1. Awˬ leh meuˇ gaˬ la tuˬ ve awˬ lawn Yeˍsuˆ awˬ laꞈ gʼawˇ hui htaꞈ hkʼaˬ hkʼe kʼoˆ piˇ ve le? Leh Yeˍsuˆ yawˇ hui htaꞈ shaˍ tiꞈ hkʼaˬ hkʼe piˇ ve le?

 Yeˍsuˆ suh˗e tuˬ hkʼaˬ nyiˇ nyi maˇ cawˬ˗oˬ htaˇ, awˬ laꞈ gʼawˇ 4 gʼaˇ yawˇ htaꞈ na piˇ ve, “miˬ guiˬ chi awˬ yanˇ leh tuˬ ve awˬ heˆ hkʼaˬ hkʼe hpehˬ tawˆ la tuˬ le? Ngaˬ hui htaꞈ a ciˉ hto laˇ˗oˆ.” (Maꞈhtehˍ 24:3) Awˬ laꞈ gʼawˇ hui awˬ leh meuˇ ve awˬ lawn Yeˍsuˆ htaꞈ na piˇ htaˇ, yawˇ hui Yuˇdaꞈ chaw ve awˬ co˗e htaꞈ kʼoˆ gaˇ ve yoˬ hehˉ. Yeˍruˆsaˍlehnˍ venˇ leh bon yehˬ lonˉ htaꞈ hkʼaˬ hkʼe htaˇ te luˬ tuˬ, awˬ leh meuˇ hkʼaˬ htaˆ gaˬ la tuˬ ve htaꞈ yawˇ hui htawˇ dawˇ nawˬ dawˇ cawˬ ve yoˬ. Yaꞈ hkʼaˇ, Yuˇdaꞈ chaw ve awˬ co˗e htaꞈ ceh Yeˍsuˆ kʼoˆ gaˇ ve maˇ heˆ. Awˬ leh meuˇ ve awˬ yanˇ ngaˬ hui ve awˬ co˗e htaꞈ kaꞈ kʼoˆ gaˇ ve yoˬ. Awˬ leh meuˇ gaˬ la paˇ neˇ ve awˬ lawn htaꞈ Yeˍsuˆ kʼoˆ ve, “awˬ nyi awˬ haˉ oˇ ve htaꞈ chaw teˇ gʼaˇ kaꞈ maˇ shiˍ. Mvuhˇ naw ma tcuh yaˇ hui kaꞈ, yaˇ hpu kaꞈ maˇ shiˍ. Awˬ pa teˇ gʼaˇ tiˉ shiˍ ve yoˬ.” Hkʼe te leh, Yeˍsuˆ awˬ laꞈ gʼawˇ teˇ gʼaˇ le le htaꞈ “shaˍ tiꞈ te” leh “hkʼa dehꞈ shaw taˍ˗oꞈ” tehꞈ kʼoˆ piˇ ve yoˬ.—Maˍkuˆ 13:32-37.

