AWˬ LAWN 25
“Ngaˬ awˬ to ngaˬ ve yawˬ teˇ hpaˍ htaꞈ” ca tuˬ yoˬ”
“Ngaˬ awˬ to ngaˬ ve yawˬ teˇ hpaˍ htaꞈ kʼawꞈ nyi kʼawꞈ haꞈ shaˉ piˇ tuˬ yoˬ.”—YEˍSAˍKEˍLAˆ 34:11.
KʼA MUIˬ HKAWˇ 105 “Gʼuiˬ sha lehˬ haꞈ pehnˇ ve teˇ ceuˬ hpehꞈ ve”
HENˇ TUˬ VE TEˇ HPAˍ *
1. Yaˬhoˉvaˬ leh awˬ e yaˇ htaꞈ cuˉ taw piˇ ve hkʼaˬ hkʼe shuˍ daꞈ ve le?
‘Yaˇ miˇ teˇ gʼaˇ lehˬ, yawˇ ve yaˇ ehˉ htaꞈ leunˇ kʼai tuˬ ve laˇ?’ Tcuh kaˍ paˍ Iˉsaˍyaˆ ve awˬ co˗e htaˇ, Yaˬhoˉvaˬ chi hkʼe na piˇ ve yoˬ. Peuˬ leh yawˇ Iˉsaˍreˍlaˆ chaw htaꞈ kʼoˆ piˇ ve, “awˬ e teˇ gʼaˇ lehˬ, yawˇ ve yaˇ htaꞈ leunˇ kʼai puiˉ sheˍ kaꞈ, ngaˬ nawˬ hui htaꞈ teˇ pawˆ kaꞈ leunˇ tuˬ ve maˇ heˆ.” (Iˉsaˍyaˆ 49:15) Maˇ˗awˍ ve kʼo, Gʼuiˬ sha yawˇ awˬ to awˬ e htaꞈ maˇ tehˆ. Yaꞈ hkʼaˇ, chi teˇ pawˆ Gʼuiˬ sha yawˇ ve chaw htaꞈ hkʼaˬ hkʼe taw haꞈ ve hpeuꞈ maw laˇ tuˬ, awˬ e leh yaˇ meuˆ daꞈ ve htaꞈ tehˆ ve yoˬ. Awˬ e laiˉ gʼaˇ Heh˗mi hkʼa shuˍ dawˇ ve yoˬ. Yawˇ kʼoˆ ve, “awˬ e yaˇ htaꞈ cuˉ taw piˇ htaˇ, hkʼaˬ htaˆ kaꞈ meuˆ daꞈ tuˬ te piˇ ve yoˬ.”
2. Yaˬhoˉvaˬ ve chaw teˇ gʼaˇ hto toˇ ve leh hpawnˬ daꞈ ve maˇ kʼai˗o ve kʼo, yawˇ hkʼaˬ hkʼe dawˇ ve le?
2 Yaˬhoˉvaˬ ve chaw teˇ gʼaˇ hto toˇ ve leh hpawnˬ daꞈ ve maˇ kʼai˗o ve kʼo, yawˇ nyi ma luˬ jaˇ. Chi beuꞈ teˇ co˗e awˬ viˉ awˬ nyi laiˉ hinˉ gʼaˇ hto toˇ ve leh hpawnˬ daꞈ ve maˇ kʼai˗o ve pa taw, yawˇ nyi ma hkʼaˬ hkʼe taw luˬ ve htaꞈ dawˇ nyi sheˍ. *
3. Yaˬhoˉvaˬ lehˬ, hto toˇ ve leh hpawnˬ daꞈ ve maˇ kʼai˗o ve chaw htaꞈ hkʼaˬ hkʼe kʼawꞈ te tcuh gaˇ ve le?
3 Maˇ maw ve awˬ yanˇ htaˇ, hto toˇ ve leh hpawnˬ daꞈ ve maˇ kʼai˗o ve awˬ viˉ awˬ nyi laiˉ gʼaˇ Hkriꞈ yaˇ awˬ moˍ hkʼaw kʼawꞈ kʼawꞈ la ve yoˬ. Chi ngaˬ hui ha lehˬ tuˬ te laˇ ve yoˬ! Yaˬhoˉvaˬ lehˬ, hto toˇ ve leh hpawnˬ daꞈ ve maˇ kʼai˗o ve chaw htaꞈ teˇ pawˆ kʼawꞈ kʼawꞈ la tcuh gaˇ ve yoˬ. Ngaˬ hui kaꞈ hkʼa shuˍ yoˬ. (1 Peˍtruˆ 2:25) Yawˇ hui htaꞈ hkʼaˬ hkʼe ga piˇ gʼa tuˬ le? Na hkawˇ chi ve htaꞈ maˇ hkʼawꞈ sheˍ htaˇ, aˬ htoꞈ ma te chaw teˇ hpaˍ hto toˇ ve leh hpawnˬ daꞈ ve maˇ kʼai˗o ve teˇ geh nyi sheˍ.
