1. Gʼuiˬ sha htaꞈ yawˆ yan ve hkʼaˬ hkʼe kʼoˆ gaˇ ve le? Yaˬhoˉvaˬ htaꞈ haꞈ ve chaw awˬ pon aˬ htoꞈ ma te chi a yeˇ uiˍ jaˇ ve le?

 Hkriꞈ yaˇ Gʼuiˬ sha htaꞈ haꞈ leh yawˆ yan ve yoˬ. Yaꞈ hkʼaˇ, Gʼuiˬ sha htaꞈ maˇ cawˇ ve hpawˇ yawˆ yan ve htaꞈ ngaˬ hui kʼoˆ gaˇ ve maˇ heˆ. Cawˇ ve hpawˇ yawˆ yan ve htaꞈ kʼoˆ gaˇ ve yoˬ. Gʼuiˬ sha htaꞈ yawˆ yan ve tcuhˉ kuiˬ lehˬ, nyi ma awˬ tawˬ hkʼa gaˬ yawˆ yan ve htaꞈ kʼoˆ gaˇ ve yoˬ. Ngaˬ hui Gʼuiˬ sha htaꞈ hkʼaˬ htaˆ kaꞈ awˬ chawˇ te gaˇ ve pa taw, yawˇ nyi ma luˬ tuˬ ngaˬ hui maˇ te ve htaꞈ kʼoˆ gaˇ ve yoˬ.—Chiˇ mvuh ve 111:10; Tawˇ naˉ ve 8:13.

2. Chiˇ mvuh ve liꞈ 86:11 hkʼaw Daˍviˆ kʼoˆ taˍ ve tawˇ hkawˇ ngaˬ hui teˇ geh henˇ tuˬ ve nyiˇ ceuˬ aˬ htoꞈ ma le?

² Chiˇ mvuh ve liꞈ 86:11 gʼaw sheˍ. Liꞈ hpu awˬ tawn chi ve htaꞈ caˉ daꞈ ve ngaˬ hui dawˇ nyi htaˇ, Gʼuiˬ sha ve awˬ meh htaꞈ yawˆ yan ve a yeˇ uiˍ ve tehꞈ Daˍviˆ na gʼa ve, ngaˬ hui shiˍ ve yoˬ. Yawˇ ve tawˇ hkawˇ ngaˬ hui htaꞈ hkʼaˬ hkʼe maˍ laˇ gʼa ve teˇ geh nyi sheˍ. Awˉ lawˉ teˇ ceuˬ lehˬ, ngaˬ hui Gʼuiˬ sha awˬ meh htaꞈ yawˆ yan ve awˬ hkʼaˇ hkʼaˬ hkʼe cawˬ ve teˇ geh nyi sheˍ. Nyiˇ ceuˬ lehˬ, ngaˬ hui a shaꞈ teꞈ kuiˬ hkʼaw Gʼuiˬ sha ve awˬ meh htaꞈ yawˆ yan ve tehꞈ hkʼaˬ hkʼe te hpeuꞈ maw piˇ gʼa tuˬ kaꞈ teˇ geh nyi sheˍ.

3. Aˬ htoꞈ ma ve awˬ heˆ Moˉseˍ Gʼuiˬ sha ve awˬ meh htaꞈ hkʼaˬ htaˆ kaꞈ yawˆ yan tuˬ te piˇ ve le?

³ Moˉseˍ haˉ pui kaˍ lo chehˇ leh boˆ taˍ htaˇ, Gʼuiˬ sha ve awˬ meꞈ awˬ hponˇ htaꞈ mawˬ ve hkʼaˬ hkʼe dawˇ ve htaꞈ dawˇ nyi sheˍ. Yeˍsuˆ miˬ guiˬ hkʼoˆ lo maˇ laˬ sheˍ htaˇ, chi chaw yaˇ awˬ pon anˇ tuˬ uiˍ jaˇ ve awˬ heˆ teˇ ceuˬ hpehꞈ ve yoˬ. Oˇ ve teˇ yanˇ, mvuhˇ naw ma tcuh yaˇ geh laˬ ve awˬ hkawˇ Moˉseˍ gʼa kaˇ ve yoˬ. Mvuhˇ naw ma tcuh yaˇ  kʼoˆ ve, “[Yaˬhoˉvaˬ] lehˬ ha kʼaˉ puiˉ leh awˬ bon te piˇ puiˉ ve Gʼuiˬ sha hpehꞈ leh, nyi ma dawˇ zuhˬ gaˇ zuhˬ ve Gʼuiˬ sha, haꞈ pehnˇ uiˍ leh ka tiꞈ yeˬ ve Gʼuiˬ sha hpehꞈ ve yoˬ. Ngaˬ lehˬ, chaw awˬ hinˉ awˬ meunˍ gʼaˇ htaꞈ ka tiꞈ yeˬ leh, yawˇ hui ve venˇ baˆ teˇ hpaˍ htaꞈ hpehˇ piˇ puiˉ ve Gʼuiˬ sha hpehꞈ ve yoˬ.” (Tawˆ kʼai ve 33:17-23; 34:5-7) Moˉseˍ Yaˬhoˉvaˬ ve awˬ meh htaꞈ yehˇ htaˇ yawˇ awˬ heˆ chi htaꞈ dawˇ mawˬ ve yoˬ hehˉ. Peuˬ hkʼawꞈ nawˉ Moˉseˍ Iˉsaˍreˍlaˆ chaw hui htaꞈ “anˇ tuˬ uiˍ ve Gʼuiˬ sha ve awˬ meh htaꞈ nawˬ hui” yawˆ yan kʼoˆ piˇ ve anˇ tuˬ maˇ loˍ.—Bon maˍ ve 28:58.

