1-2. (a) Hpehˇ piˇ ve awˬ hkʼawꞈ aˬ htoꞈ ma le? (Awˇ ceˍ awˇ fa “ Hpehˇ piˇ ve awˬ hkʼawꞈ aˬ htoꞈ ma le”) (b) Luˉkaꞈ liꞈ 4:16-18 hkʼaw Yeˍsuˆ aˬ htoꞈ ma awˬ lawn kʼoˆ ve le?

 Laiˉ mvuhˇ miˬ hkʼaw jawˇ mawˇ maˇ heˆ leh jawˇ mawˇ ma 50 hkʼawꞈ biˇ htaˇ, yawˇ hui hti caˇ hti dawˬ ve pawehˇ lonˉ te ve yoˬ. Hti caˇ hti dawˬ ve pawehˇ lonˉ teˇ nyi, teˇ shinˉ, maˇ heˆ leh chi aꞈ kehˉ maw ve te ve yoˬ. Yaꞈ hkʼaˇ, pawehˇ chi ve te peuˬ hkʼawꞈ nawˉ maˇ maw chaw yaˇ leunˇ˗e ve yoˬ.

² Iˉsaˍreˍlaˆ chaw 50 hkʼawꞈ biˇ htaˇ teˇ hkʼawꞈ ma hti caˇ hti dawˬ ve, chi ve aꞈ kehˉ daꞈ ve 50 hkʼawꞈ biˇ ve htaꞈ teˇ geh kʼawꞈ nyi sheˍ. Pawehˇ chi ve lehˬ Juˇbiˍliˍ hkʼawꞈ maˇ heˆ leh hpehˇ piˇ ve awˬ hkʼawꞈ tehꞈ kʼoˆ ve yoˬ. Chi teˇ hkʼawꞈ Iˉsaˍreˍlaˆ chaw hui hpehˇ piˇ ve htaꞈ gʼa ve yoˬ. Yaꞈ hkʼaˇ, hpehˇ piˇ ve awˬ hkʼawꞈ aˬ htoꞈ ma te ngaˬ hui awˬ pon kaꞈ a yeˇ uiˍ ve le? Yaˬhoˉvaˬ gu teh taˍ laˇ ve daꞈ jaˇ ve htaꞈ dawˇ nawˇ ve pa taw yoˬ. Chi ngaˬ hui htaꞈ co co hpehˇ laˇ ve gʼa leh chi teˇ hkui kaꞈ ngaˬ hui awˬ bon gʼa ve yoˬ. Yeˍsuˆ kaꞈ hpehˇ piˇ ve chi htaꞈ kʼoˆ ve yoˬ.—Luˉkaꞈ 4:16-18 gʼaw sheˍ.

3. Oˉ kʼoˍ pui ve liꞈ 25:8-12 hkʼaw kʼoˆ taˍ ve hkʼe, hpehˇ piˇ ve awˬ hkʼawꞈ htaˇ Iˉsaˍreˍlaˆ chaw awˬ pon awˬ bon hkʼaˬ hkʼe cawˬ ve le?

