AWˬ LAWN 26
“Ngaˬ geh kʼawꞈ hpfuhˆ kʼawꞈ la˗o”
“Ngaˬ geh kʼawꞈ hpfuhˆ kʼawꞈ la˗o. Oˇ hkʼe te ve kʼo, ngaˬ htawˇ nawˬ hui geh kʼawꞈ hpfuhˆ kʼawꞈ la tuˬ yoˬ.”—MAˍLAˍHKIˆ 3:7.
KʼA MUIˬ HKAWˇ 102 ‘Awˬ gʼaˇ nuˇ ve chaw hui htaꞈ ga piˇ˗oˆ’
HENˇ TUˬ VE TEˇ HPAˍ *
1. Mehˉ kʼai taˍ ve yawˬ teˇ hkeh kʼawꞈ kʼawꞈ la htaˇ Yaˬhoˉvaˬ hkʼaˬ hkʼe dawˇ ve le?
Peuˬ taˉ ve teˇ lawn hkʼaw ngaˬ hui henˇ kʼai peuˬ ve, daꞈ ve yawˬ hawˉ shehˍ hpaˇ yawˬ teˇ hkeh le le htaꞈ haꞈ pehnˇ ve hkʼaw nyi haꞈ shaˉ ve hkʼe, Yaˬhoˉvaˬ yawˇ awˬ to htaꞈ tehˆ taˍ ve yoˬ. Leh yawˇ mehˉ kʼai taˍ ve yawˬ htaꞈ ca hpfuhˆ ve yoˬ. Yaˬhoˉvaˬ yawˇ htaꞈ baˬ taˉ ve Iˉsaˍreˍlaˆ chaw htaꞈ kʼoˆ piˇ ve, “ngaˬ geh kʼawꞈ hpfuhˆ kʼawꞈ la˗o. Oˇ hkʼe te ve kʼo, ngaˬ htawˇ nawˬ hui geh kʼawꞈ hpfuhˆ kʼawꞈ la tuˬ yoˬ.” Gʼuiˬ sha kʼoˆ ve, “ngaˬ lehˬ, maˇ htaiˍ maˇ pa puiˉ ve [Yaˬhoˉvaˬ] hpehꞈ ve” tehꞈ ngaˬ hui shiˍ ve yoˬ. (Maˍlaˍhkiˆ 3:6, 7) Yeˍsuˆ kʼoˆ ve, mehˉ kʼai taˍ ve chaw kʼawꞈ kʼawꞈ la htaˇ Yaˬhoˉvaˬ leh mvuhˇ naw ma tcuh yaˇ ha lehˬ jaˇ.—Luˉkaꞈ 15:10, 32.
2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?
2 Yeˍsuˆ tawˇ pa haˉ 3 lawn htaꞈ tehˆ maˍ laˇ ve chi mehˉ kʼai taˍ ve chaw htaꞈ hkʼaˬ hkʼe te ga piˇ gʼa ve teˇ geh nyi sheˍ. Mehˉ kʼai taˍ ve yawˬ Gʼuiˬ sha geh kʼawꞈ kʼawꞈ la tuˬ ga piˇ gʼa ve ngaˬ hui cawˬ cawˇ ve te hkʼaˇ dawˇ hkʼaˇ htaꞈ teˇ geh henˇ tuˬ yoˬ. Maˇ hto toˇ˗o ve chaw kʼawꞈ hto toˇ la tuˬ, ngaˬ hui coˇ caˇ leh ga piˇ ve kʼo, ha lehˬ jaˇ ve kaꞈ henˇ tuˬ yoˬ.
MEHˉ KʼAI TAˍ VE HPU HTAꞈ CA HPFUHˆ VE
3-4. Luˉkaꞈ liꞈ 15:8-10 hkʼaw kʼoˆ taˍ ve yaˇ miˇ teˇ gʼaˇ lehˬ, aˬ htoꞈ ma te hpu teˇ htehꞈ mehˉ kʼai taˍ ve htaꞈ hkʼa dehꞈ ca hpfuhˆ ve le?
3 Yaˬhoˉvaˬ geh kʼawꞈ la gaˇ ve chaw htaꞈ ngaˬ hui coˇ caˇ leh gʼaꞈ ca ve yoˬ. Luˉkaꞈ ve ha lehˬ ve bon hkawˇ liꞈ hkʼaw yaˇ miˇ teˇ gʼaˇ awˬ hpfuhˆ hkʼaˆ ve hpu teˇ htehꞈ mehˉ kʼai ve tawˇ pa haˉ teˇ maˬ Yeˍsuˆ kʼoˆ ve yoˬ. Chi ve hkʼaw a yeˇ uiˍ jaˇ ve lehˬ yaˇ miˇ teˇ gʼaˇ yawˇ ve hpu mehˉ kʼai taˍ ve htaꞈ mawˬ tuˬ ca hpfuhˆ ve yoˬ.—Luˉkaꞈ 15:8-10 gʼaw sheˍ.