4. Ngaˬ hui Yaˬhoˉvaˬ htaꞈ yawˆ yan puiˉ la tuˬ aˬ htoꞈ ma ga laˇ ve le?

⁴ Yaˬhoˉvaˬ ve awˬ meh htaꞈ ngaˬ hui dawˇ nyi htaˇ, yawˇ hkʼaˬ hkʼe ve Gʼuiˬ sha hpehꞈ ve htaꞈ kaꞈ dawˇ nyi cawˇ ve yoˬ. Gʼuiˬ sha ve te hkʼaˇ dawˇ hkʼaˇ teˇ hpaˍ lehˬ, kanˇ paˆ, cuˇ yiˍ, hteˇ ve cawˇ ve leh haꞈ pehnˇ ve htaꞈ kaꞈ ngaˬ hui dawˇ nyi ve yoˬ. Te hkʼaˇ dawˇ hkʼaˇ chi ve teˇ hpaˍ leh awˬ nu ve te hkʼaˇ dawˇ hkʼaˇ htaꞈ ngaˬ hui dawˇ nyi htaˇ, Yaˬhoˉvaˬ htaꞈ yawˆ yan puiˉ la tuˬ ga laˇ ve yoˬ.—Chiˇ mvuh ve 77:11-15.

5-6. (a) Gʼuiˬ sha ve awˬ meh tcuhˉ kuiˬ hkʼaˬ hkʼe kʼoˆ gaˇ ve le? (b) Tawˆ kʼai ve liꞈ 3:13, 14; leh Iˉsaˍyaˆ liꞈ 64:8 hkʼaw kʼoˆ taˍ ve hkʼe, Yaˬhoˉvaˬ yawˇ ve a loˍ awˬ tehˬ biˇ la gʼa tuˬ hkʼaˬ hkʼe te ve le?

⁵ Gʼuiˬ sha ve awˬ meh tcuhˉ kuiˬ hkʼaˬ hkʼe kʼoˆ gaˇ ve le? Cuˇ yiˍ cawˬ paˍ laiˉ gʼaˇ kʼoˆ ve, Yaˬhoˉvaˬ ve awˬ meh tcuhˉ kuiˬ lehˬ, “yawˇ hpehꞈ tcuh gaˇ ve hkʼe teˇ ceuˬ le le yawˇ hpehꞈ tcuh gʼa ve yoˬ.” Awˬ meh chi ve tcuhˉ kuiˬ lehˬ, Gʼuiˬ sha dawˇ teh taˍ ve htaꞈ teˇ ceuˬ kaꞈ tawˍ piˇ maˇ gʼa leh yawˇ te gaˇ ve teˇ ceuˬ le le te gʼa ve tehꞈ ngaˬ hui hkʼaˬ htaˆ kaꞈ dawˇ nyi tuˬ ga laˇ ve yoˬ. Chi hkʼaˬ hkʼe te hpehꞈ gʼa ve le?

⁶ Yaˬhoˉvaˬ ve a loˍ biˇ la tuˬ yawˇ hpehꞈ gaˇ ve teˇ ceuˬ le le hpehꞈ la gʼa ve yoˬ. Chi ve Gʼuiˬ sha htaꞈ caˉ daꞈ ve ngaˬ hui dawˇ nyi tuˬ te laˇ ve yoˬ. (Tawˆ kʼai ve 3:13, 14 gʼaw sheˍ.) Chi hkʼoˆ kaꞈ, chaw yaˇ Gʼuiˬ sha ve kanˉ te gʼa tuˬ leh yawˇ ve a loˍ awˬ tehˬ biˇ la gʼa tuˬ Yaˬhoˉvaˬ lehˬ maˇ biˇ ve chaw yaˇ htaꞈ yehˇ leh hkʼaˬ hkʼe hpehꞈ tcuh gaˇ kaꞈ hpehꞈ gʼa ve yoˬ. (Iˉsaˍyaˆ 64:8 gʼaw sheˍ.) Awˬ hkʼaˇ chi ve teˇ hpaˍ htaꞈ cuˇ leh Yaˬhoˉvaˬ yawˇ ve a loˍ awˬ tehˬ biˇ la tcuh gʼa ve yoˬ. Leh yawˇ dawˇ teh taˍ ve htaꞈ teˇ ceuˬ kaꞈ tawˍ piˇ maˇ gʼa.—Iˉsaˍyaˆ 46:10, 11.