³ Hpehˇ piˇ ve htaꞈ Yeˍsuˆ kʼoˆ htaˇ, Gʼuiˬ sha Iˉsaˍreˍlaˆ chaw htaꞈ gu teh taˍ piˇ ve ngaˬ hui na gʼa tuˬ ga laˇ ve yoˬ. Gʼuiˬ sha Iˉsaˍreˍlaˆ chaw htaꞈ kʼoˆ piˇ ve, “nawˬ hui lehˬ ngaˇ chi hkʼawꞈ biˇ ve teˇ hkʼawꞈ htaꞈ daꞈ kehˬ ve awˬ hkʼawꞈ tehꞈ gʼa shawˍ taˍ ve yoˬ. Chi ve teˇ hkʼawꞈ awˬ hkʼaw lo, ponˬ laˬ htaˇ hkʼa hawˇ taˍ ve mawˇ jeˬ teˇ hpaˍ awˬ shehˍ hpaˇ, maˇ heˆ kʼo yawˇ ve awˬ ceuˬ awˬ hkʼaˇ teˇ hpaˍ htaꞈ gʼa kʼawꞈ hkʼawꞈ piˇ ve yoˬ. Shu ve awˬ ceˬ te chehˇ ve chaw lehˬ, a shu  yawˇ ve yehˬ lo kʼawꞈ kʼoꞈ˗e hpehꞈ ve yoˬ.” (Oˉ kʼoˍ pui ve 25:8-12 gʼaw sheˍ.) Shinˉ nyi Iˉsaˍreˍlaˆ chaw awˬ pon awˬ bon hkʼaˬ hkʼe cawˬ ve peuˬ taˉ ve teˇ lawn hkʼaw ngaˬ hui gʼa henˇ˗oˬ. Hkʼe kʼo hpehˇ piˇ ve awˬ hkʼawꞈ˗heꞈ? Tawˇ pa haˉ te kʼo, Iˉsaˍreˍlaˆ chaw teˇ gʼaˇ shu geh jeˬ cha leh miˬ guiˬ hawˇ shaiˍ piˇ cawˇ ve kʼo, ha lehˬ ve awˬ hkʼawꞈ htaˇ, “shu ve awˬ ceˬ te chehˇ ve chaw lehˬ, a shu yawˇ ve yehˬ lo kʼawꞈ kʼoꞈ˗e hpehꞈ ve yoˬ.” Yawˇ ve miˬ guiˬ gʼa hkʼawꞈ ve htaꞈ kʼoˆ gaˇ ve yoˬ. Yaˇ htaꞈ piˇ cawˇ ve awˬ shinˉ awˬ ka htawˇ, shu ve mawˇ maˇ kʼawꞈ hpehꞈ. Chaw teˇ gʼaˇ jeˬ cha jaˇ leh jeˬ shaiˍ piˇ tuˬ yaˇ gʼa hawˇ ve maˇ heˆ leh, yawˇ awˬ to shu ceˬ te tuˬ gʼa hawˇ piˇ ve kʼo hpehˇ piˇ ve awˬ hkʼawꞈ htaˇ, “a shu yawˇ ve yehˬ lo kʼawꞈ kʼoꞈ˗e hpehꞈ ve yoˬ.” Teˇ gʼaˇ˗ehꞈ kaꞈ dawˇ lawn kuiˬ maˇ cawˬ leh teˇ co˗e shu ve awˬ ceˬ maˇ te. Yaˬhoˉvaˬ yawˇ ve mvuhˇ miˬ yaˇ htaꞈ dawˇ haˍ jaˇ!

4-5. Hpehˇ piˇ ve awˬ hkʼawꞈ Iˉsaˍreˍlaˆ chaw hui ve ngaˬ hui gʼa henˇ ve aˬ htoꞈ ma pa taw a yeˇ uiˍ ve le?

⁴ Hpehˇ piˇ ve awˬ hkʼawꞈ aˬ htoꞈ ma awˬ bon cawˬ ve le? Yaˬhoˉvaˬ Moˉseˍ htaꞈ kʼoˆ piˇ ve, “nawˬ hui lehˬ Gʼuiˬ sha piˇ laˇ taˍ ve mvuhˇ miˬ oˇ ve hkʼaw gaˬ ve teˇ yanˇ, yawˇ nawˬ hui htaꞈ bon naꞈ laˇ tuˬ yoˬ.” (Bon maˍ ve 15:4-5) Chi lehˬ chi teˇ hkui htaꞈ peun daꞈ jaˇ. Paw sha ve chaw gʼaˇ hteꞈ paw sha leh haˍ gʼawˇ ve chaw gʼaˇ hteꞈ haˍ gʼawˇ ve yoˬ. Yaꞈ hkʼaˇ, Iˉsaˍreˍlaˆ chaw awˬ co˗e htaˇ chi hkʼe maˇ heˆ!