2. Awˉ lawˉ peuˇ ve Hkriꞈ yaˇ shaˍ tiꞈ te leh hkʼa dehꞈ shaw taˍ tuˬ aˬ htoꞈ ma te a yeˇ uiˍ jaˇ ve le?

² Awˉ lawˉ peuˇ ve Hkriꞈ yaˇ Yuˇdaꞈ chaw lehˬ, shaˍ tiꞈ te leh hkʼa dehꞈ shaw taˍ cawˇ ve yoˬ. Awˬ lawn kʼo, yawˇ hui gʼa ponˬ tuˬ, leh maˇ gʼa ponˬ tuˬ, Yeˍsuˆ shaˍ tiꞈ piˇ ve gʼaꞈ te ve htaꞈ cawˬ ve yoˬ. Yeˍruˆsaˍlehnˍ venˇ leh bon yehˬ lonˉ hkʼaˬ htaˆ te luˬ ve htaꞈ yawˇ hui shiˍ tuˬ, aˬ htoꞈ ma ve awˬ heˆ htaꞈ gʼa chaˬ nyi cawˇ ve tehꞈ Yeˍsuˆ yawˇ hui htaꞈ kʼoˆ piˇ ve yoˬ. Yeˍsuˆ kʼoˆ ve, “Yeˍruˆsaˍlehnˍ venˇ htaꞈ maꞈ moˍ maꞈ cuˇ hkʼa caw zuhˇ hoˆ taˍ ve htaꞈ nawˬ hui gʼa mawˬ ve teˇ yanˇ, venˇ oˇ ve gʼa luˬ paˇ neˇ ve htaꞈ nawˬ hui shiˍ taˍ˗oꞈ.” Leh Yeˍsuˆ kʼoˆ taˍ ve awˬ heˆ awˬ tehˬ hpehꞈ la htaˇ, awˬ laꞈ gʼawˇ hui Yeˍsuˆ shaˍ tiꞈ piˇ ve htaꞈ gʼaꞈ te leh “hkʼaw hkʼoˆ lawˬ hkʼoˆ lo hpaw˗e” ve yoˬ. (Luˉkaꞈ 21:20, 21) Roˉmaꞈ maꞈ yaˇ Yeˍruˆsaˍlehnˍ venˇ htaꞈ ca te luˬ la htaˇ, na yuˬ ve chaw gʼa ponˬ ve yoˬ.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Chi beuꞈ teˇ co˗e ngaˬ hui lehˬ haiˬ jaˇ ve awˬ leh meuˇ ve awˬ yanˇ hkʼaw chehˇ taˍ ve pa taw, shaˍ tiꞈ te leh hkʼa dehꞈ shaw taˍ cawˇ ve  yoˬ. Miˬ guiˬ hkʼoˆ lo ve awˬ heˆ teˇ hpaˍ htaꞈ mawˬ htaˇ, ngaˬ hui keunˍ lawꞈ cawˇ lawꞈ ve dawˇ hkʼaˇ hkʼaˬ hkʼe te cawˬ gʼa tuˬ le? Ngaˬ hui hkʼaˬ hkʼe te shaˍ tiꞈ hkʼa dehꞈ te gʼa tuˬ le? Ngaˬ hui awˬ yanˇ htaꞈ vuiˬ hkʼawꞈ leh hkʼa dehꞈ yehˇ gʼa tuˬ hkʼaˬ hkʼe gʼa te cawˇ ve le? Chi ve teˇ hpaˍ awˬ lawn chi ve hkʼaw teˇ geh henˇ tuˬ yoˬ.

4. Miˬ guiˬ hkʼoˆ lo hpehꞈ la chehˇ ve awˬ heˆ teˇ hpaˍ lehˬ, Liꞈ hpu hkʼaw tcuh kaˍ paˍ ve tawˇ hkawˇ kʼoˆ taˍ ve hkʼe hpehꞈ la chehˇ ve tehꞈ, aˬ htoꞈ ma te ngaˬ hui a yeˇ yuˬ cawˇ ve le?

⁴ Miˬ guiˬ hkʼoˆ lo hpehꞈ la chehˇ ve awˬ heˆ teˇ hpaˍ lehˬ, Liꞈ hpu hkʼaw tcuh kaˍ paˍ ve tawˇ hkawˇ kʼoˆ taˍ ve hkʼe hpehꞈ la chehˇ ve tehꞈ, ngaˬ hui a yeˇ yuˬ cawˇ ve laiˉ hkʼaˇ cawˬ ve yoˬ. Tawˇ pa haˉ te kʼo, Yeˍsuˆ awˬ heˆ laiˉ ceuˬ htaꞈ hteˇ lehˍ kʼoˆ taˍ ve yoˬ. Chi lehˬ haiˬ jaˇ ve miˬ guiˬ awˬ leh meuˇ gaˬ la paˇ neˇ˗oˬ ve tehꞈ ngaˬ hui shiˍ tuˬ te laˇ ve yoˬ. (Maꞈhtehˍ 24:3-14) Ngaˬ hui ve yonˍ hkʼaˇ yonˍ yeˬ ve cawˬ tuˬ ga laˇ gʼa tuˬ, tcuh yaˇ Peˍtruˆ kaꞈ Liꞈ hpu hkʼaw tcuh kaˍ paˍ ve tawˇ hkawˇ ngaˬ hui htaꞈ a yeˇ yuˬ tcuh gaˇ ve yoˬ. (2 Peˍtruˆ 1:19-21) Leh Hpeuꞈ maˍ ve liꞈ kaꞈ Liꞈ hpu awˬ leh meuˇ teˇ daw hpehꞈ ve yoˬ. Leh oˇ kaˬ lo kʼoˆ ve, “maˇ maw maw hpehꞈ la tuˬ ve awˬ lawn teˇ hpaˍ Yeˍsuˆ Hkriꞈ lehˬ, yawˇ ve awˬ ceˬ teˇ hpaˍ htaꞈ maw piˇ tuˬ, hpeuꞈ maˍ laˇ ve awˬ lawn chi teˇ hpaˍ Gʼuiˬ sha Yeˍsuˆ htaꞈ piˇ taˍ ve yoˬ.” (Hpeuꞈ maˍ ve 1:1) Chi htaꞈ pa taw, miˬ guiˬ hkʼoˆ lo hpehꞈ la chehˇ ve awˬ ceuˬ teˇ hpaˍ htaꞈ ngaˬ hui a yeˇ yuˬ leh chi ve Liꞈ hpu hkʼaw tcuh kaˍ paˍ ve tawˇ hkawˇ kʼoˆ taˍ ve hkʼe, hpehꞈ la ve laˇ tehꞈ ngaˬ hui shiˍ gaˇ ve yoˬ. Leh awˬ lawn chi htaꞈ caˉ daꞈ ve ngaˬ hui awˬ viˉ awˬ nyi geh yaw daꞈ gaˇ ve yoˬ.