Aˬ HTOꞈ MA TE CHAW TEˇ HPAˍ YAˬHOˉVAˬ VE KANˉ MAˇ TE˗O VE LE?
4. Kanˉ te caˇ ve chaw teˇ hpaˍ hpaˍ htaꞈ heuˆ la kuiˬ hkʼaˬ hkʼe cawˬ ve le?
4 Chaw teˇ hpaˍ ca caˇ ve htaꞈ tiˉ dawˇ nyi chehˇ ve pa taw, chi yawˇ hui a shaꞈ teꞈ kuiˬ hkʼaw a yeˇ uiˍ ve tehꞈ shawˍ ve yoˬ. Aˍshaˆ miˬ guiˬ awˬ hawˉ hpawˇ lo chehˇ ve awˬ viˉ awˬ nyi Hun * kʼoˆ ve, “oˇ htaˇ ngaˬ kanˉ te ve htaꞈ tiˉ a yeˇ te chehˇ ve yoˬ. Ngaˬ hpu maˇ maˇ cawˬ ve kʼo, Yaˬhoˉvaˬ ve kanˉ maˇ maˇ te gʼa tuˬ dawˇ ve kaˍ jaˇ law. Hkʼe te leh ngaˬ kanˉ tiˉ te ve yoˬ. Teˇ pawˆ pawˆ ngaˬ hpawnˬ daꞈ˗e ve maˇ kʼai leh awˬ leh meuˇ htaˇ maˇ kʼai˗o ve yoˬ. Saˍtanˍ yawˇ ve miˬ guiˬ htaꞈ cuˇ leh ngaˬ hui awˬ mui˗eˇ mui˗eˇ Yaˬhoˉvaˬ geh maˇ meuˆ daꞈ tuˬ te laˇ ve tehꞈ ngaˬ shiˍ ve yoˬ.”
5. Awˬ viˉ awˬ nyi yaˇ miˇ teˇ gʼaˇ shoꞈ shaꞈ ve laiˉ ceuˬ gʼa hpuˇ ve yawˇ htaꞈ heuˆ la kuiˬ hkʼaˬ hkʼe cawˬ ve le?
5 Awˬ viˉ awˬ nyi laiˉ gʼaˇ shoꞈ shaꞈ ve laiˉ ceuˬ gʼa gʼaˇ ve pa taw, awˬ gʼaˇ nuˇ ve yoˬ. Eˍgaˍlaˍ mvuhˇ miˬ awˬ viˉ awˬ nyi yaˇ miˇ teˇ gʼaˇ Ehn yawˇ yaˇ 5 gʼaˇ cawˬ ve yoˬ. Yawˇ kʼoˆ ve, “ngaˬ ve yaˇ teˇ gʼaˇ paw la htaˇ kaꞈ shu htaꞈ maˇ shuˍ ve yoˬ. Peuˬ hkʼawꞈ nawˉ yaˇ miˇ teˇ gʼaˇ kaꞈ Hkriꞈ yaˇ awˬ moˍ hkʼaw tawˆ cheˆ ve yoˬ. Ngaˬ ve yaˇ paˍ teˇ gʼaˇ kʼo, uˉ nawꞈ nehˆ hpawˇ a naˍ cawˬ ve yoˬ. Chi ngaˬ awˬ gʼaˇ nuˇ tuˬ te laˇ jaˇ. Hkʼe te leh ngaˬ teˇ pawˆ pawˆ hto toˇ ve leh hpawnˬ daꞈ ve maˇ kʼai˗o. Awˬ leh meuˇ htaˇ ngaˬ hto toˇ ve leh hpawnˬ daꞈ ve maˇ kʼai˗o.” Ehn ve yehˬ kʼa leh yawˇ hkʼa shuˍ gʼa hpuˇ ve chaw htaꞈ ngaˬ hui ha kʼaˉ jaˇ!
6. Kawˇlawˇsehˇ liꞈ 3:13 hkʼaw kʼoˆ taˍ ve hkʼe, maˇ gʼaꞈ te ve pa taw awˬ viˉ awˬ nyi teˇ hpaˍ hto toˇ ve leh hpawnˬ daꞈ ve maˇ kʼai tuˬ hkʼaˬ hkʼe te piˇ ve le?
