ hpehꞈ ve htawˇ, a shu yawˇ hkʼaˇ yawˇ Yaˬhoˉvaˬ geh awˬ chawˇ gʼa te ve yoˬ.

² Ehnˍheˍliˇtoˆ ve awˬ lawn htaꞈ dawˇ nyi sheˍ. Yawˇ ve yehˬ kʼa Shaˉhkiˆhkanˍ ve chaw hpehꞈ ve yoˬ. A shaꞈ i htaˇ yawˇ Yaˬhoˉvaˬ geh meuˆ daꞈ ve tehꞈ maˇ dawˇ. Yawˇ kʼoˆ ve, “ngaˬ Yaˬhoˉvaˬ ve kanˉ te ve yehˬ kʼa hkʼaw ve chaw te leh te ve yoˬ.” Peuˬ hkʼawꞈ nawˉ Ehnˍheˍliˇtoˆ Liꞈ hpu gʼaw ve, hkʼa dehꞈ dawˇ nyi ve, leh Yaˬhoˉvaˬ geh bon maˇ maˇ lawˬ tuˬ dawˇ cheˆ ve yoˬ. Yawˇ kʼawꞈ kʼoˆ ve, “ngaˬ htaꞈ haꞈ ve Awˬ pa Yaˬhoˉvaˬ geh meuˆ daꞈ tuˬ ve awˬ hkʼaˇ teˇ hkʼaˇ lehˬ ngaˬ hkʼaˇ ngaˬ yawˇ htaꞈ gʼa shiˍ daꞈ ve yoˬ.” Ehnˍheˍliˇtoˆ ve awˬ lawn ngaˬ hui dawˇ nyi tuˬ cawˬ ve yoˬ. Yaˬhoˉvaˬ htaꞈ shiˍ ve leh yawˇ htaꞈ hkʼa dehꞈ shiˍ daꞈ ve hkʼaˬ hkʼe peun daꞈ ve le? Ngaˬ hui Yaˬhoˉvaˬ htaꞈ hkʼa dehꞈ shiˍ tuˬ hkʼaˬ hkʼe te gʼa ve le?

3. Yaˬhoˉvaˬ htaꞈ shiˍ ve leh yawˇ htaꞈ hkʼa dehꞈ shiˍ daꞈ ve hkʼaˬ hkʼe peun daꞈ ve le?

³ Chaw teˇ gʼaˇ Yaˬhoˉvaˬ ve awˬ meh leh yawˇ hkʼaˬ hkʼe kʼoˆ ve maˇ heˆ leh te ve htaꞈ shiˍ htaˇ, yawˇ Gʼuiˬ sha htaꞈ shiˍ ve tehꞈ ngaˬ hui dawˇ tuˬ yoˬ. Yaꞈ hkʼaˇ, Yaˬhoˉvaˬ htaꞈ hkʼa dehꞈ shiˍ daꞈ ve lehˬ chi aꞈ kehˉ gʼa te tawˆ la ve yoˬ. Yaˬhoˉvaˬ htaꞈ caˉ daꞈ ve leh yawˇ ve te hkʼaˇ dawˇ hkʼaˇ daꞈ jaˇ ve htaꞈ ngaˬ hui gʼa henˇ ve yoˬ. Oˇ hkʼe te ve kʼo,  yawˇ kʼoˆ ve leh te ve awˬ ceuˬ teˇ hpaˍ htaꞈ ngaˬ hui na gʼa tuˬ yoˬ. Ngaˬ hui dawˇ ve, dawˇ cheˆ ve, leh te ve awˬ ceuˬ Gʼuiˬ sha nyi hkʼaˇ suh ve kʼo, yawˇ ha lehˬ tuˬ yoˬ tehꞈ yonˍ gʼa ve yoˬ. Yaˬhoˉvaˬ loˍ ve htaꞈ ngaˬ hui shiˍ˗oˬ htaˇ, gʼaꞈ te gaˇ ve yoˬ.