4 Yaˇ miˇ teˇ gʼaˇ awˬ hpfuhˇ hkʼaˆ jaˇ ve hpu htaꞈ mawˬ htaˇ hkʼaˬ hkʼe dawˇ ve htaꞈ Yeˍsuˆ kʼoˆ ve yoˬ. Yeˍsuˆ ve awˬ co˗e htaˇ, Iˉsaˍreˍlaˆ chaw yaˇ miˇ teˇ gʼaˇ awˬ hpawˇ heuˆ ve awˬ nyi htaˇ, teˇ pawˆ pawˆ kʼo, awˬ e yawˇ htaꞈ hpu teˇ chi htehꞈ piˇ ve yoˬ. Mehˉ kʼai taˍ ve hpu teˇ htehꞈ oˇ ve, yawˇ heuˆ daꞈ htaˇ awˬ e yawˇ htaꞈ piˇ taˍ ve yoˬ hehˉ. Chi htaꞈ pa taw, yawˇ hpu chi ve awˬ hpfuhˇ hkʼaˆ jaˇ ve tehꞈ shawˍ ve yoˬ. Yaˇ miˇ chi yawˇ ve yehˬ hkʼaw hpu ce ve tehꞈ dawˇ ve yoˬ. Chi htaꞈ pa taw, aˬ miˍ tuˉ leh ca ve yoˬ. Yaꞈ hkʼaˇ, gʼaˇ hteꞈ ca ve htawˇ, ca maˇ mawˬ sheˍ. Hpu oˇ ve htaꞈ mawˬ tuˬ yawˇ ve aˬ miˍ hkʼa dehꞈ maˇ ba ve pa taw maˇ mawˬ ve yoˬ hehˉ. Awˬ leh meuˇ htaˇ yawˇ yehˬ htaꞈ hkʼa dehꞈ shaw shiˆ ve yoˬ. Chi hkʼe te htaˇ, aˬ miˍ ba ve pa taw, awˬ hpfuhˇ hkʼaˆ ve hpu oˇ ve htaꞈ mawˬ ve yoˬ. Yawˇ mawˬ htaˇ ha lehˬ jaˇ leh awˬ chawˇ awˬ paˆ htaꞈ daꞈ ve awˬ lawn kʼoˆ piˇ ve yoˬ.
5. Aˬ htoꞈ ma te maˇ hto toˇ˗o ve chaw htaꞈ mawˬ tuˬ gʼa coˇ caˇ jaˇ ve le?
5 Yeˍsuˆ ve tawˇ pa haˉ htaꞈ ngaˬ hui dawˇ nyi htaˇ, mehˉ kʼai taˍ ve htaꞈ mawˬ tuˬ ngaˬ hui gʼa coˇ caˇ jaˇ. Chi ve hkʼa shuˍ, maˇ hto toˇ˗o ve chaw htaꞈ ngaˬ hui mawˬ tuˬ gʼa coˇ caˇ jaˇ. Peuˬ laˬ ve laiˉ hkʼawꞈ htaˇ yawˇ hui maˇ hto toˇ˗o ve yoˬ hehˉ. Yawˇ hui awˬ viˉ awˬ nyi maˇ shiˍ kuiˬ lo ca chehˇ˗e ve yoˬ hehˉ. Yaꞈ hkʼaˇ, maˇ hto toˇ˗o ve chaw laiˉ gʼaˇ chi teˇ hkui Yaˬhoˉvaˬ geh kʼawꞈ la gaˇ ve tehꞈ ngaˬ hui yonˍ ve yoˬ. Yawˇ awˬ viˉ awˬ nyi geh Yaˬhoˉvaˬ ve kanˉ teˇ geh kʼawꞈ te gaˇ leh yawˇ ngaˬ hui ga laˇ tuˬ htaꞈ loˍ ve yoˬ.
6. Maˇ hto toˇ˗o ve chaw htaꞈ Hkriꞈ yaˇ awˬ moˍ hkʼaw ve chaw teˇ gʼaˇ le le yawˇ htaꞈ hkʼaˬ hkʼe ga piˇ gʼa tuˬ le?
6 Maˇ hto toˇ˗o ve chaw htaꞈ a shu gʼa ga ca hpfuhˆ gʼa tuˬ le? Ngaˬ hui teˇ gʼaˇ le le ga gʼa ve yoˬ. Nyi haꞈ shaˉ paˍ, gʼuˇ suhˍ peuˍ ve chaw, leh awˬ viˉ awˬ nyi teˇ hpaˍ kaꞈ ca hpfuhˆ gʼa ve yoˬ. Nawˬ ve awˬ chawˇ maˇ heˆ leh awˬ suhˍ awˬ shaˍ hpawˇ ve awˬ viˉ awˬ nyi maˇ hto toˇ˗o ve chaw cawˬ˗aw laˇ? Nawˬ teˇ yehˬ peuˬ teˇ yehˬ maˇ heˆ leh chaw guiˇ kuiˬ lo hto toˇ htaˇ, maˇ hto toˇ˗o ve chaw htaꞈ mawˬ ve kʼo hkʼaˬ hkʼe te tuˬ ve le? Yawˇ htaꞈ caˉ daꞈ tuˬ chehˇ kuiˬ awˬ ti leh tawˇ yaw tuˬ nanˍ baꞈ nawˬ htaꞈ peꞈ laˇ ve kʼo, nawˬ nyi haꞈ shaˉ paˍ htaꞈ kʼoˆ piˇ gʼa ve yoˬ.
