1. Ngaˬ hui ve a shaꞈ lehˬ Yaˬhoˉvaˬ awˬ pon kʼo, awˬ hpfuhˇ hkʼaˬ hkʼe taw hkʼaˆ ve le?

 Tawˇ pa haˉ te kʼo, awˬ chawˇ teˇ gʼaˇ awˬ han kuˉ piˍ jaˇ˗oˬ leh awˬ hpfuhˇ hkʼaˆ jaˇ ve nawˬ htaꞈ peꞈ laˇ ve yoˬ. Awˬ han kuˉ chi ve lehˬ awˬ sheuˉ hkʼa dehꞈ maˇ daꞈ˗oˬ leh awˬ kuiˉ cawˬ ve htawˇ chi ve lehˬ awˬ hpfuhˇ laiˉ chi lanˬ hpfuhˇ cawˬ ve yoˬ. Nawˬ awˬ han chi ve htaꞈ hkʼa dehꞈ nyi haꞈ shaˉ leh awˬ chawˇ chi ve teˇ gʼaˇ htaꞈ awˬ bon uiˍ jaˇ tehꞈ kʼoˆ piˇ ve yoˬ. Chi ve hkʼa shuˍ shuˍ ngaˬ hui ve a shaꞈ lehˬ Yaˬhoˉvaˬ geh gʼa ve laꞈ shawnˍ hkʼe hpehꞈ ve yoˬ. Ngaˬ hui ve a shaꞈ lehˬ Gʼuiˬ sha awˬ pon awˬ hpfuhˇ hkʼaˆ jaˇ ve yoˬ. Hkʼe te leh, yawˇ ve Yaˇ paˍ teˇ gʼaˇ tiˉ cawˬ ve htawˇ ngaˬ hui awˬ pon htaiˍ hkʼawꞈ laˇ tcuh ve yoˬ.—Yoˇhanˬ 3:16.

2. 2 Kawˇrenˍhtuˆ liꞈ 7:1 hkʼaw kʼoˆ taˍ ve hkʼe, Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve le?

² Yaˬhoˉvaˬ lehˬ a shaꞈ teꞈ ve awˬ hkuiˉ puiˍ hpehꞈ ve yoˬ. (Chiˇ mvuh ve 36:9) Tcuh yaˇ Pawˇluꞈ kʼoˆ ve, “yawˇ htaꞈ pa taw ngaˬ hui teꞈ chehˇ ve, hiˆ hiˆ naˇ naˇ te chehˇ ve” tehꞈ yawˇ shawˍ ve yoˬ. (Tcuh yaˇ 17:25, 28) Hkʼe te leh, ngaˬ hui kʼoˆ gʼa ve ngaˬ hui ve a shaꞈ lehˬ Yaˬhoˉvaˬ geh gʼa ve laꞈ shawnˍ hpehꞈ ve yoˬ. Chi hkʼoˆ kaꞈ, Gʼuiˬ sha ngaˬ hui htaꞈ haꞈ jaˇ leh ngaˬ hui a shaꞈ teꞈ chehˇ gʼa tuˬ loˍ ve teˇ ceuˬ le le yawˇ peꞈ laˇ ve yoˬ. (Tcuh yaˇ 14:15-17) Yaꞈ hkʼaˇ, Yaˬhoˉvaˬ lehˬ anˇ tuˬ te leh chi teˇ hkui ngaˬ hui htaꞈ haꞈ shaˉ laˇ ve maˇ heˆ. Yawˇ anˇ tuˬ te leh maˇ haꞈ shaˉ laˇ ve htawˇ, ngaˬ hui a shu yawˇ awˬ to chehˇ sha cawˬ sha hpawˇ hkʼa dehꞈ nyi haꞈ shaˉ tcuh gaˇ leh yawˇ ve kanˉ caˉ leh te tcuh gaˇ ve yoˬ. (2 Kawˇrenˍhtuˆ 7:1 gʼaw sheˍ.) Aˬ htoꞈ ma te ngaˬ hui a shu yawˇ awˬ to chehˇ sha cawˬ sha hpawˇ hkʼa dehꞈ nyi haꞈ shaˉ cawˇ ve le?