6 Kawˇlawˇsehˇ liꞈ 3:13 gʼaw sheˍ. Awˬ viˉ awˬ nyi teˇ hpaˍ kʼo, awˬ viˉ awˬ nyi yawˇ htaꞈ te piˇ ve pa taw, nyi ma naˬ ve yoˬ. Pawˇluꞈ kʼoˆ ve, teˇ pawˆ pawˆ awˬ viˉ awˬ nyi “teˇ gʼaˇ leh teˇ gʼaˇ venˇ baˆ taˍ daꞈ kuiˬ cawˬ” ve yoˬ. Teˇ pawˆ pawˆ awˬ viˉ awˬ nyi ngaˬ hui htaꞈ maˇ hteˇ maˇ cawˇ te laˇ ve yoˬ hehˉ. Yaꞈ hkʼaˇ, ngaˬ hui shaˍ tiꞈ maˇ te ve kʼo, nyi ma naˬ ve maˇ na˗e taˬ. Chi hkʼe ve lehˬ Hkriꞈ yaˇ awˬ moˍ hkʼaw maˇ meuˆ daꞈ tuˬ te laˇ ve yoˬ. Aˍmeˬriˆkaꞈ mvuhˇ miˬ awˬ hawˉ hpawˇ lo awˬ viˉ awˬ nyi Hpa˗bon gʼa hpuˇ ve awˬ lawn htaꞈ dawˇ nyi sheˍ. Yawˇ htaꞈ te yaꞈ ve tehꞈ she pfuhˍ piˇ leh yawˇ Hkriꞈ yaˇ awˬ moˍ hkʼaw awˬ vuiˬ maˇ gʼa te˗o ve yoˬ. Yawˇ kʼoˆ ve, “ngaˬ beuꞈ jaˇ leh hto toˇ ve leh hpawnˬ daꞈ ve teˇ pawˆ pawˆ maˇ kʼai leh awˬ leh meuˇ htaˇ maˇ kʼai˗o.”
7. Nyi ma luˬ ve awˬ viˉ awˬ nyi teˇ hpaˍ htaꞈ heuˆ la kuiˬ hkʼaˬ hkʼe cawˬ ve le?
7 Chaw teˇ hpaˍ venˇ baˆ uiˍ jaˇ ve htaꞈ te yaꞈ jaw ve pa taw, nyi ma naˬ chehˇ sheˍ ve yoˬ. Yawˇ venˇ baˆ dawˇ hpfuhˆ˗oˬ ve htawˇ, Gʼuiˬ sha haꞈ laˇ tuˬ maˇ keunˍ tehꞈ yawˇ dawˇ ve yoˬ. Yaˬhoˉvaˬ ve Shaˉhkiˆhkanˍ ve chaw teˇ gʼaˇ hpehꞈ ve maˇ keunˍ tehꞈ dawˇ sheˍ ve yoˬ. Awˬ viˉ awˬ nyi Fanˬsiˆkoˬ kaꞈ chi hkʼe dawˇ ve yoˬ. Yawˇ kʼoˆ ve, “ngaˬ pehꞈ ve tzuhˆ ve hpawˇ te yaꞈ ve pa taw, beˆ maˍ leh shaˍ tiꞈ peꞈ laˇ ve yoˬ. Awˉ lawˉ htaˇ ngaˬ coˇ caˇ leh hpawnˬ daꞈ˗e ve yoˬ. Shaˉhkiˆhkanˍ ve chaw hpehꞈ ve ngaˬ maˇ keunˍ tehꞈ dawˇ leh awˬ gʼaˇ nuˇ jaˇ. Ngaˬ nyi ma naˬ chehˇ sheˍ leh Yaˬhoˉvaˬ venˇ baˆ maˇ hpehˇ laˇ taˬ tehꞈ dawˇ ve yoˬ. Hkʼe te leh ngaˬ hto toˇ ve leh hpawnˬ daꞈ ve maˇ kʼai˗o.” Ngaˬ hui kʼoˆ kʼai peuˬ ve awˬ viˉ awˬ nyi gʼa hpuˇ chehˇ ve htaꞈ nawˬ hkʼaˬ hkʼe dawˇ ve le? Nawˬ yawˇ hui htaꞈ ha kʼaˉ jaˇ ve maˇ heˆ laˇ? Hkʼe kʼo, Yaˬhoˉvaˬ yawˇ hui htaꞈ hkʼaˬ hkʼe dawˇ ve le?
YAˬHOˉVAˬ YAWˇ VE YAWˬ HTAꞈ HAꞈ VE
Iˉsaˍreˍlaˆ chaw yawˬ hawˉ paˍ mehˉ kʼai taˍ ve yawˬ htaꞈ dawˇ haˍ jaˇ ve (Awˬ tawn 8-9 nyi sheˍ) *
