1-2. Yaˬhoˉvaˬ ngaˬ hui htaꞈ yawˇ ve yehˬ kʼa hkʼaw chehˇ la tuˬ hkʼaˬ hkʼe kuˬ laˇ ve le?

 Yaˬhoˉvaˬ ngaˬ hui yawˇ ve yehˬ kʼa hkʼaw chehˇ la tuˬ kuˬ laˇ ve yoˬ. Chi lehˬ daꞈ jaˇ ve awˬ ceuˬ hpehꞈ ve yoˬ! Ngaˬ hui ve yehˬ kʼa hkʼaw Gʼuiˬ sha htaꞈ awˬ to chiˇ aꞈ piˇ˗oˬ ve chaw ceh tiˉ cawˬ leh Gʼuiˬ sha ve Yaˇ Yeˍsuˆ htaiˍ hkʼawꞈ laˇ ve awˬ hpfuhˇ htaꞈ yonˍ ve tehꞈ hpeuꞈ maw piˇ ve yoˬ. Ngaˬ hui ve yehˬ kʼa hkʼaw ha lehˬ jaˇ. Ngaˬ hui chi teˇ hkui kaꞈ a shaꞈ teꞈ hkʼaˇ daꞈ leh awˬ gʼuˇ suhˍ hpawˇ mvuhˇ naw ma hkʼoˆ maˇ heˆ leh miˬ guiˬ hkʼoˆ Paˍraˍdiˇsuˆ hkʼaw co co taiˍ taiˍ chehˇ tuˬ dawˇ law kuiˬ cawˬ ve yoˬ.

² Yaˬhoˉvaˬ ngaˬ hui htaꞈ haꞈ ve pa taw, yawˇ ve yehˬ kʼa hkʼaw chehˇ la tuˬ kuˬ laˇ ve yoˬ. Chi hkʼe te gʼa tuˬ yawˇ awˬ yanˇ yuˬ tanˇ jaˇ. (Yoˇhanˬ 3:16) Yawˇ ‘ngaˬ hui htaꞈ vuiˬ hkʼawꞈ taˍ peuˬ.’ (1 Kawˇrenˍhtuˆ 6:20) Htaiˍ hkʼawꞈ ve awˬ hpfuhˇ htaꞈ pa taw, Yaˬhoˉvaˬ ngaˬ hui yawˇ geh meuˆ daꞈ leh gawˬ lehˍ cawˬ tcuh laˇ ve yoˬ. Mvuhˇ naw ma miˬ naˆ ma hkʼoˆ uiˍ jaˇ mvuh jaˇ ve htaꞈ ngaˬ hui Awˬ pa gʼa kʼoˆ ve ha lehˬ jaˇ. Peuˬ taˉ ve teˇ lawn hkʼaw ngaˬ hui gʼa henˇ ve hkʼe, Yaˬhoˉvaˬ lehˬ daꞈ jaˇ ve Awˬ pa hpehꞈ leh teˇ gʼaˇ le le cawˬ gaˇ ve Awˬ pa hpehꞈ ve yoˬ.

3. Yaˬhoˉvaˬ ngaˬ hui htaꞈ te laˇ ve daꞈ ve awˬ ceuˬ htaꞈ dawˇ nyi htaˇ, a shu yawˇ awˬ to htaꞈ aˬ htoꞈ ma na nyi cawˇ ve le? (Awˇ ceˍ awˇ fa “ Yaˬhoˉvaˬ ngaˬ htaꞈ a yeˇ yuˬ laˇ ve laˇ?”) htaꞈ nyi sheˍ.