⁵ Hkriꞈ yaˇ Moˉseˍ ve awˬ liˇ tawˇ hkawˇ awˬ hawˉ lo maˇ chehˇ˗o ve pa taw, hpehˇ piˇ ve awˬ hkʼawꞈ htaꞈ gʼaꞈ te tuˬ maˇ loˍ. Awˬ ceˬ htaꞈ hpehˇ piˇ ve, jeˬ maˇ shaiˍ tcuh ve, maˇ heˆ leh miˬ guiˬ hkʼawꞈ piˇ ve yoˬ. (Roˉmaꞈ 7:4; 10:4; Eˇfeˇsuꞈ 2:15) Yaꞈ hkʼaˇ, hpehˇ piˇ ve awˬ hkʼawꞈ gʼa henˇ ve a yeˇ uiˍ jaˇ. Aˬ htoꞈ ma pa taw le? Ngaˬ hui kaꞈ hpehˇ laˇ ve htaꞈ gʼa ve pa taw yoˬ. Chi Yaˬhoˉvaˬ Iˉsaˍreˍlaˆ chaw htaꞈ gu piˇ ve, ngaˬ hui dawˇ nyi tuˬ te laˇ ve yoˬ.

6. Chaw yaˇ hpehˇ laˇ ve hkʼaˬ hkʼe ve hpawˇ gʼa cawˇ ve le?

⁶ Ngaˬ hui haiˬ jaˇ ve awˬ yanˇ hkʼaw chehˇ ve pa taw, hpehˇ laˇ ve htaꞈ gʼa cawˇ ve yoˬ. Mawˇ ve, naˬ ve gawˬ ve gʼa hpuˇ leh suh˗e ve yoˬ. Laiˉ gʼaˇ mehˆ gʼeuˆ htaꞈ nyi htaˇ, saˍ laꞈ gʼonˍ geh kʼai htaˇ awˬ lawn chi hkʼa tawˍ lehˆ gʼa mawˬ ve yoˬ. Chi hkʼoˆ  kaꞈ, ngaˬ hui venˇ baˆ te yaꞈ leh awˬ gʼaˇ nuˇ jaˇ. Tcuh yaˇ Pawˇluꞈ kʼoˆ ve, “awˬ hkʼeun teˇ hpaˍ awˬ hkʼaw lo cawˬ ve venˇ baˆ teˇ ceuˬ ngaˬ htaꞈ hpeh kʼai tuˬ kaꞈ te chehˇ ve yoˬ.” Yawˇ kʼoˆ ve, “ngaˬ lehˬ hpehꞈ bawˬ jaˇ, dawˇ haˍ jaˇ ve chaw teˇ gʼaˇ hpehꞈ ve yoˬ. Ngaˬ htaꞈ suh piˇ lawˬ puiˉ ve awˬ to chi awˬ hkʼaw lo a shu ponˬ laˇ tuˬ le?”—Roˉmaꞈ 7:23, 24.

7. Hpehˇ piˇ ve htaꞈ caˉ daꞈ ve awˬ gʼuˇ suhˍ htaˇ kaꞈ Iˉsaˍyaˆ hkʼaˬ hkʼe kʼoˆ taˍ ve le?

⁷ Gʼuiˬ sha ngaˬ hui ve venˇ baˆ htaꞈ hpehˇ laˇ ve ha lehˬ jaˇ. Chi Yeˍsuˆ te laˇ ve a yeˇ uiˍ jaˇ. Yeˍsuˆ miˬ guiˬ hkʼoˆ maˇ laˬ sheˍ 700 hkʼawꞈ hpaˆ htaˇ, Iˉsaˍreˍlaˆ chaw hpehˇ piˇ ve awˬ hkʼawꞈ aꞈ kehˉ, hpehˇ piˇ ve uiˍ jaˇ daꞈ jaˇ ve awˬ gʼuˇ suhˍ htaˇ kaꞈ Iˉsaˍyaˆ kʼoˆ taˍ ve yoˬ. Yawˇ kʼoˆ ve, “Gʼuiˬ sha lehˬ yawˇ ve kanˇ paˆ ngaˬ htaꞈ biˇ la piˇ ve yoˬ. Haˍ gʼawˇ ve chaw hui htaꞈ daꞈ ve awˬ lawn hto piˇ tuˬ, nyi ma luˬ chehˇ ve chaw hui htaꞈ dawˇ sha la piˇ tuˬ, shu mvuhˇ miˬ hkʼaw awˬ ceˬ te chehˇ ve chaw” htaꞈ ponˬ piˇ tuˬ yoˬ. (Iˉsaˍyaˆ 61:1) Tcuh kaˍ paˍ ve tawˇ hkawˇ chi a shu htaꞈ kʼoˆ gaˇ ve le?

