Yaˬhoˉvaˬ yawˇ ve chaw teˇ gʼaˇ le le htaꞈ beˆ ma piˇ chehˇ ve tehꞈ ngaˬ hui yonˍ gʼa leh “awˬ leh meuˇ ve awˬ nyi awˬ haˉ teˇ hpaˍ awˬ hkʼaw lo” Gʼuiˬ sha ve chaw yawˇ geh meuˆ daꞈ tuˬ loˍ ve teˇ ceuˬ le le yawˇ ga laˇ ve yoˬ. (2 Tiˆmoˉseˍ 3:1) Yaꞈ hkʼaˇ, Gʼuiˬ sha ve hkawˇ na maˇ na ve ngaˬ hui htaꞈ cawˬ ve yoˬ. Iˉsaˍreˍlaˆ chaw hui heh puiˉ hkʼaw chehˇ htaˇ ve htaꞈ ngaˬ hui tehˆ daꞈ gʼa ve yoˬ. Yawˇ hui behˬ heh ma hkawˇ gʼa kaˇ htaˇ, na leh teˇ ceuˬ ceuˬ gʼa te ve yoˬ.

Yaˬhoˉvaˬ Moˉseˍ htaꞈ hpu behˬ heh ma 2 maˬ te tcuh ve yoˬ. “Chaw yaˇ teˇ hpaˍ htaꞈ kuˬ hpawnˬ tuˬ leh, aˉ po kʼo hpaˆ htaˇ yehˇ tuˬ” behˬ heh ma te tcuh ve yoˬ. (Heh puiˉ hkʼaw 10:2) Paw hkuˇ teˇ hpaˍ behˬ heh ma meuˆ ve awˬ hkawˇ peun daꞈ ve yoˬ. Behˬ heh ma hkawˇ gʼa kaˇ htaˇ, yawˇ hui hkʼaˬ hkʼe gʼa te cawˇ ve shiˍ ve yoˬ. (Heh puiˉ hkʼaw 10:3-8) Chi beuꞈ teˇ co˗e Gʼuiˬ sha ve chaw kaꞈ beˆ maˍ laˇ ve awˬ hkʼaˇ laiˉ hkʼaˇ cawˬ ve yoˬ. Oˇ htaˇ teˇ co˗e behˬ heh ma meuˆ ve awˬ hkawˇ htaꞈ shuˍ ve awˬ hkʼaˇ 3 hkʼaˇ htaꞈ teˇ geh nyi sheˍ. Chi beuꞈ teˇ co˗e Gʼuiˬ sha ve chaw awˬ moˍ lonˉ hpawnˬ la tuˬ kuˬ laˇ ve yoˬ. Hkriꞈ yaˇ awˬ moˍ hkʼa peu˗eˬ hkʼaw Gʼuiˬ sha ve kanˉ hkʼaˇ pa ve cawˬ htaˇ, nyi haꞈ shaˉ paˍ Hkriꞈ yaˇ awˬ moˍ htaꞈ ga piˇ tuˬ gʼa henˇ ve yoˬ.

Yaˬhoˉvaˬ Iˉsaˍreˍlaˆ chaw hkʼa peu˗eˬ mvuhˇ nyi tawˆ hpawˇ daꞈ kehˬ ve aˉ po kʼo bon yehˬ yehˬ miˉ hpeꞈ lo hpawnˬ la tuˬ paw hkuˇ behˬ heh ma 2 maˬ htaꞈ meuˆ ve yoˬ. (Heh puiˉ hkʼaw 10:3) Daꞈ kehˬ ve aˉ po kʼoˍ awˬ paˇ lo chehˇ taˍ ve awˬ ceuˬ awˬ hkʼaˇ teˇ chaw ceuˬ le le awˬ hkawˇ oˇ ve htaꞈ gʼa kaˇ tuˬ 4 moˍ pehˬ taˍ ve yoˬ. Awˬ hkawˇ oˇ ve htaꞈ gʼa kaˇ htaˇ, awˬ paˇ lo chehˇ ve chaw haˆ gaˬ la ve yoˬ. Vuiˇ kuiˬ lo chehˇ ve chaw lehˬ gaˬ la tuˬ gʼa coˇ caˇ jaˇ. Yawˇ hui chehˇ vuiˇ ve maˇ kʼoˆ awˬ paˇ lo chehˇ ve maˇ kʼoˆ yawˇ hui teˇ gʼaˇ le le hpawnˬ la leh Yaˬhoˉvaˬ hkawˇ na la tuˬ heuˆ gaˇ ve yoˬ.