³ Liꞈ hpu bvuhꞈ paˍ teˇ gʼaˇ hkʼa shuˍ a shu yawˇ awˬ to htaꞈ na nyi cawˇ ve, ‘Gʼuiˬ sha ngaˬ htaꞈ te laˇ taˍ ve daꞈ jaˇ ve kanˉ teˇ hpaˍ awˬ pon ngaˬ yawˇ htaꞈ aˬ htoꞈ ma gʼa tanˇ piˇ tuˬ le?’ (Chiˇ mvuh ve 116:12) Yaˬhoˉvaˬ te laˇ ve hkʼa peu˗eˬ htaꞈ ngaˬ hui te hkʼawꞈ piˇ maˇ gʼa. Gʼuiˬ sha ngaˬ hui htaꞈ haꞈ ve pa taw, yawˇ htaꞈ haꞈ gaˇ tuˬ te laˇ ve yoˬ. Tcuh yaˇ Yoˇhanˬ kʼoˆ ve, “Gʼuiˬ sha ngaˬ hui htaꞈ awˉ lawˉ haꞈ ve pa taw, ngaˬ hui htawˇ haꞈ ve yoˬ.” (1 Yoˇhanˬ 4:19) Yaˬhoˉvaˬ htaꞈ haꞈ ve tehꞈ hkʼaˬ hkʼe hpeuꞈ maw piˇ gʼa tuˬ le?

4. Yaˍkoˆ liꞈ 4:8 hkʼaw kʼoˆ taˍ ve hkʼe, aˬ htoꞈ ma te ngaˬ hui Yaˬhoˉvaˬ geh meuˆ daꞈ cawˇ ve le?

⁴ Yaˬhoˉvaˬ ngaˬ hui yawˇ geh meuˆ daꞈ leh tawˇ yaw daꞈ tcuh gaˇ ve yoˬ. (Yaˍkoˆ 4:8 gʼaw sheˍ.) Yaˬhoˉvaˬ ngaˬ hui htaꞈ kʼoˆ laˇ ve, “hkʼaˬ htaˆ kaꞈ bon lawˬ tcuhˉ taˍ˗oꞈ.” (Roˉmaꞈ 12:12) Yawˇ ngaˬ hui ve hkawˇ hkʼaˬ htaˆ kaꞈ na laˇ ve yoˬ. Yawˇ maˇ taˇ leh heuˬ jaˇ ve pa taw, ngaˬ hui ve hkawˇ maˇ na laˇ ve maˇ heˆ. Ngaˬ hui yawˇ ve hkawˇ na tuˬ Liꞈ hpu gʼaw leh Liꞈ hpu hkʼaw hkʼa dehꞈ na gʼa tuˬ awˬ nu ve teˇ hpaˍ kaꞈ ga laˇ ve yoˬ. Chi hkʼoˆ kaꞈ, hpawnˬ daꞈ kuiˬ hkʼaw Yaˬhoˉvaˬ ve hkawˇ hkʼa dehꞈ na gʼa ve yoˬ. Yaˇ awˬ pa awˬ e geh meuˆ daꞈ tuˬ hkʼaˬ htaˆ kaꞈ gʼa yaw daꞈ ve hkʼe, ngaˬ hui kaꞈ hkʼaˬ htaˆ kaꞈ Yaˬhoˉvaˬ geh yaw daꞈ ve kʼo meuˆ daꞈ tuˬ yoˬ.

5. Ngaˬ hui hkʼaˬ hkʼe te bon hkʼa dehꞈ lawˬ gʼa tuˬ le?

⁵ Nawˬ ve bon lawˬ hkawˇ hkʼaˬ hkʼe hpehꞈ ve htaꞈ dawˇ nyi sheˍ. Yaˬhoˉvaˬ ngaˬ hui nyi ma hkʼaw cawˬ ve yawˇ htaꞈ kʼoˆ maˍ laˇ tcuh gaˇ ve yoˬ. (Chiˇ mvuh ve 62:8) Ngaˬ hui a shu yawˇ awˬ to htaꞈ na nyi cawˇ ve, ‘bon lawˬ htaˇ liꞈ hkʼaw bvuhꞈ taˍ ve hkʼe leˇ kʼoˆ peuˬ kaꞈ kʼoˆ ve maˇ heˆ leh ngaˬ nyi ma hkʼaw cawˬ ve awˬ ceuˬ bvuhꞈ tawˆ taˍ ve hkʼe leˇ kʼoˆ˗aw laˇ?’ Maˇ kʼoˆ taˍ. Nawˬ Yaˬhoˉvaˬ htaꞈ haꞈ leh meuˆ daꞈ gaˇ tuˬ yoˬ. Chi htaꞈ pa taw, nawˬ hkʼaˬ htaˆ kaꞈ yawˇ geh gʼa yaw daꞈ ve yoˬ. Nawˬ dawˇ taˍ ve hkʼe, ha lehˬ ve, dawˇ haˍ ve, leh nawˬ dawˇ haˍ dawˇ hkiˆ ve awˬ ceuˬ yawˇ htaꞈ kʼoˆ maˍ piˇ ve yoˬ. Yawˇ ga laˇ tuˬ lawˬ gʼa ve tehꞈ nawˬ yonˍ gʼa ve yoˬ.