4. LIꞈ hpu hkʼaw ve awˬ lawn henˇ htaˇ ngaˬ hui htaꞈ hkʼaˬ hkʼe maˍ laˇ ve le?

⁴ Ngaˬ hui hpawnˬ daꞈ ve tanˬ kʼai htaˇ, Yaˬhoˉvaˬ ve kanˉ te gaˇ ve pa taw, shu kʼoˆ guiˇ gʼuiˬ guiˇ laˇ leh tawˍ laˇ jaˇ. Yaꞈ hkʼaˇ, ngaˬ hui Yaˬhoˉvaˬ htaꞈ gʼaˇ va ve kʼo, yawˇ haꞈ shaˉ laˇ tuˬ yoˬ. Chi lehˬ ngaˬ hui Yaˬhoˉvaˬ geh co co taiˍ taiˍ meuˆ daꞈ ve awˬ hkuiˉ puiˍ hpehꞈ yoˬ. Ngaˬ hui Yaˬhoˉvaˬ htaꞈ awˬ tehˬ shiˍ daꞈ˗aw laˇ? Shiˍ daꞈ ve yoˬ. Moˉseˍ leh jawˇ mawˇ Daˍviˆ maˇ biˇ ve htawˇ, te gʼa ve tehꞈ hpeuꞈ maw laˇ ve yoˬ. Yawˇ hui te ve awˬ ceuˬ htaꞈ ngaˬ hui gʼa henˇ htaˇ, na hkawˇ 2 maˬ cawˬ ve yoˬ. Yawˇ hui Yaˬhoˉvaˬ htaꞈ hkʼaˬ hkʼe taw shiˍ daꞈ ve le? Leh yawˇ hui ve awˬ lawn ngaˬ hui htaꞈ hkʼaˬ hkʼe maˍ laˇ ve le?

5. Moˉseˍ aˬ htoꞈ ma te tuˬ leuˆ yuˬ ve le?

⁵ Moˉseˍ Gʼuiˬ sha ve kanˉ te tuˬ leuˆ ve. Moˉseˍ a shaꞈ 40 hkʼawꞈ hpaˆ htaˇ, “Hpaˍrawˇ yaˇ miˇ ve awˬ yaˇ paˍ tehꞈ kʼoˆ” ve aꞈ kehˉ Gʼuiˬ sha ve chaw Heˍbrehˇ chaw geh chehˇ tuˬ yawˇ leuˆ yuˬ ve yoˬ. (Heˍbrehˇ 11:24) Moˉseˍ aˉ yaˇ cawˬ ve awˬ vuiˬ htaꞈ baˬ taˉ ve yoˬ. Yawˇ Gʼuiˬ sha ve chaw htaꞈ ga piˇ htaˇ, Hpaˍrawˇ beuꞈ jaˇ. Hpaˍrawˇ kanˇ paˆ cawˬ ve jawˇ mawˇ hpehꞈ leh Eˇjiˇtuꞈ chaw yawˇ htaꞈ Gʼuiˬ sha hkʼe shawˍ ve yoˬ. Moˉseˍ yonˍ yeˬ jaˇ! Moˉseˍ Yaˬhoˉvaˬ htaꞈ gʼaˇ va ve pa taw, hkʼaˬ htaˆ kaꞈ Yaˬhoˉvaˬ geh meuˆ daꞈ ve yoˬ.—Tawˇ naˉ ve 3:5.

6. Moˉseˍ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

⁶ Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Ngaˬ hui Gʼuiˬ sha ve kanˉ te tuˬ leh yawˇ ve chaw geh chehˇ tuˬ, Moˉseˍ hkʼe leuˆ˗aw laˇ? Ngaˬ hui Gʼuiˬ sha ve kanˉ te tuˬ teˇ ceuˬ ceuˬ gʼa yuˬ tanˇ cawˇ ve kʼo, yawˇ htaꞈ maˇ shiˍ ve chaw tawˍ laˇ tuˬ yoˬ. Yaꞈ hkʼaˇ, mvuhˇ naw ma hkʼoˆ ve Awˬ pa htaꞈ gʼaˇ va ve kʼo, yawˇ ga laˇ tuˬ yoˬ!

7-8. Moˉseˍ aˬ htoꞈ ma kʼawꞈ henˇ ve le?

