“Ngaꞈ viˉ ngaꞈ nyi yaˇ ngaˬ geh awˬ lawn cawˬ la htaˇ, ngaˬ yawˇ ve kʼawˍ peˍ htaꞈ nyiˉ piˇ leh dawˆ pehˍ gaˇ jaˇ”.—Pawˇluꞈ.

“Aˉ hkʼaw chehˇ htaˇ awˬ lawn a ciˉ cawˬ ve kʼo, ngaˬ nyi ma laꞈ haˉ zuhˆ la ve yoˬ. Yehˬ hkʼaw ve mawˇ hkʼa peu˗eˬ htaꞈ ngaˬ te luˬ ve yoˬ.”—Maˍhkoˆ.

Ngaˬ hui chi hkʼe taw taw maˇ hpehꞈ ve htawˇ, teˇ pawˆ pawˆ kʼo, a shu yawˇ awˬ to htaꞈ maˇ gʼaˇ puiˉ ve awˬ lawn cawˬ ve yoˬ. Chaw yaˇ awˉ lawˉ teˇ gʼaˇ Aˍdanˍ venˇ baˆ te ve htaꞈ pa taw yoˬ. Chi ngaˬ hui te yaꞈ tuˬ te laˇ ve sha jaˇ. (Roˉmaꞈ 5:12) Chaw teˇ hpaˍ hpaˍ Pawˇluꞈ leh Maˍhkoˆ hkʼa shuˍ a shu yawˇ awˬ to htaꞈ gʼaˇ puiˉ tuˬ haˍ jaˇ. Chaw teˇ hpaˍ hpaˍ a shu yawˇ ve dawˇ hkʼaˇ htaꞈ gʼaˇ puiˉ tuˬ haˍ jaˇ. Yawˇ hui kawˆ ve maˇ heˆ leh maˇ daꞈ ve dawˇ hkʼaˇ cawˬ ve pa taw yoˬ. Chaw teˇ hpaˍ hpaˍ pehꞈ ve tzuhˆ ve maˇ te tuˬ, tzuhˬ dawˬ bvuhˆ ve maˇ te tuˬ, maˇ heˆ leh awˬ yeꞈ caˉ puiˉ ve naˆ tsuhˇ maˇ yehˇ tuˬ, a shu yawˇ awˬ to htaꞈ gʼaˇ puiˉ tuˬ haˍ jaˇ.

A shu yawˇ ve dawˇ hkʼaˇ maˇ heˆ leh te gaˇ ve, loˍ ve htaꞈ maˇ gʼaˇ puiˉ ve chaw lehˬ a shu yawˇ awˬ to shoꞈ shaꞈ ve tiˉ gʼa hpuˇ ve yoˬ. Yaꞈ hkʼaˇ, ngaˬ hui a shu yawˇ awˬ to chi hkʼe ve gʼa hpuˇ tcuh tuˬ maˇ loˍ. Ngaˬ hui hkʼaˬ hkʼe te gʼa tuˬ le? Chi hkʼe te gʼa tuˬ a shu yawˇ awˬ to htaꞈ gʼa gʼaˇ puiˉ ve yoˬ. Naˬ hkawˇ 3 maˬ htaꞈ teˇ geh nyi sheˍ. (1) A shu yawˇ awˬ to htaꞈ gʼaˇ puiˉ ve aˬ htoꞈ ma kʼoˆ gaˇ ve le? (2) Aˬ htoꞈ ma te a shu yawˇ awˬ to htaꞈ gʼaˇ puiˉ ve a yeˇ uiˍ jaˇ ve le? (3) A shu yawˇ ve awˬ to htaꞈ hkʼa dehꞈ gʼaˇ puiˉ tuˬ lehˬ “Awˬ ha hpu ve awˬ shiˍ nawꞈ la ve” hkʼaw ve teˇ ceuˬ hpehꞈ ve yoˬ. (Gaˍlaˍtiˆ 5:22, 23) Peuˬ leh a shu yawˇ awˬ to htaꞈ maˇ gʼaˇ puiˉ tehꞈ dawˇ ve kʼo, hkʼaˬ hkʼe te cawˇ ve teˇ geh nyi sheˍ.

A shu yawˇ awˬ to htaꞈ yuˬ tiˍ gʼaˇ puiˉ ve chaw lehˬ yawˇ te gaˇ ve awˬ ceuˬ htaꞈ teˇ pawˆ le le maˇ te. Tawˇ yaw ve leh Gʼuiˬ sha nyi hkʼaˇ maˇ suh ve awˬ ceuˬ htaꞈ yawˇ maˇ te.