5. Ngaˬ hui aˬ htoꞈ ma te cawˇ ve le? Leh aˬ htoꞈ ma maˇ te cawˇ ve le? (Awˬ han htaꞈ nyi sheˍ.)

⁵ Yaꞈ hkʼaˇ, Liꞈ hpu hkʼaw tcuh kaˍ paˍ ve tawˇ hkawˇ htaꞈ caˉ daꞈ ve ngaˬ hui yaw daꞈ htaˇ, awˬ gʼuˇ suhˍ hpawˇ aˬ htoꞈ ma hpehꞈ la tuˬ ngaˬ hui hkʼaˇ ngaˬ hui maˇ gʼa dawˇ yuˬ tuˬ shaˍ tiꞈ gʼa te cawˇ ve yoˬ. Awˬ lawn kʼo, ngaˬ hui Hkriꞈ yaˇ awˬ moˍ hkʼaw maˇ cawˇ maˇ hawˍ daꞈ ve maˇ cawˬ tuˬ maˇ te gaˇ ve yoˬ. Tawˇ pa haˉ te kʼo, miˬ guiˬ hkʼoˆ lo maˇ cawˇ maˇ hawˍ daꞈ ve maˇ cawˬ leh, dawˇ sha gawˬ lehˍ ve cawˬ leh kawˆ tuˬ maˇ cawˬ˗oˬ tehꞈ, mvuhˇ miˬ uˉ peunˍ paˍ kʼoˆ ve htaꞈ ngaˬ hui gʼa kaˇ ve yoˬ. 1 Hteˇsaˍlawˇniˆ liꞈ 5:3 hkʼaw tcuh kaˍ paˍ ve tawˇ hkawˇ awˬ tehˬ hpehꞈ la chehˇ˗oˬ ve tehꞈ, ngaˬ hui a shu yawˇ hkʼaˇ yawˇ dawˇ yuˬ ve aꞈ kehˉ, Gʼuiˬ sha ve kanˉ hkʼaˇ maˇ maw maw ve awˬ yanˇ hkʼaw kʼoˆ laˇ gehˇ sheˍ ve awˬ lawn htaꞈ a yeˇ yuˬ cawˇ ve yoˬ. Yaˬhoˉvaˬ ve kanˉ hkʼaˇ geh ngaˬ hui gʼa kaˇ ve awˬ lawn htaꞈ yaw daꞈ htaˇ, Hkriꞈ yaˇ awˬ moˍ hkʼaw cawˇ daꞈ hawˍ daꞈ tuˬ ngaˬ hui ga piˇ leh “nyi ma teˇ shiˍ tiˉ te leh, dawˇ hkʼaˇ teˇ hkʼaˇ tiˉ cawˬ ve” yoˬ.—1 Kawˇrenˍhtuˆ 1:10; 4:6.

6. 2 Peˍtruˆ liꞈ 3:11-13 hkʼaw ngaˬ hui htaꞈ aˬ htoꞈ ma maˍ laˇ ve le?