8. Yaˬhoˉvaˬ yawˇ ve kanˉ te jaw ve chaw htaꞈ leunˇ˗aw laˇ? Kʼoˆ maˍ laˇ sheˍ.
8 Yaˬhoˉvaˬ yawˇ ve kanˉ te jaw ve chaw htaꞈ maˇ leunˇ. (Heˍbrehˇ 6:10) Yaˬhoˉvaˬ yawˇ ve yawˬ htaꞈ hkʼaˬ hkʼe taw haꞈ ve ngaˬ hui na gʼa tuˬ, tcuh kaˍ paˍ Iˉsaˍyaˆ daꞈ ve awˬ lawn tehˆ maˍ laˇ ve yoˬ. Iˉsaˍyaˆ kʼoˆ ve, “yawˇ lehˬ yawˬ hawˉ paˍ hkʼa shuˍ, yawˇ ve yawˬ ehˉ teˇ hpaˍ htaꞈ haꞈ shaˉ piˇ leh, yawˇ ve yawˬ teˇ hpaˍ htaꞈ teˇ geh gʼaꞈ hpoˆ piˇ tuˬ yoˬ.” (Iˉsaˍyaˆ 40:11) Uiˍ jaˇ mvuh jaˇ ve yawˬ hawˉ shehˍ hpaˇ Yaˬhoˉvaˬ lehˬ, yawˇ ve yawˬ teˇ hkeh mehˉ˗e htaˇ, hkʼaˬ hkʼe dawˇ tuˬ le? Yeˍsuˆ awˬ laꞈ gʼawˇ htaꞈ na piˇ ve, “chaw teˇ gʼaˇ gʼaˇ, yawˬ 100 hkeh cawˬ ve awˬ hkʼaw lo teˇ hkeh mehˉ kʼai ve kʼo, 99 hkeh htaꞈ hkʼaw hkʼoˆ lo teh taˉ leh mehˉ kʼai ve 1 hkeh htaꞈ yawˇ ca nyi tuˬ yoˬ.” Chi Yaˬhoˉvaˬ hkʼaˬ hkʼe dawˇ ve ngaˬ hui na gʼa tuˬ Yeˍsuˆ maˍ laˇ ve yoˬ.—Maꞈhtehˍ 18:12, 13.
9. Daꞈ ve yawˬ hawˉ shehˍ hpaˇ hkʼaˬ hkʼe hpehꞈ ve le? (Awˬ htaꞈ hpawˇ ve awˬ han htaꞈ nyi sheˍ.)
9 Aˬ htoꞈ ma te Yaˬhoˉvaˬ lehˬ yawˬ hawˉ shehˍ hpaˇ htaꞈ tehˆ ve keunˍ jaˇ ve le? Liꞈ hpu ve awˬ co˗e htaˇ, yawˬ hawˉ paˍ lehˬ yawˇ ve yawˬ htaꞈ hkʼa dehꞈ nyi haꞈ shaˉ ve yoˬ. Tawˇ pa haˉ te kʼo, Daˍviˆ yawˇ ve yawˬ htaꞈ haꞈ shaˉ tuˬ laˇ caˬ shiˉ leh yehˬ miˉ tawˍ htaꞈ tiˇ pehˍ piˇ ve yoˬ. (1 Saˍmo˗eˍlaˆ 17:34, 35) Chi hkʼoˆ kaꞈ, yawˬ hawˉ paˍ lehˬ yawˇ ve yawˬ teˇ hkeh mehˉ˗e htaˇ hkʼa dehꞈ shiˍ ve yoˬ. (Yoˇhanˬ 10:3, 14) Yawˬ hawˉ paˍ lehˬ yawˇ ve yawˬ 99 hkeh awˬ hkʼawˆ hkʼaw keu taˉ ve maˇ heˆ leh awˬ nu ve yawˬ hawˉ paˍ htaꞈ nyi tcuh taˉ leh mehˉ kʼai ve yawˬ teˇ hkeh htaꞈ ca nyi ve yoˬ Yawˬ hawˉ paˍ chi hkʼe ve htaꞈ Yeˍsuˆ kʼoˆ ve yoˬ. Yeˍsuˆ tawˇ pa haˉ chi ve htaꞈ yehˇ leh ngaˬ hui htaꞈ a yeˇ uiˍ ve teˇ ceuˬ maˍ laˇ ve yoˬ. Yawˇ kʼoˆ ve, “chi hkʼa shuˍ shuˍ, yaˇ ehˉ chi teˇ hpaˍ teˇ gʼaˇ gʼaˇ luˬ kʼai tuˬ ve htaꞈ mvuhˇ naw ma hkʼoˆ chehˇ ve ngaˬ Awˬ pa nyi ma maˇ cawˇ.”—Maꞈhtehˍ 18:14.
Iˉsaˍreˍlaˆ chaw yawˬ hawˉ paˍ yawˇ ve yawˬ mehˉ kʼai taˍ ve htaꞈ hkʼa dehꞈ haꞈ shaˉ piˇ ve (Awˬ tawn 9 nyi sheˍ)
YAˬHOˉVAˬ YAWˇ VE YAWˬ HTAꞈ CA HPFUHˆ VE
10. Yeˍsaˍkeˍlaˆ liꞈ 34:11-16 hkʼaw kʼoˆ taˍ ve hkʼe, Yaˬhoˉvaˬ yawˇ ve yawˬ mehˉ kʼai taˍ ve htaꞈ hkʼaˬ hkʼe te tuˬ ka tiꞈ te taˍ laˇ ve le?
