1. Paˇshaˇ ve jawˇ mawˇ htaꞈ yaw daꞈ gaˇ ve chaw hkʼaˬ hkʼe gʼa te ve le?

 Peuˬ taˉ ve 2,500 hkʼawꞈ Paˇshaˇ mvuhˇ miˬ uˉ peunˍ ve awˬ hawˉ lo nawˬ chehˇ ve kʼo, hkʼaˬ hkʼe hpehꞈ ve htaꞈ dawˇ nyi sheˍ. Nawˬ jawˇ mawˇ htaꞈ tawˇ yaw daꞈ gaˇ leh Suˇsanˍ venˇ lo kʼai ve yoˬ hehˉ. Yaꞈ hkʼaˇ, nawˬ yawˇ geh yaw daꞈ tuˬ awˉ lawˉ a hkaw˗anˬ gʼa lawˬ ve yoˬ. Nawˬ maˇ lawˬ ve kʼo, tiˇ pehˍ laˇ tuˬ yoˬ hehˉ!—Iˉsaˍtaˆ 4:11.

2. Yaˬhoˉvaˬ ngaˬ hui yawˇ geh yaw daꞈ ve htaꞈ hkʼaˬ hkʼe dawˇ tcuh gaˇ ve le?

² Yaˬhoˉvaˬ Paˇshaˇ ve jawˇ mawˇ htaꞈ maˇ shuˍ daꞈ ve ngaˬ hui ha lehˬ jaˇ. Yaˬhoˉvaˬ miˬ guiˬ htaꞈ uˉ peunˍ shehˍ hpaˇ aꞈ kehˉ kanˇ paˆ uiˍ jaˇ ve htawˇ, ngaˬ hui yawˇ geh hkʼaˬ htaˆ kaꞈ yaw daꞈ htaˇ nyi ma sha tcuh gaˇ ve yoˬ. Tawˇ pa haˉ te kʼo, Gʼuiˬ sha uiˍ jaˇ mvuhˇ jaˇ ve hpanˍ shehˍ hpaˇ hpehꞈ leh kanˇ paˆ uiˍ jaˇ. Yaꞈ hkʼaˇ, haꞈ pehnˇ ve, dawˇ sha gawˬ lehˍ ve, leh ngaˬ hui htaꞈ yawˇ geh meuˆ daꞈ tuˬ, “Awˬ pa˗oˬ” tehꞈ kuˬ tcuh gaˇ ve yoˬ. (Maꞈhtehˍ 6:9) Yaˬhoˉvaˬ ngaˬ hui htaꞈ chi hkʼe dawˇ tcuh laˇ ve ha lehˬ jaˇ.

3. Aˬ htoꞈ ma te ngaˬ hui Yaˬhoˉvaˬ htaꞈ “Awˬ pa˗oˬ” tehꞈ kʼoˆ gʼa ve le? Leh awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Yaˬhoˉvaˬ lehˬ a shaꞈ teꞈ ve awˬ hkuiˉ puiˍ hpehꞈ ve pa taw, ngaˬ hui yawˇ htaꞈ “Awˬ pa˗oˬ” tehꞈ kʼoˆ ve hkeuˍ jaˇ. (Chiˇ mvuh ve 36:9) Yawˇ ngaˬ hui ve Awˬ pa hpehꞈ ve pa taw, yawˇ hkawˇ na yuˬ cawˇ ve yoˬ. Yawˇ kʼoˆ laˇ ve htaꞈ gʼaꞈ te htaˇ, awˬ bon maˇ maˇ gʼa tuˬ yoˬ. (Heˍbrehˇ 12:9) Chi mvuhˇ naw ma hkʼoˆ leh miˬ guiˬ hkʼoˆ co co taiˍ taiˍ a shaꞈ gʼa tuˬ yoˬ. Chi teˇ hkui kaꞈ awˬ bon gʼa leh, Yaˬhoˉvaˬ ngaˬ hui htaꞈ haꞈ leh dawˇ haˍ ve tehꞈ hpeuꞈ maw laˇ leh, awˬ gʼuˇ suhˍ hpawˇ kaꞈ ngaˬ hui htaꞈ chiˇ baˬ laˇ tuˬ awˬ nyi maˇ cawˬ tehꞈ yonˍ gʼa ve kaꞈ henˇ tuˬ yoˬ. Awˉ lawnˉ htaˇ mvuhˇ naw ma hkʼoˆ ve Awˬ pa ngaˬ hui htaꞈ haꞈ leh dawˇ haˍ ve tehꞈ yonˍ gʼa ve henˇ tuˬ yoˬ.