6. Mvuhˇ naw ma hkʼoˆ ve Awˬ pa geh hkʼaˬ htaˆ kaꞈ meuˆ daꞈ tuˬ, ngaˬ hui aˬ htoꞈ ma gʼa te cawˇ ve le?

⁶ Ngaˬ hui mvuhˇ naw ma hkʼoˆ ve Awˬ pa htaꞈ meuˆ daꞈ tuˬ, awˬ bon uiˍ hkawˇ shiˍ ve chaw gʼa hpehꞈ ve yoˬ. Chiˇ mvuh ve liꞈ bvuhꞈ paˍ kʼoˆ ve, “ngaˬ ve Gʼuiˬ sha [Yaˬhoˉvaˬ]˗oˬ, nawˬ lehˬ ngaˬ hui awˬ pon kanˉ laiˉ ceuˬ te laˇ taˍ peuˬ. Nawˬ htaꞈ shuˍ daꞈ ve Gʼuiˬ sha teˇ gʼaˇ kaꞈ maˇ cawˬ. Nawˬ lehˬ ngaˬ hui awˬ pon anˇ tuˬ uiˍ ve kanˉ laiˉ ceuˬ te laˇ taˍ peuˬ. Oˇ ve hkʼa peu˗eˬ htaꞈ ngaˬ gʼa kʼoˆ ve hkʼe kʼo, ngaˬ ca kʼoˆ maˇ peuˬ htaˇ hkʼa gaˬ maˇ jaˇ tuˬ yoˬ!” (Chiˇ mvuh ve 40:5) Ngaˬ hui Yaˬhoˉvaˬ htaꞈ nyi ma hkʼaw awˬ bon uiˍ hkawˇ ceh dawˇ ve maˇ lawꞈ, kʼoˆ ve leh te ve hkʼaw gʼa te tawˆ la ve yoˬ. Chi ve ngaˬ hui chi beuꞈ teˇ co˗e ve chaw htaꞈ peun daꞈ jaˇ. Gʼuiˬ sha yawˇ hui awˬ pon te piˇ ve awˬ bon maˇ shiˍ ve chaw geh ngaˬ hui chehˇ ve yoˬ. Shu ve awˬ bon htaꞈ maˇ shiˍ puiˉ ve chaw geh ngaˬ hui chehˇ ve pa taw, “awˬ leh meuˇ ve awˬ nyi awˬ haˉ” hkʼaw chehˇ ve tehꞈ hkʼa tawˍ lehˆ gʼa mawˬ ve yoˬ. (2 Tiˆmoˉseˍ 3:1, 2) Ngaˬ hui chi hkʼe taˇ hpehꞈ tcuh!

7. Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve le?

