1. Hkawehˉ ve htaꞈ pa taw, Yoˇsehꞈ ve awˬ pa leh awˬ viˉ paˍ hui hkʼaˬ hkʼe hpehꞈ la ve le?

 Yaˍkoˆ yawˇ ve yaˇ teˇ gʼaˇ le le htaꞈ haꞈ ve yoˬ. Yaꞈ hkʼaˇ, awˬ pa Yoˇsehꞈ htaꞈ awˬ viˉ paˍ hui aꞈ kehˉ haꞈ jaˇ. Yoˇsehꞈ ve awˬ viˉ paˍ hui hkʼaˬ hkʼe dawˇ ve le? Yawˇ hui Yoˇsehꞈ htaꞈ hkawehˉ leh nyi bawˬ la ve yoˬ. Yoˇsehꞈ teꞈ chiˉ maˇ gʼa te piˇ kaꞈ awˬ viˉ paˍ hui nyi bawˬ ve yoˬ. Yoˇsehꞈ 17 hkʼawꞈ htaˇ yawˇ shu ve awˬ ceˬ te tuˬ yawˇ hui hawˇ piˇ leh to nuˇ to shaˆ yawˇ htaꞈ cheꞈ caˇ ve tehꞈ awˬ pa htaꞈ heˍ piˇ ve yoˬ. Awˬ viˉ paˍ hui hkawehˉ ve htaꞈ pa taw, yawˇ hui ve yehˬ kʼa hkʼaw ha lehˬ tuˬ maˇ cawˬ leh awˬ pa nyi ma naˬ jaˇ tuˬ te piˇ ve yoˬ.—Awˬ hkuiˉ puiˍ 37:3, 4, 27-34.

2. Gaˍlaˍtiˆ liꞈ 5:19-21 hkʼaw kʼoˆ taˍ ve hkʼe, aˬ htoꞈ ma te hkawehˉ ve teˇ ceuˬ kawˆ tuˬ uiˍ jaˇ ve le?

² Liꞈ hpu hkʼaw kʼoˆ ve hkawehˉ ve * teˇ ceuˬ lehˬ kawˆ tuˬ uiˍ jaˇ. Hkawehˉ ve kaꞈ teˇ ceuˬ “awˬ suhˍ awˬ shaˍ ve kanˉ teˇ hpaˍ” hpehꞈ leh Gʼuiˬ sha ve mvuhˇ miˬ awˬ hkʼaw lo maˇ gʼa loꞈ˗e. (Gaˍlaˍtiˆ 5:19-21 gʼaw sheˍ.) Hkawehˉ ve cawˬ ve pa taw, canˇ daꞈ ve, deˇ daꞈ yaꞈ daꞈ ve, teˇ gʼaˇ leh teˇ gʼaˇ maˇ yonˍ gʼa daꞈ ve, leh nyi ma zuhˆ puiˉ jaˇ ve chi teˇ hpaˍ cawˬ la gʼa ve yoˬ.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Yoˇsehꞈ ve awˬ viˉ paˍ hui ve awˬ lawn htaꞈ dawˇ nyi sheˍ. Yawˇ hui hkawehˉ ve pa taw, yehˬ kʼa hkʼaw meuˆ daꞈ ve leh ha lehˬ ve maˇ cawˬ gʼa. Yoˇsehꞈ awˬ viˉ paˍ hui te ve hkʼe ngaˬ hui maˇ te ve htawˇ, teˇ gʼaˇ le le maˇ biˇ ve pa taw, nyi ma hpfuhˆ puiˉ ve yoˬ. Laiˉ pawˆ kʼo, ngaˬ hui kaꞈ shu htaꞈ hkawehˉ puiˉ la ve yoˬ. (Yeˍraˍmiˆ 17:9) Ngaˬ hui hkawehˉ tuˬ te laˇ ve awˬ ceuˬ teˇ hpaˍ Liꞈ hpu hkʼaw shaˍ tiꞈ peꞈ laˇ ve  teˇ lawn lawn htaꞈ teˇ geh nyi sheˍ. Peuˬ hkʼawꞈ nawˉ, hkawehˉ ve htaꞈ tawˍ daꞈ gʼaˇ tuˬ leh cawˇ daꞈ hui daꞈ ve leh dawˇ sha gawˬ lehˍ ve cawˬ tuˬ kaꞈ teˇ geh henˇ tuˬ yoˬ.

