1. Nawˬ dawˇ haˍ dawˇ hkiˉ tuˬ aˬ htoꞈ ma te laˇ ve le? Leh dawˇ haˍ dawˇ hkiˉ ve ngaˬ hui htaꞈ heuˆ la kuiˬ hkʼaˬ hkʼe cawˬ ve le?

 Nawˬ dawˇ haˍ dawˇ hkiˉ jaw˗aw laˇ? * Shu kʼoˆ ve leh te ve htaꞈ pa taw, nawˬ dawˇ haˍ dawˇ hkiˉ ve yoˬ hehˉ. Nawˬ kʼoˆ ve leh te ve htaꞈ cawˬ ve yoˬ. Tawˇ pa haˉ te kʼo, nawˬ te yaꞈ leh Yaˬhoˉvaˬ nawˬ htaꞈ venˇ baˆ maˇ hpehꞈ laˇ taˍ tehꞈ dawˇ haˍ ve yoˬ hehˉ. Nawˬ dawˇ haˍ dawˇ hkiˉ jaˇ htaˇ, nawˬ yonˍ ve maˇ cawˬ leh maˇ daꞈ ve chaw hpehꞈ ve tehꞈ dawˇ la ve yoˬ. Yaꞈ hkʼaˇ, awˬ tehˬ awˬ na chi hkʼe hpehꞈ aw˗laˇ?

2. Ngaˬ hui dawˇ haˍ dawˇ hkiˉ htaˇ, Liꞈ hpu hkʼaw a shu ve awˬ lawn ngaˬ hui htaꞈ maˍ laˇ ve le?

² Liꞈ hpu hkʼaw ve awˬ lawn teˇ hpaˍ htaꞈ teˇ geh nyi sheˍ. Tcuh kaˍ paˍ Saˍmo˗eˍlaˆ ve awˬ e Haˍnaˆ yonˍ yeˬ jaˇ. Yaꞈ hkʼaˇ, yawˇ ve yehˬ kʼa hkʼaw ve chaw yawˇ htaꞈ maˇ daꞈ ve te piˇ ve pa taw, yawˇ dawˇ haˍ jaˇ. (1 Saˍmo˗eˍlaˆ 1:7) Tcuh yaˇ Pawˇluꞈ yonˍ yeˬ jaˇ. Yaꞈ hkʼaˇ, yawˇ ve nyi ma hkʼaw “Hkriꞈ yaˇ awˬ moˍ hkʼa peu˗eˬ awˬ pon dawˇ haˍ dawˇ hkiˉ” ve yoˬ. (2 Kawˇrenˍhtuˆ 11:28) Jawˇmawˇ Daˍviˆ yonˍ yeˬ jaˇ leh Yaˬhoˉvaˬ kaꞈ yawˇ htaꞈ haꞈ leh nyi hkʼaˇ suh jaˇ. (Tcuh yaˇ 13:22) Yaꞈ hkʼaˇ, Daˍviˆ venˇ baˆ uiˍ jaˇ ve htaꞈ te yaꞈ leh yawˇ dawˇ haˍ jaˇ. (Chiˇ mvuh ve 38:4) Yaˬhoˉvaˬ ve kanˉ te ve chaw 3 gʼaˇ nyi ma sha la tuˬ yawˇ ga piˇ ve yoˬ. Awˬ lawn chi ve teˇ hpaˍ ngaˬ hui htaꞈ hkʼaˬ hkʼe maˍ laˇ ve teˇ geh nyi sheˍ.