⁷ Moˉseˍ Yaˬhoˉvaˬ htaꞈ caˉ daꞈ ve te hkʼaˇ dawˇ hkʼaˇ htaꞈ henˇ leh yawˇ loˍ ve awˬ ceuˬ htaꞈ kʼawꞈ te ve. Iˉsaˍreˍlaˆ chaw Eˇjiˇtuꞈ mvuhˇ miˬ lo tawˆ la tuˬ Yaˬhoˉvaˬ Moˉseˍ htaꞈ sheh kʼai tcuh htaˇ, yawˇ te maˇ gʼa tehꞈ dawˇ leh Gʼuiˬ sha htaꞈ laiˉ pawˆ kʼoˆ piˇ ve yoˬ. Moˉseˍ htaꞈ Gʼuiˬ sha ha kʼaˉ ve tehꞈ hpeuꞈ maw piˇ ve yoˬ. Gʼuiˬ sha Moˉseˍ ve dawˇ hkʼaˇ htaꞈ shiˍ leh ga piˇ ve yoˬ. (Tawˆ kʼai ve 4:10-16) Hpaˍrawˇ mehˆ gʼuˇ suhˍ lo hehnˇ ve awˬ ceuˬ kʼoˆ piˇ haˆ ve yoˬ. Peuˬ leh Eˇjiˇtuꞈ mvuhˇ miˬ hkʼaw Yaˬhoˉvaˬ yawˇ ve kanˇ paˆ htaꞈ yehˇ leh, Iˉsaˍreˍlaˆ chaw hui htaꞈ ponˬ piˇ leh Hpaˍrawˇ leh yawˇ ve maꞈ yaˇ htaꞈ laˇ tsuhˇ gʼuiˬ nyi hkʼaw te luˬ piˇ ve htaꞈ Moˉseˍ gʼa mawˬ ve yoˬ.—Tawˆ kʼai ve 14:26-31; Chiˇ mvuh ve 136:15.

⁸ Iˉsaˍreˍlaˆ chaw Eˇjiˇtuꞈ mvuhˇ miˬ hkʼaw Moˉseˍ sheh tawˆ la peuˬ hkʼawꞈ nawˉ, yawˇ hui teˇ hkui teˇ hkui Moˉseˍ htaꞈ hkʼanˇ maˍ piˇ ve yoˬ. Yaꞈ hkʼaˇ, Yaˬhoˉvaˬ yeunˇ hkanˍ ve hkʼaw Iˉsaˍreˍlaˆ chaw shu ceˬ te chehˇ ve htaꞈ ga piˇ ve Moˉ seˍ gʼa mawˬ ve yoˬ. (Chiˇ mvuh ve 78:40-43) Chi hkʼoˆ kaꞈ, Moˉseˍ lawˬ ve hkʼe Yaˬhoˉvaˬ te piˇ ve pa taw, yawˇ nyi ma nuˇ nehˬ jaˇ ve htaꞈ Moˉseˍ mawˬ ve yoˬ.—Tawˆ kʼai ve 32:9-14.

9. Heˍbrehˇ liꞈ 11:27 hkʼaw kʼoˆ taˍ ve hkʼe, Moˉseˍ Yaˬhoˉvaˬ geh hkʼaˬ hkʼe taw meuˆ daꞈ ve le?

⁹ Eˇjiˇtuꞈ mvuhˇ miˬ hkʼaw tawˆ la peuˬ hkʼawꞈ nawˉ, Moˉseˍ Yaˬhoˉvaˬ geh meuˆ daꞈ jaˇ leh yawˇ htaꞈ mawˬ ve hkʼe hpehꞈ ve yoˬ. (Heˍbrehˇ 11:27 gʼaw sheˍ.) Moˉseˍ leh Yaˬhoˉvaˬ meuˆ daꞈ ve htaꞈ Liꞈ hpu hkʼaw kʼoˆ ve, “Gʼuiˬ sha lehˬ Moˉseˍ htaꞈ mehˆ hpfuhˇ tawˍ daꞈ leh tawˇ yaw piˇ ve yoˬ.”—Tawˆ kʼai ve 33:11.

10. Yaˬhoˉvaˬ htaꞈ hkʼa dehꞈ shiˍ daꞈ tuˬ ngaˬ hui hkʼaˬ hkʼe gʼa te cawˇ ve le?

 ¹⁰ Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Yaˬhoˉvaˬ htaꞈ hkʼa dehꞈ shiˍ daꞈ ve lehˬ yawˇ ve te hkʼaˇ dawˇ htaꞈ ceh henˇ ve maˇ heˆ. Yawˇ loˍ ve htaꞈ kaꞈ gʼa te ve yoˬ. Chi beuꞈ teˇ co˗e “chaw hkʼa peu˗eˬ htaiˍ hkʼawꞈ ve htaꞈ gʼa tuˬ ve awˬ hkʼoˆ kaꞈ, hteˇ ve cawˇ ve htaꞈ shiˍ la tuˬ yawˇ heuˆ gaˇ ve yoˬ.” (1 Tiˆmoˉseˍ 2:3, 4) Hkʼe te leh Yaˬhoˉvaˬ htaꞈ shiˍ ve teˇ hkʼaˇ lehˬ shu htaꞈ Liꞈ hpu maˍ piˇ ve yoˬ.

