Liꞈ hpu awˬ tawn chi ve 2 tawn hkʼaw te hkʼaˇ dawˇ hkʼaˇ 9 ceuˬ htaꞈ kʼoˆ taˍ ve yoˬ. “Gʼuiˬ sha ve Awˬ ha hpu ve awˬ shiˍ nawꞈ la ve teˇ hpaˍ lehˬ, haꞈ pehnˇ ve, ha lehˬ ve, dawˇ sha ve, dawˇ zuhˬ gaˇ zuhˬ ve, ha kʼaˉ ve, shu awˬ pon daꞈ ve htaꞈ te ve, yonˍ ve, nyi ma nuˇ nehˬ ve, a shu yawˇ awˬ to htaꞈ gʼaˇ puiˉ ve” chi teˇ hpaˍ yoˬ. Yaꞈ hkʼaˇ, Gʼuiˬ sha ve daꞈ kehˬ ve Awˬ ha hpu ngaˬ hui te hkʼaˇ dawˇ hkʼaˇ teˇ hpaˍ ceh cawˬ tuˬ ga laˇ ve maˇ heˆ.

Tcuh yaˇ Pawˇluꞈ bvuhꞈ taˍ ve htaꞈ teˇ geh chaˬ nyi sheˍ. “Awˬ suhˍ awˬ shaˍ ve kanˉ teˇ hpaˍ hkʼa tawˍ lehˆ tawˆ la peuˬ. Kanˉ oˇ ve teˇ hpaˍ lehˬ, haˉ chawˇ haˉ paˆ te ve, chaꞈ chiˆ ve htaꞈ te ve, pehꞈ ve tzuhˆ ve htaꞈ te ve, shaˉ hoꞈ htaꞈ oˉ kʼoˍ pui ve, neˇ te ve, canˇ daꞈ ve, yaꞈ daꞈ jiˆ daꞈ ve, shu ve mawˇ htaꞈ sheˉ lai ve, nyi ma zuhˆ ve, tawˇ gʼawˬ daꞈ ve, hpaˆ daꞈ guiˇ daꞈ ve, awˬ moˍ pehˬ daꞈ ve, hkawehˉ ve, tzuhˬ dawˬ bvuhˆ ve, ha lehˬ tuˬ te ponˬ te leuˉ ve, chi hkʼe ve teˇ hpaˍ yoˬ.” (Gaˍlaˍtiˆ 5:19-21) Awˬ leh meuˇ htaˇ Pawˇluꞈ “chi hkʼe ve teˇ hpaˍ yoˬ” tehꞈ kʼoˆ htaˇ, “awˬ suhˍ awˬ shaˍ ve kanˉ teˇ hpaˍ” hkʼa peu˗eˬ htaꞈ kʼoˆ ve maˇ heˆ. Tawˇ pa haˉ te kʼo, Pawˇluꞈ Kawˇlawˇsehˇ liꞈ 3:5 hkʼaw ve htaꞈ kaꞈ kʼoˆ gʼa ve yoˬ. Pawˇluꞈ te hkʼaˇ dawˇ hkʼaˇ 9 ceuˬ htaꞈ kʼoˆ peuˬ hkʼawꞈ nawˉ, chi ve hkʼa shuˍ shuˍ daꞈ ve te hkʼaˇ dawˇ hkʼaˇ teˇ hpaˍ htaꞈ Pawˇluꞈ kʼoˆ htaˇ, “chi teˇ hpaˍ htaꞈ maˇ gʼa te tehꞈ kʼoˆ taˍ ve awˬ liˇ tawˇ hkawˇ teˇ maˬ kaꞈ maˇ cawˬ.” Chi htaꞈ pa taw, daꞈ kehˬ ve Awˬ ha hpu ga laˇ ve teˇ hkʼaˇ dawˇ hkʼaˇ hkʼa peu˗eˬ ngaˬ hui cawˬ gʼa ve htaꞈ Pawˇluꞈ kʼoˆ ve maˇ heˆ.