4. Aˬ htoꞈ ma te Hpiˇliˇtiˆ chaw Iˉcaˆ htaꞈ hkawehˉ ve le?

⁴ Shu hpu shi mawˇ jeˬ cawˬ ve htaꞈ mawˬ htaˇ. Iˉcaˆ paw sha jaˇ leh Hpiˇliˇtiˆ chaw yawˇ htaꞈ hkawehˉ ve yoˬ. (Awˬ hkuiˉ puiˍ 26:12-14) Iˉcaˆ ve to nuˇ to shaˆ dawˬ kuiˬ nanˬ bawˍ hkʼa peu˗eˬ htaꞈ jeꞈ duˇ keu piˇ ve yoˬ. (Awˬ hkuiˉ puiˍ 26:15, 16, 27) Chi beuꞈ teˇ co˗e ve chaw kaꞈ yawˇ hui aꞈ kehˉ hpu shi mawˇ jeˬ cawˬ maˇ ve chaw htaꞈ hkawehˉ ve yoˬ. Yawˇ hui shu cawˬ ve mawˇ htaꞈ ceh heuˆ gaˇ ve maˇ heˆ. Shu cawˬ taˍ ve hkʼa peu˗eˬ htaꞈ luˬ kʼai tcuh gaˇ ve yoˬ.

5. Aˬ htoꞈ ma te Yuˇdaꞈ chaw ve bon awˬ hoˉ Yeˍsuˆ htaꞈ hkawehˉ ve le?

⁵ Chaw teˇ gʼaˇ htaꞈ shu dawˇ cawˇ ve mawˬ htaˇ. Yuˇdaꞈ chaw ve bon awˬ hoˉ teˇ hpaˍ Yeˍsuˆ htaꞈ shu dawˇ cawˇ ve mawˬ htaˇ hkawehˉ ve yoˬ. (Maꞈhtehˍ 7:28, 29) Yeˍsuˆ Gʼuiˬ sha ve awˬ tan te shehˍ hpaˇ hpehꞈ leh yawˇ awˬ tehˬ ve htaꞈ maˍ ve htawˇ, Yeˍsuˆ ve awˬ meh luˬ tuˬ bon awˬ hoˉ teˇ hpaˍ yawˇ htaꞈ maˇ heˆ heˆ she pfuhˍ piˇ ve yoˬ. (Maˍkuˆ 15:10; Yoˇhanˬ 11:47, 48; 12:12, 13, 19) Awˬ lawn chi ngaˬ hui htaꞈ aˬ htoꞈ ma maˍ laˇ ve le? Ngaˬ hui hkawehˉ ve htaꞈ gʼa gʼaˇ tcuh ve yoˬ. Hkriꞈ yaˇ awˬ moˍ hkʼaw ve chaw teˇ gʼaˇ yawˇ teˇ ceuˬ ceuˬ daꞈ ve cawˬ leh awˬ viˉ awˬ nyi haꞈ leh chiˇ mvuh piˇ htaˇ, ngaˬ hui maˇ hkawehˉ cawˇ. Yaꞈ hkʼaˇ, yawˇ daꞈ ve htaꞈ coˇ caˇ leh henˇ yuˬ cawˇ ve yoˬ.—1 Kawˇrenˍhtuˆ 11:1; 3 Yoˇhanˬ 11.