7. Ngaˬ hui hkʼaˬ hkʼe te Yaˬhoˉvaˬ htaꞈ awˬ hpfuhˇ shiˍ maˇ la tuˬ le?

 ⁷ Yaˬhoˉvaˬ te gʼa ve awˬ ceuˬ leh yawˇ ngaˬ hui htaꞈ ga laˇ leh te gʼa ve awˬ ceuˬ htaꞈ hkʼa dehꞈ dawˇ nyi htaˇ, ngaˬ hui yawˇ htaꞈ awˬ hpfuhˇ shiˍ maˇ la ve yoˬ. Tawˇ pa haˉ te kʼo, ngaˬ hui yawˇ hpanˍ taˍ ve awˬ ceuˬ teˇ hpaˍ htaꞈ hkʼa dehꞈ dawˇ nyi htaˇ, chi ve teˇ hpaˍ hpehꞈ la gʼa ve htaꞈ ngaˬ hui dawˇ cawˇ jaˇ. (Chiˇ mvuh ve 8:3, 4) Yaˬhoˉvaˬ yawˇ ve a loˍ biˇ la tuˬ ngaˬ hui htaꞈ hkʼaˬ hkʼe ga laˇ ve htaꞈ dawˇ nyi htaˇ, ngaˬ hui yawˇ htaꞈ yawˆ yan puiˉ la ve yoˬ. Yaˬhoˉvaˬ ve awˬ meh lehˬ anˇ tuˬ cawˬ jaˇ! Awˬ meh chi ve lehˬ, yawˇ hpehꞈ chehˇ ve awˬ ceuˬ hkʼa peu˗eˬ, yawˇ te jaw ve awˬ ceuˬ hkʼa peu˗eˬ, leh awˬ gʼuˇ suhˍ hpawˇ yawˇ te tuˬ ve awˬ ceuˬ hkʼa peu˗eˬ htaꞈ caˉ daꞈ ve yoˬ.—Chiˇ mvuh ve 89:7, 8.

8. Bon maˍ ve liꞈ 32:2, 3 hkʼaw kʼoˆ taˍ ve hkʼe, Yaˬhoˉvaˬ ve kanˉ te ve chaw yawˇ ve awˬ meh htaꞈ hkʼaˬ hkʼe dawˇ tcuh gaˇ ve le?

⁸ Iˉsaˍreˍlaˆ chaw Yaˬhoˉvaˬ ka tiꞈ te taˍ ve mvuhˇ miˬ hkʼaw maˇ loꞈ˗e sheˍ htaˇ, Yaˬhoˉvaˬ Moˉseˍ htaꞈ kʼa muiˬ hkawˇ teˇ maˬ maˍ piˇ ve yoˬ. (Bon maˍ ve 31:19) Leh Yaˬhoˉvaˬ Moˉseˍ htaꞈ kʼa muiˬ hkawˇ chi ve caˉ leh Iˉsaˍreˍlaˆ chaw hui htaꞈ maˍ piˇ tcuh ve yoˬ. (Bon maˍ ve 32:2, 3 gʼaw sheˍ.) Bon maˍ ve liꞈ 32 ehˉ 2-3 htaꞈ caˉ daꞈ ve ngaˬ hui dawˇ nyi htaˇ, yawˇ ve awˬ meh maˇ faˉ taˍ gaˇ ve tehꞈ ngaˬ hui shiˍ ve yoˬ. Yaꞈ hkʼaˇ, chaw teˇ hpaˍ dawˇ ve awˬ meh chi daꞈ kehˬ jaˇ leh maˇ kʼoˆ tawˆ la haˆ ve htawˇ, yawˇ ve awˬ meh teˇ gʼaˇ le le htaꞈ shiˍ tcuh gaˇ ve yoˬ. Yaˬhoˉvaˬ leh yawˇ ve awˬ meh htaꞈ caˉ daꞈ ve, Moˉseˍ Iˉsaˍreˍlaˆ chaw htaꞈ maˍ piˇ ve daꞈ jaˇ ve awˬ ceuˬ hpehꞈ ve yoˬ. Moˉseˍ maˍ ve yawˇ hui yonˍ hkʼaˇ uiˍ la mvuh la tuˬ te piˇ ve yoˬ. Chi suhˆ pfuh ehˉ leh mvuhꞈ teˇ hpaˍ awˬ hkʼoˆ lo ce la chehˇ ve mvuhˇ yeˬ gʼuiˬ hkʼe hpehꞈ ve yoˬ. Ngaˬ hui hkʼaˬ hkʼe te Moˉseˍ hkʼe maˍ puiˉ tuˬ le?

