Liꞈ hpu htaꞈ chaˬ nyi paˍ kʼoˆ laˇ ve maw jaˇ˗oˬ ve, jawˇ mawˇ Beˍlaˍshaˍzaˍ Daˍyeˍlaˆ liꞈ hkʼaw kʼoˆ taˍ ve, awˬ tehˬ kʼo maˇ cawˬ jaw. (Daˍyeˍlaˆ 5:1) Beˍlaˍshaˍzaˍ a shaꞈ teꞈ chehˇ jaw ve tehꞈ mawˇ awˬ piˍ chaˬ nyi paˍ shaˉ hkiˆ cawˬ ve tehꞈ maˇ mawˬ jaw. Yaꞈ hkʼaˇ, 1854 hkʼawꞈ gaˬ leh awˬ suhˉ kʼawꞈ na gʼa la ve yoˬ.

Oˇ htaˇ Eˍgaˍlanˍ mvuhˇ miˬ awˬ tan te paˍ Jawnˍ Cawˆ Hteh˗leuˇ oˇ htaˇ teˇ co˗e ve Uˉraˆ venˇ hkʼaw kaw moˇ kawˍ aˍ kuiˬ teˇ kaˬ hkʼaw mawˇ awˬ piˍ hpfuhˆ mawˬ ve yoˬ. Kaw moˇ oˇ ve hkʼaw taꞈ yehˬ cawˬ leh taꞈ yehˬ hkʼaw jeꞈ baˉ laiˉ maˬ gʼa mawˬ ve yoˬ. Jeꞈ baˉ (10 cm) cawˬ leh liꞈ mehˆ htawˆ˗aˬ ve yoˬ. Teˇ maˬ hkʼaw Baˍbuˍlonˍ mvuhˇ miˬ ve jawˇ mawˇ Naˍboˍnaˍdaˆ leh yawˇ ve yaˇ paˍ uiˍ Beˍlaˍshaˍzaˍ co zuhˬ ha zuhˬ cawˬ piˇ kʼoˆ ve bon lawˬ hkawˇ cawˬ taˍ ve yoˬ. Chi htaꞈ pa taw, Beˍlaˍshaˍzaˍ a shaꞈ teꞈ chehˇ jaw ve tehꞈ chaˬ nyi tehˆ nyi paˍ gʼa haꞈ yuˬ ve yoˬ.

Yaꞈ hkʼaˇ, Liꞈ hpu hkʼaw kʼoˆ sheˍ ve, Beˍlaˍshaˍzaˍ jawˇ mawˇ kaꞈ hpehꞈ ve yoˬ. Liꞈ hpu htaꞈ chaˬ nyi paˍ awˬ lawn chi maˇ haꞈ yuˬ. Tawˇ pa haˉ te kʼo, aˬ laˬ hkʼe 1875 hkʼawꞈ htaˇ, Eˍgaˍlanˍ mvuhˇ miˬ chaˬ nyi tehˆ nyi paˍ Viˆliˇ˗an Htan˗bawꞈ kʼoˆ ve, “Be˗sa˗u˗seu [Beˍlaˍshaˍzaˍ] ve awˬ pa Naˍboˍnaˍdaˆ geh teˇ geh jawˇ mawˇ te jaw ve tehꞈ laiˉ gʼaˇ kʼoˆ ve. Yaꞈ hkʼaˇ, awˬ lawn chi shaˉ hkiˆ a ciˉ kaꞈ maˇ cawˬ.”

Yaꞈ hkʼaˇ, awˬ nu ve jeꞈ baˉ hkʼaw awˬ lawn chi kaꞈ kʼoˆ taˍ laˇ ve yoˬ. Oˇ kaˬ lo kʼoˆ ve, Beˍlaˍshaˍzaˍ ve awˬ pa Naˍboˍnaˍdaˆ venˇ lonˉ hkʼaw laiˉ hkʼawꞈ maˇ gʼa chehˇ ve yoˬ. Yawˇ maˇ chehˇ htaˇ hkʼaˬ hkʼe te ve le? Liꞈ kʼoˆ teˇ kʼoˆ hkʼaw kʼoˆ ve, “Naˍboˍnaˍdaˆ teˇ kaˬ kʼai htaˇ, Beˍlaˍshaˍzaˍ yawˇ awˬ tan jawˇ mawˇ te leh maꞈ moˍ htaꞈ kaꞈ nyi haꞈ shaˉ tcuh ve yoˬ.” Hkʼe te leh oˇ htaˇ, Beˍlaˍshaˍzaˍ awˬ pa geh jawˇ mawˇ te chehˇ ve hkʼa shuˍ hpehꞈ ve yoˬ. Chi htaꞈ pa taw, oˇ htaˇ ve chaˬ nyi tehˆ nyi paˍ leh chaw ceuˬ ve tawˇ hkawˇ chaˬ nyi paˍ A˗lan Miˆleuˍ kʼoˆ ve, “Daˍ yeˍlaˆ ve liꞈ hkʼaw Beˍlaˍshaˍzaˍ htaꞈ jawˇ mawˇ kuˬ ve cawˇ jaˇ.”

Awˬ tehˬ yoˬ. Gʼuiˬ sha ve kanˉ te ve chaw awˬ pon kʼo, Daˍ yeˍlaˆ ve liꞈ lehˬ Gʼuiˬ sha ve awˬ ha hpu dawˇ pawnˍ piˇ leh bvuhꞈ taˍ ve shiˍ ve ceh kaꞈ liꞈ chi hkʼaw ve hkʼa peu˗eˬ hkʼa dehꞈ yonˍ gʼa ve yoˬ.—2 Tiˆmoˉseˍ 3:16.