7. Nyi haꞈ shaˉ paˍ Htoˉmaꞈ kʼoˆ ve ngaˬ hui htaꞈ hkʼaˬ hkʼe maˍ laˇ ve le?
7 Maˇ hto toˇ˗o ve chaw Yaˬhoˉvaˬ geh kʼawꞈ kʼawꞈ la tuˬ ga piˇ tuˬ ve nyi haꞈ shaˉ paˍ awˬ vuiˬ cawˬ ve yoˬ. Hkʼaˬ hkʼe ga piˇ gʼa tuˬ le? Nyi haꞈ shaˉ paˍ Htoˉmaꞈ * kʼoˆ ve htaꞈ teˇ geh nyi sheˍ. Yawˇ Saˬpenˬ mvuhˇ miˬ lo chehˇ leh maˇ hto toˇ˗o ve chaw 40 gʼaˇ hpaˆ Yaˬhoˉvaˬ geh kʼawꞈ kʼawꞈ la tuˬ yawˇ ga piˇ ve yoˬ. Htoˉmaꞈ kʼoˆ ve, “awˉ lawˉ htaˇ maˇ hto toˇ˗o ve chaw chi teˇ hkui hkʼaˬ kaˬ lo chehˇ ve le tehꞈ, awˬ viˉ awˬ nyi laiˉ gʼaˇ htaꞈ na piˇ ve yoˬ. Maˇ hpawnˬ daꞈ la˗oˬ ve chaw htaꞈ tawnˇ gʼa˗aw laˇ tehꞈ, Hkriꞈ yaˇ awˬ moˍ hkʼaw awˬ viˉ awˬ nyi htaꞈ na piˇ ve yoˬ. Maˇ hto toˇ˗o ve chaw htaꞈ yawˇ hui kaꞈ teˇ gʼaˇ ga piˇ tuˬ awˬ vuiˬ cawˬ ve pa taw ha lehˬ jaˇ. Peuˬ leh maˇ hto toˇ˗o ve chaw teˇ gʼaˇ geh ngaˬ ca guiˇ˗e htaˇ, yawˇ htaꞈ caˉ daꞈ ve awˬ suhˍ awˬ shaˍ hpawˇ ve awˬ viˉ awˬ nyi leh yaˇ htaꞈ na piˇ ve yoˬ. Maˇ hto toˇ˗o ve chaw teˇ hpaˍ ve yaˇ oˇ htaˇ hto toˇ ve chaw hpehꞈ jaw ve naˍ maˇ shiˍ. Yawˇ hui Yaˬhoˉvaˬ geh kʼawꞈ la tuˬ ngaˬ hui kaꞈ ga piˇ gʼa ve yoˬ.”