6. Daˍyawˇtaˍraˆ hkawehˉ ve hkʼaˬ hkʼe hpeuꞈ maw laˇ ve le?

⁶ Shu daꞈ ve awˬ vuiˬ gʼa ve htaꞈ mawˬ htaˇ. Awˉ lawˉ peuˇ ve Hkriꞈ yaˇ Daˍyawˇtaˍraˆ Hkriꞈ yaˇ awˬ moˍ hkʼaw sheh kʼai paˍ htaꞈ hkawehˉ ve yoˬ. Yawˇ awˬ viˉ awˬ nyi “awˬ hkʼaw lo shu aꞈ kehˉ uiˍ gaˇ ve” yoˬ. Tcuh yaˇ Yoˇhanˬ leh Hkriꞈ yaˇ awˬ moˍ hkʼaw sheh kʼai paˍ hui htaꞈ maˇ daꞈ ve hpawˇ yawˇ kʼoˆ ve yoˬ. (3 Yoˇhanˬ 9, 10) Daˍyawˇtaˍraˆ te ve hkʼe ngaˬ hui maˇ te ve htawˇ, awˬ viˉ awˬ nyi daꞈ ve awˬ vuiˬ gʼa ve maˇ heˆ leh ngaˬ hui te gaˇ ve awˬ vuiˬ htaꞈ maˇ gʼa te htaˇ hkawehˉ la ve yoˬ. Awˬ vuiˬ oˇ ve htaꞈ ngaˬ hui kaꞈ hkʼa dehꞈ te gʼa ve maˇ heˆ leh oˇ ve teˇ gʼaˇ aꞈ kehˉ te gʼa ve tehꞈ dawˇ la ve yoˬ hehˉ.

7. Hkawehˉ ve ngaˬ hui htaꞈ heuˆ la kuiˬ hkʼaˬ hkʼe cawˬ ve le?

⁷ Hkawehˉ ve lehˬ veˬ kʼawˍ yawˇ hkʼe hpehꞈ ve yoˬ. Awˬ yeˬ oˇ ve ngaˬ hui nyi ma hkʼaw cawˬ la htaˇ, yuˬ baˬ haˍ jaˇ. Uiˍ muiˬ caˆ muiˬ ve, a shu yawˇ awˬ pon tiˉ dawˇ nyi ve kʼo, hkawehˉ ve cawˬ tuˬ sha jaˇ. Hkʼe ceh maˇ heˆ. Veˬ kʼawˍ cehˬ suhˉ veˆ htaꞈ hoˆ htaˇ hkʼa dehꞈ maˇ veˆ gʼa ve yoˬ. Chi hkʼa shuˍ shuˍ hkawehˉ ve cawˬ ve kʼo, haꞈ pehnˇ ve, ha kʼaˉ ve, leh shu awˬ pon dawˇ nyi puiˉ ve leh ngaˬ hui ve te hkʼaˇ dawˇ hkʼaˇ daꞈ la tuˬ te laˇ maˇ gʼa. Hkʼe te leh ngaˬ hui hkawehˉ ve cawˬ la ve htaꞈ shiˍ htaˇ, laꞈ haˉ gʼa yuˬ baˬ ve yoˬ. Hkawehˉ ve htaꞈ hkʼaˬ hkʼe te gʼaˇ tuˬ le?

8. Ngaˬ hui hkawehˉ ve htaꞈ gʼaˇ tuˬ te hkʼaˇ dawˇ hkʼaˇ hkʼaˬ hkʼe ve ga laˇ ve le?

⁸ Ngaˬ hui nyi ma nuˇ nehˬ leh cawˬ taˍ ve htaꞈ nyi hkʼaˇ suh ve kʼo, hkawehˉ ve htaꞈ tawˍ daꞈ gʼaˇ tuˬ yoˬ. Ngaˬ hui te hkʼaˇ dawˇ hkʼaˇ chi ve nyiˇ ceuˬ cawˬ ve kʼo, hkawehˉ ve maˇ cawˬ gʼa. Nyi ma nuˇ nehˬ ve lehˬ a shu yawˇ awˬ pon tiˉ maˇ dawˇ nyi tuˬ ga laˇ ve yoˬ. Nyi ma nuˇ nehˬ ve chaw lehˬ yawˇ shu aꞈ kehˉ daꞈ ve awˬ ceuˬ teˇ hpaˍ gʼa cawˇ ve tehꞈ maˇ dawˇ. (Gaˍlaˍtiˆ 6:3, 4) Cawˬ taˍ ve htaꞈ nyi hkʼaˇ suh ve chaw lehˬ yawˇ awˬ to shu htaꞈ maˇ tehˆ daꞈ. (1 Tiˆmoˉseˍ 6:7, 8) Nyi ma nuˇ nehˬ leh cawˬ taˍ ve htaꞈ nyi hkʼaˇ suh ve chaw lehˬ shu daꞈ ve gʼa  ve htaꞈ mawˬ htaˇ, oˇ ve teˇ gʼaˇ ha lehˬ ve hkʼe yawˇ kaꞈ ha lehˬ ve yoˬ.