3. Ngaˬ hui awˬ to chehˇ sha cawˬ sha hpawˇ nyi haꞈ shaˉ ve teˇ ceuˬ lehˬ aˬ htoꞈ ma le?

³ Ngaˬ hui ve awˬ to chehˇ sha cawˬ sha hpawˇ nyi haꞈ shaˉ cawˇ ve teˇ hkʼaˇ lehˬ, ngaˬ hui Yaˬhoˉvaˬ ve kanˉ hkʼa dehꞈ te gaˇ ve pa taw yoˬ. (Maˍkuˆ 12:30) Ngaˬ hui “ve awˬ to lehˬ, teꞈ chehˇ ve, daꞈ kehˬ ve leh, Gʼuiˬ sha nyi ma cawˇ ve tanˇ tuˬ, yawˇ htaꞈ chiˇ aꞈ piˇ” gaˇ ve pa taw, ngaˬ hui ve awˬ to htaꞈ naˬ tuˬ maˇ te gaˇ ve yoˬ. (Roˉmaꞈ 12:1) Ngaˬ hui ve awˬ to chehˇ sha cawˬ sha hpawˇ nyi haꞈ shaˉ ve lehˬ, ngaˬ hui ve awˬ to maˇ naˬ˗oˬ ve htaꞈ kʼoˆ gaˇ ve maˇ heˆ. Yaꞈ hkʼaˇ, ngaˬ hui coˇ caˇ leh awˬ to htaꞈ nyi haꞈ shaˉ ve lehˬ, Yaˬhoˉvaˬ ngaˬ hui htaꞈ a shaꞈ teꞈ chehˇ tcuh laˇ ve htaꞈ awˬ hpfuhˇ shiˍ ve tehꞈ yawˇ htaꞈ shiˍ tcuh piˇ gaˇ ve yoˬ.

4. Jawˇ mawˇ Daˍviˆ aˬ htoꞈ ma te gaˇ ve le?

⁴ Jawˇ mawˇ Daˍviˆ lehˬ a shaꞈ Gʼuiˬ sha peꞈ laˇ ve laꞈ shawnˍ htaꞈ awˬ hpfuhˇ shiˍ ve tehꞈ kʼoˆ maˍ laˇ ve yoˬ. Yawˇ kʼoˆ ve, “ngaˬ suh˗e leh tuˍ hpfuh hkʼaw loꞈ˗e ve pa taw, nawˬ awˬ pon aˬ htoꞈ ma awˬ yawˬ cawˬ tuˬ le? Suh peuˬ ve chaw nawˬ htaꞈ chiˇ mvuh hpehꞈ tuˬ ve laˇ? Nawˬ te taˍ ve daꞈ ve kanˉ teˇ hpaˍ awˬ lawn, yawˇ hui shu htaꞈ kʼaoˍ maˍ piˇ gʼa tuˬ ve laˇ?” (Chiˇ mvuh ve 30:9) Daˍviˆ lehˬ yawˇ maˇ suh sheˍ htaˇ, liꞈ chi bvuhꞈ ve yoˬ. Yaꞈ hkʼaˇ, yawˇ Yaˬhoˉvaˬ htaꞈ chiˇ mvuh tuˬ yawˇ a shaꞈ teꞈ chehˇ gaˇ sheˍ ve tehꞈ ngaˬ hui gʼa mawˬ ve yoˬ. Ngaˬ hui teˇ gʼaˇ le le kaꞈ chi hkʼa shuˍ dawˇ ve yoˬ.

5. A shaꞈ maˇ ve maˇ heˆ leh maˇ chehˇ sha ve htawˇ, ngaˬ hui te gʼa ve aˬ htoꞈ ma cawˬ sheˍ ve le?

⁵ A shaꞈ maˇ ve leh maˇ chehˇ sha ve htawˇ, ngaˬ hui te jaw ve laiˉ ceuˬ htaꞈ maˇ te gʼa ve pa taw, awˬ gʼaˇ nuˇ leh nyi ma luˬ ve yoˬ. Yaꞈ hkʼaˇ, chi ve lehˬ ngaˬ hui awˬ to chehˇ sha cawˬ sha hpawˇ maˇ nyi haꞈ shaˉ ve taˇ te laˇ tcuh. Aˬ htoꞈ ma pa taw le? A shaꞈ hkʼaˬ hkʼe ma gaˬ ve maˇ heˆ leh naˬ ve htawˇ maˇ kʼoˆ, jawˇ mawˇ Daˍviˆ hkʼa shuˍ ngaˬ hui Yaˬhoˉvaˬ htaꞈ chiˇ mvuh gʼa sheˍ ve yoˬ. Ngaˬ hui a shaꞈ maˇ ve maˇ heˆ leh naˬ ve htawˇ, ngaˬ hui awˬ hpfuhˇ cawˬ ve tehꞈ Yaˬhoˉvaˬ shawˍ laˇ ve pa taw, awˬ gʼaˇ gʼa jaˇ ve yoˬ. (Maꞈhtehˍ 10:29-31) Ngaˬ hui suh˗e ve htawˇ Yaˬhoˉvaˬ lehˬ ngaˬ hui htaꞈ kʼawꞈ teꞈ tu la tcuh gaˇ jaˇ ve yoˬ. (Yawˇbaˆ 14:14, 15) Ngaˬ hui a shaꞈ teꞈ chehˇ sheˍ htaˇ ngaˬ hui ve awˬ to chehˇ sha cawˬ sha hpawˇ hkʼa dehꞈ nyi haꞈ shaˉ gaˇ ve yoˬ.