4. Aˬ htoꞈ ma te chaw teˇ hpaˍ Yaˬhoˉvaˬ htaꞈ Awˬ pa hpehꞈ ve tehꞈ dawˇ tuˬ haˍ ve le?

⁴ Nawˬ Yaˬhoˉvaˬ htaꞈ Awˬ pa hpehꞈ ve tehꞈ dawˇ tuˬ haˍ˗aˬ laˇ? Chaw teˇ hpaˍ Yaˬhoˉvaˬ htaꞈ tehˆ htaˇ, awˬ hpfuhˇ maˇ cawˬ tehꞈ dawˇ ve yoˬ. Uiˍ jaˇ mvuh jaˇ ve Gʼuiˬ sha yawˇ htaꞈ a yeˇ yuˬ laˇ ve laˇ tehꞈ yawˇ hkʼa dehꞈ maˇ yonˍ gʼa. Yaꞈ hkʼaˇ, mvuhˇ naw ma hkʼoˆ haꞈ pehnˇ uiˍ jaˇ ve Gʼuiˬ sha ngaˬ hui htaꞈ chi hkʼe maˇ dawˇ tcuh gaˇ. Yawˇ ngaˬ hui htaꞈ a shaꞈ peꞈ laˇ leh yawˇ htaꞈ ca mawˬ tcuh gaˇ ve yoˬ. Tcuh yaˇ Pawˇluꞈ Aˍhtenˍ venˇ chaw htaꞈ chi hkʼe kʼoˆ piˇ jaw ve yoˬ. Yaˬhoˉvaˬ lehˬ “hkʼaˬ ve teˇ gʼaˇ htaꞈ htawˇ vuiˇ daꞈ ve maˇ heˆ.” (Tcuh yaˇ 17:24-29) Awˬ pa yaˇ htaꞈ haꞈ leh dawˇ haˍ ve tehꞈ shiˍ tcuh leh nyi ma sha ve hkʼaw yaw daꞈ ve hkʼe, ngaˬ hui yawˇ geh chi hkʼe te tcuh gaˇ ve yoˬ.

5. Awˬ viˉ awˬ nyi yaˇ miˇ teˇ gʼaˇ ve awˬ lawn ngaˬ hui htaꞈ aˬ htoꞈ ma maˍ laˇ ve le?

⁵ Chaw teˇ hpaˍ Yaˬhoˉvaˬ htaꞈ Awˬ pa hpehꞈ ve dawˇ tuˬ haˍ jaˇ. Yawˇ ve awˬ pa yawˇ htaꞈ maˇ haꞈ piˇ jaw ve maˇ heˆ leh yawˇ ve awˬ pa yawˇ htaꞈ haꞈ ve tehꞈ a ciˉ kaꞈ maˇ hpeuꞈ maw piˇ jaw ve pa taw yoˬ. Awˬ viˉ awˬ nyi yaˇ miˇ teˇ gʼaˇ ve awˬ lawn htaꞈ dawˇ nyi sheˍ. Yawˇ kʼoˆ ve, “ngaˬ pa nyi ma maˇ daꞈ leh deˇ puiˉ jaˇ. Ngaˬ Liꞈ hpu tanˬ henˇ htaˇ, mvuhˇ naw ma hkʼoˆ ve Awˬ pa htaꞈ meuˆ daꞈ tuˬ haˍ jaˇ. Yaꞈ hkʼaˇ, ngaˬ Yaˬhoˉvaˬ htaꞈ shiˍ la htaˇ, teˇ ceuˬ le le pa ve yoˬ.” Nawˬ chi hkʼe dawˇ jaw˗aw laˇ? Nawˬ chi hkʼe dawˇ ve kʼo, Yaˬhoˉvaˬ lehˬ nawˬ ve Awˬ pa daꞈ jaˇ ve hpehꞈ gʼa ve tehꞈ yonˍ gʼa ve yoˬ.

6. Maꞈhtehˍ liꞈ 11:27 hkʼaw kʼoˆ taˍ ve hkʼe, Yaˬhoˉvaˬ ngaˬ hui htaꞈ haꞈ ve Awˬ pa hpehꞈ ve tehꞈ dawˇ tuˬ awˬ hkʼaˇ teˇ hkʼaˇ lehˬ aˬ htoꞈ ma le?