Chi beuꞈ teˇ co˗e ngaˬ hui daꞈ kehˬ ve aˉ po kʼoˍ awˬ paˇ lo maˇ gʼa hpawnˬ la˗o. Yaꞈ hkʼaˇ, ngaˬ hui Gʼuiˬ sha ve chaw geh hpawnˬ la tuˬ kuˬ laˇ ve yoˬ. Kuˬ laˇ ve chi lehˬ hpawnˬ daꞈ lonˉ 3 nyi leh awˬ nu ve hpawnˬ daꞈ ve hkʼaw beˆ maˍ laˇ ve a yeˇ uiˍ ve htaꞈ ngaˬ hui gʼa shiˍ ve yoˬ. Chi Yaˬhoˉvaˬ ve chaw miˬ guiˬ chi hkʼoˆ lo ve hkʼa peu˗eˬ gu teh taˍ laˇ ve htaꞈ awˬ bon hkʼa shuˍ gʼa ve yoˬ. Chi htaꞈ pa taw, kuˬ laˇ ve htaꞈ kaˇ leh hpawnˬ la ve chaw teˇ gʼaˇ le le ha lehˬ ve yoˬ. Awˬ tehˬ kʼo, awˬ viˉ awˬ nyi teˇ hpaˍ laˬ vuiˇ jaˇ ve htawˇ, coˇ caˇ leh laˬ ve awˬ hpfuhˇ hkʼawꞈ jaˇ tehꞈ haꞈ yuˬ ve yoˬ.

Vuiˇ jaˇ kuiˬ awˬ moˍ hkʼaw chehˇ ve chaw kʼo˗ehꞈ? Awˬ hkʼeun awˬ shaˉ awˬ shaˉ tawˆ la ve pa taw, vuiˇ jaˇ kuiˬ chehˇ ve chaw htawˇ, yawˇ hui kaꞈ teˇ gʼaˇ hpawnˬ daꞈ kuiˬ hkʼaw hpawnˬ daꞈ chehˇ ve htaꞈ shuˍ leh awˬ bon gʼa ve yoˬ. Tawˇ pa haˉ te kʼo, Biˬniˬ Beˍteˍlaˆ hkʼaw awˬ tcuhˆ puiˍ lonˉ hkʼaw ve awˬ tan ca guiˇ la ve yoˬ. Oˇ teˇ yanˇ Niˇjaˇ mvuhˇ miˬ A˗riˆ venˇ chi ve hkʼaw VDO awˬ han feu piˇ leh nyi tcuh ve yoˬ. Oˇ kaˬ lo lehˬ Sha˗ha˗raˬ ve shehˇ de mvuhˇ miˬ leh shi duˇ kuiˬ awˬ ti hpehꞈ ve yoˬ. Oˇ ve teˇ pawˆ hpawnˬ daꞈ ve VDO awˬ han feu piˇ ve, awˬ viˉ awˬ nyi leh nyi ma pfuhˇ ve chaw hkʼa peu˗eˬ 21 gʼaˇ nyi ve yoˬ. Yawˇ hui chehˇ vuiˇ jaˇ ve htawˇ, 44,131 gʼaˇ awˬ moˍ hkʼaw yawˇ hui kaꞈ teˇ gʼaˇ hpehꞈ ve tehꞈ dawˇ ve yoˬ. Awˬ viˉ awˬ nyi teˇ gʼaˇ  kʼoˆ ve, “hpawnˬ daꞈ ve chi teˇ pawˆ VDO awˬ han feu laˇ ve htaꞈ gʼa nyi ve ngaˬ hui nyi ma awˬ tawˬ hkʼa gaˬ awˬ bon uiˍ jaˇ. Nawˬ hui ngaˬ hui htaꞈ hkʼaˬ hkʼe taw haꞈ ve shiˍ la ve yoˬ.”