10 Yaˬhoˉvaˬ ngaˬ hui teˇ gʼaˇ le le leh awˬ moˍ hkʼaw mehˉ kʼai taˍ ve htaꞈ haꞈ ve yoˬ. Yaˬhoˉvaˬ ka tiꞈ te taˍ ve tcuh kaˍ paˍ Yeˍsaˍkeˍlaˆ htaꞈ kʼoˆ tcuh ve, yawˇ ve yawˬ mehˉ kʼai taˍ ve htaꞈ gʼaꞈ ca leh yawˇ geh teˇ pawˆ kʼawꞈ meuˆ daꞈ tcuh tuˬ yoˬ. Yawˬ ehˉ mehˉ kʼai taˍ ve yawˇ geh kʼawꞈ la tuˬ awˬ hkʼaˇ maˍ piˇ ve yoˬ. Iˉsaˍreˍlaˆ chaw yawˬ hawˉ paˍ yawˬ ehˉ mehˉ kʼai taˍ ve htaꞈ ca hpfuhˆ ve hkʼa shuˍ yoˬ. (Yeˍsaˍkeˍlaˆ 34:11-16 gʼaw sheˍ.) Awˉ lawˉ teˇ ceuˬ, yawˬ hawˉ paˍ yawˬ ehˉ mehˉ kʼai taˍ ve htaꞈ ca hpfuhˆ tuˬ, awˬ yanˇ leh awˬ gʼaˇ gʼa yehˇ maˇ ve yoˬ. Yawˇ yawˬ oˇ ve teˇ hkeh htaꞈ mawˬ˗oˬ htaˇ, awˬ moˍ geh kʼawꞈ shiˍ kʼawꞈ la ve yoˬ. Chi hkʼoˆ kaꞈ, yawˬ ehˉ oˇ ve teˇ hkeh naˬ ve meuꞈ ve kʼo, chiˇ taˆ piˇ ve, caˍ piˇ ve, leh hkʼa dehꞈ haꞈ shaˉ piˇ ve yoˬ. A shu teˇ gʼaˇ Hkriꞈ yaˇ awˬ moˍ hkʼaw mehˉ kʼai ve kʼo, nyi haꞈ shaˉ paˍ lehˬ “Gʼuiˬ sha ve yawˬ awˬ moˍ htaꞈ hkʼa dehꞈ” gʼa nyi haꞈ shaˉ ve yoˬ. (1 Peˍtruˆ 5:2, 3) Nyi haꞈ shaˉ paˍ yawˇ htaꞈ ca hpfuhˆ leh Hkriꞈ yaˇ awˬ moˍ hkʼaw shiˍ kʼawꞈ la tuˬ yoˬ. Yawˇ Yaˬhoˉvaˬ geh teˇ pawˆ kʼawꞈ meuˆ daꞈ la tuˬ hkʼa dehꞈ nyi haꞈ shaˉ piˇ ve yoˬ. *
11. Daꞈ ve yawˬ hawˉ shehˍ hpaˇ lehˬ aˬ htoꞈ ma htaꞈ shiˍ ve le?
11 Yawˬ hawˉ shehˍ hpaˇ lehˬ yawˬ mehˉ˗e la ve tehꞈ hkʼa dehꞈ shiˍ ve yoˬ. Awˬ moˍ hkʼaw mehˉ kʼai taˍ ve yawˬ htaꞈ yawˇ maˇ ciˍ yanˍ piˇ. Yaˬhoˉvaˬ yawˇ ve kanˉ te ve chaw htaꞈ hkʼaˬ hkʼe ga piˇ ve teˇ geh nyi sheˍ.
12. Yaˬhoˉvaˬ Yoˇnaˆ htaꞈ hkʼaˬ hkʼe ga piˇ ve le?
12 Tcuh kaˍ paˍ Yoˇnaˆ lehˬ yawˇ ve awˬ vuiˬ htaꞈ hpaw˗e ve yoˬ. Yaꞈ hkʼaˇ, Yaˬhoˉvaˬ yawˇ htaꞈ dawˇ law chehˇ sheˍ. Yaˬhoˉvaˬ lehˬ daꞈ jaˇ ve yawˬ hawˉ shehˍ hpaˇ hkʼe hpehꞈ ve yoˬ. Yoˇnaˆ awˬ gʼaˇ cawˬ tuˬ leh awˬ vuiˬ htaꞈ kʼawꞈ te tuˬ Yaˬhoˉvaˬ ga piˇ ve yoˬ. (Yoˇnaˆ 2:7; 3:1, 2) Peuˬ hkʼawꞈ nawˉ, chaw yaˇ teˇ gʼaˇ le le ve a shaꞈ awˬ hpfuhˇ hkʼaˬ hkʼe taw hkʼaˆ ve Yoˇnaˆ na gʼa tuˬ, Yaˬhoˉvaˬ suhˆ cehˬ ehˉ htaꞈ yehˇ leh maˍ piˇ ve yoˬ. (Yoˇnaˆ 4:10, 11) Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Nyi haꞈ shaˉ paˍ lehˬ awˬ viˉ awˬ nyi maˇ hto toˇ ve htaꞈ dawˇ law gʼa sheˍ. Aˬ htoꞈ ma te awˬ viˉ awˬ nyi oˇ ve teˇ gʼaˇ mehˉ kʼai ve htaꞈ gʼa na gʼa piˇ ve yoˬ. Kʼawꞈ la˗oˬ htaˇ, nyi haꞈ shaˉ paˍ hkʼa dehꞈ gʼa nyi haꞈ shaˉ piˇ ve yoˬ.