8. Tcuh kaˍ paˍ Iˉsaˍyaˆ ve tawˇ hkawˇ hpehˇ piˇ ve chi a shu htaꞈ kʼoˆ gaˇ ve le?

⁸ Tcuh kaˍ paˍ ve tawˇ hkawˇ hpehˇ piˇ ve chi, Yeˍsuˆ miˬ guiˬ hkʼoˆ Gʼuiˬ sha ve kanˉ tanˬ te htaˇ hpehꞈ la ve yoˬ. Yawˇ uiˍ la kuiˬ Naˍzaˍrehˆ venˇ Yuˇdaꞈ chaw hpawnˬ daꞈ kuiˬ hkʼaw, tcuh kaˍ paˍ Iˉsaˍyaˆ ve liꞈ Yuˇdaꞈ chaw hpawnˬ daꞈ la ve htaꞈ gʼaw maˍ piˇ leh, tcuh kaˍ paˍ ve tawˇ hkawˇ chi yawˇ htaꞈ kʼoˆ gaˇ ve tehꞈ kʼoˆ maˍ piˇ ve yoˬ. Yawˇ kʼoˆ ve, ‘Yaˬhoˉvaˬ ve Awˬ ha hpu ngaˬ awˬ hkʼoˆ cawˬ taˍ ve yoˬ. Haˍ ve gʼawˇ ve chaw hui htaꞈ ha lehˬ ve bon hkawˇ maˍ piˇ tuˬ, hpeh taˍ ve chaw htaꞈ hpehˇ piˇ tuˬ, mehˆ cuˉ ve chaw mehˆ kʼawꞈ mawˬ la tuˬ, fawˉ mehˍ ve htaꞈ gʼa hkanˍ ve chaw htaꞈ ponˬ piˇ tuˬ, ngaˬ htaꞈ peu laˇ peuˬ.’ (Luˉkaꞈ 4:16-19) Yeˍsuˆ tcuh kaˍ paˍ ve tawˇ hkawˇ chi biˇ la tuˬ hkʼaˬ hkʼe te ve le?

9. Yeˍsuˆ ve awˬ co˗e htaˇ laiˉ gʼaˇ hpehˇ piˇ ve hkʼaˬ hkʼe ve htaꞈ gʼa gaˇ ve le?

⁹ Hpehˇ piˇ ve tcuh kaˍ paˍ Iˉsaˍyaˆ ve tawˇ hkawˇ Yeˍsuˆ ve awˬ co˗e htaˇ gʼaw ve yoˬ. “Yaꞈ nyi nawˬ hui mehˆ gʼuˇ suhˍ biˇ la peuˬ” tehꞈ yawˇ kʼoˆ ve pa taw ngaˬ hui shiˍ ve yoˬ. (Luˉkaꞈ 4:21) Oˇ ve teˇ yanˇ Yeˍsuˆ gʼaw ve laiˉ gʼaˇ gʼa kaˇ ve pa taw, mvuhˇ miˬ uˉ peunˍ ve hpawˇ pa ve cawˬ tuˬ tehꞈ yawˇ hui dawˇ law ve yoˬ. Yawˇ hui Roˉmaꞈ uˉ peunˍ ve awˬ hawˉ lo maˇ chehˇ gaˇ. Yawˇ hui hawˉ hkʼaˆ 2 gʼaˇ hkʼe dawˇ ve yoˬ. Yawˇ hui kʼoˆ ve, “yawˇ lehˬ Iˉsaˍreˍlaˆ chaw ceuˬ htaꞈ htaiˍ hkʼawꞈ shehˍ hpaˇ hpehꞈ ve yoˬ tehꞈ, ngaˬ hui dawˇ law jaw ve yoˬ.”  (Luˉkaꞈ 24:13, 21) Yaꞈ hkʼaˇ, Yeˍsuˆ ve awˬ laꞈ gʼawˇ Roˉmaꞈ uˉ peunˍ ve htaꞈ tawˍ daꞈ tuꞈ yawˇ maˇ gʼa kʼoˆ piˇ ve tehꞈ ngaˬ hui shiˍ ve yoˬ. Chi hkʼe te ve aꞈ kehˉ yawˇ yawˇ hui htaꞈ kʼoˆ piˇ ve, “jawˇ mawˇ Kehˉsaˍ ve mawˇ jawˇ mawˇ Kehˉsaˍ htaꞈ piˇ˗oˆ.” (Maꞈhtehˍ 22:21) Chi hkʼe hpehꞈ ve kʼo, Yeˍsuˆ chaw yaˇ htaꞈ hkʼaˬ hkʼe hpehˇ piˇ ve le?