11. Shu htaꞈ Yaˬhoˉvaˬ ve awˬ lawn maˍ piˇ ve ngaˬ hui yawˇ htaꞈ hkʼa dehꞈ shiˍ daꞈ tuˬ hkʼaˬ hkʼe ga laˇ ve le?

¹¹ Shu htaꞈ Yaˬhoˉvaˬ ve awˬ lawn maˍ piˇ htaˇ, ngaˬ hui kaꞈ yawˇ htaꞈ hkʼa dehꞈ shiˍ ve yoˬ. Gʼuiˬ sha htaꞈ awˬ chawˇ te gaˇ ve chaw htaꞈ mawˬ tuˬ yawˇ ha kʼaˉ ve hkʼaw beˆ maˍ laˇ ve yoˬ. (Yoˇhanˬ 6:44; Tcuh yaˇ 13:48) Liꞈ hpu henˇ ve chaw yawˇ awˬ to leh te hkʼaˇ dawˇ hkʼaˇ pa ve htaꞈ gʼa mawˬ htaˇ, Liꞈ hpu hkʼaw ve kanˇ paˆ ngaˬ hui hkʼa tawˍ lehˆ gʼa mawˬ ve yoˬ. (Kawˇlawˇsehˇ 3:9, 10) Chi hkʼoˆ kaꞈ, Gʼuiˬ sha htaꞈ shiˍ leh a shaꞈ gʼa ponˬ tuˬ ngaˬ hui hto toˇ kuiˬ awˬ ti lo ve chaw htaꞈ laiˉ pawˆ Yaˬhoˉvaˬ yeunˇ hkanˍ laˇ ve ngaˬ hui hkʼa tawˍ lehˆ gʼa mawˬ ve yoˬ.—Roˉmaꞈ 10:13-15.

12. Tawˆ kʼai ve liꞈ 33:13 hkʼaw Moˉseˍ aˬ htoꞈ ma awˬ lawn htaꞈ kʼawꞈ lawˬ ve le?

¹² Moˉseˍ Yaˬhoˉvaˬ geh meuˆ daꞈ ve htaꞈ awˬ hpfuhˇ shiˍ ve tehꞈ hpeuꞈ maw laˇ ve. Yawˇ Gʼuiˬ sha htaꞈ hkʼa dehꞈ shiˍ daꞈ tuˬ anˇ tuˬ laiˉ ceuˬ te gʼa tcuh ve htawˇ, Gʼuiˬ sha htaꞈ hkʼa dehꞈ shiˍ daꞈ tuˬ kʼawꞈ lawˬ sheˍ ve yoˬ. (Tawˆ kʼai ve 33:13 gʼaw sheˍ.) Moˉseˍ a shaꞈ 80 hkʼawꞈ hpaˆ˗oˬ ve htawˇ, mvuhˇ naw ma hkʼoˆ Awˬ pa htaꞈ caˉ daꞈ ve laiˉ ceuˬ gʼa henˇ sheˍ ve tehꞈ yawˇ dawˇ ve yoˬ.

13. Ngaˬ hui Gʼuiˬ sha geh meuˆ daꞈ ve awˬ hpfuhˇ shiˍ ve tehꞈ te tawˆ la ve awˬ hkʼaˇ teˇ hkʼaˇ lehˬ aˬ htoꞈ ma le?

¹³ Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Yaˬhoˉvaˬ ve kanˉ hkʼaˬ hkʼe maw te˗oˬ ve htawˇ, ngaˬ hui yawˇ geh meuˆ daꞈ ve awˬ hpfuhˇ shiˍ ve tehꞈ gʼa hpeuꞈ maw piˇ ve yoˬ. Ngaˬ hui awˬ hpfuhˇ shiˍ ve hkʼa tawˍ lehˆ te tawˆ la ve teˇ hkʼaˇ lehˬ yawˇ geh bon lawˬ ve yoˬ.