3. Chaw teˇ hpaˍ hpaˍ ve tawˇ ngaˬ hui dawˇ haˍ tuˬ hkʼaˬ hkʼe te laˇ ve le?

³ Shu kʼoˆ ve leh ngaˬ hui htaꞈ maˇ daꞈ ve te laˇ htaˇ, dawˇ haˍ ve yoˬ. Awˬ chawˇ meuˆ daꞈ jaˇ ve maˇ heˆ leh awˬ viˉ awˬ nyi hpehꞈ ve  kʼo nyi ma naˬ jaˇ. Oˇ ve teˇ gʼaˇ geh meuˆ daꞈ ve luˬ kʼai la ve htaꞈ kawˆ ve pa taw, dawˇ haˍ dawˇ hkiˉ ve yoˬ. Teˇ pawˆ pawˆ kʼo, maˇ dawˇ nyi leh yaw laˇ ve tawˇ lehˬ aˉ htaw juˆ laˇ ve hkʼe hpehꞈ ve yoˬ! (Tawˇ naˉ ve 12:18) Teˇ pawˆ pawˆ kʼo, dawˇ taˍ leh tawˇ yaw laˇ ve chaw lehˬ ngaˬ hui nyi ma naˬ jaˇ tuˬ te laˇ ve yoˬ. Awˬ viˉ awˬ nyi yaˇ nehˬ teˇ gʼaˇ chi hkʼe gʼa hpuˇ jaw ve yoˬ. Yawˇ kʼoˆ ve, “ponˬ taˉ ve 2-3 hkʼawꞈ htaˇ ngaˬ awˬ chawˇ meuˆ daꞈ jaˇ ve in˗teu˗neꞈ hkʼaw maˇ heˆ heˆ ve bvuhꞈ keu laˇ leh ngaˬ nyi ma naˬ leh dawˇ haˍ jaˇ. Aˬ htoꞈ ma te yawˇ chi hkʼe te laˇ ve naˍ ngaˬ maˇ dawˇ nyi jaw.” Nawˬ awˬ chawˇ meuˆ daꞈ jaˇ ve maˇ heˆ leh awˬ viˉ awˬ nyi nawˬ nyi ma naˬ tuˬ te laˇ htaˇ, Haˍnaˆ ve awˬ lawn htaꞈ henˇ yuˬ gʼa ve yoˬ.

4. Haˍnaˆ tuꞈ hkanˍ jaˇ ve aˬ htoꞈ ma gʼa hpuˇ ve le?

⁴ Haˍnaˆ laiˉ hkʼawꞈ yaˇ maˇ cawˬ gʼa ve pa taw, yawˇ tuꞈ hkanˍ jaˇ. (1 Saˍmo˗eˍlaˆ 1:2) Iˉsaˍreˍlaˆ chaw hui ve chaw liˇ vaˇ liˇ kʼo a shu teˇ gʼaˇ chaw meh ma hpehꞈ ve kʼo, hkeu piˇ taˍ ve htaꞈ gʼa hkanˍ ve tehꞈ hpeuꞈ maw laˇ ve yoˬ. Chi Haˍnaˆ yaꞈ taw jaˇ. (Awˬ hkuiˉ puiˍ 30:1, 2) Chi hkʼoˆ kaꞈ, Peˍniˇnaˆ yaˇ cawˬ gʼa ve pa taw, Haˍnaˆ tuꞈ hkanˍ jaˇ tuˬ te piˇ ve yoˬ. Peˍniˇnaˆ lehˬ Haˍnaˆ htaꞈ canˇ paˍ hkʼe shawˍ leh “maˇ shawˍ maˇ caˆ te piˇ ve yoˬ.” (1 Saˍmo˗eˍlaˆ 1:6) Awˉ lawˉ htaˇ Haˍnaˆ dawˇ haˍ jaˇ leh haꞈ yuˬ maˇ gʼa. Yawˇ nyi ma luˬ leh “dawˇ haˍ jaˇ.” Yawˇ “maˇ caˇ maˇ dawˬ leh hawˬ chehˇ ve yoˬ.” (1 Saˍmo˗eˍlaˆ 1:7, 10) Yawˇ nyi ma sha la tuˬ aˬ htoꞈ ma ga piˇ ve le?

5. Bon lawˬ ve lehˬ Haˍnaˆ htaꞈ hkʼaˬ hkʼe ga piˇ ve le?

⁵ Haˍnaˆ nyi ma hkʼaw cawˬ ve Yaˬhoˉvaˬ geh bon lawˬ ve hkʼaw kʼoˆ piˇ peuˬ hkʼawꞈ nawˉ, paw hkuˇ Eˇliˆ htaꞈ kaꞈ kʼoˆ piˇ ve yoˬ. Eˇliˆ yawˇ htaꞈ kʼoˆ piˇ ve, “gawˬ lehˍ ve hkʼaw kʼoꞈ˗e loˬ. Iˉsaˍreˍlaˆ ve Gʼuiˬ sha lehˬ nawˬ lawˬ ve hkʼe awˬ bon naꞈ laˇ piˇ˗oˆ.” Haˍnaˆ “caˇ tuˬ kʼawꞈ caˇ ve yoˬ. Chi teˇ pawˆ yawˇ lehˬ maˇ kʼawꞈ dawˇ haˍ˗o.” (1 Saˍmo˗eˍlaˆ 1:17, 18) Bon lawˬ ve lehˬ Haˍnaˆ nyi ma gawˬ lehˍ cawˬ la tuˬ ga piˇ ve yoˬ.

6. Haˍnaˆ ve awˬ lawn leh Hpiˇliˇpiˆ liꞈ 4:6, 7 hkʼaw bon lawˬ ve htaꞈ caˉ daꞈ ve ngaˬ hui htaꞈ hkʼaˬ hkʼe maˍ laˇ ve le?