YAˬHOˉVAˬ VE YAˇ MEHˉ KʼAI TAˍ VE HTAꞈ SHIˍ KʼAWꞈ LA VE
8. Luˉkaꞈ liꞈ 15:17-24 hkʼaw yaˇ venˇ baˆ dawˇ hpfuhˆ leh kʼawꞈ la htaˇ awˬ pa hkʼaˬ hkʼe te ve le?
8 Yaˬhoˉvaˬ ve yaˇ mehˉ kʼai taˍ ve htaꞈ ngaˬ hui ga piˇ tuˬ te hkʼaˇ dawˇ hkʼaˇ hkʼaˬ hkʼe ve cawˬ cawˇ ve le? Mehˉ kʼai taˍ ve yaˇ paˍ awˬ lawn Yeˍsuˆ tawˇ pa haˉ tehˆ maˍ laˇ ve htaꞈ teˇ geh nyi sheˍ. (Luˉkaꞈ 15:17-24 gʼaw sheˍ.) Yeˍsuˆ kʼoˆ ve, mehˉ kʼai taˍ ve yaˇ paˍ venˇ baˆ dawˇ hpfuhˆ leh aˉ hkʼaw kʼawꞈ˗e tuˬ dawˇ cheˆ ve yoˬ. Yaˇ paˍ vuiˇ kuiˬ lo kʼawꞈ la chehˇ ve htaꞈ awˬ pa gʼa mawˬ htaˇ, gʼuiˇ kʼai leh kʼuˉ taˍ ve lehˬ yawˇ htaꞈ hkʼa hkʼe taw haꞈ ve hpeuꞈ maw piˇ ve yoˬ. Yaˇ paˍ chi ve teˇ gʼaˇ yaꞈ jaˇ leh ngaˬ pa ve yaˇ tehꞈ kuˬ laˇ ve maˇ keunˍ tehꞈ dawˇ ve yoˬ. Yaˇ paˍ nyi ma hkʼaw cawˬ ve hkʼa peu˗eˬ kʼoˆ piˇ ve yoˬ. Awˬ pa kaꞈ ha kʼaˉ ve hkʼaw na taˍ piˇ ve yoˬ. Awˬ pa yaˇ paˍ awˬ pon hti caˇ hti dawˬ tuˬ gu leh daꞈ jaˇ ve aˉ poꞈ lonˉ haˆ haˆ yuˬ deh piˇ ve lehˬ yawˇ kʼawꞈ la ve htaꞈ awˬ pa awˬ tehˬ awˬ na haꞈ yuˬ ve tehꞈ hpeuꞈ maw piˇ ve yoˬ. Awˬ ceˬ hkʼe haꞈ yuˬ piˇ ve maˇ heˆ. Haꞈ ve yaˇ paˍ hkʼe haꞈ yuˬ piˇ ve yoˬ.
9. Maˇ hto toˇ˗o ve leh maˇ hpawnˬ daꞈ la˗o ve chaw htaꞈ ngaˬ hui ga piˇ gʼa tuˬ, te hkʼaˇ dawˇ hkʼaˇ hkʼaˬ hkʼe ve gʼa cawˬ cawˇ ve le? (Awˇ ceˍ awˇ fa “ Yaˬhoˉvaˬ geh kʼawꞈ la gaˇ ve chaw htaꞈ hkʼaˬ hkʼe ga piˇ gʼa tuˬ le?”)
9 Yaˬhoˉvaˬ lehˬ tawˇ pa haˉ chi ve hkʼaw awˬ pa hkʼe hpehꞈ ve yoˬ. Maˇ hto toˇ˗o ve leh maˇ hpawnˬ daꞈ la˗o ve chaw htaꞈ Gʼuiˬ sha haꞈ ve pa taw, kʼawꞈ kʼawꞈ la tcuh gaˇ ve yoˬ. Ngaˬ hui Yaˬhoˉvaˬ htaꞈ henˇ yuˬ ve kʼo, yawˇ hui htaꞈ ga piˇ gʼa ve yoˬ. Yaꞈ hkʼaˇ, ngaˬ hui yeunˇ hkanˍ ve, ha kʼaˉ puiˉ ve, leh haꞈ pehnˇ ve tehꞈ gʼa hpeuꞈ maw piˇ ve yoˬ. Yawˇ hui htaꞈ ga piˇ tuˬ aˬ htoꞈ ma te, te hkʼaˇ dawˇ hkʼaˇ chi ve teˇ hpaˍ a yeˇ uiˍ jaˇ ve le? Leh ngaˬ hui te hkʼaˇ dawˇ hkʼaˇ chi ve teˇ hpaˍ hkʼaˬ hkʼe te hpeuꞈ maw piˇ gʼa tuˬ le?
10. Maˇ hto toˇ˗o ve leh maˇ hpawnˬ daꞈ la˗o ve chaw Yaˬhoˉvaˬ geh kʼawꞈ la tuˬ aˬ htoꞈ ma te ngaˬ hui yeunˇ hkanˍ cawˇ ve le?
10 Chaw teˇ gʼaˇ Yaˬhoˉvaˬ geh kʼawꞈ la tuˬ awˬ yanˇ gʼa yehˇ maw ve pa taw, ngaˬ hui yeunˇ hkanˍ cawˇ ve yoˬ. Yaˬhoˉvaˬ ve kanˉ maˇ te˗o ve chaw laiˉ gʼaˇ kʼoˆ ve, yawˇ hui Yaˬhoˉvaˬ geh kʼawꞈ la gʼa tuˬ nyi haꞈ shaˉ paˍ leh awˬ viˉ awˬ nyi yawˇ hui geh laiˉ pawˆ guiˇ la ve yoˬ. Aˍshaˆ miˬ guiˬ awˬ hawˉ hpawˇ lo chehˇ ve awˬ viˉ awˬ nyi Nehnˉsiˍ kʼoˆ ve, “Hkriꞈ yaˇ awˬ moˍ hkʼaw ngaˬ ve awˬ chawˇ teˇ gʼaˇ ga laˇ jaˇ. Yawˇ ngaˬ htaꞈ awˬ viˉ ma hkʼe haꞈ laˇ ve yoˬ. Oˇ htaˇ ngaˬ hui daꞈ ve awˬ lawn teˇ geh te ve dawˇ nawˇ tuˬ yawˇ ga laˇ ve yoˬ. Ngaˬ nyi ma hkʼaw cawˬ ve yawˇ htaꞈ kʼoˆ maˍ piˇ leh yawˇ hkʼa dehꞈ na taˍ leh beˆ maˍ laˇ haˆ ve yoˬ. Yawˇ ngaˬ ve awˬ chawˇ hpehꞈ leh ngaˬ loˍ ve teˇ pawˆ le le ga laˇ ve yoˬ.”