9. Gaˍlaˍtiˆ liꞈ 5:16 leh Hpiˇliˇpiˆ liꞈ 2:3, 4 hkʼaw kʼoˆ taˍ ve hkʼe, daꞈ kehˬ ve awˬ ha hpu ngaˬ hui htaꞈ hkʼaˬ hkʼe te tuˬ ga laˇ ve le?

⁹ Ngaˬ hui hkawehˉ ve maˇ cawˬ tuˬ, nyi ma nuˇ nehˬ leh cawˬ taˍ ve htaꞈ nyi hkʼaˇ suh ve yoˬ. Gʼuiˬ sha ve daꞈ kehˬ ve awˬ ha hpu ga laˇ tuˬ ngaˬ hui gʼa lawˬ ve yoˬ. (Gaˍlaˍtiˆ 5:16; Hpiˇliˇpiˆ 2:3, 4 gʼaw sheˍ.) Ngaˬ hui ve dawˇ hkʼaˇ leh nyi ma hkʼaw chaˬ nyi tuˬ, daꞈ kehˬ ve awˬ ha hpu gʼa ga laˇ tcuh ve yoˬ. Gʼuiˬ sha lehˬ ngaˬ hui ve dawˇ hkʼaˇ maˇ daꞈ ve htaꞈ yuˬ baˬ laˇ leh daꞈ ve dawˇ hkʼaˇ kʼawꞈ cawˬ tcuh laˇ tuˬ yoˬ. (Chiˇ mvuh ve 26:2; 51:10) Chi teˇ hkui Moˉseˍ leh Pawˇluꞈ hkawehˉ ve htaꞈ tawˍ daꞈ gʼaˇ ve teˇ geh nyi sheˍ.

10. Moˉseˍ hkawehˉ ve nyi ma cawˬ tuˬ aˬ htoꞈ ma te piˇ ve le? (Awˬ htaꞈ hpawˇ ve awˬ han htaꞈ nyi sheˍ.)

¹⁰ Moˉseˍ Gʼuiˬ sha ve chaw aꞈ kehˉ kanˇ paˆ cawˬ ve htawˇ, shu daꞈ ve awˬ vuiˬ gʼa tuˬ maˇ tawˍ piˇ. Teˇ pawˆ htaˇ, Moˉseˍ geh daꞈ kehˬ ve awˬ ha hpu teˇ hpaˍ hpaˍ htaꞈ Yaˬhoˉvaˬ yuˬ leh daꞈ kehˬ ve aˉ po kʼoˍ awˬ paˇ lo huˉ chehˇ ve Iˉsaˍreˍlaˆ chaw sheh kʼai paˍ hui htaꞈ piˇ ve yoˬ. Peuˬ hkʼawꞈ nawˉ, daꞈ kehˬ ve aˉ po kʼo awˬ paˇ lo maˇ gʼa kʼai ve sheh kʼai paˍ 2 gʼaˇ htaꞈ kaꞈ daꞈ kehˬ ve awˬ ha hpu gʼa leh tcuh kaˍ paˍ hkʼe te ve tehꞈ Moˉseˍ gʼa kaˇ ve yoˬ. Yawˇsuˆ lehˬ yawˇ hui taꞈ iˉ chehˇ tuˬ Moˉseˍ htaꞈ kʼoˆ piˇ tcuh ve yoˬ. Yaꞈ hkʼaˇ, Moˉseˍ hkʼaˬ hkʼe te ve le? Yawˇ Yaˬhoˉvaˬ leuˆ yuˬ ve 2 gʼaˇ htaꞈ maˇ hkawehˉ. Yaꞈ hkʼaˇ, Moˉseˍ nyi ma nuˇ nehˬ leh yawˇ hui daꞈ ve awˬ vuiˬ gʼa ve htaꞈ ha lehˬ ve yoˬ. (Heh puiˉ hkʼaw 11:24-29) Moˉseˍ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