⁶ Yaˬhoˉvaˬ ngaˬ hui htaꞈ ga laˇ leh yawˇ htaꞈ Awˬ pa dawˇ tcuh gaˇ ve teˇ ceuˬ lehˬ, Yeˍsuˆ kʼoˆ ve leh te ve awˬ ceuˬ htaꞈ caˉ daꞈ ve Liꞈ hpu hkʼaw bvuhꞈ keu taˍ ve yoˬ. (Maꞈhtehˍ 11:27 gʼaw sheˍ.) Yeˍsuˆ yawˇ ve Awˬ pa htaꞈ hkʼa dehꞈ henˇ yuˬ gʼa ve yoˬ. Yawˇ kʼoˆ ve, “ngaˬ htaꞈ mawˬ ve chaw lehˬ, Awˬ pa htaꞈ mawˬ peuˬ.” (Yoˇhanˬ 14:9) Yeˍsuˆ Yaˬhoˉvaˬ htaꞈ Awˬ pa tehꞈ kʼoˆ ve yoˬ. Ha lehˬ ve bon hkawˇ liꞈ 4 daw hkʼaw ceh kaꞈ Yeˍsuˆ Yaˬhoˉvaˬ htaꞈ “Awˬ pa˗oˬ” tehꞈ aˬ laˬ hkʼe 200 pawˆ kʼoˆ ve yoˬ. Aˬ htoꞈ ma te yawˇ “Awˬ pa˗oˬ” tehꞈ chi hkʼe taw taw kʼoˆ ve le? Awˬ hkʼaˇ teˇ hkʼaˇ lehˬ chaw yaˇ Yaˬhoˉvaˬ yawˇ hui htaꞈ haꞈ ve Awˬ pa hpehꞈ ve tehꞈ yonˍ gʼa tuˬ awˬ pon yoˬ.—Yoˇhanˬ 17:25, 26.

7. Yaˬhoˉvaˬ Yeˍsuˆ htaꞈ te piˇ ve awˬ hkʼaˇ, ngaˬ hui htaꞈ aˬ htoꞈ ma maˍ laˇ ve le?

⁷ Yaˬhoˉvaˬ yawˇ ve Yaˇ Yeˍsuˆ htaꞈ te piˇ ve awˬ hkʼaˇ htaꞈ dawˇ nyi sheˍ. Yaˬhoˉvaˬ Yeˍsuˆ ve bon lawˬ hkawˇ htaꞈ hkʼaˬ htaˆ kaꞈ na ve yoˬ. Yaꞈ hkʼaˇ, na ve ceh maˇ heˆ. Gʼuiˬ sha Yeˍsuˆ ve bon lawˬ hkawˇ htaꞈ kaꞈ hkʼawꞈ piˇ ve yoˬ. (Yoˇhanˬ 11:41, 42) Yeˍsuˆ aˬ htoꞈ ma ve awˬ lawn gʼa hpuˇ ve htawˇ, yawˇ ve Awˬ pa yawˇ htaꞈ haꞈ leh hkʼaˬ htaˆ kaꞈ ga laˇ ve tehꞈ shiˍ ve yoˬ.—Luˉkaꞈ 22:42, 43.

8. Yaˬhoˉvaˬ Yeˍsuˆ loˍ ve awˬ ceuˬ htaꞈ hkʼaˬ hkʼe ga piˇ ve le?

⁸ Yeˍsuˆ kʼoˆ ve, “yawˇ htaꞈ pa taw ngaˬ teꞈ chehˇ” gʼa ve yoˬ. Yawˇ chi hkʼe kʼoˆ ve lehˬ Yaˬhoˉvaˬ teˇ gʼaˇ ceh tiˉ a shaꞈ leh loˍ ve awˬ ceuˬ teˇ hpaˍ peꞈ laˇ shehˍ hpaˇ hpehꞈ ve tehꞈ shiˍ ve yoˬ. (Yoˇhanˬ 6:57) Yeˍsuˆ a shaꞈ teꞈ chehˇ kuiˬ loˍ ve awˬ ceuˬ leh yawˇ Gʼuiˬ sha htaꞈ ka tiꞈ yeˬ gʼa tuˬ, ga laˇ ve tehꞈ yonˍ gʼa ve yoˬ.—Maꞈhtehˍ 4:4.