11. Nyi ma luˬ ve chaw htaꞈ ga piˇ tuˬ aˬ htoꞈ ma te ngaˬ hui ha kʼaˉ puiˉ ve chaw hpehꞈ cawˇ ve le?
11 Shu ngaˬ hui htaꞈ maˇ daꞈ ve te laˇ ve pa taw nyi ma naˬ ve lehˬ, naˬ ve htaꞈ kʼawꞈ naˬ tuˬ te laˇ ve hkʼe hpehꞈ ve yoˬ. Ha kʼaˉ puiˉ ve nyi ma cawˬ ve lehˬ, hpehˇ yawˇ hkʼe hpehꞈ leh naˬ ve htaꞈ na˗e la leh nyi ma sha la tuˬ te laˇ gʼa ve yoˬ. Maˇ hto toˇ˗o ve leh maˇ hpawnˬ daꞈ la˗o ve awˬ viˉ awˬ nyi teˇ hpaˍ, peuˬ taˉ ve laiˉ hkʼawꞈ htaˇ shu yawˇ htaꞈ maˇ daꞈ ve te piˇ ve pa taw nyi ma naˬ chehˇ sheˍ ve yoˬ. Chi htaꞈ pa taw, yawˇ hui Yaˬhoˉvaˬ geh maˇ kʼawꞈ la gaˇ tuˬ te piˇ ve yoˬ. Teˇ hpaˍ kʼo, yawˇ hui htaꞈ maˇ hteˇ maˇ cawˇ ve te laˇ ve tehꞈ dawˇ ve yoˬ. Hkʼe te leh yawˇ hui kʼoˆ maˍ laˇ htaˇ, na piˇ tuˬ loˍ ve yoˬ. (Yaˍkoˆ 1:19) Maˇ hto toˇ˗o ve leh maˇ hpawnˬ daꞈ la˗o ve hpehꞈ jaw ve Maˍriˆ kʼo ve, “ngaˬ hawˬ htaˇ, na laˇ tuˬ, awˬ gʼaˇ peꞈ laˇ tuˬ, ngaˬ htaꞈ shaˍ tiꞈ peꞈ laˇ tuˬ, ngaˬ loˍ htaˇ ga laˇ tuˬ ve chaw htaꞈ loˍ ve yoˬ.”
12. Yaˬhoˉvaˬ lehˬ haꞈ pehnˇ ve aˉ hkeh htaꞈ hkʼaˬ hkʼe shuˍ ve le?
12 Yaˬhoˉvaˬ yawˇ ve chaw htaꞈ haꞈ ve lehˬ, aˉ hkeh htaꞈ shuˍ ve tehꞈ Liꞈ hpu hkʼaw kʼoˆ taˍ ve yoˬ. Aˬ htoꞈ ma te chi hkʼe hpehꞈ ve le? Tawˇ pa haˉ chi htaꞈ dawˇ nyi sheˍ. Nawˬ laˇ tsuhˇ gʼuiˬ hkʼaw iˉ kaˆ kʼa chehˇ ve htaꞈ dawˇ nyi sheˍ. Chaw teˇ gʼaˇ nawˬ htaꞈ iˉ kaˆ lawehˇ tuˬ ve aˉ poꞈ baˬ peu laˇ ve htaꞈ dawˇ nyi sheˍ. Nawˬ iˉ kaˆ maˇ kʼa tuˬ ga laˇ ve pa taw, ha lehˬ jaˇ. Iˉ kaˆ kuˇ jaˇ ve pa taw nawˬ gʼa ponˬ tuˬ ve maˇ heˆ. Nawˬ iˉ kaˆ hkʼaw chehˇ sheˍ ve kʼo, suh˗e tuˬ yoˬ. Chaw teˇ gʼaˇ nawˬ htaꞈ aˉ hkeh baˬ peu laˇ leh heuˇ caˉ hkʼaw gʼawˬ taˆ laˇ htaˇ hehꞈ nawˬ gʼa ponˬ ve yoˬ. Yaˬhoˉvaˬ htaꞈ baˬ taˉ ve Iˉsaˍreˍlaˆ chaw htaꞈ kʼoˆ piˇ ve, “haꞈ pehnˇ ve awˬ hkʼaw lo ngaˬ yawˇ hui htaꞈ kuˬ yuˬ ve yoˬ.” (Hawˇseˍ 11:4) Chi beuꞈ teˇ co˗e, Yaˬhoˉvaˬ ve kanˉ maˇ te˗o ve chaw shoꞈ shaꞈ ve gʼa hpuˇ leh dawˇ haˍ chehˇ ve chaw htaꞈ, Yaˬhoˉvaˬ chi hkʼe kuˬ piˇ ve yoˬ. Gʼuiˬ sha yawˇ hui htaꞈ haꞈ jaˇ leh yawˇ geh shiˍ kʼawꞈ la gaˇ ve tehꞈ yawˇ hui htaꞈ shiˍ tcuh gaˇ ve yoˬ. Gʼuiˬ sha yawˇ hui htaꞈ haꞈ chehˇ sheˍ ve tehꞈ shiˍ tuˬ Gʼuiˬ sha ngaˬ hui htaꞈ yehˇ gʼa ve yoˬ.