11. Nyi haꞈ shaˉ paˍ Moˉseˍ htaꞈ hkʼaˬ hkʼe te henˇ yuˬ gʼa tuˬ le?

¹¹ Nawˬ nyi haꞈ shaˉ paˍ hpehꞈ ve kʼo, nawˬ haꞈ jaˇ ve awˬ vuiˬ shu htaꞈ maˍ piˇ tuˬ lawˬ laˇ jaw˗aw laˇ? Nawˬ Shaw nyi kuiˬ Taꞈ yehˬ sheh kʼai ve dawˇ cawˇ jaˇ ve yoˬ hehˉ. Awˬ viˉ awˬ nyi teˇ gʼaˇ Shaw nyi kuiˬ Taꞈ yehˬ sheh kʼai tuˬ nawˬ gʼa maˍ piˇ ve kʼo, awˬ leh meuˇ htaˇ yawˇ nawˬ awˬ tan te gʼa tuˬ yoˬ. Nawˬ hkʼaˬ hkʼe dawˇ tuˬ le? Nawˬ Moˉseˍ hkʼe leˇ nyi ma nuˇ nehˬ ve kʼo, nawˬ awˬ to awˬ hpfuhˇ maˇ cawˬ ve tehꞈ maˇ dawˇ. Yaꞈ hkʼaˇ, nawˬ awˬ viˉ awˬ nyi htaꞈ gʼa ga piˇ ve ha lehˬ jaˇ tuˬ yoˬ.

12. Chi beuꞈ teˇ co˗e ve awˬ viˉ awˬ nyi laiˉ gʼaˇ nyi ma nuˇ nehˬ leh cawˬ taˍ ve htaꞈ nyi hkʼaˇ suh ve tehꞈ hkʼaˬ hkʼe hpeuꞈ maw laˇ ve le?

¹² Awˬ viˉ awˬ nyi hawˉ hkʼaˆ a shaꞈ maˇ˗oˬ ve htaꞈ teˇ geh nyi sheˍ. Laiˉ gʼaˇ lehˬ nyi haꞈ shaˉ paˍ awˬ moˍ hkʼaw caˉ daꞈ paˍ laiˉ chi hkʼawꞈ te˗oˬ ve yoˬ. Yaꞈ hkʼaˇ, yawˇ hui 80 hkʼawꞈ gaˬ htaˇ, awˬ vuiˬ chi ve htaꞈ maˇ te˗o. Toˇ nyi shehˍ hpaˇ kaꞈ 70 hkʼawꞈ gaˬ htaˇ, yawˇ hui nyi ma nuˇ nehˬ leh awˬ nu ve awˬ vuiˬ kʼawꞈ te ve yoˬ. Chi hkʼoˆ kaꞈ, ponˬ laˬ ve hkʼaˬ nyiˇ hkʼawꞈ maˇ gaˬ sheˍ htaˇ, miˬ guiˬ chi hkʼoˆ Beˍteˍlaˆ hkʼaw ve chaw laiˉ gʼaˇ hto toˇ kuiˬ lo awˬ vuiˬ awˬ suhˉ gʼa ve yoˬ. Awˬ viˉ awˬ nyi chi teˇ hpaˍ yawˇ hui ve awˬ vuiˬ htaꞈ awˬ nu ve chaw te la htaˇ, yawˇ hui maˇ beuꞈ.