A shu yawˇ awˬ to htaꞈ gʼaˇ puiˉ ve hkʼaˬ hkʼe kʼoˆ gaˇ ve Yeˍsuˆ te maˍ laˇ ve yoˬ. Liꞈ hpu hkʼaw kʼoˆ ve, “shu yawˇ htaꞈ hkʼa mvuhˇ hkʼa na kʼoˆ htaˇ, yawˇ shu htaꞈ hkʼa mvuhˇ hkʼa na maˇ kʼawꞈ kʼoˆ. Yawˇ gʼa tuꞈ gʼa hkanˍ ve teˇ yanˇ, shu htaꞈ yawˇ maˇ kʼawꞈ te hkʼawꞈ. Hteˇ lehˍ cawˇ lehˍ Suhˉ jehˬ shehˍ hpaˇ Gʼuiˬ sha ve laꞈ hkʼaw lo yawˇ awˬ to htaꞈ aꞈ piˇ ve yoˬ.” (1 Peˍtruˆ 2:23) Canˇ paˍ yawˇ htaꞈ tawˍ piˇ leh suhˆ hkuiˉ daw hkʼoˆ htaꞈ pehˍ piˇ htaˇ, Yeˍsuˆ a shu yawˇ awˬ to htaꞈ gʼaˇ puiˉ ve awˬ tehˬ awˬ na chi hkʼe te ve yoˬ. (Maꞈhtehˍ 27:39-44) Chi awˬ gʼuˇ suhˍ htaˇ, bon awˬ hoˉ teˇ hpaˍ yawˇ tawˇ yaw ve awˬ hkʼaˇ yuˬ yaꞈ gaˇ htaˇ kaꞈ Yeˍsuˆ yawˇ awˬ to htaꞈ hkʼa dehꞈ gʼaˇ puiˉ ve yoˬ. (Maꞈhtehˍ 22:15-22) Yuˇdaꞈ chaw yawˇ htaꞈ beuꞈ leh haˉ pui gʼawˆ leh baˬ pehˍ˗aꞈ te htaˇ kaꞈ, yawˇ lehˬ daꞈ jaˇ ve henˇ yuˬ kuiˬ hpehꞈ ve yoˬ. Yawˇ te hkʼawꞈ cawˇ ve kaꞈ, “Yeˍsuˆ vaꞈ sheˬ leh bon yehˬ lonˉ awˬ hkʼaw lo tawˆ kʼai ve yoˬ.”—Yoˇhanˬ 8:57-59.

Ngaˬ hui Yeˍsuˆ htaꞈ henˇ yuˬ gʼa˗aw laˇ? Gʼa ve yoˬ. Ngaˬ hui teˇ ceuˬ ceuˬ te gʼa ve yoˬ. Tcuh yaˇ Peˍtruˆ kʼoˆ ve, “Hkriꞈ htawˇ nawˬ hui awˬ pon gʼa tuꞈ gʼa hkanˍ leh, nawˬ hui yawˇ ve hkui ha awˬ hkʼaˇ suh gʼaꞈ kʼai tuˬ, nawˬ hui awˬ pon henˇ kuiˬ jawˬ kuiˬ yawˇ te taˉ peuˬ.” (1 Peˍtruˆ 2:21) Ngaˬ hui maˇ biˇ ve chaw hpehꞈ ve htawˇ, ngaˬ hui a shu yawˇ ve awˬ to htaꞈ gʼaˇ puiˉ tuˬ, Yeˍsuˆ ve hkui ha awˬ hkʼaˇ suh gʼaꞈ te gʼa ve yoˬ. Ngaˬ hui chi hkʼe te gʼa tuˬ aˬ htoꞈ ma te a yeˇ uiˍ jaˇ ve le?

Yaˬhoˉvaˬ ngaˬ hui htaꞈ nyi hkʼaˇ suh tcuh gaˇ ve kʼo, ngaˬ hui a shu yawˇ awˬ to htaꞈ gʼa gʼaˇ puiˉ ve yoˬ. Ngaˬ hui ka tiꞈ yeˬ ve hkʼaw Yaˬhoˉvaˬ ve kanˉ te maw jaˇ˗oˬ ve htawˇ, ngaˬ hui kʼoˆ ve, te ve, a shu yawˇ awˬ to htaꞈ maˇ gʼaˇ puiˉ ve kʼo, ngaˬ hui yawˇ ve awˬ chawˇ maˇ kʼawꞈ hpehꞈ.