⁷ Awˬ pa awˬ e lehˬ yaˇ htaꞈ maˇ deˇ daꞈ tcuh gaˇ, haꞈ daꞈ tcuh gaˇ ve yoˬ. Yaˬhoˉvaˬ kaꞈ yawˇ ve yaˇ teˇ gʼaˇ le le haꞈ daꞈ leh cawˇ daꞈ tcuh gaˇ ve yoˬ. Haꞈ daꞈ ve teˇ ceuˬ lehˬ ngaˬ hui awˬ tehˬ ve Hkriꞈ yaˇ hpehꞈ ve tehꞈ hpeuꞈ maw piˇ ve yoˬ. (Yoˇhanˬ 13:35) Chiˇ mvuh ve liꞈ bvuhꞈ paˍ kʼoˆ ve, “awˬ viˉ awˬ nyi hkʼa shuˍ teˇ geh hpoˆ chehˇ taˍ ve Gʼuiˬ sha ve chaw teˇ hpaˍ lehˬ, hkʼaˬ ma daꞈ jaˇ leh hkʼaˬ ma nyi sha jaˇ ve le!” (Chiˇ mvuh ve 133:1) Ngaˬ hui awˬ viˉ awˬ nyi htaꞈ haꞈ ve kʼo, Yaˬhoˉvaˬ htaꞈ haꞈ ve tehꞈ hpeuꞈ maw piˇ ve yoˬ. (1 Yoˇhanˬ 4:20) “Teˇ gʼaˇ leh teˇ gʼaˇ daꞈ ve htaꞈ te daꞈ leh, teˇ gʼaˇ leh teˇ gʼaˇ ha kʼaˉ daꞈ” ve yehˬ kʼa hkʼaw gʼa chehˇ ve daꞈ jaˇ!—Eˇfeˇsuꞈ 4:32.

8. 1 Yoˇhanˬ liꞈ 5:3 hkʼaw kʼoˆ taˍ ve hkʼe, ngaˬ hui Yaˬhoˉvaˬ ve hkawˇ na yuˬ ve a yeˇ uiˍ jaˇ ve lehˬ aˬ htoꞈ ma le?

⁸ Yaˬhoˉvaˬ lehˬ yaˇ awˬ pa awˬ e hkawˇ htaꞈ na yuˬ tcuh gaˇ leh ngaˬ hui kaꞈ yawˇ ve hkawˇ na yuˬ tcuh gaˇ ve yoˬ. (Eˇfeˇsuꞈ 6:1) Yaˬhoˉvaˬ ngaˬ hui htaꞈ a shaꞈ peꞈ laˇ shehˍ hpaˇ hpehꞈ leh awˬ ceuˬ hkʼa peu˗eˬ a shaꞈ teꞈ chehˇ tcuh gʼa ve pa taw, yawˇ ve hkawˇ na yuˬ cawˇ ve yoˬ. Awˬ pa teˇ gʼaˇ le  le aꞈ kehˉ Gʼuiˬ sha lehˬ cuˇ yiˍ cawˬ jaˇ. Ngaˬ hui yawˇ ve hkawˇ na yuˬ ve a yeˇ uiˍ jaˇ ve lehˬ yawˇ htaꞈ haꞈ ve pa taw yoˬ. (1 Yoˇhanˬ 5:3 gʼaw sheˍ.) Yaˬhoˉvaˬ hkawˇ na yuˬ cawˇ ve laiˉ hkʼaˇ cawˬ ve htawˇ, yawˇ ngaˬ hui htaꞈ maˇ nyiˉ laˇ. Yaˬhoˉvaˬ ngaˬ hui htaꞈ leuˆ yuˬ tuˬ a hkaw˗anˬ peꞈ laˇ ve yoˬ. Ngaˬ hui yawˇ htaꞈ haꞈ leh yawˇ ve hkawˇ na yuˬ ve yawˇ ha lehˬ jaˇ.

9-10. Aˬ htoꞈ ma te ngaˬ hui Gʼuiˬ sha ve awˬ liˇ awˬ hkʼaˇ htaꞈ shiˍ leh gʼaꞈ te ve a yeˇ uiˍ jaˇ ve le?

⁹ Awˬ pa awˬ e lehˬ yaˇ htaꞈ kawˆ ve maˇ heuˆ la tcuh gaˇ ve pa taw awˬ liˇ teh piˇ ve yoˬ. Yaˇ na yuˬ ve tehꞈ hpeuꞈ maw piˇ htaˇ, awˬ pa awˬ e htaꞈ yawˆ yan ve yoˬ. Chi htaꞈ pa taw, ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ shiˍ leh gʼaꞈ te tuˬ a yeˇ uiˍ jaˇ. Chi hkʼe te ve kʼo, Yaˬhoˉvaˬ htaꞈ haꞈ leh yawˆ yan ve tehꞈ hpeuꞈ maw piˇ ve yoˬ. Chi ngaˬ hui awˬ pon kaꞈ awˬ bon cawˬ ve yoˬ. (Iˉsaˍyaˆ 48:17, 18) Awˬ nu ve chaw Yaˬhoˉvaˬ ve hkawˇ maˇ na yuˬ leh Yaˬhoˉvaˬ ve awˬ liˇ awˬ hkʼaˇ htaꞈ maˇ gʼaꞈ te ve pa taw luˬ ve gʼa hpuˇ ve yoˬ.—Gaˍlaˍtiˆ 6:7, 8.