9. Yaˬhoˉvaˬ Yeˍsuˆ htaꞈ haꞈ leh dawˇ haˍ ve Awˬ pa hpehꞈ ve tehꞈ hkʼaˬ hkʼe hpeuꞈ maw piˇ ve le?

⁹ Yaˬhoˉvaˬ Yeˍsuˆ htaꞈ haꞈ leh yawˇ hkʼaˬ htaˆ kaꞈ Yeˍsuˆ htaꞈ ga piˇ chehˇ ve tehꞈ yonˍ gʼa tcuh ve yoˬ. (Maꞈhtehˍ 26:53; Yoˇhanˬ 8:16) Yeˍsuˆ shoꞈ shaꞈ ve gʼa hpuˇ ve teˇ ceuˬ le le Yaˬhoˉvaˬ maˇ ga piˇ ve htawˇ, yawˇ yeunˇ hkanˍ gʼaˇ tuˬ ga piˇ ve yoˬ. Yeˍsuˆ tuꞈ ve hkanˍ ve gʼa hpuˇ ve teˇ hkui teˇ yanˇ ceh hpehꞈ ve tehꞈ shiˍ ve yoˬ. (Heˍbrehˇ 12:2) Yaˬhoˉvaˬ Yeˍsuˆ htaꞈ haꞈ ve tehꞈ hpeuꞈ maw piˇ ve  lehˬ yawˇ ve hkawˇ na ve, yawˇ loˍ ve awˬ ceuˬ ga piˇ ve, maˍ piˇ ve, leh yawˇ htaꞈ ga piˇ ve yoˬ. (Yoˇhanˬ 5:20; 8:28) Mvuhˇ naw ma hkʼoˆ ve Awˬ pa ngaˬ hui htaꞈ kaꞈ a yeˇ hkʼaˬ hkʼe yuˬ laˇ ve teˇ geh nyi sheˍ.

10. Chiˇ mvuh ve liꞈ 66:19, 20 hkʼaw kʼoˆ taˍ ve hkʼe, Yaˬhoˉvaˬ ngaˬ hui htaꞈ haꞈ ve tehꞈ hkʼaˬ hkʼe hpeuꞈ maw laˇ ve le?

¹⁰ Yaˬhoˉvaˬ ngaˬ hui ve bon lawˬ hkawˇ na laˇ ve. (Chiˇ mvuh ve 66:19, 20 gʼaw sheˍ.) Ngaˬ hui yawˇ geh teˇ nyi ve bon hkʼaˬ nyiˇ pawˆ, hkʼaˬ hkʼe taw zuhˬ ve, maˇ heˆ leh aˬ htoꞈ ma awˬ lawn lawˬ tuˬ, dawˇ cheˆ laˇ taˍ ve maˇ heˆ. Yaꞈ hkʼaˇ, yawˇ geh bon hkʼaˬ htaˆ kaꞈ lawˬ tcuh gaˇ ve yoˬ. (1 Hteˇsaˍlawˇniˆ 5:17) Hkʼe te leh Yaˬhoˉvaˬ geh bon hkʼaˬ htaˆ leh hkʼaˬ kaˬ lo lawˬ kaꞈ gʼa ve yoˬ. Yawˇ maˇ taˇ leh maˇ na laˇ ve maˇ heˆ. Hkʼaˬ htaˆ kaꞈ na laˇ ve yoˬ. Ngaˬ hui ve bon lawˬ hkawˇ Yaˬhoˉvaˬ na laˇ ve tehꞈ shiˍ htaˇ, yawˇ htaꞈ haꞈ maˇ la ve yoˬ. Chiˇ mvuh ve liꞈ bvuhꞈ paˍ kʼoˆ ve, “ngaˬ ve bon lawˬ hkawˇ htaꞈ Gʼuiˬ sha na yuˬ laˇ ve pa taw, ngaˬ yawˇ htaꞈ haꞈ ve yoˬ.”—Chiˇ mvuh ve 116:1.