⁶ 2 Peˍtruˆ liꞈ 3:11-13 gʼaw sheˍ. Liꞈ hpu hkʼaw tcuh kaˍ paˍ ve tawˇ hkawˇ teˇ hpaˍ htaꞈ ngaˬ hui nyi htaˇ, ngaˬ hui keunˍ lawꞈ cawˇ lawꞈ ve dawˇ hkʼaˇ cawˬ tuˬ, tcuh yaˇ Peˍtruˆ beˆ maˍ laˇ ve yoˬ. Yawˇ kʼoˆ ve, “Gʼuiˬ sha ve awˬ nyi htaꞈ law taˍ leh dawˇ law chehˇ ve yoˬ.” Aˬ htoꞈ ma te ngaˬ hui chi hkʼe te cawˇ ve htaꞈ chaˬ nyi sheˍ. Peˍtruˆ kʼoˆ ve, ngaˬ hui awˬ yanˇ htaꞈ hkʼa dehꞈ vuiˬ hkʼawꞈ leh yehˇ gaˇ ve pa taw, ‘daꞈ kehˬ ve awˬ liˇ awˬ hkʼaˇ htaꞈ tiˉ te leh Gʼuiˬ sha htaꞈ yawˆ yan ve chaw hpehꞈ cawˇ ve yoˬ.’ Aˍmaˍgeˍdonˍ laˬ tuˬ ve “awˬ nyi awˬ haˉ” htaꞈ shiˍ gaˇ ve pa taw maˇ heˆ. (Maꞈhtehˍ 24:36; Luˉkaꞈ 12:40) Yaˬhoˉvaˬ cawˇ ve tehꞈ kʼoˆ ve awˬ ceuˬ htaꞈ ngaˬ hui te gaˇ leh, ngaˬ hui yawˇ htaꞈ haꞈ ve pa taw yawˇ ve kanˉ te ve tehꞈ kaꞈ shiˍ tcuh gaˇ ve yoˬ. Ngaˬ hui shaˍ tiꞈ te leh hkʼa dehꞈ gʼa shaw taˍ cawˇ ve yoˬ.

7. Shaˍ tiꞈ te ve chaw lehˬ aˬ htoꞈ ma te tuˬ le? (Luˉkaꞈ 21:34)

⁷ Awˬ laꞈ gʼawˇ hui lehˬ miˬ guiˬ hkʼoˆ lo hpehꞈ la tuˬ ve awˬ lawn htaꞈ ceh a yeˇ yuˬ cawˇ ve tehꞈ Yeˍsuˆ maˇ gʼa kʼoˆ piˇ. Yaꞈ hkʼaˇ, yawˇ hui a shu yawˇ awˬ to htaꞈ kaꞈ a yeˇ gʼa yuˬ cawˇ ve yoˬ. Awˬ lawn chi lehˬ Luˉkaꞈ liꞈ 21:34 hkʼaw ngaˬ hui gʼa mawˬ ve yoˬ.  (Gʼaw sheˍ.) Yeˍsuˆ awˬ laꞈ gʼawˇ htaꞈ “shaˍ tiꞈ te˗o” tehꞈ kʼoˆ piˇ ve yoˬ. Chi lehˬ ngaˬ hui ve te hkʼaˇ dawˇ hkʼaˇ htaꞈ a yeˇ yuˬ cawˇ ve tehꞈ kʼoˆ gaˇ ve yoˬ. Shaˍ tiꞈ te ve chaw lehˬ Yaˬhoˉvaˬ geh meuˆ daꞈ ve htaꞈ te luˬ laˇ ve aˬ htoꞈ ma awˬ ceuˬ cawˬ ve htaꞈ shaˍ tiꞈ te ve pa taw, yawˇ hkʼaˬ htaˆ kaꞈ Yaˬhoˉvaˬ haꞈ ve chaw hpehꞈ ve yoˬ.—Tawˇ naˉ ve 22:3; Yuˇdaꞈ 20, 21.

8. Pawˇluꞈ lehˬ Hkriꞈ yaˇ htaꞈ aˬ htoꞈ ma te tuˬ kʼoˆ piˇ ve le?

⁸ Tcuh yaˇ Pawˇluꞈ Hkriꞈ yaˇ htaꞈ shaˍ tiꞈ te tuˬ kʼoˆ piˇ ve yoˬ. Tawˇ pa haˉ te kʼo, yawˇ Eˇfeˇsuꞈ venˇ hkʼaw ve awˬ viˉ awˬ nyi htaꞈ kʼoˆ piˇ ve, “nawˬ hui hkʼaˬ hkʼe dawˇ ve te ve htaꞈ shaˍ tiꞈ hkʼa dehꞈ taˍ˗oꞈ. Cuˇ yiˍ maˇ cawˬ ve chaw hui hkʼe taˇ te. Cuˇ yiˍ cawˬ ve chaw hui hkʼe te chehˇ˗oˆ.” (Eˇfeˇsuꞈ 5:15, 16) Ngaˬ hui Yaˬhoˉvaˬ geh meuˆ daꞈ ve htaꞈ Saˍtanˍ te luˬ laˇ tuˬ maˇ jehˇ. Liꞈ hpu hkʼaw ngaˬ hui htaꞈ shaˍ tiꞈ peꞈ laˇ ve, “[Yaˬhoˉvaˬ] ve a loˍ hkʼaˬ hkʼe cawˬ ve htaꞈ shiˍ ve chaw hpehꞈ piˇ˗oˆ.” Ngaˬ hui chi hkʼe te ve kʼo, Saˍtanˍ yehˇ ve laꞈ caˉ teˇ ceuˬ le le htaꞈ ngaˬ hui tawˍ daꞈ gʼaˇ tuˬ yoˬ.—Eˇfeˇsuꞈ 5:17.