6. Caˇ ve dawˬ ve awˬ lawn Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve le?

⁶ Liꞈ hpu lehˬ chehˇ sha cawˬ sha hpawˇ maˇ heˆ leh caˇ tuˬ dawˬ tuˬ hpawˇ beˆ maˍ laˇ ve liꞈ kʼoˆ maˇ hpehꞈ ve htawˇ, awˬ lawn chi ve htaꞈ Yaˬhoˉvaˬ hkʼaˬ hkʼe dawˇ ve ngaˬ hui shiˍ ve yoˬ. Tawˇ pa haˉ te kʼo, yawˇ kʼoˆ ve, ‘nawˬ htaꞈ naˬ tuˬ te laˇ chehˇ ve awˬ ceuˬ teˇ hpaˍ htaꞈ yuˬ baˬ˗oꞈ.’ (Cuˇ yiˍ piˇ ve 11:10) Chi hkʼoˆ kaꞈ, Liꞈ hpu hkʼaw ngaˬ hui htaꞈ kʼoˆ laˇ ve, caˇ ponˬ caˇ leuˉ ve maˇ heˆ leh tzuhˬ dawˬ bvuhˆ ve maˇ te cawˇ. Chi ve lehˬ ngaˬ hui awˬ to chehˇ sha cawˬ sha hpawˇ kawˆ tuˬ cawˬ leh ngaˬ hui suh tuˬ te laˇ gʼa ve yoˬ. (Tawˇ naˉ ve 23:20) Yaˬhoˉvaˬ lehˬ ngaˬ hui htaꞈ caˇ ve dawˬ ve hpawˇ shaˍ tiꞈ te tcuh gaˇ ve yoˬ.—1 Kawˇrenˍhtuˆ 6:12; 9:25.

7. Tawˇ naˉ ve liꞈ 2:11 hkʼaw kʼoˆ taˍ ve hkʼe, chehˇ sha cawˬ sha hpawˇ ve awˬ lawn ngaˬ hui cuˇ yiˍ cawˬ ve hkʼaw dawˇ cheˆ gʼa tuˬ aˬ htoꞈ ma ga laˇ ve le?

⁷ Ngaˬ hui a shaꞈ htaꞈ awˬ hpfuhˇ shiˍ ve tehꞈ hpeuꞈ maw piˇ gʼa tuˬ, chehˇ sha cawˬ sha hpawˇ cuˇ yiˍ cawˬ ve hkʼaw gʼa dawˇ cheˆ ve yoˬ. (Chiˇ mvuh ve 119:99, 100; Tawˇ naˉ ve 2:11 gʼaw sheˍ.) Tawˇ pa haˉ te kʼo, aˬ htoꞈ ma caˇ tuˬ ngaˬ hui hkʼa dehꞈ gʼa dawˇ nyi ve yoˬ. Ngaˬ hui dawˇ cawˇ ve caˇ tuˬ teˇ ceuˬ ceuˬ awˬ to hpawˇ awˬ bon maˇ cawˬ ve tehꞈ shiˍ htaˇ ngaˬ hui maˇ caˇ tuˬ yoˬ. Chi hkʼoˆ kaꞈ, hkʼa dehꞈ zuhꞈ bvuhˆ ve, awˬ yanˇ cawˇ cawˇ awˬ gʼaˇ cawˬ ve, hkʼaˬ htaˆ kaꞈ awˬ to htaꞈ nyi haꞈ shaˉ ve, leh yehˬ daꞈ kehˬ tuˬ te ve, chi ve teˇ hpaˍ htaꞈ ngaˬ hui te chehˇ ve tehꞈ hpeuꞈ maw piˇ ve yoˬ.