9. Ngaˬ hui hkʼaˬ hkʼe te Yaˬhoˉvaˬ ve awˬ meh htaꞈ yawˆ yan te piˇ lawˬ tuˬ te gʼa ve le?

⁹ Ngaˬ hui teˇ yehˬ peuˬ teˇ yehˬ maˇ heˆ leh chaw guiˇ kuiˬ lo hto toˇ htaˇ, Gʼuiˬ sha ve awˬ meh Yaˬhoˉvaˬ meh ve tehꞈ Liꞈ hpu hkʼaw ngaˬ hui shu htaꞈ hpeuꞈ maˍ piˇ gʼa ve yoˬ. Yaˬhoˉvaˬ ve awˬ meh htaꞈ chiˇ mvuh tuˬ liꞈ kʼoˆ, VDO, leh vehˆsaiˉ hkʼaw hpaw maˍ piˇ gʼa ve yoˬ. Liꞈ henˇ ve, kanˉ te ve, hkʼaˬ kaˬ lo kʼai ve htawˇ maˇ kʼoˆ Yaˬhoˉvaˬ htaꞈ caˉ daꞈ ve awˬ lawn shu htaꞈ kʼoˆ maˍ piˇ gʼa ve yoˬ. Leh yawˇ hkʼaˬ hkʼe ve Gʼuiˬ sha hpehꞈ ve kaꞈ kʼoˆ maˍ piˇ gʼa ve yoˬ. Gʼuiˬ sha chaw yaˇ awˬ pon leh awˬ gʼuˇ suhˍ hpawˇ miˬ guiˬ chi htaꞈ aˬ htoꞈ ma te tuˬ, ngaˬ hui mawˬ daꞈ ve chaw htaꞈ kʼoˆ maˍ piˇ gʼa ve yoˬ. Gʼuiˬ sha yawˇ htaꞈ hkʼaˬ hkʼe taw haꞈ ve yawˇ awˉ lawˉ teˇ pawˆ gʼa kaˇ jaw tuˬ yoˬ hehˉ. Gʼuiˬ sha htaꞈ caˉ daꞈ ve awˬ tehˬ ve ngaˬ hui kʼoˆ piˇ htaˇ, Gʼuiˬ sha ve awˬ meh htaꞈ yawˆ yan te piˇ lawˬ tuˬ ngaˬ hui te chehˇ ve yoˬ. Shu Yaˬhoˉvaˬ htaꞈ caˉ daꞈ ve awˬ tehˬ maˇ heˆ ve heˍ ve awˬ lawn ngaˬ hui hpeuꞈ maw piˇ chehˇ ve yoˬ. Ngaˬ hui maˍ piˇ ve awˬ lawn yawˇ hui ha lehˬ leh awˬ gʼaˇ gʼa jaˇ tuˬ yoˬ.—Iˉsaˍyaˆ 65:13, 14.

10. Ngaˬ hui Liꞈ hpu maˍ piˇ htaˇ, Gʼuiˬ sha ve awˬ liˇ awˬ hkʼaˇ cawˇ ve leh Gʼuiˬ sha ngaˬ hui htaꞈ aˬ htoꞈ ma te tcuh gaˇ ve maˍ piˇ ve ceh hkʼaˬ hkʼe te maˇ lawꞈ ve le?

¹⁰ Ngaˬ hui Liꞈ hpu maˍ piˇ htaˇ, Liꞈ hpu henˇ ve chaw htaꞈ Yaˬhoˉvaˬ ve awˬ meh yehˇ tcuh gaˇ ve yoˬ. Yaꞈ hkʼaˇ, chi hkʼe ceh maˇ heˆ. Yaˬhoˉvaˬ hkʼaˬ hkʼe ve Gʼuiˬ sha hpehꞈ ve kaꞈ yawˇ hui htaꞈ shiˍ tcuh gaˇ ve yoˬ. Yawˇ hui htaꞈ Gʼuiˬ sha ve awˬ liˇ awˬ hkʼaˇ ceh maˍ piˇ ve kʼo, yawˇ hui a shaꞈ teꞈ kuiˬ hkʼaw Gʼuiˬ sha hkʼaˬ hkʼe te tcuh gaˇ ve awˬ tehˬ awˬ na shiˍ la tuˬ ngaˬ hui maˍ piˇ gʼa˗aw laˇ? Liꞈ hpu henˇ ve chaw Yaˬhoˉvaˬ ve awˬ liˇ awˬ hkʼaˇ htaꞈ gʼa henˇ leh dawˇ cawˇ tuˬ yoˬ. Yaꞈ hkʼaˇ, yawˇ hui Yaˬhoˉvaˬ htaꞈ haꞈ ve pa taw, yawˇ ve hkawˇ na yuˬ gaˇ˗aw laˇ? Eˇvaꞈ htaꞈ dawˇ nyi sheˍ, yawˇ Gʼuiˬ sha ve awˬ liˇ tawˇ hkawˇ htaꞈ shiˍ ve yoˬ. Yaꞈ hkʼaˇ, yawˇ awˬ liˇ tawˇ hkawˇ chi peꞈ laˇ shehˍ hpaˇ htaꞈ maˇ haꞈ. Aˍdanˍ kaꞈ hkʼa shuˍ yoˬ. (Awˬ hkuiˉ puiˍ 3:1-6) Chi htaꞈ pa taw, Gʼuiˬ sha ve awˬ liˇ awˬ hkʼaˇ cawˇ ve leh Gʼuiˬ sha ngaˬ hui htaꞈ aˬ htoꞈ ma te tcuh gaˇ ve maˍ piˇ ve ceh maˇ lawꞈ.