13. Chiˇ mvuh ve liꞈ 73 bvuhꞈ paˍ htaꞈ Yaˬhoˉvaˬ te piˇ ve ngaˬ hui htaꞈ hkʼaˬ hkʼe maˍ laˇ ve le?
13 Chiˇ mvuh ve liꞈ 73 bvuhꞈ paˍ, haiˬ ve chaw daꞈ ve awˬ ceuˬ gʼa ve htaꞈ mawˬ htaˇ, awˬ gʼaˇ nuˇ ve yoˬ. Gʼuiˬ sha kʼoˆ laˇ ve hkʼe gʼaꞈ te ve awˬ tehˬ awˬ na daꞈ˗aw laˇ tehꞈ, yawˇ htawˇ dawˇ nawˬ dawˇ cawˬ ve yoˬ. (Chiˇ mvuh ve 73:12, 13, 16) Leh Yaˬhoˉvaˬ hkʼaˬ hkʼe te ve le? Yaˬhoˉvaˬ yawˇ htaꞈ maˇ gʼa deˇ piˇ. Yaˬhoˉvaˬ lehˬ yawˇ ve tawˇ hkawˇ Liꞈ hpu hkʼaw cawˬ tcuh sheˍ ve yoˬ. Yaˬhoˉvaˬ geh meuˆ daꞈ ve leh a shaꞈ awˬ hpfuhˇ hkʼaˆ jaˇ ve tehꞈ awˬ leh meuˇ htaˇ Chiˇ mvuh ve liꞈ 73 bvuhꞈ paˍ na gʼa ve yoˬ. (Chiˇ mvuh ve 73:23, 24, 26, 28) Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Awˬ viˉ awˬ nyi Gʼuiˬ sha ve kanˉ te ve hkʼaˬ hkʼe daꞈ ve tehꞈ htawˇ dawˇ nawˬ dawˇ cawˬ htaˇ, nyi haꞈ shaˉ paˍ haˆ maˇ dawˇ cheˆ piˇ cawˇ. Nyi haꞈ shaˉ paˍ yawˇ htaꞈ deˇ piˇ ve aꞈ kehˉ aꞈ htoꞈ ma te yawˇ chi hkʼe dawˇ ve gʼa na gʼa piˇ cawˇ ve yoˬ. Chi hkʼe te htaˇ, nyi haꞈ shaˉ paˍ Liꞈ hpu hkʼaw yawˇ htaꞈ hawˍ daꞈ ve beˆ maˍ piˇ leh awˬ gʼaˇ piˇ gʼa ve yoˬ.
14. Aˬ htoꞈ ma te Eˇliˇyaꞈ ga laˇ tuˬ loˍ ve le? Leh Yaˬhoˉvaˬ yawˇ htaꞈ hkʼaˬ hkʼe ga piˇ ve le?
14 Tcuh kaˍ paˍ Eˇliˇyaꞈ jawˇ mawˇ ma Yeˍsaˍbeˍlaˆ htaꞈ hpaw˗e ve yoˬ. (1 Jawˇmawˇ 19:1-3) Yaˬhoˉvaˬ ve kanˉ te ve yawˇ teˇ gʼaˇ tiˉ leuˉ taˍ ve tehꞈ yawˇ dawˇ ve yoˬ. Yawˇ Yaˬhoˉvaˬ ve kanˉ te ve teꞈ chiˉ awˬ bon maˇ cawˬ tehꞈ yawˇ dawˇ ve yoˬ. Yawˇ awˬ gʼaˇ nuˇ leh suh˗e gaˇ ve yoˬ. (1 Jawˇmawˇ 19:4, 10) Yaˬhoˉvaˬ yawˇ htaꞈ deˇ piˇ ve aꞈ kehˉ yawˇ hkawˇ hkʼa dehꞈ na taˍ leh yawˇ te gʼa ve kanˉ cawˬ maˇ jaˇ sheˬ tehꞈ kʼoˆ piˇ ve yoˬ. Nawˬ teˇ gʼaˇ tiˉ chehˇ ve maˇ heˆ tehꞈ Gʼuiˬ sha yawˇ htaꞈ kʼoˆ piˇ leh yawˇ Gʼuiˬ sha ve kanˇ paˆ htaꞈ gʼaˇ va tuˬ ga piˇ ve yoˬ. Chi hkʼoˆ kaꞈ, Gʼuiˬ sha yawˇ htaꞈ awˬ vuiˬ awˬ suhˉ piˇ ve yoˬ. (1 Jawˇmawˇ 19:11-16, 18) Awˬ lawn chi ngaˬ hui htaꞈ hkʼaˬ hkʼe maˍ laˇ ve le? Ngaˬ hui leh nyi haꞈ shaˉ paˍ kaꞈ Gʼuiˬ sha ve yawˬ htaꞈ nuˇ nehˬ ve hkʼaw gʼa te piˇ ve yoˬ. Chaw oˇ ve teˇ gʼaˇ awˬ hpfuhˇ maˇ cawˬ leh Gʼuiˬ sha venˇ baˆ maˇ hpehˇ laˇ taˬ tehꞈ dawˇ leh beuꞈ ve htawˇ, nyi haꞈ shaˉ paˍ yawˇ kʼoˆ ve htaꞈ hkʼa dehꞈ gʼa na taˍ piˇ ve yoˬ. Leh Yaˬhoˉvaˬ yawˇ htaꞈ haꞈ leh awˬ hpfuhˇ cawˬ ve tehꞈ yawˇ yonˍ gʼa tuˬ ga piˇ ve yoˬ.
