Pawˇluꞈ kʼoˆ ve, “ngaˬ lehˬ Gʼuiˬ sha htaꞈ caˉ daꞈ ve teˇ hpawˇ lo gʼa teꞈ tuˬ, awˬ liˇ tawˇ hkawˇ htaꞈ caˉ daꞈ ve teˇ hpawˇ lo, awˬ liˇ tawˇ hkawˇ awˬ hawˉ lo ngaˬ suh ve yoˬ.”—Gaˍlaˍtiˆ 2:19.

Gaˍlaˍtiˆ mvuhˇ miˬ awˬ hkʼaw lo chehˇ ve Hkriꞈ yaˇ awˬ moˍ teˇ hpaˍ htaꞈ Liꞈ hpu awˬ tawn chi htaꞈ caˉ daꞈ ve a yeˇ uiˍ ve teˇ hpaˍ Pawˇluꞈ yawˇ hui htaꞈ gʼa kʼawꞈ kʼoˆ piˇ ve yoˬ. Chaw yaˇ gʼa ponˬ gaˇ ve kʼo, yawˇ hui Moˉseˍ ve awˬ liˇ tawˇ hkawˇ awˬ guiˬ meuˇ shoˍ ve htaꞈ gʼa gʼaꞈ te ve tehꞈ chaw teˇ hpaˍ maˍ yaꞈ ve yoˬ. Leh awˬ viˉ awˬ nyi teˇ hpaˍ kaꞈ maˇ daꞈ ve dawˇ hkʼaˇ chi hkʼe ve heuˆ la kuiˬ cawˬ ve yoˬ. Gʼuiˬ sha lehˬ Hkriꞈ yaˇ htaꞈ awˬ guiˬ meuˇ maˇ kʼawꞈ shoˍ tcuh ve tehꞈ Pawˇluꞈ shiˍ ve yoˬ. Hkʼe te leh, maˍ ve oˇ ve yaꞈ ve tehꞈ Pawˇluꞈ hkʼa tawˍ lehˆ beˆ maˍ piˇ ve yoˬ. Yeˍsuˆ htaiˍ hkʼawꞈ laˇ ve awˬ hpfuhˇ htaꞈ awˬ viˉ awˬ nyi yonˍ maˇ la tuˬ yawˇ ga piˇ ve yoˬ.—Gaˍlaˍtiˆ 2:4; 5:2.

Suh˗oˬ ve chaw lehˬ teꞈ chiˉ maˇ shiˍ˗oˬ tehꞈ, Liꞈ hpu hkʼaw hkʼa tawˍ lehˆ kʼoˆ laˇ ve yoˬ. Ngaˬ hui awˬ paˇ awˬ kui lo hpehꞈ chehˇ ve awˬ ceuˬ teˇ hpaˍ kaꞈ yawˇ hui htaꞈ heuˆ kuiˬ teꞈ chiˉ maˇ cawˬ. (Cuˇ yiˍ piˇ ve 9:5) Chi htaꞈ pa taw Pawˇluꞈ kʼoˆ ve, “awˬ liˇ tawˇ hkawˇ awˬ hawˉ lo ngaˬ suh ve yoˬ.” Yawˇ kʼoˆ gaˇ ve lehˬ, Moˉseˍ ve awˬ liˇ tawˇ hkawˇ yawˇ htaꞈ heuˆ la kuiˬ maˇ cawˬ. Awˬ tehˬ kʼo, yawˇ htaiˍ hkʼawꞈ ve awˬ hpfuhˇ htaꞈ yonˍ ve pa taw, ‘Gʼuiˬ sha htaꞈ caˉ daꞈ ve teˇ hpawˇ lo teꞈ’ chehˇ ve yoˬ.