Iˉsaˍreˍlaˆ chaw paw hkuˇ behˬ heh ma teˇ maˬ ceh tiˉ meuˆ htaˇ, awˬ ceuˬ awˬ hkʼaˇ teˇ ceuˬ le le htaꞈ nyi haꞈ shaˉ paˍ “awˬ hoˉ awˬ naˬ teˇ hpaˍ htaꞈ ceh tiˉ” daꞈ kehˬ ve aˉ po kʼo hkʼaw gʼa hpawnˬ daꞈ la cawˇ ve yoˬ. (Heh puiˉ hkʼaw 10:4) Yawˇ hui ve awˬ ceuˬ awˬ hkʼaˇ htaꞈ kanˉ te ve awˬ vuiˬ pehˬ piˇ gʼa tuˬ, awˬ hoˉ awˬ naˬ teˇ hpaˍ Moˉseˍ geh gʼa henˇ ve yoˬ. Nawˬ kaꞈ awˬ ceuˬ awˬ hkʼaˇ ve awˬ hoˉ awˬ naˬ teˇ gʼaˇ hpehꞈ ve kʼo, oˇ kaˬ lo chehˇ leh maˍ laˇ ve htaꞈ awˬ bon gʼa tuˬ nawˬ kaꞈ te gʼa ve hkʼe coˇ caˇ leh te ve maˇ heˆ laˇ?

Chi beuꞈ teˇ co˗e Hkriꞈ yaˇ awˬ moˍ hkʼaw nyi haꞈ shaˉ paˍ lehˬ “awˬ hoˉ awˬ naˬ” maˇ heˆ leh Gʼuiˬ sha ve yawˬ awˬ moˍ yawˇ hui htaꞈ nyi haꞈ shaˉ tcuh taˍ ve awˬ hkʼoˆ jawˇ mawˇ hkʼe kaꞈ maˇ gʼa te. (1 Peˍtruˆ 5:1-3) Yaꞈ hkʼaˇ, yawˇ hui te gʼa ve hkʼe Gʼuiˬ sha ve yawˬ awˬ moˍ htaꞈ hkʼa dehꞈ nyi haꞈ shaˉ ve yoˬ. Gʼuiˬ sha ve kanˉ te tuˬ Liꞈ henˇ yehˬ hkʼaw awˬ leuˉ kʼawꞈ shiˍ maˇ la tuˬ, kuˬ piˇ htaˇ yawˇ hui laꞈ haˉ kʼai gʼa tuˬ gu hehnˇ taˍ ve yoˬ. Liꞈ henˇ yehˬ chi ve nyi haꞈ shaˉ paˍ Hkriꞈ yaˇ awˬ moˍ hkʼaw teˇ ceuˬ le le hpawˇ nyi haꞈ shaˉ leh daꞈ la tuˬ yawˇ hui hkʼaˬ hkʼe gʼa henˇ ve le? Chi nyi haꞈ shaˉ paˍ leh awˬ viˉ awˬ nyi Yaˬhoˉvaˬ geh meuˆ daꞈ maˇ la tuˬ ga piˇ ve yoˬ. Nawˬ Liꞈ henˇ yehˬ chi ve hkʼaw maˇ gʼa henˇ ve htawˇ, Liꞈ henˇ yehˬ chi ve hkʼaw gʼa henˇ ve chaw geh nawˬ kaꞈ awˬ bon gʼa tuˬ yoˬ.