14. Gʼuiˬ sha htaꞈ hkʼa dehꞈ shiˍ daꞈ tuˬ aˬ htoꞈ ma te ngaˬ hui bon lawˬ ve a yeˇ uiˍ jaˇ ve le?

¹⁴ Nawˬ chaw teˇ gʼaˇ htaꞈ meuˆ daꞈ gaˇ ve kʼo, yawˇ geh tawˇ gʼa yaw daꞈ cawˇ ve yoˬ. Nawˬ Gʼuiˬ sha geh meuˆ daꞈ gaˇ ve kʼo, yawˇ geh bon gʼa lawˬ cawˇ ve yoˬ. Nawˬ hkʼaˬ hkʼe dawˇ ve Gʼuiˬ sha htaꞈ kʼoˆ piˇ tuˬ taˇ kawˆ. (Eˇfeˇsuꞈ 6:18) Tawˇ pa haˉ te kʼo, Tuˬraˬkiˬ mvuhˇ miˬ lo chehˇ ve Kiˇtan kʼoˆ ve, “ngaˬ Yaˬhoˉvaˬ geh hkʼaˬ htaˆ kaꞈ yaw daꞈ htaˇ, yawˇ htaꞈ haꞈ leh yonˍ maˇ la ve yoˬ. Ngaˬ ve bon lawˬ hkawˇ htaꞈ Yaˬhoˉvaˬ hkʼawꞈ laˇ ve pa taw, yawˇ ngaˬ ve Awˬ pa ngaˬ ve awˬ chawˇ hpehꞈ ve tehꞈ dawˇ la ve yoˬ.”

15. Yaˬhoˉvaˬ jawˇ mawˇ Daˍviˆ htaꞈ hkʼaˬ hkʼe kʼoˆ ve le?

¹⁵ Jawˇmawˇ Daˍviˆ Yaˬhoˉvaˬ htaꞈ chiˇ aꞈ piˇ˗oˬ ve chaw ceuˬ geh paw la ve yoˬ. Yawˇ ve awˬ pa awˬ e leh awˬ paˇ awˬ kui chehˇ ve chaw Yaˬhoˉvaˬ htaꞈ oˉ kʼoˍ pui ve yoˬ. Yaꞈ hkʼaˇ, Daˍviˆ yehˬ kʼa hkʼaw ve chaw yonˍ ve pa taw yonˍ ve maˇ heˆ. Daˍviˆ yawˇ hkʼaˇ yawˇ Yaˬhoˉvaˬ geh meuˆ daꞈ leh Yaˬhoˉvaˬ kaꞈ yawˇ htaꞈ haꞈ jaˇ. Yaˬhoˉvaˬ Daˍviˆ htaꞈ kʼoˆ piˇ ve, ‘nawˬ lehˬ ngaˬ ve a loˍ hkʼa biˇ te’ ve yoˬ. (Tcuh yaˇ 13:22) Daˍviˆ Yaˬhoˉvaˬ geh meuˆ daꞈ tuˬ aˬ htoꞈ ma te piˇ ve le?