Moˉseˍ ve “awˬ liˇ tawˇ hkawˇ awˬ hawˉ lo” Pawˇluꞈ suh ve htawˇ, Gʼuiˬ sha htaꞈ caˉ daꞈ ve teˇ hpawˇ lo hkʼaˬ hkʼe te yawˇ teꞈ chehˇ ve le? Chi awˬ gʼuˇ suhˍ Pawˇluꞈ kʼoˆ maˍ laˇ ve hkʼaˬ nyiˇ tawn maˇ gaˬ sheˍ ve awˬ hkʼoˆ kaꞈ, “chaw teˇ gʼaˇ hteˇ ve cawˇ ve chaw hpehꞈ la ve lehˬ, awˬ liˇ tawˇ hkawˇ htaꞈ caˉ daꞈ ve kanˉ teˇ hpaˍ htaꞈ te ve pa taw maˇ heˆ. Yeˍsuˆ Hkriꞈ htaꞈ yonˍ ve pa taw” yoˬ. (Gaˍlaˍtiˆ 2:16) Moˉseˍ ve awˬ liˇ tawˇ hkawˇ gʼa cawˬ cawˇ ve a yeˇ uiˍ jaˇ ve htaꞈ teˇ geh nyi sheˍ. Awˬ lawn chi ve Pawˇluꞈ Gaˍlaˍtiˆ mvuhˇ miˬ hkʼaw ve awˬ viˉ awˬ nyi htaꞈ kʼoˆ piˇ ve, “ka tiꞈ htaꞈ gʼa tuˬ ve awˬ ceuˬ awˬ hkʼaˇ oˇ ve teˇ gʼaˇ maˇ gaˬ la sheˍ ve ceh ceh, te yaꞈ te jiˆ ve teˇ hpaˍ tawˆ la tuˬ awˬ liˇ tawˇ hkawˇ” hkʼa tawˍ lehˆ gʼa mawˬ ve yoˬ. (Gaˍlaˍtiˆ 3:19) Maˇ biˇ ve chaw yaˇ Moˉseˍ ve awˬ liˇ tawˇ hkawˇ htaꞈ hkʼa biˇ te biˇ maˇ gʼa ve tehꞈ hkʼa tawˍ lehˆ gʼa mawˬ ve yoˬ. Hkʼe te leh, yawˇ hui biˇ ve tuˉ tanˇ tuˬ htaꞈ loˍ ve yoˬ. Awˬ liˇ tawˇ hkawˇ chi ve lehˬ chaw yaˇ htaꞈ “awˬ kaˍ te shehˍ hpaˇ” geh shiˍ kʼai laˇ ve yoˬ. Chi lehˬ Yeˍsuˆ htaꞈ kʼoˆ gaˇ ve yoˬ. Chaw yaˇ Yeˍsuˆ htaꞈ yonˍ ve tehꞈ hpeuꞈ maw piˇ ve kʼo, yawˇ Gʼuiˬ sha haꞈ yuˬ gʼa ve chaw teˇ gʼaˇ hpehꞈ gʼa ve yoˬ. (Gaˍlaˍtiˆ 3:24) Moˉseˍ ve awˬ liˇ tawˇ hkawˇ htaꞈ pa taw, Yeˍsuˆ htaiˍ hkʼawꞈ laˇ ve gʼa cawˬ cawˇ ve tehꞈ Pawˇluꞈ shiˍ ve yoˬ. Yawˇ Yeˍsuˆ htaꞈ haꞈ yuˬ leh yonˍ˗oˬ htaˇ, yawˇ kaꞈ Gʼuiˬ sha haꞈ yuˬ gʼa ve chaw hpehꞈ ve yoˬ. Pawˇ luꞈ ‘awˬ liˇ tawˇ hkawˇ awˬ hawˉ lo suh’ ve leh “Gʼuiˬ sha htaꞈ caˉ daꞈ ve teˇ hpawˇ lo gʼa teꞈ” ve yoˬ. Hkʼe htaꞈ pa taw, Moˉseˍ ve awˬ liˇ tawˇ hkawˇ Pawˇluꞈ awˬ hkʼoˆ kanˇ paˆ maˇ cawˬ. Yaꞈ hkʼaˇ, Gʼuiˬ sha ceh tiˉ yawˇ awˬ hkʼoˆ kanˇ paˆ cawˬ ve yoˬ.

Chi htaꞈ pa taw, Pawˇluꞈ Roˉmaꞈ venˇ hkʼaw ve awˬ viˉ awˬ nyi htaꞈ kaꞈ liꞈ hkʼa shuˍ bvuhꞈ piˇ ve yoˬ. Yawˇ kʼoˆ ve, ‘awˬ viˉ awˬ nyi teˇ hpaˍ˗oˬ, chi hkʼa shuˍ shuˍ nawˬ hui Hkriꞈ ve awˬ to geh teˇ geh suh peuˬ ve pa taw, awˬ liˇ tawˇ hkawˇ htaꞈ maˇ kʼawꞈ caˉ daꞈ. Ngaˬ hui awˬ liˇ tawˇ hkawˇ htaꞈ ponˬ peuˬ. Ponˬ laˬ htaˇ ngaˬ hui htaꞈ hpehꞈ tiˍ taˍ ve teˇ ceuˬ htaꞈ ngaˬ hui suh taˉ peuˬ ve pa taw yoˬ.’ (Roˉmaꞈ 7:4, 6) Liꞈ hpu awˬ tawn chi ve leh Gaˍlaˍtiˆ liꞈ 2:19 hkʼaw chaw yaˇ Moˉseˍ ve awˬ liˇ tawˇ hkawˇ htaꞈ maˇ gʼaꞈ te ve pa taw suh ve maˇ heˆ tehꞈ, Pawˇluꞈ kʼoˆ ve htaꞈ ngaˬ hui hkʼa tawˍ lehˆ gʼa mawˬ ve yoˬ. Yaꞈ hkʼaˇ, ponˬ laˇ ve htaꞈ yawˇ kʼoˆ gaˇ ve yoˬ. Awˬ liˇ tawˇ hkawˇ chi yawˇ awˬ hkʼoˆ kanˇ paˆ maˇ cawˬ leh, yawˇ hkʼa shuˍ ve Hkriꞈ yaˇ awˬ hkʼoˆ htawˇ kanˇ paˆ maˇ cawˬ. Yawˇ hui Yeˍsuˆ htaiˍ hkʼawꞈ ve htaꞈ yonˍ ve pa taw ponˬ piˇ ve htaꞈ gʼa ve yoˬ.