11. Liꞈ hpu henˇ ve chaw htaꞈ Gʼuiˬ sha leh yawˇ ve awˬ liˇ tawˇ hkawˇ maˍ piˇ htaˇ, awˬ liˇ tawˇ hkawˇ peꞈ laˇ shehˍ hpaˇ htaꞈ haꞈ tuˬ ngaˬ hui hkʼaˬ hkʼe ga piˇ gʼa ve le?

¹¹ Yaˬhoˉvaˬ ve awˬ liˇ awˬ hkʼaˇ ngaˬ hui awˬ pon daꞈ jaˇ. (Chiˇ mvuh ve 119:97, 111, 112) Yaꞈ hkʼaˇ,  Yaˬhoˉvaˬ ngaˬ hui htaꞈ haꞈ leh awˬ liˇ tawˇ hkawˇ chi peꞈ laˇ ve Liꞈ hpu henˇ ve chaw maˇ na gʼa. Chi htaꞈ pa taw, Liꞈ hpu henˇ ve chaw htaꞈ na nyi piˇ cawˇ ve, “aˬ htoꞈ ma te Yaˬhoˉvaˬ ngaˬ hui chi hkʼe te tcuh gaˇ ve, oˇ hkʼe maˇ te tcuh gaˇ ve le? Leh awˬ lawn chi Yaˬhoˉvaˬ htaꞈ caˉ daꞈ ve hkʼaˬ hkʼe maˍ laˇ ve le?” Yaˬhoˉvaˬ htaꞈ caˉ daꞈ ve Liꞈ hpu henˇ ve chaw dawˇ nyi tuˬ ngaˬ hui ga piˇ ve kʼo, uiˍ jaˇ mvuh jaˇ ve awˬ meh htaꞈ ceh haꞈ ve maˇ heˆ. Liꞈ hpu henˇ ve chaw nyi ma hkʼaw gaˬ tuˬ ngaˬ hui maˍ piˇ gʼa ve yoˬ. Yawˇ awˬ liˇ tawˇ hkawˇ htaꞈ ceh haꞈ ve maˇ heˆ. Yaꞈ hkʼaˇ, awˬ liˇ tawˇ hkawˇ peꞈ laˇ shehˍ hpaˇ Gʼuiˬ sha htaꞈ kaꞈ yawˇ haꞈ tuˬ yoˬ. (Chiˇ mvuh ve 119:68) Yawˇ hui ve yonˍ hkʼaˇ uiˍ la mvuh la leh aˬ miˍ hkʼa shuˍ hehnˇ ve beˬ ve lawˇ ve htaꞈ kaꞈ yawˇ hui yeunˇ hkanˍ gʼaˇ tuˬ yoˬ.—1 Kawˇrenˍhtuˆ 3:12-15.

12. Daˍviˆ nyi ma awˬ tawˬ hkʼa gaˬ cawˇ ve htaꞈ maˇ haꞈ ve aˬ htoꞈ ma le? Hkʼaˬ hkʼe hpehꞈ la ve le?

¹² Jawˇmawˇ Daˍviˆ htaꞈ dawˇ pawnˍ piˇ leh Chiˇ mvuh ve liꞈ 86:11 (MGS) hkʼaw “nyi ma awˬ tawˬ hkʼa gaˬ” kʼoˆ ve a yeˇ uiˍ ve tawˇ hkawˇ bvuhꞈ tcuh ve yoˬ. Yawˇ a shaꞈ teꞈ chehˇ ve teˇ co˗e cawˇ ve htaꞈ nyi ma awˬ tawˬ hkʼa gaˬ haꞈ tuˬ maˇ sha tehꞈ shiˍ ve yoˬ. Tawˇ pa haˉ te kʼo, teˇ pawˆ htaˇ yawˇ yehˬ mvuhˇ hpeꞈ hkʼoˆ chehˇ leh shu miˇ ma iˉ kaˆ hehˉ chehˇ ve htaꞈ gʼa mawˬ ve yoˬ. Oˇ ve teˇ yanˇ, yawˇ cawˇ ve htaꞈ nyi ma awˬ tawˬ hkʼa gaˬ haꞈ˗aw laˇ? Yawˇ Yaˬhoˉvaˬ ve awˬ liˇ tawˇ hkawˇ htaꞈ shiˍ˗oˬ ve yoˬ. Oˇ kaˬ lo kʼoˆ ve, “shu miˇ ma htaꞈ” maˇ gʼa sheˉ lai. (Tawˆ kʼai ve 20:17) Yaꞈ hkʼaˇ, yawˇ nyi chehˇ sheˍ. Daˍviˆ Yaˬhoˉvaˬ nyi hkʼaˇ suh tuˬ te piˇ gaˇ ve htawˇ, yawˇ yaˇ miˇ oˇ ve htaꞈ heuˆ gaˇ ve yoˬ. Daˍviˆ Yaˬhoˉvaˬ htaꞈ haꞈ leh yawˆ yan maw jaˇ˗oˬ ve htawˇ, yawˇ ve a loˍ htaꞈ te gaˇ sheˍ ve pa taw, haiˬ ve htaꞈ te ve yoˬ. Yawˇ Yaˬhoˉvaˬ ve awˬ meh luˬ tuˬ te piˇ ve yoˬ. Yawˇ ve yehˬ kʼa leh awˬ nu ve chaw kaꞈ shoꞈ shaꞈ ve gʼa hpuˇ ve yoˬ.—2 Saˍmo˗eˍlaˆ 11:1-5, 14-17; 12:7-12.