⁶ Hkʼaˬ htaˆ kaꞈ bon lawˬ ve kʼo, ngaˬ hui nyi ma gawˬ lehˍ cawˬ tuˬ yoˬ. Haˍnaˆ mvuhˇ naw ma hkʼoˆ ve Awˬ pa geh maw chaweh bon lawˬ ve yoˬ. (1 Saˍmo˗eˍlaˆ 1:12) Ngaˬ hui dawˇ haˍ ve, kawˆ ve, awˬ gʼaˇ nuˇ kuiˬ Yaˬhoˉvaˬ geh maw chaweh bon lawˬ ve hkʼaw kʼoˆ piˇ gʼa ve yoˬ. Tawˇ hkawˇ tcuhˉ kuiˬ naˉ leh cawˇ ve htaꞈ yaw tuˬ maˇ loˍ. Teˇ pawˆ pawˆ ngaˬ hui dawˇ haˍ leh gʼaˇ hteꞈ hawˬ ve  pa taw, ngaˬ hui lawˬ ve hkawˇ Gʼuiˬ sha nyi bawˬ leh maˇ na laˇ ve maˇ heˆ. Ngaˬ hui gʼa hpuˇ ve htaꞈ caˉ daꞈ ve bon lawˬ ve awˬ hkʼoˆ kaꞈ Hpiˇliˇpiˆ liꞈ 4:6, 7 hkʼaw kʼoˆ taˍ ve htaꞈ ngaˬ hui maˇ leunˇ cawˇ. (Gʼaw sheˍ.) Chi ve teˇ tawn hkʼaw ngaˬ hui bon lawˬ htaˇ, awˬ bon uiˍ hkawˇ kʼoˆ piˇ tuˬ Pawˇluꞈ maˍ laˇ ve yoˬ. Yaˬhoˉvaˬ htaꞈ awˬ bon uiˍ hkawˇ kʼoˆ piˇ tuˬ laiˉ hkʼaˇ cawˬ ve yoˬ. A shaꞈ teꞈ ve, yawˇ hpanˍ taˍ ve daꞈ jaˇ ve, haꞈ pehnˇ ve leh ngaˬ hui htaꞈ daꞈ jaˇ ve dawˇ law kuiˬ peꞈ laˇ gʼa ve awˬ bon uiˍ jaˇ kʼoˆ piˇ gʼa ve yoˬ. Yaꞈ hkʼaˇ, Haˍnaˆ ve awˬ lawn ngaˬ hui htaꞈ aˬ htoꞈ ma maˍ laˇ sheˍ ve le?

7. Haˍnaˆ leh awˬ hpawˇ hkʼaˬ htaˆ kaꞈ aˬ htoꞈ ma te ve le?

⁷ Haˍnaˆ shoꞈ shaꞈ ve htawˇ, Yaˬhoˉvaˬ htaꞈ hkʼaˬ htaˆ kaꞈ oˉ kʼoˍ pui tuˬ yawˇ ve awˬ hpawˇ geh Shiˍlonˍ venˇ lo kʼai ve yoˬ. (1 Saˍmo˗eˍlaˆ 1:1-5) Awˬ tehˬ kʼoˆ, paw hkuˇ Eˇliˆ Haˍnaˆ htaꞈ awˬ gʼaˇ piˇ leh Yaˬhoˉvaˬ nawˬ ve bon lawˬ hkawˇ htaꞈ hkʼawꞈ laˇ tuˬ yoˬ tehꞈ dawˇ law kuiˬ kʼoˆ piˇ htaˇ, Haˍnaˆ kaꞈ daꞈ kehˬ ve aˉ po kʼo hkʼaw chehˇ sheˍ.—1 Saˍmo˗eˍlaˆ 1:9, 17.

8. Hpawnˬ daꞈ˗e ve ngaˬ hui htaꞈ hkʼaˬ hkʼe ga laˇ ve le? Kʼoˆ maˍ laˇ sheˍ.

⁸ Ngaˬ hui hkʼaˬ htaˆ kaꞈ hpawnˬ daꞈ˗e ve kʼo, nyi ma gawˬ lehˍ cawˬ tuˬ yoˬ. Hpawnˬ daꞈ htaˇ awˉ lawˉ bon lawˬ ve lehˬ daꞈ kehˬ ve awˬ ha hpu hpawnˬ daꞈ la ve chaw geh chehˇ tuˬ lawˬ ve yoˬ. Dawˇ sha gawˬ lehˍ ve lehˬ nyi ma sha tuˬ te laˇ ve awˬ ha hpu ve awˬ shiˍ nawꞈ ve hkʼaw teˇ maˬ hpehꞈ ve yoˬ. (Gaˍlaˍtiˆ 5:22) Ngaˬ hui dawˇ haˍ jaˇ ve htawˇ, hpawnˬ daꞈ˗e ve kʼo, nyi ma gawˬ lehˍ cawˬ la leh awˬ gʼaˇ gʼa tuˬ Yaˬhoˉvaˬ leh awˬ viˉ awˬ nyi ga laˇ tuˬ ve awˬ hkʼaˇ cawˬ ve yoˬ. Yaˬhoˉvaˬ ngaˬ hui nyi ma sha la tuˬ ga laˇ ve awˬ hkʼaˇ lehˬ bon lawˬ ve leh hpawnˬ daꞈ˗e ve chi a yeˇ uiˍ jaˇ. (Heˍbrehˇ 10:24, 25) Yaꞈ hkʼaˇ, Haˍnaˆ ve awˬ lawn ngaˬ hui htaꞈ maˍ laˇ gʼa sheˍ.