16. Daˍviˆ Yaˬhoˉvaˬ hpanˍ taˍ ve awˬ ceuˬ teˇ hpaˍ htaꞈ dawˇ nyi htaˇ, yawˇ ve awˬ lawn aˬ htoꞈ ma shiˍ la ve le?

¹⁶ Daˍviˆ Yaˬhoˉvaˬ htaꞈ caˉ daꞈ ve hpanˍ taˍ te taˍ ve htaꞈ henˇ yuˬ ve. Yaˇ ehˉ htaˇ Daˍviˆ awˬ pa ve yawˬ hawˉ ve yoˬ. Oˇ ve teˇ yanˇ yawˇ Yaˬhoˉvaˬ hpanˍ taˍ ve htaꞈ tanˬ dawˇ nyi ve yoˬ. Mvuhˇ hpeuꞈ htaˇ mvuhˇ naw ma htaꞈ chiˇ nyi leh meuꞈ keu shiˍ teˇ hpaˍ htaꞈ ceh mawˬ ve maˇ heˆ. Meuꞈ keu shiˍ chi teˇ hpaˍ hpanˍ shehˍ hpaˇ ve te hkʼaˇ dawˇ hkʼaˇ htaꞈ  kaꞈ shiˍ la ve yoˬ. Yawˇ kʼoˆ ve, ‘mvuhˇ naw ma lehˬ Gʼuiˬ sha ve awˬ meꞈ awˬ hponˇ leh yawˇ te taˍ peuˬ ve kanˉ teˇ hpaˍ htaꞈ hpeuꞈ maˍ laˇ chehˇ ve yoˬ.’ (Chiˇ mvuh ve 19:1, 2) Yaˬhoˉvaˬ chaw yaˇ htaꞈ hpanˍ ve yawˇ dawˇ nyi htaˇ, Daˍviˆ kaꞈ Yaˬhoˉvaˬ ve cuˇ yiˍ htaꞈ shiˍ la ve yoˬ. (Chiˇ mvuh ve 139:14) Daˍviˆ Gʼuiˬ sha hpanˍ taˍ ve awˬ ceuˬ htaꞈ hkʼa dehꞈ dawˇ nyi htaˇ, yawˇ nyi ma nuˇ nehˬ la ve yoˬ.—Chiˇ mvuh ve 139:6.

17. Gʼuiˬ sha hpanˍ taˍ ve awˬ ceuˬ htaꞈ dawˇ nyi htaˇ, ngaˬ hui htaꞈ aˬ htoꞈ ma maˍ laˇ ve le?

¹⁷ Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Gʼuiˬ sha hpanˍ taˍ ve awˬ ceuˬ htaꞈ dawˇ nyi ve, miˬ guiˬ hkʼoˆ daꞈ jaˇ ve awˬ ceuˬ htaꞈ chaˬ nyi ve, leh awˬ ceuˬ chi ve teˇ hpaˍ htaꞈ hkʼaˬ hkʼe taw anˇ tuˬ cawˬ ve shiˍ la ve yoˬ! Teˇ nyi le le a shaꞈ teꞈ kuiˬ hkʼaw suhˆ cehˬ hawˆ cehˬ, to nuˇ to shaˆ teˇ hpaˍ, leh chaw yaˇ htaꞈ dawˇ nyi ve yoˬ. Awˬ ceuˬ chi ve teˇ hpaˍ htaꞈ nyi htaˇ, Yaˬhoˉvaˬ htaꞈ caˉ daꞈ ve nawˬ htaꞈ hkʼaˬ hkʼe maˍ laˇ ve le? Mvuhˇ naw ma hkʼoˆ ve Awˬ pa nawˬ htaꞈ hkʼaˬ hkʼe taw haꞈ ve shiˍ la ve yoˬ. (Roˉmaꞈ 1:20) Nawˬ Gʼuiˬ sha htaꞈ haꞈ ve kaꞈ teˇ nyi aꞈ kehˉ teˇ nyi maˇ la ve yoˬ.

18. Chiˇ mvuh ve liꞈ 18 hkʼaw Daˍviˆ aˬ htoꞈ ma htaꞈ shiˍ ve le?

¹⁸ Daˍviˆ Yaˬhoˉvaˬ yawˇ htaꞈ ga laˇ ve tehꞈ shiˍ ve. Daˍviˆ awˬ pa ve yawˬ htaꞈ laˇ caˬ shiˉ leh yehˬ miˉ tawˍ maˇ gʼa cheꞈ tuˬ ga piˇ htaˇ, Yaˬhoˉvaˬ yawˇ htaꞈ ga laˇ ve tehꞈ shiˍ ve yoˬ. Gawˇliˇyaꞈ maꞈ poˍ lonˉ htaꞈ yawˇ gʼaˇ htaˇ, Yaˬhoˉvaˬ ga laˇ ve tehꞈ yawˇ hkʼa dehꞈ shiˍ ve yoˬ. (1 Saˍmo˗eˍlaˆ 17:37) Daˍviˆ jawˇ mawˇ Sawˉluꞈ htaꞈ hpaw˗e htaˇ, yawˇ a shaꞈ gʼa ponˬ tuˬ Yaˬhoˉvaˬ ga laˇ ve tehꞈ hkʼa dehꞈ shiˍ ve yoˬ. (Chiˇ mvuh ve liꞈ kaˇ nanˉ uiˍ 18 awˬ hkʼoˆ ve awˬ lawn, Miˬ guiˬ awˬ suhˉ yuˬ tawˆ ve Liꞈ hpu) Uiˍ muiˬ cheuˬ muiˬ ve chaw lehˬ yawˇ hui te gʼa ve hkʼa peu˗eˬ yawˇ hui cheuˬ ve tehꞈ dawˇ ve yoˬ. Yaꞈ hkʼaˇ, Daˍviˆ nyi ma nuˇ nehˬ jaˇ. Yaˬhoˉvaˬ yawˇ htaꞈ hkʼaˬ htaˆ kaꞈ ga laˇ ve tehꞈ yawˇ shiˍ ve yoˬ.—Chiˇ mvuh ve 138:6.