Gʼuiˬ sha ve Awˬ ha hpu ve awˬ shiˍ nawꞈ la ve teˇ hpaˍ leh Pawˇluꞈ Eˇfeˇsuꞈ Hkriꞈ yaˇ htaꞈ awˬ gʼeuˆ ve awˬ lawn bvuhꞈ piˇ ve htaꞈ tehˆ daꞈ htaˇ ngaˬ hui na gʼa ve yoˬ. Yawˇ kʼoˆ ve, “awˬ gʼeuˆ ve awˬ shiˍ lehˬ, daꞈ ve hkʼa peu˗eˬ hteˇ ve cawˇ ve hkʼa peu˗eˬ leh, awˬ tehˬ awˬ na ve awˬ ceuˬ hkʼa peu˗eˬ awˬ hkʼaw lo cawˬ taˍ ve yoˬ.” (Eˇfeˇsuꞈ 5:8, 9) Awˬ tehˬ yoˬ, “daꞈ ve hkʼa peu˗eˬ”, hteˇ ve cawˇ ve leh awˬ tehˬ awˬ na ve awˬ ceuˬ lehˬ, “awˬ gʼeuˆ ve awˬ shiˍ” hpehꞈ ve yoˬ. Yaꞈ hkʼaˇ, daꞈ ve hkʼa peu˗eˬ lehˬ, “Gʼuiˬ sha ve Awˬ ha hpu ve awˬ shiˍ nawꞈ la ve teˇ hpaˍ” yoˬ.

Gʼuiˬ sha ve Awˬ ha hpu ve awˬ shiˍ nawꞈ la ve leh Pawˇluꞈ Tiˆmoˉseˍ htaꞈ te hkʼaˇ dawˇ hkʼaˇ 6 ceuˬ cawˬ tuˬ kʼoˆ piˇ ve htaꞈ tehˆ daꞈ htaˇ, awˬ lawn chi ngaˬ hui na gʼa ve yoˬ. Te hkʼaˇ dawˇ hkʼaˇ chi ve teˇ hpaˍ lehˬ, ‘hteˇ ve cawˇ ve, Gʼuiˬ sha htaꞈ yawˆ yan ve, yonˍ ve, haꞈ pehnˇ ve, nyi ma yeˬ ve leh, nyi ma nuˇ nehˬ ve’ yoˬ. (1 Tiˆmoˉseˍ 6:11) (Yonˍ ve teˇ ceuˬ, haꞈ pehnˇ ve teˇ ceuˬ, nyi ma yeˬ ve teˇ ceuˬ) choˬ kaˬ lo te hkʼaˇ dawˇ hkʼaˇ 3 ceuˬ htaꞈ ceh kʼoˆ taˍ ve yoˬ. Chi “Gʼuiˬ sha ve Awˬ ha hpu ve awˬ shiˍ nawꞈ la ve” teˇ hpaˍ hpehꞈ ve yoˬ. Yaꞈ hkʼaˇ, Tiˆmoˉseˍ haꞈ pehnˇ ve, Gʼuiˬ sha htaꞈ yawˆ yan ve, leh nyi ma yeˬ ve kaꞈ gʼa cawˬ ve yoˬ. Te hkʼaˇ dawˇ hkʼaˇ chi ve teˇ hpaˍ cawˬ tuˬ, Gʼuiˬ sha ve daꞈ kehˬ ve Awˬ ha hpu gʼa ga laˇ tcuh ve tehꞈ yawˇ shiˍ ve yoˬ.—Kawˇlawˇsehˇ liꞈ 3:12; 2 Peˍtruˆ liꞈ 1:5-7 hkʼaw kaꞈ tehˆ nyi sheˍ.

Chi htaꞈ pa taw, Gaˍlaˍtiˆ liꞈ 5:22, 23 hkʼaw Hkriꞈ yaˇ cawˬ cawˇ ve te hkʼaˇ dawˇ hkʼaˇ hkʼa peu˗eˬ htaꞈ kʼoˆ taˍ ve maˇ heˆ. “Gʼuiˬ sha ve Awˬ ha hpu ve awˬ shiˍ nawꞈ la ve” 9 ceuˬ hkʼaw ve te hkʼaˇ dawˇ hkʼaˇ ngaˬ hui cawˬ tuˬ Gʼuiˬ sha ve kanˇ paˆ ga laˇ tcuh gʼa ve yoˬ. Co ha hpawˇ ve chaw mawˇ hpehꞈ gʼa tuˬ, awˬ nu ve te hkʼaˇ dawˇ hkʼaˇ teˇ hpaˍ ngaˬ hui gʼa cawˬ cawˇ sheˍ ve yoˬ. Leh ngaˬ hui “awˬ tehˬ awˬ na hteˇ ve cawˇ ve leh daꞈ ve kehˬ ve awˬ hkʼaw lo, Gʼuiˬ sha hpanˍ taˍ ve nyi ma awˬ suhˉ htaꞈ veuꞈ deh” cawˇ ve yoˬ.—Eˇfeˇsuꞈ 4:24.