8. Awˬ to htaꞈ kawˆ ve maˇ gʼa heuˆ la tuˬ Yaˬhoˉvaˬ a yeˇ yuˬ ve tehꞈ Liꞈ hpu hkʼaw ngaˬ hui shiˍ tuˬ hkʼaˬ hkʼe ga laˇ ve le?

⁸ Iˉsaˍreˍlaˆ chaw aˉ hkʼaw chehˇ htaˇ leh kanˉ te chehˇ htaˇ yawˇ hui awˬ to htaꞈ kawˆ tuˬ naˬ tuˬ maˇ  gʼa heuˆ la tuˬ Yaˬhoˉvaˬ yawˇ hui htaꞈ awˬ liˇ tawˇ hkawˇ teh piˇ ve yoˬ. (Tawˆ kʼai ve 21:28, 29; Bon maˍ ve 22:8) Chi hkʼoˆ kaꞈ, Yaˬhoˉvaˬ ve awˬ liˇ tawˇ hkawˇ hkʼaw kʼoˆ ve, a shu teˇ gʼaˇ yawˇ te ve awˬ ceuˬ shu htaꞈ suh tuˬ te piˇ ve kʼo, yawˇ te ve awˬ ceuˬ yawˇ gʼa hkanˍ ve yoˬ. (Bon maˍ ve 19:4, 5) Maˇ dawˇ maˇ gaˇ ve hkʼaw yaˇ hu ma htaꞈ gʼa hteˆ heuˆ leh yaˇ shawˆ˗e puiˉ ve kʼo, yawˇ te taˍ ve htaꞈ gʼa hkanˍ ve yoˬ. (Tawˆ kʼai ve 21:22, 23) Yaˬhoˉvaˬ lehˬ ngaˬ hui htaꞈ maˇ dawˇ maˇ gaˇ ve awˬ ceuˬ maˇ gʼa hpuˇ tuˬ, shaˍ tiꞈ hkʼa dehꞈ te tcuh gaˇ ve tehꞈ Liꞈ hpu hkʼaw hkʼa tawˍ lehˆ gʼa mawˬ ve yoˬ.

9. Maˇ dawˇ maˇ gaˇ ve awˬ ceuˬ maˇ gʼa hpuˇ tuˬ ngaˬ hui hkʼaˬ hkʼe te gʼa ve le? (Awˬ han htaꞈ nyi sheˍ.)

⁹ Ngaˬ hui ve a shaꞈ lehˬ, Yaˬhoˉvaˬ peꞈ laˇ ve laꞈ shawnˍ hpehꞈ ve tehꞈ awˬ hpfuhˇ shiˍ ve hpeuꞈ maw piˇ tuˬ, ngaˬ hui ve yehˬ leh kanˉ te kuiˬ kawˆ ve maˇ cawˬ tuˬ gʼa te ve yoˬ. Tawˇ pa haˉ te kʼo, tcuhˆ ve awˬ ceuˬ, naˆ tsuhˇ awˬ tawꞈ ma cawˬ ve, maˇ heˆ leh naˆ tsuhˇ teˇ hpaˍ, yaˇ maˇ yuˬ gʼa kuiˬ lo gʼa gʼawˆ teh ve yoˬ. Awˬ ceuˬ chi ve ngaˬ hui gʼawˆ baˬ htaˇ kaꞈ shaˍ tiꞈ hkʼa dehꞈ gʼa te ve yoˬ. Aˬ miˍ tuˉ ve, iˉ kaˆ caˉ ve, maˇ heˆ leh awˬ nu ve daˆ aˬ miˍ yehˇ htaˇ kaꞈ shaˍ tiꞈ gʼa te ve yoˬ. Ngaˬ hui awˬ ceuˬ chi ve teˇ hpaˍ te chehˇ  htaˇ, awˬ nu ve teˇ kaˬ lo maˇ kʼai cawˇ. Chi hkʼoˆ kaꞈ, zuhꞈ muiˉ geuꞈ naˆ tsuhˇ dawˬ ve, tzuhˬ dawˬ ve, maˇ heˆ leh hkʼa dehꞈ maˇ zuhꞈ bvuhˆ ve kʼo, ngaˬ hui kaˇ maˇ gʼaꞈ cawˇ. Ngaˬ hui kaˇ gʼaꞈ htaˇ tawˇ yaw tuˬ awˬ hkʼeun nyi ve kʼo, kawˆ tuˬ cawˬ la ve yoˬ.

