Bon maˍ ve liꞈ 22:25-27 hkʼaw ve awˬ liˇ tawˇ hkawˇ, hawˉ hkʼaˆ oˇ ve teˇ gʼaˇ te yaꞈ ve htaꞈ chaˬ nyi ve maˇ heˆ. Yawˇ te yaꞈ˗oˬ ve pa taw yoˬ. Yaꞈ hkʼaˇ, awˬ liˇ tawˇ hkawˇ chi ve hkʼaw kʼoˆ ve, yaˇ miˇ oˇ ve teˇ gʼaˇ yaꞈ kuiˬ maˇ cawˬ. Awˬ lawn chi htaꞈ teˇ geh nyi sheˍ.

Bon maˍ ve liꞈ 22:23, 24 hkʼaw kʼoˆ ve, “venˇ hkʼaw lo” shu heuˆ tuˬ ka tiꞈ te taˍ peuˬ ve yaˇ miˇ teˇ gʼaˇ geh hawˉ hkʼaˆ teˇ gʼaˇ zuhꞈ ve awˬ lawn yoˬ. Chi hkʼe te ve yawˇ haˉ chawˇ te ve yoˬ. Awˬ lawn kʼo shu heuˆ tuˬ ka tiꞈ te˗oˬ ve yaˇ miˇ lehˬ heuˆ daꞈ˗oˬ ve htaꞈ shuˍ ve yoˬ. Hkʼe kʼo yaˇ miˇ chi ve teˇ gʼaˇ yaꞈ˗aw laˇ? Yawˇ shu ga laˇ tuˬ kuˬ ve kʼo, shu kaꞈ kaˇ leh yawˇ htaꞈ ga piˇ gʼa tuˬ yoˬ. Yaꞈ hkʼaˇ, “yaˇ miˇ oˇ ve lehˬ venˇ hkʼaw chehˇ taˍ ve htawˇ, shu ca behˇ la htaˇ maˇ kuˬ ve pa taw yoˬ.” Chi htaꞈ pa taw yawˇ oˇ ve hpaˇ geh haˉ chawˇ te ve yoˬ. Yawˇ huiˉ maˬ nyiˇ gʼaˇ gʼaˇ haˉ chawˇ te yaꞈ ve tehꞈ kʼoˆ leh suhˉ jehˬ cheˆ piˇ ve yoˬ.

Yaꞈ hkʼaˇ, Bon maˍ ve liꞈ 22:25-27 hkʼaw yaˇ miˇ htaꞈ suhˉ jehˬ cheˆ piˇ ve awˬ lawn maˇ shuˍ daꞈ ve kʼoˆ taˍ ve yoˬ. Choˬ kaˬ lo kʼoˆ ve, “heh puiˉ hkʼaw lo chaw teˇ gʼaˇ lehˬ, shu heuˆ tuˬ ka tiꞈ te taˍ ve yaˇ miˇ htaꞈ haˉ chawˇ te ve kʼo, hawˉ hkʼaˆ oˇ ve htaꞈ ceh tiˉ gʼa tiˇ pehˍ ve yoˬ. Yaꞈ miˇ htaꞈ teꞈ chiˉ maˇ gʼa te. Yawˇ lehˬ, suh keunˍ ve venˇ baˆ maˇ cawˬ. Chi ve lehˬ, chaw teˇ gʼaˇ shu htaꞈ yaꞈ daꞈ leh shu htaꞈ tiˇ pehˍ piˇ ve hkʼe ceh hpehꞈ ve yoˬ. Chaw oˇ ve lehˬ, heh puiˉ hkʼaw lo yaˇ miˇ oˇ ve htaꞈ haˉ chawˇ te ve yoˬ. Yaˇ miˇ oˇ ve kuˬ ve htawˇ, yawˇ htaꞈ ca ga la paˍ teˇ gʼaˇ kaꞈ maˇ cawˬ.”

Awˬ lawn chi hkʼe ve lehˬ suhˉ jehˬ paˍ yaˇ miˇ oˇ ve teˇ gʼaˇ htaꞈ awˬ bon gʼa tcuh ve yoˬ. Yawˇ hui kʼoˆ ve, “yaˇ miˇ oˇ ve kuˬ ve htawˇ, yawˇ htaꞈ ca ga la paˍ teˇ gʼaˇ kaꞈ maˇ cawˬ.” Hkʼe te leh yawˇ haˉ chawˇ te ve maˇ heˆ. Yaꞈ hkʼaˇ, shu heuˆ tuˬ ka tiꞈ te taˍ peuˬ ve yaˇ miˇ htaꞈ “ca behˇ la” ve pa taw, hawˉ hkʼaˆ chi ve teˇ gʼaˇ haˉ chawˇ te ve tehꞈ suhˉ jehˬ cheˆ piˇ ve yoˬ.

Chi htaꞈ pa taw awˬ liˇ tawˇ hkawˇ chi ve hkʼaw kʼoˆ ve, yaˇ miˇ chi ve teˇ gʼaˇ maˇ gʼa te yaꞈ. Yaꞈ hkʼaˇ, awˬ lawn chi ve hkʼaw hawˉ hkʼaˆ chi ve teˇ gʼaˇ shu htaꞈ behˇ leh haˉ chawˇ te yaꞈ ve tehꞈ suhˉ jehˬ cheˆ piˇ ve yoˬ. Suhˉ jehˬ paˍ “hkʼa dehꞈ chaˬ nyi˗o” ve tehꞈ ngaˬ hui yonˍ gʼa ve yoˬ. Gʼuiˬ sha ve awˬ liˇ awˬ hkʼaˇ hkʼaw hkʼa tawˍ lehˆ kʼoˆ˗oˬ ve hkʼe suhˉ jehˬ cheˆ piˇ ve yoˬ.—Bon maˍ ve 13:14; 17:4; Tawˆ kʼai ve 20:14.