10. Chaw yaˇ aˬ htoꞈ ma ve awˬ hawˉ lo Yeˍsuˆ hpehˇ piˇ ve le?

¹⁰ Gʼuiˬ sha ve Yaˇ Yeˍsuˆ chaw yaˇ htaꞈ hpehˇ piˇ ve 2 hkʼaˇ cawˬ ve yoˬ. Awˉ lawˉ teˇ hkʼaˇ lehˬ, bon awˬ hoˉ maˇ heˆ heˆ maˍ ve awˬ hawˉ lo chaw yaˇ htaꞈ hpehˇ piˇ ve yoˬ. Oˇ htaˇ teˇ co˗e Yuˇdaꞈ chaw lehˬ chaw liˇ vaˇ liˇ leh maˇ heˆ heˆ ve htaꞈ yonˍ ve yoˬ. (Maꞈhtehˍ 5:31-37; 15:1-11) Bon awˬ hoˉ teˇ hpaˍ shu Gʼuiˬ sha ve awˬ liˇ cawˇ ve htaꞈ gʼaꞈ te tuˬ maˍ piˇ ve htawˇ, yawˇ hui maˇ gʼaꞈ te. Yawˇ hui mehˆ cuˉ paˍ htaꞈ shuˍ ve yoˬ. Chi hkʼoˆ kaꞈ, Meˍsiˉyaꞈ leh yawˇ maˍ ve awˬ tehˬ ve awˬ gʼeuˆ htaꞈ yawˇ hui maˇ haꞈ yuˬ. Chi yawˇ hui naˆ hoꞈ ve hkʼaw chehˇ sheˍ leh venˇ baˆ hpehˇ piˇ ve htaꞈ maˇ gʼa. (Yoˇhanˬ 9:1, 14-16, 35-41) Yaꞈ hkʼaˇ, Yeˍsuˆ ve awˬ lawn leh yawˇ maˍ ve htaꞈ pa taw, maˇ heˆ heˆ maˍ ve htaꞈ hpehˇ laˇ ve tehꞈ nyi ma nuˇ nehˬ ve chaw htaꞈ mawˬ tcuh ve yoˬ.—Maˍkuˆ 1:22; 2:23–3:5.

11. Yeˍsuˆ chaw yaˇ htaꞈ hpehˇ piˇ ve nyiˇ hkʼaˇ teˇ hkʼaˇ lehˬ aˬ htoꞈ ma le?

¹¹ Nyiˇ hkʼaˇ lehˬ chaw yaˇ venˇ baˆ ve awˬ ceˬ te ve htaꞈ Yeˍsuˆ hpehˇ laˇ ve yoˬ. Yeˍsuˆ htaiˍ hkʼawꞈ laˇ ve htaꞈ haꞈ yuˬ ve chaw Yaˬhoˉvaˬ venˇ baˆ hpehˇ laˇ leh gʼa ponˬ ve yoˬ. (Heˍbrehˇ 10:12-18) Yeˍsuˆ kʼoˆ ve, “Yaˇ hpu lehˬ nawˬ hui htaꞈ hpehˇ laˇ ve kʼo, nawˬ hui awˬ tehˬ awˬ na gʼa ponˬ tuˬ yoˬ.” (Yoˇhanˬ 8:36) Iˉsaˍreˍlaˆ chaw hpehˇ piˇ ve awˬ hkʼawꞈ htaˇ, ha lehˬ ve aꞈ kehˉ chi lehˬ daꞈ jaˇ. Tawˇ pa haˉ te kʼo, hpehˇ piˇ ve awˬ hkʼawꞈ htaˇ yawˇ hui ha lehˬ ve kaꞈ awˬ ceˬ gʼa kʼawꞈ te sheˍ. Leh yawˇ hui kaꞈ gʼa suh tuˬ yoˬ. Yaꞈ hkʼaˇ, Yeˍsuˆ hpehˇ piˇ ve lehˬ co co taiˍ taiˍ awˬ bon gʼa ve yoˬ.