13. Daˍviˆ nyi ma awˬ tawˬ hkʼa gaˬ cawˇ ve htaꞈ teˇ pawˆ kʼawꞈ haꞈ ve ngaˬ hui hkʼaˬ hkʼe shiˍ gʼa ve le?

¹³ Daˍviˆ te ve awˬ ceuˬ yaꞈ jaˇ ve tehꞈ shiˍ tuˬ Yaˬhoˉvaˬ ga piˇ leh yawˇ Yaˬhoˉvaˬ geh teˇ pawˆ kʼawꞈ meuˆ daꞈ la ve yoˬ. (2 Saˍmo˗eˍlaˆ 12:13; Chiˇ mvuh ve 51:2-4, 17) Peuˬ hkʼawꞈ nawˉ, Daˍviˆ nyi ma awˬ tawˬ hkʼa gaˬ cawˇ ve htaꞈ maˇ haꞈ ve tehꞈ yawˇ shiˍ leh nyi ma naˬ jaˇ. Leh Daˍviˆ cawˇ ve htaꞈ teˇ pawˆ kʼawꞈ haꞈ tuˬ Yaˬhoˉvaˬ ga piˇ˗aw laˇ? Ga piˇ ve yoˬ. Liꞈ hpu hkʼaw kʼo ve, Daˍviˆ lehˬ Yaˬhoˉvaˬ ve kanˉ nyi ma awˬ tawˬ hkʼa gaˬ te ve yoˬ.—1 Jawˇmawˇ 11:4; 15:3.

14. Ngaˬ hui a shu yawˇ awˬ to htaꞈ hkʼaˬ hkʼe na nyi cawˇ ve le? Aˬ htoꞈ ma pa taw chi hkʼe na nyi ve le?

¹⁴ Daˍviˆ venˇ baˆ uiˍ jaˇ ve te yaꞈ ve awˬ lawn lehˬ, Gʼuiˬ sha ve kanˉ te ve chaw htaꞈ shaˍ tiꞈ peꞈ laˇ ve yoˬ. Ngaˬ hui yaꞈ ve tehꞈ shiˍ ve htawˇ, te yaꞈ tuˬ Saˍtanˍ beˬ laˇ ve yoˬ. Hkʼe te leh, Gʼuiˬ sha ve kanˉ te gehˇ sheˍ ve maˇ heˆ leh te maw jaˇ˗oˬ ve htawˇ, a shu yawˇ awˬ to htaꞈ na nyi cawˇ ve, ‘ngaˬ cawˇ ve htaꞈ nyi ma awˬ tawˬ hkʼa gaˬ haꞈ tuˬ te chehˇ˗aw laˇ?’

15. Pehꞈ ve tzuhˆ ve awˬ han mawˬ leh te gaˇ ve nyi ma cawˬ ve kʼo, Yaˬhoˉvaˬ htaꞈ yawˆ yan ve ngaˬ hui htaꞈ hkʼaˬ hkʼe ga laˇ ve le?