11. Ngaˬ hui bon lawˬ htaˇ Yaˬhoˉvaˬ hkʼaˬ hkʼe hkʼawꞈ laˇ ve le?

¹¹ Mvuhˇ naw ma hkʼoˆ ve Awˬ pa ngaˬ hui ve bon lawˬ hkawˇ ceh na ve maˇ heˆ. Yaꞈ hkʼaˇ, ngaˬ hui lawˬ ve hkawˇ yawˇ hkʼawꞈ laˇ ve yoˬ. Tcuh yaˇ Yoˇhanˬ kʼoˆ ve, “[Gʼuiˬ sha] ve a loˍ cawˇ ve hkʼe ngaˬ hui teˇ ceuˬ ceuˬ lawˬ ve kʼo, yawˇ na yuˬ tuˬ yoˬ.” (1 Yoˇhanˬ 5:14, 15) Yaˬhoˉvaˬ ngaˬ hui dawˇ taˍ ve hkʼe maˇ hkʼawꞈ laˇ ve yoˬ hehˉ. Yaꞈ hkʼaˇ, ngaˬ hui awˬ pon daꞈ jaˇ ve Yaˬhoˉvaˬ shiˍ ve tehꞈ yonˍ gʼa ve yoˬ. Teˇ pawˆ pawˆ kʼo, Gʼuiˬ sha maˇ hkʼawꞈ laˇ ve maˇ heˆ leh ngaˬ hui dawˇ taˍ ve aꞈ kehˉ maw ve yoˬ hehˉ.—2 Kawˇrenˍhtuˆ 12:7-9.

12-13. Mvuhˇ naw ma hkʼoˆ ve Awˬ pa ngaˬ hui loˍ ve awˬ ceuˬ htaꞈ hkʼaˬ hkʼe ga laˇ ve le?

¹² Yaˬhoˉvaˬ ngaˬ hui loˍ ve awˬ ceuˬ ga laˇ ve. Yehˬ shehˍ hpaˇ yehˬ kʼa hkʼaw ve chaw htaꞈ nyi haꞈ shaˉ tcuh gaˇ leh yawˇ kaꞈ chi hkʼe te ve yoˬ. (1 Tiˆmoˉseˍ 5:8) Gʼuiˬ sha yawˇ ve yaˇ teˇ hpaˍ htaꞈ a shaꞈ teꞈ kuiˬ hkʼaw loˍ ve awˬ ceuˬ yawˇ ga piˇ ve yoˬ. Caˇ tuˬ, aˉ poꞈ veuꞈ kʼaˇ, maˇ heˆ leh chehˇ kuiˬ Gʼuiˬ sha ngaˬ hui htaꞈ maˇ dawˇ haˍ tcuh gaˇ. (Maꞈhtehˍ 6:32, 33; 7:11) Awˬ pa yaˇ htaꞈ haꞈ ve hkʼa shuˍ, awˬ gʼuˇ suhˍ hpawˇ ngaˬ hui loˍ ve awˬ ceuˬ Yaˬhoˉvaˬ gu teh laˇ tuˬ yoˬ.

¹³ Ngaˬ hui yawˇ geh meuˆ daꞈ tuˬ, loˍ ve awˬ ceuˬ yawˇ ga laˇ ve yoˬ. Yawˇ ngaˬ hui htaꞈ Liꞈ hpu kaꞈ peꞈ laˇ ve yoˬ. Gʼuiˬ sha htaꞈ caˉ daꞈ ve awˬ tehˬ ve leh yawˇ ve a loˍ shiˍ tuˬ, ngaˬ hui htaꞈ aˬ htoꞈ ma awˬ pon hpanˍ ve leh, awˬ gʼuˇ suhˍ hpawˇ aˬ htoꞈ ma hpehꞈ la tuˬ kaꞈ Liꞈ hpu hkʼaw kʼoˆ laˇ ve yoˬ. Ngaˬ hui Liꞈ hpu tanˬ henˇ htaˇ, awˬ pa awˬ e maˇ heˆ leh awˬ nu ve chaw htaꞈ a yeˇ yuˬ tuˬ yawˇ maˍ laˇ ve yoˬ. Hkriꞈ yaˇ awˬ moˍ hkʼaw nyi haꞈ shaˉ paˍ maˇ heˆ leh co ha hpawˇ ve chaw mawˇ ngaˬ hui htaꞈ hkʼaˬ htaˆ kaꞈ ga laˇ ve yoˬ. Chi hkʼoˆ kaꞈ, Yaˬhoˉvaˬ lehˬ hpawnˬ daꞈ ve hkʼaw kaꞈ maˍ laˇ sheˍ. Yehˬ kʼa hkʼaw ve chaw hkʼe awˬ viˉ awˬ nyi geh gʼa henˇ ve yoˬ. Awˬ hkʼaˇ chi ve leh awˬ nu ve awˬ hkʼaˇ teˇ hpaˍ Yaˬhoˉvaˬ lehˬ ngaˬ hui htaꞈ haꞈ jaˇ ve Awˬ pa hkʼe hpehꞈ ve tehꞈ gʼa shiˍ ve yoˬ.—Chiˇ mvuh ve 32:8.