12. Yeˍsuˆ kʼoˆ ve hpehˇ piˇ ve htaꞈ awˬ bon gʼa ve awˉ lawˉ teˇ moˍ a shu le?

¹² Peˍteˍkoˆteˍ 33 hkʼawꞈ htaˇ, Yaˬhoˉvaˬ lehˬ tcuh yaˇ leh ka tiꞈ yeˬ ve hawˉ hkʼaˆ yaˇ miˇ laiˉ gʼaˇ htaꞈ daꞈ kehˬ ve awˬ ha hpu htaꞈ cuˇ leh leuˆ yuˬ ve yoˬ. Yawˇ hui Gʼuiˬ sha ve yaˇ hpehꞈ ve pa taw, mvuhˇ naw ma hkʼoˆ teꞈ tu˗e leh Yeˍsuˆ geh teˇ geh uˉ peunˍ tuˬ yoˬ. (Roˉmaꞈ 8:2, 15-17) Naˍzaˍrehˆ venˇ Yuˇdaꞈ chaw hpawnˬ daꞈ kuiˬ hkʼaw hpehˇ piˇ ve htaꞈ gʼa ve awˉ lawˉ teˇ moˍ htaꞈ Yeˍsuˆ kʼoˆ ve yoˬ. Bon awˬ hoˉ maˍ ve leh yawˇ hui ve awˬ liˇ awˬ hkʼaˇ Liꞈ hpu hkʼaw maˇ hawˍ daꞈ ve htaꞈ maˇ gʼaꞈ te tuˬ Yeˍsuˆ maˍ piˇ ve yoˬ. Chi hkʼoˆ kaꞈ, yawˇ hui venˇ baˆ cawˬ leh gʼa suh˗e ve htawˇ, Yaˬhoˉvaˬ mehˆ gʼuˇ suhˍ lo suh ve htaꞈ gʼa ponˬ ve yoˬ. Hkriꞈ yaˇ awˬ pon hpehˇ piˇ ve 33 hkʼawꞈ htaˇ tanˬ ve yoˬ. Oˇ htaˇ  Yeˍsuˆ ve awˬ laꞈ gʼawˇ htaꞈ leuˆ yuˬ ve yoˬ. Yeˍsuˆ uˉ peunˍ ve teˇ hinˉ hkʼawꞈ htaˇ peuˬ tuˬ yoˬ. Chi teˇ hkui kaꞈ tanˬ leh teˇ hinˉ hkʼawꞈ ve awˬ hkʼaw lo daꞈ ve awˬ ceuˬ aˬ htoꞈ ma hpehꞈ la tuˬ le?

13-14. Leuˆ yuˬ taˍ ve chaw peuˬ kʼo, Yeˍsuˆ kʼoˆ ve hpehˇ laˇ ve htaꞈ awˬ bon gʼa ve a shu kaꞈ gʼa sheˍ ve le?

¹³ Chi beuꞈ teˇ co˗e laiˉ mvuhˇ miˬ hkʼaw ve chaw laiˉ lanˬ gʼaˇ, “awˬ kaˍ awˬ nu yawˬ teˇ hpaˍ” hkʼaw chehˇ la ve yoˬ. (Yoˇhanˬ 10:16) Yawˇ hui mvuhˇ naw ma hkʼoˆ Yeˍsuˆ geh uˉ peunˍ tuˬ Yaˬhoˉvaˬ maˇ gʼa leuˆ. Liꞈ hpu hkʼaw kʼoˆ ve, yawˇ hui miˬ guiˬ hkʼoˆ co co taiˍ taiˍ chehˇ tuˬ a hkaw˗anˬ gʼa ve yoˬ. Nawˬ kaꞈ dawˇ law kuiˬ chi hkʼe ve cawˬ˗aw laˇ?