10. Maˇ dawˇ maˇ gaˇ ve maˇ gʼa hpuˇ sheˍ htaˇ leh gʼa hpuˇ peuˬ hkʼawꞈ nawˉ ngaˬ hui aˬ htoꞈ ma gʼa te cawˇ ve le?

¹⁰ Tawˇ pa haˉ te kʼo, kawˆ tuˬ teˇ ceuˬ ceuˬ kʼo mvuhˇ yeˬ mvuhˇ haw, naˬ beuꞈ a naˍ, maˇ heˆ leh awˬ haiˬ te daꞈ ve, chi ve teˇ hpaˍ ngaˬ hui gu maˇ gʼa ve yoˬ. Yaꞈ hkʼaˇ, ngaˬ hui htaꞈ kawˆ ve maˇ gʼa heuˆ la tuˬ te leh, mvuhˇ miˬ uˉ peunˍ paˍ maˇ kʼai tcuh laˇ ve awˬ yanˇ htaˇ ngaˬ hui gʼa na yuˬ leh, kawˆ tuˬ cawˬ ve awˬ ti lo ngaˬ hui htaꞈ hpaw˗e tcuh laˇ ve, maˇ heˆ leh awˬ nu ve awˬ ceuˬ teˇ hpaˍ kaꞈ ngaˬ hui gʼa na yuˬ ve yoˬ. (Roˉmaꞈ 13:1, 5-7) Chi hkʼoˆ kaꞈ, maˇ dawˇ maˇ gaˇ ve teˇ ceuˬ ceuˬ ngaˬ hui gʼa hpuˇ la puiˉ ve kʼo, awˉ lawˉ htaˇ kaꞈ ngaˬ hui gu hehnˇ taˍ gʼa ve yoˬ. Mvuhˇ yeˬ mvuhˇ haw gʼa hpuˇ htaˇ ngaˬ hui gʼu hehnˇ taˍ gʼa tuˬ ngaˬ hui chehˇ kuiˬ lo mvuhˇ miˬ kanˉ te paˍ beˆ maˍ laˇ ve hkawˇ htaꞈ gʼa na yuˬ ve yoˬ. Tawˇ pa haˉ te kʼo, iˉ kaˆ, haˆ maˇ luˬ puiˉ ve caˇ tuˬ, maˇ heˆ leh naˆ tsuhˇ, chi ve teˇ hpaˍ ngaˬ hui gu hehnˇ taˍ gʼa ve yoˬ.

11. Naˬ beuꞈ a naˍ cawˬ htaˇ ngaˬ hui aˬ htoꞈ ma te cawˇ ve le?

¹¹ Ngaˬ hui chehˇ kuiˬ teˇ tawn lo naˬ beuꞈ a naˍ cawˬ ve kʼo, ngaˬ hui mvuhˇ miˬ uˉ peunˍ paˍ hkawˇ na yuˬ cawˇ˗aw laˇ? Tawˇ pa haˉ te kʼo, laꞈ sheh tsuhˇ ve, shu paˇ lo maˇ kʼai ve, naˍ hkʼawˇ hpa hoˆ ve, a shu yawˇ hkʼaˇ yawˇ tiˉ chehˇ ve, chi ve teˇ hpaˍ ngaˬ hui gʼa na yuˬ leh gʼaꞈ te ve kʼo, Gʼuiˬ sha ngaˬ hui htaꞈ peꞈ laˇ ve a shaꞈ htaꞈ awˬ hpfuhˇ shiˍ ve tehꞈ hpeuꞈ maw piˇ ve yoˬ.

12. Maˇ dawˇ maˇ gaˇ ve hkʼaw awˬ lawn sha tanˇ gʼa kaˇ htaˇ Tawˇ naˉ ve liꞈ 14:15 hkʼaw ve awˬ liˇ awˬ hkʼaˇ hkʼaˬ hkʼe beˆ maˍ laˇ ve le?