9. Haˍnaˆ aˬ htoꞈ ma gʼa kʼawꞈ hpuˇ sheˍ ve le? Yaꞈ hkʼaˇ, yawˇ pa gʼa ve aˬ htoꞈ ma cawˬ ve le?

⁹ Haˍnaˆ dawˇ haˍ jaˇ ve laꞈ haˉ peuˬ˗e ve maˇ heˆ. Daꞈ kehˬ ve aˉ po kʼo hkʼaw oˉ kʼoˍ pui˗e ve kʼawꞈ la˗oˬ htaˇ, yawˇ Peˍniˇnaˆ geh gʼa chehˇ sheˍ. Peˍniˇnaˆ pa maˇ pa ve Liꞈ hpu hkʼaw maˇ kʼoˆ laˇ taˍ. Chi htaꞈ pa taw Peˍniˇnaˆ kʼoˆ guiˇ piˇ ve htaꞈ Haˍnaˆ gʼa hkanˍ sheˍ ve yoˬ hehˉ. Yaꞈ hkʼaˇ Haˍnaˆ nyi ma gawˬ lehˍ cawˬ˗oˬ. Yawˇ shoꞈ shaꞈ ve awˬ lawn Yaˬhoˉvaˬ htaꞈ kʼoˆ piˇ˗oˬ leh yawˇ ve bon lawˬ hkawˇ Yaˬhoˉvaˬ na laˇ ve tehꞈ yonˍ gʼa˗oˬ htaˇ, yawˇ maˇ dawˇ haˍ˗o leh nyi ma gawˬ lehˍ cawˬ la ve yoˬ. Yawˇ nyi ma sha la tuˬ Yaˬhoˉvaˬ ga laˇ tcuh ve yoˬ. Peuꞈ hkʼawꞈ nawˉ, yawˇ ve bon lawˬ hkawˇ htaꞈ Yaˬhoˉvaˬ hkʼawꞈ piˇ leh yaˇ laiˉ gʼaˇ cawˬ la ve yoˬ!—1 Saˍmo˗eˍlaˆ 1:19, 20; 2:21.

10. Haˍnaˆ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

¹⁰ Ngaˬ hui ve shoꞈ shaꞈ ve maˇ peuˬ ve htawˇ, nyi ma gawˬ lehˍ cawˬ la gʼa tuˬ yoˬ. Ngaˬ hui hkʼaˬ htaˆ kaꞈ bon lawˬ leh hpawnˬ daꞈ˗e ve htawˇ, shoꞈ shaꞈ ve teˇ ceuˬ ceuˬ cawˬ sheˍ. Yaꞈ hkʼaˇ, Haˍnaˆ ve awˬ lawn ngaˬ hui htaꞈ maˍ laˇ ve, Yaˬhoˉvaˬ ngaˬ hui nyi ma sha la tuˬ ga laˇ ve teˇ ceuˬ kaꞈ tawˍ piˇ maˇ gʼa. Ngaˬ hui Yaˬhoˉvaˬ htaꞈ ka tiꞈ yeˬ ve kʼo, maˇ maw ve awˬ yanˇ yawˇ ngaˬ hui htaꞈ laꞈ shawnˍ peꞈ laˇ tuˬ yawˇ maˇ leunˇ.—Heˍbrehˇ 11:6.