13. Ngaˬ hui shu htaꞈ haꞈ ve pa taw, Yaˬhoˉvaˬ ve kanˉ teˇ pawˆ kʼawꞈ te gaˇ tuˬ Hpa˗lo ve awˬ lawn ngaˬ hui htaꞈ hkʼaˬ hkʼe maˍ laˇ ve le?
13 Maˇ hto toˇ˗o ve leh maˇ hpawnˬ daꞈ la˗o ve chaw Yaˬhoˉvaˬ leh ngaˬ hui yawˇ hui htaꞈ haꞈ jaˇ ve tehꞈ shiˍ tcuh tuˬ ngaˬ hui kʼoˆ ve leh te ve a yeˇ uiˍ jaˇ. Peuˬ taˉ ve teˇ lawn hkʼaw Hpa˗lo Gʼuiˬ sha ve kanˉ maˇ te˗o ve 30 hkʼawꞈ hpaˆ gaˬ˗oˬ ve kʼoˆ ve, “teˇ shawˉ htaˇ ngaˬ aˉ hkʼaw tawˆ˗e te htaˇ, awˬ viˉ awˬ nyi chaw mawˇ ma teˇ gʼaˇ htaꞈ mawˬ daꞈ ve yoˬ. Yawˇ haꞈ lu diˬ jaˇ. Yawˇ nuˇ nehˬ ve hkʼaw ngaˬ htaꞈ tawˇ yaw laˇ ve yoˬ. Ngaˬ huiˉ maˬ tawˇ yaw daꞈ htaˇ ngaˬ hawˬ ve yoˬ. Ngaˬ yawˇ htaꞈ kʼoˆ piˇ ve, Yaˬhoˉvaˬ nawˬ ngaˬ geh peu laˇ ve yoˬ. Oˇ ve teˇ yanˇ, ngaˬ Yaˬhoˉvaˬ ve kanˉ teˇ pawˆ kʼawꞈ te tuˬ dawˇ cheˆ ve yoˬ.”
AWˬ GʼAˇ NUˇ VE CHAW HTAꞈ HAꞈ PEHNˇ VE HKʼAW GA PIˇ VE
14. Luˉkaꞈ liꞈ 15:4, 5 hkʼaw ve tawˇ pa haˉ yawˬ hawˉ paˍ yawˬ htaꞈ mawˬ peuˬ hkʼawꞈ nawˉ yawˇ hkʼaˬ hkʼe te ve le?
14 Maˇ hto toˇ˗o ve leh maˇ hpawnˬ daꞈ la˗o ve chaw htaꞈ ngaˬ hui mawˬ peuˬ hkʼawꞈ nawˉ caˉ leh gʼa kʼawꞈ ga piˇ ve yoˬ. Mehˉ kʼai ve yaˇ paˍ awˬ lawn Yeˍsuˆ tehˆ ve hkʼa shuˍ, yawˇ hui nyi ma hkʼaw naˬ sheˍ ve pa taw, gu na˗e piˇ tuˬ awˬ yanˇ gʼa yehˇ ve yoˬ. Saˍtanˍ ve miˬ guiˬ yawˇ hui htaꞈ te piˇ ve awˬ ceuˬ kaꞈ awˬ gʼaˇ nuˇ ve pa taw, oˇ htaˇ hkʼe leˇ Yaˬhoˉvaˬ geh maˇ meuˆ daꞈ˗oˬ. Yawˇ hui Yaˬhoˉvaˬ htaꞈ yonˍ tuˬ ngaˬ hui gʼa ga piˇ ve yoˬ. Mehˉ kʼai taˍ ve yawˬ Yeˍsuˆ tawˇ pa haˉ tehˆ maˍ laˇ ve lehˬ, yawˬ hawˉ paˍ yawˇ ve yawˬ htaꞈ mawˬ tuˬ awˬ yanˇ gʼa yehˇ maˇ jaˇ. Yawˬ htaꞈ mawˬ˗oˬ htaˇ yawˬ awˬ gʼaˇ maˇ cawˬ leh, awˬ moˍ geh yawˇ hkʼaˇ yawˇ kʼawꞈ la maˇ gʼa ve tehꞈ yawˇ shiˍ ve yoˬ. Hkʼe te leh, yawˇ yawˬ htaꞈ taˆ kʼawꞈ la ve yoˬ.—Luˉkaꞈ liꞈ 15:4, 5 gʼaw sheˍ.
