Nawˬ shu te laˇ ve htaꞈ awˬ hpfuhˇ shiˍ leh awˬ bon uiˍ jaˇ kʼoˆ piˇ˗aw laˇ? Chi ngaˬ hui hkʼa dehꞈ gʼa dawˇ nyi ve yoˬ. Liꞈ hpu hkʼaw tcuh kaˍ paˍ ve tawˇ hkawˇ kʼoˆ taˍ ve, ngaˬ hui ve awˬ co˗e “shu ve awˬ bon htaꞈ maˇ shiˍ puiˉ ve chaw” hpehꞈ tuˬ yoˬ. (2 Tiˆmoˉseˍ 3:2) Shu htaꞈ awˬ bon uiˍ hkawˇ maˇ kʼoˆ piˇ cawˇ tehꞈ dawˇ ve chaw htaꞈ nawˬ mawˬ jaw ve yoˬ hehˉ. Chi hkʼe ve chaw lehˬ shu yawˇ htaꞈ gʼa te laˇ cawˇ leh teˇ gʼaˇ le le yawˇ ve awˬ bon gʼa shiˍ cawˇ ve tehꞈ dawˇ ve yoˬ. Nawˬ chi hkʼe ve chaw awˬ paˇ lo maˇ chehˇ gaˇ ve maˇ heˆ laˇ?

Yaꞈ hkʼaˇ, Liꞈ hpu hkʼaw Yaˬhoˉvaˬ ve kanˉ te ve chaw htaꞈ kʼoˆ piˇ ve, “yawˇ ve bon htaꞈ dawˇ nawˇ˗oˆ.” Ngaˬ hui “teˇ ceuˬ le le awˬ hkʼaw lo Gʼuiˬ sha htaꞈ chiˇ mvuh” cawˇ ve yoˬ. (Kawˇlawˇsehˇ 3:15; 1 Hteˇsaˍlawˇniˆ 5:18) Shu htaꞈ awˬ bon uiˍ jaˇ kʼoˆ piˇ ve lehˬ a shu yawˇ awˬ pon awˬ bon cawˬ ve yoˬ. Aˬ htoꞈ ma te awˬ bon cawˬ ve le, teˇ geh nyi sheˍ.

Awˬ bon uiˍ hkawˇ shiˍ ve a yeˇ uiˍ jaˇ ve lehˬ a shu yawˇ awˬ pon awˬ bon cawˬ ve yoˬ. Shu htaꞈ awˬ bon uiˍ hkawˇ kʼoˆ piˇ ve lehˬ nyi ma sha leh gʼa ve chaw kaꞈ ha lehˬ ve yoˬ. Aˬ htoꞈ ma te nyiˇ hpawˇ hpawˇ awˬ bon cawˬ ve le? Shu nawˬ htaꞈ teˇ ceuˬ ceuˬ te laˇ ve shiˍ ve pa taw, nawˬ htaꞈ a yeˇ yuˬ leh awˬ hpfuhˇ cawˬ ve tehꞈ hpeuꞈ maw laˇ ve yoˬ. Chi nawˬ nyi ma sha tuˬ te laˇ ve maˇ heˆ laˇ? Ruˉhtaˆ Bawˇzaˆ yawˇ htaꞈ daꞈ ve te piˇ htaˇ, yawˇ chi hkʼe dawˇ ve yoˬ. Ruˉhtaˆ yawˇ htaꞈ a yeˇ yuˬ laˇ leh awˬ hpfuhˇ cawˬ ve tehꞈ shiˍ htaˇ ha lehˬ jaˇ.—Ruˉhtaˆ 2:10-13.