11. Pawˇluꞈ dawˇ haˍ dawˇ hkiˉ tuˬ aˬ htoꞈ ma te piˇ ve le?

¹¹ Pawˇluꞈ dawˇ haˍ dawˇ hkiˉ tuˬ laiˉ lawn cawˬ ve yoˬ. Awˬ viˉ awˬ nyi shoꞈ shaꞈ ve gʼa hpuˇ ve htaꞈ Pawˇluꞈ shiˍ htaˇ, dawˇ haˍ jaˇ. (2 Kawˇrenˍhtuˆ 2:4; 11:28) Pawˇluꞈ tcuh yaˇ hpehꞈ leh tawˍ taˍ paˍ Pawˇluꞈ htaꞈ jawꞈ piˇ leh htawnˍ hkʼaw yuˬ keu piˇ ve yoˬ. Chi hkʼoˆ kaꞈ, haˍ gʼawˇ htaˇ yawˇ tuꞈ hkanˍ ve laiˉ ceuˬ gʼa yeunˇ hkanˍ ve yoˬ. Chi yawˇ dawˇ haˍ dawˇ hkiˉ jaˇ tuˬ te piˇ ve yoˬ. (Hpiˇliˇpiˆ 4:12)  Pawˇluꞈ Gʼuiˬ sha ve kanˉ te htaˇ, haw loꞈ kʼoˍ luˬ kʼai ve 3 pawˆ gʼa hpuˇ ve yoˬ. Haw loꞈ kʼoˍ gʼa kʼawꞈ ciˇ kʼai ve kʼo, hkʼaˬ hkʼe taw dawˇ haˍ ve htaꞈ dawˇ nyi sheˍ. (2 Kawˇrenˍhtuˆ 11:23-27) Pawˇluꞈ htaꞈ aˬ htoꞈ ma ga piˇ ve le?

12. Pawˇluꞈ hkʼe taw maˇ dawˇ haˍ tuˬ aˬ htoꞈ ma ga piˇ ve le?

¹² Awˬ viˉ awˬ nyi shoꞈ shaꞈ ve gʼa hpuˇ ve pa taw, Pawˇluꞈ dawˇ haˍ ve yoˬ. Awˬ viˉ awˬ nyi shoꞈ shaꞈ ve gʼa hpuˇ ve htaꞈ Pawˇluꞈ yawˇ hkʼaˇ yawˇ maˇ gu. Yawˇ nyi ma nuˇ nehˬ leh teˇ ceuˬ le le yawˇ tiˉ te maˇ gʼa ve tehꞈ shiˍ ve yoˬ. Hkriꞈ yaˇ awˬ moˍ oˇ ve htaꞈ awˬ viˉ awˬ nyi ga nyi haꞈ shaˉ laˇ tuˬ yawˇ lawˬ ve yoˬ. Yonˍ gʼa ve chaw Tiˆmoˉseˍ leh Tiˇtuˆ ga laˇ tcuh ve yoˬ. Yawˇ huiˉ maˬ ga piˇ ve pa taw, Pawˇluꞈ hkʼe taw maˇ dawˇ haˍ˗oˬ.—Hpiˇliˇpiˆ 2:19, 20; Tiˇtuˆ 1:1, 4, 5.

13. Nyi haꞈ shaˉ paˍ Pawˇluꞈ htaꞈ hkʼaˬ hkʼe henˇ yuˬ gʼa tuˬ le?

¹³ Shu ga laˇ tcuh sheˍ. Hkriꞈ yaˇ awˬ moˍ hkʼaw awˬ viˉ awˬ nyi shoꞈ shaꞈ ve gʼa hpuˇ htaˇ, Pawˇluꞈ hkʼa shuˍ nyi haꞈ shaˉ paˍ lehˬ awˬ viˉ awˬ nyi awˬ pon dawˇ haˍ ve yoˬ. Yaꞈ hkʼaˇ, nyi haꞈ shaˉ paˍ teˇ gʼaˇ ceh tiˉ kʼo, Hkriꞈ yaˇ awˬ moˍ hkʼaw ve chaw hkʼa peu˗eˬ htaꞈ nyi haꞈ shaˉ maˇ gʼa. Yawˇ nyi ma nuˇ nehˬ leh yawˇ teˇ gʼaˇ tiˉ te maˇ gʼa ve tehꞈ haꞈ yuˬ ve kʼo, awˬ vuiˬ te keunˍ ve chaw htaꞈ kaꞈ te tcuh leh yaˇ nehˬ teˇ hpaˍ Gʼuiˬ sha ve yawˬ htaꞈ nyi haꞈ shaˉ tuˬ maˍ piˇ ve yoˬ.—2 Tiˆmoˉseˍ 2:2.