GʼUIˬ SHA VE YAWˬ MEHˉ KʼAI TAˍ VE HTAꞈ NGAˬ HUI HKʼAˬ HKʼE DAWˇ VE LE?
15. Yoˇhanˬ liꞈ 6:39 hkʼaw kʼoˆ taˍ ve hkʼe, Yeˍsuˆ Awˬ pa ve yawˬ mehˉ kʼai taˍ ve htaꞈ hkʼaˬ hkʼe dawˇ ve le?
15 Yaˬhoˉvaˬ ve yawˬ mehˉ kʼai taˍ ve, yawˇ ngaˬ hui htaꞈ hkʼaˬ hkʼe dawˇ tcuh gaˇ ve le? Awˬ lawn chi ve, Yeˍsuˆ htaꞈ ngaˬ hui henˇ yuˬ gʼa ve yoˬ. Yawˬ teˇ hkeh le le Yaˬhoˉvaˬ awˬ pon awˬ hpfuhˇ hkʼaˆ jaˇ ve tehꞈ Yeˍsuˆ shiˍ ve yoˬ. Hkʼe te leh, “mehˉ kʼai taˍ ve yawˬ” Gʼuiˬ sha geh kʼawꞈ kʼawꞈ la tuˬ Yeˍsuˆ te gʼa ve hkʼe teˇ ceuˬ le le te ve yoˬ. (Maꞈhtehˍ 15:24; Luˉkaꞈ 19:9, 10) Chi hkʼoˆ kaꞈ, Yeˍsuˆ lehˬ daꞈ ve yawˬ hawˉ shehˍ hpaˇ hpehꞈ ve yoˬ. Yaˬhoˉvaˬ ve yawˬ teˇ hkeh kaꞈ maˇ mehˉ kʼai tuˬ Yeˍsuˆ te gʼa ve hkʼe te ve yoˬ.—Yoˇhanˬ 6:39 gʼaw sheˍ.
16-17. Mehˉ kʼai taˍ ve chaw kʼawꞈ kʼawꞈ la gʼa tuˬ ga piˇ ve, nyi haꞈ shaˉ paˍ hkʼaˬ hkʼe dawˇ ve le? (Awˇ ceˍ awˇ fa “ Mehˉ kʼai taˍ ve yawˬ dawˇ ve” htaꞈ nyi sheˍ.)
16 Tcuh yaˇ Pawˇluꞈ Eˇfeˇsuꞈ Hkriꞈ yaˇ awˬ moˍ hkʼaw nyi haꞈ shaˉ paˍ Yeˍsuˆ htaꞈ henˇ yuˬ tuˬ awˬ gʼaˇ piˇ ve yoˬ. Yawˇ kʼoˆ ve, ‘nawˬ hui htawˇ awˬ gʼaˇ nuˇ ve chaw hui htaꞈ gʼa ga piˇ tuˬ, ngaˬ nawˬ hui htaꞈ te maˍ laˇ peuˬ. Piˇ ve lehˬ gʼa ve aꞈ kehˉ awˬ bon uiˍ ve yoˬ tehꞈ, Jawˇmawˇ Yeˍsuˆ kʼoˆ taˍ ve tawˇ hkawˇ htaꞈ dawˇ nawˇ tuˬ htawˇ, hkʼa peu˗eˬ awˬ hkʼaw lo ngaˬ nawˬ hui htaꞈ te maˍ laˇ peuˬ.’ (Tcuh yaˇ 20:17, 35) Nyi haꞈ shaˉ paˍ lehˬ a yeˇ uiˍ jaˇ ve awˬ vuiˬ cawˬ ve tehꞈ, chi teˇ tawn ngaˬ hui htaꞈ hkʼa tawˍ lehˆ hpeuꞈ maw laˇ ve yoˬ. Saˬpenˬ mvuhˇ miˬ lo nyi haꞈ shaˉ paˍ Sa˗va˗daw kʼoˆ ve, “Yaˬhoˉvaˬ yawˇ ve yawˬ htaꞈ hkʼaˬ hkʼe taw dawˇ haˍ ve ngaˬ dawˇ nyi htaˇ, yawˇ hui htaꞈ ga piˇ gʼa tuˬ ngaˬ te gʼa ve hkʼe teˇ ceuˬ le le te gaˇ ve yoˬ. Yaˬhoˉvaˬ yawˇ ve yawˬ htaꞈ hkʼa dehꞈ nyi haꞈ shaˉ tcuh gaˇ ve tehꞈ ngaˬ yonˍ gʼa ve yoˬ.”