 ¹⁵ Tawˇ pa haˉ te kʼo, nawˬ TV nyi ve, in˗teu˗neꞈ hkʼaw leˍ guiˇ leh, pehꞈ ve tzuhˆ ve awˬ han mawˬ leh te gaˇ ve nyi ma cawˬ htaˇ, hkʼaˬ hkʼe te tuˬ le? Nawˬ nyi ve awˬ han awˬ kʼu nyi ve awˬ han maˇ heˆ tehꞈ nawˬ dawˇ ve yoˬ. Nawˬ nyi ma awˬ tawˬ hkʼa gaˬ cawˇ ve htaꞈ maˇ haꞈ leh awˬ nu ve awˬ ceuˬ htaꞈ haꞈ tuˬ, Saˍtanˍ te laˇ ve tehꞈ dawˇ˗aw laˇ? (2 Kawˇrenˍhtuˆ 2:11) Awˬ han chi ve lehˬ hawˉ hkʼaˆ teˇ gʼaˇ ceˉ ceˇ yuˬ leh suhˆ tawˆ ve htaꞈ tehˆ taˍ ve yoˬ. Yawˇ suhˆ awˉ lawˉ teˇ pawˆ tawˆ htaˇ, hkʼe taw maˇ naˉ sheˍ. Yawˇ gʼaˇ hteꞈ kʼawꞈ tawˆ ve kʼo, suhˆ nyiˇ tawn nehˉ hpehꞈ ve yoˬ. Nawˬ dawˇ kʼo, chi pehꞈ ve tzuhˆ ve nyi ma cawˬ tuˬ te gaˇ ve hkʼe hpehꞈ˗aw laˇ? Awˉ lawˉ htaˇ awˬ han chi ve teˇ hpaˍ awˬ tawꞈ ma cawˬ ve htaꞈ maˇ shuˍ. Peuˬ hkʼawꞈ nawˉ, nyi ma awˬ tawˬ hkʼa gaˬ cawˇ ve htaꞈ maˇ haꞈ tuˬ chaw teˇ gʼaˇ htaꞈ te piˇ leh nyi ma awˬ nu ve awˬ ceuˬ htaꞈ haꞈ ve lehˬ suhˆ nyiˇ tawn tawˆ ve htaꞈ shuˍ ve yoˬ. Awˬ leh meuˇ htaˇ yawˇ Yaˬhoˉvaˬ htaꞈ te yaꞈ tuˬ te piˇ ve yoˬ. Chi htaꞈ pa taw, nawˬ ve nyi ma hkʼaw maˇ daꞈ ve awˬ ceuˬ taˇ cawˬ tcuh! Yaˬhoˉvaˬ ve awˬ meh htaꞈ nyi ma awˬ tawˬ hkʼa gaˬ yawˆ yan tuˬ coˇ caˇ sheˍ!

16. Beˬ ve lawˇ ve gʼa hpuˇ htaˇ a shu yawˇ awˬ to htaꞈ hkʼaˬ hkʼe na nyi cawˇ ve le?

¹⁶ Pehꞈ ve tzuhˆ ve awˬ han mawˬ ve awˬ hkʼoˆ kaꞈ, ngaˬ hui awˬ nu ve maˇ cawˇ ve awˬ ceuˬ htaꞈ te tuˬ Saˍtanˍ beˬ laˇ chehˇ ve yoˬ. Ngaˬ hui chi hkʼe gʼa hpuˇ htaˇ, hkʼaˬ hkʼe te tuˬ le? Awˬ tehˬ kʼo, ngaˬ hui a shu yawˇ awˬ to htaꞈ maˇ yaꞈ ve dawˇ tuˬ sha jaˇ. Tawˇ pa haˉ te kʼo, ‘awˬ lawn chi hkʼe ceh ve Hkriꞈ yaˇ awˬ moˍ hkʼaw maˇ tawˆ cheˆ taˬ tehꞈ dawˇ ve yoˬ.’ Yaꞈ hkʼaˇ, chi hkʼe dawˇ ve yaꞈ jaˇ. Beˬ ve lawˇ ve gʼa hpuˇ htaˇ a shu yawˇ awˬ to htaꞈ na nyi cawˇ ve, ‘Saˍtanˍ chi ve htaꞈ yehˇ leh ngaˬ nyi ma awˬ tawˬ hkʼa gaˬ cawˇ ve htaꞈ maˇ haꞈ tuˬ te laˇ˗aw laˇ? Maˇ cawˇ ve tehꞈ shiˍ ve htawˇ ngaˬ te leh Yaˬhoˉvaˬ ve awˬ meh te luˬ piˇ˗aw laˇ? Chi hkʼe te ve ngaˬ Yaˬhoˉvaˬ geh meuˆ daꞈ maˇ la tuˬ, maˇ heˆ leh maˇ meuˆ daꞈ tuˬ te laˇ ve laˇ?’ Na hkawˇ chi teˇ hpaˍ htaꞈ dawˇ nyi sheˍ. A shu yawˇ awˬ to htaꞈ ka tiꞈ yeˬ leh na hkawˇ chi htaꞈ hkʼawꞈ piˇ tuˬ,  cuˇ yiˍ gʼa tuˬ Gʼuiˬ sha geh bon lawˬ sheˍ. (Yaˍkoˆ 1:5) Chi hkʼe te ve lehˬ nawˬ htaꞈ haꞈ shaˉ laˇ gʼa ve yoˬ. Yeˍsuˆ “Saˍtanˍ˗oˬ kʼai loˬ” kʼoˆ piˇ ve hkʼa shuˍ, nawˬ beˬ ve lawˇ ve htaꞈ tawˍ baˬ gʼaˇ tuˬ ga laˇ ve yoˬ.—Maꞈhtehˍ 4:10.