14. Pawˇluꞈ aˬ htoꞈ ma htaꞈ maˇ kawˆ ve le? Leh yawˇ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

¹⁴ Nawˬ awˬ gʼaˇ gʼa tuˬ loˍ ve tehꞈ haꞈ yuˬ she. Pawˇluꞈ nyi ma nuˇ nehˬ leh awˬ chawˇ geh awˬ gʼaˇ gʼa tuˬ loˍ ve tehꞈ yawˇ shiˍ ve yoˬ. Awˬ chawˇ ga laˇ ve htaꞈ yawˇ haꞈ yuˬ htaˇ, awˬ gʼaˇ nuˇ ve tehꞈ shu kʼoˆ ve htaꞈ yawˇ maˇ kawˆ ve hkʼa tawˍ lehˆ gʼa mawˬ ve yoˬ. Yawˇ Hpiˇleˍmonˍ htaꞈ liꞈ bvuhꞈ piˇ ve, “nawˬ ve haꞈ pehnˇ ve htaꞈ pa taw, ngaˬ ha lehˬ dawˇ sha jaˇ.” (Hpiˇleˍmonˍ 7) Pawˇluꞈ dawˇ haˍ htaˇ yawˇ htaꞈ ga laˇ gʼa ve, Gʼuiˬ sha ve kanˉ teˇ geh te ve awˬ chawˇ laiˉ gʼaˇ ve awˬ lawn kʼoˆ ve yoˬ. (Kawˇlawˇsehˇ 4:7-11) Ngaˬ hui nyi ma nuˇ nehˬ leh awˬ gʼaˇ gʼa tuˬ loˍ ve tehꞈ haꞈ yuˬ htaˇ, awˬ viˉ awˬ nyi kaꞈ ngaˬ hui htaꞈ ga laˇ ve ha lehˬ ve yoˬ.

15. Pawˇluꞈ yawˇ dawˇ haˍ jaˇ htaˇ aˬ htoꞈ ma te ve le?

¹⁵ Gʼuiˬ sha ve tawˇ hkawˇ htaꞈ gʼaˇ va sheˍ. Pawˇluꞈ awˬ gʼaˇ gʼa tuˬ Liꞈ hpu ga laˇ gʼa ve tehꞈ shiˍ ve yoˬ. (Roˉmaꞈ 15:4) Teˇ ceuˬ le le htaꞈ haꞈ yuˬ gʼa tuˬ Liꞈ hpu lehˬ cuˇ yiˍ peꞈ laˇ gʼa ve yoˬ. (2 Tiˆmoˉseˍ 3:15, 16) Pawˇluꞈ Roˉmaꞈ venˇ htawnˍ hkʼaw lo nyiˇ pawˆ teˇ pawˆ gʼa chehˇ htaˇ, yawˇ gʼa suh la paˇ neˇ ve tehꞈ shiˍ ve yoˬ. Dawˇ haˍ ve htaꞈ  haꞈ yuˬ gʼa tuˬ yawˇ hkʼaˬ hkʼe te ve le? Tiˆmoˉseˍ haˆ haˆ laˬ leh “shaˍ guiˬ kʼuˉ htaꞈ bvuhꞈ taˍ ve liꞈ teˇ hpaˍ” yuˬ veu˗oˆ tehꞈ kʼoˆ piˇ ve yoˬ. (2 Tiˆmoˉseˍ 4:6, 7, 9, 13) Aˬ htoꞈ ma pa taw le? Liꞈ daw chi ve hkʼaw Heˍbrehˇ ve tawˇ hkawˇ Liꞈ hpu awˬ tawn bvuhꞈ taˍ ve pa taw, yawˇ hkʼaˇ yawˇ Liꞈ hpu henˇ gʼa ve yoˬ. Ngaˬ hui Pawˇluꞈ htaꞈ henˇ yuˬ leh a shu yawˇ hkʼaˇ yawˇ hkʼaˬ htaˆ kaꞈ Liꞈ hpu henˇ ve kʼo, aˬ htoꞈ ma gʼa hpuˇ ve htawˇ nyi ma sha la tuˬ, Yaˬhoˉvaˬ Liꞈ hpu htaꞈ cuˇ leh ga laˇ tuˬ yoˬ.

16. Daˍviˆ venˇ baˆ uiˍ jaˇ ve htaꞈ te yaꞈ peuˬ hkʼawꞈ nawˉ hkʼaˬ hkʼe te ve le?

¹⁶ Daˍviˆ venˇ baˆ uiˍ jaˇ ve htaꞈ te yaꞈ ve yoˬ. Yawˇ Baˍtaˍsheˍbaˆ htaꞈ haˉ chawˇ te ve, awˬ hpawˇ htaꞈ kaꞈ tiˇ pehˍ tuˬ awˬ hkʼaˇ gu ve, leh yawˇ te yaꞈ ve htaꞈ faˉ taˍ ve yoˬ. (2 Saˍmo˗eˍlaˆ 12:9) Awˉ lawˉ htaˇ Daˍviˆ yawˇ te yaꞈ ve htaꞈ a yeˇ maˇ te. Chi yawˇ Yaˬhoˉvaˬ geh maˇ meuˆ daꞈ˗o. Yawˇ awˬ to kaꞈ naˬ leh nyi ma hkʼaw kaꞈ dawˇ haˍ jaˇ. (Chiˇ mvuh ve 32:3, 4) Yawˇ te yaꞈ ve htaꞈ pa taw, Daˍviˆ dawˇ haˍ ve htaꞈ haꞈ yuˬ gʼa tuˬ aˬ htoꞈ ma ga piˇ ve le? Ngaˬ hui venˇ baˆ uiˍ jaˇ ve htaꞈ te yaꞈ ve kʼo, aˬ htoꞈ ma ga laˇ ve le?