17 Awˬ lawn chi ve hkʼaw mehˉ kʼai taˍ ve yawˬ hkʼe ve chaw teˇ gʼaˇ le le Yaˬhoˉvaˬ geh kʼawꞈ kʼawꞈ la˗oˬ. Leh chi teˇ hkui kaꞈ yawˇ hui hkʼe leˇ kʼawꞈ kʼawꞈ la gaˇ ve laiˉ gʼaˇ cawˬ sheˍ. Gʼuˇ suhˍ teˇ lawn hkʼaw yawˇ hui Yaˬhoˉvaˬ geh kʼawꞈ kʼawꞈ la gʼa tuˬ ngaˬ hui hkʼaˬ hkʼe ga piˇ gʼa ve teˇ geh henˇ tuˬ yoˬ.
KʼA MUIˬ HKAWˇ 139 Miˬ guiˬ awˬ suhˉ hkʼaw nawˬ ve a shaꞈ
^ Aˬ htoꞈ ma te awˬ viˉ awˬ nyi Yaˬhoˉvaˬ ve kanˉ te maw jaˇ˗oˬ ve, hto toˇ ve leh hpawnˬ daꞈ ve maˇ kʼai˗o ve le? Gʼuiˬ sha yawˇ hui htaꞈ hkʼaˬ hkʼe dawˇ ve le? Awˬ lawn chi ve hkʼaw hkʼawꞈ laˇ tuˬ yoˬ. Oˇ htaˇ teˇ co˗e, Yaˬhoˉvaˬ ve kanˉ te ve ka tiꞈ yeˬ ve chaw yawˇ htaꞈ teˇ tcuhˉ teˇ yanˇ vuiˇ daꞈ ve htaꞈ hkʼaˬ hkʼe ga piˇ ve kaꞈ henˇ tuˬ yoˬ.
^ KʼAWꞈ KʼOˆ MAˍ TAˍ VE: Hto toˇ ve maˇ kʼai˗o ve tcuhˉ kaiˬ lehˬ, hto toˇ ve awˬ naˍ riˍ 6 ha pa maˇ heˆ leh chi aꞈ kehˉ maw ve maˇ bvuhꞈ piˇ ve kʼoˆ gaˇ ve yoˬ. Chi hkʼe hpehꞈ ve htawˇ, yawˇ hui awˬ viˉ awˬ nyi hpehꞈ chehˇ sheˍ. Ngaˬ hui yawˇ hui htaꞈ haꞈ ve yoˬ.
^ Awˬ lawn chi ve hkʼaw awˬ meh teˇ hpaˍ hpaˍ pa ve.
^ Gʼuˇ suhˍ teˇ lawn hkʼaw nyi haꞈ shaˉ paˍ chi ve 3 ceuˬ htaꞈ hkʼaˬ hkʼe te gʼa tuˬ kʼoˆ maˍ laˇ tuˬ yoˬ.
^ AWˬ HAN HTAꞈ KʼOˆ MAˍ TAˍ VE: Iˉsaˍreˍlaˆ chaw yawˬ hawˉ paˍ mehˉ kʼai taˍ ve yawˬ htaꞈ dawˇ haˍ jaˇ ve. Yawˇ yawˬ htaꞈ ca hpfuhˆ leh awˬ moˍ geh kʼawꞈ kʼawꞈ la tuˬ ga piˇ ve. Chi beuꞈ teˇ co˗e nyi haꞈ shaˉ paˍ kaꞈ hkʼa shuˍ te chehˇ ve.
^ AWˬ HAN HTAꞈ KʼOˆ MAˍ TAˍ VE: Awˬ viˉ awˬ nyi yaˇ miˇ teˇ gʼaˇ maˇ hto toˇ˗o ve, chaw gʼawˬ caˇ ve kaˇ hkʼaw mui taˍ ve. Shaˉhkiˆhkanˍ ve chaw 2 gʼaˇ hawˉ hkʼaˆ teˇ gʼaˇ geh ha lehˬ ha kʼa chaw guiˇ kuiˬ lo hto maˍ piˇ chehˇ ve htaꞈ yawˇ gʼa mawˬ ve.