¹² Maˇ dawˇ maˇ gaˇ ve awˬ ceuˬ hpehꞈ la htaˇ, awˬ chawˇ, yehˬ paˇ yehˬ kuiˬ ve chaw, maˇ heˆ leh awˬ lawn teˇ hpaˍ hkʼaw maˇ cawˇ ve awˬ lawn teˇ caˉ peuˬ teˇ caˉ kʼoˆ laˇ ve htaꞈ ngaˬ hui gʼa kaˇ ve yoˬ. ‘Tawˇ teˇ hkawˇ le le htaꞈ’ ngaˬ hui yonˍ ve aꞈ kehˉ mvuhˇ miˬ uˉ peunˍ paˍ leh chehˇ sha cawˬ sha ve hpawˇ kʼoˆ laˇ ve chaw tawˇ hkawˇ ngaˬ hui na cawˇ ve yoˬ. (Tawˇ naˉ ve 14:15 gʼaw sheˍ.) Uˉ peunˍ ve Kawˍmiˍtiˍ leh awˬ tcuhˉ puiˍ lo ve kawˍmiˍtiˍ lehˬ, hpawnˬ daꞈ ve leh hto toˇ ve hkʼaw awˬ viˉ awˬ nyi htaꞈ maˇ beˆ maˍ piˇ sheˍ htaˇ, yawˇ hui awˬ lawn awˬ tanˇ htaꞈ awˉ lawˉ hkʼa dehꞈ gʼa chaˬ nyi sheˍ ve yoˬ. (Heˍbrehˇ 13:17) Ngaˬ hui Gʼuiˬ sha ve kanˉ hkʼaˇ htaꞈ hkʼa dehꞈ na yuˬ ve kʼo, ngaˬ hui ve awˬ to htaꞈ haꞈ shaˉ gʼa leh awˬ nu ve chaw kaꞈ kawˆ tuˬ maˇ cawˬ. Leh ngaˬ hui Gʼuiˬ sha ve kanˉ hkʼaˇ htaꞈ awˬ meh bvuhˬ tuˬ kaꞈ te piˇ gʼa sheˍ ve yoˬ.—1 Peˍtruˆ 2:12.

13. Awˬ suhˍ ve awˬ lawn Yaˬhoˉvaˬ ngaˬ hui htaꞈ peꞈ laˇ ve a shaꞈ htaꞈ awˬ hpfuhˇ shiˍ ve tehꞈ hkʼaˬ hkʼe hpeuꞈ maw piˇ gʼa tuˬ le?

¹³ Yaˬhoˉvaˬ ve Shaˉhkiˆhkanˍ ve chaw lehˬ, awˬ suhˍ htaꞈ taˍ uiˍ ve tehꞈ laiˉ gʼaˇ shiˍ ve yoˬ. Awˬ suhˍ ve awˬ lawn Yaˬhoˉvaˬ ve awˬ liˇ tawˇ hkawˇ htaꞈ ngaˬ hui na yuˬ leh suh˗e la yoˬ te htaˇ kaꞈ awˬ suhˍ maˇ keu ve yoˬ. (Tcuh yaˇ 15:28, 29) Yaꞈ hkʼaˇ, chi lehˬ ngaˬ hui suh˗e gaˇ ve tehꞈ kʼoˆ gaˇ ve maˇ heˆ. Yaˬhoˉvaˬ ngaˬ hui htaꞈ peꞈ laˇ ve a shaꞈ htaꞈ ngaˬ hui haꞈ ve yoˬ. Ngaˬ hui htaꞈ hkʼa dehꞈ haꞈ shaˉ laˇ gʼa ve saˍ laꞈ gʼonˍ leh ngaˬ hui awˬ suhˍ maˇ keu ve htaꞈ yawˆ yan laˇ ve saˍ laꞈ gʼonˍ htaꞈ ca ve yoˬ.

14. Maˇ shawˆ hpeꞈ tuˬ maˇ heˆ leh maˇ naˬ jaˇ tuˬ aˬ htoꞈ ma awˬ hkʼaˇ ga laˇ gʼa ve le?

¹⁴ Chehˇ sha cawˬ sha hpawˇ nyi haꞈ shaˉ tuˬ awˬ lawn chi ve hkʼaw ngaˬ hui gʼa henˇ˗oˬ ve hkʼe gʼaꞈ te ve kʼo, maˇ shawˆ hpeꞈ tuˬ maˇ heˆ leh maˇ naˬ jaˇ tuˬ ga laˇ ve yoˬ. Ngaˬ hui naˬ htaˇ gʼa shawˆ hpeꞈ ve kʼo, ngaˬ hui awˬ to htaꞈ hkʼa dehꞈ nyi haꞈ shaˉ ve lehˬ haˆ haˆ na˗e la gʼa ve yoˬ. Chi hkʼoˆ kaꞈ, yehˬ daꞈ kehˬ tuˬ te leh kanˉ te kuiˬ lo kawˆ ve maˇ cawˬ tuˬ te ve, leh kaˇ gʼaꞈ ve hpawˇ awˬ liˇ awˬ hkʼaˇ htaꞈ ngaˬ hui na yuˬ ve kʼo, maˇ dawˇ maˇ gaˇ ve hkʼaw naˬ leh maˇ gʼa shawˆ hpeꞈ taˬ.