Gʼaˇ jehˇ kuiˬ lo chehˇ ve chaw teˇ gʼaˇ le le htaꞈ Yaˬhoˉvaˬ tawˆ kʼai tcuh gaˇ htaˇ, Iˉsaˍreˍlaˆ chaw ve paw hkuˇ behˬ heh ma cheˆ cheˆ te meuˆ ve yoˬ. (Heh puiˉ hkʼaw 10:5, 6) Iˉsaˍreˍlaˆ chaw gʼaˇ jehˇ kuiˬ lo tawˆ kʼai htaˇ, yawˇ hui hteˇ hteˇ shawˇ shawˇ cawˬ ve yoˬ. Yaꞈ hkʼaˇ, teˇ gʼaˇ le le awˬ pon sha ve maˇ heˆ. Chaw teˇ hpaˍ hpaˍ htawˇ dawˇ nawˬ dawˇ cawˬ leh maˇ tawˆ kʼai gaˇ. Aˬ htoꞈ ma pa taw le?

Behˬ heh ma teˇ hkui teˇ hkui meuˆ ve pa taw, chaw teˇ hpaˍ hpaˍ laꞈ haˉ kʼai maˇ gʼa tehꞈ dawˇ ve yoˬ. Teˇ pawˆ pawˆ kʼo, moˬ mvuhˇ hpeuꞈ la htaˇ taꞈ iˉ chehˇ sheˬ leh mvuhˇ shawˉ kʼo moˬ kʼawꞈ taˆ˗e ve yoˬ. Leh teˇ pawˆ pawˆ kʼo, “nyiˇ nyi, teˇ ha pa, teˇ hkʼawꞈ” teˇ kaˬ lo tawˆ kʼai tuˬ awˬ yanˇ chi hkʼe maw gʼa yehˇ ve yoˬ. (Heh puiˉ hkʼaw 9:21, 22) Yawˇ hui hkʼaˬ nyiˇ kaˬ gʼa jiˆ kʼai ve le? Heh puiˉ hkʼaw liꞈ kaˇ nanˉ uiˍ 33 hkʼaw kʼoˆ ve, Iˉsaˍreˍlaˆ chaw 40 kaˬ gʼa jiˆ kʼai ve yoˬ.

Teˇ pawˆ pawˆ kʼo, Iˉsaˍreˍlaˆ chaw “kawˆ lawꞈ lawꞈ ve hteunˍ lonˉ” htaꞈ gʼa hpanˍ kʼai ve yoˬ. Teˇ pawˆ pawˆ kʼo, yawˇ hui jehˇ kuiˬ daꞈ leh kawˆ tuˬ maˇ cawˬ. (Bon maˍ ve 1:19) Yawˇ hui gʼa kʼawꞈ jiˆ kʼai ve kʼo, chi aꞈ kehˉ haˍ jaˇ kuiˬ lo gʼa chehˇ tuˬ tehꞈ dawˇ ve yoˬ.

Gʼa kʼawꞈ jiˆ kʼai htaˇ, teˇ chaw ceuˬ ceuˬ kʼo, awˬ nu ve chaw ceuˬ tawˆ˗e ve htaꞈ gʼa law sheˍ ve yoˬ. Iˉsaˍreˍlaˆ chaw behˬ heh ma awˬ hkawˇ hkʼa shuˍ gʼa kaˇ ve htawˇ, teˇ gʼaˇ le le teˇ pawˆ tiˉ tawˆ kʼai gʼa ve maˇ heˆ. Behˬ heh ma awˬ hkawˇ cheˆ cheˆ te meuˆ ve htaꞈ gʼa kaˇ htaˇ, mvuhˇ nyi tawˆ hpawˇ lo chehˇ ve chaw gʼa tawˆ kʼai ve tehꞈ hpeuꞈ maˍ laˇ ve yoˬ. Yuˇdaꞈ ve awˬ ceuˬ awˬ hkʼaˇ, Iˉsaˍhkaˍ ve awˬ ceuˬ awˬ hkʼaˇ, leh Zeˍbuˆlonˍ ve awˬ ceuˬ awˬ hkʼaˇ awˉ lawˉ gʼa tawˆ kʼai ve yoˬ. (Heh puiˉ hkʼaw 2:3-7; 10:5, 6) Awˬ ceuˬ awˬ hkʼaˇ chi ve hkʼa peu˗eˬ tawˆ kʼai peuˬ hkʼawꞈ nawˉ, awˬ hawˉ hpawˇ lo ve awˬ ceuˬ awˬ hkʼaˇ awˬ nu ve 3 chaw ceuˬ kʼawꞈ tawˆ kʼai tuˬ, paw hkuˇ kaꞈ behˬ heh ma cheˆ cheˆ nyiˇ pawˆ kʼawꞈ meuˆ ve yoˬ. Oˇ kaˬ lo chehˇ taˍ ve chaw hkʼa peu˗eˬ tawˆ kʼai peuˬ htaˇ hkʼa gaˬ, paw hkuˇ chi hkʼe te ve yoˬ.