13. Tcuh yaˇ 12 gʼaˇ htaꞈ Pawˇluꞈ hkawehˉ tuˬ aˬ htoꞈ ma te piˇ ve le?

¹³ Nyi ma nuˇ nehˬ leh cawˬ taˍ ve htaꞈ nyi hkʼaˇ suh ve chaw awˬ pon, tcuh yaˇ Pawˇluꞈ kaꞈ teˇ gʼaˇ daꞈ ve henˇ yuˬ tuˬ hpehꞈ ve yoˬ. Pawˇluꞈ hkawehˉ ve maˇ cawˬ tcuh. Yawˇ Gʼuiˬ sha ve kanˉ te hkeuꞈ jaˇ ve htawˇ, yawˇ nyi ma nuˇ nehˬ ve hkʼaw kʼoˆ ve, ‘ngaˬ lehˬ tcuh yaˇ hui awˬ hkʼaw lo i jaˇ ve teˇ gʼaˇ hpehꞈ ve yoˬ. Ngaˬ htaꞈ tcuh yaˇ kʼoˆ tuˬ ve kaꞈ maˇ keunˍ.’ (1 Kawˇrenˍhtuˆ 15:9, 10) Tcuh yaˇ 12 gʼaˇ Yeˍsuˆ awˬ hkʼaˇ suh gʼaꞈ yuˬ leh Gʼuiˬ sha ve kanˉ te ve yoˬ. Yaꞈ hkʼaˇ, Pawˇluꞈ Hkriꞈ yaˇ hpehꞈ la ve lehˬ Yeˍsuˆ kʼawꞈ teꞈ tu la peuˬ hkʼawꞈ nawˉ htaˇ yoˬ. Peuˬ leh yawˇ “buiˇ shaˆ aˉ naˆ chaw hui awˬ pon tcuh yaˇ” te tuˬ leuˆ yuˬ piˇ ve yoˬ. Yaꞈ hkʼaˇ, Pawˇluꞈ lehˬ tcuh yaˇ 12 gʼaˇ hkʼaw ve teˇ gʼaˇ maˇ hpehꞈ. (Roˉmaꞈ 11:13; Tcuh yaˇ 1:21-26) Pawˇluꞈ tcuh yaˇ  12 gʼaˇ Yeˍsuˆ geh meuˆ daꞈ ve htaꞈ hkawehˉ cawˇ ve htawˇ, yawˇ hpehꞈ chehˇ ve awˬ ceuˬ htaꞈ nyi hkʼaˇ suh ve yoˬ.

14. Ngaˬ hui nyi ma nuˇ nehˬ leh cawˬ taˍ ve htaꞈ nyi hkʼaˇ suh ve kʼo hkʼaˬ hkʼe te tuˬ le?

¹⁴ Ngaˬ hui nyi ma nuˇ nehˬ leh cawˬ taˍ ve htaꞈ nyi suh ve kʼo, Yaˬhoˉvaˬ kanˇ paˆ piˇ ve chaw htaꞈ ngaˬ hui Pawˇluꞈ hkʼa shuˍ yawˆ yan tuˬ yoˬ. (Tcuh yaˇ 21:20-26) Yaˬhoˉvaˬ hawˉ hkʼaˆ teˇ hpaˍ htaꞈ leuˆ yuˬ leh Hkriꞈ yaˇ awˬ moˍ hkʼaw sheh kʼai tcuh ve yoˬ. Yawˇ hui maˇ biˇ ve chaw hpehꞈ ve htawˇ, Gʼuiˬ sha lehˬ “chaw yaˇ hui htaꞈ laꞈ shawnˍ teˇ hpaˍ piˇ ve yoˬ.” (Eˇfeˇsuꞈ 4:8, 11) Leuˆ yuˬ piˇ taˍ ve hawˉ hkʼaˆ chi ve teˇ hpaˍ htaꞈ ngaˬ hui yawˆ yan ve kʼo, yawˇ hui beˆ maˍ laˇ ve htaꞈ nyi ma nuˇ nehˬ ve hkʼaw gʼaꞈ te tuˬ yoˬ. Ngaˬ hui Yaˬhoˉvaˬ geh hkʼaˬ htaˆ kaꞈ meuˆ daꞈ ve kʼo, awˬ viˉ awˬ nyi geh ha lehˬ ve yoˬ.