15. (a) Aˬ htoꞈ ma te ngaˬ hui awˬ suhˍ maˇ keu tuˬ ve liꞈ kʼoˆ hkʼaˬ htaˆ kaꞈ pfuhˇ taˍ cawˇ ve le? (Awˬ han htaꞈ nyi sheˍ.) (b) VDO hkʼaw gʼa mawˬ ve hkʼe, awˬ suhˍ ve awˬ lawn ngaˬ hui dawˇ cheˆ ve htaꞈ shu mawˬ gʼa tuˬ hkʼaˬ hkʼe te gʼa ve le?

¹⁵ Ngaˬ hui a shaꞈ htaꞈ awˬ hpfuhˇ shiˍ ve awˬ hkʼoˆ  kaꞈ ngaˬ hui awˬ suhˍ maˇ keu tuˬ ve liꞈ kʼoˆ ehˉ hkʼaw bvuhꞈ leh naˆ tsuhˇ yehˬ lo haꞈ shaˉ tuˬ ve awˬ hkʼaˇ hkʼaˬ htaˆ kaꞈ gʼa pfuhˇ taˍ ve yoˬ. b Liꞈ kʼoˆ ehˉ chi lehˬ awˬ suhˍ maˇ keu tuˬ ve awˬ lawn leh, naˆ tsuhˇ yehˬ lo haꞈ shaˉ tuˬ ve awˬ hkʼaˇ ngaˬ hui dawˇ cheˆ taˍ ve hpeuꞈ maw piˇ ve yoˬ. Nawˬ liꞈ kʼoˆ ehˉ chi bvuhꞈ˗oˬ laˇ? Maˇ bvuhꞈ sheˍ ve maˇ heˆ leh awˬ suhˉ kʼawꞈ bvuhꞈ cawˇ ve kʼo, haˆ haˆ bvuhꞈ sheˍ. Liꞈ kʼoˆ ehˉ chi bvuhꞈ taˍ ve lehˬ saˍ laꞈ gʼonˍ leh saˍ laꞈ gʼonˍ htaꞈ ga piˇ ve chaw, ngaˬ hui hkʼaˬ hkʼe loˍ leh haˆ haˆ gu laˇ gʼa tuˬ, yawˇ hui awˬ hkʼaˇ shiˍ tuˬ ga piˇ ve yoˬ. Chi hkʼoˆ kaꞈ, ngaˬ hui kawˆ ve maˇ gʼa heuˆ la tuˬ, saˍ laꞈ gʼonˍ leh saˍ laꞈ gʼonˍ htaꞈ ga piˇ ve chaw ngaˬ hui htaꞈ haꞈ shaˉ laˇ gʼa tuˬ awˬ hkʼaˇ yawˇ hui shiˍ tuˬ te piˇ ve yoˬ. c

16. Awˬ suhˍ maˇ keu tuˬ liꞈ kʼoˆ ehˉ bvuhꞈ ve awˬ hkʼaˇ ngaˬ hui maˇ shiˍ ve kʼo, hkʼaˬ hkʼe te cawˇ ve le?

¹⁶ A shaꞈ i ve maˇ heˆ leh chehˇ sha puiˉ ve htawˇ maˇ kʼoˆ, ngaˬ hui teˇ gʼaˇ le le maˇ dawˇ maˇ gaˇ ve gʼa hpuˇ ve maˇ heˆ leh naˬ la puiˉ ve yoˬ. (Cuˇ yiˍ piˇ ve 9:11) Hkʼe te leh, ngaˬ hui cuˇ yiˍ cawˬ ve hkʼaw awˬ suhˍ maˇ keu tuˬ ve liꞈ kʼoˆ ehˉ gʼa bvuhꞈ cawˇ ve yoˬ. Hkʼaˬ hkʼe te bvuhꞈ tuˬ awˬ hkʼaˇ nawˬ maˇ shiˍ ve kʼo, nyi haꞈ shaˉ paˍ htaꞈ na piˇ sheˍ. Yawˇ beˆ maˍ laˇ gʼa ve htawˇ, nawˬ hkʼaˬ hkʼe leuˆ yuˬ tuˬ yawˇ nawˬ awˬ  tan maˇ dawˇ cheˆ laˇ. Chi nawˬ hkʼaˇ nawˬ gʼa dawˇ cheˆ ve yoˬ. (Gaˍlaˍtiˆ 6:4, 5) Yaꞈ hkʼaˇ, nyi haꞈ shaˉ paˍ lehˬ nawˬ hkʼaˬ hkʼe leuˆ yuˬ cawˇ ve htaꞈ na gʼa tuˬ ga laˇ gʼa leh bvuhꞈ tuˬ awˬ hkʼaˇ kaꞈ nawˬ htaꞈ beˆ maˍ laˇ gʼa ve yoˬ.