14. Aˬ htoꞈ ma te Yaˬhoˉvaˬ ngaˬ hui htaꞈ maˍ laˇ ve le? Leh ngaˬ hui htaꞈ hkʼaˬ hkʼe hpawˇ kaꞈ maˍ laˇ ve le?

¹⁴ Yaˬhoˉvaˬ ngaˬ hui htaꞈ maˍ laˇ ve. Ngaˬ hui maˇ biˇ ve pa taw, Yeˍsuˆ htaꞈ maˇ shuˍ daꞈ. Chi htaꞈ pa taw, Awˬ pa Yaˬhoˉvaˬ ngaˬ hui htaꞈ haꞈ leh maˍ laˇ ve yoˬ. Liꞈ hpu hkʼaw kʼoˆ ve, “[Yaˬhoˉvaˬ] lehˬ yawˇ haꞈ ve chaw htaꞈ maˍ piˇ” ve yoˬ. (Heˍbrehˇ 12:6, 7) Yaˬhoˉvaˬ ngaˬ hui htaꞈ laiˉ hkʼaˇ maˍ laˇ ve lehˬ Liꞈ hpu gʼaw ve, hpawnˬ daꞈ kuiˬ hkʼaw maˍ laˇ ve, ngaˬ hui a shaꞈ teꞈ hkʼaˇ pa gʼa tuˬ ga laˇ ve yoˬ. Teˇ pawˆ pawˆ kʼo Hkriꞈ yaˇ awˬ moˍ hkʼaw nyi haꞈ shaˉ paˍ  htaꞈ kaꞈ cuˇ leh maˍ laˇ ve yoˬ. Yaˬhoˉvaˬ ngaˬ hui htaꞈ hkʼaˬ hkʼe maˍ laˇ ve htawˇ, yawˇ haꞈ ve pa taw yoˬ.—Yeˍraˍmiˆ 30:11.

15. Yaˬhoˉvaˬ ngaˬ hui htaꞈ hkʼaˬ hkʼe ga laˇ tuˬ le?

¹⁵ Ngaˬ hui shoꞈ shaꞈ ve gʼa hpuˇ htaˇ, Yaˬhoˉvaˬ ga laˇ ve. Yaˇ tuꞈ hkanˍ ve gʼaˇ hpuˇ htaˇ awˬ pa ga piˇ ve hkʼa shuˍ, mvuhˇ naw ma hkʼoˆ ve Awˬ pa kaꞈ ngaˬ hui htaꞈ ga laˇ ve yoˬ. Ngaˬ hui Yaˬhoˉvaˬ geh meuˆ daꞈ ve htaꞈ maˇ gʼa te luˬ laˇ tuˬ, yawˇ daꞈ kehˬ ve awˬ ha hpu htaꞈ cuˇ leh ga laˇ ve yoˬ. (Luˉkaꞈ 11:13) Chi hkʼoˆ kaꞈ, ngaˬ hui awˬ gʼaˇ nuˇ htaˇ leh dawˇ haˍ htaˇ kaꞈ ga laˇ ve yoˬ. Tawˇ pa haˉ te kʼo, daꞈ jaˇ ve dawˇ law kuiˬ kaꞈ yawˇ peꞈ laˇ ve yoˬ. Chi lehˬ tuꞈ hkanˍ ve htaꞈ yeunˇ hkanˍ gʼaˇ tuˬ ga laˇ ve yoˬ. Ngaˬ hui maˇ daꞈ ve gʼa hpuˇ ve, chi ve hkʼaˬ hkʼe taw naˬ tuˬ te laˇ ve, awˬ gʼuˇ suhˍ hpawˇ chi ve teˇ hpaˍ maˇ gʼa hpuˇ jaw sheˍ ve hkʼe leˇ Awˬ pa gu laˇ tuˬ yoˬ. Ngaˬ hui gʼa hpuˇ ve teˇ hkui teˇ yanˇ ceh yoˬ. Yaꞈ hkʼaˇ, ngaˬ hui Yaˬhoˉvaˬ geh gʼa ve awˬ bon teˇ hpaˍ lehˬ co co taiˍ taiˍ yeˬ tuˬ yoˬ.—2 Kawˇrenˍhtuˆ 4:16-18.

