Yo˗ma˗ra leh yawˇ ve awˬ nyi paˍ 2 gʼaˇ Ma˗se˗lonˇ leh E˗veh Gaw˗aˍtiˬmaˬlaˬ mvuhˇ miˬ hkʼaˆ ehˉ hkʼaw chehˇ ve yoˬ. Yo˗ma˗ra awˉ lawˉ Shaˉhkiˆhkanˍ ve chaw geh Liꞈ hpu henˇ ve yoˬ. Peuˬ hkʼawꞈ nawˉ awˬ nyi paˍ 2 gʼaˇ kaꞈ henˇ ve yoˬ. Yaꞈ hkʼaˇ, yawˇ hui shoꞈ shaꞈ ve gʼa hpuˇ ve lehˬ, yawˇ hui 3 gʼaˇ mehˆ cuˉ leh mehˆ cuˉ ve liꞈ gʼaw maˇ gʼa ve yoˬ. Chi htaꞈ pa taw, yawˇ hui htaꞈ Liꞈ hpu maˍ piˇ ve awˬ viˉ awˬ nyi lehˬ, liꞈ kʼoˆ henˇ tuˬ ve awˬ lawn hkʼaw ve gʼaw maˍ piˇ leh henˇ chehˇ htaˇ Liꞈ hpu awˬ tawn kaꞈ gʼaw maˍ piˇ ve yoˬ.

Chi hkʼoˆ kaꞈ, hpawnˬ daꞈ˗e tuˬ yawˇ hui 3 gʼaˇ kʼai maˇ gʼa ve yoˬ. Hpawnˬ daꞈ kuiˬ yehˬ lo kʼai tuˬ 40 miꞈ niꞈ hkʼe taw gʼa kʼai leh yawˇ hui hkʼaˇ yawˇ hui kʼai maˇ gʼa ve yoˬ. Yaꞈ hkʼaˇ, Hkriꞈ yaˇ awˬ moˍ hkʼaw ve awˬ viˉ awˬ nyi kaꞈ yawˇ hui 3 gʼaˇ hpawnˬ daꞈ˗e tuˬ teˇ pawˆ le le shiˍ kʼai piˇ ve yoˬ. Yawˇ hui 3 gʼaˇ mvuhˇ hpeuꞈ haˉ hpawnˬ daꞈ ve hkʼaw liꞈ henˇ yaˇ te˗oˬ htaˇ, yawˇ hui awˬ vuiˬ gu tuˬ awˬ viˉ awˬ nyi gʼa ga piˇ ve yoˬ. Yawˇ hui awˬ lawn awˬ tanˇ htaꞈ tawnˇ gʼa leh awˬ vuiˬ te gʼa tuˬ, awˬ viˉ awˬ nyi gʼaw maˍ piˇ ve yoˬ.

Ha pa 5 maˬ 2019 hkʼawꞈ htaˇ, yawˇ hui ve hkʼaˆ hkʼaw Hkriꞈ yaˇ awˬ moˍ hpawnˬ daꞈ ve cawˬ ve yoˬ. Leh hkʼaˬ htaˆ kaꞈ gʼuˇ suhˍ peuˍ ve te chehˇ ve teˇ ca oˇ kaˬ lo ca chehˇ la ve yoˬ. Awˬ hpawˇ awˬ miˇ ma chi teˇ ca lehˬ, yawˇ hui 3 gʼaˇ mehˆ cuˉ ve liꞈ gʼaw gʼa leh bvuhꞈ gʼa tuˬ ga piˇ tuˬ dawˇ teh taˍ ve yoˬ. Awˬ viˉ awˬ nyi chi teˇ ca mehˆ cuˉ ve liꞈ gʼaw leh bvuhꞈ tuˬ awˬ hkʼaˇ maˇ shiˍ ve htawˇ, yawˇ hui 3 gʼaˇ htaꞈ maˍ piˇ tuˬ, yawˇ huiˉ maˬ liꞈ kʼoˆ teh kuiˬ lo kʼai leh mehˆ cuˉ ve liꞈ gʼaw leh bvuhꞈ tuˬ awˬ hkʼaˇ henˇ ve yoˬ.

Laiˉ ha pa peuˬ hkʼawꞈ nawˉ, Yo˗ma˗ra, Ma˗se˗lonˇ, leh E˗veh yawˇ hui mehˆ cuˉ ve liꞈ hkʼa sha sha˗ehˬ ve htaꞈ gʼaw gʼa ve yoˬ. Chi yawˇ hui co ha hpawˇ uiˍ la mvuh la leh Yaˬhoˉvaˬ geh kaꞈ gʼaˇ hteꞈ meuˆ daꞈ tuˬ te piˇ ve yoˬ. a Chi teˇ hkui yawˇ hui 3 gʼaˇ hkʼaˬ htaˆ kaꞈ gʼuˇ suhˍ peuˍ ve te chehˇ ve yoˬ. Ma˗se˗lonˇ ga piˇ shehˍ hpaˇ hpehꞈ leh, yawˇ hui 3 gʼaˇ teˇ shinˉ ve hkʼaw Gʼuiˬ sha ve kanˉ kaiˬ ve hkʼaw te ve yoˬ. Yawˇ hui kaiˬ ve pa taw, awˬ viˉ awˬ nyi kaꞈ yawˇ hui htaꞈ henˇ yuˬ ve yoˬ.

Awˬ viˉ awˬ nyi yawˇ hui htaꞈ haꞈ laˇ ve awˬ bon uiˍ jaˇ tehꞈ kʼoˆ ve yoˬ. Yo˗ma˗ra kʼoˆ ve, “Shaˉhkiˆhkanˍ ve chaw htaꞈ shiˍ daꞈ ve awˉ lawˉ teˇ pawˆ htaˇ, yawˇ hui awˬ tehˬ ve Hkriꞈ yaˇ haꞈ daꞈ ve hkʼe hpehꞈ ve tehꞈ ngaˬ hui shiˍ ve yoˬ.” Ma˗se˗lonˇ kʼoˆ ve, “ngaˬ hui lehˬ Hkriꞈ yaˇ awˬ moˍ hkʼaw haꞈ lu diˬ ve awˬ chawˇ cawˬ leh ngaˬ hui haꞈ daꞈ ve pa taw, miˬ guiˬ chi hkʼoˆ lo Shaˉhkiˆhkanˍ ve chaw lehˬ teˇ yehˬ kʼa hkʼaw ve chaw hkʼe hpehꞈ ve yoˬ. Yo˗ma˗ra leh yawˇ ve awˬ nyi paˍ teˇ hpaˍ miˬ guiˬ chi hkʼoˆ lo miˬ guiˬ awˬ suhˉ hpehꞈ la ve htaꞈ yawˇ hui awˬ meu˗eˇ awˬ meu˗eˇ gʼa mawˬ tuˬ dawˇ law chehˇ ve yoˬ.—Chiˇ mvuh ve 37:10, 11; Iˉsaˍyaˆ 35:5.