15. Ngaˬ hui hkʼaˬ hkʼe gʼa te cawˇ ve le?

¹⁵ Ngaˬ hui hkawehˉ ve cawˬ tcuh ve kʼo, dawˇ sha gawˬ lehˍ ve maˇ cawˬ gʼa. Hkʼe te leh, ngaˬ hui ve nyi ma hkʼaw hkawehˉ ve hkʼa peu˗eˬ htaꞈ yuˬ baˬ ve kʼo, shu ve nyi ma hkʼaw hkawehˉ ve awˬ yawˇ ti keu piˇ tuˬ ve maˇ heˆ. Ngaˬ hui Yaˬhoˉvaˬ ve hkawˇ na yuˬ ve kʼo, “cawˇ daꞈ hui daꞈ tuˬ leh, teˇ gʼaˇ leh teˇ gʼaˇ uiˍ la mvuh la tuˬ, hkʼaˬ htaˆ kaꞈ te kʼai” ve chi a yeˇ uiˍ jaˇ. (Roˉmaꞈ 14:19) Shu hkawehˉ ve htaꞈ tawˍ daꞈ gʼaˇ tuˬ, ngaˬ hui hkʼaˬ hkʼe ga piˇ gʼa tuˬ le? Dawˇ sha gawˬ lehˍ ve cawˬ tuˬ ngaˬ hui kaꞈ hkʼaˬ hkʼe ga piˇ gʼa tuˬ le?

16. Shu hkawehˉ ve htaꞈ tawˍ daꞈ gʼaˇ tuˬ ngaˬ hui hkʼaˬ hkʼe ga piˇ gʼa tuˬ le?

¹⁶ Ngaˬ hui ve dawˇ hkʼaˇ leh te hkʼaˇ shu htaꞈ heuˆ la kuiˬ cawˬ jaˇ. Miˬ guiˬ chi hkʼoˆ lo ngaˬ hui cawˬ  taˍ ve awˬ ceuˬ htaꞈ “nyi ma uiˍ” tcuh gaˇ ve yoˬ. (1 Yoˇhanˬ 2:16) Yaꞈ hkʼaˇ, chi hkʼe ve dawˇ hkʼaˇ lehˬ hkawehˉ ve cawˬ tcuh ve yoˬ. Ngaˬ hui shu ve nyi ma hkʼaw hkawehˉ ve maˇ cawˬ tcuh tuˬ, ngaˬ hui vuiˬ gaˇ ve leh cawˬ taˍ ve awˬ ceuˬ shu htaꞈ teˇ hkui teˇ hkui maˇ kʼoˆ maˍ piˇ. Awˬ nu ve teˇ hkʼaˇ lehˬ ngaˬ hui awˬ vuiˬ gʼa htaˇ nyi ma gʼa nuˇ nehˬ ve yoˬ. Ngaˬ hui gʼa ve daꞈ jaˇ ve awˬ vuiˬ htaꞈ teˇ hkui teˇ hkui kʼoˆ ve kʼo, ngaˬ hui kaꞈ hkawehˉ ve nyi ma cawˬ tuˬ gu hehnˇ taˍ˗oˬ ve yoˬ. Yaꞈ hkʼaˇ, ngaˬ hui shu htaꞈ awˬ tehˬ awˬ na a yeˇ yuˬ ve kʼo, yawˇ hui daꞈ ve awˬ ceuˬ te ve htaꞈ chiˇ mvuh piˇ leh yawˇ hpehꞈ chehˇ ve htaꞈ nyi hkʼaˇ suh tuˬ ga piˇ ve yoˬ. Ngaˬ hui dawˇ sha gawˬ lehˍ ve cawˬ leh Hkriꞈ yaˇ awˬ moˍ hkʼaw cawˇ daꞈ hui daꞈ tuˬ te ve yoˬ.

17. Awˬ leh meuˇ htaˇ Yoˇsehꞈ ve awˬ viˉ paˍ hui aˬ htoꞈ ma te gʼa ve le? Leh yawˇ hui chi hkʼe te gʼa tuˬ aˬ htoꞈ ma ga piˇ ve le?