16. Aˍdanˍ mvuhˇ naw ma hkʼoˆ ve Awˬ pa hkawˇ maˇ na htaˇ hkʼaˬ hkʼe hpehꞈ la ve le?

¹⁶ Yaˬhoˉvaˬ yawˇ ve yehˬ kʼa miˬ guiˬ hkʼoˆ lo ve shoꞈ shaꞈ ve awˉ lawˉ teˇ pawˆ gu piˇ htaˇ, Yaˬhoˉvaˬ ngaˬ hui htaꞈ haꞈ ve tehꞈ hkʼa tawˍ lehˆ gʼa mawˬ ve yoˬ. Aˍdanˍ mvuhˇ naw ma hkʼoˆ Awˬ pa hkawˇ maˇ na htaˇ, yawˇ leh yawˇ ve awˬ yaˇ awˬ duˬ Gʼuiˬ sha ve yehˬ kʼa ha lehˬ ve hkʼaw maˇ kʼawꞈ gʼa chehˇ. (Roˉmaꞈ 5:12; 7:14) Yaꞈ hkʼaˇ, Aˍdanˍ ve awˬ yaˇ awˬ duˬ htaꞈ ga piˇ tuˬ Yaˬhoˉvaˬ teˇ ceuˬ ceuˬ te ve yoˬ.

17. Aˍdanˍ Yaˬhoˉvaˬ htaꞈ hpfuhˆ peuˬ hkʼawꞈ nawˉ, laꞈ haˆ aˬ htoꞈ ma te ve le?

¹⁷ Yaˬhoˉvaˬ Aˍdanˍ htaꞈ ciˍ yanˍ piˇ ve htawˇ, yawˇ ve awˬ yaˇ awˬ duˬ htaꞈ dawˇ law kuiˬ maˇ cawˬ leh chiˇ baˬ piˇ taˍ ve maˇ heˆ. Aˍdanˍ Yaˬhoˉvaˬ htaꞈ hpfuhˆ peuˬ hkʼawꞈ nawˉ, na yuˬ ve chaw teˇ gʼaˇ le le yawˇ ve yehˬ kʼa hkʼaw gʼa kʼawꞈ chehˇ tuˬ tehꞈ ka tiꞈ laꞈ haˆ te ve yoˬ. (Awˬ hkuiˉ puiˍ 3:15; Roˉmaꞈ 8:20, 21) Yaˬhoˉvaˬ ka tiꞈ htaꞈ gʼaꞈ te ve pa taw,  yawˇ haꞈ jaˇ ve Yaˇ paˍ ngaˬ hui htaꞈ htaiˍ hkʼawꞈ laˇ tcuh ve yoˬ. Chi ve htaꞈ nyi ve teˇ yanˇ, Yaˬhoˉvaˬ ngaˬ hui htaꞈ haꞈ jaˇ.—Yoˇhanˬ 3:16.

18. Ngaˬ hui Yaˬhoˉvaˬ htaꞈ hpfuhˆ jaw ve htawˇ, yawˇ ve yaˇ hpehꞈ tcuh gaˇ sheˍ ve tehꞈ aˬ htoꞈ ma te yonˍ gʼa ve le?

¹⁸ Ngaˬ hui maˇ biˇ ve chaw hpehꞈ ve htawˇ, Yaˬhoˉvaˬ yawˇ ve yehˬ kʼa hkʼaw chehˇ tcuh gaˇ ve yoˬ. Ngaˬ hui yawˇ awˬ pon awˬ vuiˬ hehnˇ ve tehꞈ Yaˬhoˉvaˬ maˇ dawˇ jaw. Ngaˬ hui Yaˬhoˉvaˬ nyi ma luˬ tuˬ te piˇ ve maˇ heˆ leh hpfuhˆ piˇ ve htawˇ, yawˇ ngaˬ hui htaꞈ dawˇ law chehˇ sheˍ. Teˇ nyi kʼo, ngaˬ hui kʼawꞈ kʼawꞈ la tuˬ yawˇ dawˇ law chehˇ sheˍ. Yaˬhoˉvaˬ lehˬ yaˇ htaꞈ haꞈ jaˇ ve awˬ pa hkʼe hpehꞈ ve yoˬ. Mehˉ kʼai taˍ ve yaˇ paˍ ve awˬ lawn Yeˍsuˆ kʼoˆ maˍ laˇ ve yoˬ. (Luˉkaꞈ 15:11-32) Tawˇ pa haˉ chi ve hkʼaw awˬ pa lehˬ teˇ nyi kʼo, yaˇ kʼawꞈ la tuˬ dawˇ law taˍ ve yoˬ. Yaˇ kʼawꞈ la htaˇ, awˬ pa haꞈ yuˬ piˇ ve yoˬ. Ngaˬ hui Yaˬhoˉvaˬ htaꞈ hpfuhˆ jaw ve htawˇ, chi teˇ hkui venˇ baˆ dawˇ hpfuhˆ ve kʼo, Awˬ pa haꞈ yuˬ laˇ tuˬ yoˬ tehꞈ yonˍ gʼa ve yoˬ.