Moˉseˍ ve awˬ lawn htaꞈ dawˇ nyi sheˍ. Yawˇ “miˬ guiˬ hkʼoˆ chehˇ ve chaw hkʼa peu˗eˬ aꞈ kehˉ nyi ma nuˇ nehˬ jaˇ.” (Heh puiˉ hkʼaw 12:3) Moˉseˍ lehˬ Iˉsaˍreˍlaˆ chaw hkʼanˇ maˍ piˇ ve htaꞈ laiˉ chi hkʼawꞈ yeunˇ hkanˍ˗oˬ ve yoˬ. Yaꞈ hkʼaˇ, teˇ nyi gaˬ leh yawˇ awˬ to htaꞈ yuˬ tiˍ maˇ gʼaˇ. Iˉsaˍreˍlaˆ chaw iˉ kaˆ maˇ gʼa dawˬ tehꞈ hkʼanˇ maˍ piˇ htaˇ, yawˇ beuꞈ jaˇ. Moˉseˍ Iˉsaˍreˍlaˆ chaw htaꞈ tawˇ yaw piˇ ve hehnˇ jaˇ. Yawˇ kʼoˆ ve, “ngaˬ huiˉ maˬ nawˬ hui awˬ pon haˉ hpawˇ chi ve hkʼaw iˉ kaˆ gʼa tawˆ la piˇ tuˬ laˇ?”—Heh puiˉ hkʼaw 20:2-11.

Moˉseˍ yawˇ awˬ to htaꞈ maˇ yuˬ tiˍ gʼa. Yaˬhoˉvaˬ htaꞈ maˇ yawˆ yan leh anˇ tuˬ te leh iˉ kaˆ tawˆ la piˇ shehˍ hpaˇ Yaˬhoˉvaˬ hpehꞈ ve tehꞈ yawˇ maˇ kʼoˆ. (Chiˇ mvuh ve 106:32, 33) Gʼuiˬ sha ka tiꞈ te taˍ ve mvuhˇ miˬ hkʼaw Moˉseˍ htaꞈ maˇ loꞈ˗e tcuh. (Heh puiˉ hkʼaw 20:12) Oˇ ve teˇ yanˇ Moˉseˍ yawˇ awˬ to htaꞈ maˇ yuˬ tiˍ gʼaˇ ve lehˬ yawˇ ve a shaꞈ teꞈ ve teˇ co˗e nyi ma luˬ jaˇ ve yoˬ hehˉ.—Bon maˍ ve 3:23-27.

Ngaˬ hui henˇ yuˬ tuˬ aˬ htoꞈ ma le? Ngaˬ hui awˬ tehˬ ve hkʼaw laiˉ hkʼawꞈ chehˇ˗oˬ ve htawˇ, ngaˬ hui htaꞈ nyi ma maˇ sha tuˬ te laˇ ve, maˇ heˆ leh gʼa maˍ piˇ cawˇ ve chaw htaꞈ maˇ yawˆ yan ve tawˇ ngaˬ hui maˇ yaw piˇ cawˇ ve yoˬ. (Eˇfeˇsuꞈ 4:32; Kawˇlawˇsehˇ 3:12) Ngaˬ hui a shaꞈ maˇ la htaˇ, teˇ pawˆ pawˆ kʼo yeunˇ hkanˍ gʼaˇ tuˬ kaꞈ haˍ jaˇ. Yaꞈ hkʼaˇ, Yaˬhoˉvaˬ geh daꞈ ve awˬ meh cawˬ maw jaˇ˗oˬ ve maˇ luˬ tcuh gaˇ ve pa taw, ngaˬ hui a shu yawˇ awˬ to htaꞈ yuˬ tiˍ maˇ gʼaˇ puiˉ ve maˇ te gaˇ. Hkʼaˬ hkʼe te a shu yawˇ awˬ to htaꞈ hkʼa dehꞈ gʼaˇ puiˉ tuˬ le?