15. Awˬ gʼaˇ nuˇ ve chaw Yaˬhoˉvaˬ geh kʼawꞈ la gaˇ ve htaꞈ ngaˬ hui hkʼaˬ hkʼe ga piˇ gʼa tuˬ le? (Awˇ ceˍ awˇ fa “ Laꞈ caˉ awˬ hpfuhˇ hkʼaˆ jaˇ ve”) htaꞈ nyi sheˍ.
15 Maˇ hto toˇ˗o ve leh maˇ hpawnˬ daꞈ la˗o ve chaw Yaˬhoˉvaˬ geh kʼawꞈ la gaˇ ve htawˇ, haˍ jaˇ tehꞈ dawˇ ve chaw htaꞈ ngaˬ hui ga piˇ tuˬ gʼa coˇ caˇ ve yoˬ. Yaꞈ hkʼaˇ, chi hkʼe ceh maˇ heˆ. Daꞈ kehˬ ve Awˬ ha hpu, Liꞈ hpu, leh Gʼuiˬ sha ve kanˉ hkʼaˇ hkʼaw ve liꞈ teˇ hpaˍ cawˬ ve pa taw, yawˇ hui Yaˬhoˉvaˬ geh kʼawꞈ meuˆ daꞈ la tuˬ, ngaˬ hui ga piˇ gʼa ve yoˬ. (Roˉmaꞈ 15:1) Ngaˬ hui hkʼaˬ hkʼe te gʼa tuˬ le? Nyi haꞈ shaˉ paˍ teˇ gʼaˇ kʼoˆ ve, “maˇ hto toˇ˗o ve leh maˇ hpawnˬ daꞈ la˗o ve chaw Yaˬhoˉvaˬ geh kʼawꞈ la gaˇ ve kʼo, maˇ˗awˍ ve chaw Liꞈ hpu teˇ pawˆ gʼa kʼawꞈ henˇ ve yoˬ.” * Maˇ hto toˇ˗o ve leh maˇ hpawnˬ daꞈ la˗o ve chaw geh Liꞈ hpu maˍ piˇ tuˬ nyi haꞈ shaˉ paˍ nawˬ htaꞈ lawˬ laˇ ve kʼo, chi lehˬ daꞈ jaˇ ve laꞈ shawnˍ hpehꞈ ve tehꞈ dawˇ taˍ sheˍ. Nyi haꞈ shaˉ paˍ chi teˇ gʼaˇ kʼoˆ sheˍ ve, “daꞈ ve awˬ chawˇ, yawˇ yonˍ gʼa ve, yawˇ ve dawˇ hkʼaˇ kʼoˆ maˍ piˇ htaˇ nyi ma sha ve chaw gʼa hpehꞈ piˇ ve yoˬ.”
MVUHˇ NAW MA HKʼOˆ LEH MIˬ GUIˬ HKʼOˆ HA LEHˬ VE
16. Mvuhˇ naw ma tcuh yaˇ ngaˬ hui htaꞈ ga laˇ tuˬ hkʼaˬ hkʼe te shiˍ gʼa ve le?
16 Maˇ hto toˇ˗o ve leh maˇ hpawnˬ daꞈ la˗o ve chaw Yaˬhoˉvaˬ geh kʼawꞈ kʼawꞈ la gaˇ ve chaw htaꞈ ngaˬ hui ca mawˬ tuˬ mvuhˇ naw ma tcuh yaˇ ga laˇ ve tehꞈ hpeuꞈ maw piˇ ve laiˉ ceuˬ cawˬ ve yoˬ. (Hpeuꞈ maˍ ve 14:6) Iˬkoˬ˗e˗dawˇ lo chehˇ ve Si˗vi˗o ve awˬ lawn htaꞈ teˇ geh nyi sheˍ. Yaˬhoˉvaˬ geh kʼawꞈ la gaˇ ve pa taw, yawˇ geh peu laˇ leh ga laˇ tuˬ bon lawˬ chehˇ htaˇ, nyi haꞈ shaˉ paˍ 2 gʼaˇ gaˬ la ve yoˬ. Oˇ teˇ nyi Si˗vi˗o Yaˬhoˉvaˬ geh kʼawꞈ la tuˬ nyi haꞈ shaˉ paˍ ga piˇ ve yoˬ.