17. Aˬ htoꞈ ma te nyi ma awˬ nu ve awˬ ceuˬ htaꞈ dawˇ ve awˬ bon maˇ cawˬ ve le? Tawˇ pa haˉ kʼoˆ maˍ laˇ sheˍ.

¹⁷ Ngaˬ hui nyi ma awˬ tawˬ hkʼa gaˬ cawˇ ve htaꞈ maˇ haꞈ ve kʼo, awˬ bon maˇ cawˬ. Bawˉ shiˍ hteˆ ve awˬ moˍ hkʼaw maˇ hawˍ daꞈ ve htaꞈ dawˇ nyi sheˍ. Teˇ hpaˍ kʼo teˇ gʼaˇ tiˉ awˬ meꞈ awˬ hponˇ gʼa gaˇ ve, teˇ hpaˍ kʼo awˬ liˇ teh taˍ ve hkʼe maˇ gʼaꞈ te, teˇ hpaˍ kʼo, maˍ piˇ shehˍ hpaˇ hkawˇ maˇ na gaˇ. Chi hkʼe ve chaw lehˬ maˇ gʼaˇ taˬ. Bawˉ shiˍ hteˆ paˍ teˇ gʼaˇ leh teˇ gʼaˇ hawˍ daꞈ ve kʼo, gʼaˇ tuˬ yoˬ. Nawˬ dawˇ ve, nawˬ loˍ ve, Yaˬhoˉvaˬ ve awˬ liˇ awˬ hkʼaˇ cawˇ ve awˬ ceuˬ htaꞈ te ve kʼo, nawˬ ve nyi ma kaꞈ bawˉ shiˍ hteˆ ve awˬ moˍ gʼaˇ ve hkʼe te gʼa ve yoˬ. Nawˬ awˬ nu ve awˬ ceuˬ htaꞈ te gaˇ ve nyi ma cawˬ tuˬ, Saˍtanˍ te laˇ ve tehꞈ tawnˇ taˍ sheˍ. Ngaˬ hui dawˇ ve, loˍ ve, leh te gaˇ ve, Yaˬhoˉvaˬ ve awˬ liˇ awˬ hkʼaˇ htaꞈ maˇ cawˇ tuˬ, Saˍtanˍ te tcuh gaˇ ve yoˬ. Ngaˬ hui loˍ ve awˬ ceuˬ htaꞈ te gaˇ ve htawˇ, Gʼuiˬ sha loˍ ve maˇ heˆ tehꞈ shiˍ ve yoˬ. Yaꞈ hkʼaˇ, nawˬ Yaˬhoˉvaˬ ve kanˉ te gaˇ ve kʼo, nyi ma awˬ tawˬ hkʼa gaˬ yawˇ htaꞈ gʼa haꞈ ve yoˬ. (Maꞈhtehˍ 22:36-38) Nawˬ ve nyi ma awˬ nu ve awˬ ceuˬ htaꞈ dawˇ tuˬ Saˍtanˍ taˇ te laˇ tcuh!

18. Miˆhkaˍ liꞈ 4:5 hkʼaw kʼoˆ taˍ ve hkʼe, nawˬ aˬ htoꞈ ma te tuˬ dawˇ teh taˍ ve le?

¹⁸ Daˍviˆ Yaˬhoˉvaˬ geh “nawˬ ve awˬ meh htaꞈ nyi ma awˬ tawˬ hkʼa gaˬ yawˆ yan puiˉ tuˬ ngaˬ htaꞈ maˍ laˇ˗oˆ” tehꞈ bon lawˬ ve hkʼa shuˍ nawˬ kaꞈ te gʼa ve yoˬ. Nawˬ bon lawˬ ve hkʼa shuˍ a shaꞈ teꞈ chehˇ kuiˬ hkʼaw gʼaꞈ te sheˍ. Nawˬ teˇ nyi le le awˬ lawn uiˍ ve maˇ uiˍ ve dawˇ cheˆ ve htawˇ, Yaˬhoˉvaˬ ve awˬ meh htaꞈ yawˆ yan ve tehꞈ hpeuꞈ maw piˇ sheˍ. Nawˬ chi hkʼe te ve kʼo, shu Yaˬhoˉvaˬ ve awˬ meh htaꞈ gʼa kaˇ htaˇ nawˬ kaꞈ teˇ gʼaˇ Yaˬhoˉvaˬ ve Shaˉhkiˆhkanˍ ve chaw hpehꞈ leh shu Yaˬhoˉvaˬ ve awˬ meh htaꞈ cawˇ ve hkʼaw dawˇ tuˬ ga piˇ chehˇ ve yoˬ. (Tawˇ naˉ ve 27:11) Leh ngaˬ hui teˇ gʼaˇ le le tcuh kaˍ paˍ Miˆhkaˍ hkʼe kʼoˆ gʼa ve yoˬ. Yawˇ kʼoˆ ve, “ngaˬ hui lehˬ Jawˇmawˇ Gʼuiˬ sha htaꞈ co co taiˍ taiˍ oˉ kʼoˍ pui leh, yawˇ ve tawˇ htaꞈ na yuˬ tuˬ yoˬ.”—Miˆhkaˍ 4:5.