Daꞈ kehˬ ve awˬ ha hpu ga laˇ tuˬ bon lawˬ sheˍ. Aˬ htoꞈ ma te ngaˬ hui chi hkʼe te cawˇ ve le? A shu yawˇ awˬ to htaꞈ gʼaˇ puiˉ ve lehˬ daꞈ kehˬ ve Awˬ ha hpu hkʼaw ve awˬ shiˍ teˇ ceuˬ hpehꞈ ve pa taw yoˬ. Yaˬhoˉvaˬ yawˇ geh daꞈ kehˬ ve Awˬ ha hpu lawˬ ve chaw htaꞈ yawˇ piˇ ve yoˬ. (Luˉkaꞈ 11:13) A shu yawˇ awˬ to htaꞈ gʼaˇ puiˉ tuˬ, Yaˬhoˉvaˬ daꞈ kehˬ ve Awˬ ha hpu peꞈ laˇ tuˬ yoˬ. (Hpiˇliˇpiˆ 4:13) Daꞈ kehˬ ve Awˬ ha hpu hkʼaw ve awˬ shiˍ awˬ nu ve kaꞈ cawˬ tuˬ yawˇ ga laˇ tuˬ yoˬ. Tawˇ pa haˉ te kʼo, haꞈ pehnˇ ve lehˬ ngaˬ hui a shu yawˇ awˬ to htaꞈ gʼaˇ puiˉ tuˬ ga laˇ ve yoˬ.—1 Kawˇrenˍhtuˆ 13:5.

A shu yawˇ awˬ to htaꞈ maˇ gʼaˇ puiˉ tuˬ te laˇ ve haˍ jaˇ ve awˬ ceuˬ htaꞈ jaw kʼai sheˍ. Tawˇ pa haˉ te kʼo, vehˆsaiˉ hkʼaw maˇ heˆ leh awˬ han hkʼaw maˇ daꞈ ve awˬ ceuˬ htaꞈ caˉ daꞈ ve ngaˬ hui maˇ nyi cawˇ. (Eˇfeˇsuꞈ 5:3, 4) Awˬ tehˬ kʼo, ngaˬ hui htaꞈ maˇ daꞈ ve awˬ ceuˬ  te laˇ ve hkʼa peu˗eˬ htaꞈ gʼa jaw kʼai ve yoˬ. (Tawˇ naˉ ve 22:3; 1 Kawˇrenˍhtuˆ 6:12) Tawˇ pa haˉ te kʼo, pehꞈ ve tzuhˆ ve hpawˇ nyi ma nuˇ puiˉ ve chaw lehˬ, chi htaꞈ caˉ daꞈ ve awˬ han nyi ve maˇ heˆ leh liꞈ gʼaw ve ceh kaꞈ maˇ te cawˇ.

A shu yawˇ awˬ to htaꞈ gʼaˇ puiˉ tuˬ beˆ maˍ laˇ ve htaꞈ gʼaꞈ te tuˬ haˍ jaˇ tehꞈ dawˇ ve yoˬ. Yaꞈ hkʼaˇ ngaˬ hui coˇ caˇ ve kʼo, a shu yawˇ awˬ to htaꞈ gʼaˇ puiˉ tuˬ, Yaˬhoˉvaˬ daꞈ kehˬ ve Awˬ ha hpu peꞈ laˇ tuˬ yoˬ. (2 Peˍtruˆ 1:5-8) Ngaˬ hui ve dawˇ hkʼaˇ, tawˇ yaw ve, te ve, a shu yawˇ awˬ to htaꞈ gʼaˇ puiˉ tuˬ Gʼuiˬ sha ga laˇ tuˬ yoˬ. Pawˇluꞈ leh Maˍhkoˆ awˉ lawˉ htaˇ kʼoˆ peuˬ ve htaꞈ ngaˬ hui gʼa mawˬ ve yoˬ. Yawˇ huiˉ maˬ nyi ma haw puiˉ ve htaꞈ yuˬ tiˍ gʼaˇ ve yoˬ. Awˬ nu ve teˇ gʼaˇ lehˬ awˬ viˉ awˬ nyi hawˉ hkʼaˆ kaˇ gʼaꞈ htaˇ nyi ma haw puiˉ ve pa taw, awˬ nu ve teˇ gʼaˇ kaˇ gʼaꞈ chehˇ ve htaꞈ deˇ daꞈ jaw ve yoˬ. Yawˇ hkʼaˬ hkʼe te ve le? Yawˇ kʼoˆ ve, “awˬ lawn chi htaꞈ caˉ daꞈ ve ngaˬ teˇ nyi le le bon lawˬ ve yoˬ. A shu yawˇ awˬ to htaꞈ gʼaˇ puiˉ tuˬ ve awˬ lawn ngaˬ chaˬ nyi leh ngaˬ htaꞈ ga laˇ gʼa ve Liꞈ hpu awˬ tawn htaꞈ tawnˇ taˍ ve yoˬ. Ngaˬ chi hkʼe te ve laiˉ hkʼawꞈ gaˬ˗oˬ ve htawˇ, yaꞈ nyi ngaˬ nyi ma gawˬ lehˍ cawˬ tuˬ ve yoˬ tehꞈ chi teˇ hkui teˇ shawˉ le le ngaˬ awˬ to htaꞈ shaˍ tiꞈ gʼa piˇ chehˇ sheˍ. Chi ga laˇ gʼa jaˇ. Ngaˬ tinˍ daꞈ˗aꞈ ve cawˬ kʼo, haˆ haˆ maˇ gʼa kʼai tuˬ, awˉ lawˉ tawˆ˗e ve yoˬ.”