9. Yaˬhoˉvaˬ ve a loˍ ngaˬ hui htaꞈ te tcuh gaˇ ve tehꞈ hkʼaˬ hkʼe te shiˍ gʼa tuˬ le?

⁹ Ngaˬ hui Yaˬhoˉvaˬ geh meuˆ daꞈ ve awˬ ceuˬ htaꞈ te luˬ laˇ gʼa ve, teˇ ceuˬ le le htaꞈ Liꞈ hpu hkʼaw maˇ gʼa kʼoˆ laˇ taˬ. Leh ngaˬ hui hkʼaˬ hkʼe te cawˇ ve Liꞈ hpu hkʼaw hteˇ˗ehˍ maˇ gʼa kʼoˆ laˇ ve awˬ lawn cawˬ ve kʼo, chi ngaˬ hui hkʼaˇ ngaˬ hui gʼa dawˇ cheˆ ve yoˬ. Chi htaꞈ pa taw, ngaˬ hui cuˇ yiˍ cawˬ ve hkʼaw dawˇ cheˆ gʼa tuˬ, “[Yaˬhoˉvaˬ] ve a loˍ hkʼaˬ hkʼe cawˬ ve” ngaˬ hui gʼa na gʼa cawˇ ve yoˬ. Ngaˬ hui chi hkʼe te gʼa tuˬ, Liꞈ hpu gʼaw ve, Liꞈ hpu hkʼaw hpfuhˆ nyi ve, leh hkʼaˬ htaˆ kaꞈ hkʼa dehꞈ gʼa dawˇ nyi ve yoˬ. Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve htaꞈ shiˍ leh “Hkriꞈ ve nyi ma” cawˬ tuˬ coˇ caˇ cawˇ ve yoˬ. Chi ngaˬ hui aˬ htoꞈ ma te cawˇ ve, maˇ heˆ leh maˇ te cawˇ ve hteˇ˗ehˍ maˇ beˆ maˍ laˇ ve htawˇ, ngaˬ hui “cuˇ yiˍ” cawˬ ve hkʼaw dawˇ cheˆ gʼa ve yoˬ. (1 Kawˇrenˍhtuˆ 2:14-16) Kawˆ tuˬ cawˬ ve ngaˬ hui shaˍ tiꞈ gʼa te cawˇ ve aˬ htoꞈ ma cawˬ ve le? Kawˆ tuˬ teˇ ceuˬ ceuˬ kʼo, mawˬ gʼa ve leh teˇ ceuˬ ceuˬ kʼo hkʼa dehꞈ maˇ mawˬ gʼa ve, chi ve teˇ hpaˍ teˇ geh henˇ tuˬ yoˬ.