17. Daˍviˆ awˬ tehˬ awˬ na venˇ baˆ dawˇ hpfuhˆ ve tehꞈ Chiˇ mvuh ve liꞈ 51:1-4 hkʼaw hkʼaˬ hkʼe hpeuꞈ maw laˇ ve le?

¹⁷ Gʼuiˬ sha venˇ baˆ hpehˇ laˇ tuˬ bon lawˬ sheˍ. Daˍviˆ Yaˬhoˉvaˬ geh kʼawꞈ kʼawꞈ˗e tuˬ bon lawˬ ve yoˬ. Yawˇ awˬ tehˬ awˬ na venˇ baˆ dawˇ hpfuhˆ leh te yaꞈ ve htaꞈ haꞈ yuˬ ve yoˬ. (Chiˇ mvuh ve 51:1-4 gʼaw sheˍ.) Awˬ leh meuˇ htaˇ yawˇ nyi ma gawˬ lehˍ cawˬ leh ha lehˬ gʼa ve yoˬ! (Chiˇ mvuh ve 32:1, 2, 4, 5) Nawˬ venˇ baˆ uiˍ jaˇ ve htaꞈ te yaꞈ ve kʼo, taˇ faˉ taˍ. Yaꞈ hkʼaˇ, nawˬ te yaꞈ ve hkʼa peu˗eˬ Yaˬhoˉvaˬ geh bon lawˬ ve hkʼaw kʼoˆ piˇ sheˍ. Nawˬ chi hkʼe te ve kʼo, maˇ dawˇ haˍ˗o. Yaꞈ hkʼaˇ, nawˬ Yaˬhoˉvaˬ geh awˉ lawˉ htaˇ hkʼe kʼawꞈ meuˆ daꞈ gaˇ ve kʼo, nawˬ te gʼa hkʼe teˇ ceuˬ le le gʼa te ve yoˬ.

18. Daˍviˆ maˍ piˇ ve htaꞈ hkʼaˬ hkʼe haꞈ yuˬ ve le?

¹⁸ Maˍ laˇ ve htaꞈ haꞈ yuˬ sheˍ. Daˍviˆ te yaꞈ ve htaꞈ Yaˬhoˉvaˬ tcuh kaˍ paˍ Naˍtanˍ htaꞈ cuˇ leh ca kʼoˆ piˇ tcuh htaˇ, Daˍviˆ maˇ gʼa te yaꞈ tehꞈ maˇ kʼoˆ leh te yaꞈ ve htaꞈ maˇ faˉ taˍ. Yawˇ te yaꞈ ve tehꞈ laꞈ haˉ haꞈ yuˬ ve yoˬ. Baˍtaˍsheˍbaˆ ve awˬ hpawˇ htaꞈ ceh te yaꞈ ve maˇ heˆ. Chi aꞈ kehˉ te yaꞈ jaˇ ve lehˬ Gʼuiˬ sha htaꞈ yoˬ. Daˍviˆ Yaˬhoˉvaˬ maˍ piˇ ve htaꞈ haꞈ yuˬ leh Yaˬhoˉvaˬ yawˇ htaꞈ venˇ baˆ hpehˇ piˇ ve yoˬ. (2 Saˍmo˗eˍlaˆ 12:10-14) Ngaˬ hui venˇ baˆ  uiˍ jaˇ ve htaꞈ te yaꞈ ve kʼo, ngaˬ hui htaꞈ nyi haꞈ shaˉ laˇ tuˬ Yaˬhoˉvaˬ leuˆ teh taˍ ve chaw geh ca yaw daꞈ˗e cawˇ ve yoˬ. (Yaˍkoˆ 5:14, 15) Chi hkʼoˆ kaꞈ, ngaˬ hui maˇ gʼa te yaꞈ tehꞈ maˇ kʼoˆ cawˇ. Ngaˬ hui maˍ laˇ ve htaꞈ haꞈ yuˬ leh laꞈ haˉ dawˇ hpfuhˆ ve kʼo, nyi ma gawˬ lehˍ cawˬ leh ha lehˬ tuˬ yoˬ.