Teˇ pawˆ pawˆ kʼo, ngaˬ hui a shu yawˇ awˬ to htaꞈ maˇ gʼaˇ puiˉ ve pa taw, Yaˬhoˉvaˬ geh bon lawˬ tuˬ yaꞈ taw jaˇ tehꞈ dawˇ ve yoˬ. Yaꞈ hkʼaˇ, awˬ tehˬ kʼo, awˬ yanˇ chi lehˬ bon lawˬ cawˇ ve yoˬ. Chi htaꞈ pa taw, Yaˬhoˉvaˬ geh bon laꞈ haˆ lawˬ sheˍ. Yawˇ venˇ baˆ hpehˇ laˇ tuˬ leh yawˇ ga laˇ tuˬ lawˬ sheˍ. Nawˬ maˇ kʼawꞈ te yaꞈ tuˬ dawˇ teh taˍ sheˍ. (Chiˇ mvuh ve 51:9-11) Nawˬ nyi ma awˬ tawˬ hkʼa gaˬ bon lawˬ ve htaꞈ Yaˬhoˉvaˬ maˇ na laˇ tehꞈ taˇ dawˇ. (Chiˇ mvuh ve 102:17) Tcuh yaˇ Yoˇhanˬ ngaˬ hui maˇ leunˇ tuˬ ga laˇ ve yoˬ. Yawˇ kʼoˆ ve, “[Gʼuiˬ sha] ve Yaˇ hpu Yeˍsuˆ Hkriꞈ ve awˬ suhˍ lehˬ, ngaˬ hui ve venˇ baˆ teˇ ceuˬ le le htaꞈ tsuhˇ baˬ laˇ chehˇ ve yoˬ.” (1 Yoˇhanˬ 1:7; 2:1; Chiˇ mvuh ve 86:5) Yaˬhoˉvaˬ ve kanˉ te ve chaw htaꞈ caˉ leh venˇ baˆ hpehˇ daꞈ tuˬ kʼoˆ laˇ ve htaꞈ tawnˇ taˍ sheˍ. Hkʼe te leh yawˇ ngaˬ hui htaꞈ kaꞈ chi hkʼe te laˇ ve tehꞈ yonˍ gʼa ve yoˬ.—Maꞈhtehˍ 18:21, 22; Kawˇlawˇsehˇ 3:13.

Moˉseˍ heh puiˉ hkʼaw chehˇ htaˇ yawˇ awˬ to htaꞈ maˇ gʼaˇ puiˉ ve pa taw, Yaˬhoˉvaˬ nyi hkʼaˇ maˇ suh. Yaꞈ hkʼaˇ, Gʼuiˬ sha yawˇ htaꞈ venˇ baˆ hpehˇ piˇ ve yoˬ. Liꞈ hpu hkʼaw Moˉseˍ lehˬ yonˍ yeˬ jaˇ ve henˇ yuˬ tuˬ hpehꞈ ve tehꞈ kʼoˆ taˍ ve yoˬ. (Bon maˍ ve 34:10; Heˍbrehˇ 11:24-28) Yaˬhoˉvaˬ ka tiꞈ te taˍ ve mvuhˇ miˬ hkʼaw Moˉseˍ loꞈ˗e tuˬ a hkaw˗anˬ maˇ piˇ. Yaꞈ hkʼaˇ, Paˍraˍdiˇsuˆ hkʼaw co co taiˍ taiˍ ve dawˇ law kuiˬ Gʼuiˬ sha Moˉseˍ htaꞈ cawˬ tcuh ve yoˬ. Ngaˬ hui a shu yawˇ awˬ to htaꞈ yuˬ tiˍ gʼaˇ puiˉ ve kʼo, Moˉseˍ hkʼa shuˍ ngaˬ hui dawˇ law taˍ ve yoˬ.—1 Kawˇrenˍhtuˆ 9:25.