10. Kawˆ tuˬ cawˬ ve ngaˬ hui gʼa jaw kʼai cawˇ ve aˬ htoꞈ ma cawˬ ve le?

¹⁰ Kawˆ tuˬ cawˬ ve ngaˬ hui gʼa jaw kʼai cawˇ ve teˇ hpaˍ lehˬ, maˆ guiˇ ve, caˇ leuˉ dawˬ leuˉ ve, tzuhˬ dawˬ bvuhˆ ve, nyi ma naˬ tuˬ tawˇ yaw ve, hehnˇ ve awˬ han nyi ve, awˬ kʼu nyi ve awˬ han nyi ve, leh awˬ nu ve awˬ ceuˬ kaꞈ te ve yoˬ. (Chiˇ mvuh ve 101:3) Ngaˬ hui ve canˇ paˍ Saˍtanˍ lehˬ, ngaˬ hui Yaˬhoˉvaˬ geh meuˆ daꞈ ve htaꞈ te luˬ laˇ tuˬ hkʼaˬ htaˆ kaꞈ awˬ hkʼaˇ ca chehˇ ve yoˬ. (1 Peˍtruˆ 5:8) Ngaˬ hui shaˍ tiꞈ maˇ te ve kʼo, Saˍtanˍ lehˬ te hkʼaˇ dawˇ hkʼaˇ maˇ daꞈ ve awˬ ceuˬ ngaˬ hui ve dawˇ hkʼaˇ leh nyi ma hkʼaw cawˬ tcuh gaˇ ve yoˬ. Tawˇ pa haˉ te kʼo, hkawehˉ ve, ka tiꞈ maˇ yeˬ ve, lawˇ hpaꞈ uiˍ ve, nyi bawˬ daꞈ ve, uiˍ muiˬ caˆ muiˬ ve, leh te hkʼawꞈ daꞈ ve, chi ve teˇ hpaˍ yoˬ. (Gaˍlaˍtiˆ 5:19-21) Awˉ lawˉ htaˇ ngaˬ hui te hkʼaˇ dawˇ hkʼaˇ chi hkʼe ve hkʼa dehꞈ maˇ cawˬ sheˍ ve htawˇ, ngaˬ hui haˆ maˇ gu ve kʼo, chi ve lehˬ suhˆ cehˬ awˬ tawꞈ ma cawˬ ve hkʼa shuˍ gʼaˇ hteꞈ uiˍ la leh, ngaˬ hui shoꞈ shaꞈ ve cawˬ tuˬ te laˇ ve yoˬ.—Yaˍkoˆ 1:14, 15.

11. Kawˆ tuˬ cawˬ ve ngaˬ hui hkʼa dehꞈ maˇ nyi mawˬ ve teˇ ceuˬ lehˬ aˬ htoꞈ ma le? Leh aˬ htoꞈ ma pa taw ngaˬ hui gʼa jaw kʼai cawˇ ve le?

¹¹ Kawˆ tuˬ cawˬ ve ngaˬ hui hkʼa dehꞈ maˇ nyi mawˬ ve teˇ ceuˬ lehˬ maˇ daꞈ ve awˬ chawˇ yoˬ. Awˬ lawn chi htaꞈ teˇ geh nyi sheˍ. Shaˉhkiˆhkanˍ ve chaw maˇ heˆ ve geh nawˬ kanˉ teˇ geh te ve, yawˇ htaꞈ Shaˉhkiˆhkanˍ ve chaw htaꞈ leuˉ leh kʼawꞈ shiˍ daꞈ tcuh gaˇ ve pa taw, nawˬ yawˇ htaꞈ daꞈ ve te piˇ leh ga piˇ ve yoˬ. Sha gʼuˇ awˍ teˇ geh caˇ˗e tuˬ jehˬ laˇ htaˇ, nawˬ kaꞈ teˇ pawˆ pawˆ kʼo kʼai ve yoˬ. Peuˬ hkʼawꞈ nawˉ nawˬ kaꞈ awˍ hkʼaˬ htaˆ kaꞈ yawˇ geh teˇ geh caˇ ve yoˬ. Teˇ pawˆ pawˆ awˬ chawˇ chi ve teˇ gʼaˇ nawˬ maˇ dawˇ cawˇ ve tawˇ yaw ve yoˬ. Yaꞈ hkʼaˇ, peuˬ hkʼawꞈ nawˉ yawˇ maˇ daꞈ ve tawˇ yaw ve htaꞈ nawˬ awˬ pon kaꞈ a hkʼe leˇ ceh hpehꞈ ve yoˬ. Teˇ nyi hkʼe gaˬ leh kanˉ te peuˬ hkʼawꞈ nawˉ teˇ geh tzuhˬ ca dawˬ˗e tuˬ nawˬ htaꞈ jehˬ laˇ ve yoˬ. Leh nawˬ kaꞈ kʼai ve yoˬ. Maˇ maw, nawˬ kaꞈ yawˇ dawˇ ve hkʼe dawˇ leh yawˇ te ve hkʼe te tuˬ yoˬ hehˉ. Ngaˬ hui teˇ gʼaˇ le le htaꞈ daꞈ ve te piˇ leh  gʼa yawˆ yan piˇ cawˇ ve yoˬ. Ngaˬ hui a shu teˇ gʼaˇ geh awˬ chawˇ te ve kʼo, yawˇ hkʼe leˇ ve te hkʼaˇ dawˇ hkʼaˇ cawˬ la gʼa ve tehꞈ gʼa tawnˇ taˍ cawˇ ve yoˬ. (1 Kawˇrenˍhtuˆ 15:33) Yeˍsuˆ shaˍ tiꞈ peꞈ laˇ ve htaꞈ ngaˬ hui na yuˬ ve kʼo, Yaˬhoˉvaˬ ve awˬ liˇ awˬ hkʼaˇ htaꞈ maˇ gʼaꞈ te ve chaw geh ngaˬ hui awˬ chawˇ maˇ te. (2 Kawˇrenˍhtuˆ 6:15) Chi kawˆ tuˬ cawˬ leh ngaˬ hui gʼa jaw kʼai cawˇ ve tehꞈ shiˍ ve yoˬ.