19. Daˍviˆ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

¹⁹ Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Ngaˬ hui Yaˬhoˉvaˬ ga laˇ tuˬ ve ceh maˇ lawˬ. Yaꞈ hkʼaˇ, ngaˬ hui htaꞈ hkʼaˬ hkʼe htaˇ ga laˇ ve gʼa shiˍ cawˇ ve yoˬ. Ngaˬ hui nyi ma nuˇ nehˬ ve kʼo, teˇ ceuˬ le le ngaˬ hui te gʼa ve tehꞈ maˇ dawˇ leh Yaˬhoˉvaˬ ga laˇ ve tehꞈ dawˇ ve yoˬ. Yaˬhoˉvaˬ ga laˇ ve htaꞈ mawˬ htaˇ, ngaˬ hui yawˇ geh hkʼa dehꞈ meuˆ daꞈ gʼa ve yoˬ. Fiˬjiˬ venˇ lo awˬ viˉ awˬ nyi Ai˗sehˆ Yaˬhoˉvaˬ ve kanˉ te maw jaˇ˗oˬ ve, yawˇ awˬ tehˬ awˬ na chi hkʼe dawˇ ve yoˬ. Yawˇ kʼoˆ ve, “Liꞈ hpu tanˬ henˇ htaˇ leh chi teˇ hkui ve htaꞈ kʼawꞈ dawˇ nyi htaˇ, Yaˬhoˉvaˬ ngaˬ htaꞈ hkʼaˬ hkʼe ga laˇ ve hkʼa tawˍ lehˆ gʼa mawˬ ve yoˬ. Chi lehˬ Yaˬhoˉvaˬ ngaˬ awˬ pon awˬ tehˬ hpehꞈ leh ngaˬ yawˇ geh meuˆ daꞈ tuˬ te laˇ ve yoˬ.”

20. Daˍviˆ Yaˬhoˉvaˬ htaꞈ meuˆ daꞈ ve ngaˬ hui htaꞈ hkʼaˬ hkʼe maˍ laˇ ve le?

²⁰ Daˍviˆ Yaˬhoˉvaˬ ve te hkʼaˇ dawˇ hkʼaˇ htaꞈ henˇ yuˬ ve. Yaˬhoˉvaˬ ngaˬ hui htaꞈ hpanˍ laˇ leh yawˇ htaꞈ henˇ yuˬ tcuh laˇ ve yoˬ. (Awˬ hkuiˉ puiˍ 1:26) Ngaˬ hui yawˇ ve te hkʼaˇ dawˇ hkʼaˇ htaꞈ henˇ htaˇ, yawˇ htaꞈ hkʼa dehꞈ shiˍ ve yoˬ. Daˍviˆ mvuhˇ naw ma hkʼoˆ ve Awˬ pa ve te hkʼaˇ dawˇ hkʼaˇ htaꞈ hkʼa dehꞈ shiˍ leh yawˇ shu geh caˉ daꞈ htaˇ Awˬ pa htaꞈ henˇ yuˬ gʼa ve yoˬ. Tawˇ pa haˉ te kʼo, Daˍviˆ Beˍtaˍsheˍbaˆ htaꞈ haˉ chawˇ te leh yawˇ ve awˬ hpawˇ htaꞈ shu tiˇ pehˍ tcuh ve, chi ve yawˇ Yaˬhoˉvaˬ htaꞈ venˇ baˆ te yaꞈ ve htawˇ, Yaˬhoˉvaˬ yawˇ htaꞈ ha kʼaˉ piˇ sheˍ. (2 Saˍmo˗eˍlaˆ 11:1-4, 15) Peuˬ laˬ htaˇ yawˇ Yaˬhoˉvaˬ htaꞈ henˇ yuˬ leh shu htaꞈ ha kʼaˉ ve pa taw, Yaˬhoˉvaˬ chi hkʼe te sheˍ ve yoˬ. Daˍviˆ Yaˬhoˉvaˬ geh meuˆ daꞈ leh Iˉsaˍreˍlaˆ chaw haꞈ jaˇ ve jawˇ mawˇ teˇ gʼaˇ hpehꞈ ve yoˬ. Gʼuiˬ sha Daˍviˆ htaꞈ Iˉsaˍreˍlaˆ chaw ve jawˇ mawˇ hpehꞈ tcuh ve yoˬ.—1 Jawˇmawˇ 15:11; 2 Jawˇmawˇ 14:1-3.