¹⁴ Chi teˇ hkui nawˬ kaꞈ leuˆ yuˬ taˍ ve chaw awˬ bon gʼa ve hkʼe gʼa tuˬ yoˬ. Yeˍsuˆ htaiˍ hkʼawꞈ laˇ ve awˬ hpfuhˇ htaꞈ yonˍ ve pa taw, Yaˬhoˉvaˬ nawˬ htaꞈ venˇ baˆ hpehˇ laˇ tuˬ lawˬ gʼa ve yoˬ. Chi nawˬ htaꞈ Gʼuiˬ sha haꞈ yuˬ laˇ gʼa ve yoˬ. Nawˬ ve dawˇ shiˍ puiˉ ve nyi ma htaꞈ heuˆ la kuiˬ maˇ cawˬ leh nyi ma sha ve yoˬ. (Eˇfeˇsuꞈ 1:7; Hpeuꞈ maˍ ve 7:14, 15) Chi hkʼoˆ kaꞈ, nawˬ maˇ heˆ heˆ ve uˉ peunˍ ve awˬ hawˉ lo maˇ gʼa chehˇ˗o ve htaꞈ dawˇ nyi sheˍ. Yeˍsuˆ kʼoˆ ve, “hteˇ ve cawˇ ve awˬ ceuˬ htaꞈ nawˬ hui shiˍ tuˬ yoˬ. Hteˇ ve cawˇ ve awˬ ceuˬ oˇ ve lehˬ, nawˬ hui htaꞈ hpehˇ laˇ tuˬ yoˬ.” (Yoˇhanˬ 8:32) Hpehˇ laˇ ve chi ha lehˬ jaˇ!

15. Awˬ gʼuˇ suhˍ hpawˇ ngaˬ hui hpehˇ laˇ ve htaꞈ gʼa leh aˬ htoꞈ ma awˬ bon gʼa tuˬ le?

¹⁵ Awˬ gʼuˇ suhˍ hpawˇ nawˬ hpehˇ laˇ ve chi aꞈ kehˉ gʼa tuˬ sheˍ. Maˇ maw ve awˬ yanˇ maˇ heˆ heˆ ve bon liˇ leh chaw yaˇ uˉ peunˍ ve heˍ ve hkʼa  peu˗eˬ htaꞈ Yeˍsuˆ te luˬ tuˬ yoˬ. “Chaw awˬ moˍ lonˉ” yawˇ ve kanˉ te ve leh miˬ guiˬ awˬ suhˉ hkʼaw yawˇ hui awˬ bon maˇ maˇ gʼa tuˬ ve htaꞈ Yaˬhoˉvaˬ nyi haꞈ shaˉ tuˬ yoˬ. (Hpeuꞈ maˍ ve 7:9, 14) Chaw maˇ maˇ htaꞈ kʼawꞈ teꞈ tu la tcuh leh Aˍdanˍ te taˍ ve venˇ baˆ htaꞈ pa taw luˬ ve awˬ ceuˬ hkʼa peu˗eˬ hpehˇ laˇ ve htaꞈ gʼa tuˬ yoˬ.—Tcuh yaˇ 24:15.

16. Awˬ gʼuˇ suhˍ hpawˇ chaw yaˇ hpehˇ laˇ ve daꞈ jaˇ ve hkʼaˬ hkʼe ve cawˬ tuˬ le?

¹⁶ Yeˍsuˆ uˉ peunˍ ve teˇ hinˉ hkʼawꞈ awˬ hkʼaw lo yawˇ leh yawˇ geh uˉ peunˍ ve chaw, chaw yaˇ biˇ ve chaw hpehꞈ tuˬ te laˇ tuˬ yoˬ. Yawˇ hui Gʼuiˬ sha geh meuˆ daꞈ tuˬ yoˬ. Oˇ ve teˇ yanˇ kʼawꞈ gu te ve leh Iˉsaˍreˍlaˆ chaw hpehˇ piˇ ve awˬ hkʼawꞈ ha lehˬ ve hkʼe, hpehˇ laˇ ve htaꞈ gʼa tuˬ yoˬ. Yaˬhoˉvaˬ htaꞈ ka tiꞈ yeˬ ve chaw teˇ gʼaˇ le le biˇ ve chaw hpehꞈ leh venˇ baˆ maˇ kʼawꞈ cawˬ.