12. Yeˍsuˆ ve awˬ laꞈ gʼawˇ lehˬ awˬ leh meuˇ ve awˬ yanˇ gaˬ la paˇ neˇ ve htaꞈ law chehˇ htaˇ aˬ htoꞈ ma te ve le?

¹² Awˬ laꞈ gʼawˇ hui awˬ leh meuˇ ve awˬ yanˇ hkʼaˬ htaˆ gaˬ la tuˬ law chehˇ htaˇ, yawˇ hui taꞈ iˉ maˇ chehˇ taˍ. Yeˍsuˆ yawˇ hui htaꞈ “Yeˍruˆsaˍlehnˍ venˇ htaꞈ tanˬ leh Yuˇdaꞈ mvuhˇ miˬ, Saˍmaˍriˆ mvuhˇ miˬ leh mvuhˇ leh miˬ leh hkʼa gaˬ” bon ca maˍ˗oꞈ tehꞈ kʼoˆ piˇ ve yoˬ. (Tcuh yaˇ 1:6-8) Awˬ laꞈ gʼawˇ hui kanˉ maˇ jaˇ. Yawˇ hui awˬ vuiˬ gʼa taˍ ve htaꞈ hkʼa dehꞈ te ve kʼo, yawˇ hui kaꞈ awˬ yanˇ htaꞈ vuiˬ hkʼawꞈ leh hkʼa dehꞈ yehˇ chehˇ ve yoˬ.

13. Aˬ htoꞈ ma te ngaˬ hui awˬ yanˇ htaꞈ vuiˬ hkʼawꞈ leh hkʼa dehꞈ yehˇ cawˇ ve le? (Kawˇlawˇsehˇ 4:5)

¹³ Kawˇlawˇsehˇ liꞈ 4:5 gʼaw sheˍ. Ngaˬ hui shaˍ tiꞈ hkʼa dehꞈ te tuˬ, ngaˬ hui ve awˬ yanˇ htaꞈ vuiˬ hkʼawꞈ leh hkʼaˬ hkʼe yehˇ cawˇ ve le tehꞈ gʼa dawˇ nyi cawˇ ve yoˬ. Awˬ lawn kʼo, maˇ dawˇ maˇ gaˇ ve awˬ lawn teˇ gʼaˇ le le kaꞈ gʼa hpuˇ puiˉ leh hkʼaˬ hkʼe htaˇ suh˗e tuˬ naˍ kaꞈ maˇ shiˍ.—Cuˇ yiˍ piˇ ve 9:11.

14-15. Ngaˬ hui awˬ yanˇ htaꞈ vuiˬ hkʼawꞈ leh hkʼaˬ hkʼe te hkʼa dehꞈ yehˇ gʼa tuˬ le? (Heˍbrehˇ 6:11, 12) (Awˬ han htaꞈ nyi sheˍ.)

 ¹⁴ Ngaˬ hui awˬ yanˇ htaꞈ hkʼa dehꞈ vuiˬ hkʼawꞈ leh yehˇ gʼa tuˬ, Yaˬhoˉvaˬ loˍ ve awˬ ceuˬ htaꞈ te leh yawˇ geh meuˆ daꞈ tuˬ coˇ caˇ sheˍ. (Yoˇhanˬ 14:21) Chi hkʼoˆ kaꞈ, Liꞈ hpu hkʼaw kʼoˆ laˇ ve hkʼe ngaˬ hui gʼaꞈ te tuˬ, “nyi ma yeˬ ve chaw, te kuiˬ dawˇ kuiˬ yeˬ ve chaw leh, Jawˇ mawˇ Yeˍsuˆ ve kanˉ htaꞈ hkʼaˬ htaˆ kaꞈ gʼaˇ hteꞈ te chehˇ ve chaw hpehꞈ piˇ˗oˆ.” (1 Kawˇrenˍhtuˆ 15:58) Ngaˬ hui chi hkʼe gʼaꞈ te chehˇ ve kʼo, ngaˬ hui ve a shaꞈ teꞈ hkʼaˇ lehˬ haiˬ ve miˬ guiˬ awˬ leh meuˇ ve awˬ yanˇ gaˬ la htaˇ, ngaˬ hui Yaˬhoˉvaˬ ve kanˉ chi aꞈ kehˉ te cawˇ ve law tehꞈ dawˇ leh nyi ma maˇ luˬ taˬ.—Maꞈhtehˍ 24:13; Roˉmaꞈ 14:8.