17. Chehˇ sha cawˬ sha hpawˇ ngaˬ hui lehˬ awˬ hkʼaˇ ca ve chaw hpehꞈ ve tehꞈ hkʼaˬ hkʼe hpeuꞈ maw piˇ gʼa ve le?

¹⁷ Chehˇ sha cawˬ sha hpawˇ haꞈ shaˉ tuˬ awˬ lawn htaꞈ dawˇ cheˆ htaˇ, ngaˬ hui Liꞈ hpu hkʼaw ve awˬ liˇ awˬ hkʼaˇ htaꞈ yehˇ cawˇ ve yoˬ. (Tcuh yaˇ 24:16; 1 Tiˆmoˉseˍ 3:9) Awˬ lawn chi ve htaꞈ ngaˬ hui dawˇ cheˆ leh awˬ nu ve chaw geh yaw daꞈ htaˇ, Hpiˇliˇpiˆ liꞈ 4:5 hkʼaw ve awˬ liˇ awˬ hkʼaˇ htaꞈ yuˬ yehˇ cawˇ ve yoˬ. Choˬ kaˬ lo kʼoˆ ve, ‘nawˬ hui awˬ hkʼaˇ ca ve chaw hpehꞈ ve tehꞈ shu shiˍ tuˬ te˗o.’ Ngaˬ hui awˬ hkʼaˇ ca ve chaw hpehꞈ ve kʼo, chehˇ sha cawˬ sha hpawˇ ve awˬ lawn htaꞈ ngaˬ hui hkʼe taw maˇ dawˇ haˍ leh awˬ nu ve chaw kaꞈ ngaˬ hui hkʼe dawˇ tuˬ maˇ nyiˉ piˇ. Awˬ viˉ awˬ nyi dawˇ cheˆ ve ngaˬ hui htaꞈ maˇ shuˍ ve htawˇ, ngaˬ hui yawˇ htaꞈ haꞈ leh yawˆ yan piˇ sheˍ ve yoˬ.—Roˉmaꞈ 14:10-12.

18. A shaꞈ lehˬ Gʼuiˬ sha geh gʼa ve laꞈ shawnˍ hpehꞈ leh ngaˬ hui awˬ hpfuhˇ shiˍ ve tehꞈ hkʼaˬ hkʼe hpeuꞈ maw piˇ gʼa tuˬ le?

¹⁸ Yaˬhoˉvaˬ lehˬ a shaꞈ teꞈ ve awˬ hkuiˉ puiˍ hpehꞈ leh ngaˬ hui awˬ bon uiˍ jaˇ tehꞈ hpeuꞈ maw piˇ gʼa tuˬ, ngaˬ hui ve a shaꞈ teꞈ hkʼaˇ chehˇ sha cawˬ sha hpawˇ hkʼa dehꞈ nyi haꞈ shaˉ leh te gʼa ve hkʼe yawˇ ve kanˉ caˉ leh hkʼa dehꞈ te ve yoˬ. (Hpeuꞈ maˍ ve 4:11) Chi teˇ hkui ngaˬ hui naˬ ve gawˬ ve leh mvuhˇ yeˬ mvuhˇ haw lonˉ kaꞈ gʼa hpuˇ ve yoˬ. Yaꞈ hkʼaˇ, chi hkʼe ve Yaˬhoˉvaˬ ngaˬ hui htaꞈ maˇ hpuˇ tcuh gaˇ. Maˇ maw ve awˬ yanˇ, ngaˬ hui co co taiˍ taiˍ ve a shaꞈ gʼa leh naˬ ve gawˬ ve kaꞈ maˇ gʼa hpuˇ˗o leh maˇ kʼawꞈ gʼa suh˗o. (Hpeuꞈ maˍ ve 21:4) Chi teˇ hkui ngaˬ hui a shaꞈ teꞈ ve lehˬ daꞈ jaˇ leh Yaˬhoˉvaˬ htaꞈ haꞈ leh yawˇ ve kanˉ te ve yoˬ!