17. Iˉsaˍyaˆ liꞈ 65:21-23 hkʼaw kʼoˆ ve, Gʼuiˬ sha ve mvuhˇ miˬ yaˇ awˬ gʼuˇ suhˍ hpawˇ hkʼaˬ hkʼe hpehꞈ tuˬ le? (Awˬ htaꞈ hpawˇ ve awˬ han htaꞈ nyi sheˍ.)

¹⁷ Iˉsaˍyaˆ liꞈ 65:21-23 gʼaw sheˍ. Tcuh kaˍ paˍ ve tawˇ hkawˇ chi awˬ gʼuˇ suhˍ hpawˇ hkʼaˬ hkʼe hpehꞈ la tuˬ ve kʼoˆ laˇ taˍ ve yoˬ. Miˬ guiˬ awˬ suhˉ hkʼaw chehˇ ve lehˬ ngaˬ hui teꞈ chiˉ maˇ gʼa te˗o ve laˇ? Maˇ heˆ. Liꞈ hpu hkʼaw kʼoˆ ve, Gʼuiˬ sha ve chaw awˬ bon cawˬ ve kanˉ htaꞈ te leh ha lehˬ tuˬ yoˬ. Yeˍsuˆ uˉ peunˍ ve teˇ hinˉ hkʼawꞈ hkʼaw ngaˬ hui yonˍ gʼa ve, ‘hpanˍ taˍ te taˍ ve lehˬ, luˬ ve sheˆ ve awˬ hawˉ lo gʼa ponˬ leh, Gʼuiˬ sha ve awˬ yaˇ awˬ duˬ teˇ hpaˍ ve awˬ meꞈ awˬ hponˇ htaꞈ caˉ daꞈ ve ponˬ ve teˇ ceuˬ htaꞈ gʼa tuˬ’ yoˬ.—Roˉmaꞈ 8:21.

18. Aˬ htoꞈ ma te awˬ gʼuˇ suhˍ hpawˇ ha lehˬ ve cawˬ tuˬ tehꞈ ngaˬ hui yonˍ gʼa ve le?

¹⁸ Iˉsaˍreˍlaˆ chaw kanˉ te ve leh gʼaˇ jehˇ ve htaꞈ keunˍ lawꞈ cawˇ lawꞈ ve Yaˬhoˉvaˬ gu teh taˍ piˇ ve hkʼe, Yeˍsuˆ uˉ peunˍ ve teˇ hinˉ hkʼawꞈ awˬ hkʼaw lo Yaˬhoˉvaˬ yawˇ ve mvuhˇ miˬ yaˇ htaꞈ kaꞈ hkʼa shuˍ te piˇ tuˬ yoˬ. Oˇ ve teˇ yanˇ Gʼuiˬ sha htaꞈ oˉ kʼoˍ pui ve awˬ yanˇ cawˬ tuˬ tehꞈ ngaˬ hui yonˍ gʼa ve yoˬ. Gʼuiˬ sha htaꞈ oˉ kʼoˍ pui ve lehˬ a yeˇ uiˍ jaˇ leh ha lehˬ ve yoˬ. Miˬ guiˬ awˬ suhˉ hkʼaw ngaˬ hui chi hkʼe te ve awˬ yanˇ cawˬ tuˬ yoˬ. Yeˍsuˆ uˉ peunˍ ve teˇ hinˉ hkʼawꞈ ve awˬ hkʼaw lo ka tiꞈ yeˬ ve chaw teˇ gʼaˇ le le ha lehˬ tuˬ yoˬ tehꞈ yonˍ gʼa ve yoˬ. Oˇ ve teˇ yanˇ Gʼuiˬ sha ve kanˉ gʼa te ve ha lehˬ jaˇ.