Teˇ pawˆ pawˆ nawˬ htawˇ dawˇ nawˬ dawˇ cawˬ leh, Gʼuiˬ sha ve kanˉ hkʼaˇ hkʼaw pa ve awˬ ceuˬ htaꞈ teˇ ceuˬ ceuˬ maˇ haꞈ yuˬ gaˇ ve yoˬ hehˉ. Laiˉ ceuˬ pa maˇ jaˇ ve tehꞈ nawˬ dawˇ ve pa taw, te chehˇ˗oˬ ve kaꞈ daꞈ˗aꞈ dawˇ leh nawˬ maˇ pa gaˇ ve yoˬ hehˉ. Hkʼaˬ hkʼe hpehꞈ ve htawˇ nawˬ yeunˇ hkanˍ gʼaˇ tuˬ, leh pa ve htaꞈ haꞈ yuˬ gʼa tuˬ awˬ yanˇ gʼa yehˇ maw ve tehꞈ nawˬ dawˇ ve yoˬ hehˉ. Yaꞈ hkʼaˇ, ngaˬ hui te cawˇ ve htaꞈ coˇ caˇ leh te htaˇ, daꞈ ve htaꞈ gʼa mawˬ leh Yaˬhoˉvaˬ awˬ bon naꞈ laˇ ve htaꞈ kaꞈ gʼa mawˬ tuˬ yoˬ.

Moˉseˍ ve awˬ co˗e htaˇ hawˉ hkʼaˆ, yaˇ miˇ leh yaˇ ehˉ laiˉ lanˬ gʼaˇ heh puiˉ hkʼaw lo hpanˍ kʼai gʼa tuˬ Yaˬhoˉvaˬ beˆ maˍ piˇ ve yoˬ. Yawˇ maˇ nyi haꞈ shaˉ leh maˇ beˆ maˍ piˇ ve kʼo, teˇ gʼaˇ kaꞈ maˇ ponˬ gʼa taˬ. Chi beuꞈ teˇ co˗e awˬ leh meuˇ ve awˬ yanˇ kawˆ lawꞈ lawꞈ ve hkʼaw Yaˬhoˉvaˬ kaꞈ ngaˬ hui htaꞈ beˆ maˍ laˇ chehˇ ve yoˬ. Ngaˬ hui yawˇ geh meuˆ daꞈ tuˬ leh ngaˬ hui ve yonˍ hkʼaˇ hkʼaˬ htaˆ kaꞈ yonˍ yeˬ tuˬ yawˇ ga laˇ chehˇ ve yoˬ! Chi htaꞈ pa taw, ka tiꞈ yeˬ ve Iˉsaˍreˍlaˆ chaw behˬ heh ma hkawˇ na yuˬ tuˬ coˇ caˇ ve hkʼe, ngaˬ hui kaꞈ te gʼa ve hkʼe teˇ ceuˬ le le te leh na yuˬ cawˇ ve yoˬ!