17. Maˇ hto toˇ˗o ve leh maˇ hpawnˬ daꞈ la˗o ve chaw htaꞈ ga piˇ ve ngaˬ hui hkʼaˬ hkʼe dawˇ tuˬ le?
17 Yaˬhoˉvaˬ geh kʼawꞈ la tuˬ ngaˬ hui ga piˇ htaˇ ha lehˬ jaˇ. Maˇ hto toˇ˗o ve chaw htaꞈ ga piˇ tuˬ gʼuˇ suhˍ peuˍ ve Saˬveˇdoˬ kaꞈ dawˇ cawˇ jaˇ. Yawˇ kʼoˆ ve, “maˇ hto toˇ˗o ve chaw htaꞈ ga piˇ leh Yaˬhoˉvaˬ geh kʼawꞈ la ve htaꞈ ngaˬ dawˇ nyi htaˇ ha lehˬ leh mehˆ gʼuiˬ yaꞈ la ve yoˬ. Yaˬhoˉvaˬ haꞈ ve yawˬ teˇ hkeh Saˍtanˍ ve miˬ guiˬ hkʼaw tawˆ la tuˬ ga piˇ ve ngaˬ kaꞈ Yaˬhoˉvaˬ geh kanˉ teˇ geh gʼa te ve ha lehˬ jaˇ.”—Tcuh yaˇ 20:35.
18. Nawˬ maˇ hto toˇ˗o ve chaw hpehꞈ ve kʼo, hkʼaˬ hkʼe ve htaꞈ yonˍ gʼa tuˬ le?
18 Nawˬ maˇ hto toˇ˗o ve chaw hpehꞈ ve kʼo, Yaˬhoˉvaˬ nawˬ htaꞈ haꞈ chehˇ sheˍ ve tehꞈ yonˍ gʼa ve yoˬ. Nawˬ htaꞈ Yaˬhoˉvaˬ geh kʼawꞈ la tcuh gaˇ ve yoˬ. Nawˬ Yaˬhoˉvaˬ geh kʼawꞈ la tuˬ teˇ ceuˬ ceuˬ gʼa te ve yoˬ. Yaˬhoˉvaˬ lehˬ Yeˍsuˆ ve tawˇ pa haˉ tehˆ maˍ laˇ ve awˬ pa hkʼe hpehꞈ ve yoˬ. Yawˇ nawˬ htaꞈ dawˇ law chehˇ sheˍ leh nawˬ kʼawꞈ la ve htaꞈ yawˇ ha lehˬ ha kʼa haꞈ yuˬ laˇ tuˬ yoˬ.
KʼA MUIˬ HKAWˇ 103 Yawˬ hawˉ shehˍ hpaˇ lehˬ laꞈ shawnˍ hpehꞈ ve
^ Maˇ hto toˇ˗o ve leh maˇ hpawnˬ daꞈ la˗o ve chaw htaꞈ Yaˬhoˉvaˬ yawˇ geh kʼawꞈ kʼawꞈ la tcuh gaˇ ve yoˬ. “Ngaˬ geh kʼawꞈ hpfuhˆ kʼawꞈ la˗o” tehꞈ Yaˬhoˉvaˬ kʼoˆ ve chi htaꞈ haꞈ yuˬ gaˇ ve chaw htaꞈ ngaˬ hui laiˉ ceuˬ ga piˇ gʼa ve yoˬ. Yawˇ hui htaꞈ hkʼaˬ hkʼe ga piˇ gʼa ve awˬ lawn chi ve hkʼaw teˇ geh henˇ tuˬ yoˬ.
^ Awˬ lawn chi ve hkʼaw awˬ meh teˇ hpaˍ hpaˍ pa ve.
^ Maˇ hto toˇ˗o ve leh maˇ hpawnˬ daꞈ la˗o ve chaw geh a shu teˇ gʼaˇ Liꞈ hpu maˍ piˇ keunˍ ve, nyi haꞈ shaˉ paˍ awˬ moˍ hkʼaw caˉ daꞈ paˍ leuˆ ve yoˬ. Maˇ hto toˇ˗o ve leh maˇ hpawnˬ daꞈ la˗o ve chaw geh maˍ piˇ tuˬ liꞈ kʼoˆ Gʼuiˬ sha hkʼaˬ htaˆ kaꞈ haꞈ laˇ tuˬ hkʼaˬ hkʼe gʼa te ve le? hkʼaw ve teˇ hpaˍ maˍ piˇ keunˍ ve yoˬ. Chaw teˇ hpaˍ kʼo liꞈ kʼoˆ Yaˬhoˉvaˬ geh meuˆ daꞈ˗oꞈ hkʼaw ve teˇ hpaˍ maˍ piˇ keunˍ ve yoˬ.
^ AWˬ HAN HTAꞈ KʼOˆ MAˍ TAˍ VE: Awˬ viˉ awˬ nyi hawˉ hkʼaˆ 3 gʼaˇ Yaˬhoˉvaˬ geh kʼawꞈ la gaˇ ve chaw htaꞈ coˇ caˇ leh ga piˇ ve. Yawˇ hui chi hkʼe te ve lehˬ yawˇ htaꞈ teˇ hkui teˇ hkui caˉ daꞈ leh yawˇ htaꞈ haꞈ chehˇ sheˍ ve chaw cawˬ ve tehꞈ yonˍ tcuh leh yawˇ tawˇ yaw htaˇ ha kʼaˉ ve hkʼaw na taˍ piˇ ve.