¹⁰ Yaˬhoˉvaˬ kʼoˆ laˇ ve hkʼe ngaˬ hui gʼaꞈ te htaˇ, nyi ma sha leh yawˇ geh meuˆ daꞈ ve yoˬ. Ngaˬ hui awˬ pon aˬ htoꞈ ma daꞈ ve yawˇ hkʼa dehꞈ shiˍ ve yoˬ. Aˍmeˬriˆkaꞈ mvuhˇ miˬ lo ve awˬ viˉ awˬ nyi Aw˗lon˗lan kʼoˆ ve, “Yaˬhoˉvaˬ ve hkawˇ na yuˬ ve lehˬ ngaˬ hui ve a shaꞈ teꞈ hkʼaˇ daꞈ jaˇ ve cawˬ tcuh laˇ ve tehꞈ ngaˬ shiˍ ve yoˬ.” Chi teˇ gʼaˇ le le htaꞈ awˬ tehˬ hpehꞈ ve yoˬ. Nawˬ awˬ pon kʼo Yaˬhoˉvaˬ haꞈ pehnˇ ve hkʼaw beˆ maˍ laˇ ve htaꞈ gʼaꞈ te htaˇ, awˬ bon hkʼaˬ hkʼe gʼa ve le?

11. Bon lawˬ ve ngaˬ hui htaꞈ hkʼaˬ hkʼe ga laˇ ve le?

¹¹ Ngaˬ hui Yaˬhoˉvaˬ ve hkawˇ na yuˬ tuˬ haˍ jaˇ ve htawˇ, bon lawˬ ve ga laˇ ve yoˬ. Teˇ pawˆ  pawˆ kʼo haˍ jaˇ tehꞈ dawˇ ve htawˇ, ngaˬ hui maˇ biˇ ve htaꞈ caˉ leh gʼa tawˍ daꞈ ve yoˬ. Chiˇ mvuh ve liꞈ bvuhꞈ paˍ Yaˬhoˉvaˬ geh lawˬ hkawˉ leh kʼoˆ ve, “ngaˬ htaꞈ na yuˬ puiˉ ve chaw kʼawꞈ hpehꞈ la piˇ˗oˆ.” (Chiˇ mvuh ve 51:12) Dehˬniˆ hkʼaˬ htaˆ kaꞈ gʼuˇ suhˍ peuˍ ve chaw te ve kʼoˆ ve, “Yaˬhoˉvaˬ ngaˬ htaꞈ kʼoˆ laˇ ve gʼaꞈ te tuˬ haˍ jaˇ tehꞈ dawˇ htaˇ, cawˇ ve htaꞈ te gʼa tuˬ yawˇ geh bon lawˬ ve yoˬ.” Yaˬhoˉvaˬ ngaˬ hui ve bon lawˬ hkawˇ hkʼaˬ htaˆ kaꞈ hkʼawꞈ laˇ ve tehꞈ hkʼa dehꞈ yonˍ gʼa ve yoˬ.—Luˉkaꞈ 11:9-13.