¹⁵ Chi beuꞈ teˇ co˗e ngaˬ hui Gʼuiˬ sha ve mvuhˇ miˬ daꞈ ve awˬ lawn sha tanˇ, miˬ guiˬ hkʼoˆ teˇ kaˬ le le lo gʼa hto toˇ ve tehꞈ Yeˍsuˆ beˆ maˍ laˇ chehˇ ve yoˬ. Ngaˬ hui hto toˇ tuˬ awˬ hkʼaˇ hkʼaˬ hkʼe gʼa te cawˇ ve yawˇ te maˍ laˇ ve yoˬ. Leh yawˇ kaꞈ Yaˬhoˉvaˬ ve kanˉ hkʼaˇ htaꞈ cuˇ leh ngaˬ hui htaꞈ laꞈ caˉ maˇ maˇ peꞈ laˇ ve yoˬ. (Maꞈhtehˍ 28:18-20) Yeˍsuˆ ngaˬ hui htaꞈ hkʼa dehꞈ ga laˇ chehˇ ve tehꞈ gʼa mawˬ ve yoˬ. Yaꞈ hkʼaˇ, ngaˬ hui kaꞈ ngaˬ hui ve awˬ vuiˬ htaꞈ gʼa te cawˇ ve yoˬ. Haiˬ ve miˬ guiˬ chi awˬ leh meuˇ ve awˬ yanˇ gaˬ la ve htaꞈ ngaˬ hui law chehˇ htaˇ, ngaˬ hui kaiˬ ve hkʼaw hto toˇ leh Liꞈ hpu gʼa maˍ ve yoˬ. Ngaˬ hui shaˍ tiꞈ te leh hkʼa dehꞈ gʼa shaw taˍ cawˇ ve yoˬ. Heˍbrehˇ liꞈ 6:11, 12 hkʼaw beˆ maˍ laˇ taˍ ve htaꞈ ngaˬ hui gʼaꞈ te htaˇ (Gʼaw sheˍ.) ngaˬ hui ve dawˇ law kuiˬ awˬ leh hkʼa gaˬ yeˬ chehˇ gʼa tuˬ yoˬ.

16. Ngaˬ hui aˬ htoꞈ ma te tuˬ dawˇ teh taˍ ve le?

¹⁶ Haiˬ ve miˬ guiˬ chi htaꞈ te luˬ tuˬ Yaˬhoˉvaˬ awˬ yanˇ tinˍ taˍ peuˬ. Oˇ ve teˇ yanˇ gaˬ kʼo, miˬ guiˬ awˬ suhˉ htaꞈ caˉ daꞈ ve Gʼuiˬ sha ka tiꞈ te taˍ ve tcuh kaˍ paˍ ve tawˇ hkawˇ hkʼa peu˗eˬ hpehꞈ la tcuh tuˬ yoˬ. Yaꞈ hkʼaˇ, teˇ pawˆ pawˆ kʼo, haiˬ ve miˬ guiˬ awˬ leh meuˇ ve awˬ yanˇ aˬ htoꞈ ma te haˆ maˇ gaˬ la ve le tehꞈ ngaˬ hui dawˇ ve yoˬ. Ngaˬ hui law ve maw jaˇ˗oˬ. Yaꞈ hkʼaˇ, Yaˬhoˉvaˬ ve awˬ nyi “awˬ tehˬ awˬ na hpehꞈ la tuˬ yoˬ.” (Haˍbaˍkuˆ 2:3) Ngaˬ hui “Gʼuiˬ sha htaꞈ ceh tiˉ law nyi tcuhˉ taˍ tuˬ yoˬ.” Leh “Gʼuiˬ sha htaꞈ ceh tiˉ [ngaˬ hui] nyi ma yeˬ chaweh taˍ leh law nyi tcuhˉ taˍ tuˬ yoˬ.”—Miˆhkaˍ 7:7.