19. Aˍdanˍ te taˍ ve luˬ ve sheˆ ve htaꞈ Yaˬhoˉvaˬ hkʼaˬ hkʼe gu laˇ tuˬ le?

¹⁹ Mvuhˇ naw ma hkʼoˆ ve Awˬ pa lehˬ Aˍdanˍ te taˍ ve luˬ ve sheˆ ve hkʼa peu˗eˬ gu laˇ tuˬ yoˬ. Aˍdanˍ Yaˬhoˉvaˬ htaꞈ hpfuhˆ peuˬ hkʼawꞈ nawˉ, Yaˬhoˉvaˬ 144,000 gʼaˇ htaꞈ leuˆ yuˬ leh yawˇ ve yaˇ te tcuh ve yoˬ. Yawˇ hui Yeˍsuˆ geh teˇ geh mvuhˇ naw ma hkʼoˆ paw hkuˇ leh jawˇ mawˇ te tcuh tuˬ yawˇ dawˇ cheˆ ve yoˬ. Miˬ guiˬ awˬ suhˉ hkʼaw Yeˍsuˆ leh yawˇ geh uˉ peunˍ ve chaw, na yuˬ ve chaw teˇ gʼaˇ le le htaꞈ biˇ ve chaw hpehꞈ tcuh tuˬ yoˬ. Beˬ ve lawˇ ve awˬ leh meuˇ teˇ pawˆ peuˬ hkʼawꞈ nawˉ, Gʼuiˬ sha lehˬ na yuˬ ve chaw teˇ gʼaˇ le le htaꞈ co co taiˍ taiˍ a shaꞈ piˇ tuˬ yoˬ. Oˇ ve teˇ yanˇ biˇ ve awˬ yaˇ awˬ duˬ hkʼa biˇ cawˬ ve htaꞈ Yaˬhoˉvaˬ gʼa mawˬ htaˇ ha lehˬ jaˇ tuˬ yoˬ. Oˇ ve lehˬ daꞈ jaˇ ve awˬ yanˇ hpehꞈ ve yoˬ!

20. Yaˬhoˉvaˬ ngaˬ hui htaꞈ haꞈ ve tehꞈ hkʼaˬ hkʼe hpeuꞈ maw laˇ ve le? Gʼuˇ suhˍ teˇ lawn hkʼaw aˬ htoꞈ ma htaꞈ henˇ tuˬ le?

²⁰ Yaˬhoˉvaˬ ngaˬ hui htaꞈ haꞈ jaˇ ve tehꞈ hpeuꞈ maw laˇ ve yoˬ. Gʼuiˬ sha lehˬ teˇ gʼaˇ le le cawˬ gaˇ ve Awˬ pa hpehꞈ ve yoˬ. Gʼuiˬ sha ngaˬ hui ve bon lawˬ hkawˇ na laˇ ve, a shaꞈ teꞈ kuiˬ hkʼaw loˍ ve awˬ ceuˬ ga laˇ ve, yawˇ geh meuˆ daꞈ tcuh laˇ ve, maˍ leh hkʼaˬ htaˆ kaꞈ ga laˇ ve, leh awˬ gʼuˇ suhˍ hpawˇ daꞈ jaˇ ve gu teh taˍ laˇ tuˬ yoˬ. Mvuhˇ naw ma hkʼoˆ ve Awˬ pa ngaˬ hui htaꞈ haꞈ leh a yeˇ yuˬ laˇ ve tehꞈ shiˍ htaˇ, nyi ma sha jaˇ. Ngaˬ hui yawˇ ve yaˇ hpehꞈ leh awˬ bon uiˍ hkawˇ hkʼaˬ hkʼe hpeuꞈ maw piˇ gʼa tuˬ gʼuˇ suhˍ teˇ lawn hkʼaw henˇ tuˬ yoˬ.