12. Eˇfeˇsuꞈ liꞈ 5:1 hkʼaw kʼoˆ taˍ ve hkʼe, ngaˬ hui hkʼaˬ hkʼe te cawˇ ve le?

¹² Eˇfeˇsuꞈ liꞈ 5:1 gʼaw sheˍ. Ngaˬ hui Yaˬhoˉvaˬ ve haꞈ ve awˬ yaˇ hpehꞈ ve pa taw, ngaˬ hui te gʼa ve hkʼe yawˇ htaꞈ henˇ yuˬ gaˇ ve yoˬ. Shu htaꞈ haꞈ ve, venˇ baˆ hpehˇ piˇ ve, daꞈ ve te piˇ ve, chi ve ngaˬ hui yawˇ htaꞈ henˇ yuˬ ve tehꞈ hpeuꞈ maw piˇ ve yoˬ. Gʼuiˬ sha htaꞈ maˇ shiˍ ve chaw ngaˬ hui te ve daꞈ ve htaꞈ mawˬ htaˇ, yawˇ Gʼuiˬ sha htaꞈ shiˍ gaˇ tuˬ yoˬ. (1 Peˍtruˆ 2:12) Hkriꞈ yaˇ hpehꞈ ve awˬ pa awˬ e yaˇ htaꞈ teˇ ceuˬ ceuˬ te piˇ htaˇ, Yaˬhoˉvaˬ htaꞈ henˇ yuˬ cawˇ ve yoˬ. Chi hkʼe te htaˇ yaˇ mvuhˇ naw ma hkʼoˆ ve Awˬ pa geh meuˆ daꞈ gaˇ tuˬ yoˬ.

13. Ngaˬ hui haꞈ hanˉ tuˬ hkʼaˬ hkʼe dawˇ nyi cawˇ ve le?

¹³ Yaˇ awˬ pa htaꞈ nyi hkʼaˇ suh leh yawˇ ve awˬ lawn shu htaꞈ gʼa kʼoˆ piˇ htaˇ ha lehˬ jaˇ ve hkʼe, ngaˬ hui kaꞈ Yaˬhoˉvaˬ htaꞈ nyi hkʼaˇ suh leh yawˇ ve awˬ lawn shu htaꞈ kʼoˆ piˇ gaˇ ve yoˬ. Ngaˬ hui kaꞈ Daˍviˆ kʼoˆ ve hkʼa shuˍ “[Yaˬhoˉvaˬ] te taˍ peuˬ ve kanˉ teˇ hpaˍ awˬ pon, ngaˬ yawˇ htaꞈ chiˇ mvuh tuˬ yoˬ.” (Chiˇ mvuh ve 34:2) Yaꞈ hkʼaˇ,  ngaˬ hui yaꞈ taw puiˉ ve kʼo, hkʼaˬ hkʼe te haꞈ hanˉ tuˬ le? Yaˬhoˉvaˬ hkʼaˬ hkʼe taw ha lehˬ ve maˇ heˆ leh awˬ nu ve chaw Yaˬhoˉvaˬ htaꞈ shiˍ daꞈ htaˇ awˬ bon hkʼaˬ hkʼe taw gʼa ve ngaˬ hui dawˇ nyi htaˇ, haꞈ hanˉ tuˬ yoˬ. Ngaˬ hui haꞈ hanˉ tuˬ Yaˬhoˉvaˬ peꞈ laˇ tuˬ yoˬ. Awˉ lawˉ peuˇ ve awˬ viˉ awˬ nyi haꞈ hanˉ ve Yaˬhoˉvaˬ ga piˇ jaw˗oˬ ve hkʼe, yawˇ ngaˬ hui htaꞈ kaꞈ ga laˇ tuˬ yoˬ.—1 Hteˇsaˍlawˇniˆ 2:2.

14. Hto toˇ ve a yeˇ hkʼaˬ hkʼe taw uiˍ ve le?

¹⁴ Yaˬhoˉvaˬ chaw mehˆ hpfuhˇ maˇ nyi leh hkʼaˬ kaˬ lo laˬ ve, hkʼaˬ hkʼe ve chaw hpehꞈ ve htawˇ, ngaˬ hui teˇ gʼaˇ le le htaꞈ haꞈ ve tehꞈ hpeuꞈ maw piˇ ve yawˇ ha lehˬ jaˇ. (Tcuh yaˇ 10:34, 35) Ngaˬ hui awˬ nu ve chaw htaꞈ haꞈ ve tehꞈ hpeuꞈ maw piˇ ve awˬ hkʼaˇ teˇ hkʼaˇ lehˬ yawˇ hui htaꞈ daꞈ ve awˬ lawn sha tanˇ hto maˍ piˇ ve yoˬ. (Maꞈhtehˍ 28:19, 20) Daꞈ ve awˬ lawn sha tanˇ hto toˇ ve awˬ bon hkʼaˬ hkʼe gʼa ve le? Na yuˬ ve chaw chi teˇ hkui kaꞈ a shaꞈ teꞈ hkʼaˇ daꞈ leh awˬ gʼuˇ suhˍ hpawˇ kaꞈ co co taiˍ taiˍ ve a shaꞈ gʼa tuˬ dawˇ law kuiˬ cawˬ ve yoˬ.—1 Tiˆmoˉseˍ 4:16.