A yeˇ uiˍ jaˇ ve lehˬ Gʼuiˬ sha ngaˬ hui htaꞈ te laˇ ve awˬ bon uiˍ jaˇ kʼoˆ piˇ cawˇ ve yoˬ. Yaˬhoˉvaˬ nawˬ htaꞈ peꞈ laˇ jaw ve, nawˬ uiˍ la mvuh la tuˬ ga laˇ ve, leh yawˇ caˉ leh nawˬ htaꞈ kʼawꞈ ga laˇ ve, chi ve teˇ hpaˍ htaꞈ dawˇ nyi cawˇ ve yoˬ. (Bon maˍ ve 8:17, 18; Tcuh yaˇ 14:17) Yaꞈ hkʼaˇ, hkʼa dehꞈ maˇ dawˇ nyi ve taˇ te. Nawˬ leh nawˬ haꞈ ve chaw htaꞈ Gʼuiˬ sha daꞈ jaˇ ve awˬ ceuˬ teˇ hpaˍ peꞈ laˇ ve htaꞈ hkʼa dehꞈ dawˇ nyi cawˇ ve yoˬ. Yaˬhoˉvaˬ nawˬ htaꞈ hkʼaˬ hkʼe taw haꞈ ve dawˇ nyi htaˇ, nawˬ yawˇ te laˇ ve awˬ hpfuhˇ htaꞈ shiˍ leh awˬ bon uiˍ jaˇ kʼoˆ piˇ gaˇ ve yoˬ. Gʼuiˬ sha nawˬ htaꞈ haꞈ leh awˬ hpfuhˇ cawˬ ve tehꞈ dawˇ tuˬ te laˇ ve yoˬ.—1 Yoˇhanˬ 4:9.

Chi hkʼoˆ kaꞈ, Yaˬhoˉvaˬ nawˬ htaꞈ haꞈ leh nawˬ htaꞈ daꞈ jaˇ ve awˬ ceuˬ peꞈ laˇ htaˇ, yawˇ htaꞈ awˬ bon uiˍ jaˇ kʼoˆ piˇ cawˇ ve yoˬ. (Chiˇ mvuh ve 100:4, 5) Chaw teˇ gʼaˇ chi hkʼe kʼoˆ jaw ve, “awˬ bon uiˍ jaˇ kʼoˆ piˇ ve lehˬ ngaˬ hui ha lehˬ tuˬ te laˇ ve yoˬ.”

Awˬ bon uiˍ jaˇ kʼoˆ piˇ ve teˇ hkʼaˇ lehˬ ngaˬ hui meuˆ daꞈ tuˬ te laˇ ve yoˬ. A shu yawˇ awˬ to awˬ hpfuhˇ cawˬ ve tehꞈ dawˇ ve yoˬ. Yawˇ nawˬ htaꞈ daꞈ ve awˬ ceuˬ te laˇ ve pa taw, nawˬ yawˇ htaꞈ awˬ hpfuhˇ shiˍ leh awˬ bon uiˍ jaˇ kʼoˆ piˇ ve kʼo, yawˇ leh nawˬ kaꞈ meuˆ daꞈ maˇ la tuˬ yoˬ. (Roˉmaꞈ 16:3, 4) Chi hkʼoˆ kaꞈ, awˬ bon uiˍ hkawˇ leh shu te laˇ ve htaꞈ awˬ hpfuhˇ shiˍ ve chaw lehˬ shu htaꞈ ga piˇ puiˉ ve yoˬ. Shu yawˇ htaꞈ daꞈ ve te laˇ ve htaꞈ mawˬ htaˇ, yawˇ kaꞈ shu htaꞈ daꞈ ve te piˇ gaˇ ve yoˬ. Yawˇ shu htaꞈ ga piˇ ve kʼo, yawˇ kaꞈ ha lehˬ ve yoˬ. Yeˍsuˆ kʼoˆ ve hkʼa shuˍ “piˇ ve lehˬ gʼa ve aꞈ kehˉ awˬ bon uiˍ ve yoˬ.”—Tcuh yaˇ 20:35.

Hkʼeriˉfaˇne liꞈ tanˇ mvuh ve hkʼaw chaˬ nyi paˍ Roˍbeuˍ Eh˗mawnˇ awˬ bon uiˍ hkawˇ htaꞈ caˉ daꞈ ve chaˬ nyi mawˬ ve yoˬ. Yawˇ kʼoˆ ve, “awˬ bon uiˍ hkawˇ leh shu te laˇ ve htaꞈ awˬ hpfuhˇ shiˍ tuˬ, chaw yaˇ teˇ gʼaˇ leh teˇ gʼaˇ caˉ daꞈ taˍ leh gʼaˇ va daꞈ cawˇ ve tehꞈ yawˇ shiˍ ve yoˬ. Teˇ pawˆ pawˆ kʼo shu  htaꞈ piˇ ve, teˇ pawˆ pawˆ kʼo gʼa ve yoˬ.” Tawˇ pa haˉ te kʼo, shu ngaˬ hui gʼa caˇ tuˬ ga laˇ leh naˬ htaˇ kaꞈ ga laˇ ve yoˬ. (1 Kawˇrenˍhtuˆ 12:21) Shu htaꞈ awˬ bon uiˍ hkawˇ kʼoˆ piˇ ve lehˬ shu te laˇ ve awˬ hpfuhˇ htaꞈ shiˍ ve tehꞈ ngaˬ hui hkʼa tawˍ lehˆ gʼa mawˬ ve yoˬ. Hkʼe kʼo nawˬ˗heꞈ? Shu nawˬ htaꞈ teˇ ceuˬ ceuˬ te laˇ htaˇ, nawˬ awˬ bon uiˍ jaˇ kʼoˆ piˇ˗aw laˇ?