19. Ngaˬ hui aˬ htoꞈ ma te tuˬ dawˇ teh taˍ cawˇ ve le?

¹⁹ Maˇ kʼawꞈ te yaꞈ tuˬ dawˇ teh taˍ sheˍ. Jawˇmawˇ Daˍviˆ maˇ kʼawꞈ te yaꞈ tuˬ Yaˬhoˉvaˬ gʼa ga laˇ tcuh ve yoˬ. (Chiˇ mvuh ve 51:7, 10, 12) Yaˬhoˉvaˬ venˇ baˆ hpehˇ piˇ peuˬ hkʼawꞈ mawˉ, Daˍviˆ maˇ daꞈ ve htaꞈ maˇ kʼawꞈ dawˇ nyi˗o. Chi yawˇ nyi ma gawˬ lehˍ kʼawꞈ cawˬ tuˬ te piˇ ve yoˬ.

20. Yaˬhoˉvaˬ venˇ baˆ hpehˇ laˇ ve htaꞈ ngaˬ hui awˬ hpfuhˇ shiˍ ve tehꞈ hkʼaˬ hkʼe hpeuꞈ maw piˇ gʼa ve le?

²⁰ Yaˬhoˉvaˬ venˇ baˆ hpehˇ laˇ tuˬ bon lawˬ ve, maˍ laˇ ve htaꞈ haꞈ yuˬ ve, leh maˇ kʼawꞈ te yaꞈ tuˬ Yaˬhoˉvaˬ venˇ baˆ hpehˇ laˇ ve htaꞈ awˬ hpfuhˇ shiˍ ve tehꞈ hpeuꞈ maw piˇ ve yoˬ. Chi hkʼe te ve lehˬ ngaˬ hui nyi ma gawˬ lehˍ cawˬ tuˬ ga laˇ ve yoˬ. Yaˍkoˆ venˇ baˆ uiˍ jaˇ ve htaꞈ te yaꞈ leh chi awˬ tehˬ hpehꞈ ve tehꞈ haꞈ yuˬ ve yoˬ. Yawˇ kʼoˆ ve, “nyi haꞈ shaˉ paˍ htaꞈ kʼoˆ maˍ piˇ htaˇ nyi ma hkʼaw, hkʼaw pui lonˉ yuˬ baˬ laˇ ve hkʼe hpehꞈ leh ngaˬ nyi ma gawˬ lehˍ kʼawꞈ cawˬ la ve yoˬ.” Ngaˬ hui ve “Gʼuiˬ sha lehˬ nyi ma luˬ chehˇ ve chaw hui awˬ paˇ neˇ lo chehˇ taˍ ve yoˬ. Dawˇ law kuiˬ maˇ cawˬ ve chaw hui htaꞈ yawˇ ponˬ piˇ tuˬ yoˬ.” Chi awˬ gʼaˇ gʼa jaˇ!—Chiˇ mvuh ve 34:18.

21. Ngaˬ hui nyi ma sha la tuˬ Yaˬhoˉvaˬ htaꞈ hkʼaˬ hkʼe ga laˇ tcuh gʼa ve le?

²¹ Awˬ leh meuˇ gaˬ la paˇ neˇ htaˇ, ngaˬ hui dawˇ haˍ dawˇ hkiˉ tuˬ gʼa hpuˇ maˇ jaˇ. Nawˬ dawˇ haˍ ve kʼo, Yaˬhoˉvaˬ ga laˇ tuˬ haˆ lawˬ sheˍ. Hkʼaˬ htaˆ kaꞈ Liꞈ hpu henˇ sheˍ. Haˍnaˆ, Pawˇluꞈ, leh Daˍviˆ ve awˬ lawn htaꞈ henˇ yuˬ sheˍ. Hkʼaˬ hkʼe gʼa hpuˇ ve awˬ lawn htaꞈ shiˍ tuˬ leh aˬ htoꞈ ma te nawˬ dawˇ haˍ ve htaꞈ na gʼa tuˬ, mvuhˇ naw ma hkʼoˆ chehˇ ve Awˬ pa Yaˬhoˉvaˬ ga laˇ tuˬ lawˬ sheˍ. (Chiˇ mvuh ve 139:23) Nawˬ gu maˇ gʼa ve awˬ lawn Yaˬhoˉvaˬ ga laˇ tcuh sheˍ. Chi hkʼe te ve kʼo chiˇ mvuh ve liꞈ bvuhꞈ paˍ Yaˬhoˉvaˬ htaꞈ kʼa muiˬ hkawˇ kʼa chiˇ mvuh leh kʼoˆ ve, “ngaˬ dawˇ haˍ leh nyi ma luˬ chehˇ ve teˇ yanˇ, nawˬ ngaˬ htaꞈ dawˇ sha laˇ leh, ha lehˬ tcuh laˇ ve yoˬ.”—Chiˇ mvuh ve 94:19.