21. Eˇfeˇsuꞈ liꞈ 4:24 leh kaˇ nanˉ uiˍ 5:1 hkʼaw kʼoˆ taˍ taˍ ve hkʼe, Ngaˬ hui Gʼuiˬ sha htaꞈ henˇ yuˬ htaˇ awˬ bon hkʼaˬ hkʼe gʼa ve le?

 ²¹ Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Ngaˬ hui Gʼuiˬ sha htaꞈ henˇ yuˬ cawˇ ve yoˬ. Chi hkʼe te ve kʼo, ngaˬ hui awˬ pon awˬ bon cawˬ leh Yaˬhoˉvaˬ htaꞈ shiˍ daꞈ maˇ la tuˬ ga laˇ gʼa ve yoˬ. Ngaˬ hui Gʼuiˬ sha htaꞈ henˇ yuˬ ve kʼo, ngaˬ hui yawˇ ve yaˇ hpehꞈ ve tehꞈ hpeuꞈ maw piˇ ve yoˬ.—Eˇfeˇsuꞈ 4:24; 5:1 gʼaw sheˍ.

22-23. Yaˬhoˉvaˬ ve awˬ lawn ngaˬ hui gʼa henˇ taˍ ve hkʼe gʼaꞈ te ve kʼo awˬ bon hkʼaˬ hkʼe gʼa tuˬ le?

²² Yaˬhoˉvaˬ hpanˍ taˍ ve awˬ ceuˬ leh Liꞈ hpu hkʼaw ngaˬ hui yawˇ htaꞈ shiˍ tuˬ hpeuꞈ maw laˇ ve tehꞈ gʼa henˇ˗oˬ ve yoˬ. Liꞈ hpu hkʼaw Gʼuiˬ sha ve kanˉ te ve ka tiꞈ yeˬ ve chaw maˇ maˇ ve awˬ lawn ngaˬ hui henˇ yuˬ tuˬ cawˬ ve yoˬ. Moˉseˍ leh Daˍviˆ kaꞈ yoˬ. Ngaˬ hui Yaˬhoˉvaˬ htaꞈ shiˍ daꞈ tuˬ yawˇ ve awˬ vuiˬ yawˇ te ve yoˬ. Gʼuiˬ sha htaꞈ hkʼa dehꞈ shiˍ daꞈ tuˬ, na paw, mehˆ shiˍ, nyi ma ngaˬ hui ve awˬ vuiˬ ngaˬ hui te˗aw laˇ? Ngaˬ hui htaꞈ cawˬ ve yoˬ.

²³ Ngaˬ hui Yaˬhoˉvaˬ ve awˬ lawn henˇ ve peuˬ kuiˬ leh kuiˬ maˇ cawˬ. (Cuˇ yiˍ piˇ ve 3:11) A yeˇ uiˍ jaˇ ve lehˬ ngaˬ hui yawˇ htaꞈ shiˍ ve ceh maˇ lawꞈ. Yaꞈ hkʼaˇ, cuˇ yiˍ chi ve htaꞈ hkʼaˬ hkʼe yehˇ cawˇ ve le? Ngaˬ hui htaꞈ haꞈ ve Awˬ pa mvuhˇ naw ma hkʼoˆ chehˇ ve htaꞈ henˇ yuˬ leh yuˬ yehˇ ve kʼo, yawˇ kaꞈ ngaˬ hui geh meuˆ daꞈ tuˬ yoˬ. (Yaˍkoˆ 4:8) Coˇ caˇ leh yawˇ htaꞈ shiˍ gaˇ ve chaw hui htaꞈ chiˇ baˬ tuˬ awˬ nyi maˇ cawˬ tehꞈ Liꞈ hpu hkʼaw yawˇ ka tiꞈ te taˍ laˇ ve yoˬ.