Chi hkʼoˆ kaꞈ, nawˬ maˇ daꞈ ve hpawˇ maˇ dawˇ leh daꞈ ve hpawˇ dawˇ tuˬ ga laˇ ve pa taw, awˬ bon uiˍ hkawˇ shiˍ ve lehˬ nawˬ awˬ pon awˬ bon cawˬ ve yoˬ. Nawˬ ve dawˇ hkʼaˇ lehˬ hkeunˉ tuˬ htaꞈ shuˍ leh maˇ cawˬ tcuh gaˇ ve dawˇ hkʼaˇ htaꞈ tawˆ˗e tcuh leh cawˬ tcuh gaˇ ve dawˇ hkʼaˇ htaꞈ ceh leuˉ taˉ tcuh ve yoˬ. Awˬ bon uiˍ hkawˇ shiˍ ve kʼo, nawˬ daꞈ ve hpawˇ dawˇ leh shoꞈ shaꞈ ve hpawˇ hkʼa dehꞈ maˇ dawˇ nyi. Nawˬ awˬ bon uiˍ hkawˇ leh shu te laˇ ve htaꞈ awˬ hpfuhˇ shiˍ ve kʼo, a shaꞈ teꞈ kuiˬ hkʼaw daꞈ ve awˬ ceuˬ gʼa hpuˇ tuˬ yoˬ. Chi nawˬ awˬ bon uiˍ hkawˇ shiˍ tuˬ te laˇ ve yoˬ. Tcuh yaˇ Pawˇluꞈ kʼoˆ ve hkʼe gʼaꞈ te ve kʼo, a shaꞈ teꞈ kuiˬ hkʼaw awˬ bon uiˍ hkawˇ shiˍ tuˬ yoˬ. Yawˇ kʼoˆ ve, “Jawˇmawˇ Yeˍsuˆ awˬ hkʼaw lo hkʼaˬ htaˆ kaꞈ ha lehˬ chehˇ˗oˆ.”—Hpiˇliˇpiˆ 4:4.

Awˬ bon uiˍ hkawˇ shiˍ ve chaw lehˬ maˇ daꞈ ve hpawˇ maˇ dawˇ nyi. Awˬ bon uiˍ hkawˇ shiˍ ve kʼo, shu htaꞈ maˇ hkawehˉ, nyi ma luˬ ve, maˇ heˆ leh beuꞈ ve maˇ cawˬ ve tehꞈ nawˬ mawˬ ve maˇ heˆ laˇ? Chi hkʼoˆ kaꞈ, awˬ bon uiˍ hkawˇ shiˍ ve chaw lehˬ hpu shi mawˇ jeˬ htaꞈ a yeˇ hkʼe tawˍ maˇ te. Yawˇ cawˬ ve htaꞈ awˬ hpfuhˇ shiˍ ve yoˬ. Yawˇ hpu shi mawˇ jeˬ maˇ maˇ cawˬ tuˬ maˇ gʼaꞈ ca.—Hpiˇliˇpiˆ 4:12.