15-16. Ngaˬ hui ha lehˬ tuˬ te laˇ ve aˬ htoꞈ ma le?

¹⁵ Yaˬhoˉvaˬ lehˬ awˬ pa yaˇ htaꞈ haꞈ ve hkʼe hpehꞈ leh yawˇ ve yehˬ kʼa hkʼaw ve chaw htaꞈ ha lehˬ tcuh gaˇ ve yoˬ. (Iˉsaˍyaˆ 65:14) Ngaˬ hui shoꞈ shaꞈ ve laiˉ ceuˬ gʼa hpuˇ ve htawˇ, chi teˇ hkui kaꞈ ha lehˬ ve yoˬ. Tawˇ pa haˉ te kʼo, mvuhˇ naw ma hkʼoˆ ve Awˬ pa ngaˬ hui htaꞈ haꞈ ve tehꞈ yonˍ gʼa ve leh Liꞈ hpu hkʼaw cawˇ ve htaꞈ ngaˬ hui shiˍ ve yoˬ. (Yeˍraˍmiˆ 15:16) Chi hkʼoˆ kaꞈ, Yaˬhoˉvaˬ htaꞈ haꞈ ve chaw ceh tiˉ cawˬ ve, yawˇ ve awˬ liˇ awˬ hkʼaˇ htaꞈ haꞈ ve, leh teˇ gʼaˇ leh teˇ gʼaˇ haꞈ daꞈ ve, awˬ nu ve yehˬ kʼa htaꞈ maˇ shuˍ ve daꞈ jaˇ ve yehˬ kʼa hkʼaw ngaˬ hui gʼa chehˇ ve ha lehˬ jaˇ.—Chiˇ mvuh ve 106:4, 5.

¹⁶ Chi teˇ hkui aꞈ kehˉ awˬ gʼuˇ suhˍ hpawˇ ngaˬ hui ve a shaꞈ teꞈ hkʼaˇ daꞈ jaˇ ve cawˬ tuˬ tehꞈ yonˍ gʼa ve pa taw, ha lehˬ jaˇ. Maˇ maw ve awˬ yanˇ haiˬ ve awˬ ceuˬ hkʼa peu˗eˬ htaꞈ Yaˬhoˉvaˬ yuˬ baˬ tuˬ yoˬ tehꞈ ngaˬ hui shiˍ ve yoˬ. Gʼuiˬ sha ve mvuhˇ miˬ lehˬ miˬ guiˬ chi hkʼoˆ daꞈ jaˇ ve Paˍraˍdiˇsuˆ teˇ pawˆ kʼawꞈ hpehꞈ tcuh tuˬ yoˬ. Suh peuˬ ve chaw kʼawꞈ teꞈ tu la leh ngaˬ hui geh teˇ geh gʼa chehˇ tuˬ yoˬ tehꞈ daꞈ jaˇ ve dawˇ law kuiˬ cawˬ ve yoˬ. (Yoˇhanˬ 5:28, 29) Chi lehˬ ha lehˬ jaˇ. Maˇ maw ve awˬ yanˇ mvuhˇ naw ma hkʼoˆ leh miˬ guiˬ hkʼoˆ chehˇ ve chaw teˇ gʼaˇ le le Yaˬhoˉvaˬ htaꞈ awˬ meꞈ awˬ hponˇ cawˬ tuˬ te piˇ ve, chiˇ uiˍ chiˇ mvuhˇ piˇ tuˬ te ve, chi ve ngaˬ hui ve Awˬ pa gʼa keunˍ ve tehꞈ yonˍ gʼa ve yoˬ.