¹⁷ Ngaˬ hui hkawehˉ ve htaꞈ tawˍ daꞈ gʼaˇ ve yoˬ! Yoˇsehꞈ ve awˬ viˉ paˍ hui ve awˬ lawn htaꞈ teˇ geh dawˇ nyi sheˍ. Yoˇsehꞈ htaꞈ maˇ daꞈ ve te piˇ ve laiˉ hkʼawꞈ peuˬ hkʼawꞈ nawˉ, Yawˇ hui Eˇjiˇtuꞈ mvuhˇ miˬ lo Yoˇsehꞈ htaꞈ mawˬ daꞈ ve yoˬ. Yaꞈ hkʼaˇ, Yoˇsehꞈ htaꞈ tawnˇ maˇ gʼa. Yawˇ a shu hpehꞈ ve maˇ kʼoˆ piˇ sheˍ htaˇ, awˬ viˉ paˍ hui pa˗oˬ le naˍ tehꞈ yawˇ lawˇ nyi piˇ ve yoˬ. Yoˇsehꞈ yawˇ hui htaꞈ caˇ tuˬ piˇ tcuh ve yoˬ. Yaꞈ hkʼaˇ, awˬ nyi paˍ leh Beˍyaˍmenˍ htaꞈ yawˇ hui aꞈ kehˉ piˇ maˇ ve yoˬ. (Awˬ hkuiˉ puiˍ 43:33, 34) Yaꞈ hkʼaˇ, awˬ viˉ paˍ hui Beˍyaˍmenˍ htaꞈ maˇ hkawehˉ. Yawˇ hui Beˍyaˍmenˍ leh awˬ pa htaꞈ dawˇ haˍ jaˇ. (Awˬ hkuiˉ puiˍ 44:30-34) Awˬ viˉ paˍ hui hkawehˉ ve maˇ kʼawꞈ cawˬ ve pa taw, yawˇ hui ve yehˬ kʼa dawˇ sha gawˬ lehˍ ve teˇ pawˆ kʼawꞈ cawˬ ve yoˬ. (Awˬ hkuiˉ puiˍ 45:4, 15) Ngaˬ hui ve nyi ma hkʼaw hkawehˉ ve htaꞈ yuˬ baˬ ve kʼo, yehˬ kʼa hkʼaw leh Hkriꞈ yaˇ awˬ moˍ hkʼaw kaꞈ dawˇ sha gawˬ lehˍ ve cawˬ tuˬ yoˬ.

18. Yaˍkoˆ liꞈ 3:17, 18 hkʼaw kʼoˆ taˍ ve hkʼe, dawˇ sha gawˬ lehˍ ve cawˬ tcuh ve kʼo, hkʼaˬ hkʼe hpehꞈ la tuˬ le?

¹⁸ Yaˬhoˉvaˬ lehˬ ngaˬ hui hkawehˉ ve htaꞈ tawˍ daꞈ gʼaˇ leh dawˇ sha gawˬ lehˍ ve cawˬ tcuh gaˇ ve yoˬ. Ngaˬ hui chi ve nyiˇ ceuˬ htaꞈ te tuˬ gʼa coˇ caˇ ve yoˬ. Awˬ lawn chi ve hkʼaw ngaˬ hui henˇ peuˬ ve hkʼa shuˍ, hkawehˉ ve cawˬ tuˬ te laˇ gʼa ve yoˬ. (Yaˍkoˆ 4:5) Miˬ guiˬ chi ngaˬ hui hkawehˉ ve chaw hpehꞈ tuˬ nyiˉ laˇ jaˇ. Yaꞈ hkʼaˇ, nyi ma nuˇ nehˬ ve, cawˬ taˍ ve htaꞈ nyi hkʼaˇ suh ve, leh awˬ bon uiˍ hkawˇ shiˍ ve kʼo, ngaˬ hui hkawehˉ ve maˇ cawˬ gʼa. Daꞈ ve te hkʼaˇ dawˇ hkʼaˇ leh dawˇ sha gawˬ lehˍ ve cawˬ tuˬ ngaˬ hui te gʼa ve yoˬ.—Yaˍkoˆ 3:17, 18 gʼaw sheˍ.