Nawˬ Hkriꞈ yaˇ hpehꞈ leh Saˍtanˍ nawˬ htaꞈ awˬ gʼaˇ nuˇ tcuh gaˇ ve, leh awˬ leh meuˇ ve awˬ yanˇ hkʼaw nawˬ gʼa hpuˇ ve teˇ hpaˍ htaꞈ pa taw, maˇ te gaˇ tuˬ te laˇ ve htaꞈ nawˬ shiˍ ve yoˬ. Neˇ haiˬ lehˬ nawˬ shu htaꞈ maˇ daꞈ ve hpawˇ dawˇ tuˬ te laˇ ve yoˬ. Nawˬ chi hkʼe ve chaw hpehꞈ ve kʼo, hto toˇ kuiˬ lo maˇ ha lehˬ. Yaꞈ hkʼaˇ awˬ bon uiˍ hkawˇ leh shu te laˇ ve awˬ hpfuhˇ htaꞈ shiˍ ve kʼo, Gʼuiˬ sha ve awˬ ha hpu ve awˬ shiˍ htaꞈ caˉ daꞈ ve yoˬ. Daꞈ ve awˬ ceuˬ Gʼuiˬ sha peꞈ laˇ leh Gʼuiˬ sha ka tiꞈ te taˍ laˇ ve htaꞈ caˉ daꞈ ve pa taw, ha lehˬ ve yoˬ.—Gaˍlaˍtiˆ 5:22, 23.

Nawˬ Yaˬhoˉvaˬ ve chaw hpehꞈ ve yoˬ. Awˬ bon uiˍ hkawˇ leh shu te laˇ ve awˬ hpfuhˇ htaꞈ shiˍ ve hkʼaˬ hkʼe caˉ daꞈ ve awˬ lawn chi ve hkʼaw nawˬ gʼa henˇ˗oˬ. Yaꞈ hkʼaˇ, nawˬ awˬ bon uiˍ hkawˇ leh daꞈ ve hpawˇ dawˇ tuˬ sha ve maˇ heˆ. Hkʼe kaꞈ awˬ gʼaˇ taˇ nuˇ. Nawˬ awˬ bon uiˍ hkawˇ shiˍ tuˬ te jawˬ gʼa ve yoˬ. Teˇ nyi le le daꞈ ve awˬ ceuˬ htaꞈ dawˇ nyi tuˬ awˬ yanˇ shawˍ teh leh nawˬ a shaꞈ teꞈ kuiˬ hkʼaw awˬ bon uiˍ jaˇ kʼoˆ piˇ gʼa ve yoˬ. Nawˬ chi hkʼe te ve kʼo, nawˬ awˬ bon uiˍ hkawˇ leh shu te laˇ ve awˬ hpfuhˇ htaꞈ shiˍ ve yoˬ. Shoꞈ shaꞈ ve htaꞈ tiˉ dawˇ nyi ve chaw aꞈ kehˉ nawˬ ha lehˬ ve cawˬ tuˬ yoˬ. Nawˬ bvuhꞈ tawˆ la nyi kaꞈ gʼa ve yoˬ. Nawˬ awˬ bon uiˍ jaˇ kʼoˆ piˇ gʼa ve teˇ nyi le le 2-3 ceuˬ bvuhꞈ nyi gʼa ve yoˬ.

Awˬ lawn chi ve htaꞈ chaˬ ve chaw kʼoˆ ve, “awˬ bon uiˍ jaˇ kʼoˆ piˇ ve hkʼaˬ htaˆ kaꞈ te jawˬ ve lehˬ uˉ nawꞈ nehˆ hkʼaw dawˇ hkʼaˇ pa leh daꞈ ve hpawˇ dawˇ tuˬ te laˇ ve yoˬ.” Awˬ bon uiˍ hkawˇ kʼoˆ piˇ tuˬ shiˍ ve chaw lehˬ ha lehˬ jaˇ! Chi htaꞈ pa taw nawˬ gʼa hpuˇ ve awˬ ceuˬ htaꞈ ha lehˬ ve, leh awˬ bon uiˍ hkawˇ leh shu te laˇ ve awˬ hpfuhˇ htaꞈ shiˍ ve dawˇ nyi ve te jawˬ gʼa ve yoˬ. Gʼa ve awˬ ceuˬ htaꞈ dawˇ nyi˗oˆ. “Gʼuiˬ sha htaꞈ chiˇ mvuh˗o. Awˬ lawn kʼo, yawˇ daꞈ jaˇ” leh “teˇ ceuˬ le le awˬ hkʼaw lo Gʼuiˬ sha htaꞈ chiˇ mvuh chehˇ˗oˆ.”—1 Raˍsaˍvanˍ 16:34; 1 Hteˇsaˍlawˇniˆ 5:18.